10 сентября.

Канон преподобным отцам Печерским, ихже нетленныя мощи в Дальной пещере почивают.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Мы́сленное со́лнце и све́тлую луну́, первонача́льных Пече́рских, со все́м собо́ром преподо́бных дне́сь почти́м, ти́и бо, церко́вную тве́рдь озаря́я, просвеща́ют во тме́ страсте́й бе́дствующих, и подаю́т от Христа́ Бо́га моли́твами свои́ми по́мощь во все́х ско́рбех, и душа́м на́шим про́сят избавле́ния.

Стихи́ра, гла́с 8:

Престо́лу Трисо́лнечнаго Божества́ предстоя́щии и бога́тно осиява́еми непристу́пными све́тлостьми, отцы́ на́ши всеблаже́ннии, и́же на земли́ любе́зно предстоя́щих и собо́р ва́ш дне́сь гла́сы воспева́ющих, страсте́й и бе́д свободи́те, я́ко при́снии к Бо́гу хода́таи, и моли́твенницы о душа́х на́ших.

Кано́н преподо́бных, глас 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Запев: Преподобнии отцы Печерстии, молите Бога о нас!

Во́ду преходи́ти пе́сненных слове́с в па́мять ва́шу, богоно́снии отцы́, хотя́ща мя́, в тишине́ у́мной всегда́ испра́вите, и от бу́рных страсте́й удержи́те, да в ва́шем хвале́нии с пе́снию возвели́чу и́мя Бо́га моего́.

Запев: Преподобнии отцы Печерстии, молите Бога о нас!

Изше́д на зла́чное по́ле мы́сленнаго рая́ пеще́ры святы́я, услажда́юся благово́нными арома́ты, я́же источа́ют мо́щи ва́ша, преподо́бнии отцы́, и ве́село Созда́телю Бо́гу пе́снь умо́м возсыла́ю.

Запев: Преподобнии отцы Печерстии, молите Бога о нас!

Вертогра́д заключе́н ты́ еси́, пеще́ро свята́я, в тебе́ бо Сади́тель Вы́шний насади́ мно́жество древе́с, богоно́сных оте́ц, а́ки ке́дров лива́нских, и́же досяго́ша небе́с высото́ю, и́мже удивля́яся, пою́ пе́снь Бо́гу моему́.

Запев: Преподобнии отцы Печерстии, молите Бога о нас!

Стра́жу неусы́пне, Ло́нгине вра́тарю, да́р име́вый прозира́ти мы́сли входя́щих, обреты́й по́чести вы́шняго зва́ния, вни́ди и объими́ хвалы́ богоно́сных оте́ц, в и́хже па́мяти пе́снь Бо́гу на́шему пое́м.

Запев: Преподобнии отцы Печерстии, молите Бога о нас!

Игна́тие, па́стырю и́ночествующих и цели́телю боля́щих, в неду́зех на́ших посо́бствуй тя́ почита́ющим, да в па́мяти твое́й пе́снь хвалы́ Бо́гу на́шему принесе́м.

Сла́ва Отцу́ и Сы́ну и Свято́му Ду́ху:

Силуа́не преподо́бне, чистоты́ рачи́телю и храни́телю садо́вий, тате́й чу́вственных и мы́сленных, плоды́ обоя́ окра́сти хотя́щих, моли́твою связа́вый, от те́х нападе́ний и на́с спаси́, мо́лимся.

И ны́не и при́сно и во ве́ки веко́в. Ами́нь.

Богородичен: Мно́гими татьми́ обстои́мь, не чу́вствую всегда́, и окрада́ют ми́ врази́ покая́ния плоды́, но бо́дренною Твое́ю моли́твою и неисче́тною благосты́нею, Ма́ти Бо́жия, изба́ви мя́, молю́ся.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Запев: Преподобнии отцы Печерстии, молите Бога о нас!

Небе́снаго и земна́го кру́га Созда́тель созда́ ме́сто сие́, и ва́с, до́брыя гра́жданы, в не́м поста́ви, треблаже́ннии отцы́. Причти́те на́с в сожи́тие ва́ше нетле́нное и жела́емаго кра́я ми́лости дости́гнути моли́теся, мо́лим ва́с.

