10 сентября.

Канон преподобному Моисею Мурину.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Пусты́нный жи́тель, и в телеси́ Ангел, и чудотво́рец яви́лся еси́, богоно́се о́тче на́ш Моисе́е: посто́м, бде́нием, моли́твою небе́сная дарова́ния прии́м, исцеля́еши неду́жныя и ду́ши ве́рою приходя́щих ти́. Сла́ва Да́вшему тебе́ кре́пость, сла́ва Венча́вшему тя́, сла́ва Де́йствующему тобо́ю все́м исцеле́ния.

Канон свята́го, глас 8.

Пе́снь 1.

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Преподобне отче Моисее, моли́ Бо́га о нас.

Грызе́нием грехо́вным помраче́нное се́рдце мое́ убели́, о́тче, покая́ния ту́чами, моли́твами твои́ми.

Припев: Преподобне отче Моисее, моли́ Бо́га о нас.

Стра́ху Влады́чню пло́ть пригвозди́в, вся́ко помышле́ние стра́стное от се́рдца, богоно́се преблаже́нне, изсуши́л еси́.

Сла́ва Отцу́ и Сы́ну и Свято́му Ду́ху:

В бразда́х мы́сленных скры́в Сло́ва, о́тче, се́мена, возде́лал еси́ пшени́цу, в сокро́вищах неистоща́емых соблюда́ему.

И ны́не и при́сно и во ве́ки веко́в. Ами́нь.

Богородичен: Всего́ мя спаса́ет Сло́во Пребоже́ственное бла́гостию, восхоте́в из чре́ва Твоего́ воплоти́тися, Чи́стая Ма́ти Де́во.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Припев: Преподобне отче Моисее, моли́ Бо́га о нас.

Ду́хом дви́жимь, духо́вными, му́дре, дея́нии, терпя́, лука́вствия покори́л еси́ ду́хи.

Припев: Преподобне отче Моисее, моли́ Бо́га о нас.

Си́лою укрепля́емь богонача́льною, Моисе́е преподо́бне, кре́пкаго, я́ко безпло́тен, смири́л еси́ зми́я.

Сла́ва Отцу́ и Сы́ну и Свято́му Ду́ху:

Ту́чами сле́з твои́х, о́гненное опале́ние страсте́й угаси́л еси́ и река́ яви́лся еси́ дарова́ний, наполня́ема Ду́хом.

И ны́не и при́сно и во ве́ки веко́в. Ами́нь.

Богородичен: Име́я Тя́ по́мощь, враго́в стремле́ния, Чи́стая, не убою́ся: име́я Тя́ Предста́тельницу, те́х побежда́ю полки́.

Седа́лен, гла́с 3.

Боже́ственными сия́нии разбогате́в, и тму́ разруши́л еси́ страсте́й, всеблаже́нне, и бо́дрыми моли́твами твои́ми увяди́л еси́ пло́ти возвыша́емая мудрова́ния, и к го́рнему преше́л еси́ кра́йнему гра́ду. Отче преподо́бне, Христа́ Бо́га моли́ дарова́ти на́м ве́лию ми́лость.

Сла́ва, и ны́не, Богородичен:

Боже́ственнаго естества́ не отлу́чся, пло́ть бы́в во чре́ве Твое́м, но Бо́г вочелове́чся и пребы́сть, Иже по рождестве́ Ма́терь Тя́ Де́ву, я́ко пре́жде рождества́, сохрани́в Всенепоро́чну, еди́н Госпо́дь. Того́ приле́жно моли́ дарова́ти на́м ве́лию ми́лость.

КрестоБогородичен:

Нескве́рная Агница Сло́ва, Нетле́нная Де́ва Ма́ти, на Кресте́ зря́щи пове́шена из Нея́ без боле́зни Прозя́бшаго, ма́терски подо́бно рыда́ющи, вопия́ше: увы́ Мне́, Ча́до Мое́, ка́ко стра́ждеши во́лею, хотя́ изба́вити от страсте́й безче́стия челове́ка?

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Преподобне отче Моисее, моли́ Бо́га о нас.

Любопло́тнаго де́мона непреста́нными, о́тче, мольба́ми и боле́зней придая́ньми от души́, преблаже́нне, отгна́л еси́.

Припев: Преподобне отче Моисее, моли́ Бо́га о нас.

Преложи́в помышле́ние к су́щим па́че ума́ же и сло́ва, преподо́бне, воздержа́ния зно́й, я́коже боже́ственную ро́су, терпе́л еси́.

Сла́ва Отцу́ и Сы́ну и Свято́му Ду́ху:

Ве́трилом воскрили́вся нестяжа́ния, легко́ преплы́л еси́ жите́йское, о́тче, мо́ре, ко приста́нищу ти́хому направля́емь.

И ны́не и при́сно и во ве́ки веко́в. Ами́нь.

