1 сентября.

Канон святому мученику Андрею Стратилату и с ним двум тысячам пяти сот девяноста трем.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь свята́го, гла́с 5:

Земна́го са́на сла́ву оста́вив, небе́сное Ца́рство насле́довал еси́, кро́вными ка́плями, я́ко пречу́дным ка́мением, нетле́нныя венцы́ украси́л еси́ и ко Христу́ приве́л еси́ собо́р страстоте́рпец. С ли́ки Ангельскими в невече́рнем све́те незаходи́маго Со́лнца Христа́ обре́л еси́, свя́те Андре́е Стратила́те, Его́же моли́ с пострада́вшими с тобо́ю при́сно, да спасе́т ду́ши на́ша.

Кано́н свята́го. Гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святый мучениче Андрее, моли́ Бо́га о нас.

Пе́ти свяще́нное твое́ торжество́ усе́рдствующаго, све́тлыми Ду́ха заря́ми ду́шу мою́ озари́ и мглу́ отжени́ неве́дения, му́чениче сла́вне.

Припев: Святый мучениче Андрее, моли́ Бо́га о нас.

Му́ченик бога́тно све́тлостьми, блаже́нне, обогати́лся еси́, мужему́дренно си́лою боже́ственною попра́л еси́ льсти́ваго и победи́тель бы́в, му́чениче великоимени́те Андре́е.

Сла́ва Отцу́ и Сы́ну и Свято́му Ду́ху:

Умертви́в я́же на земли́ мудрова́ния, му́чениче многострада́льне, умертви́вшемуся Сло́ву тебе́ ра́ди му́жески после́довал еси́ и к жи́зни неги́бнущей сме́ртию премину́л еси́.

И ны́не и при́сно и во ве́ки веко́в. Ами́нь.

Богородичен: Иже в пло́ть за премно́гую бла́гость из Тебе́, Всенепоро́чная, на спасе́ние все́м челове́ком вои́стинну обле́кся, Бо́г вку́пе и Челове́к, сугу́б естество́м познава́ется.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Святый мучениче Андрее, моли́ Бо́га о нас.

Ве́трилом Креста́ напа́сти препла́вая пучи́ну, враги́, сла́вне, струя́ми твои́х крове́й погрузи́л еси́.

Припев: Святый мучениче Андрее, моли́ Бо́га о нас.

Собла́зн лука́ваго и того́ хи́тростей превы́ше, я́ко победи́тель изря́ден, му́чениче, бы́в, просла́вился еси́.

Сла́ва Отцу́ и Сы́ну и Свято́му Ду́ху:

Украша́емь благоле́пия венце́м, му́чениче Христо́в, всегда́ со избра́нными му́ченики в ра́дости предстои́ши.

И ны́не и при́сно и во ве́ки веко́в. Ами́нь.

Богородичен: Избавля́ющаго челове́ки от мучи́тельства вра́жия, родила́ еси́ все́х Го́спода, Влады́чице, Де́во Всенепоро́чная.

Седа́лен, гла́с 1.

Му́жеством ду́шу укрепля́я, му́чениче, потреби́л еси́ вра́жие кре́пкое суровство́, и, ра́дуяся, пострада́л еси́, и Бо́гу угоди́л еси́. Те́мже вси́ пресвяту́ю твою́ па́мять пра́зднуем весе́лием се́рдца, Андре́е пребога́те.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святый мучениче Андрее, моли́ Бо́га о нас.

Яко сте́ну кре́пку, тя́ Це́рковь стяжа́вши, прему́дре, вра́жиими сопроти́вными прило́ги непреклони́ма явля́ется, зову́щи: сла́ва си́ле Твое́й, Го́споди.

Припев: Святый мучениче Андрее, моли́ Бо́га о нас.

Боже́ственными уче́нии укрепи́в му́ченический по́лк, я́коже воево́да, те́лу я́ко растли́тися, сла́вне, хотя́щу пощади́тися ника́коже повину́л еси́.

Яко ору́жием, вооружи́вся му́жеством, и, я́коже мече́м обоюдуо́стрым, Андре́е преблаже́нне, Кресто́м Честны́м враги́ потреби́л еси́, я́коже воево́да до́блественнейший.

Сла́ва Отцу́ и Сы́ну и Свято́му Ду́ху:

Тя́, побо́рника ве́ры, восхваля́ем, я́ко страда́льца непобеди́ма, и небе́сныя све́тлости прича́стника, и исто́чника, источа́юща во́ды чуде́с тре́бующим.

И ны́не и при́сно и во ве́ки веко́в. Ами́нь.

