Шрифт

13 сентября.

Канон Положению честнаго пояса Пресвятыя Богородицы.

Положению честнаго пояса Пресвятыя Богородицы
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Богоро́дице Присноде́во, челове́ков покро́ве, ри́зу и по́яс пречи́стаго Твоего́ телесе́, держа́вное гра́ду Твоему́ обложе́ние дарова́ла еси́, безсе́менным рождество́м Твои́м, нетле́нна пребыва́ющи, о Тебе́ бо и естество́ обновля́ется и вре́мя. Те́мже мо́лим Тя́ ми́р гра́ду Твоему́ дарова́ти, и душа́м на́шим ве́лию ми́лость.

Кано́на пе́рвый, гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Пресвятая Богородице, спаси нас.

Кре́постию мя́ Боже́ственною благоче́стно препоя́ши, песносло́вяща Тво́й свяще́нный по́яс, боже́ственно су́щи гра́ду Твоему́ опоя́сание, и держа́ва, Отрокови́це, и незы́блемо остене́ние, Чи́стая Де́во Препе́тая.

Припев: Пресвятая Богородице, спаси нас.

Ты́ Бо́га си́льнаго родила́ еси́, препоясу́ющаго благочести́выя вся́ си́лою, Всенепоро́чная. Те́мже Тя́ блажи́м и боже́ственный Тво́й по́яс, ра́достно облобыза́юще, благода́ть почерпа́ем и ми́лость.

Сла́ва Отцу́ и Сы́ну и Свято́му Ду́ху:

Ра́достно положе́нию дне́сь о́крест лику́ем свяще́ннаго по́яса честны́я Богоотрокови́цы, от Нея́же на́м препоя́сание нетле́ния истка́ся, и нераздира́ема оде́жда, и ри́за свяще́ния.

И ны́не и при́сно и во ве́ки веко́в. Ами́нь.

Под Твою́ Твои́ лю́дие, Всенепоро́чная, притека́ют си́лу, под Тво́й покро́в прибега́ют всегда́, все́м бу́ди по́мощь и я́же ко спасе́нию все́м пода́ждь проше́ния, спаса́ющи от бе́д ду́ши на́ша.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Пресвятая Богородице, спаси нас.

Обновля́ется се́рдце, ве́рою те́плою прикаса́ющеся по́ясу свяще́нному Де́вы, и препоясу́ется си́лою непобеди́мою на стра́сти нечи́стыя и вра́г безпло́тных, невреди́мо пребыва́юще.

Припев: Пресвятая Богородице, спаси нас.

Пребыва́ет нетле́нен еще́ свяще́нный по́яс Тво́й, и́же Твое́ нетле́нное те́ло, Отрокови́це, опоя́са, освяща́ющ благоче́стно приступа́ющии, и тли́ изыма́ющ неду́г и скорбе́й.

Сла́ва Отцу́ и Сы́ну и Свято́му Ду́ху:

Была́ еси́ до́м преудо́брен, Чи́стая, Сло́ва, из Тебе́ воплоще́ннаго, и во святе́м хра́ме Твое́м благоволи́ла еси́ по́яс Тво́й положи́ти: его́же облобыза́юще, освяща́емся.

И ны́не и при́сно и во ве́ки веко́в. Ами́нь.

Честны́й Тво́й по́яс че́стно вси́ ра́достным се́рдцем облобыза́ем, че́сть су́щую все́х ве́рных, Богоро́дице, я́ко пречестно́му Твоему́ прикосну́вшуся телеси́.

Конда́к, гла́с 2.

Богоприя́тное Твое́ чре́во, Богоро́дице, объе́мший по́яс Тво́й честны́й, держа́ва гра́ду Твоему́ необори́ма и сокро́вище е́сть, благи́х неоску́дно, еди́на ро́ждшая Присноде́во.

Та́же седа́лен, гла́с 4.

Яко боже́ственное возложе́ние, во хра́ме Бо́жии, Чи́стая, освяти́ся по́яс всечестны́й, и́мже препоя́сала еси́ ложесна́ непоро́чная, Бо́га заче́ншая. Те́мже, сему́ ве́рою прикаса́ющеся и стра́хом че́стно облобыза́юще, освяща́емся.

Сла́ва, и ны́не, други́й, гла́с то́йже.

