15 сентября

Канон второй преподобному Иоанну Постнику, патриарху Цареградскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глас 4:

Те́сным путе́м та́йных по́двигов / от ю́ности в ми́ре ше́ствовал еси́: / посто́м те́ло свое́ умерщвля́я, / ми́лостынями ни́щия ущедря́л еси́. / Сего́ ра́ди от смире́ния на высоту́ возведе́н был еси́ / мы же ублажа́ем Тя си́це: / Ра́дуйся Иоа́нне По́стниче, вселе́нский Святи́телю.

Кано́н, глас 8

Песнь 1

Ирмос: Во́ду проше́д, я́ко су́шу, и еги́петскаго зла избежа́в, израильтя́нин вопия́ше: Изба́вителю и Бо́гу на́шему пои́м.

Припев: Святителю отче Иоанне, моли́ Бо́га о нас.

Во́ду жи́ву благода́ти Ду́ха, пе́ти тя начина́ющу, испроси́ моли́твами твои́ми Святи́телю, да просла́влю тя во спасе́ние мое́.

Припев: Святителю отче Иоанне, моли́ Бо́га о нас.

И́мя нося́ благода́ти тезоиме́нное, преподо́бне Иоа́нне, па́че всего́ сию́ возжела́л еси́, и ра́ди тоя́ весь мир, я́ко ничто́же, вмени́л еси́.

Сла́ва Отцу́ и Сы́ну и Свято́му Ду́ху:

Немощны́ми отовсю́ду обложе́н и оживотворя́щую благода́ть Ду́ха попира́я, не вем, ка́ко спасу́ся: ве́ру же вме́сто дел мне вмени́в, Спа́се, по ми́лости Твое́й спаси́ мя.

И ны́не и при́сно и во ве́ки веко́в. Ами́нь.

Богородичен: О́браз Твой, Влады́чице, просла́вити хотя́, во сне стра́ждущей де́ве яви́ся и исцеле́ние да́ти обеща́я; те́мже и моя́ не́мощи посети́ и исцеле́ние те́лу да́руй, и ду́шу поми́луй, Блага́я.

Песнь 3

Ирмос: Небе́снаго кру́га Верхотво́рче Го́споди и Це́ркве Зижди́телю, Ты мене́ утверди́ в любви́ Твое́й, жела́ний кра́ю, ве́рных Утвержде́ние, Еди́не Человеколю́бче.

Припев: Святителю отче Иоанне, моли́ Бо́га о нас.

Небе́сныя жи́зни наслажда́тися от ю́ности восхоте́в, по́стничеству от млады́х ногте́й вда́лся еси́, ревни́телю Христо́в, благоче́стия подви́жниче, избра́нниче Бо́жий Иоа́нне.

Припев: Святителю отче Иоанне, моли́ Бо́га о нас.

Я́ко ры́барей апо́столы сотвори́ Иису́с ловцы́ челове́ков, и тебе́ от дея́ния зла́та ги́бнущаго, взыска́ти би́сера Еди́наго, Христа́, сокро́вище неистощи́мое Дух привле́кл есть.

Сла́ва Отцу́ и Сы́ну и Свято́му Ду́ху:

Мно́гажды жи́ти по Бо́зе обещава́яся, па́ки к ми́ру страсте́й прилепля́юся: гла́ден же сый, в покая́нии зову́ Тебе́, Отцу́ Всеблаго́му: моли́твами уго́дника Твоего́, Спа́се, спаси́ мя.

И ны́не и при́сно и во ве́ки веко́в. Ами́нь.

Богородичен: В пра́хе мно́гая ле́та в небреже́нии пребы́вая, боля́щей рабе́ Твое́й откры́лася еси́ и здра́вие подала́ еси́, милосе́рдия Ма́ти; и на́ших скверн не возгнуша́йся. Пречи́стая, но омы́й их благода́тию Ма́терски.

Седа́лен, глас 8:

Благода́ть креще́ния опа́сно сохраня́я, и в ми́ре сый житие́ свя́то проводи́л еси́, в посте́х и моли́твах, и ми́лостынех Бо́гу угожда́я, злых угреба́яся и непреста́нно в се́рдце взыва́я: Иису́се, Сы́не Бо́жий, Спа́се ми́ра, спаси́ нас.

Сла́ва: и ны́не. Богородичен: Я́ко смире́нная Де́ва, чту́щая Сло́во Бо́жие, изображе́на еси́ на ико́не, в пречи́стых рука́х Твои́х кни́гу держа́ща; сподо́би и нас во смире́нии у ног Иису́са, Сы́на Твоего́, я́ко Мари́я, седе́ти, благу́ю часть любви́ к Нему́ избра́вших.

Песнь 4

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Святителю отче Иоанне, моли́ Бо́га о нас.

В ми́ре живы́й, о свято́м и́ночестем житии́ слы́шав, мона́хов возлюби́л еси́, с те́ми вку́пе сла́вя в моли́твах Преми́рнаго Бо́га.

Припев: Святителю отче Иоанне, моли́ Бо́га о нас.

