12 сентября.

Канон иной перенесение мощей святого благоверного великого князя Александра Невскаго из Владимира в царствующий град святого Петра.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Позна́й свою́ бра́тию, росси́йский Ио́сифе, не в Еги́пте, но на небеси́ ца́рствующий, благове́рный кня́же Алекса́ндре, и приими́ моле́ния и́х, умножа́я жи́та лю́дем плодоно́сием земли́ твоея́, гра́ды влады́чествия твоего́ огражда́я моле́нием и насле́дником твои́м на сопроти́вныя спобо́рствуя.

Величание

Велича́ем тя́, благове́рный кня́же Алекса́ндре, и чте́м святу́ю па́мять твою́, ты́ бо мо́лиши о на́с Христа́ Бо́га на́шего.

Стихи́ра, гла́с 6:

Прииди́те, вси́ лю́дие, хвалу́ принесе́м блаже́нному, вопию́ще си́це: ра́дуйся, пресве́тлый сто́лпе, просвеща́я на́с чуде́с светлостьми́; ра́дуйся, ро́сный о́блаче, пла́мень погаша́яй страсте́й и ороша́яй ве́рных мы́сли, боже́ственный Алекса́ндре.

Други́й кано́н свято́му, гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Благоверный княже Александре, моли́ Бо́га о нас.

Досто́йными похвала́ми воспе́ти пресла́внаго чудотво́рца, у́м и смы́сл да́руй ми́, Христе́ Бо́же, я́ко да воспою́, ра́дуяся, па́мять его́.

Припев: Благоверный княже Александре, моли́ Бо́га о нас.

Свети́льниче многосве́тлый Росси́йския земли́, я́коже второ́е со́лнце, чудесы́ сия́я, все́х на́с помина́й, соверша́ющих па́мять твою́, Алекса́ндре блаже́нне.

Сла́ва Отцу́ и Сы́ну и Свято́му Ду́ху:

Богому́дре Алекса́ндре, а́ще тя́ и напосле́док ле́т богопросвеще́нная Росси́йская страна́ возрасти́, но дре́вних че́сти сподо́бился еси́, дарова́ние чуде́с досто́йно прие́м.

И ны́не и при́сно и во ве́ки веко́в. Ами́нь.

Богородичен: Зако́нов кроме́ есте́ственных, Де́во, родила́ еси́ Законода́вца Бо́га, Челове́ка бы́вша. Того́, я́ко Бла́га, моли́, Всенепоро́чная, на́ша беззако́ния презре́ти.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Благоверный княже Александре, моли́ Бо́га о нас.

Свети́льник све́та яви́лся еси́, Алекса́ндре всеблаже́нне, неду́гов глубо́кую тму́ разруша́я всегда́, заре́ю све́тлою чуде́с, прему́дре.

Припев: Благоверный княже Александре, моли́ Бо́га о нас.

Престо́лу предстои́ши благода́ти, со все́ми Ангелы ра́дуяся дне́сь, и ми́ру исцеле́ния раздава́я бога́тство, спаси́ все́х на́с моли́твами твои́ми, блаже́нне.

Сла́ва Отцу́ и Сы́ну и Свято́му Ду́ху:

Благочести́ваго и венцено́снаго Алекса́ндра, соше́дшеся, по достоя́нию восхва́лим, я́ко чуде́с пода́теля оби́льнаго и Го́споду моля́щася о все́х на́с.

И ны́не и при́сно и во ве́ки веко́в. Ами́нь.

Богородичен: Яко вои́стинну Госпо́дь воцари́ся в Ца́рствие не отпа́дающее, и облече́ся псало́мски из Тебе́, Богома́ти, в кра́сное благоле́пие, пло́ть святу́ю, е́юже сме́рть прия́т и разруши́ ея́ ца́рство.

Седа́лен, гла́с 8:

Яко звезда́ многосве́тлая яви́лся еси́, све́тлаго ра́ди жития́ твоего́, сосу́д Свята́го Ду́ха бы́в. Сего́ ра́ди по мно́гих ле́тех во гро́бе нетле́нны обрето́шася святы́я твоя́ мо́щи, от ни́хже источа́еши ре́ки чуде́с исцеле́ний ве́рно зову́щим ти́: ра́дуйся, благове́рный вели́кий кня́же Алекса́ндре.