Положе́ние Твоего́ честна́го по́яса Це́рковь Твоя́ све́тло пра́зднует и приле́жно зове́т Ти́, Де́во Чи́стая: вся́ опоя́ши на си́лу вра́жию, низложи́ шата́ние безбо́жных ва́рвар, и на́ш упра́ви живо́т, де́лати Госпо́дня Боже́ственная хоте́ния.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Пресвятая Богородице, спаси нас.

Взя́тся к Све́ту незаходи́мому, преста́вльшися, оста́вила еси́ Тя́ блажа́щим, вме́сто телесе́ Твоего́, Чи́стая, честны́й по́яс, исто́чник чуде́с су́щи, и ме́сто спасе́ния, и огражде́ние сему́, чту́щему Тя́ гра́ду, Пречи́стая.

Припев: Пресвятая Богородице, спаси нас.

Яко в но́во не́бо, мы́ вхо́дим в Тво́й хра́м, иде́же сокро́вище положи́ся, я́коже со́лнце светоза́рно, Тво́й Боже́ственный по́яс, лучи́ чуде́с испуща́ющь, и все́х сердца́ озаря́ющ, Отрокови́це, и страсте́й мглу́ отгоня́ющ.

Припев: Пресвятая Богородице, спаси нас.

Ты́ киво́т мы́сленнаго свяще́ния еси́, Чи́стая Всепе́тая, и честну́ю сию́ ра́ку, иму́щую по́яс, его́же на Себе́ носи́ла еси́, подае́ши лю́дем Твои́м прибе́жище ве́лие, и исто́чник исцеле́ний неистоща́емый.

Сла́ва Отцу́ и Сы́ну и Свято́му Ду́ху:

Принесе́ся Твоему́ гра́ду многобога́тный да́р — честны́й по́яс Тво́й, Всенепоро́чная, и положи́ся све́тло в се́й де́нь в се́м Боже́ственнем хра́ме Твое́м, и бы́сть ве́лия пра́здника, Богоро́дице, те́пле лю́бящим Тя́ вина́.

И ны́не и при́сно и во ве́ки веко́в. Ами́нь.

Зако́на се́ни и проро́к гада́ния предсказа́ху: бы́ти Тебе́, Пречи́стая, Бо́гу Ма́терь всеи́стинную, Еюже кля́тва исчезе́ и процвете́ соверше́нное благослове́ние, и спаси́тельная благода́ть, ве́рою и любо́вию пою́щим Тя́.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Пресвятая Богородице, спаси нас.

По́ясу боже́ственному, положе́ну дне́сь во хра́ме Твое́м, Богора́дованная, с ни́м положи́ся благи́х вся́ко дая́ние тре́бующим, и наполня́ется вся́к, кто́ свяще́ния приходя́й, проше́ния ве́рно прие́мля.

Припев: Пресвятая Богородице, спаси нас.

Украси́ся, Де́во, Сло́ва Прекра́снаго поро́ждши, и во Твое́м кра́снем благоволи́ла еси́ дому́ положи́тися кра́сному по́ясу, и́же Твое́ кра́сное те́ло, Богоро́дице, красно́ опоя́са.

Сла́ва Отцу́ и Сы́ну и Свято́му Ду́ху:

Тво́й святы́й хра́м, я́коже други́й ра́й, все́м познава́ется: посреде́ стяжа́, я́коже благово́нен шипо́к, по́яс Тво́й, благово́ния Боже́ственнаго исполня́ющь сердца́, ве́рно приступа́ющим, Всенепоро́чная.

И ны́не и при́сно и во ве́ки веко́в. Ами́нь.

Ту́чи Боже́ственныя о́блак была́ еси́, Пренепоро́чная, иска́пающий спасе́ния во́ду, и зе́млю, олядене́вшую грехми́, к плодоно́сию преводя́щи благоче́стия. Сего́ ра́ди ве́рно Тя́ сла́вим.

Пе́снь 6.

Ирмос: Бе́здна грехо́в и прегреше́ний бу́ря мя́ смуща́ет и во глубину́ ну́жднаго ре́ет мя́ отча́яния, но Твою́ кре́пкую ру́ку мне́ простри́, я́ко Петро́ви, о Упра́вителю! и спаси́.

Припев: Пресвятая Богородице, спаси нас.

