19 сентября.
Канон мученику Евдоксию.
![Мученику Евдоксию Мученику Евдоксию](img_i/053.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропарь, глас 4:
Му́ченик Твой, Го́споди, Евдокси́й,/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами// спаси́ ду́ши на́ша.
Канон мученика, глас 8.
Песнь 1
Ирмо́с: Во́ду проше́д, я́ко су́шу, и египетскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.
Припев: Святый мучениче Евдоксие, моли́ Бо́га о нас.
И́же сла́вы жела́юще страда́льческия,/ прииди́те, восхва́лим вели́каго во страда́льцех Евдокси́я вси,/ в кимва́лех дави́дски торжеству́юще.
Припев: Святый мучениче Евдоксие, моли́ Бо́га о нас.
Изы́де повеле́ние нечести́вое в весь мир,/ не служи́ти Живо́му Бо́гу, но и́долом,/ ты же, му́чениче, Небе́сному Бо́гу твоему́ служи́л еси́.
Сла́ва Отцу́ и Сы́ну и Свято́му Ду́ху:
Тезоимени́те, сло́во благочести́вых, Евдокси́е му́чениче,/ испове́дал еси́ Христа́ Бо́га су́ща Безнача́льна/ посреде́ суде́й непра́ведных, уязвля́ющих тя.
И ны́не и при́сно и во ве́ки веко́в. Ами́нь.
Богородичен: Чи́ни Тя Ангел и челове́к, Ма́ти Безневе́стная, хва́лят непреста́нно,/ Зижди́теля бо их, я́ко Младе́нца, на рука́х Твои́х носи́ла еси́.
Песнь 3
Ирмо́с: Утверждей нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́,// Еди́не Человеколю́бче.
Припев: Святый мучениче Евдоксие, моли́ Бо́га о нас.
Я́коже а́гнец, на заколе́ние приве́лся еси́, Евдокси́е му́чениче,/ не пререку́я, ни вопия́, всеблаже́нне,/ Учи́теля твоего́ Христа́ житие́ подража́я,/ и сего́ ра́ди сла́ву прия́л еси́ безконе́чную.
Припев: Святый мучениче Евдоксие, моли́ Бо́га о нас.
И́дольским служи́телем, страда́льче, возглаша́л еси́:/ Бог мой живе́т во ве́ки,/ ва́ши же бо́зи дела́ рук челове́ческих суть,/ па́дше не востаю́т, истука́нни су́ще, безду́шнии.
Сла́ва Отцу́ и Сы́ну и Свято́му Ду́ху:
Хи́трости вра́жия низложи́л еси́, страда́льче,/ утве́рждь твой ум на ка́мени Це́ркве Христо́вы./ Тем и взыва́л еси́:/ жизнь тле́нную оставля́ю за су́щую ве́чную жизнь.
И ны́не и при́сно и во ве́ки веко́в. Ами́нь.
Богородичен: Соприсносу́щный Отцу́ и Сопресто́льный Бог Сло́во,/ обнови́ти восхоте́в родонача́льника,/ по Ипоста́си того́ из Тебе́, Чи́стая, восприя́ше,/ Святе́йшу всех Тя, Богома́ти, обре́т.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.
Припев: Святый мучениче Евдоксие, моли́ Бо́га о нас.
Пре́лесть обличи́л еси́/ ну́дящих тя отврещи́ся Жи́зни безконе́чныя/ и жизнь су́етную возлюби́ти.
Припев: Святый мучениче Евдоксие, моли́ Бо́га о нас.
Ураня́емь, ра́довался еси́,/ закла́вшагося ра́ди Сло́ва пло́тию ра́ди нас,/ мучи́телем же взыва́л еси́:/ я́ко недосто́йна суть моя́ страда́ния.
Сла́ва Отцу́ и Сы́ну и Свято́му Ду́ху:
Бо́зи, и́мже слу́жите, уста́ иму́ще, не веща́ют,/ Евдокси́е, взыва́л еси́,/ и́мже подо́бни да бу́дут творя́щии ты́я.
И ны́не и при́сно и во ве́ки веко́в. Ами́нь.
Богородичен: Очище́ние нам да́руй неве́дений, я́ко Безгре́шен,/ и умири́ мир Твой, Бо́же,/ моли́твами Ро́ждшия Тя.
Пе́снь 5
Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,// Человеколю́бче.
Припев: Святый мучениче Евдоксие, моли́ Бо́га о нас.
Ты моя́ кре́пость, Евдокси́е, вопия́л еси́,/ пло́тию пострада́вый Христе́ Бо́же,/ утверди́ мене́, се бо стражду́ му́чимь.
