Шрифт

19 сентября.

Канон воспоминанию чуда Архистратига Михаила, бывшего в Хонех (Колоссах).

Воспоминанию чуда Архистратига Михаила, бывшего в Хонех
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Небе́сных во́инств архистрати́же, мо́лим тя́ при́сно мы́, недосто́йнии, да твои́ми моли́твами огради́ши на́с кро́вом кри́л невеще́ственныя твоея́ сла́вы, сохраня́я на́с, припа́дающих приле́жно и вопию́щих: от бе́д изба́ви на́с, я́ко чинонача́льник вы́шних си́л.

Канон арха́нгела. Гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Архистратиже Божий Михаиле, моли́ Бо́га о нас.

Боже́ственными светлостьми́ облистава́емь всегда́, у́м мо́й озари́, е́же воспе́ти тя́, архистрати́же го́рних во́инств, все́х утвержде́ние притека́ющих к тебе́.

Припев: Архистратиже Божий Михаиле, моли́ Бо́га о нас.

Ум Пребезнача́льный преми́рнаго чинонача́льника показа́ чи́на, тя́ пресла́вне архистрати́же, и све́т су́щих во тме́, и боже́ственное украше́ние Це́ркве Своея́.

Сла́ва Отцу́ и Сы́ну и Свято́му Ду́ху:

Умо́в предваря́я небе́сных в Ду́се, до́льним же, всеизря́днейше, Михаи́ле, да́лся еси́ огражде́ние, и утвержде́ние, и ору́жие, враги́ закала́ющее и потребля́ющее.

И ны́не и при́сно и во ве́ки веко́в. Ами́нь.

Богородичен: Де́во Всенепоро́чная, Яже Ангелов благоле́пие, челове́ков по́моще, Ты́ мне́ помози́, морепла́вающему и в бу́ри греха́ при́сно впа́дающу и бе́дствующу.

Пе́снь 3.

Ирмос: Не му́дростию и си́лою и бога́тством хва́лимся, но Тобо́ю, Отчею Ипоста́сною Му́дростию, Христе́; не́сть бо свя́т па́че Тебе́, Человеколю́бче.

Припев: Архистратиже Божий Михаиле, моли́ Бо́га о нас.

Кре́постию боже́ственною, воево́до Ангелов всехва́льне, обхо́диши всю́ зе́млю, от лю́тых ны́ изыма́я, призыва́ющия твое́ боже́ственное и́мя.

Припев: Архистратиже Божий Михаиле, моли́ Бо́га о нас.

Яко боже́ствен пропове́дник, я́ко предста́тель ве́рных непосты́ден, заблу́ждших путево́ждь и наказа́тель бы́л еси́, Бо́жий архистрати́же богови́днейший.

Сла́ва Отцу́ и Сы́ну и Свято́му Ду́ху:

Боже́ственнаго сия́ния чи́стшее зерца́ло бы́л еси́, явле́ния честна́го све́тло прие́м Ду́ха, Михаи́ле первоа́нгеле досточу́дне.

И ны́не и при́сно и во ве́ки веко́в. Ами́нь.

Богородичен: Невеще́ственныя умы́ Соста́вивый во́лею в веще́ственное Твое́ чре́во всели́ся хоте́нием, Всенепоро́чная, пло́тию зри́мь Незре́нный.

Седа́лен, гла́с 8.

Небе́сных чино́в наста́вник, служи́тель же сла́вы боже́ственныя, досто́йно бы́в повеле́нием Зижди́теля Твоего́, христиа́ном еси́ хода́тай спаси́тельный, невеще́ственною твое́ю сла́вою земны́я назира́я. Те́мже по до́лгу благохва́лим тя́ вси́, боже́ственное твое́ дне́сь воспева́юще торжество́, Михаи́ле архистрати́же, моли́ Христа́ Бо́га, грехо́в оставле́ние дарова́ти, пра́зднующим любо́вию боже́ственная твоя́ чудеса́.

Сла́ва, и́н седа́лен, гла́с 1.

