16 сентября.

Канон святому священномученику Анфиму, епископу Никомидийскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

И нра́вом прича́стник, и престо́лом наме́стник апо́столом бы́в, дея́ние обре́л еси́, богодохнове́нне, в виде́ния восхо́д; сего́ ра́ди, сло́во и́стины исправля́я, и ве́ры ра́ди пострада́л еси́ да́же до кро́ве, священному́чениче Анфи́ме, моли́ Христа́ Бо́га спасти́ся душа́м на́шим.

Кано́н священному́ченика. Гла́с 8.

Пе́снь 1.

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Священномучениче Анфиме, моли́ Бо́га о нас.

Двоплете́н благоче́стия архиере́йства и страда́ния прие́м вене́ц, от Христа́ ублажа́ешися, пресла́вне.

Припев: Священномучениче Анфиме, моли́ Бо́га о нас.

Тебе́, Первопа́стырю, священноде́йственник Тво́й, я́ко незло́биво и чи́сто а́гня, беззако́нных рука́ми приведе́ся.

Сла́ва Отцу́ и Сы́ну и Свято́му Ду́ху:

Разори́л еси́, иера́рше, еретико́в тве́ржи, благочести́вым дерзнове́нием, пропове́дав Тро́ицу несозда́нную.

И ны́не и при́сно и во ве́ки веко́в. Ами́нь.

Богородичен: Пречи́стая Богоро́дице, Яже воплоще́нное Присносу́щное и Пребоже́ственное Сло́во па́че естества́ ро́ждши, пое́м Тя́.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Припев: Священномучениче Анфиме, моли́ Бо́га о нас.

Яви́лся еси́ священному́ченик, священноде́йствуя пе́рвее, преподо́бне, Изба́вителю: пото́м же я́ко же́ртву себе́ сама́го священноде́йствовал еси́.

Припев: Священномучениче Анфиме, моли́ Бо́га о нас.

Бы́л еси́ не нае́мник, но ве́рнейший па́стырь, преподо́бне, твою́ кро́вь пролива́я, боголюбе́зне, за ста́до твое́.

Сла́ва Отцу́ и Сы́ну и Свято́му Ду́ху:

Изря́дне упа́сл еси́ Влады́ки твоего́ ста́до, архиере́е, те́м на ме́сте зла́чне всели́лся еси́.

И ны́не и при́сно и во ве́ки веко́в. Ами́нь.

Богородичен: Да́ждь на́м по́мощь мольба́ми Твои́ми, Пречи́стая, прило́ги отрева́ющи лю́тых обстоя́ний.

Седа́лен Анфи́ма, гла́с 1.

Кро́вь твоя́, му́дре, та́йно вопия́ше от земли́ к Бо́гу, я́ко Авелева, богому́дре: я́ве бо пропове́дал еси́ Тро́ицу Несозда́нную. Те́мже, Анфи́ме, па́стырски просия́в, отгна́л еси́ ересе́й зве́ри, я́ко храни́тель ве́ры.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Священномучениче Анфиме, моли́ Бо́га о нас.

Волко́в собо́рища а́гнцы творя́ сло́вом, блаже́нне, умертви́лся еси́ те́лом, ду́х же пре́дал еси́ Го́споду.

Припев: Священномучениче Анфиме, моли́ Бо́га о нас.

Яко благово́нная и всечестна́я, Всецарю́ прия́тна же́ртва твоя́, и принося́щаго в богому́дрии, и приноша́емаго пребеззако́нными рука́ми.

Сла́ва Отцу́ и Сы́ну и Свято́му Ду́ху:

Пома́зался еси́ у́бо, преподо́бне, свяще́нническою ма́стию пе́рвее, соверши́лся же еси́ второ́е страда́льческою твое́ю, о́тче, кро́вию.

И ны́не и при́сно и во ве́ки веко́в. Ами́нь.