Припев: Святый мучениче Евдоксие, моли́ Бо́га о нас.
Ты сокро́вище проше́ний еси́, Христе́ Бо́же,/ не пре́зри мене́, вопия́л еси́ в му́ках,/ Евдокси́е терпеливоду́шне.
Сла́ва Отцу́ и Сы́ну и Свято́му Ду́ху:
Меча́ и огня́ не бою́ся, Евдокси́й вопия́ше к мучи́телю:/ се бо и́мам Бо́га, Кре́пость кре́пкую,/ Ему́же служу́.
И ны́не и при́сно и во ве́ки веко́в. Ами́нь.
Богородичен: Исцели́, Чи́стая, страсте́й мои́х неможе́ние,/ посеще́ния Твоего́ удосто́ивши,/ и здра́вие мольба́ми Твои́ми пода́ждь ми.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся, / к Тебе́ бо возопи́х, и услы́ши мя,// Бо́же спасе́ния моего́.
Припев: Святый мучениче Евдоксие, моли́ Бо́га о нас.
Ни меч, ниже́ огнь разлучи́т мя любве́ Христо́вы,/ ва́ша же преще́ния я́ко де́тская глумле́ния вменя́ю,/ Евдокси́е, вопия́л еси́ ве́рою, жре́ти принужда́ющим.
Припев: Святый мучениче Евдоксие, моли́ Бо́га о нас.
О́наго ужаса́юся огня́ негаси́маго муча́щаго,/ жи́зни же жела́ю неотъе́млемыя,/ мучи́телю, Евдокси́е, взыва́л еси́:/ се те́ло уязвля́й, не служу́ и́долом твои́м.
Сла́ва Отцу́ и Сы́ну и Свято́му Ду́ху:
Бо́зи, и́мже ты кла́няешися, сребро́ и зла́то суть,/ уста́ и́мут, и не глаго́лют,/ у́ши не слы́шат, но́ги не хо́дят,/ мой же Бог Вседе́тель есть, взыва́л еси́.
И ны́не и при́сно и во ве́ки веко́в. Ами́нь.
Богородичен: Да изба́вимся лю́тых прегреше́ний моли́твами Твои́ми, Богороди́тельнице Чи́стая,/ и да улучи́м, Пресвята́я, Боже́ственное сия́ние/ из Тебе́ неизрече́нно воплоще́ннаго Сы́на Бо́жия.
Седален, глас 8.
Небе́сное бога́тство собра́в и ни́щим сие́ прине́с, расточи́л еси́,/ и дал еси́ а́лчущим хлеб твой,/ и, сего́ ра́ди жизнь нетле́нную стяжа́в, Христо́вым испове́данием просия́л еси́;/ те́мже, му́жествовав и зако́нно пострада́в,/ вене́ц прия́л еси́ от Бо́га трудо́в твои́х, страстоте́рпче Евдокси́е,/ моли́ Христа́ Бо́га, грехо́в оставле́ние дарова́ти/ честву́ющим любо́вию святу́ю па́мять твою́.
Песнь 7
Ирмо́с: От Иуде́и доше́дше о́троцы,/ в Вавило́не иногда́/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.
Припев: Святый мучениче Евдоксие, моли́ Бо́га о нас.
Отроко́в поревнова́в терпе́нию, Евдокси́е прему́дре,/ о́бразу ле́стному не поклони́л еси́ коле́н,/ но взыва́л еси́ ве́рою те́плою:/ отце́в на́ших Бо́же, благослове́н еси́.
Припев: Святый мучениче Евдоксие, моли́ Бо́га о нас.
По́мощь стяжа́в непобе́дную благода́ти, му́чениче Евдокси́е,/ тве́рдо ополче́ния вра́жия низложи́л еси́/ и, победи́в, взыва́л еси́:/ отце́в на́ших Бо́же, благослове́н еси́.
Сла́ва Отцу́ и Сы́ну и Свято́му Ду́ху:
Распала́емь, му́чениче, любо́вию Боже́ственнаго жела́ния, Евдокси́е,/ пристра́стия привре́меннаго я́ве возгнуша́лся еси́, возме́здие прие́мля,/ и взыва́л еси́:/ отце́в на́ших Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: Ле́стию па́дшаго восхоте́в обнови́ти, Преблаги́й Бог/ от Де́вы воплоща́ется и ражда́ется и обожа́ет челове́чество.
Песнь 8
Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.
Припев: Святый мучениче Евдоксие, моли́ Бо́га о нас.
Язв пучи́ну преплы́л еси́, сла́вне,/ и в приста́нище жи́зни дости́гл еси́, Евдокси́е,/ вене́ц терпе́ния прие́м,/ и со Ангелы немо́лчно зове́ши:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.