Ли́к Ангельский архистрати́га име́я, боже́ственнаго Михаи́ла, с ни́м Святе́й Тро́ице немо́лчное приноша́ет песнопе́ние, из не су́щих бо Соде́тель вся́ческих во́инства огнезра́чных чино́в Сло́вом приведе́.

И ны́не, Богородичен:

Упова́ние христиа́н, Пресвята́я Де́во, Его́же родила́ еси́ Бо́га, па́че ума́ же и сло́ва, непреста́нно моли́ с вы́шними си́лами, пода́ти оставле́ние грехо́в на́ших все́х и исправле́ние жития́ ве́рою и любо́вию при́сно Тя́ сла́вящим.

КрестоБогородичен:

Нескве́рная Агница, Агнца и Па́стыря пове́шена на Дре́ве ме́ртва зря́щи, пла́чущи веща́ше, и Ма́терски восклица́ющи: ка́ко претерплю́ Твое́ е́же па́че сло́ва, Сы́не Мо́й, сни́тие и во́льныя Стра́сти, Бо́же Преблаги́й?

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Архистратиже Божий Михаиле, моли́ Бо́га о нас.

Ум сы́й Пе́рвый, соста́вил еси́ боже́ственныя умы́ хоте́нием, нача́льника посреде́ си́х Михаи́ла соде́ла, всеблаже́нным прича́стием просвеща́ема и у́мными богонача́лии облиста́ема.

Припев: Архистратиже Божий Михаиле, моли́ Бо́га о нас.

Пе́ние свято́е со престо́лы и нача́лы, и си́лами, и властьми́, и свяще́нными госпо́дьствы возглаша́еши Тро́ице, пресла́вне Михаи́ле, спаса́я ны́, пою́щия тя́.

Сла́ва Отцу́ и Сы́ну и Свято́му Ду́ху:

Велича́ем все́х Творца́ же и Го́спода, за благоутро́бие да́вшаго обхране́ние велича́йшее, и необори́му сте́ну, и забра́ло, Михаи́ла на́м, светоза́рнаго архистрати́га.

И ны́не и при́сно и во ве́ки веко́в. Ами́нь.

Богородичен: Мы́сленно, Де́во, Твоего́ Рождества́ пресла́вное ска́зоваше дре́вле священноявле́нный, Ду́хом го́ру присе́нную ви́дя Тя́ ясне́йше, из Нея́же Святы́й прии́де Бо́г воплоща́емь.

Пе́снь 5

Ирмос: Нечести́вии не у́зрят сла́вы Твоея́, Христе́, но мы́ Тя́, Единоро́дне, Оте́ческия сла́вы сия́ние Божества́, от но́щи у́тренююще, воспева́ем Тя́, Человеколю́бче.

Припев: Архистратиже Божий Михаиле, моли́ Бо́га о нас.

Яви́лся еси́ предводя́щ дре́вняго Изра́иля, повеле́нием Су́щаго из Иа́кова, челове́ком я́вльшагося дебельство́м те́ла, Михаи́ле безтеле́сный, Ангелов архистрати́же.

Припев: Архистратиже Божий Михаиле, моли́ Бо́га о нас.

Невеще́ственными сия́нии обожа́емь при́сно, прича́стием богонача́льным, и на́м осия́ние светода́тельное подава́еши, первоа́нгеле, пресла́вно удивля́емь.

Сла́ва Отцу́ и Сы́ну и Свято́му Ду́ху:

Украси́ся благода́тию боже́ственный тво́й хра́м, в то́й бо прише́д, враче́вств пучи́ну его́ показа́л еси́, Михаи́ле первоа́нгеле, и страсте́й потреби́теля.

И ны́не и при́сно и во ве́ки веко́в. Ами́нь.

Богородичен: Умных Ангелов Тя́ показа́ Бо́г вы́шшую, всели́вся в Твоя́ ложесна́, Чи́стая, Всенепоро́чная, Его́же моли́ всегда́ уще́дрити пою́щия Тя́.

Пе́снь 6.

Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

Припев: Архистратиже Божий Михаиле, моли́ Бо́га о нас.

