Шрифт

14 сентября.

Началу Индикта, то есть Церковного новолетия.

Тропа́рь инди́кта, гла́с 2:

Всея́ тва́ри Соде́телю, времена́ и ле́та во Свое́й вла́сти положи́вый, благослови́ вене́ц ле́та бла́гости Твоея́, Го́споди, сохраня́я в ми́ре гра́д Тво́й, моли́твами Богоро́дицы, и спаси́ ны.

Кано́н Инди́кта, гла́с 1.

Пе́снь 1.

Ирмос: Пои́м, вси́ лю́дие, от го́рькия рабо́ты фарао́ни Изра́иля Изме́ншему и во глубине́ морсте́й нога́ми немо́крыми Наста́вльшему, пе́снь побе́дную, я́ко просла́вися.

Воспои́м вси́ Христу́, Имже соста́вишася вся́ческая и в Не́мже соверши́шася неразлу́чна, я́ко из безнача́льнаго ро́ждшуся Бо́га Отца́ Ипоста́сному Сло́ву, пе́снь побе́дную, я́ко просла́вися.

Воспои́м вси́ Христу́, Отчим благоволе́нием я́вльшуся из Де́вы и пропове́давшу ле́то Госпо́дне прия́тно, на́м на избавле́ние, пе́снь побе́дную, я́ко просла́вися.

В Назаре́т прише́д Пода́тель Зако́на, в де́нь суббо́тный уча́ше, законополага́я евре́ем прише́ствия Своего́ неизрече́ннаго, и́мже, я́ко Ми́лостив, спаса́ет ро́д на́ш.

Богородичен: Пою́ще, вси́ ве́рнии, преди́вную Отрокови́цу, Христа́ вселе́нней возсия́вшую и ра́дости вся́ческая испо́лнившую присносу́щныя жи́зни, при́сно восхваля́ем, я́ко просла́вися.

Пе́снь 3.

Ирмос: Утверди́ мене́, Христе́, на недви́жимом ка́мени за́поведей Твои́х и просвети́ мя све́том лица́ Твоего́: не́сть бо свя́т па́че Тебе́, Человеколю́бче.

Утверди́, Бла́же, его́же насади́ любо́вию на земли́ десни́ца Твоя́, плодови́т виногра́д, сохраня́я Твою́ Це́рковь, Всеси́льне.

В де́лех духо́вных богокра́сных крася́щияся наста́вшее, Го́споди, ле́то сие́, преведи́, Влады́ко, и́же ве́рою Тя́ песносло́вящия, Бо́же вся́ческих.

Ти́хий ми́, Христе́, ле́тный кру́г дава́й, Ще́дре, и насы́ти мя́ слове́с Боже́ственных Твои́х, я́же яви́лся еси́ глаго́ля иуде́ем в суббо́тах.

Богородичен: Яко еди́ну преесте́ственно па́че челове́ка благода́ть во Твою́ утро́бу прие́мшую и невра́щно ро́ждшую Христа́ Бо́га на́шего, при́сно Тя́ сла́вим.

Та́же седа́лен инди́кта, гла́с 8.

Иже времена́ плодоно́сна и дожди́ с небесе́ подая́ су́щим на земли́, и ны́не, прие́мля мольбы́ рабо́в Твои́х, от вся́кия изба́ви ну́жды гра́д Тво́й, щедро́ты бо Твоя́ и́стинно на все́х де́лех Твои́х. Те́мже вхо́ды благослови́ и исхо́ды, дела́ испра́ви в на́с ру́к на́ших и согреше́ний проще́ние да́руй на́м, Бо́же: Ты́ бо из несу́щих вся́ческая во е́же бы́ти, я́ко Си́лен, приве́л еси́.

Сла́ва, И ны́не, Богородичен:

Наста́ви ны́ на пу́ть покая́ния, уклоня́ющияся при́сно к злы́м безпу́тием и Преблага́го прогне́вающия Го́спода, Неискусобра́чная, Благослове́нная Мари́е, прибе́жище отча́янных челове́ков, Бо́жие обита́лище.

Пе́снь 4.

Ирмос: Разуме́х, Всеси́льне, Твое́ смотре́ние и со стра́хом просла́вих Тя́, Спа́се.

Нача́ло Тебе́ ле́та лю́дие Твои́ прино́сят, Ангельскими пе́сньми славосло́вяще Тя́, Спа́се.

Яко Человеколю́бец сподо́би наче́ншим ле́то и сконча́ти Тебе́ благоуго́дно, Христе́.