Припев: Святый мучениче Евдоксие, моли́ Бо́га о нас.
Сквозе́ огнь и во́ду проше́дша, блаже́нне, в поко́й тя Христо́с изведе́,/ в не́мже, ра́дуяся, со Ангелы, му́чениче му́дре, пое́ши немо́лчно Тро́ице песнь:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.
Сла́ва Отцу́ и Сы́ну и Свято́му Ду́ху:
Ты мы́сленнаго погуби́л еси́ зми́я, по́мощию Небе́снаго Царя́, сла́вне,/ и, побе́ды вене́ц терпе́ния прие́м,/ со безпло́тными немо́лчно взыва́вши:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.
И ны́не и при́сно и во ве́ки веко́в. Ами́нь.
Троичен: Трисве́тлое Божество́, во Еди́ной сия́ющее зари́, от Еди́наго Триипоста́снаго Естества́,/ Роди́теля Безнача́льна, Единоесте́ственна же Сло́ва Отцу́ и Сца́рствующаго Единосу́щнаго Ду́ха,/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Песнь 9
Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,// А́нгелов и челове́к чинонача́лия велича́ют.
Припев: Святый мучениче Евдоксие, моли́ Бо́га о нас.
Устраши́шася а́нгельская во́инства, и челове́честии собо́ри удиви́шася,/ я́ко, тле́нно естество́, страда́льче, име́я и то́чное,/ безплотныя де́моны показа́л еси́ окая́нны и не́мощны и ве́рою Тро́ице взыва́л еси́, служа́:/ Трисия́нный Све́те, Ты еси́ сла́ва моя́.
Припев: Святый мучениче Евдоксие, моли́ Бо́га о нас.
Блаже́н ты, му́чениче, в ро́ды родо́в просла́вився, Евдокси́е,/ я́ко, пло́ти ника́коже пощаде́в Христа́ ра́ди,/ но му́ки претерпе́л еси́ и не поклони́лся еси́ истука́нным./ Те́мже тя чи́ни а́нгельстии, оде́ждею нетле́ния оде́явше, венча́ша.
Сла́ва Отцу́ и Сы́ну и Свято́му Ду́ху:
Ве́рою соверша́ющих, му́чениче, страда́ний твои́х па́мять, Евдокси́е,/ к Бо́гу твои́ми моли́твами от вся́каго наве́та вра́жия исхити́, да не похва́лится на ны,/ я́ко му́ченик бо мо́жеши, прие́м от Вы́шняго страда́ний воздая́ние.
И ны́не и при́сно и во ве́ки веко́в. Ами́нь.
Богородичен: Яви́лася еси́, о Де́во, Ма́ти Бо́жия, па́че естества́ ро́ждши пло́тию Бо́га Сло́ва,/ Его́же Оте́ц от се́рдца Своего́ отры́гну пре́жде всех веко́в, я́ко Благ,/ Его́же ны́не и теле́с превы́шша разумева́ем, а́ще и в те́ло облече́ся.
Стихиры мученика, глас 1.
Тезоимени́тное твое́ зва́ние, му́чениче Евдокси́е,/ доброде́тельми благода́ть Спа́са прия́л еси́,/ и житие́м благосла́вия страда́льческаго/ благоде́рзостно премени́л еси́,/ и, со Ангелы лику́я на Небесе́х,/ досто́йно ны́не просла́вился еси́.
Отсече́нием вы́и ве́ры ра́ди,/ Небе́сным венце́м венча́л еси́ главу́ твою́,/ Евдокси́е преблаже́нне,/ те́мже нас, соверша́ющих па́мять твою́,/ не преста́й моли́твами твои́ми ко Христу́ помина́ти,/ му́чениче сла́вне.
Преоби́дев бога́тство и привре́менную жизнь,/ Моисе́йски вмени́л еси́/ па́че мирска́го благосла́вия, Евдокси́е,/ носи́ти поноше́ние Христо́во,/ Боже́ственную похвалу́,// прибли́жився му́кам и напа́стем да́же до кро́ве, сла́вне.
Слава, и ныне, Богородичен:
Прегреше́ний пучи́ною обурева́емь,/ к ти́хому приста́нищу Твоея́ пречи́стыя́ мольбы́,/ Богоро́дице, прибе́г, взыва́ю Ти:/ спаси́ мя, держа́вную Твою́ просте́рши десни́цу// рабу́ Твоему́, Пренепоро́чная.
Молитва
О святы́й уго́дниче Бо́жий, му́чениче Евдокси́е! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Мученику Евдоксию Мученику Евдоксию](img_b/053.jpg)