17 сентября.
Канон святому священномученику Вавиле, епископу Антиохийскому.
![Святому священномученику Вавиле, епископу Антиохийскому Святому священномученику Вавиле, епископу Антиохийскому](img_i/048.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 4:
И нра́вом прича́стник, и престо́лом наме́стник апо́столом бы́в, дея́ние обре́л еси́, богодухнове́нне, в виде́ния восхо́д: сего́ ра́ди, сло́во и́стины исправля́я, и ве́ры ра́ди пострада́л еси́ да́же до кро́ве, священному́чениче Вави́ло, моли́ Христа́ Бо́га спасти́ся душа́м на́шим.
Кано́н священному́ченика. Гла́с 6.
Пе́снь 1.
Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.
Припев: Священномучениче Вавило, моли́ Бо́га о нас.
Свои́ми кровьми́, я́ко Моисе́й Чермно́е мо́ре, безво́лненно проше́д, Вави́ло блаже́нне, Бо́гу побе́дную пе́снь вопия́л еси́: воспои́м Го́споду, я́ко просла́вися.
Припев: Священномучениче Вавило, моли́ Бо́га о нас.
Ты́ земны́х преоби́дел еси́ жела́ние, боже́ственному повину́в жела́нию, е́же жи́ти, Вави́ло блаже́нне, Христо́ву гряды́й ви́дети красоту́.
Сла́ва Отцу́ и Сы́ну и Свято́му Ду́ху:
Пребоже́ственныя Тро́ицы я́ко сы́й рачи́тель, с треми́ у́мерл еси́ о́троки, ра́дуяся, Вави́ло блаже́нне, при́сно приводя́ ду́ши сия́ жела́нием.
И ны́не и при́сно и во ве́ки веко́в. Ами́нь.
Богородичен: Своего́ прие́мши Соде́теля, я́ко Са́м восхоте́, из безсе́меннаго чре́ва Твоего́ па́че ума́ воплоща́ема, Чи́стая, тва́рей и́стинно показа́лася еси́ Влады́чица.
Пе́снь 3.
Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.
Припев: Священномучениче Вавило, моли́ Бо́га о нас.
Не́сть свя́т, я́коже Ты́, Го́споди Бо́же мо́й, возвы́сивый ро́г ве́рнаго Твоего́ Вави́лы, и венча́в его́ венце́м испове́дания Твоего́.
Припев: Священномучениче Вавило, моли́ Бо́га о нас.
Му́чеников бы́сть кре́пость, Го́споди, Кре́ст Тво́й, утверди́вый о́троки с блаже́нным Вави́лою, и низложи́вый те́ми пре́лести безбо́жныя де́рзости.
Сла́ва Отцу́ и Сы́ну и Свято́му Ду́ху:
Кре́пость оскуде́, Христе́, диа́воля в коне́ц: незло́бивыми бо детьми́ и боже́ственным Вави́лою побежда́ется кре́пкий и посмева́емь е́сть, от ни́х поруга́емь.
И ны́не и при́сно и во ве́ки веко́в. Ами́нь.
Богородичен: Боже́ственнаго рождества́ Твоего́, Чи́стая, вся́кий естества́ чи́н прехо́дит чу́до: Бо́га бо преесте́ственно зачала́ еси́ во утро́бе, и ро́ждши, пребыва́еши Присноде́ва.
Седа́лен священному́ченика, гла́с 3. Подо́бен: Боже́ственныя ве́ры.
Точа́ ве́ры испове́дание, пре́лесть угаси́л еси́ злосла́вия, обличи́в и́дольское безбо́жие, и всесожже́ние Боже́ственное бы́в, чудотворе́ньми ороша́еши концы́: о́тче преподо́бне, Христа́ Бо́га моли́, дарова́ти на́м ве́лию ми́лость.
Сла́ва, И ны́не, богоро́дичен, глас 4:
Пречи́стыя ру́ки Твоя́, Де́во Ма́ти, просте́рши, покры́й упова́ющия на Тя́, и Сы́ну Твоему́ зову́щия: все́м пода́ждь, Христе́, ми́лости Твоя́.
КрестоБогородичен:
На Дре́ве ви́дящи воздви́жена Сы́на Твоего́, Пречи́стая, утро́бою ма́тернею растерза́ема, жа́лостно взыва́ла еси́: увы́ Мне́, ка́ко заше́л еси́, Све́те Мо́й безле́тный?
Пе́снь 4.
Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.
Припев: Священномучениче Вавило, моли́ Бо́га о нас.
Христо́с моя́ си́ла, Бо́г и Госпо́дь, пред суди́щем вопия́л еси́, мучи́тельских преще́ний небоя́знен, священному́чениче Вави́ло, в Го́споде ра́дуяся.