Вседержи́телю, Еди́не Го́споди, ле́т обхожде́ния, ути́шив, ми́ру да́руй.

Богородичен: Яко приста́нище ны́не ду́ш на́ших и тве́рду наде́жду, Богоро́дицу вси́ воспои́м.

Пе́снь 5.

Ирмос: От но́щи у́тренююще, пое́м Тя́, Христе́, Отцу́ Собезнача́льна и Спа́са ду́ш на́ших: ми́р ми́рови пода́ждь, Человеколю́бче.

Исполня́яй вся́ческая бла́гости, Христе́, Ты́ благорастворе́нием и благопло́дием, благослове́ньми венча́емо, многокру́жное ле́то рабо́м Твои́м да́руй.

Ле́тное воздая́ние покажи́ на́м преложе́ние к лу́чшим, ми́рное же устрое́ние ве́дущим Тя́, Сло́ве Бо́жий, уподо́бльшася челове́ком.

На зе́млю прише́л еси́, Собезнача́льне Отцу́, пле́нником отпуще́ние, слепы́м же прозре́ние от Отца́ возвеща́я и вре́мя прия́тно.

Богородичен: На́ши наде́жды, Богоро́дице Чи́стая, и на́ше жела́ние на Тя́ возлага́ем, Ми́лостива на́м да́ждь, Де́во, Его́же родила́ еси́.

Пе́снь 6.

Ирмос: Проро́ка спа́сл еси́ от ки́та, Человеколю́бче, и мене́ из глубины́ прегреше́ний возведи́, молю́ся.

Житие́ нача́ти благоуго́дно Тебе́, Влады́ко, с ле́тным начина́нием на́с сподо́би.

Дне́й духо́вных, в поуче́нии Зако́на Твоего́, покажи́ испо́лнены, ще́дре Спа́се, пою́щия Тя́.

Богородичен: Ро́ждшая Го́спода, Богоро́дице Всенепоро́чная, изба́ви от бе́д ве́рою пою́щия Тя́, Пречи́стая.

Конда́к инди́кта, гла́с 2:

В Вы́шних живы́й, Христе́ Царю́, все́х ви́димых и неви́димых Тво́рче и Зижди́телю, Иже дни́ и но́щи, времена́ и ле́та сотвори́вый, благослови́ ны́не вене́ц ле́та, соблюди́ и сохрани́ в ми́ре гра́д, и лю́ди Твоя́, Многоми́лостиве.

Пе́снь 7.

Ирмос: Отроцы, благоче́стию совоспита́ни, злочести́ваго веле́ния небре́гше, о́гненнаго преще́ния не убоя́шася, но посреди́ пла́мене стоя́ще поя́ху: отце́в Бо́же, благослове́н еси́.

Начина́ющии ле́то, и пе́сней нача́ток сотворя́ем ца́рствующему Христу́, Ца́рством безконе́чным, правосла́внии лю́дие, благоче́стно пою́ще: отце́в Бо́же, благослове́н еси́.

Сы́й пре́жде ве́к, на ве́к же и еще́ Госпо́дь, воспева́ющим Тя́, Христе́, Исто́чник бла́гости, благи́х Твои́х даро́в ле́то сие́ испо́лни: отце́в Бо́же, благослове́н еси́.

Богородичен: Яко раби́ Влады́це, на моли́тву Чи́стую Ма́терь Твою́ Тебе́ предлага́ем, Христе́, от вся́каго обстоя́ния лю́ди Твоя́, Бла́же, изба́вити, пою́щия: отце́в Бо́же, благослове́н еси́.

Пе́снь 8.

Ирмос: Песносло́вцы в пещи́ спа́сшаго де́ти и громопла́менную прело́жшаго на ро́су, Христа́ Бо́га по́йте и превозноси́те во вся́ ве́ки.

Яко Нача́льнику спасе́ния, Христе́, нача́ток Тебе́ прино́сит ле́тный честна́я Це́рковь, зову́щи: по́йте и превозноси́те Христа́ во ве́ки.

Из не су́щих вся́ческая му́дре обнови́вшаго Созда́теля и производя́щего време́н обраще́ния хоте́нием, по́йте и превозноси́те Его́ во ве́ки.

Изводя́щему вся́ческая Бо́гу и времена́ изменя́ющему, на многообра́зное челове́ков управле́ние, пое́м: хвали́те и превозноси́те Христа́ во ве́ки.