За́поведь но́вую храня́, ни́щих зело́ возлюби́л еси́, и сия́ всегда́ от сокро́вищ свои́х пита́я, от Христа́, в них живу́щаго, любо́вь стяжа́л еси́.

Сла́ва Отцу́ и Сы́ну и Свято́му Ду́ху:

Зако́н за́поведей и́щущим живота́ ве́чнаго соблюда́ти повеле́вый, от беззако́ний на́ших очи́сти нас и мирски́я и мона́хи моли́твами святы́х Твои́х благода́тию ту́не, Спа́се, спаса́я.

И ны́не и при́сно и во ве́ки веко́в. Ами́нь.

Богородичен: При́сно во хра́ме Зако́ну Бо́жию поуча́яся, угото́вала еси́ Себе́ в Храм Свят Законода́вцу Сло́ву, нас ра́ди безслове́сных воплоти́вшемуся и све́том ра́зума мир просвети́вшему.

Пе́снь 5

Ирмос: Просвети́ нас повеле́нии Твои́ми, Го́споди, и мы́шцею Твое́ю высо́кою Твой мир пода́ждь нам, Человеколю́бче.

Припев: Святителю отче Иоанне, моли́ Бо́га о нас.

Чистоту́ души́ и те́ла Твоего́ и целому́дрия сохрани́л еси́, в ми́ре живы́й, безпло́тным подо́бяся, и Спа́су вопия́ непреста́нно: от та́йных мои́х очи́сти Бо́же, и спаси́ мя.

Припев: Святителю отче Иоанне, моли́ Бо́га о нас.

В ми́ре и́нок сый ду́хом, с и́ночествующими обще́ние храни́л еси́; еди́наго же иду́щу сему́ с тобо́ю, глас с небесе́ глаго́лаше, ди́вно о тебе́ прорица́я: почто́ одесну́ю вели́каго гряде́ши?

Сла́ва Отцу́ и Сы́ну и Свято́му Ду́ху:

Ди́вному во святы́х Твои́х, Го́споди, дивлю́ся, сам же подража́ти им ника́коже возмого́х; и воззре́ти на преподо́бный о́браз Твой в них срамля́яся, то́кмо вопию́ Ти: Бо́же, поми́луй мя гре́шнаго.

И ны́не и при́сно и во ве́ки веко́в. Ами́нь.

Богородичен: Чистоты́ сокро́вище и высоту́ смире́ния возлюби́ в Тебе́ Зижди́тель, Пресвята́я Де́во; да плоть от Тебе́ прие́м, пло́тских страсте́й изба́вит нас Твои́м Ма́терним к Нему́ предста́тельством, Присноде́во.

Песнь 6

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зол душа́ моя́ испо́лнися и живо́т мой а́ду прибли́жися, и молю́ся, я́ко Ио́на: от тли, Бо́же, возведи́ мя.

Припев: Святителю отче Иоанне, моли́ Бо́га о нас.

Моли́твы непреста́нныя творя́ и преподо́бныя ру́ки чи́сте воздева́я, не утаи́лся еси́ я́ко град, наверху́ горы́ стоя́щ; и не хотя́щу ти, просвети́ся житие́ твое́; лю́дие же ви́девше до́брая дела́ твоя́, сла́вяху Отца́ Небе́снаго.

Припев: Святителю отче Иоанне, моли́ Бо́га о нас.

Сконча́вшуся первосвяти́телю ца́рствующаго гра́да, всем любе́зно бысть и́мя твое́, Иоа́нне; сего́ ра́ди на престо́л святи́тельский возведе́н был еси́, да ду́ши ве́рных, па́че зла́та и сребра́ честне́йшия, Царю́ всех устроя́еши.

Сла́ва Отцу́ и Сы́ну и Свято́му Ду́ху:

Вся́ческая Про́мыслом Твои́м управля́я, я́ко вся ве́дый, пути́ моя́ по во́ле Твое́й напра́ви, во смире́нии сохраня́я мя; моли́твы же Преподо́бнаго Твоего́ о мне прие́мля, Сам Христе́ Человеколю́бче, и́миже ве́си судьба́ми, спаси́ мя.

И ны́не и при́сно и во ве́ки веко́в. Ами́нь.

Богородичен: На смире́ние Твое́ призре́в Творе́ц, па́че небе́сных чино́в просла́ви Тя, вся ро́ды научи́в ублажа́ти Тя, су́щую Богоро́дицу; мы же с Арха́нгелом вопие́м Ти уми́льно: Ра́дуйся, Благода́тная, Госпо́дь с Тобо́ю.

Конда́к, глас 2:

Посто́м и моли́твами очи́стив се́рдце Твое́, благода́ть любве́ от Бо́га прия́л еси́, ни́щия удовля́я, немощны́я заступа́я; сего́ ра́ди Христо́с пасти́ о́вцы Своя́ поста́ви и в черто́г Небе́сный всели́ Тя, иде́же со ины́ми святи́тели сла́виши Тро́ицу Пресвяту́ю.