Богородичен: Восхваля́ем Тя́, похвало́ му́чеников и ве́рных спасе́ние, вси́ челове́честии ро́ди, Пренепоро́чная: Бо́га бо родила́ еси́, пребы́вши Де́ва нетле́нна.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святый мучениче Андрее, моли́ Бо́га о нас.

Му́жества и́стиннаго бы́в тезоимени́т, отгна́л еси́ враги́ твоя́, и до конца́, Андре́е всеблаже́нне, потреби́л еси́.

Припев: Святый мучениче Андрее, моли́ Бо́га о нас.

Во́ды ве́рным исцеле́ний всегда́, прехва́льне, источа́еши, спаси́тельною благода́тию обогати́в духо́вною.

Сла́ва Отцу́ и Сы́ну и Свято́му Ду́ху:

Протече́ во всю́ зе́млю вои́стинну, богодухнове́нне, хвала́ твои́х чуде́с и честна́го муче́ния, сия́ние Боже́ственныя благода́ти.

И ны́не и при́сно и во ве́ки веко́в. Ами́нь.

Богородичен: Ору́жия врага́ ны́не до конца́ оскуде́ша, ро́ждши Тебе́, Богоро́дице, копие́м Уя́звеннаго и ми́р Обно́вльша.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святый мучениче Андрее, моли́ Бо́га о нас.

Притупи́л еси́ лука́ваго жа́ла боле́зньми твои́ми и к неболе́зненней сла́ве преста́вился еси́, ра́дуяся, му́чениче Андре́е, Стратила́те му́ченических честны́х полко́в.

Припев: Святый мучениче Андрее, моли́ Бо́га о нас.

Кровьми́ ма́лыми измени́л еси́ све́тлость ве́чнующия сла́вы, и ра́дость, никогда́же престаю́щую, и венцы́ небе́сныя, и сия́ние невече́рнее.

Сла́ва Отцу́ и Сы́ну и Свято́му Ду́ху:

Во́инство многочи́сленное, му́чениче, собра́в, и лико́м Ангельским приче́л еси́, блаже́нне, с тобо́ю страда́вшее, ра́достно Влады́це все́х предстоите́.

И ны́не и при́сно и во ве́ки веко́в. Ами́нь.

Богородичен: Родила́ еси́ неизглаго́ланно Отцу́ Собезнача́льнаго, уподо́бльшася челове́ком, па́че ума́ и сло́ва, Богороди́тельнице: Его́же моли́ изба́витися от бе́д рабо́м Твои́м.

Конда́к свята́го, гла́с 2:

В моли́твах Го́сподеви предстоя́, я́коже звезда́ со́лнцу предтеки́й, и жела́емое сокро́вище Ца́рствия узре́л еси́, ра́дости неизрече́нныя исполня́яся. Безсме́ртному Царю́ в безконе́чныя ве́ки, от Ангел безпреста́ни хвали́мому, пое́ши, Андре́е Стратила́те. С ни́миже моли́ся непреста́нно о все́х на́с.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святый мучениче Андрее, моли́ Бо́га о нас.

Струя́ми кро́вными исто́чник истещи́ сотвори́л еси́, вся́ческих неду́г, му́чениче, я́ко вои́стинну боле́знь исцеля́ющь, приступа́ющим к тебе́ несумне́нною ве́рою, богодохнове́нне.

Припев: Святый мучениче Андрее, моли́ Бо́га о нас.

Святы́х собо́р Пресвято́му Сло́ву, му́дре му́чениче, приве́л еси́ кро́вию, жи́знь нестаре́емую насле́довал еси́, с ни́миже моли́ о на́с Христа́ Человеколю́бца.

Сла́ва Отцу́ и Сы́ну и Свято́му Ду́ху:

Боже́ственною ре́вностию твои́ми кровьми́ багряни́цу себе́, му́чениче, обагри́в и в сию́ оде́явся, все́ми Ца́рствующему сца́рствуеши ны́не, побе́дным венце́м украша́емь.

И ны́не и при́сно и во ве́ки веко́в. Ами́нь.

Богородичен: Яже челове́ки па́че естества́ Боже́ственным Рождество́м Твои́м, Де́во, проявле́нно обожи́вши, я́ко Бо́га неизрече́нно вопло́щши, благослове́на Ты́ в жена́х еси́, Пренепоро́чная Влады́чице.

Пе́снь 8.

Ирмос: Ру́це распросте́р Дании́л, / львов зия́ния в ро́ве затче́; / о́гненную же си́лу угаси́ша, / доброде́телию препоя́савшеся, / благоче́стия рачи́тели, о́троцы, взыва́юще: / благослови́те вся дела́ Госпо́дня, Го́спода.