Богородичен: Богома́терь Де́ву Чи́стую, ле́т обхожде́ньми же и обраще́ньми, правосла́вно, челове́честии собо́ри, пое́м Тя́, я́ко Богоро́дицу и все́х спасе́ние.

Пе́снь 9.

Ирмос: Образ чи́стаго рождества́ Твоего́ огнепали́мая купина́ показа́ неопа́льная, и ны́не на на́с напа́стей свире́пеющую угаси́ти мо́лимся пе́щь: да Тя́, Богоро́дице, непреста́нно велича́ем.

Сло́во Бо́жие и Си́ла, и́стинная Му́дрость и Ипоста́сная, содержа́щая и пра́вящая вся́ческая му́дре, и ны́не наста́вшее рабо́м Твои́м вре́мя, во устрое́нии ти́се произведи́.

Вся́ дела́ Твоя́, Го́споди: небеса́, земля́, све́т и мо́ре, во́ды и вси́ исто́чницы, со́лнце же, луна́ и тма́, зве́зды, о́гнь, челове́цы и ско́ти, со Ангелы восхваля́ют Тя́.

Еди́н еси́ Преве́чный, я́ко Творе́ц веко́в, и ца́рствующее триипоста́сное Еди́но Божество́ неразде́льное, мольба́ми Чи́стыя Богома́тере ле́то плодоно́сно насле́дию Твоему́ покажи́.

Богородичен: Спа́се всего́, и Строи́телю, и Зижди́телю, и Вседержи́телю тва́ри, мольба́ми безсе́менно Ро́ждшия Тя́, ми́р ми́ру Твоему́ пода́ждь, соблюда́я Це́рковь всегда́ немяте́жну.

Свети́лен инди́кта.

Бо́же бого́в и Го́споди, триипоста́сное Естество́, Непристу́пне, Присносу́щне, Несозда́нне и все́х Соде́телю, Вседержи́телю, Тебе́ припа́даем вси́ и Тя́ мо́лим: настоя́щее ле́то сие́ я́ко Бла́г благослови́в, сохрани́ в ми́ре Импера́тора, и вся́ лю́ди Твоя́, Ще́дре.

Сла́ва, И ны́не, инди́кта.

Соде́телю и Прави́телю всея́ тва́ри сы́й, времена́ и ле́та положи́в в Твое́й вла́сти, ле́тний кру́г, благослове́ньми, Ще́дре, бла́гости венча́й, в ми́ре сохраня́я Твоя́ лю́ди невре́дны и це́лы, мо́лимся, моли́твами Ро́ждшия Тя́ и боже́ственных Ангел.

Стихи́ры инди́кта. Гла́с 3.

Преве́чное Сло́во Отчее, Иже во о́бразе Бо́жии сы́й и соста́вивый тва́рь из не су́щаго во е́же бы́ти, времена́ и ле́та в Свое́й вла́сти положи́вый, благослови́ вене́ц ле́та бла́гости Твоея́, да́руя ми́р це́рквам Твои́м, и побе́ды воинству, благопло́дие же земли́, и на́м ве́лию ми́лость.

Гла́с 4.

Ца́рствие Твое́, Христе́ Бо́же, ца́рство все́х веко́в, и влады́чество Твое́ во вся́ком ро́де и ро́де, вся́ бо му́дростию сотвори́л еси́, времена́ и ле́та на́м предложи́в. Те́мже, благодаря́ще о все́х и за вся́, вопие́м: благослови́ вене́ц ле́та бла́гости Твоея́ и сподо́би на́с неосужде́нно вопи́ти Тебе́: Го́споди, сла́ва Тебе́.

Ше́ствия Твоя́, Бо́же, ше́ствия ве́лия и чу́дна: те́м строе́ния Твоего́ си́лу велича́ем, я́ко Све́т от Све́та прише́л еси́ во окая́нный ми́р Тво́й и пе́рвую погуби́л еси́ кля́тву ве́тхаго Ада́ма, я́ко благоволи́л еси́, Сло́ве, и на́м му́дростию времена́ и ле́та положи́л еси́, е́же сла́вити вседе́тельную Твою́ бла́гость: Го́споди, сла́ва Тебе́.

Сла́ва, И ны́не, инди́кта. Гла́с 8.

Неизрече́нною му́дростию соста́вивый вся́ческая, Сло́ве, Христе́ Бо́же, времена́ и ле́та на́м предложи́вый, дела́ ру́к Твои́х благослови́, си́лою Твое́ю возвесели́, подая́ на ва́рвары кре́пость, я́ко Еди́н Бла́г и Человеколю́бец.