Сла́ва, и ны́не, гла́с то́йже:

Тро́ицу славосло́вим, ве́рнии, Единосу́щную, призре́ бо на смире́ние на́ше, отъя́т поноше́ние во челове́цех, утверди́ ми́лость Свою́ на на́с, во е́же соблюсти́ на́с и невре́дных сохрани́ти. Те́мже благослови́м Бо́га на́шего.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божеcтво́.

Припев: Благоверный княже Александре, моли́ Бо́га о нас.

Заре́ю Трисо́лнечныя благода́ти сия́я, све́тле тво́й пра́здник творя́щих озари́ и стра́стнаго омраче́ния де́монскаго изба́ви, Алекса́ндре пресла́вне.

Припев: Благоверный княже Александре, моли́ Бо́га о нас.

Ца́рие и кня́зи, и свяще́нницы, и вельмо́жи, и ста́рцы со ю́нотами, и ве́сь во́зраст, све́тло предъигра́йте и па́мять блаже́ннаго в пе́снех возвели́чите.

Сла́ва Отцу́ и Сы́ну и Свято́му Ду́ху:

К Боже́ственному Све́ту ны́не преста́вился еси́, Све́та сы́н возлю́блен бы́в, в ра́дости и красоте́ с ли́ки Ангельскими ны́не ра́достно лику́еши.

И ны́не и при́сно и во ве́ки веко́в. Ами́нь.

Богородичен: Име́ю Тя́ Помо́щницу и не постыжду́ся, Пречи́стая Ма́ти Бо́жия; име́ю Тя́ Предста́тельницу и вра́г мои́х не убою́ся.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси́ Бо́г на́ш, ра́зве Тебе́, ино́го не ве́мы.

Припев: Благоверный княже Александре, моли́ Бо́га о нас.

Яко звезда́ светла́ яви́ся непреле́стна, плене́нных свободи́тель, и ни́щих богати́тель, и боля́щих вра́чь, царе́й побо́рник и оте́чества на́шего утвержде́ние.

Припев: Благоверный княже Александре, моли́ Бо́га о нас.

Яви́ся в Росси́йстей земли́ чудотво́рец пресла́вен, Алекса́ндр блаже́нный, я́ко всесве́тел свети́льник, сия́я во все́м ми́ре и во мра́це страсте́й озаря́я вся́.

Припев: Благоверный княже Александре, моли́ Бо́га о нас.

Досточу́дная и пресла́вная па́мять твоя́ возсия́ в Росси́йстей земли́, блаже́нне, и ра́достно ве́рных весели́т собо́ры.

Сла́ва Отцу́ и Сы́ну и Свято́му Ду́ху:

Отверзо́шася тебе́ две́ри еде́мския, и несказа́нен све́т и трисия́нен возсия́, блаже́нне, в неподвижи́мем Ца́рствии небе́снем, и пра́ведных весе́лие прия́л еси́, ра́дуяся.

И ны́не и при́сно и во ве́ки веко́в. Ами́нь.

Богородичен: Ме́ртвости и тли́ изба́вила еси́ челове́чество, естество́м бо Жизнода́вца и Бо́га без се́мене родила́ еси́, Де́во Всенепоро́чная, на благодея́ние восхваля́ющих Тя́ ве́рно.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Благоверный княже Александре, моли́ Бо́га о нас.

От пречестна́го ко́рене изра́сл еси́ ве́твь, пресла́вне, и благоче́стно на земли́ пожи́л еси́, и прия́телище чи́сто Ду́ха яви́лся еси́, освяща́я ве́рою притека́ющия ти́, блаже́нне.

Припев: Благоверный княже Александре, моли́ Бо́га о нас.

Весе́лия дне́сь испо́лнися вся́ Росси́йская земля́ в наро́читый де́нь пра́здника пресла́внаго чудотво́рца, Алекса́ндра блаже́ннаго: соблюда́ет бо оте́чество свое́ вы́ну ненаве́тно.

Сла́ва Отцу́ и Сы́ну и Свято́му Ду́ху:

Сиро́т и вдо́в засту́пника и в беда́х непобори́маго помо́щника, пе́сньми Алекса́ндра ублажи́м, сла́вяще: пра́зднующих бо па́мять его́ ве́село от бе́д избавля́ет и скорбе́й.

И ны́не и при́сно и во ве́ки веко́в. Ами́нь.

Богородичен: Су́щий пресвяты́й хра́м, Богоро́дице, Исто́чник родила́ еси́, Всенепоро́чная, неисчерпа́емый, Влады́чице.