Ра́дуется ве́рных мно́жество, благохва́лящее тя́, и сла́вит Всесвята́го Сло́ва, совоку́пльшаго земны́я со Ангелы, Михаи́ле, Свое́ю бла́гостию.

Припев: Архистратиже Божий Михаиле, моли́ Бо́га о нас.

Во́инства Изра́илева спа́сл еси́, явля́яся и боже́ственная подая́ повеле́ния, архистрати́же, враги́ низложи́л еси́, и в коне́ц сия́ истреби́л еси́.

Сла́ва Отцу́ и Сы́ну и Свято́му Ду́ху:

Яко ви́де тя́ Иису́с Нави́н, поклони́ся, вопроси́в честна́го твоего́ и свята́го и́мене, нача́льниче Ангелов, благогове́нием и стра́хом держи́мь.

И ны́не и при́сно и во ве́ки веко́в. Ами́нь.

Богородичен: Блаже́ни лю́дие, при́сно блажа́щия Тя́, Блаже́нная, Яже Бо́га Блаже́ннаго ро́ждшая, земны́я за милосе́рдие неизрече́нным едине́нием обожи́вшаго.

Конда́к, гла́с 2:

Архистрати́же Бо́жий, служи́телю боже́ственныя сла́вы, Ангелов нача́льниче и челове́ков наста́вниче, поле́зное на́м проси́, и ве́лию ми́лость, я́ко безпло́тных архистрати́г.

Икос:

Ре́кл еси́, Человеколю́бче, в Писа́ниих Твои́х: мно́жеству ра́доватися Ангелов на небеси́ о челове́це еди́ном ка́ющемся, Безсме́ртне. Те́мже мы́, и́же в беззако́ниих, Безгре́шне еди́не Сердцеве́дче, Тя́ моли́ти всегда́ дерза́ем, я́ко Благоутро́бнаго, уще́дрити и низпосла́ти недосто́йным умиле́ние, Влады́ко, подая́ на́м проще́ние, о все́х бо на́с мо́лится Тебе́ безпло́тных архистрати́г.

Пе́снь 7.

Ирмос: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Припев: Архистратиже Божий Михаиле, моли́ Бо́га о нас.

Усмотри́в, Дании́л ви́де купностоя́ща тя́, блаже́нне, и умудря́юща того́ в Хова́ре, виде́ние, е́же ви́де, Гаврии́ле молниезра́чне, Михаи́ла чинонача́льника тому́ явля́юща.

Припев: Архистратиже Божий Михаиле, моли́ Бо́га о нас.

Ангелов наста́вники, богови́дныя и светоно́сныя, Михаи́ла и Гаврии́ла, на́ши благи́я уте́шители и предста́тели, и храни́тели, восхва́лим ве́рою велегла́сно.

Сла́ва Отцу́ и Сы́ну и Свято́му Ду́ху:

Красе́н и всеблаголе́пен и богови́ден сы́й, во́ждь па́че ума́ невеще́ственных духо́в бы́л еси́, Михаи́ле светоза́рнейше, с ни́ми у́бо о все́х на́с моли́ся.

И ны́не и при́сно и во ве́ки веко́в. Ами́нь.

Богородичен: Ума́ Вели́каго и́стинно Сло́во Присносу́щное, Де́во, в Тя́ неизглаго́ланно и стра́шно всели́вшася ви́дя, возопи́ Гаврии́л арха́нгел: ра́дуйся, Престо́ле Высоча́йшаго, Благослове́нная.

Пе́снь 8.

Ирмос: Изба́вителю все́х, Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Припев: Архистратиже Божий Михаиле, моли́ Бо́га о нас.

Мы́сленных безтеле́сных чинонача́льник, моли́твенник челове́ков спаси́телен, боже́ствен Бо́жий служи́тель, Михаи́ле, показа́лся еси́, поя́ непреста́нно: вся́ дела́, благослови́те, по́йте Го́спода.

Припев: Архистратиже Божий Михаиле, моли́ Бо́га о нас.

Свети́льника два́ всесве́тлая, Михаи́ле и Гаврии́ле арха́нгели, Трисве́тлаго Божества́ сия́ньми тва́рь просвеща́ющии, лю́тых мглу́ отгоня́ете.

