13 сентября.

Канон Положению честнаго пояса Пресвятой Богородицы.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Богоро́дице Присноде́во, челове́ков покро́ве, ри́зу и по́яс пречи́стаго Твоего́ телесе́, держа́вное гра́ду Твоему́ обложе́ние дарова́ла еси́, безсе́менным рождество́м Твои́м, нетле́нна пребыва́ющи, о Тебе́ бо и естество́ обновля́ется и вре́мя. Те́мже мо́лим Тя́ ми́р гра́ду Твоему́ дарова́ти, и душа́м на́шим ве́лию ми́лость.

Велича́ние:

Велича́ем Тя́, Пресвята́я Де́во, и чте́м всечестна́го Твоего́ по́яса в Халкопра́тии положе́ние.

Стихи́ра, гла́с 2:

Яко венце́м пресве́тлым, Пречи́стая Богоро́дице, по́ясом Твои́м святы́м Це́рковь Бо́жия обложи́ся, и све́тится, ра́дующися дне́сь, и та́йно ликовству́ет, Влады́чице, вопию́щи Тебе́: ра́дуйся, диади́мо честна́я и ве́нче боже́ственныя сла́вы; ра́дуйся, еди́на сла́вы исполне́ние и ве́чное весе́лие; ра́дуйся, к Тебе́ притека́ющим приста́нище, и предста́тельнице, и спасе́ние на́ше.

Други́й кано́н, гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Пресвятая Богородице, спаси нас.

Свещу́ светоявле́нную и незаходи́мую Де́вы хра́м, я́ко не́бо, обре́т све́тло, Тоя́ пресве́тлый по́яс, вселе́нную дне́сь чуде́с облиста́ет заря́ми.

Припев: Пресвятая Богородице, спаси нас.

Кре́пость же и утвержде́ния сою́з, Твои́м, Пречи́стая, Боже́ственным я́ко вои́стинну по́ясом, мы́сленне опоя́сан гра́д Тво́й, держа́ву нераздра́нну и́мать, те́мже и о Тебе́ хва́лится.

Сла́ва Отцу́ и Сы́ну и Свято́му Ду́ху:

Дре́вле я́ко вои́стинну пречестна́го киво́та Твоя́ ра́ка, Богороди́тельнице, яви́ся су́щим на земли́, не скрижа́ли нося́щая, но ве́рно соблюда́юща и́стины позна́ния.

И ны́не и при́сно и во ве́ки веко́в. Ами́нь.

Арома́ты та́йныя пролива́ются во хра́ме Чи́стыя от честны́я дне́сь ра́ки и исполня́ют духо́внаго благово́ния все́х, любо́вию к то́й притека́ющих.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Пресвятая Богородице, спаси нас.

Да почти́м, ве́рнии, я́ко совокупле́ния к Бо́гу сою́з, Чи́стыя дне́сь по́яс, и ве́рно да поклони́мся.

Припев: Пресвятая Богородице, спаси нас.

Всегда́шнии то́ки благода́тей, Чи́стая, от пречи́стыя Твоея́ ра́ки теку́щии, все́х ве́рных напоя́ют.

Сла́ва Отцу́ и Сы́ну и Свято́му Ду́ху:

Исцеле́ния ве́рным многопе́тый на́м дне́сь Пречестны́я честны́й по́яс источа́ет благода́тию.

И ны́не и при́сно и во ве́ки веко́в. Ами́нь.

Яко роса́ у́тренняя, весе́лие Твое́, Чи́стая, точа́щи, страсте́й пе́щь Тя́ при́сно воспева́ющим угаша́ет.

Конда́к, гла́с 2.

Богоприя́тное Твое́ чре́во, Богоро́дице, объе́мший по́яс Тво́й честны́й, держа́ва гра́ду Твоему́ необори́ма и сокро́вище е́сть, благи́х неоску́дно, еди́на ро́ждшая Присноде́во.

Та́же седа́лен, гла́с 4.

Яко боже́ственное возложе́ние, во хра́ме Бо́жии, Чи́стая, освяти́ся по́яс всечестны́й, и́мже препоя́сала еси́ ложесна́ непоро́чная, Бо́га заче́ншая. Те́мже, сему́ ве́рою прикаса́ющеся и стра́хом че́стно облобыза́юще, освяща́емся.