Припев: Святый мучениче Андрее, моли́ Бо́га о нас.

Льво́в ди́виих стремле́ния удержа́л еси́, сла́вне, тве́рдыми по́двиги твои́ми, мучи́телей безбо́жных шата́ния Боже́ственною си́лою смири́л еси́ и победи́тель к небесе́м, вопия́, восте́кл еси́: благослови́те, вся́ дела́ Госпо́дня, Го́спода.

Припев: Святый мучениче Андрее, моли́ Бо́га о нас.

Святы́х све́тлости ви́дети и жи́ти в ра́дости, му́чениче, сподо́бился еси́, подви́гся, до́блественне, и сконча́в по́двиг тво́й ме́чным усекнове́нием. И ны́не вопие́ши с весе́лием: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

К боже́ственному притека́юще хра́му, боже́ственнаго му́ченика све́т прии́мем и, ра́це прикаса́ющеся всегда́ моще́й сего́, ра́дующеся, свяще́ние пода́тельно благода́ти прии́мше, вопие́м: вся́ дела́, благослови́те, Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Свята́я Де́во, Яже Бо́га Пресвята́го свя́то поро́ждши, Его́же вси́ святи́и му́ченицы на суди́щи испове́даша, освяще́ние и просвеще́ние на́м низпосли́, вопию́щим: вся́ дела́, благослови́те, Госпо́дня, Го́спода.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святый мучениче Андрее, моли́ Бо́га о нас.

Се́ светоза́рна страстоте́рпца па́мять просия́ светоно́сно, тму́ де́монскую отгоня́щи, ве́рныя же вся́ просвеща́ющи, сию́ све́тло соверша́ем, сего́ досто́йно велича́юще.

Припев: Святый мучениче Андрее, моли́ Бо́га о нас.

Яви́лся еси́, я́ко со́лнце ве́лие, посреди́, Андре́е, стра́ждущих с тобо́ю, си́х к невече́рнему сия́нию небе́сныя све́тлости наставля́я словесы́ твои́ми, с ни́миже тя́ ве́рою ублажа́ем.

Тя́, све́тлостию чуде́с всю́ просвеща́ющаго тва́рь, тя́, неукло́нным муче́нием Це́ркви столпа́ бы́вша и ве́рным утвержде́ние, му́чениче Андре́е, велича́ем.

Сла́ва Отцу́ и Сы́ну и Свято́му Ду́ху:

Процве́л еси́ посреди́ рая́ страда́лец, я́коже ши́пок, нося́ та́йно благово́ние, и обвеселя́ ве́рных исполне́ние, и смра́д, всему́дре, пре́лести отгоня́ Боже́ственною благода́тию.

И ны́не и при́сно и во ве́ки веко́в. Ами́нь.

Богородичен: Нося́щи Христа́ на руку́, ма́нием нося́щаго вся́, Сего́ моли́ руки́ мя́ чужда́го изба́вити, Влады́чице, правосла́вною ве́рою Тя́ непреста́нно велича́юща.

Молитва мученику Андрею Стратилату

Святый мучениче Андрее Стратилате, призри с Небеснаго чертога на требующих твоея помощи и не отвергни прошений наших, но, яко присный благодетель и ходатай наш, моли Христа Бога, да, человеколюбив и многомилостив Сый, сохранит нас от всякаго лютаго обстояния: от труса, потопа, огня, меча, нашествия иноплеменников и междоусобныя брани. Да не осудит нас, грешных, по беззакониям нашим, и да не во зло обратим благая, даруемая нам от Всещедраго Бога, но во славу святаго имене Его и в прославление крепкаго твоего заступления. Да молитвами твоими даст нам Господь мир помыслов, воздержание от пагубных страстей и от всякия скверны, и да укрепит во всем мире Свою Единую Святую Соборную и Апостольскую Церковь, юже стяжал есть Честною Своею Кровию. Молися прилежно, святый мучениче, да благословит Христос Бог державу нашу, да утвердит во Святей Своей Православней Церкви живый дух правыя веры и благочестия, да вси члены ея, чистии от суемудрия и суеверия, духом и истиною покланяются Ему и усердно пекутся о соблюдении Его заповедей, да мы вси в мире и благочестии поживем в настоящем веце и достигнем блаженныя вечныя жизни на Небеси благодатию Господа нашего Иисуса Христа, Емуже подобает всякая слава, честь и держава со Отцем и Святым Духом, ныне, и присно, и во веки веков. Аминь.