14 сентября
Канон преподобной Марфе Тамбовской
![Преподобной Марфе Тамбовской Преподобной Марфе Тамбовской](img_i/035.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, глас 4:
Чистоту́ жития́ твоего́ яви́вши, преподо́бная ма́ти Ма́рфо, в по́двизех покая́ния и смире́ния Бо́гу угоди́ла еси́, сего́ ра́ди благода́ть стяжа́ла еси́ лю́ди любо́вию огражда́ти, от скорбе́й и печа́лей избавля́ти. Моли́ Христа́ Бо́га дарова́ти нам ве́лию ми́лость.
Кано́н, глас 8.
Песнь 1.
Ирмос: Колесницегони́теля фарао́ня погрузи́, чудотворя́й иногда́ моисе́йский жезл, крестообра́зно порази́в, и раздели́в мо́ре: Изра́иля же беглеца́, пешехо́дца спасе́, песнь Бо́гови воспева́юща.
Припев: Преподобная мати Марфо, моли́ Бо́га о нас.
Стра́стными мя́ бу́рями всю́ду погружа́ема, и помышле́ний молво́ю ду́шу мою́ коле́блему, ко приста́нищу ти́хому Христо́вы во́ли, моли́твами твои́ми преподо́бная Ма́рфо, напра́ви, я́ко да досто́йно тя воспою́.
Припев: Преподобная мати Марфо, моли́ Бо́га о нас.
Де́вственными добро́тами просвеще́на, богоблаже́нная, Ма́рфо, Чи́стому Сло́ву уневе́стилася еси́, пожи́вши поще́нием боже́ственне: и Того́ живоно́сным стопа́м после́довала еси́, умерщвле́ние страсте́й претерпе́вши.
Сла́ва Отцу́ и Сы́ну и Свято́му Ду́ху:
Боже́ственных оте́ц наказа́нию после́довала еси́ сла́вная, Ма́рфо, и сих нра́ву чи́сте поревнова́ла еси́, воздержа́нием я́ко безпло́тна, и чистото́ю и де́вством пожи́вши, преподо́бная, и и́стинным смире́нием.
И ны́не и при́сно и во ве́ки веко́в. Ами́нь.
Богородичен: Боже́ственную Ру́чку и Трапе́зу, Хлеб живо́тный поне́сшую, неде́ланную Ни́ву, Го́ру Святу́ю, Богоро́дицу Де́ву пе́сньми сла́вим.
Песнь 3
Ирмос: Небе́снаго кру́га верхотво́рче Го́споди, и Це́ркве Зижди́телю, Ты мене́ утверди́ в любви́ Твое́й жела́ний Кра́ю, ве́рных Утвержде́ние, е́дине Человеколю́бче.
Припев: Преподобная мати Марфо, моли́ Бо́га о нас.
В небе́сныя черто́ги светоза́рныя всели́лася еси́, неве́ста избра́нна бы́вши Вседержи́телю, исцеле́ния ре́ки источа́еши, Ма́рфо, страстна́я нам тече́ния изсуша́ющи.
Припев: Преподобная мати Марфо, моли́ Бо́га о нас.
Украси́лася еси́ жела́нием кра́йним жела́ющи Христа́, премно́жеством благосе́рдия, пло́тию обнища́вшаго, и после́довала еси́ живо́тным Его́ словесе́м, жите́йская вся кра́сная возненави́девши.
Сла́ва Отцу́ и Сы́ну и Свято́му Ду́ху:
Позлаще́нне криле́ доброде́тели стяжа́вши, на высоту́ небе́сную возлете́ла еси́ блаже́нная, Ма́рфо, я́ко голуби́ца нетле́нная.
И ны́не и при́сно и во ве́ки веко́в. Ами́нь.
Богородичен: Род спасе́ся, Де́во, челове́ческий благода́тию обнища́вшаго пло́тию, из чре́ва Твоего́ неизрече́нно: те́мже чтим Тя, и благоче́стно ублажа́ем, Пречи́стая Де́во Богора́дованная.