Запев: Преподобнии отцы Печерстии, молите Бога о нас!

Агафо́не блаже́нне, бла́гости веща́ния имени́те, по́стником красото́, проро́че нело́жный и цели́телю неду́жных, скажи́ на́м, нечу́вственным, а́ще пу́ть беззако́ния е́сть в на́с, и ты́ наста́ви ны́ моли́твами твои́ми на пу́ть ве́чен.

Запев: Преподобнии отцы Печерстии, молите Бога о нас!

Пое́м ди́внаго Зино́на, сия́ющаго посто́м, и Мака́рия, блаже́ству тезоимени́та, си́х двои́х ра́ди отце́в, мо́лимтися, Влады́ко, изми́ на́с душе́вных и теле́сных страсте́й, еди́не Человеколю́бче.

Запев: Преподобнии отцы Печерстии, молите Бога о нас!

Сла́вим Ахи́лу, служи́теля же́ртвы, и я́ко и́стиннаго по́стника приво́дим Ти́, Христе́, в моли́тву, его́же ра́ди изми́ на́с от порабоще́ния чре́вных страсте́й, и воздержа́нию того́ научи́ ны, еди́не Человеколю́бче.

Запев: Преподобнии отцы Печерстии, молите Бога о нас!

Ипа́тие, служи́телю немощны́м, я́ко име́яй да́р больны́х цели́ти возложе́нием руку́, тя́ мо́лим, посети́ свы́ше на́с, душе́вными неду́ги обдержи́мых, и спаси́ моли́твами твои́ми.

Запев: Преподобнии отцы Печерстии, молите Бога о нас!

Яко в житии́ се́м любве́ свя́зани сою́зом, по сме́рти же в еди́ном гро́бе су́ще положе́ни, та́ко и в нетле́нной жи́зни ны́не вку́пе живу́ще, Паи́сие и Мерку́рие, хода́тайством ва́шим к Бо́гу, в единомы́слии и любви́ утверди́те ны́, мо́лимся.

Сла́ва Отцу́ и Сы́ну и Свято́му Ду́ху:

Лавре́нтие, по́стником свети́ло, и Моисе́е крестоно́сне, в тме́ страсте́й на́с су́щих и ходя́щих освети́те и моли́твами ва́шими наста́вите, да и мы́ в крестоноше́нии на́шем не преткне́м о ка́мень собла́зна но́г на́ших.

И ны́не и при́сно и во ве́ки веко́в. Ами́нь.

Богородичен: Тма́ страсте́й объя́т ны́, и в пути́ сласте́й уклони́хомся непрохо́дны, све́та исправле́ния не ви́дим. Наста́внице, наста́ви на́с и све́т покая́ния возсия́й на́м, Ты́ бо еси́ все́м многосве́тлое свети́ло, просвеща́ющее ду́ши на́ша.

Седа́лен, гла́с 2:

Поще́нием просия́вших и све́тлыми по́двиги преподо́бных оте́ц Пече́рских чи́стое житие́ и труды́ кто́ восхвали́ти мо́щен? Оба́че от любве́, я́же к ни́м, пе́сненныя да́ры прино́сим, ти́и бо, со Ангелы предстоя́ще, при́сно мо́лятся Го́сподеви о все́х на́с.

Сла́ва, и ны́не, Богородичен:

Милосе́рдия су́щи исто́чник, ми́лости сподо́би на́с, Богоро́дице, при́зри на лю́ди согреши́вшия, яви́, я́ко при́сно, си́лу Твою́, на Тя́ бо упова́юще, — ра́дуйся, — вопие́м Ти́, я́коже иногда́ Гаврии́л, безпло́тных архистрати́г.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божcтво́.

Запев: Преподобнии отцы Печерстии, молите Бога о нас!

Дре́вних оте́ц стопа́м после́дующе, не уклони́стеся ни ма́ло от и́х трудо́в, те́мже ра́вный дина́рь ве́чныя жи́зни от Христа́ прие́мше, со Ангелы сла́вите преве́чное Того́ Божество́.

Запев: Преподобнии отцы Печерстии, молите Бога о нас!

