14 сентября.

Канон святым мученицам сорока женам и святому Аммуну диакону учителю их.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 1:

А́гницы слове́сныя/ А́гнцу и Па́стырю приведо́стеся муче́нием ко Христу́,/ тече́ние сконча́вше, и ве́ру соблю́дше./ Те́мже днесь ра́достною душе́ю соверша́ем, досточу́дныя,/ святу́ю ва́шу па́мять,// Христа́ велича́юще.

Кано́н святы́х же́н. Гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Святии мученицы, моли́те Бо́га о нас.

Тве́рдо на противобо́рца подвиза́стеся, му́ченицы, посто́м у́бо пе́рвее, второ́е же кро́вным страда́нием, сего́ ра́ди ва́ша па́мяти ве́рою почита́ем.

Припев: Святии мученицы, моли́те Бо́га о нас.

Уязви́вшеся любо́вию на́с ра́ди Претерпе́вшаго Кре́ст же и сме́рть, Сего́ стопа́м после́доваша святы́я жены́, плотску́ю не́мощь забы́вше.

Сла́ва Отцу́ и Сы́ну и Свято́му Ду́ху:

Еллинския же́ртвы и де́монская водруже́ния ору́жием ве́ры низложи́сте и принесо́стеся ко хра́му небе́сному, сосу́ди одушевле́ннии, му́ченицы всечестни́и.

И ны́не и при́сно и во ве́ки веко́в. Ами́нь.

Богородичен: Укре́пльшеся благода́тию от Твоея́ Возсия́вшаго утро́бы, Всенепоро́чная, отрокови́цы де́вы отрази́ша му́к треволне́ние и в сле́д Тебе́ приведо́шася, ра́дующеся.

Пе́снь 3.

Ирмос: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.

Припев: Святии мученицы, моли́те Бо́га о нас.

Кре́постию всеси́льною укрепля́еми, противобо́рцев попра́сте си́лу, сего́ ра́ди я́ко победоно́сицы от Христа́ венча́стеся.

Припев: Святии мученицы, моли́те Бо́га о нас.

Яви́шася зве́рская зия́ния Боже́ственною си́лою Христо́вою неде́йственна: и изба́вистеся, богоно́сицы, невреди́мы, Бо́га почита́юще.

Сла́ва Отцу́ и Сы́ну и Свято́му Ду́ху:

Воззре́нием к Бо́гу обожа́еми, многобо́жия хла́д отри́нусте и к теплоте́ вы́шния сла́вы, страстоно́сицы, достиго́сте.

И ны́не и при́сно и во ве́ки веко́в. Ами́нь.

Богородичен: Зна́юще благоче́стно, пропове́даем Тя́ всеи́стинную Бо́жию Ма́терь, Всенепоро́чная: Тобо́ю бо на́м Созда́тель приобщи́тися сподо́би.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Святии мученицы, моли́те Бо́га о нас.

Претерпе́вше му́ки и сокруше́ние те́ла разли́чными о́бразы, раздробле́ние же уде́с и опале́ние, небе́сная селе́ния насле́довасте, насла́ждшеся дре́ва жи́зни, досточу́днии.

Припев: Святии мученицы, моли́те Бо́га о нас.

Деви́ц блаже́нных по́двигу удиви́шася небе́сныя си́лы, я́ко врага́ победи́ша в же́нстем естестве́, укрепля́еми си́лою от Жены́ Возсия́вшаго.

Припев: Святии мученицы, моли́те Бо́га о нас.

Отве́ргше ми́ра суету́ всю́, Бо́гу Еди́ному все́ю душе́ю прилепи́стеся, те́м воздержа́ния боле́зни и страда́ния претерпе́сте, неве́сты Христо́вы терпели́вии.

Сла́ва Отцу́ и Сы́ну и Свято́му Ду́ху:

Прекре́пкое я́ко ору́жие кре́ст обнося́ще, к сопоста́тным противоста́сте ополче́нием, со Христо́м же побе́ду отнесо́сте, победи́вшим ми́р си́лою Божества́.

И ны́не и при́сно и во ве́ки веко́в. Ами́нь.

Богородичен: Сни́де, я́ко до́ждь на руно́, во утро́бу Твою́, богоглаго́ливый дре́вле рече́ проро́к, Всенепоро́чная, Его́же во дву́ существу́ родила́ еси́, Ему́же взыва́ем: сла́ва, Христе́, си́ле Твое́й.

Пе́снь 5

Ирмос: Нечести́вии не у́зрят сла́вы Твоея́, Христе́, но мы́ Тя́, Единоро́дне, Оте́ческия сла́вы Сия́ние Божества́, от но́щи у́тренююще, воспева́ем Тя́, Человеколю́бче.

Припев: Святии мученицы, моли́те Бо́га о нас.