Богородичен: Очище́ние на́м да́руй неве́дений, я́ко Безгре́шен, и умири́ ми́р Тво́й, Бо́же, моли́твами Ро́ждшия Тя́.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.

Припев: Священномучениче Анфиме, моли́ Бо́га о нас.

Безкро́вну Же́ртву прине́сл еси́ Го́споду, сама́го же себе́ кро́вию плодоприне́сл еси́, Анфи́ме.

Припев: Священномучениче Анфиме, моли́ Бо́га о нас.

Ду́х тя́ Боже́ственный просвети́, иера́рше; те́м пресла́вную торжеству́ем па́мять твою́.

Сла́ва Отцу́ и Сы́ну и Свято́му Ду́ху:

Боже́ственный у́бо тво́й язы́к иска́па спасе́ние, то́к же кро́ве твоея́ духо́вное ра́дование.

И ны́не и при́сно и во ве́ки веко́в. Ами́нь.

Богородичен: Ути́ши непостоя́нную бу́рю страсте́й мои́х, Бо́га Ро́ждшая Ко́рмчию и Го́спода.

Пе́снь 6.

Ирмос: Ри́зу мне́ пода́ждь све́тлу, одея́йся све́том, я́ко ри́зою, Многоми́лостиве Христе́ Бо́же на́ш.

Припев: Священномучениче Анфиме, моли́ Бо́га о нас.

Крести́л еси́ водо́ю лю́ди и Святы́м Ду́хом, я́коже крести́лся еси́, крести́лся же еси́ и твое́ю, о́тче, кро́вию.

Припев: Священномучениче Анфиме, моли́ Бо́га о нас.

Яко розга́ Лозы́ жи́зненныя, избра́н и че́стен, мно́жайший израсти́л еси́ Влады́це твоему́ пло́д, всеблаже́нне.

Сла́ва Отцу́ и Сы́ну и Свято́му Ду́ху:

Не преста́й, моле́ния творя́ ко Христу́, блаже́нне, о ста́де твое́м и кро́вь предложи́в моле́бную.

И ны́не и при́сно и во ве́ки веко́в. Ами́нь.

Богородичен: Хра́м Тя́ Бо́жий, и киво́т, и черто́г одушевле́н, и две́рь небе́сную, Богоро́дице, ве́рнии, возвеща́ем.

Конда́к, гла́с 4.

Во свяще́нницех благоче́стно пожи́в и муче́ния пу́ть сконча́в, и́дольская угаси́л еси́ служе́ния, побо́рник бы́в твоему́ ста́ду, богому́дре. Те́мже тя́ и почита́ем ны́не, та́йно вопию́ще: от бе́д изба́ви на́с твои́ми моли́твами, приснопа́мятне Анфи́ме.

Икос:

Пода́в мне́ зна́ние Боже́ственное, мра́к неве́дения от моего́ се́рдца отжени́ моли́твами твои́ми, я́ко да пою́ твою́ ве́рно святу́ю па́мять, в не́йже Ангельстии ли́цы с му́ченическими дне́сь веселя́тся боже́ственне и челове́цы пе́сньми похва́льными твою́ главу́, я́коже цве́ты спле́тше, венча́ют досто́йно, прося́ще от тебе́ прия́ти согреше́ний оставле́ние и злы́х жития́ реше́ние, враго́в же ви́димых изба́витися и неви́димых твои́ми моли́твами, о́тче на́ш Анфи́ме.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Священномучениче Анфиме, моли́ Бо́га о нас.

Яко до́брая и я́ко ту́чная же́ртва твоя́ яви́ся, преблаже́нне Анфи́ме: Самому́ бо Влады́це кро́вию прине́слся еси́, принося́й безкро́вная, — отце́в, — вопия́, — Бо́же, благослове́н еси́.

Припев: Священномучениче Анфиме, моли́ Бо́га о нас.