Иларио́н ди́вный, вели́каго о́браза чи́н име́вый, и по чи́ну своему́ ревну́я житию́ преподо́бнаго Феодо́сия, еди́ною всегда́ в седми́це яды́й, кре́пок бе́ во славосло́вии пе́ти: сла́ва си́ле Твое́й, Го́споди.

Запев: Преподобнии отцы Печерстии, молите Бога о нас!

По́стническое стече́ся во́инство, в не́мже просия́ све́тлая звезда́, Диони́сий, и́же ны́не сия́ет во сла́ве святы́х и сла́вит Еди́но Божество́.

Запев: Преподобнии отцы Печерстии, молите Бога о нас!

Трудолю́бцем о́браз изве́стный, Арсе́ний, му́жеству тезоимени́тый, в труде́х де́нь и но́щь живы́й, прия́т возме́здие — да́р чудотворе́ния, от него́же подае́т тре́бующим все́м неоску́дно.

Запев: Преподобнии отцы Печерстии, молите Бога о нас!

Пи́мине, по́стником единонра́вне, кровопо́тными труды́ труди́выйся в послуша́нии вы́ну, дрова́ нося́, в же́рновах меля́, на вся́ку же но́щь непреста́нно поя́ Бо́га и Того́ Еди́но Божество́.

Запев: Преподобнии отцы Печерстии, молите Бога о нас!

Сто́лпе непоколеби́ме, Афана́сие затво́рниче, водруже́н сы́й в затво́ре, не тре́бовал еси́ све́тлости чу́вственныя, поне́же тебе́ мы́сленная светя́ше. То́ю моли́, блаже́нне, просвети́тися тя́ почита́ющим.

Сла́ва Отцу́ и Сы́ну и Свято́му Ду́ху:

Тро́ичен: Сла́ва Тебе́, Тро́ице Пресвята́я, я́ко просла́вила еси́ ме́сто земно́е, небе́сному гра́жданы подо́бное, в и́хже па́мяти приноси́мым от на́с пе́нием Тя́, Отче и Сы́не и Ду́ше Святы́й, с раболе́пным поклоне́нием, гре́шнии, сла́вим и Твое́ Еди́но Божество́ превозно́сим.

И ны́не и при́сно и во ве́ки веко́в. Ами́нь.

Богородичен: Сла́ва Тебе́, правосла́вных сла́во, Чи́стая, Тя́ бо сла́вит со Ангелы ро́д челове́ческий, и припа́дающе, вопие́т: сла́ва бо Твоя́, Богоро́дице, все́м простре́ся во спасе́ние.

Пе́снь 5

Ирмос: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Запев: Преподобнии отцы Печерстии, молите Бога о нас!

Просвети́ша всю́ Росси́йскую зе́млю да́нною и́м благода́тию отцы́ всеблаже́ннии, и тма́ уже́ злове́рия в коне́ц поги́бе. Ты́я лучи́ простри́ на ны́ моле́ния и́х ра́ди, мо́лимтися, еди́не Человеколю́бче.

Запев: Преподобнии отцы Печерстии, молите Бога о нас!

Сисо́е чу́дне и Григо́рие, и́мя от бо́дрости име́вый, о́ба посто́м обузда́вшии своя́ стра́сти, свире́пеющую по́хоть и на́шея пло́ти смири́те, ва́м бо дана́ е́сть благода́ть в страсте́х на́м посо́бствовати.

Запев: Преподобнии отцы Печерстии, молите Бога о нас!

Воздержа́ния рачи́телю, Па́вле блаже́нне, со двема́ канона́рхи, простри́те о на́с мольбы́ ко Влады́це, да Того́ благода́тию от чре́вняго несы́тства уде́ржимся и ва́м в воздержа́нии насле́дницы бу́дем.

Запев: Преподобнии отцы Печерстии, молите Бога о нас!

Сло́во Бо́жие, вразумля́ющее челове́ки, некни́жныя му́дрости научи́ тя, Не́сторе свя́те, но вы́шния, е́юже зре́л еси́ при моли́твах Ангелы и кончи́ну свою́ предви́дел еси́. Тоя́ и на́с прича́стники сотвори́, мо́лим тя́, па́мять твою́ почита́юще.