Конда́к свята́го, гла́с 4:

Якоже сро́дницы твои́ Бори́с и Гле́б яви́шася тебе́ с небесе́ в по́мощь, подвиза́ющемуся на Ве́лгера Све́йскаго и во́ев его́, та́ко и ты́ ны́не, блаже́нне Алекса́ндре, прииди́ в по́мощь твои́м сро́дником, и побори́ борю́щия ны́.

Икос:

Иже дре́вле наве́тами вра́жиими расточе́нныя, я́ко оре́л птенцы́ под криле́, собира́ше лю́ди своя́, се́й и ны́не на духо́вное торжество́ собира́ет на́с; прииди́те у́бо, возра́дуемся Го́сподеви, и просла́вим просла́вльшаго сро́дника на́шего и влады́ку, и возопии́м: ра́дуйся, росси́йская сла́во, ски́петров держа́во, во́ев хра́брость, ору́жия кре́пость! Помина́й ста́до твое́, над ни́миже Госпо́дь поста́ви тя́, и побори́ борю́щия ны́.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Благоверный княже Александре, моли́ Бо́га о нас.

Дне́сь Це́рковь Христо́ва, пра́зднующи Алекса́ндрово торжество́, соше́дшимся вои́стинну источа́ет благода́ть, приле́жно моля́щимся и любо́вию пою́щим его́.

Припев: Благоверный княже Александре, моли́ Бо́га о нас.

Во все́х страна́х росси́йских произы́де веща́ние, я́ко яви́ся в ни́х чудотво́рец пресла́вен, источа́я исцеле́ний мно́жество все́м пою́щим те́пле.

Сла́ва Отцу́ и Сы́ну и Свято́му Ду́ху:

Чудесы́ у́бо твои́ми, я́ко цве́т, процве́л еси́, блаже́нне, и исцеле́ния подава́еши притека́ющим в кро́в тво́й, му́дре и досточу́дне.

И ны́не и при́сно и во ве́ки веко́в. Ами́нь.

Богородичен: От де́вственных ложе́сн Твои́х вопло́щся Бо́г, яви́ся на спасе́ние на́ше. Те́мже Тя́ Ма́терь ве́дуще, Богоро́дице, правове́рно вопие́м Ему́: оте́ц на́ших Бо́же, благослове́н еси́.

Пе́снь 8.

Ирмос: Богоглаго́ливии о́троцы, в пещи́ со огне́м пла́мень попира́юще, поя́ху: благослови́те, дела́ Госпо́дня, Го́спода.

Припев: Благоверный княже Александре, моли́ Бо́га о нас.

Тебе́ в чудесе́х сла́вна росси́йским страна́м показа́ Бо́г, Алекса́ндре, и украси́ тя небе́сными дара́ми, Того́ моли́ поми́ловати все́х на́с.

Припев: Благоверный княже Александре, моли́ Бо́га о нас.

Яко у́тро, я́ко де́нь све́тлый тво́й пра́здник яви́ся, просвеща́я на́ша сердца́, и все́х с ве́рою восхваля́ющих тя́, Алекса́ндре пресла́вне.

Сла́ва Отцу́ и Сы́ну и Свято́му Ду́ху:

Де́нь торжества́ и пра́здник весе́лия наста́, стеце́мся, ве́рнии, очи́стивше вку́пе ду́ши и телеса́: се́ бо на́с призыва́ет Алекса́ндр боже́ственный.

И ны́не и при́сно и во ве́ки веко́в. Ами́нь.

Богородичен: Образы нося́щи дре́вле Рождества́ Твоего́, Де́во Ма́ти: пе́щь у́бо ю́ношей не опали́, та́кожде и о́гнь Боже́ственный утро́бы Твоея́, Чи́стая.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Благоверный княже Александре, моли́ Бо́га о нас.

Твое́ свято́е преставле́ние дне́сь све́тло пра́зднуем, испо́лни ра́дости и весе́лия восхваля́ющия тя́, Алекса́ндре великоимени́те.

Припев: Благоверный княже Александре, моли́ Бо́га о нас.

Ве́лий щи́т и кре́пость в Росси́йстей земли́, Алекса́ндре, обре́лся еси́, правосла́вным же похвале́ние, и ны́не мо́лимся ти́: сохраня́й оте́чество твое́ от язы́ка чужда́го.

Припев: Благоверный княже Александре, моли́ Бо́га о нас.

Незаходи́маго све́та луча́ми во тме́ су́щим сия́я, сла́вне, к просвеще́нию весе́лия наста́ви ны́, пою́щия тя́.

