10 сентября.

Канон преподобному Иову, Почаевскому чудотворцу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Многострада́льнаго пра́отца долготерпе́ние стяжа́в, Крести́телеву воздержа́нию уподобля́яся, боже́ственныя же ре́вности обою́ приобща́яся, те́х имена́ досто́йно прия́ти сподо́бился еси́, и и́стинныя ве́ры бы́л еси́ пропове́дник безбоя́знен; те́мже мона́хов мно́жества ко Христу́ приве́л еси́, и вся́ лю́ди в Правосла́вии утверди́л еси́, Иове преподо́бне о́тче на́ш, моли́ спасти́ся душа́м на́шим.

Стихи́ры, гла́с 1:

Прии́де де́нь па́мяти твоея́, Иове пресла́вне, и Волы́нская земля́ ра́дости исполня́ется, я́ко твои́м науче́нием во Правосла́вии утверди́вшися и твои́ми по́двиги благоче́стию научи́вшися, на твоя́ же моли́твы упова́ющи: и́миже, о́тче преподо́бне, испроси́ ми́рови ми́р и душа́м на́шим ве́лию ми́лость.

Во сла́вней па́мяти твое́й, уго́дниче Христо́в, мона́шестии собо́ри ликовству́ют и о богоуго́днем житии́ ре́вностию распала́ются, твои́м же нетле́нным моще́м покланя́ющеся, я́ко живу́щему ти́ с на́ми восклица́ют: о́тче Иове, ми́лостиве и богоуве́тливе, испроси́ у Го́спода ми́рови ми́р и душа́м на́шим ве́лию ми́лость.

Кто́ не подиви́тся твоему́ долготерпели́вому житию́, о́тче преподо́бне? Во трие́х бо оби́телех твоя́ пресла́вная дея́ния пропове́дашася, по́ст же, и сле́зы, и бде́ние, в пеще́ре себе́ заключе́ние и во все́м себе́ непощаде́ние, но ко бра́тии любо́вь ми́лующая, та́тем проще́ние и все́м лю́дем до́брое науче́ние.

Ины стихи́ры, гла́с 2:

Ки́ими похва́льными венцы́ увязе́м преподо́бнаго Иова, ве́ры Правосла́вныя учи́теля и ратобо́рца, Боже́ственных Писа́ний глаша́тая, оте́ческих же Преда́ний списа́теля, но и тя́жких слу́жб исполни́теля, земли́ копа́нием и древе́с сажде́нием себе́ смиря́вшаго и все́м о́браз послуша́ния бы́вшаго? Сего́ ны́не нетле́нною сла́вою венча́ет Христо́с Бо́г на́ш, име́яй ве́лию ми́лость.

Ки́ими досто́йными благодаре́ньми просла́вим Иова, Поча́евскую похвалу́ и всея́ страны́ Росси́йския украше́ние? То́й бо моли́твами свои́ми небе́сный све́т в пеще́ру низведе́, то́й и по преставле́нии свое́м с небесе́ явля́ется и моли́тву возно́сит о напа́ствуемых лю́дех. Та́мо бо сла́вою венча́ет его́ Христо́с Бо́г на́ш, име́яй ве́лию ми́лость.

Ки́ими умиле́нными слеза́ми сокруши́м растле́нная сердца́ на́ша, зря́ще Иова нетле́нное те́ло, е́же по сме́рти, а́ки жи́во, сохраня́ется, но во вре́мя жития́ его́, а́ки ме́ртво, пребыва́ше, посто́м и бде́нием изнуря́емо? Того́ у́бо подвиго́м подража́ти потщи́мся, да и на́с во гряду́щем житии́ поми́лует Христо́с Бо́г на́ш, име́яй ве́лию ми́лость.