Сла́ва Отцу́ и Сы́ну и Свято́му Ду́ху:

Яко до́брии ко́рмчии, арха́нгели, ко приста́нищу боже́ственныя во́ли душе́вный кора́бль мо́й спаса́йте, от бу́ри грехо́в па́дший и бе́дствующий.

И ны́не и при́сно и во ве́ки веко́в. Ами́нь.

Богородичен: Невестокраси́тель боже́ственный арха́нгел, предста́в, приглаша́ше Тебе́, е́же ра́дуйся, Неве́сто Бо́жия безневе́стная, Ангелов сла́во и челове́ков спасе́ние и огражде́ние.

Песнь 9

Ирмос: Ева у́бо неду́гом преслуша́ния кля́тву всели́ла е́сть; Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Припев: Архистратиже Божий Михаиле, моли́ Бо́га о нас.

Се́ благоле́пие твоего́, арха́нгеле, боже́ственнаго хра́ма, осия́ющее светоза́рным твои́м прису́тствием, чуде́с мо́лнии испуща́ет и тмы́ неду́гов всегда́ отгоня́ет Боже́ственною благода́тию.

Припев: Архистратиже Божий Михаиле, моли́ Бо́га о нас.

Яко супру́г красе́н и ле́потен су́ще, Влады́чним повеле́нием су́щим на земли́ слу́жите, арха́нгели, от лю́тых изыма́юще и все́м просвеще́ние посыла́юще спаси́тельное Боже́ственным Ду́хом.

Припев: Архистратиже Божий Михаиле, моли́ Бо́га о нас.

Дне́сь ра́дуются с на́ми безтеле́снии боже́ственнии у́ми, воспева́ема ви́дяще сего́ от все́х, вели́каго и све́тлаго архистрати́га, и любо́вию с на́ми пра́зднуют, Жизнода́вца велича́юще.

Сла́ва Отцу́ и Сы́ну и Свято́му Ду́ху:

Боже́ственная дво́ице и светоза́рна, арха́нгели Михаи́ле всече́стне и Гаврии́ле препросла́вленне, Тро́ице Честне́й предстоя́ще, прегреше́ний вины́ и му́ки хва́лящия ва́с изба́вите.

И ны́не и при́сно и во ве́ки веко́в. Ами́нь.

Богородичен: Гла́с Тебе́ боже́ственнаго Гаврии́ла прино́сим ра́достно и взыва́ем: ра́дуйся, раю́, дре́во посреде́ жи́зни име́яй, Пречи́стая, пресла́вная Сло́ва пала́то; ра́дуйся, Де́во Всенепоро́чная.

Свети́лен:

Якоже дре́вле погрузи́л еси́ реки́ безчи́нная ше́ствия и шуме́ния, архистрати́же сла́вы, та́ко и ны́не, арха́нгеле, язы́ков горды́ню и де́монов свере́пства потреби́, я́ко да по до́лгу тя́ чти́м в пе́снех досто́йно.

Богородичен: Почита́ют Рождество́ Твое́ безпло́тных чи́ни: ра́дости бо земна́я Ты́ напо́лнила еси́ еди́на. Те́м Тя́, Всенепоро́чную, ве́рнии, сла́вим, в пе́ниих славосло́вяще: Све́т бо су́щим во тме́ возсия́ла еси́, я́ко у́тренний возсия́вший де́нь.