Сла́ва Отцу́ и Сы́ну и Свято́му Ду́ху:

Блаже́нне Алекса́ндре, ка́ко тя́ возмо́жем воспе́ти досто́йно? Не мо́жет бо язы́к изглаго́лати твоя́ разли́чная исцеле́ния, и мно́гая дарова́ния, и чудеса́, я́же подава́еши насле́дию твоему́.

И ны́не и при́сно и во ве́ки веко́в. Ами́нь.

Богородичен: Яко у́тро, те́мным и блудя́щим, Де́во, возсия́ Пра́вды Со́лнце — Христо́с, Его́же на рука́х Твои́х носи́ла еси́, Чи́стая.

Свети́лен.

Слы́шана бы́сть в Све́йских страна́х превели́кая сла́ва твоя́, Алекса́ндре, я́ко еди́нем му́жественным и́менем твои́м устраша́хуся сопроти́внии; и ны́не, блаже́нне, враги́ на́ша неви́димо устраша́й, ополча́ющияся на христолюби́вое твое́ во́инство.

Сла́ва, и ны́не:

Изба́вивый ны́ от вла́сти те́мныя и преста́вивый в Ца́рство любве́ Сы́на Твоего́, Бо́же на́ш, преведы́й от тмы́ неве́дения ко све́ту благоразу́мия и сла́вы, и имени́ты сотвори́вый по все́й земли́, Тебе́ и ны́не про́сим: да я́коже сохрани́л и возвы́сил еси́ на́с всеси́льною Твое́ю десни́цею, то́южде защища́й, избавля́й и содержи́.

Молитва благоверному князю Александру Невскому, в схиме Алексию

Ско́рый помо́щниче всех усе́рдно к тебе́ прибега́ющих и те́плый наш пред Го́сподем предста́телю, святы́й благове́рный кня́же Алекса́ндре! При́зри ми́лостивно на ны недосто́йныя мно́гими беззако́нии непотре́бны себе́ сотво́ршия, к ра́це моще́й твои́х (или: ико́не твое́й) ны́не притека́ющия и из глубины́ се́рдца тебе́ взыва́ющия: ты в житии́ свое́м ревни́тель и защи́тник правосла́вныя ве́ры был еси́, и нас в ней те́плыми твои́ми моли́твами непоколеби́мы утверди́. Ты вели́кое, возло́женное на тя служе́ние тща́тельно проходи́л еси́, и нас твое́ю по́мощию пребыва́ти коего́ждо, в не́йже призва́н есть, наста́ви. Ты, победи́в полки́ супоста́тов, от преде́лов Росси́йских отгна́л еси́, и на нас ополча́ющихся всех ви́димых и неви́димых враго́в низложи́. Ты, оста́вив тле́нный вене́ц ца́рства земна́го, избра́л еси́ безмо́лвное житие́, и ны́не пра́ведно венце́м нетле́нным уве́нчанный, на Небесе́х ца́рствуеши, хода́тайствуй и нам, смире́нно мо́лим тя, житие́ ти́хое и безмяте́жное и к ве́чному Ца́рствию ше́ствие неукло́нное твои́м предста́тельством устро́й нам. Предстоя́ же со все́ми святы́ми Престо́лу Бо́жию, моли́ся о всех правосла́вных христиа́нах, да сохрани́т их Госпо́дь Бог Свое́ю благода́тию в ми́ре, здра́вии, и благоде́нствии, и вся́ком благополу́чии в до́лжайшая ле́та, да и при́сно сла́вим и благослови́м Бо́га, в Тро́ице Святе́й сла́вимаго Отца́, и Сы́на, и Свята́го Ду́ха, ны́не и при́сно и во ве́ки веко́в. Ами́нь.

Молитва вторая благоверному князю Александру Невскому, в схиме Алексию

О, святы́й благове́рный кня́же Алекса́ндре! При́зри ми́лостивно на ны, недосто́йныя рабы́ Бо́жии (имена), и исхода́тайствуй нам житие́ ти́хое и безмяте́жное, и к ве́чному Ца́рствию ше́ствие неукло́нное твои́м предста́тельством устро́й нам, да сохрани́т нас Госпо́дь Бог Свое́ю благода́тию в ми́ре, здра́вии, долгоде́нствии и вся́ком благополу́чии в до́лжайшая ле́та, да при́сно сла́вим и благослови́м Бо́га в Тро́ице Святе́й сла́вимаго, Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.