Сла́ва и ныне, гла́с 3:

Твои́м словесе́м, Го́споди, после́довал Иов преподо́бный, вся́ кра́сная ми́ра сего́ во уме́ты вмени́л е́сть, и о ю́ности свое́й неради́в, измла́да мона́шескому послуша́нию вдаде́ся, те́мже де́монския ко́зни победи́в, адама́нт кре́пок правосла́внаго благоче́стия яви́лся е́сть, всю́ же страну́ сию́ свои́ми по́двиги просвеща́ет. Того́ моли́твами ду́ши на́ша пощади́, и да́руй на́м по́мысл до́брый е́же пре́жде конца́ покая́ния.

Велича́ние:

Ублажа́ем тя́, преподо́бне о́тче на́ш Иове, и чте́м святу́ю па́мять твою́, наста́вниче мона́хов и собесе́дниче Ангелов.

Кано́н преподо́бному и богоно́сному Иову, Поча́евскому чудотво́рцу, гла́с 8.

Пе́снь 1.

Ирмос: Посе́ченный несеко́маго пресече́, и ви́де со́лнце зе́млю, ю́же не ви́де; лю́таго врага́ вода́ потопи́, и непроходи́мое про́йде Изра́иль; пе́снь же воспева́шеся: Го́сподеви пои́м, сла́вно бо просла́вися.

Припев: Преподобне отче Иове, моли́ Бо́га о нас.

Ангела земна́го и небе́снаго челове́ка, Иова преподо́бнаго, Волы́нскую похвалу́, досто́йно воспе́ти помози́ ми, Сло́ве Бо́жий, презира́я моя́ прегреше́ния и подава́я сло́во усто́м мои́м.

Припев: Преподобне отче Иове, моли́ Бо́га о нас.

Бы́л еси́, преподо́бне, вои́стинну ми́ру свети́льник пресве́тел, все́м пу́ть спасе́ния показу́яй; те́мже и мне́ бу́ди помо́щник, во е́же просла́вити житие́ твое́ и умиле́ние стяжа́ти.

Припев: Преподобне отче Иове, моли́ Бо́га о нас.

В дому́ роди́телей твои́х пе́рвее позна́л еси́ Го́спода, Иове сла́вне, и о́трок сы́й, ра́зум соверше́н показа́л еси́, егда́ мона́шеское житие́ изво́лил еси́, вся́ же жите́йская преоби́дев, еди́наго Бо́га возлюби́л еси́.

Припев: Преподобне отче Иове, моли́ Бо́га о нас.

Горе́ о́чи твои́ и ду́шу вознося́, во оби́тели Уго́рництей бра́тию в богоуго́днем житии́ ско́ро превозше́л еси́, ху́ждша все́х себе́ помышля́я и те́м лу́чший Иису́су явля́яся, ста́рцем же и ю́ным о́браз бы́в прелюбе́знейший.

Сла́ва Отцу́ и Сы́ну и Свято́му Ду́ху:

До́бре тя́ на диа́волы во́инствовавши помышля́я, преподо́бне, своея́ стыжду́ся ле́ности, и мно́жества грехо́в мои́х ужаса́юся: но твои́ми, свя́те, моли́твами да́руй ми́ жела́ние благо́е, во е́же про́чее вре́мя жития́ моего́ в покая́нии сконча́ти.

И ны́не и при́сно и во ве́ки веко́в. Ами́нь.

Богородичен: Яко Бо́жия Ма́ти дерзнове́ние иму́щи к ро́ждшемуся из Тебе́, Единоро́дному Сло́ву, и Отцу́ Собезнача́льному, и Соесте́ственному Ду́ху, моля́щи не преста́й от бе́д спасти́, Всенепоро́чная, Тя́ Богоро́дицу сла́вящия.

Пе́снь 3.

Ирмос: Утверди́ся се́рдце мое́ в Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии Твое́м.

Припев: Преподобне отче Иове, моли́ Бо́га о нас.

Есть во мне́, о́тче преподо́бне, до́браго исправле́ния жела́ние, но искуше́ния ле́ности побежда́ти не навыко́х, увы́ мне́. Оба́че на по́мощь твою́ наде́яся, уны́ния по́мыслы отгоня́ю, на твоя́ же взира́ю сла́вныя по́двиги.

Припев: Преподобне отче Иове, моли́ Бо́га о нас.