Молитва святому Архангелу Михаилу

О, святы́й Михаи́ле Арха́нгеле, светлообра́зный и гро́зный Небе́снаго Царя́ воево́до! Пре́жде Стра́шнаго Суда́ осла́би ми пока́ятися от грехо́в мои́х, от се́ти ловя́щих изба́ви ду́шу мою́ и приведи́ ю́ к сотво́ршему ю́ Бо́гу, седя́щему на Херуви́мех, и моли́ся о ней приле́жно, да твои́м хода́тайством по́слет ю́ в ме́сто поко́йное. О гро́зный Воево́до Небе́сных Сил, предста́телю всех у Престо́ла Влады́ки Христа́, храни́телю тве́рдый всем челове́ком и му́дрый ору́жниче, кре́пкий Воево́до Небе́снаго Царя́! Поми́луй мя, гре́шнаго, тре́бующаго твоего́ заступле́ния, сохрани́ мя от всех ви́димых и неви́димых враг, па́че же подкрепи́ от у́жаса сме́ртнаго и от смуще́ния диа́вольскаго и сподо́би мя непосты́дно предста́ти Созда́телю на́шему в час стра́шнаго и пра́веднаго Суда́ Его́. О всесвяты́й вели́кий Михаи́ле Архистрати́же! Не пре́зри мене́, гре́шнаго, моля́щагося тебе́ о по́мощи и заступле́нии твое́м, в ве́це сем и в бу́дущем, но сподо́би мя та́мо ку́пно с тобо́ю сла́витии Отца́ и Сы́на и Свята́го Ду́ха во ве́ки веко́в. Ами́нь

Молитва третья Архангелу Михаилу

О, святы́й Михаи́ле Арха́нгеле, поми́луй нас, гре́шных, тре́бующих твоего́ заступле́ния, сохрани́ нас, раб Бо́жиих (имена), от все́х ви́димых и неви́димых враг, па́че же подкрепи́ от у́жаса сме́ртнаго и от смуще́ния диа́вольскаго и сподо́би нас непосты́дно предста́ти Созда́телю на́шему в час стра́шнаго и пра́веднаго Суда́ Его́. О всесвяты́й, вели́кий Михаи́ле Архистрати́же! Не пре́зри нас, гре́шных, моля́щихся тебе́ о по́мощи и заступле́нии твое́м в ве́це сем и в бу́дущем, но сподо́би нас та́мо ку́пно с тобо́ю сла́вити Отца́ и Сы́на и Свята́го Ду́ха во ве́ки веко́в. Аминь.

Молитва вторая Архангелу Михаилу

Святы́й и вели́кий Арха́нгеле Бо́жий Михаи́ле, неисповеди́мыя и пресу́щественныя Тро́ицы пе́рвый во А́нгелех предстоя́телю, ро́да же челове́ческаго приста́вниче и храни́телю, сокруши́вый с во́инствы свои́ми главу́ прего́рдаго Денни́цы на небеси́ и посрамля́яй вы́ну зло́бу и кова́рства его́ на земли́! К тебе́ прибега́ем с ве́рою и тебе́ мо́лимся с любо́вию: бу́ди щит несокруши́м и забра́ло тве́рдо Святе́й Це́ркви и Правосла́вному Оте́чествию на́шему, огражда́я их молниено́сным мече́м твои́м от всех враг, ви́димых и неви́димых. Не оста́ви же, о Арха́нгеле Бо́жий, по́мощию и заступле́нием твои́м и нас, прославля́ющих днесь свято́е и́мя твое́: се бо, а́ще и многогре́шни есмы́, оба́че не хо́щем в беззако́ниих на́ших поги́бнути, но е́же обрати́тися ко Го́споду и оживле́нным бы́ти от Него́ на дела́ блага́я. Озари́ у́бо ум наш све́том лица́ Бо́жия, и́же вы́ну сия́ет на молниеви́днем челе́ твое́м, да возмо́жем разуме́ти, что есть во́ля Бо́жия о нас, блага́я и соверше́нная, и ве́дети вся, я́же подоба́ет нам твори́ти и я́же презира́ти и оставля́ти. Укрепи́ благода́тию Госпо́днею сла́бую во́лю и немощно́е произволе́ние на́ше, да, утверди́вшеся в зако́не Госпо́днем, преста́нем про́чее вла́ятися земны́ми по́мыслы и похоте́нии пло́ти, увлека́ющеся по подо́бию несмы́сленных дете́й скороги́бнущими красо́тами ми́ра сего́, я́ко ра́ди тле́ннаго и земна́го безу́мне забыва́ти ве́чная и небе́сная. Над все́ми же си́ми испроси́ нам свы́ше дух и́стиннаго покая́ния, нелицеме́рную печа́ль по Бо́зе и сокруше́ние о гресе́х на́ших, да остаю́щее нам число́ дний вре́меннаго живота́ на́шего иждиве́м не во угожде́нии чу́вств и рабо́те страсте́м на́шим, но во изглажде́нии зол, соде́янных на́ми, слеза́ми ве́ры и сокруше́ния серде́чнаго, по́двигами чистоты́ и святы́ми дела́ми милосе́рдия. Егда́ же прибли́зится час оконча́ния на́шего, освобожде́ния от уз бре́ннаго сего́ телесе́, не оста́ви нас. Арха́нгеле Бо́жий, беззащи́тных проти́ву духо́в зло́бы поднебе́сных, обы́кших прегражда́ти душе́ челове́честей восхо́д в го́рняя, да, охраняя́еми тобо́ю, безпреткнове́нне дости́гнем о́ных пресла́вных селе́ний ра́йских, иде́же не́сть печа́ль, ни воздыха́ние, но жизнь безконе́чная, и, сподо́бльшеся узре́ти пресве́тлое лице́ Всеблага́го Го́спода и Влады́ки на́шего, па́дше со слеза́ми у ног Его́, в ра́дости и умиле́нии воскли́кнем: сла́ва Тебе́, дража́йший Искупи́телю наш, И́же за премно́гую любо́вь Твою́ к нам, недосто́йным, благоволи́л еси́ посла́ти А́нгелы Твоя́ в служе́ние спасе́нию на́шему! Ами́нь.