Яко а́гницы непоро́чныя, я́ко же́ртвы прия́тныя, Агнцу и́стинному и Па́стырю, му́ченицы, принесо́стеся приноше́ния всебога́тая и прия́тна всесожже́ния.

Припев: Святии мученицы, моли́те Бо́га о нас.

Умерщвле́ни бы́вше те́лом, ожи́сте душе́ю, Умертви́вшему кре́пость сме́рти, му́ченицы, я́ко уподо́бльшеся, и кресту́, и сме́рти, и стра́сти во́льней.

Сла́ва Отцу́ и Сы́ну и Свято́му Ду́ху:

Еди́н ра́зум иму́ще в телесе́х мно́гих, Еди́наго Го́спода Иису́са, разли́чными ра́нами стру́жеми и огне́м сожига́еми, испове́даху богому́дрыя.

И ны́не и при́сно и во ве́ки веко́в. Ами́нь.

Богородичен: Воздви́гни па́дша мя́ в ро́ве искуше́ний и упра́ви, Бо́га Ко́рмчию Ро́ждшая, еди́на Всенепоро́чная, пе́рвее соедини́вшаго разстоя́щияся бла́гостию.

Пе́снь 6.

Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

Припев: Святии мученицы, моли́те Бо́га о нас.

Разраже́на и нога́ми же́нскими попира́ема, зря́щи прама́терь, боже́ственне ра́дуется, ту́ю ле́стию из рая́ пе́рвее изгна́вшего.

Припев: Святии мученицы, моли́те Бо́га о нас.

Воздержа́нием к страда́нию усе́рдно совоку́пльшеся, Жениху́ ду́ш ны́не нетле́нне совокупи́стеся, и в черто́зе Боже́ственнем, ра́достною душе́ю водворя́етеся.

Сла́ва Отцу́ и Сы́ну и Свято́му Ду́ху:

Возвыша́емая му́к свере́пая волне́ния, му́чениц корабле́й потопи́ти не возмого́ша: держа́вною бо руко́ю к Боже́ственным приста́нищем достиго́ша.

И ны́не и при́сно и во ве́ки веко́в. Ами́нь.

Богородичен: Глаго́лов Твои́х сбытия́ зря́щи, возвели́чи наипа́че, Богома́ти, Тя́ Возвели́чившаго, ро́ди бо вси́ Тя́ ны́не и́стинно ублажа́ют.

Седа́лен святы́х же́н, гла́с 1.

Агницы слове́сныя, Агнцу и Па́стырю приведо́стеся ве́рно муче́нием, тече́ние соверши́вше и ве́ру соблю́дше. Те́м ра́достно дне́сь восхваля́ем, досточу́днии, свяще́нную ва́шу па́мять, Христа́ велича́юще.

Пе́снь 7.

Ирмос: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Припев: Святии мученицы, моли́те Бо́га о нас.

Ко́ль непобеди́мо твое́ мудрова́ние, Амму́не богоно́се: и́бо, нача́льник ли́ка де́в, му́к не убоя́лся еси́, с ни́ми скончева́яся, я́ко диа́кон и таи́нник боже́ственныя сла́вы, пе́л еси́: препе́тый Го́споди, Бо́же оте́ц, благослове́н еси́.

Припев: Святии мученицы, моли́те Бо́га о нас.

Яко невестоводи́тель му́др, словесы́ помазу́еши му́жества, к Жениху́ взира́ти и плотски́я терпе́ти боле́зни, зову́щия му́ченицы: препе́тый Го́споди, Бо́же оте́ц, благослове́н еси́.

Сла́ва Отцу́ и Сы́ну и Свято́му Ду́ху:

Да не облени́мся, се́ отве́рзеся три́знище, отрокови́цы, ста́нем му́жески, Христо́с венцы́ простира́ет, те́ла на́шего не пощади́м, вопия́ху до́блии на три́знищи: препе́тый Го́споди, Бо́же оте́ц, благослове́н еси́.

И ны́не и при́сно и во ве́ки веко́в. Ами́нь.

Богородичен: Благослове́н Пло́д благослове́ннаго чре́ва Твоего́, Его́же благословя́т небе́сныя си́лы и челове́честии собо́ри, на́с Изба́вльшаго кля́твы дре́вния, Благослове́нная.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Святии мученицы, моли́те Бо́га о нас.

Све́тлы себе́ от крове́й ри́зы му́ченических обложи́сте, совле́кшеся и́стинно тле́емаго греха́ми челове́ка и воспева́юще: Го́спода по́йте, дела́, и превозноси́те Его́ во вся́ ве́ки.

Припев: Святии мученицы, моли́те Бо́га о нас.