Желе́зо нарече́ся ро́д тво́й, Иове преподо́бне, кре́пость души́ твоея́ предуказу́я; в пеще́ре ка́менней заключи́вся, я́ко зла́то сокрове́но, освяти́л еси́ ме́сто по́двиг твои́х, и го́ру Поча́евскую, я́ко сте́ну ме́дяну, проти́ву враго́в Правосла́вия яви́л еси́.

Припев: Преподобне отче Иове, моли́ Бо́га о нас.

Зело́ углуби́шася помышле́ния твоя́, я́же о небе́снем Ца́рствии, егда́, еще́ о́трок сы́й, Ангельский о́браз восприя́л еси́; те́мже и свяще́нник бы́в Бо́гу ве́рен, да́же ны́не моле́ния о лю́дех возно́сиши, Иове преподо́бне.

Припев: Преподобне отче Иове, моли́ Бо́га о нас.

Земля́ Га́лицкая ю́ностию твое́ю сла́вится, и Ду́бенская оби́тель му́жеския по́двиги твоя́ благовеству́ет, оби́тель же Поча́евская ста́ростию твое́ю хва́лится и блаже́нною кончи́ною весели́тся, вся́ же вселе́нная о чудесе́х твои́х ра́дуется и ликовству́ет.

Сла́ва Отцу́ и Сы́ну и Свято́му Ду́ху:

Иже подае́ши блага́я все́м, моля́щимся тебе́, и мене́ припа́дающа не отри́ни, свя́тче, но покая́ние мое́ зря́, да́ждь ми́ жития́ исправле́ние, ре́вность же вдохни́, е́же подража́ти твои́м боголюби́вым дея́нием.

И ны́не и при́сно и во ве́ки веко́в. Ами́нь.

Богородичен: Умерщвле́нный мо́й у́м, живо́тным де́йством из Тебе́ Явльшимся ми́ру, воздви́гни, Чи́стая, и к жи́зни наста́ви, Яже сме́рти две́ри разо́ршая Еди́на Рождество́м Твои́м.

Седа́лен, гла́с 8:

Дне́сь исполня́ется ра́дости оби́тель Поча́евская, твое́ боголюби́вое житие́ прославля́ющи; дне́сь христоимени́тии лю́дие ре́вностию спасе́ния просвеща́ются, зря́ще нетле́нием просла́вленныя мо́щи твоя́, преподо́бне; дне́сь грехо́вныя отгоня́ются стра́сти, и по́мыслы покая́ния ду́ши на́ша объе́млют, в ни́хже утверди́ все́х, пресла́вне, ве́рно почита́ющих па́мять твою́.

Сла́ва, и ны́не, Богородичен:

Яко Всенепоро́чная Неве́ста Творца́, я́ко Неискусому́жная Ма́ти Изба́вителя, прия́телище я́ко су́щи Уте́шителя, Всепе́тая, беззако́ния мя́ су́ща скве́рное оби́телище и де́монов игра́лище в ра́зуме бы́вша, потщи́ся от те́х злоде́йства мя́ изба́вити и све́тлое жили́ще доброде́телей соверши́, Светоно́сная Нетле́нная, отжени́ о́блак страсте́й, и Вы́шняго прича́стия сподо́би, и Све́та невече́рняго моли́твами Твои́ми.

Пе́снь 4.

Ирмос: Проро́к Авваку́м у́мныма очи́ма прови́де, Го́споди, прише́ствие Твое́, те́м и вопия́ше: от ю́га прии́дет Бо́г. Сла́ва си́ле Твое́й, сла́ва снизхожде́нию Твоему́.

Припев: Преподобне отче Иове, моли́ Бо́га о нас.

Иове преподо́бне, о все́х моли́твенник бу́ди те́плый, твоему́ заступле́нию ве́рующих, свое́ же окаява́ющих житие́ и на Бо́жие милосе́рдие упова́ющих, а́ще и прельще́ньми жития́ сего́ вла́ющихся.

Припев: Преподобне отче Иове, моли́ Бо́га о нас.