Запев: Преподобнии отцы Печерстии, молите Бога о нас!

Ти́те всему́жественне, во́инствующу ти́ иногда́, поби́ша сопроти́внии ору́жием главу́ твою́, и бы́сть я́зва вино́ю, я́ко прише́л еси́ в Пече́рскую го́ру и та́мо пла́кал еси́ о гресе́х свои́х, о и́хже проще́нии извеще́ние прие́мь, ра́достно отше́л еси́ к го́рним селе́ниям небе́сным, преподо́бне.

Запев: Преподобнии отцы Печерстии, молите Бога о нас!

Па́мву послушли́ваго почита́ти дерза́ю и удивля́юся: то́й бо в послуша́нии от неве́рных и ве́ры ра́ди во у́зах претерпе́ мно́го, оба́че, от Ангел восхище́н и пренесе́н, в ке́ллии свое́й обре́теся, и сбы́стся на не́м, я́ко послуша́ние от сме́рти избавля́ет.

Сла́ва Отцу́ и Сы́ну и Свято́му Ду́ху:

Тро́ичен: Впадо́х в ру́ки враго́в мы́сленных и око́ван е́смь от ни́х тя́жкими пу́ты, от ни́хже бра́т не изба́вит. Ты́, Тро́ице Пресвята́я, я́ко Ми́лостивая, созда́ние Твое́ поми́луй и бла́гостию Твое́ю от у́з сме́ртных свободи́.

И ны́не и при́сно и во ве́ки веко́в. Ами́нь.

Богородичен: Свя́зан е́смь мно́гими плени́цами страсте́й, и не́сть ми́ разреше́ния наде́жды, но Ты́ поми́луй мя́, я́ко Ма́ти Бо́га вы́шняго, и разреши́ мя от ни́х, Ты́ бо Еди́на си́льна еси́ по Бо́зе грехо́вныя плени́цы разреши́ти.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Запев: Преподобнии отцы Печерстии, молите Бога о нас!

Моли́твы на́ша прино́сим ва́м, о богоно́снии отцы́, вы́ бо есте́ моли́твенницы о на́с к Бо́гу и хода́таи, хода́тайством у́бо ва́шим от тли́ грехо́вныя изба́вите честны́й ва́ш собо́р почита́ющих.

Запев: Преподобнии отцы Печерстии, молите Бога о нас!

Неусы́пне серде́чное виде́ние иму́ще к Бо́гу, бы́сте незло́бивии, а́ки младе́нцы, но я́ро о́ко име́сте на бе́сы, я́ко и и́мене ва́шего и́м трепета́ти. Мо́лим ва́с, моли́теся, да и от на́с нападе́ния вра́жия со студо́м возвратя́тся.

Запев: Преподобнии отцы Печерстии, молите Бога о нас!

Заха́рие, па́мяти Госпо́дней тезоимени́те, по и́мени твоему́ и житие́ стяжа́вый, та́ко бо на враги́ посто́м му́жески вооружи́лся еси́, я́ко во все́м житии́ твое́м зе́лием пита́яся, дово́лен бы́л еси́, те́м и́мене твоего́ боя́хуся бе́си; от си́х у́бо злоде́йства избавля́я, ускори́ на по́мощь на́шу, смире́нно мо́лимтися.

Запев: Преподобнии отцы Печерстии, молите Бога о нас!

Фео́доре блаже́нне, сла́ву благоро́дства своего́ в пе́рсть всели́вый, измени́в княже́ние на и́ноческий о́браз, в не́мже Влады́це своему́ до́бре угоди́вый и ны́не со Ангелы в небе́сных живы́й, моли́ся о на́с, да сла́вы неги́бнущия прича́стницы бу́дем.

Запев: Преподобнии отцы Печерстии, молите Бога о нас!

Софро́ние преподо́бне, в те́мнем ме́сте себе́ затвори́вый, непреста́нно во псалме́х пе́л еси́ Бо́гу; и ны́не в простра́ннем селе́нии го́рнем наслажда́яся Ангельских пе́ний, моли́ся, да и мы́ та́я слы́шати сподо́бимся.