Но́во родила́ еси́ на́м я́ко Отроча́, пре́жде ве́к су́щаго, и обновля́еши сердца́, грехми́ обетша́вшая, прие́мшая обновле́ние, положе́нием честна́го по́яса Твоего́, Отрокови́це Присноде́во.

Припев: Пресвятая Богородице, спаси нас.

Свята́я Твоя́ це́рковь ди́вна в пра́вду е́сть, и́же чу́дный Тво́й по́яс, точа́щий чудеса́, стяжа́вши, бе́дным пучи́на явля́ется исцеле́ний, Богороди́тельнице Ма́ти Де́во.

Сла́ва Отцу́ и Сы́ну и Свято́му Ду́ху:

Возвесели́ся вся́ка душа́, совоку́пльшися во святе́м хра́ме Твое́м и в не́м зря́щи, Богоро́дице, по́яс Тво́й, я́коже со́лнце све́тло, све́т облиста́ющ дарова́ний Вседе́теля и Боже́ственнаго Ду́ха.

И ны́не и при́сно и во ве́ки веко́в. Ами́нь.

Укрепи́ на́ша, Чи́стая, сердца́, презре́вши вся́ согреше́ния, и препоя́ши си́лою, по́яс Тво́й ве́рно я́коже многоце́нно стяжа́вших, и неотъе́млемо сокро́вище.

Конда́к, гла́с 4.

Честна́го по́яса Твоего́ положе́ние пра́зднует дне́сь Тво́й, Препе́тая, хра́м и приле́жно взыва́ет Ти́: ра́дуйся, Де́во, христиа́н похвало́.

Икос:

Твои́м мя́ просвети́ све́том, Де́во Богоро́дице, и разруши́ мою́ тму́, во уме́ лежа́щую лю́те, я́ко да чи́сто Тебе́ приступлю́, Чи́стей, земны́я обожи́вшей, воспою́ Тво́й, Всенескве́рная и Непоро́чная, боже́ственный по́яс, светле́йший со́лнца, его́же ми́р се́й и́мать я́ко тве́рд покро́в и наде́жду, побежда́ющ сове́ты враго́в беззако́нных, и си́х кова́рства разоря́ющ, и всегда́ сохраня́ющ Твоя́ рабы́. Ра́дуйся, Де́во, христиа́н похвало́.

Пе́снь 7.

Ирмос: Бо́жия снисхожде́ния о́гонь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Припев: Пресвятая Богородице, спаси нас.

Все́х Цари́ца, к небе́сным се́лом отше́дши, оста́ви бога́тство царю́ все́х градо́в — Сво́й по́яс, и́мже спаса́ются от наше́ствия ви́димых и неви́димых вра́г.

Припев: Пресвятая Богородице, спаси нас.

Ко исто́чнику ны́не присту́пим, иска́пающему благода́ть и ми́лость, ра́це честне́й, иму́щей по́яс всечестны́й поче́тшия челове́ческое смеше́ние честны́м Рождество́м Свои́м, Де́вы же и Ма́тере.

Сла́ва Отцу́ и Сы́ну и Свято́му Ду́ху:

Хвали́те Го́спода, си́лы вся́ небе́сныя, и Сего́ Ро́ждшую, челове́честии язы́цы вси́, просла́вите: я́ко по́яс Сво́й дарова́, прибе́жище и́стинно и спасе́ние ве́рным.

И ны́не и при́сно и во ве́ки веко́в. Ами́нь.

Да кропя́т свы́ше пра́вду о́блацы дне́сь, положе́нием по́яса Твоего́, Облаче богора́дованный, и да сладкопое́т душа́ вся́ка, ра́дующися: благослове́н Бо́г оте́ц на́ших.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Пресвятая Богородице, спаси нас.

Якоже престо́л свя́т, ковче́г положи́ся, вну́трь невходи́мых свяще́нных све́тло, еди́ныя Богоотрокови́цы и Цари́цы все́х Чи́стыя по́яс иму́щий поко́йный: от него́же тружда́ющимся во мно́гих боле́знех поко́й соверше́н прихо́дит незави́стно.

Припев: Пресвятая Богородице, спаси нас.