Сла́ва, и ны́не, гла́с то́йже.

Положе́ние Твоего́ честна́го по́яса Це́рковь Твоя́ све́тло пра́зднует и приле́жно зове́т Ти́, Де́во Чи́стая: вся́ опоя́ши на си́лу вра́жию, низложи́ шата́ние безбо́жных ва́рвар, и на́ш упра́ви живо́т, де́лати Госпо́дня Боже́ственная хоте́ния.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Пресвятая Богородице, спаси нас.

Яко пречестно́е утвержде́ние, Богоро́дице, Творе́ц и Созда́тель Тя́ водрузи́в, я́коже звезда́ми, украси́л Тя́ е́сть, Боже́ственными сия́нии, и́миже просвеща́еши концы́.

Припев: Пресвятая Богородице, спаси нас.

Тя́ держа́ву гра́д Тво́й, Богоро́дице, и тве́рдое основа́ние име́я, боже́ственным по́ясом Твои́м содержи́тся: сою́з неразори́мь се́й, в бра́нех протяза́ющ.

Сла́ва Отцу́ и Сы́ну и Свято́му Ду́ху:

От земли́ на́с возвлачи́т, Богороди́тельнице, к небеси́ боже́ственный по́яс Тво́й, любо́вию Твое́ю и того́ возводи́мых. Те́м Тя́ сла́вим, я́ко вину́ сла́вы лу́чшия.

И ны́не и при́сно и во ве́ки веко́в. Ами́нь.

Се́ благода́ть неисчерпа́емая, прииди́те вси́ усе́рдным се́рдцем, почерпи́те ре́ки, точа́щия незави́стно, празднолю́бцы, от честны́я ра́ки Пречи́стыя Ма́тере.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Пресвятая Богородице, спаси нас.

Ты́, Го́споди, Твою́ Ма́терь возвели́чил еси́, Ты́ возвы́сил еси́ над вся́ мы́сленныя вла́сти, без сравне́ния сла́вы Тоя́.

Припев: Пресвятая Богородице, спаси нас.

Благода́ть Бо́жия ны́не незави́стно подае́тся, Пречи́стая Богоро́дице, от честны́я ра́ки Твоея́, ве́рою покланя́ющимся Тебе́.

Сла́ва Отцу́ и Сы́ну и Свято́му Ду́ху:

Твое́ю си́лою ве́рнии ца́рие опоясу́ются, Тя́ сою́з, Богоро́дице, Тво́й гра́д хва́лящи, по́ясом Твои́м честву́ется.

И ны́не и при́сно и во ве́ки веко́в. Ами́нь.

Ве́дома Твоя́ вои́стинну благода́ть пока́зася, Пречи́стая, пресла́вно де́йствующая си́лы и зна́мения по все́й земли́.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Пресвятая Богородице, спаси нас.

Всю́ Тя́ преесте́ственне просла́ви Госпо́дь, всю́ возвы́сив Тя́ еди́ну, всю́ Тя́ почте́ па́че сло́ва, Богоро́дице, хра́м с по́ясом и боже́ственною ра́кою.

Сла́ва Отцу́ и Сы́ну и Свято́му Ду́ху:

Истека́ют, я́ко из пучи́ны, струи́ благода́ти, от ра́ки Пречи́стыя и тва́рь всю́ окружа́ют напая́юще, ве́рно покланя́ющияся Рождеству́ Твоему́.

И ны́не и при́сно и во ве́ки веко́в. Ами́нь.

Кре́пость Тя́, ве́рнии, стяжа́вше и похвалу́, опоясу́ются сла́вою, честны́й Тво́й по́яс, Богороди́тельнице, иму́ще, я́ко пресве́тлую у́тварь и честну́ю.

Конда́к, гла́с 4.

Честна́го по́яса Твоего́ положе́ние пра́зднует дне́сь Тво́й, Препе́тая, хра́м и приле́жно взыва́ет Ти́: ра́дуйся, Де́во, христиа́н похвало́.