Запев: Преподобнии отцы Печерстии, молите Бога о нас!

В преподо́бии и пра́вде свяще́нствуя Вы́шнему, Панкра́тие чу́дне, чудотво́рными да́ры обогати́вся, от си́х подава́л еси́ неоску́дно тре́бующим; пода́ждь у́бо сия́ и на́м, в боле́знех к тебе́ усе́рдно приходя́щим.

Сла́ва Отцу́ и Сы́ну и Свято́му Ду́ху:

Тро́ичен: Сла́вы ра́ди и́мене Твоего́, Пресу́щественная Тро́ице, просла́вила еси́ пра́ведных Твои́х и ме́сто сие́; бла́гостию у́бо Твое́ю пода́ждь и на́м, Бла́же, сла́ву святы́х во сла́ве Твое́й зре́ти, и с ни́ми Тебе́ сла́вити, в трие́х Ипоста́сех Еди́наго Бо́га.

И ны́не и при́сно и во ве́ки веко́в. Ами́нь.

Богородичен: Иже Тя́ не просла́вит, Пресвята́я Де́во, то́й да не ви́дит сла́вы жи́зни ве́чныя; на́м же да́ждь ви́дети ту́ю, и́бо зна́ем Тя́, сла́виму от все́х си́л небе́сных, и сие́ прино́сим Ти́: ра́дуйся, ве́рным изве́стная похвало́.

Конда́к, гла́с 8:

Избра́ннии от родо́в уго́дницы Бо́жии, святи́и преподо́бнии Пече́рскии, на си́х гора́х доброде́тельми просия́вшии, ва́с земля́ не потаи́ла е́сть, но не́бо отве́рзеся ва́м и ра́йское селе́ние. Те́мже мы́ похва́льныя пе́сни Бо́гу, просла́вльшему ва́с, в па́мяти ва́шей прино́сим; вы́ же, я́ко иму́щии дерзнове́ние, ва́ш собо́р почита́ющих, от все́х бе́д моли́твами ва́шими заступа́йте, я́ко засту́пницы на́ши и к Бо́гу хода́таи.

Икос:

Восхвали́ти по еди́ному кто́ возмо́жет святы́я Твоя́, Бла́же? Изочту́ и́х, и па́че песка́ умно́жатся, но Са́м, Влады́ко Христе́, исчита́яй мно́жество зве́зд и все́м имена́ нарица́яй, приими́ все́х и́х мольбы́ о на́с, и яви́ щедро́ты Твоя́ на лю́дех Твои́х; ве́мы бо, я́ко мно́го и́мут дерзнове́ние к вели́честву Твоему́, и хода́тайствуют к Тебе́, я́ко при́сно моли́твенницы о душа́х на́ших.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Запев: Преподобнии отцы Печерстии, молите Бога о нас!

Ту́чная еси́ и усыре́нная, Пече́рская горо́, в твои́х бо гра́жданех изво́ли Вы́шний селе́ние Свое́ положи́ти, те́мже и мы́ с ни́ми пое́м: оте́ц на́ших Бо́же, благослове́н еси́.

Запев: Преподобнии отцы Печерстии, молите Бога о нас!

Сми́рны испо́лнена и хо́лму Лива́нскому подо́бна еси́, Пече́рская горо́, ка́плющая ми́ры богоно́сных оте́ц на исцеле́ние боле́зней тлетво́рных, и́хже мы́ благоуха́ние прие́млюще, пое́м: оте́ц на́ших Бо́же, благослове́н еси́.

Запев: Преподобнии отцы Печерстии, молите Бога о нас!

Аммо́не и Марда́рие, подви́жный супру́г, бы́вше нищеты́ рачи́телие, ны́не же бога́тство неги́блющее стяжа́вшии, моли́теся и на́м то́ежде стяжа́ти в вы́шних, иде́же пою́т: Бо́же, благослове́н еси́.

Запев: Преподобнии отцы Печерстии, молите Бога о нас!

Пое́м Ру́фа, по́стником и трудолю́бцем зерца́ло, с Вениами́ном блаже́нным, и́же все́ свое́ име́ние отдаде́ ни́щим, да еди́н би́сер — Христа́ стя́жет, Ему́ же ревни́тели да бу́дем, пою́ще: Бо́же, благослове́н еси́.