На земли́ Го́спода свяще́нно воплоти́ла еси́ и рука́ми святы́ми вои́стинну опоя́сала еси́, препоясу́ющаго благочести́выя си́лою; ны́не же возше́дши небе́с превы́ше, оста́вила еси́ челове́ком честны́й Тво́й по́яс, Де́во Богоро́дице, держа́ву и покро́в.

Сла́ва Отцу́ и Сы́ну и Свято́му Ду́ху:

Неду́гующих исцеле́ние, поползну́вшихся утвержде́ние и уныва́ющих благоду́шие боже́ственно, корми́ло пла́вающих, заблу́ждших обраще́ние, после́дующая честно́му Твоему́ по́ясу, Чи́стая Де́во, Боже́ственная благода́ть вои́стинну е́сть, ему́же ве́рою покланя́емся во вся́ ве́ки.

И ны́не и при́сно и во ве́ки веко́в. Ами́нь.

Соверша́юще дне́сь свято́е положе́ние по́яса Твоего́ боже́ственнаго, свяще́нное торжество́, раби́ Твои́, чти́м и ра́достию вопие́м Ти́: ра́дуйся, Богоро́дице, ра́досте Ангелов и все́х челове́ков, ве́рою пою́щих: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Пресвятая Богородице, спаси нас.

Се́ Боже́ственный о́др Соломо́нов, его́же си́льнии окружа́ют шестьдеся́т, рече́ния писа́ний, я́коже на одре́ ца́рсте, в ковче́зе че́стне дне́сь по́яс полага́ет Сво́й, на воззва́ние все́м ве́рным и благочести́вым в снабде́ние.

Припев: Пресвятая Богородице, спаси нас.

О, Гра́де Царя́ небе́снаго, о не́мже возглаго́лашася пресла́вная! Положи́ Твоему́ гра́ду да́р че́стен и свя́т, всесвяты́й Тво́й по́яс, во утвержде́ние все́м ве́рным, и́мже венцено́сцы побежда́ют супоста́ты, Правосла́вием сия́юще.

Припев: Пресвятая Богородице, спаси нас.

Иска́пайте, го́ры, ны́не сла́дость, и хо́лми, весе́лие ве́чное, патриа́рх собо́ри и му́ченик ли́цы, проро́ков же сосло́вие, боже́ственных апо́столов со́нм честны́й, весели́теся со все́ми на́ми, в положе́нии боже́ственнаго по́яса Богоотрокови́цы.

Сла́ва Отцу́ и Сы́ну и Свято́му Ду́ху:

Освяти́ла еси́ вся́ Твои́м, Пресвята́я Де́во, рождество́м и ны́не на́м подала́ еси́ премно́гое просвеще́ние — пресвяты́й по́яс Тво́й, его́же положе́нием вся́ земля́ лику́ет и почита́ет Тя́, ра́дости неизглаго́ланныя испо́лнившую челове́чество.

И ны́не и при́сно и во ве́ки веко́в. Ами́нь.

Любве́ мя́ ле́стныя страсте́й, и врага́, всегда́ искуша́ющаго грехо́в тягото́ю, уны́ния же лю́таго отведе́ния, Пречи́стая, и плене́ния, и греха́, к Твое́й прибега́ющаго ми́лости, вско́ре, я́ко ми́лостива, Чи́стая, премени́.

Свети́лен.

По́яс честны́й Тво́й, и́мже свяще́нное Твое́ препоя́сала еси́ те́ло, Богоотрокови́це Де́во, чту́ще, пра́зднуем сего́ ны́не положе́ние, и́мже тли́ избавля́емся, и бе́д, и напа́стей, Ма́ти Бо́га Вы́шняго.

Молитва

Цари́це моя́ преблага́я, наде́ждо моя́ Богоро́дице, прия́телище си́рых и стра́нных предстáтельнице, скорбя́щих рáдосте, оби́димых покрови́тельнице! Зри́ши мою́ беду́, зри́ши мою́ скорбь, помози́ ми я́ко не́мощну, окорми́ мя я́ко стрáнна. Оби́ду мою́ ве́си, разреши́ ту, я́ко во́лиши: я́ко не и́мам ины́я по́мощи ра́зве Тебе́, ни ины́я предстáтельницы, ни благи́я уте́шительницы, то́кмо Тебе́, о Богомáти, я́ко да сохрани́ши мя и покры́еши во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Положению честнаго пояса Пресвятыя Богородицы