Припев: Священномучениче Вавило, моли́ Бо́га о нас.
Же́ртву непоро́чну, стра́шну, безкро́вну, Го́споду принося́, и себе́ сама́го заколе́ние кро́вию, священному́чениче Вави́ло, нескве́рно приве́л еси́.
Сла́ва Отцу́ и Сы́ну и Свято́му Ду́ху:
Дете́й, преподо́бне, младо́е мудрова́ние, я́ко му́др детоучи́тель, духо́вным воспита́в млеко́м, священному́чениче Вави́ло, в соверше́ние испра́вил еси́.
И ны́не и при́сно и во ве́ки веко́в. Ами́нь.
Богородичен: Яко и́стинно невеща́нна и непости́жна, Твоего́, Богоро́дице, благоле́пнаго су́ть рождества́, су́щим на земли́ и на небеси́, Присноде́во, та́инства.
Пе́снь 5
Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.
Припев: Священномучениче Вавило, моли́ Бо́га о нас.
Боже́ственную благода́ть Твою́, Иису́се, священному́ченик Вави́ла и́стинно с высоты́ прия́ше, я́ко и де́ти ю́ныя к Твое́й любви́ приведе́, и сме́рти к преоби́дению.
Припев: Священномучениче Вавило, моли́ Бо́га о нас.
Боже́ственным зна́нием Твои́м осия́вся, священному́ченик Вави́ла, вся́ уча́ше, Го́споди, Тя́ ве́дети, Еди́наго Бо́га, Су́що Го́спода, от мра́ка и льсти́ взыва́юща.
Сла́ва Отцу́ и Сы́ну и Свято́му Ду́ху:
Боже́ственным избра́нием Твои́м прозна́менався священному́ченик Вави́ла слове́сное пасти́ ста́до Твое́, Тебе́ прино́сит, Сло́ве Бо́жий, кро́вь свою́, к стези́ спасе́ния все́х му́дре путеводя́.
И ны́не и при́сно и во ве́ки веко́в. Ами́нь.
Богородичен: Богоро́дицу Тя́ от души́, Влады́чице ми́ра блага́я, испове́дующия спаса́й: Тя́ бо Предста́тельницу непобеди́му и́мамы, су́щую Богороди́тельницу.
Пе́снь 6.
Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.
Припев: Священномучениче Вавило, моли́ Бо́га о нас.
Жите́йское мо́ре преле́стное зря́ волну́емо бу́рею, Вави́ла, пресла́вный страда́лец, вопия́ше: возведи́ из тли́ жи́знь мою́, Многоми́лостиве.
Припев: Священномучениче Вавило, моли́ Бо́га о нас.
Христу́ подо́бяся, за па́ству ду́шу твою́ пре́дал еси́, о сла́вный му́чениче, и страда́льче Вави́ло блаже́нне, и преле́стныя сте́ны разори́л еси́.
Сла́ва Отцу́ и Сы́ну и Свято́му Ду́ху:
Дете́й непостоя́нное утверди́ му́дре свои́ми страда́ньми Вави́ла, приснопа́мятный страда́лец, к жи́зни небе́сней от земли́ преводя́, пресла́вный.
И ны́не и при́сно и во ве́ки веко́в. Ами́нь.
Богородичен: Пречи́стая Влады́чице, ро́ждшая земны́м Ко́рмчию Го́спода, страсте́й мои́х непостоя́нное и лю́тое укроти́ смуще́ние и тишину́ пода́ждь се́рдцу моему́.
Конда́к священному́ченику, гла́с 8.
Яко благоче́стия пропове́дника и страда́льцев утвержде́ние, Це́рковь сла́вит тя́, Вави́ло сла́вне, освеща́ема дне́сь; но, я́ко име́я дерзнове́ние ко Го́споду, в ми́ре соверше́ннем велича́ющия и восхваля́ющия тя́, сохрани́ти Христу́ моли́ся, о многострада́льне.
Икос:
Мирску́ю я́ве суету́ помышля́я, ми́ра отчужде́нный, и Стра́сти Христо́вы подража́в, плотски́я стра́сти умертви́л еси́, и кре́ст тво́й взе́м, после́довал еси́, му́чениче, Зижди́телю твоему́, и пребыва́я с Ни́м ны́не, моли́ся о честву́ющих тя́ и́стинно, о многострада́льне.
Пе́снь 7.
Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.
Припев: Священномучениче Вавило, моли́ Бо́га о нас.
Небе́сная чинонача́лия дне́сь, победоно́сцы зря́ще ю́ныя на пре́лесть, и чу́днаго Вави́лу, вопия́ху сра́дующеся Христу́: благослове́н еси́, Го́споди Бо́же отце́в на́ших.
Припев: Священномучениче Вавило, моли́ Бо́га о нас.