Кто́ от челове́к не подиви́тся долготерпели́вому житию́ твоему́, о́тче? Кто́ ли не просла́вит твоея́ о Правосла́вии ре́вности? Ты́ бо, я́ко адама́нт кре́пок, еретико́м противоста́л еси́, и и́стинныя ве́ры пропове́дание словесы́ же и писа́ньми все́м препо́дал еси́.

Припев: Преподобне отче Иове, моли́ Бо́га о нас.

Льва́ рыка́юща и и́щуща поглоти́ти ду́ши спаса́емых моли́твою твое́ю победи́л еси́, о́тче, но и тому́ служа́щия лю́ди в покая́ние приводи́л еси́, та́ти милосе́рдием твои́м постыжда́я и вразумля́я, граби́тели же обличе́ньми устраша́я и вся́ науча́я спаси́тельному покая́нию.

Сла́ва Отцу́ и Сы́ну и Свято́му Ду́ху:

Мра́к души́ моея́, о́тче, предста́тельством твои́м разсе́й и све́том за́поведей Госпо́дних просвети́ мое́ окая́нное се́рдце, да и а́з, твои́м ученико́м после́дуя, те́х ча́сти лише́н не пребу́ду, твою́ восхваля́я святу́ю па́мять.

И ны́не и при́сно и во ве́ки веко́в. Ами́нь.

Богородичен: Бо́га, из Тебе́ воплоще́ннаго моли́, непрело́жно, е́же бе́, пребы́вша, и есте́ственно ра́вна Отцу́, и Ду́ху сопресто́льна, проще́ние прегреше́ний и ду́ш спасе́ние пою́щим Тя́ ве́рою дарова́ти.

Пе́снь 5

Ирмос: Мра́к души́ моея́ разжени́, Светода́вче Христе́ Бо́же, началоро́дную тму́ изгна́в бе́здны, и да́руй ми́ све́т повеле́ний Твои́х, Сло́ве, да у́тренюя, сла́влю Тя́.

Припев: Преподобне отче Иове, моли́ Бо́га о нас.

На́ш еси́ вои́стинну предста́тель и чудотво́рец пресве́тлый, — взыва́ше Диони́сий, обреты́й мо́щи твоя́, тле́нию неприча́стны; мы́ же, сия́ лобыза́юще, вопие́м: на́ших скве́рн не возгнуша́йся, уго́дниче Бо́жий, но твои́ми моли́твами сия́ очи́сти.

Припев: Преподобне отче Иове, моли́ Бо́га о нас.

Оправда́нием Бо́жиим от ю́ности, о́тче, науча́емь, суеты́ жите́йския уклони́тися кре́пко возжела́л еси́, безмо́лвие же возлюби́л еси́: оба́че веле́нию Христо́ву не противля́яся, притека́ющия к тебе́ пра́вому испове́данию и ева́нгельскому житию́ науча́л еси́.

Припев: Преподобне отче Иове, моли́ Бо́га о нас.

Предста́тель яви́лся еси́ и по преставле́нии твое́м стра́ждущим и скорбя́щим челове́ком: та́ко бо тя́ ви́деша лю́дие, из гро́ба твоего́ исходя́ща и со Ангелы посреде́ це́ркве моля́щася. О, чу́до пресла́вное вои́стинну! О, ра́дость ве́рным и утвержде́ние!

Припев: Преподобне отче Иове, моли́ Бо́га о нас.

Рачи́тель бы́в небе́снаго Ца́рствия, о свое́м та́мо вхожде́нии известву́ешися и кроме́ боле́зни и стра́ха пресе́льник явля́ешися лу́чшия жи́зни, бра́тии же твоея́ учи́тель и упова́ние.

Сла́ва Отцу́ и Сы́ну и Свято́му Ду́ху:

Сопу́тник житию́ моему́ бу́ди, о́тче Иове, моли́твою твое́ю огражда́й многомяте́жную мою́ ду́шу и введи́ ю́ в небе́сное Ца́рство, твои́ми умиле́нную по́двиги, Христу́ же покая́нныя принося́щую сле́зы.