Седа́лен, глас 4:
Красо́тами яви́лася еси́ де́вственно преукраша́ема, по́стнических свяще́нных по́двиг, я́ко неве́ста непоро́чная де́ва Христо́ва: и с Ним в нетле́нный вошла́ еси́ черто́г и красо́т Его́ наслажда́ешися, но моли́ спасти́ся нам от вся́кия беды́, любо́вию пою́щим тя.
Сла́ва, и ны́не, Богородичен:
Чи́стая Всенепоро́чная, и Неискусобра́чная, еди́на безле́тнаго Сы́на и Сло́во Бо́жие в ле́те Ро́ждшая: Того́ со́ святы́ми и честны́ми апо́столы, му́ченики и проро́ки, и преподо́бными моли́, дарова́ти нам очище́ние, и ве́лию ми́лость.
КрестоБогородичен:
Де́во Пренепоро́чная Ма́ти Христа́ Бо́га, ору́жие про́йде Твою́ пресвяту́ю Ду́шу, егда́ распина́ема ви́дела еси́ во́лею Сы́на и Бо́га Твоего́: Его́же Благослове́нная моля́щи не преста́й, проще́ние прегреше́ний на́м дарова́ти.
Песнь 4.
Ирмос: Услы́шах Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.
Припев: Преподобная мати Марфо, моли́ Бо́га о нас.
Све́тлое твое́ торжество́, све́том сия́ющее Бо́жия Ду́ха, озаря́ет ду́ши на́ша ве́рою пою́щих тя, Ма́рфо, преподо́бная.
Припев: Преподобная мати Марфо, моли́ Бо́га о нас.
Чудесы́ Боже́ственными уве́рила еси́ неве́дущих Влады́ку, и к позна́нию Его́ возврати́ла еси́, пре́лести тьму оста́вльших.
Сла́ва Отцу́ и Сы́ну и Свято́му Ду́ху:
Да́ры Христу́ принесла́ еси́, чи́стое умерщвле́ние удо́в, и труды́ воздержа́ния: и проти́ву прия́ла еси́ Небе́сное Ца́рство, Ма́рфо, и ве́чнующее наслажде́ние.
И ны́не и при́сно и во ве́ки веко́в. Ами́нь.
Богородичен: Смири́вши спаси́ мя, высокому́дрием живу́щаго, Ро́ждшая возне́сшаго смири́вшееся естество́ на́ше Пречи́стая.
Пе́снь 5
Ирмос: У́тренююще вопие́м Ти, Го́споди, спаси́ ны: Ты бо еси́ Бог наш, ра́зве бо Тебе́ ино́го не ве́мы.
Припев: Преподобная мати Марфо, моли́ Бо́га о нас.
Ру́це твои́ преподо́бно воздвиза́еми к Зижди́телю, ма́ти, Ма́рфо, низложи́ша вра́жия шата́ния.
Припев: Преподобная мати Марфо, моли́ Бо́га о нас.
Удержа́в ру́ку твою́ десну́ю Вы́шний, наста́вил тя есть ма́ти, к небе́сному своему́ наслажде́нию.
Сла́ва Отцу́ и Сы́ну и Свято́му Ду́ху:
Стезю́ те́сную проше́дши в поще́нии, к широте́ приспе́ла еси́ ра́йстей, Ма́рфо, всече́стная.
И ны́не и при́сно и во ве́ки веко́в. Ами́нь.
Богородичен: И́же Богоро́дицу Тя́ неве́дущии Богома́ти, све́та не́ и́мут ви́дети, Ро́ждшагося из Тебе́ Пречи́стая.
Песнь 6.
Ирмос: Ри́зу мне пода́ждь све́тлу, одея́йся све́том я́ко ри́зою, многоми́лостиве Христе́ Бо́же наш.