Песнь 7

Ирмос: От Иуде́и доше́дше, о́троцы, в Вавило́не иногда́ ве́рою Трои́ческою пла́мень пе́щный попра́ша, пою́ще: отце́в Бо́же, благослове́н еси́.

Припев: Святителю отче Иоанне, моли́ Бо́га о нас.

От попече́ний жите́йских свободи́вся, па́че по́стничества и милосе́рдия вда́лся еси́, высоту́ в смире́нии зря, нищету́ та́йную, я́ко бога́тство, почита́я; и первосвяти́тель сый, па́стве слугу́ себе́ вменя́ше.

Припев: Святителю отче Иоанне, моли́ Бо́га о нас.

Сам во всем подвиза́яся, не́мощи не́мощных в се́рдце свое́м носи́л еси́; и тех греха́ми, я́ко свои́ми, страда́я, пра́вила неудобоноси́мая ума́лил еси́, милосе́рдию Отца́ Небе́снаго подража́я.

Сла́ва Отцу́ и Сы́ну и Свято́му Ду́ху:

Оте́ческаго до́ма, я́ко блу́дный сын, бе́гая, в бесо́вское уны́ние никогда́ же впадо́х; па́че же Изба́вителю моему́ прилепля́яся, и тебе́, свя́тче, в хода́тая призыва́я, ве́рою зову́: Ты еси́ спасе́ние мое, Го́споди.

И ны́не и при́сно и во ве́ки веко́в. Ами́нь.

Богородичен: Еще́ на земли́ прославля́емая, в молча́нии слага́ла еси́ вся в се́рдце Твое́м, благода́ть Свята́го Ду́ха внутрь Себе́ храня́ и нас науча́я молвы́ жите́йския отбега́ти любве́ ра́ди Бо́жия.

Песнь 8

Ирмос: Царя́ Небе́снаго, Его́же пою́т во́и а́нгельстии, хвали́те и превозноси́те во вся ве́ки.

Припев: Святителю отче Иоанне, моли́ Бо́га о нас.

Сла́вы Ца́рствия Бо́жия взыску́я, че́сти и земны́я сподо́бился еси́, от Собо́ра бо оте́ц Вселе́нским ца́рскаго гра́да ра́ди именова́ся.

Припев: Святителю отче Иоанне, моли́ Бо́га о нас.

По́стническое житие́ сконча́в, ничто́же на земли́ оста́ви, то́чию па́мять пра́веднаго По́стника с похвала́ми.

Сла́ва Отцу́ и Сы́ну и Свято́му Ду́ху:

Оде́жды доброде́телей не стяжа́х, бра́чный хито́н благода́ти ту́не дарова́ти ми, Ми́лостиве, молю́ся.

И ны́не и при́сно и во ве́ки веко́в. Ами́нь.

Богородичен: В Ца́рство Тро́ицы превознесе́нная и одесну́ю Сы́на седя́щая, не забу́ди сродства́ Твои́х на земли́ су́щих.

Песнь 9

Ирмос: Вои́стину Богоро́дицу Тя испове́дуем, спасе́нии Тобо́ю, Де́во Чи́стая, с безпло́тными ли́ки Тя велича́юще.

Припев: Святителю отче Иоанне, моли́ Бо́га о нас.

Вели́к нарече́нный на земли́, ве́лий еси́ ны́не в Ца́рствии Небе́сном, я́ко сотвори́в и научи́в; моли́тву о воспева́ющих тя я́ко же́ртву принеси́ Искупи́телю.

Припев: Святителю отче Иоанне, моли́ Бо́га о нас.

Ве́дый не́мощь естества́ челове́ческаго, я́ко оте́ц чадолюби́вый, благода́ть тезоиме́нникам испроси́, от напа́стей лука́ваго изба́ви и с собо́ю жи́ти в ве́ки введи́.

Сла́ва Отцу́ и Сы́ну и Свято́му Ду́ху:

А́ще хощу́, а́ще ли же не хощу́, Христе́ Спа́се мой, спаси́ мя, не посра́мив наде́жды на Тя; да благода́рно с преподо́бным зову́ ны́не и во ве́ки: Аллилу́иа.

И ны́не и при́сно и во ве́ки веко́в. Ами́нь.

Богородичен: Во гра́дех и ве́сех Калу́жских ико́ною Свое́ю пребыва́я, посети́ и нас, в да́льнем разсе́янии су́щих, и моли́твами Ма́терними пути́ на́ша упра́ви.

Свети́лен:

Концы́ ми́ра днесь благослове́ние прие́млют, вселе́нскаго Святи́теля па́мять соверша́юще; мы же тя велича́юще, Спа́са прославля́юще, заступле́ния Твоего́ про́сим во е́же спасти́ся нам, По́стниче Спа́сов.

Сла́ва, и ны́не: Богородичен: Де́ва Пречи́стая, Ма́ти Пренепоро́чная, де́вственных похвало́, гре́шников наде́жда, скорбя́щих ра́досте, уныва́ющих отра́да, спаси́ мя к Тебе́ прибега́ющаго и сла́достное и́мя Твое́ призыва́юща: о Ма́ти на́ша, спаси́ всех нас.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Иоанне, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.