1 сентября.

Канон преподобному Мисаилу Абалакского

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глас 3:

Це́ркви усе́рдный служи́телю,/ па́стырем ве́рный помо́щниче,/ отроко́м му́дрый наста́вниче,/ стра́ждущим благоду́шный уте́шителю,/ житие́ в труде́х свяще́нных провожда́л еси́/ и блаже́нное упокое́ние восприя́л еси́,/ преподо́бне о́тче Мисаи́ле,// моли́ Христа́ Бо́га спасти́ся душа́м на́шим.

Ин тропа́рь, глас 2:

Це́ркве Христо́вы свети́льниче,/ Абала́кския оби́тели засту́пниче,/ гра́да Тобо́льска пресла́вное украше́ние,/ преподо́бне о́тче Мисаи́ле,/ моли́ Христа́ Бо́га// спасти́ся душа́м на́шим.

Кано́н, глас 8.

Песнь 1

Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

Припе́в: Преподо́бне о́тче Мисаи́ле, моли́ Бо́га о нас.

О Иису́се Сладча́йший, Све́те ми́ра! Да́ждь ми ра́зум и си́лу, да досто́йно с любо́вию воспою́ по́двиги уго́дника Твоего́, преподо́бнаго Мисаи́ла Абала́кскаго.

Припе́в: Преподо́бне о́тче Мисаи́ле, моли́ Бо́га о нас.

Те́пле в моли́тве Го́сподеви предстоя́ и в послуша́нии роди́телем благоче́стию навы́кнув, к животу́ ве́чному устреми́лся еси́, сла́ву Бо́гови воспева́я.

Слава: Человеколю́бца Христа́ от ю́ности возлю́бив, при́сно о́ком серде́чным к Нему́ взира́л еси́. Те́мже, к ли́ку преподо́бных причте́н быв, ны́не на Небеси́ Изба́вителя и Бо́га воспева́еши.

И ныне: Ева́нгельския за́поведи исполня́ти мя наста́ви, молю́ Тя, Пречи́стая Де́во, испра́ви мя, заблу́ждшаго умо́м, и стра́сти пло́ти моея́ утоли́, да сла́влю Бо́га во ве́ки.

Песнь 3

Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,// и пое́т Тя дух мой.

Припе́в: Преподо́бне о́тче Мисаи́ле, моли́ Бо́га о нас.

Преподо́бне о́тче Мисаи́ле, о́браз ве́рным явля́я, са́ном иере́йским почте́н был еси́ и служе́ние непоро́чное Бо́гу и Це́ркви соверша́л еси́. Те́мже тя ны́не ублажа́ем.

Припе́в: Преподо́бне о́тче Мисаи́ле, моли́ Бо́га о нас.

Ра́дуйся, о́тче Мисаи́ле, ты бо, плотски́я стра́сти и прило́ги бесо́вския победи́в, я́ко луч све́та Боже́ственнаго во оби́тели Абала́кской просия́л еси́.

Слава: Егда́ возложи́ша на тя бра́тия послуша́ние и́ноческое во оби́тели Абала́кстей, тогда́ со смире́нием и лю́бовию им послужи́л еси́, Христу́ подража́я. Моли́ся и нам в соверше́нном послуша́нии Бо́гу пребыва́ти.

И ныне: Про́мыслом Свои́м вся ко бла́гу направля́я, Госпо́дь Ма́терь Свою́ дарова́ в по́мощь и заступле́ние лю́дем земли́ Сиби́рския. Ея́же моли́твами, Иису́се Христе́, сподо́би и нас путь земна́го жития́ во благоче́стии соверша́ти и Ца́рствия Небе́снаго дости́гнути.

Седа́лен, глас 4.

О́тче преподо́бне Мисаи́ле, ко стяжа́нию Боже́ственныя благода́ти путь твой направля́я, плотско́е мудрова́ние ду́хови покори́л еси́ и, и́ноческия обе́ты до́бре исполня́я, о́браз благоче́стия бра́тии яви́л еси́. Сего́ ра́ди тя усе́рдно прославля́ем.

Сла́ва, и ны́не, Богоро́дичен:

Де́во Богоро́дице, стена́ непобеди́мая нам, христиа́ном, еси́, к Тебе́ бо прибега́юще, невреди́ми пребыва́ем и, па́ки согреша́юще, и́мамы Тя Моли́твенницу. Тем благодаря́ще вопие́м Ти: ра́дуйся, Влады́чице, Ми́лостивая о нас пред Бо́гом Засту́пнице.

Песнь 4

Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.

Припе́в: Преподо́бне о́тче Мисаи́ле, моли́ Бо́га о нас.

Служе́ние церко́вное ре́вностне соверша́я, насле́дник го́рняго Ца́рствия с Вы́шними Си́лами яви́лся еси́. Те́мже во благоче́стии укрепи́ всех, чту́щих па́мять твою́.

Припе́в: Преподо́бне о́тче Мисаи́ле, моли́ Бо́га о нас.