Запев: Преподобнии отцы Печерстии, молите Бога о нас!

Фео́филе, иера́рхом удобре́ние, Но́вграда престо́л содержа́вый и Сама́го Го́спода ви́девый, умоли́ Того́ бла́гость, да и мы́ лице́ Его́ у́зрим с тобо́ю и воспое́м: оте́ц на́ших Бо́же, благослове́н еси́.

Запев: Преподобнии отцы Печерстии, молите Бога о нас!

В диа́конех свети́ло и в трудолю́бцех о́бразе, Марти́рие, чистоты́ рачи́телю, да́р име́вый прогоня́ти от челове́к лука́выя ду́хи и не́мощи цели́ти, ду́ха зло́бы и вся́кия ле́сти отжени́ от на́с, да чи́сто воспое́м: Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Тро́ичен: Прославля́ющия святы́х Твои́х просла́ви, Преблага́я Тро́ице, сла́вою, ю́же угото́вала еси́ от ве́ка рабо́м Твои́м, и сподо́би пе́ти: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Прера́дованная Ма́ти и Цари́це, ра́достная Тебе́ принося́щих ра́дости ве́чныя сподо́би и отве́рзи ра́йския две́ри христиа́нскому всему́ ро́ду, при́сно Тебе́ пою́щему: Богоро́дице, благослове́нна еси́.

Пе́снь 8.

Ирмос: Царя́ Небе́снаго, Его́же пою́т во́и Ангельстии, хвали́те и превозноси́те во вся́ ве́ки.

Запев: Преподобнии отцы Печерстии, молите Бога о нас!

Цари́цы Небе́сныя селе́ние еси́, святопече́рская горо́, ю́же си́льных мно́жество преподо́бных оте́ц окружа́ют, вси́ ору́жия изощре́нны иму́ще, моли́твы проти́ву мироде́ржца, пою́т пе́снь Бо́гу: пое́м и превозно́сим Его́ во ве́ки.

Запев: Преподобнии отцы Печерстии, молите Бога о нас!

Восто́к и за́пад, ю́г и се́вер ви́дит во огра́де твое́й, Пече́рская горо́, исто́чник, кипя́щий мѵ́ры чуде́с богоно́сных оте́ц, излива́ющийся все́м изоби́льно, и́же пою́т и превозно́сят Го́спода во ве́ки.

Запев: Преподобнии отцы Печерстии, молите Бога о нас!

Ко́е хвале́ние ва́м принесе́м, о богоно́снии отцы́? Ка́ко испове́мы труды́ и по́двиги ва́ша тупогру́бым язы́ком? — Не ве́мы. Но ты́, свя́те Евфи́мие молчали́ве, научи́ ны, да с тобо́ю пое́м Го́спода во ве́ки.

Запев: Преподобнии отцы Печерстии, молите Бога о нас!

По́стником и трудолю́бцем сия́ние, Кассиа́не и Пио́ре блаже́нне, о́ба светя́щиися житие́м, а́ки небе́сная свети́ла, све́тлостию благода́ти, да́нныя ва́м, озари́те ны́, да сподо́бимся с ва́ми пе́ти Го́спода во вся́ ве́ки.

Запев: Преподобнии отцы Печерстии, молите Бога о нас!

Пла́чущих помина́я блаже́нство, Пафну́тие преподо́бне, всегда́ пла́кал еси́, ны́не же ра́достная насле́див места́, моли́ся та́мо и на́м во кро́в безплаче́вный всели́тися, да с тобо́ю превозно́сим Го́спода во ве́ки.

Запев: Преподобнии отцы Печерстии, молите Бога о нас!

Со Ио́сифом чу́дным ва́шу, вси́ святи́и, па́мять почита́ем, посто́м и труды́ до́бре Бо́гу угоди́вшии, и мо́лим, да от все́х бе́д заступле́ние ва́ми обря́щем и сподо́бимся Го́спода превозноси́ти во ве́ки.