Припев: Преподобная мати Марфо, моли́ Бо́га о нас.
Умертви́вши двиза́ния плотска́я, над страстьми́ вельми́ воцари́лася еси́, и ны́не всечестна́я, Ма́рфо, в безстра́стных живе́ши све́тлостех.
Припев: Преподобная мати Марфо, моли́ Бо́га о нас.
О́бразу Спа́сову навы́кла еси́ покланя́тися сла́вная, де́лы и словесы́ твои́ми спаси́тельная Его́ соблюда́ющи уче́ния.
Сла́ва Отцу́ и Сы́ну и Свято́му Ду́ху:
О́блак тя́ Христо́с показа́ ма́ти, Ма́рфо, дождь источа́ющий живо́тный, ве́рою прося́щим у тебе́ пресла́вная.
И ны́не и при́сно и во ве́ки веко́в. Ами́нь.
Богородичен: Кра́сен па́че все́х челове́к, Сын Твой Пречи́стая, добро́тою Божества́, а́ще и плоть бысть нас ра́ди.
Конда́к, глас 3:
Тамбо́вскую моли́твенницу преподо́бную Ма́рфу почти́м, та бо а́нгельски на земли́ пожи́вши, мно́гим путь ко спасе́нию указа́, сего́ ра́ди испо́лнися Бо́жия благода́ти.
И́кос:
Струи́ мне сло́ва даждь, Бо́же мой, и исто́чник благочи́ния сотвори́ мой ум, и благослови́ язы́к мой, да воспою́ Твою́ а́гницу, ю́же венча́л еси́ Ты бла́гостию Твое́ю: а́ще бо́ Сам не́ да́си ми сло́ва досто́йнаго, ка́ко принесу́ да́р ни́щий, бога́тней в словесе́х и дея́ниих? Тем пода́ждь ми си́лу, испове́дати ея́ натриже́ния, кре́пко бо зве́ри победи́ла есть: но́ моли́твами ея́ проти́вных шата́ние разори́.
Песнь 7.
Ирмос: О́троцы евре́йстии в пещи́ попра́ша пла́мень дерзнове́нно, и на ро́су огнь преложи́ша, вопию́ще: благослове́н еси́ Го́споди Бо́же, во ве́ки.
Припев: Преподобная мати Марфо, моли́ Бо́га о нас.
О добро́те тле́ющей, Ма́рфо преподо́бная, небрегла́ еси́, смотря́ющи та́мо су́щая воздая́ния и свет, и сла́ву Бо́жию нестаре́ющую и красоту́, и Боже́ственное селе́ние.
Припев: Преподобная мати Марфо, моли́ Бо́га о нас.
Ми́р премени́ла еси́ тле́ющий преми́рным живото́м нестаре́ющим, и вре́менную пи́щу пребыва́ющим существо́м, и плотски́м обру́чником, небе́снаго Жениха́.
Сла́ва Отцу́ и Сы́ну и Свято́му Ду́ху:
Ра́зум боголюби́в стяжа́ла еси́, Ма́рфо, с пло́тию а́нгелом уподо́билася еси́, бдя́щи те́пле любо́вию, и пою́щи: благослове́н еси́ Го́споди Бо́же во ве́ки.
И ны́не и при́сно и во ве́ки веко́в. Ами́нь.
Богородичен: Виждь ско́рбь мою́ Де́во, ю́же ми наведе́ мно́жество зол мои́х, и родства́ о́гненнаго исхити́ мя, вопию́щаго: благослове́н еси́ Го́споди Бо́же во ве́ки.
Песнь 8:
Ирмос: Богоглаго́ливии о́троцы в пещи́, со огне́м пла́мень попира́юще, поя́ху: благослови́те дела́ Госпо́дня Го́спода.
Припев: Преподобная мати Марфо, моли́ Бо́га о нас.