Икос:

Твои́м мя́ просвети́ све́том, Де́во Богоро́дице, и разруши́ мою́ тму́, во уме́ лежа́щую лю́те, я́ко да чи́сто Тебе́ приступлю́, Чи́стей, земны́я обожи́вшей, воспою́ Тво́й, Всенескве́рная и Непоро́чная, боже́ственный по́яс, светле́йший со́лнца, его́же ми́р се́й и́мать я́ко тве́рд покро́в и наде́жду, побежда́ющ сове́ты враго́в беззако́нных, и си́х кова́рства разоря́ющ, и всегда́ сохраня́ющ Твоя́ рабы́. Ра́дуйся, Де́во, христиа́н похвало́.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Пресвятая Богородице, спаси нас.

Ты́, я́ко Со́лнце пра́вды, Еди́не сы́й Светода́вче, Боже́ственне хра́м Чи́стыя просвети́л еси́ разли́чными Твои́ми дарова́нии: в не́мже сия́ющи, лучи́ изъясня́ет по́яс Тоя́.

Припев: Пресвятая Богородице, спаси нас.

Яко злату́ю ста́мну, Тво́й по́яс окружа́юще, еди́на Чи́стая, Боже́ственней вои́стинну причаща́емся ны́не сла́дости благода́тей, Всеблагослове́нная, и скрижа́лей вы́шшую Ти́, я́ко су́щую, почита́ем сию́.

Сла́ва Отцу́ и Сы́ну и Свято́му Ду́ху:

Источа́ют вои́стинну чуде́с, Отрокови́це Чи́стая, ча́ши, Твоя́ благода́ть ве́рным, и незави́стно от Твоея́ ра́ки происхо́дят, я́ко от ина́го Еде́ма ре́ки.

И ны́не и при́сно и во ве́ки веко́в. Ами́нь.

Ны́не приступи́те с весе́лием вси́, и́же на земли́, прииди́те, — ра́ка прорица́ет та́йно Госпожи́ — объе́млите Пресла́вную, во мне́ сокро́виществовавшую по́яс Сво́й.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Пресвятая Богородице, спаси нас.

Скрижа́ли боже́ственныя дре́вле киво́т, руко́ю напи́санныя Бо́жиею, содержа́ше, Пречи́стая: Твоя́ же, Чи́стая Влады́чице, чествова́нная и честна́я ра́ка по́яс содержи́т, те́х законополо́жника, содержа́щия в себе́ стра́шное та́инство.

Припев: Пресвятая Богородице, спаси нас.

Ангели, Пречи́стая, Чи́стая, ны́не в честне́м Твое́м хра́ме слику́ют и объе́млют, Влады́чице, честны́й и святы́й Тво́й по́яс, ему́же любо́вию, и ра́достию, и весе́лием мно́гим покланя́емся, Тя́ воспева́юще, сла́ву ро́да на́шего.

Сла́ва Отцу́ и Сы́ну и Свято́му Ду́ху:

Же́зл, Яже Цве́т жи́зни прозя́бший, Ты́ еси́ все́х ра́дость, многоце́нная чи́стая мирополо́жница Ду́ха, сокро́вище благи́х, арома́т исто́чник, из нея́же ми́ро исцеле́ний излива́ет Боже́ственная ра́ка.

И ны́не и при́сно и во ве́ки веко́в. Ами́нь.

Воспева́ют, Пречи́стая, Чи́стая, вели́чия Твоя́, мы́сленная во́инства, пропове́дуют вси́ патриа́рси и проро́цы я́вственно, апо́столи со свяще́нными и му́чеников ли́кове, с ни́миже покланя́емся Тебе́.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Пресвятая Богородице, спаси нас.

Черто́г пречестны́й вои́стинну, Богороди́тельнице, ра́ка Твоя́ яви́ся, святы́й Тво́й по́яс, я́ко де́вственную и неве́стническую оде́жду, досто́йне содержа́щи и соблюда́ющи, я́ко живота́ сокро́вище.

Припев: Пресвятая Богородице, спаси нас.

Боже́ственною диади́мою красоты́ Це́рковь, Богоро́дице, оде́явшися, боже́ственным и всесвяты́м Твои́м по́ясом дне́сь ца́рски весели́тся и красу́ется сла́вою Твое́ю.