Пасы́йся и упа́с, отобою́ду, о́тче, бога́тство собра́л еси́, и, сие́ снабде́в, соблю́л еси́ печа́тию страда́ния, поя́ Христу́: отце́в на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

В ве́рных це́ркви Триипоста́сное Естество́ богосло́вил еси́ и, пред се́ю, богоно́се, непра́ведных судо́м убива́емь, пе́л еси́: отце́в на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: От де́вственнаго чре́ва вопло́щься яви́лся еси́ на спасе́ние на́ше. Те́мже, Твою́ Ма́терь ве́дуще Богоро́дицу, благода́рно взыва́ем: отце́в на́ших Бо́же, благослове́н еси́.

Пе́снь 8.

Ирмос: Царя́ Небе́снаго, Его́же пою́т во́и Ангельстии, хвали́те и превозноси́те во вся́ ве́ки.

Припев: Священномучениче Анфиме, моли́ Бо́га о нас.

Священному́ченика благосла́внаго в па́мяти, ве́рнии, весели́теся, вопию́ще: Тя́ превозно́сим, Христе́, во ве́ки.

Припев: Священномучениче Анфиме, моли́ Бо́га о нас.

Иера́рха му́ченическим зря́ще благоле́пно укра́шена венце́м, Го́спода пое́м и превозно́сим во ве́ки.

Сла́ва Отцу́ и Сы́ну и Свято́му Ду́ху:

Тро́ицы уго́дника и кро́вь Тоя́ ра́ди излия́вшаго почти́м, Го́спода пою́ще и превознося́ще во вся́ ве́ки.

И ны́не и при́сно и во ве́ки веко́в. Ами́нь.

Богородичен: Свеща́тельну Тя́ и златоза́рну всели́выйся в Тя́ Све́т Непристу́пный, Де́во, показа́ свещу́ во вся́ ве́ки.

Песнь 9

Ирмос: Проявле́нное на горе́ законополо́жнику во огни́ и купине́, Рождество́ Присноде́вы, в на́ше ве́рных спасе́ние, пе́сньми немо́лчными велича́ем.

Припев: Священномучениче Анфиме, моли́ Бо́га о нас.

Ты́ у́бо овца́м па́стырь ве́рен показа́лся еси́, Па́стырю же овча́ приве́лся еси́ на же́ртву и сугу́бу прия́л еси́ сла́ву, те́м тя́ честву́юще ублажа́ем.

Припев: Священномучениче Анфиме, моли́ Бо́га о нас.

Ты́ начерта́ния воздержа́нием, преблаже́нне, благоче́стия шары́ себе́ вообрази́в, и́стинно по Бо́жию о́бразу ду́шу твою́ показа́л еси́, блаже́нне.

Сла́ва Отцу́ и Сы́ну и Свято́му Ду́ху:

Твоя́ преда́ния, о́тче, невре́дна соблюда́юще и страда́ние честву́юще, благоче́стно Тро́ицу во Еди́ном Божества́ Естестве́ пе́сньми непреста́нно блажи́м.

И ны́не и при́сно и во ве́ки веко́в. Ами́нь.

Богородичен: Противля́ющихся, Христе́, Твое́й Це́ркви мы́шцы сокруши́ Богоро́дицы ра́ди, да Тя́ непреста́нно велича́ем.

Свети́лен.

Ли́к приведи́ дне́сь ле́тный ве́сь, Никомиди́йский, ра́дуяся, гра́де, до́браго па́стыря твоего́, и взыгра́й, назира́теля име́яй, соблюда́юща тя́, вре́да вра́г вы́шша.

Сла́ва, и ны́не, Богородичен:

Со апо́столы моли́, Богоро́дице, Твоего́ Сы́на и Го́спода поми́ловатися все́м пою́щим Тя́, и сла́вящим, и во ико́нах Тя́ честву́ющим, и покланя́ющимся досто́йно, и любо́вию облобыза́ющим.

Молитва

О святы́й уго́дниче Бо́жий, священному́чениче Анфиме! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.