Сла́ва Отцу́ и Сы́ну и Свято́му Ду́ху:

Во огра́де пеще́ры святы́я проходя́ умо́м, зри́м на тве́рди ея́ мно́жество, а́ки зве́зд, оте́ц преподо́бных, и́хже исчи́слити не возмо́жно. Те́м о все́х возда́вше хвалу́ Бо́гу, мо́лим, да да́ст на́м с ни́ми превозноси́ти Его́ во ве́ки.

И ны́не и при́сно и во ве́ки веко́в. Ами́нь.

Богородичен: Гони́мь су́щи зми́ем миролю́бным, к Твое́й огра́де прибего́х, Чи́стая: кро́вом у́бо ми́лости Твоея́ защити́ мя́ и того́ зубо́в изба́ви, я́ко да спасе́н, превозношу́ Тя́, Ма́терь Бо́жию, во ве́ки.

Песнь 9

Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Запев: Преподобнии отцы Печерстии, молите Бога о нас!

Вои́стинну пре́жде юдо́ль бе́ плаче́вная и верте́п разбо́йником гора́ сия́ свята́я, ны́не же до́м Бо́жий е́сть, и живу́щии в не́м блаже́нни, я́ко ва́ми освяти́ся, богоно́снии отцы́: сего́ ра́ди все́х ва́с велича́ем.

Запев: Преподобнии отцы Печерстии, молите Бога о нас!

Гла́с ра́дования и шу́м празднолю́бных стека́ется восхвали́ти собо́р ва́ш, отцы́ Пече́рскии; те́х у́бо хвале́ния прие́мше, от все́х скорбе́й и печа́лей спаса́йте, да всегда́ ва́с велича́ем.

Запев: Преподобнии отцы Печерстии, молите Бога о нас!

Ра́достною душе́ю взе́мше кре́стное и́го и ра́лом трудо́в го́ру сию́ возде́лавше, насади́сте сады́ по́тов ва́ших, богоно́снии отцы́, мы́сленных, и́хже плоды́ объе́мше, увеселя́ем ду́ши на́ша и все́х ва́с велича́ем.

Запев: Преподобнии отцы Печерстии, молите Бога о нас!

Во еди́н пу́ть за́поведей Госпо́дних ходя́ще, разли́чная се́мена се́ясте: о́в чистоту́, о́в послуша́ние, и́н по́ст, други́й нищету́, труды́ и сле́зы. Оба́че вси́ ра́вно ра́дости рукоя́ти пожина́ете, от ни́хже и на́м да́рствуйте, да вы́ну ва́с все́х велича́ем.

Запев: Преподобнии отцы Печерстии, молите Бога о нас!

Госпо́дь пасе́т ва́с ны́не на ме́сте зла́чне, преблаже́ннии отцы́, и ко́е уже́ ва́с лиша́ет бла́го? Пото́к бо сла́дости ва́с напая́ет, от него́же поне́ ка́плею еди́ною жития́ на́шего го́ресть, мо́лимся, услади́те, да ра́достно Бо́гу на́шему воспое́м.

Запев: Преподобнии отцы Печерстии, молите Бога о нас!

От ме́ста плаче́внаго на безплаче́вное преше́дших, мо́лим ва́с, отцы́ преблаже́ннии, на́с, па́мять ва́шу вку́пе почита́ющих, вся́кия ско́рби избавля́йте, да вси́ ва́с велича́ем.

Сла́ва Отцу́ и Сы́ну и Свято́му Ду́ху:

Тро́ичен: Сла́ва Ты́ еси́, Тро́ице, преподо́бных оте́ц ли́ку, и неги́блющее весе́лие, о Тебе́ бо ми́р и пло́ть с неви́димым враго́м победи́вше, прия́ша венцы́ и ра́дуются со Ангелы, Тя́ всегда́ велича́юще.

И ны́не и при́сно и во ве́ки веко́в. Ами́нь.

Богородичен: Сла́вим Тя́, пресла́вный гра́де Бо́жий, Тебе́ бо Са́м основа́ Вы́шний и даде́ в прибе́жище все́м от лица́ вра́жия бежа́щим. И на́м бу́ди в приста́нище, да Тя́ вы́ну велича́ем.