Неуста́нно пред чудотво́рным о́бразом Бо́жия Ма́тере Абала́кским моли́лся еси́ и плод духо́вный в ми́ре, ра́дости и любви́ прине́сл еси́, Засту́пницу усе́рдную ро́да христиа́нскаго прославля́я.

Слава: Еди́ному и́стинному Бо́гу усе́рдне послужи́в, преподо́бне о́тче, да́ра благода́ти Ду́ха Свята́го сподо́бился еси́. Те́мже и ны́не всем, призыва́ющим тя, по́мощь благовре́менне подае́ши.

И ныне: Многопло́дная ни́ва духо́вная су́щи, Присноде́во, из бразды́ Клас спаси́тельный ми́ру израсти́ла еси́, всю тварь Пита́ющаго, Бо́га вся́ческих.

Песнь 5

Ирмос: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,// ра́зве Тебе́ ино́го не ве́мы.

Припе́в: Преподо́бне о́тче Мисаи́ле, моли́ Бо́га о нас.

Иере́й благогове́йный архиере́йскаго до́ма быв, блаже́нне, со слеза́ми моле́ния Христу́ Бо́гу пред престо́лом возноси́л еси́. Помоли́ся и о нас, свя́тче Бо́жий.

Припе́в: Преподо́бне о́тче Мисаи́ле, моли́ Бо́га о нас.

Со смире́нием послуша́ние исполня́я, дух ми́рен в се́рдцы стяжа́л еси́. Помози́ и нам, о́тче, сего́ да́ра сподо́битися и земно́е по́прище до́бре соверши́ти.

Слава: А́нгельски на земли́ пожи́в, кро́тостию же и смире́нием Бо́гу угоди́в, о́браз благоче́стия лю́дем Тобо́льским яви́л еси́, на спаси́тельный путь доброде́тели наставля́я.

И ныне: Исцели́ неду́гующаго ума́ моего́ омраче́ние, Врача́ ро́ждшая, Христа́, Всенепоро́чная Влады́чице, и стра́ждущую ду́шу благода́тию Бо́жиею озари́.

Песнь 6

Ирмос: Моли́тву пролию́ ко Го́споду,/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся, я́ко Ио́на:// от тли, Бо́же, возведи́ мя.

Припе́в: Преподо́бне о́тче Мисаи́ле, моли́ Бо́га о нас.

Любо́вию Христо́вою уязви́вся, апо́стольски не́мощи бли́жних носи́л еси́, преподо́бне, вы́ну моля́ся ко Го́споду и не прилага́я се́рдца к попече́нию жите́йскому.

Припе́в: Преподо́бне о́тче Мисаи́ле, моли́ Бо́га о нас.

Еди́наго на потре́бу взыску́я, блаже́нне о́тче, к слу́жбе Бо́жией усе́рдне прилежа́л еси́ и же́ртву безкро́вную умо́м неколе́блемым за лю́ди приноси́л еси́.

Слава: Мона́шескаго жития́ усе́рдный рачи́тель быв, преподо́бне, а́нгельскому житию́ поревнова́л еси́ и ны́не с Небе́сными Си́лами мо́лишися о всех, почита́ющих тя.

И ныне: О Де́во Пречи́стая, Влады́чице, поми́луй, и изба́ви мя вся́каго лука́вствия, и озлобле́ния, и ве́чнаго муче́ния.

Конда́к, глас 3:

Лю́дие гра́да Тобо́льска почита́ют тя, о́тче Мисаи́ле,/ я́ко па́стыря до́браго и моли́твенника неусы́пнаго,/ подви́жника терпели́внаго и наста́вника смире́ннаго,/ Це́ркви Христо́ве в житии́ свое́м усе́рдне послужи́вшаго,/ ны́не же во оби́телех Небе́сных моля́щагося// о спасе́нии душ на́ших.

И́кос:

И́ноческое житие́ возлюби́в, преподо́бне, мирска́я наслажде́ния отве́ргл еси́ и, я́ко свети́льник Бо́жия благода́ти просия́в, во благоче́стии мно́гия лю́ди утверди́л еси́. Те́мже помина́й нас, чту́щих святу́ю па́мять твою́, да зове́м ти: ра́дуйся, земли́ Сиби́рския благода́тный свети́льниче; ра́дуйся, гра́да Тобо́льска пресла́вная похвало́. Ра́дуйся, оби́тели Абала́кския ре́вностный подви́жниче; ра́дуйся, преподо́бне о́тче Мисаи́ле, те́плый моли́твенниче о душа́х на́ших.

Песнь 7

Ирмос: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.

Припе́в: Преподо́бне о́тче Мисаи́ле, моли́ Бо́га о нас.

Богослуже́бное пе́ние возлюби́в, ре́вностне и благогове́йно Бо́га сла́вил еси́, о́тче, и ны́не со А́нгелы пое́ши: оте́ц на́ших Бо́же, благослове́н еси́.

Припе́в: Преподо́бне о́тче Мисаи́ле, моли́ Бо́га о нас.