Припев: Пресвятая Богородице, спаси нас.

Хра́м, по всему́ подо́бящийся небесе́м, благокра́сный дне́сь Де́вы, ве́рнии, прие́мше дарова́ний зари́, я́коже зве́здными красота́ми осия́еми, светли́теся.

Сла́ва Отцу́ и Сы́ну и Свято́му Ду́ху:

Имать святы́й Тво́й по́яс, Богороди́тельнице, гра́д Тво́й, сою́з ми́ра, и сте́ну, и догма́т боже́ственное еди́нство, и правосла́вных похвалу́, и царе́й одоле́тельная.

И ны́не и при́сно и во ве́ки веко́в. Ами́нь.

Воспева́ем неизглаго́ланную сла́ву и неизче́тную Твою́ благода́ть: Ты́ бо еси́ исто́чник прему́дрости, из нея́же сло́во все́м происхо́дит, чту́щим Тя́, Пречи́стая, и велича́ющим Рождество́ Твое́.

Свети́лен.

По́яс честны́й Тво́й, и́мже свяще́нное Твое́ препоя́сала еси́ те́ло, Богоотрокови́це Де́во, чту́ще, пра́зднуем сего́ ны́не положе́ние, и́мже тли́ избавля́емся, и бе́д, и напа́стей, Ма́ти Бо́га Вы́шняго.

Стихи́ры, гла́с 4.

Яко пресве́тлым венце́м, Богоро́дице Пречи́стая, / святы́м по́ясом Твои́м обложи́ся Це́рковь, / и ра́дующися, светле́ется дне́сь, / и лику́ет та́йно, / вопию́щи Тебе́, Влады́чице: / ра́дуйся, ве́нче / и диади́мо боже́ственная; / ра́дуйся, еди́на исполне́ния моего́ сла́ва / и весе́лие ве́чное.

Ты́, Пречи́стая Влады́чице, / держа́вное огражде́ние, / незы́блемо же утвержде́ние и спасе́ние / Твои́м лю́дем и гра́ду Твоему́ су́щи, / дала́ еси́, я́ко све́тло одея́ние, / пречестны́й по́яс Тво́й, / спаса́ющь от вся́ких злоключе́ний / ве́рою и те́плым усе́рдием / сего́ чту́щих, Богоневе́сто.

Хра́м Тво́й, Пречи́стая, / я́ко исто́чник неисчерпа́емый / чуде́с дне́сь показа́ся: / ре́ки бо благода́ти незави́стно пролива́ются / от святы́я Твоея́ ра́ки / и ве́рных помышле́ние увеселя́ют, / ве́рою и любо́вию Тебе́ вопию́щих: / ра́дость, и весе́лие, / и жи́знь на́ша Ты́ еси́.

Сла́ва, и ны́не, гла́с 2:

Смы́сл очи́стивше и у́м, со Ангелы и мы́ торжеству́ем, све́тло начина́юще Дави́дскую пе́снь Отрокови́це, Неве́сте все́х Царя́, Христа́ Бо́га на́шего: воскресни́, Го́споди, — глаго́люще, — в поко́й Тво́й, Ты́ и Киво́т святы́ни Твоея́; я́ко бо пала́ту красну́, Сию́ украси́в и причте́ Ю гра́ду Твоему́, Влады́ко, стро́ити и покрыва́ти от супоста́тных пога́н держа́вною си́лою Твое́ю, моли́твами Ея́.

Молитва

Цари́це моя́ преблага́я, наде́ждо моя́ Богоро́дице, прия́телище си́рых и стра́нных предстáтельнице, скорбя́щих рáдосте, оби́димых покрови́тельнице! Зри́ши мою́ беду́, зри́ши мою́ скорбь, помози́ ми я́ко не́мощну, окорми́ мя я́ко стрáнна. Оби́ду мою́ ве́си, разреши́ ту, я́ко во́лиши: я́ко не и́мам ины́я по́мощи ра́зве Тебе́, ни ины́я предстáтельницы, ни благи́я уте́шительницы, то́кмо Тебе́, о Богомáти, я́ко да сохрани́ши мя и покры́еши во ве́ки веко́в. Ами́нь.