Свети́лен:

Ца́рское свяще́ние, ро́де избра́нный, иера́рси святи́и, свяще́нницы, мона́си, де́вственницы, чудотво́рцы и все́ по́стническое сосло́вие преподо́бных оте́ц Пече́рских, собери́теся дне́сь на моли́тву, да ва́с ра́ди Ца́рь сла́вы спасе́т Импера́тора и вся́ лю́ди, благоче́стно собо́р ва́ш почита́ющих.

Сла́ва, и ны́не, Богородичен:

Святы́х Святе́йшую Тя́ сла́вим, Чи́стая Де́во, и велича́ем от Тебе́ рожде́нное Сло́во, Ты́ же приими́ и от на́с славосло́вие сие́, и да́ждь сла́вити Тя́, иде́же вси́ святи́и Ма́терь Тя́ Бо́жию сла́вят.

Стихи́ры, гла́с 4.

Плотско́е мудрова́ние, покоре́нием ума́ / плени́сте в послуша́ние Христо́во, / отцы́ преблаже́ннии, / и стра́стное мо́ре преплы́вше, / достиго́сте кра́йнято жела́ния, / те́м дарова́ ва́м / по́чести зва́ния вы́шняго / Иису́с Человеколю́бец / и Спа́с ду́ш на́ших.

Угаси́сте пе́щь мирски́х пристра́стий / и самохо́тныя молвы́, / сле́зными пото́ки / и коне́чною нището́ю, отцы́ преподо́бнии, / и я́ко в черто́зе све́тле, / в те́мных пребы́сте пеще́рах, / Ангельски славосло́вяще / Иису́са Человеколю́бца / и Спа́са ду́ш на́ших.

От бре́нныя страсте́й глубины́, / скорбе́й и попече́ний жите́йских / у́м очи́стивше, / отцы́ богоно́снии, / упова́нием бу́дущия жи́зни / вся́ тле́нная презре́сте. / И ны́не, в нетле́нной жи́зни су́ще, / моли́те за ны́ Иису́са Человеколю́бца / и Спа́са ду́ш на́ших.

Сла́ва, гла́с 6:

Блаже́нства непоро́чных вожделе́вше, в пу́ть за́поведей Госпо́дних теко́сте, и свиде́ния во́ли Бо́жия взыску́юще, в го́ры, в верте́пы и в те́мныя пеще́ры всели́стеся, ми́р с по́хотьми распя́сте, и бесо́вския полки́ победи́вше, ны́не жи́знь и сла́ву безконе́чную насле́дисте. Моли́теся за ны́, мо́лим ва́с, отцы́ преподо́бнии, улучи́ти прича́стие с ва́ми Вы́шняго Иерусали́ма и спасе́ние душа́м на́шим.

И ны́не, богоро́дичен, гла́с то́йже:

Богоро́дице, Ты́ еси́ лоза́ и́стинная, возрасти́вшая на́м Пло́д живота́, Тебе́ мо́лимся: моли́ся, Влады́чице, со святы́ми апо́столы и со все́ми святы́ми спасти́ся душа́м на́шим.

Молитва

К вам, о святи́и преподобнии отцы Печерстии, я́ко путево́дным свети́льникам, дея́ньми свои́ми освети́вшим путь Небе́снаго восхо́да, аз многогре́шный смире́нно коле́на се́рдца моего́ преклоня́ю и из глубины́ души́ взыва́ю: умоли́те о мне Человеколю́бца Бо́га, да не попу́стит ми еще́ блужда́ти по распу́тиям греха́, но да просвети́т мои́ ум и се́рдце све́том благода́ти Своея́, я́ко да то́ю озаря́ем и подкрепля́ем, возмогу́ про́чее вре́мя земна́го жития́ пра́вою стезе́ю непреткнове́нно преити́ и хода́тайством ва́шим к Преблаго́му Го́споду сподо́блюся, поне́ вма́ле прича́стник бы́ти духо́вныя ва́шея трапе́зы в Небе́сном черто́зе Царя́ сла́вы. Ему́же со Безнача́льным Его́ Отце́м и Пресвяты́м, Благи́м и Животворя́щим Ду́хом бу́ди сла́ва, честь и поклоне́ние во ве́ки веко́в. Ами́нь.