Молитва четвертая Архангелу Михаилу

Го́споди, Бо́же Вели́кий, Царю́ безнача́льный, пошли́ Арха́нгела Твоего́ Михаи́ла на по́мощь раба́м Твои́м (имена). Защити́, Арха́нгеле, нас от вся́ких враго́в, ви́димых и неви́димых. О, Госпо́день Вели́кий Арха́нгеле Михаи́ле! Де́монов сокруши́тель, запрети́ всем врага́м, борю́щимся со мно́ю, и сотвори́ их я́ко о́вцы, и смири́ их зло́бные сердца́, и сокруши́ их, я́ко прах пред лице́м ве́тра. О, Госпо́день Вели́кий Арха́нгеле Михаи́ле! Шестикрыла́тых пе́рвый кня́же, Воево́до Небе́сных Сил — Херуви́м и Серафи́м, бу́ди нам помо́щник во всех бе́дах, ско́рбях, в печа́лях, в пусты́ни и на моря́х ти́хое приста́нище. О, Госпо́день Вели́кий Арха́нгеле Михаи́ле! Изба́ви нас от вся́кия пре́лести диа́вольския, егда́ услы́шишь нас, гре́шных, моля́щихся тебе́, и призыва́ющих и́мя твое́ свято́е. Ускори́ нам на по́мощь и побори́ всех, проти́вящихся нам, си́лою Честна́го и Животворя́щего Креста́ Госпо́дня, моли́твами Пресвято́й Богоро́дицы, моли́твами святы́х апо́столов, святи́теля Чудотво́рца Никола́я, Андре́я, Христа́ ра́ди, юро́диваго, св. проро́ка Илии́ и всех святы́х великому́чеников: святы́х му́чеников Ники́ты и Евста́фия, и всех преподо́бных отцо́в на́ших, от ве́ка Бо́гу угоди́вших и всех святы́х Небе́сных Сил. О, Госпо́день Вели́кий Арха́нгеле Михаи́ле! Помоги́ нам гре́шным (имена) и изба́ви нас от тру́са, пото́па, огня́, меча́ и напра́сной сме́рти, от вели́кого зла, от врага́ льсти́ваго, от бу́ри поноси́мой, от лука́вого изба́ви нас всегда́, ны́не и при́сно, и во ве́ки веко́в. Ами́нь. 

Святы́й Архистрати́же Бо́жий Михаи́ле, молниено́сным мечо́м твои́м отжени́ от мене́ ду́ха лука́вого, искуша́ющего и томя́щего мя. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Воспоминанию чуда Архистратига Михаила, бывшего в Хонех