Богородичен: Де́вства сосу́де и невмести́маго естества́ селе́ние, ду́шу мою́ просвети́ омраче́нную, Богоневе́сто.

Пе́снь 5

Ирмос: Утренююще вопие́м Ти́: Го́споди, спаси́ ны, Ты́ бо еси́ Бо́г на́ш, ра́зве Тебе́, ино́го не ве́мы.

Припев: Преподобне отче Моисее, моли́ Бо́га о нас.

Углем разжига́емь, блаже́нне, безстра́стия, ве́щь удобопа́льную страсте́й попали́л еси́.

Припев: Преподобне отче Моисее, моли́ Бо́га о нас.

Звезда́ воздержа́ния, высота́ми сия́я, яви́лся еси́, ду́ши на́ша просвеща́я, пресла́вне.

Сла́ва Отцу́ и Сы́ну и Свято́му Ду́ху:

На высоту́ доброде́телей возше́л еси́ и во о́стров дости́гл еси́ небе́сный, о́тче Моисе́е досточу́дне.

И ны́не и при́сно и во ве́ки веко́в. Ами́нь.

Богородичен: Де́ву по рождестве́ пое́м Тя́, Богоро́дице: Ты́ бо Бо́га Сло́ва пло́тию ми́ру родила́ еси́.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Преподобне отче Моисее, моли́ Бо́га о нас.

Но́щию мя́ грехо́вною и сласте́й омраче́нием окруже́на, и́же в тебе́ духо́вными сия́нии всего́ просвети́, всего́ ко приста́нищу спасе́ния, о́тче, напра́ви.

Припев: Преподобне отче Моисее, моли́ Бо́га о нас.

Якоже пчела́ трудолюби́вая, со́том ума́ твоего́ цве́ты доброде́телей собра́в, источи́л еси́ сла́дость безсме́ртную, го́ресть, о́тче, де́монскую отгоня́щую.

Сла́ва Отцу́ и Сы́ну и Свято́му Ду́ху:

В пусты́нях претерпева́я, вы́шний гра́д насле́довал еси́, пло́ть порабоща́я поще́ньми, чу́дне, к пи́щи неоскудева́емей и к ра́йским селе́нием отше́л еси́.

И ны́не и при́сно и во ве́ки веко́в. Ами́нь.

Богородичен: Свяще́ние у́мное и неприкоснове́нное очисти́лище, свети́льник златови́ден и трапе́зу одушевле́нну, Хле́б носи́вшую жи́зни, Де́во, ве́рнии, Тя́ имену́ем.

Конда́к, гла́с 4:

Му́рины зауши́в и ли́ца де́монов поплева́в, мы́сленно просия́л еси́, я́коже со́лнце све́тло, све́том жития́ твоего́ и уче́нием наставля́я ду́ши на́ша.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Припев: Преподобне отче Моисее, моли́ Бо́га о нас.

Ка́ла страсте́й очище́н, духо́вными блиста́яся сия́ньми, к Све́ту вои́стинну невеще́ственному преста́вился еси́, иде́же ли́цы, блаже́нне, по́стников во ве́ки.

Припев: Преподобне отче Моисее, моли́ Бо́га о нас.

Вся́кия избе́гл еси́ зло́бы, присво́ився же до́брым преложе́нием, до́брым жела́нием, невеще́ственно примеси́лся еси́, вопия́, блаже́нне: Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Боле́зньми воздержа́ния безме́рными боле́зненный изсуши́л еси́ гре́х, богоно́се, те́мже безболе́зненное обре́л еси́ благи́х наслажде́ние, благословя́ твоего́ Влады́ку.

И ны́не и при́сно и во ве́ки веко́в. Ами́нь.

Богородичен: Се́, Юже рече́ Де́ву Ду́хом вели́кий Иса́ия, во утро́бе Бо́га зача́т и ражда́ет. Ему́же пое́м: благослове́н Бо́г оте́ц на́ших.

Пе́снь 8.

Ирмос: Седмери́цею пе́щь халде́йский мучи́тель, Богочести́вым неи́стовно разжже́; си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Преподобне отче Моисее, моли́ Бо́га о нас.

Моли́твами вжиля́емь, смире́нием возвыша́емь, пра́вдою ду́шу облиста́я, любо́вию украша́емь, к доброде́телей соверше́нию, к явле́нней, о́тче, восте́кл еси́ высоте́, зовы́й Влады́це: свяще́нницы, благослови́те, лю́дие, превозноси́те во вся́ ве́ки.

Припев: Преподобне отче Моисее, моли́ Бо́га о нас.

Че́рный те́лом, ду́шу же светле́йшу со́лнечных сия́ний стяжа́в, де́монов очерни́ омраче́нная ли́ца, ве́рных же просвеща́ет сердца́ свои́м подо́бием, те́пле пою́щих: лю́дие, превозноси́те Христа́ во ве́ки.