Укра́шена сия́нием чистоты́, и чи́стым житие́м просвеще́на ма́ти, предстои́ши Жениху́ твоему́ Христу́ Бо́гу на́шему.
Припев: Преподобная мати Марфо, моли́ Бо́га о нас.
Боле́зни разли́чныя уврачу́ет челове́ков, и прого́нит бесо́вския па́кости, те́ло твое́ свято́е, преподо́бная, во гро́бе пресла́вно сокрыва́емое.
Сла́ва Отцу́ и Сы́ну и Свято́му Ду́ху:
Свяще́нна же́ртва принесла́ся еси́, и приноше́ние све́тлое, преподо́бная ма́ти Ма́рфо, я́ко кади́ло Благоуха́нное, все́х Влады́це Христу́ Бо́гу на́шему.
И ны́не и при́сно и во ве́ки веко́в. Ами́нь.
Богородичен: Бе́з истле́ния Сло́ва па́че слове́с родила́ еси́, тле́ния вся́каго нас избавля́ющаго: сего́ ра́ди Тя, Де́во, ве́рою велича́ем.
Песнь 9.
Ирмос: Устраши́ся всяк слух неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от Деви́ческаго чре́ва быв челове́к: те́мже Пречи́стую Богоро́дицу ве́рнии велича́ем.
Припев: Преподобная мати Марфо, моли́ Бо́га о нас.
Возжеле́ла еси́ добро́ту мы́сленную Жениха́, и чи́сто возлюби́ла еси́ Его́. Где́ почива́еши? Где́ ли пасе́ши? Те́пле вопия́ла еси́: да почи́ю у Тебе́, и в Твои́х све́тлостех наслажду́ся, велича́ющи Твою́ бла́гость.
Припев: Преподобная мати Марфо, моли́ Бо́га о нас.
Ра́зум име́ла еси́ в твое́й души́, и смире́ние, и Боже́ственную кро́тость, ве́ру несумне́нну, н наде́жду и любо́вь, ю́же к Бо́гу: всено́щными моли́твами приближа́ющися Ему́, и та́мо су́щими све́тлостьми блаже́нная, Ма́рфо, озаря́ема и просвеща́ема.
Сла́ва Отцу́ и Сы́ну и Свято́му Ду́ху:
Собра́шася днесь лю́дие, хвала́ми возвели́чити Го́спода, возвели́чившаго твое́ свято́е торжество́ сие́: в не́мже помина́й нас помина́ющих тя, предстоя́щи Христу́ Жениху́ твоему́, преподо́бная, Ма́рфо, и всечестна́я.
И ны́не и при́сно и во ве́ки веко́в. Ами́нь.
Богородичен: Пощади́ мя Бо́же, рожде́йся от Де́вы, и сохрани́в Ро́ждшую Тя́ нетле́нну по́ рождестве́, егда́ ся́деши суди́ти дела́ моя́, беззако́ния и грехи́ моя́ пре́зри, я́ко безгре́шен и ми́лостив Бог, и Человеколю́бец.
Свети́лен:
Кня́зя утаи́вшися студа́, и сего́ в прему́дростнем о́бразе показа́ безу́мна, де́ва су́щи душе́ю и те́лом, была́ еси́ муж ра́зумом и ве́рою, Ма́рфо, преподо́бная, де́вственников добро́та, чернори́зиц украше́ние.
Богородичен: День мне возсия́й разу́мнаго весе́лия, Ты бо еси́ Чи́стая свет, и живо́т су́щих во тьме́: хоте́нию бо мо́щна еси́, и е́же твори́ти и́маши я́ко су́щи всех Влады́чица, изба́ви всех от бед, и всех скорбя́щих от собла́зн лука́ваго.
Молитва
О свята́я преподо́бная Ма́рфо. По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́щи Престо́лу Бо́жию, приими́ моле́ния на́ша и ко всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Преподобной Марфе Тамбовской Преподобной Марфе Тамбовской](img_b/035.jpg)