Оби́льнаго све́та светоли́тиями, Со́лнца мы́сленнаго Боже́ственными светлостьми́, му́ченицы, освеща́еми, но́щь претеко́сте безбо́жия, пою́ще единомышле́нием души́: Го́спода по́йте, дела́, и превозноси́те Его́ во вся́ ве́ки.

Припев: Святии мученицы, моли́те Бо́га о нас.

Яко а́гницы, я́ко нескве́рныя ю́ницы, я́ко боже́ственныя голуби́цы, я́ко самово́льная заколе́ния, приведо́стеся, му́ченицы, Зижди́телю, и я́ко же́ртвы непоро́чны, согла́сно пою́ще: Го́спода по́йте, дела́, и превозноси́те Его́ во вся́ ве́ки.

Сла́ва Отцу́ и Сы́ну и Свято́му Ду́ху:

Повеле́нием мучи́телей пребеззако́нных непра́ведную подъя́сте сме́рть, на у́ды ссеца́еми, па́лицами сокруша́еми, неми́лостивне бие́ми, огне́м всесожига́еми, мече́м посека́еми; те́м безсме́ртная прия́сте с ра́достию бога́тная воздая́ния.

И ны́не и при́сно и во ве́ки веко́в. Ами́нь.

Богородичен: Во сле́д Тебе́ теко́ша жены́, Мѵ́ра благово́ннаго ве́дуще, Всечестна́я Богоневе́сто, еди́на Неискусобра́чная, из утро́бы Твоея́ возсия́вшаго Единоро́днаго Сы́на, и с Тобо́ю ца́рствуют и́стинно, песносло́вяще Христа́ во ве́ки.

Песнь 9

Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́, те́м Тя́ вси́ велича́ем.

Припев: Святии мученицы, моли́те Бо́га о нас.

Подаю́т исцеле́ний то́ки тре́бующим, я́ко от исто́чника Всеблаже́нныя, уставля́ют па́губу неду́гов и страсте́й отгоня́ют зно́й, сердца́ боголюби́вых напая́ют к благопло́дию боже́ственных де́яний.

Припев: Святии мученицы, моли́те Бо́га о нас.

Боже́ственный диа́кон Амму́н, Келси́на же, и к си́м четы́редесять боже́ственныя и богому́дрыя жены́, пострада́вше зако́нно, венча́шася и ны́не со Ангелы лику́ют, я́же по до́лгу ублажа́ем.

Сла́ва Отцу́ и Сы́ну и Свято́му Ду́ху:

Вознесо́стеся, держа́ву на враги́ взе́мше, и Ангелом уподо́бистеся, дре́ва наслажда́етеся невозбра́нно жи́зненнаго в раи́, богоневе́сты, исто́чник ны́не до́брых прия́сте, о ми́ре моля́щеся.

И ны́не и при́сно и во ве́ки веко́в. Ами́нь.

Богородичен: Му́дрости вмести́лище па́че ума́ лу́чшаго яви́лася еси́, Отрокови́це непоро́чная, одушевле́н Престо́л же и две́рь; те́м я́ко Цари́цу возлюби́ша де́вы Тя́, Де́во, в сле́д Тебе́ приведо́шася, Богоотрокови́це.

Стихира святы́х же́н, гла́с 2.

Егда́ стра́стию Твое́ю, Го́споди, вселе́нную утверди́л еси́, тогда́ и немощству́ющии препоя́сашася си́лою, жены́ му́жествоваша на горча́йшаго мучи́теля, и побежде́ние ма́тернее испра́вивше, па́ки в сла́дости ра́йстей бы́ша, в сла́ву Твою́, ро́ждшагося от Жены́, и спа́сшаго ро́д челове́ческий.

Молитва

К вам, о святи́и мученицы Христовы, я́ко путево́дным свети́льникам, дея́ньми свои́ми освети́вшим путь Небе́снаго восхо́да, аз многогре́шный смире́нно коле́на се́рдца моего́ преклоня́ю и из глубины́ души́ взыва́ю: умоли́те о мне Человеколю́бца Бо́га, да не попу́стит ми еще́ блужда́ти по распу́тиям греха́, но да просвети́т мои́ ум и се́рдце све́том благода́ти Своея́, я́ко да то́ю озаря́ем и подкрепля́ем, возмогу́ про́чее вре́мя земна́го жития́ пра́вою стезе́ю непреткнове́нно преити́ и хода́тайством ва́шим к Преблаго́му Го́споду сподо́блюся, поне́ вма́ле прича́стник бы́ти духо́вныя ва́шея трапе́зы в Небе́сном черто́зе Царя́ сла́вы. Ему́же со Безнача́льным Его́ Отце́м и Пресвяты́м, Благи́м и Животворя́щим Ду́хом бу́ди сла́ва, честь и поклоне́ние во ве́ки веко́в. Ами́нь.