От ю́ных лет мно́гия тру́ды и по́двиги подъе́м и боле́зни теле́сныя претерпе́в, преподо́бне, ны́не в дому́ Бо́жием доброде́тельми духо́вными благоуха́еши, со А́нгелы поя́: оте́ц на́ших Бо́же, благослове́н еси́.

Слава: Глаго́лы Бо́жия со усе́рдием лю́дем Тобо́льским пропове́дал еси́, Мисаи́ле блаже́нне, вся науча́я по во́ли Бо́жией жи́ти и воспева́ти: оте́ц на́ших Бо́же, благослове́н еси́.

И ныне: Арха́нгельский глас вопие́м Ти, Чи́стая: ра́дуйся, Благода́тная, Госпо́дь с Тобо́ю, и Тобо́ю с на́ми, пою́щими: оте́ц на́ших Бо́же, благослове́н еси́.

Песнь 8

Ирмос: Богоглаго́ливии о́троцы в пещи́/ со огне́м пла́мень попира́юще, поя́ху:// благослови́те, дела́ Госпо́дня, Го́спода.

Припе́в: Преподо́бне о́тче Мисаи́ле, моли́ Бо́га о нас.

О насле́дниче Боже́ственных селе́ний! Ты доброде́тельно и чи́сто на земли́ пожи́л еси́. Те́мже со А́нгелы ны́не лику́ет дух твой.

Припе́в: Преподо́бне о́тче Мисаи́ле, моли́ Бо́га о нас.

Ма́терь Бо́жию усе́рдно почи́тая, пред ико́ною Ея́ Абала́кскою моле́ние те́плое непреста́нно возноси́л еси́. И ны́не Цари́цу Небесе́ и земли́ со все́ми святы́ми прославля́еши.

Слава: На одре́ боле́зни блаже́нную кончи́ну прие́м, о́тче преподо́бне, в го́рняя селе́ния пресели́лся еси́, иде́же мо́лиши Христа́ Бо́га о душа́х на́ших.

И ныне: Еди́наго Бо́га, сотво́ршаго небеса́ воле́ю, Его́же не вмеща́ет не́бо, Богоро́дице, я́ко ши́ршая небе́с, вмести́ла еси́, слове́сное не́бо и одушевле́нное.

Песнь 9

Ирмос: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к.// Те́мже Пречи́стую Богоро́дицу ве́рнии велича́ем.

Припе́в: Го́споди, Иису́се Христе́ Бо́же наш, поми́луй нас.

Го́споди, Иису́се Христе́, благода́тную по́мощь ще́дро источа́еши моли́твами преподо́бнаго Мисаи́ла всем, ве́рою чту́щим святу́ю па́мять его́.

Припе́в: Преподо́бне о́тче Мисаи́ле, моли́ Бо́га о нас.

Ра́дуйся, земли́ Сиби́рския благода́тный свети́льниче, я́ко насле́довал еси́ оби́тели Небе́сныя. Те́мже и нас моли́твами твои́ми сия́ улучи́ти сподо́би.

Еди́ну мысль име́я, е́же по́двигом до́брым Христа́ ра́ди подвиза́тися, око́вы страсте́й сокруши́л еси́. И нас немощны́х от уз грехо́вных разреши́ моли́твами твои́ми, Мисаи́ле блаже́нне.

Слава: Шу́ия ча́сти изба́ви нас, Го́споди, на Стра́шнем Суди́щи Твое́м моли́твами преподо́бнаго Мисаи́ла и всех святы́х, в земли́ Сиби́рстей просия́вших.

И ныне: Ны́не просвети́ сердца́ на́ша, Де́во Чи́стая, при́сно омрача́емая жите́йскими страстьми́, и не оста́ви нас враго́м лука́вым в поноше́ние, да ра́достно сла́вим Тя, Всепе́тая.

Свети́лен:

Естество́м челове́к быв, а́нгельски на земли́ пожи́л еси́ и, я́ко луч со́лнечный, в стране́ Сиби́рстей возсия́л еси́, преподо́бне Мисаи́ле. Ны́не же, Свет невече́рний созерца́я, моли́ спасти́ся душа́м на́шим.

Моли́тва

О богому́дре о́тче Мисаи́ле! Ты, и́стиннаго Па́стыря Христа́ за́поведи ре́вностне исполня́я, вся́кое пра́здное весе́лие возненави́дел еси́ и, от си́лы в си́лу восходя́, житие́ твое́ в труде́х свяще́нных и послуша́нии и́ночестем провожда́л еси́. Те́мже мы, ве́дуще о да́нной ти благода́ти, со смире́нием припа́даем ти и взыва́ем: моли́ся о нас ко Го́споду Иису́су Христу́ и Пречи́стей Его́ Ма́тери, о е́же сохрани́ти страну́ на́шу в ми́ре и благоде́нствии, па́стырем до́брое попече́ние о лю́дех име́ти, отроко́м послуша́ние и прилежа́ние в уче́нии дарова́ти, нам же всем в ве́ре, благоче́стии и взаи́мной любви́ ти́хое и безмяте́жное житие́ провожда́ти, да, спасе́ние улучи́вше, единоду́шно воспое́м в Тро́ице сла́вимаго Бо́га, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.