Влады́чня светоно́сная уясни́ благода́ть соше́дшияся ве́рныя, венцено́сный же сла́вный Вави́ла повелева́ет сра́дующимся вопи́ти: благослове́н еси́, Го́споди Бо́же отце́в на́ших.
Сла́ва Отцу́ и Сы́ну и Свято́му Ду́ху:
Мучи́телей у́бо недоуме́яшеся умышле́ние, помоществова́ти не су́щим бого́м. Пресвяте́й же Тро́ице чу́дный Вави́ла повелева́ет вопи́ти: благослове́н еси́, Бо́же отце́в на́ших.
И ны́не и при́сно и во ве́ки веко́в. Ами́нь.
Богородичен: Тобо́ю, Ма́ти Де́во, Све́т возсия́ вселе́нней све́тел: Ты́ бо Зижди́теля все́х родила́ еси́, Бо́га. Его́же моли́, Всечи́стая, низпосла́ти на́м, ве́рным, ве́лию ми́лость.
Пе́снь 8.
Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.
Припев: Священномучениче Вавило, моли́ Бо́га о нас.
Бо́га Отца́ Соде́теля, Единосу́щна Сы́на, и Бо́жия Ду́ха, в пла́мени ю́ноши пе́ти повелева́ются: да благослови́т Го́спода вся́ тва́рь и превозно́сит во вся́ ве́ки.
Припев: Священномучениче Вавило, моли́ Бо́га о нас.
Па́мять дне́сь, бра́тие, священному́ченика Вави́лы я́же в пла́мени ю́ноши пе́ти повелева́ют: благослови́те Го́спода, вся́ дела́, и превозноси́те Его́ во ве́ки.
Сла́ва Отцу́ и Сы́ну и Свято́му Ду́ху:
Юнии дне́сь ученицы́ иере́я и му́ченика Вави́лы, с ста́рцем венча́вшеся, в пещи́ ю́нош пе́снь пе́ти повелева́ют: благослови́те Го́спода, вся́ дела́, и превозноси́те Его́ во ве́ки.
И ны́не и при́сно и во ве́ки веко́в. Ами́нь.
Богородичен: Бо́га родила́ еси́ пло́тию, содержа́щаго руко́ю вся́, и на объя́тиих Сего́, Де́во, носи́ла еси́. Его́же пое́м я́ко Го́спода, дела́, и превозно́сим во вся́ ве́ки.
Песнь 9
Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.
Припев: Священномучениче Вавило, моли́ Бо́га о нас.
Бо́г челове́ком пу́ть показа́, Кресто́м к высоте́ небе́сней благовосхо́ден, сего́ ра́ди сме́рть побежда́ется земны́ми. Де́ти бо ю́ныя сея́ не убоя́шася, с чу́дным Вави́лою, я́же ублажа́ем.
Припев: Священномучениче Вавило, моли́ Бо́га о нас.
Яко Све́т сы́й, Христе́, Всечи́стый, стра́стный мглы́ ду́шу мою́ очи́сти, моли́твами, Влады́ко, Твои́х страстоте́рпец, Вави́лы и дете́й, и́хже ле́тнюю па́мять соверша́юще, благосла́вно торжеству́ем.
Сла́ва Отцу́ и Сы́ну и Свято́му Ду́ху:
Страсте́й врачева́ния почерпе́м, сла́вней Це́ркви страда́лец притека́юще: в ту́ бо приидо́ша Ангельстии ли́цы, и ду́си пра́ведных все́х, и Влады́чица с чу́дным Вави́лою, врачева́ния подава́ющи.
И ны́не и при́сно и во ве́ки веко́в. Ами́нь.
Богородичен: Сы́на, безле́тно от Отца́ возсия́вша, Ты́, во чре́ве несказа́нно заче́нши, родила́ еси́, Богома́ти Чи́стая, Де́во Пресвята́я, моли́ о рабе́х Твои́х еди́наго Человеколю́бца Бо́га, спасти́ ро́д на́ш.
Свети́лен.
Жре́ц ку́пно и же́ртва, Вави́ло, яви́лся еси́ Бо́жия, жря́ Ему́ безкро́вно, и свои́ми кровьми́ поже́рся с соверше́нными младе́нцы, с ни́миже Тя́ ны́не восхваля́ем.
Сла́ва, и ны́не, Богородичен:
Твоему́ о́бразу, Де́во, не покланя́ющияся, и Сы́на и Бо́га Твоего́, ве́рою чи́стою, низложи́ я́ко безбо́жныя, и гее́нне преда́ждь.
Молитва
О святы́й уго́дниче Бо́жий, священному́чениче Вави́ло! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святому священномученику Вавиле, епископу Антиохийскому Святому священномученику Вавиле, епископу Антиохийскому](img_b/048.jpg)