Сла́ва Отцу́ и Сы́ну и Свято́му Ду́ху:

Смире́нием всю́ду огражде́н, убежа́л еси́, о́тче, ефио́пов мы́сленных стреля́ния, о́браз же бы́л еси́ мона́хом к боре́нию враго́в, де́лы же и словесы́, с ни́ми взыва́я: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Па́че естества́ зачала́ еси́, па́че сло́ва родила́ еси́ Соде́теля челове́ческаго естества́, бы́вша Челове́ка, Отцу́ неразлу́чна, Влады́чице Чи́стая. Ему́же пое́т вся́ тва́рь: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Песнь 9

Ирмос: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Припев: Преподобне отче Моисее, моли́ Бо́га о нас.

В де́лех вои́стинну благи́х жи́знь сконча́в, пости́гл еси́ благи́х исто́чник, и твоего́ жела́ния коне́ц прия́л еси́, пра́зднующих же иде́же гла́с с хвале́нием, ра́дуяся, всели́лся еси́, досточу́дне Моисе́е, о́тче преподо́бне.

Припев: Преподобне отче Моисее, моли́ Бо́га о нас.

Иска́пают, о́тче, сла́дость по́льзы боле́зней по́тове твои́, и го́ресть на́шу стра́стную отго́нят, источа́ют на́м исцеле́ния мо́щи, и гное́ния зо́л и ду́ш скве́рну очища́ют.

Сла́ва Отцу́ и Сы́ну и Свято́му Ду́ху:

Венцы́ венча́ Христо́с неувяда́ющими твою́ главу́, чу́дне, победи́вша тве́рдо полки́ мироде́ржца, и преподо́бных лико́м преподо́бно приче́лся еси́. С ни́миже моли́ся изба́витися напа́стей чту́щим тя́.

И ны́не и при́сно и во ве́ки веко́в. Ами́нь.

Богородичен: Уста́вила еси́ еди́на в жена́х кля́тву первозда́нных, Богоневе́сто, Неопи́санна пло́тию ро́ждши опису́ема, обнови́ла еси́ зако́ны естества́, Нескве́рная, разстоя́щая пе́рвее, пресла́вным хода́тайством Твои́м соедини́ла еси́.

Молитва первая преподобному Моисею Мурину

О преподобный, ты от тяжких грехов достиг пречудных добродетелей, помоги молящимся тебе рабам Божиим (имена), влекомым в погибель оттого, что предаются безмерному, вредному для души и тела употреблению вина. Склони на них свой милостивый взор, не отклони и не презри их, но внемли им, прибегающим к тебе. Моли, святой Моисей, Владыку Христа, чтобы не отверг их Он, Милосердный, и да не возрадуется диавол их погибели, но да пощадит Господь этих безсильных и несчастных, которыми овладела пагубная страсть пиянства, ведь мы все Божии создания и искуплены Пречистою Кровию Сына Его. Услышь же, преподобный Моисей, их молитву, отгони от них диавола, даруй им силу победить страсть, помоги им, простри твою руку, выведи их на путь добра, освободи их от рабства страстей и избавь их от винопития, чтобы они, обновленные, в трезвении и светлом уме возлюбили воздержание и благочестие, и вечно прославляли Всеблагого Бога, всегда спасающего Свои создания. Аминь. 

Молитва вторая преподобному Моисею Мурину

О, великая сила покаяния! О, неизмеримая глубина милосердия Божия! Ты, преподобный Моисей, был прежде разбойником, но потом ужаснулся своих грехов, восскорбел о них и в раскаянии пришел в монастырь и там в великом плаче о своих беззакониях и в трудных подвигах проводил свои дни до кончины и удостоился Христовой благодати прощения и дара чудотворения.

О, преподобный, ты от тяжких грехов достиг пречудных добродетелей, помоги и молящимся тебе рабам Божиим (имена), влекомым в погибель от того, что предаются безмерному, вредному для души и тела употреблению вина. Склони на них свой милостивый взор, не отклони и не презри их, но внемли им, прибегающим к тебе.

Моли, святой Моисей, Владыку Христа, чтобы не отверг их Он, Милосердный, и да не возрадуется диавол их погибели, но да пощадит Господь этих безсильных и несчастных (имена), которыми овладела пагубная страсть пьянства, ведь мы все Божии создания и искуплены Пречистою Кровью Сына Его. Услышь же, преподобный Моисей, их молитву, отгони от них диавола, даруй им силу победить их страсть, помоги им, простри твою руку, выведи их на путь добра, освободи их от рабства страстей и избавь их от винопития, чтобы они, обновленные, в трезвении и светлом уме, возлюбили воздержание и благочестие и вечно прославляли Всеблагого Бога, всегда спасающего Свои создания. Аминь.