И ны́не и при́сно и во ве́ки веко́в. Ами́нь.

Богородичен: Тя́ сте́ну иму́ще и предста́тельством Твои́м соблюда́еми, Твое́ю боже́ственною сла́вою хва́лящеся, Тя́ блажи́м: Ты́ бо, Всечи́стая, душа́м на́шим источа́еши весе́лие и ра́дование.

Пе́снь 6.

Ирмос: Ио́ну в ки́те, Го́споди, еди́наго всели́л еси́, мене́ же свя́зана мре́жами вра́жиими, я́ко от тли́ о́наго, спаси́.

Припев: Преподобне отче Иове, моли́ Бо́га о нас.

Тве́рдое упова́ние на предста́тельство твое́ возлага́ю, преподо́бне, и ве́рою молю́ся: да́ждь ми́ страсте́й лю́тых одоле́ние, сме́рти же непреста́нную па́мять и блаже́нства жела́ние гряду́щаго ве́ка.

Припев: Преподобне отче Иове, моли́ Бо́га о нас.

Утвержда́ется тобо́ю, преподо́бне, Свята́я Це́рковь, е́ресь же вся́кая посрамля́ется, обличе́ние иму́щи твоя́ многоцеле́бныя мо́щи, и жития́ твоего́ столе́тняго труды́, и боле́зни, и сле́зы, и по́ст, и пло́ти от косте́й отпаде́ние.

Припев: Преподобне отче Иове, моли́ Бо́га о нас.

Фарао́на мы́сленнаго побежда́ше Иов преподо́бный, послуша́нию всегда́ прилежа́ и обурева́емым на по́мощь приходи́ти не отрица́яся, и та́ко три́ оби́тели уче́нием свои́м просвети́в и по́двиги мно́гими просла́вив, веселя́ше Спа́са все́х, Человеколю́бца.

Припев: Преподобне отче Иове, моли́ Бо́га о нас.

Христо́ву смире́нию подража́ше Иов, егда́ нача́льство, я́ко служе́ние все́м прия́т, и игу́мен сы́й, в тя́жких слу́жбах подвиза́шеся, бра́тии же бя́ше о́браз кро́тости, и трудолю́бия пра́вило, и о моли́тве при́сное напомина́ние.

Сла́ва Отцу́ и Сы́ну и Свято́му Ду́ху:

От скве́рных изба́ви мя́ страсте́й твои́ми моли́твами, те́х одоле́ние мне́ подава́я Боже́ственныя по́мощи при́сным призыва́нием, и на себе́ ненаде́янием, и бра́та моего́ неосужде́нием.

И ны́не и при́сно и во ве́ки веко́в. Ами́нь.

Богородичен: Вознесла́ еси́ всеи́стинно па́дшееся челове́ческое существо́ во зра́це Боже́ственнем, и Отца́ в ра́венстве, ви́димаго Сы́на неизме́ннаго, Богома́ти, без се́мене во чре́ве поноси́вши.

Конда́к, гла́с 4.

Яви́лся еси́ и́стинныя ве́ры сто́лп, ева́нгельских же за́поведей ревни́тель, горды́ни обличе́ние, смире́нным же предста́тель и науче́ние: те́мже и ублажа́ющим тя́ грехо́в отпуще́ние испроси́ и оби́тель твою́ невреди́му сохрани́, Иове о́тче на́ш, многострада́льному подо́бный.

Икос:

Отве́рзи уста́ твоя́, пеще́ро ка́менная, и рцы́ на́м, колькра́ты то́ки сле́з Иовлих омочи́лася еси́, ка́ко того́ воздыха́ния твои́х сте́н не расторго́ша, ка́ко све́т Боже́ственный тебе́ не сожже́, ка́ко Ангели бде́нным подвиго́м Иовлим диви́шася, те́ми бо освяти́ся земля́ Га́лицкая и Волы́нская? Мы́ же, сия́ вся́ помышля́юще, слеза́ми умиле́ния о́чи на́ши исполня́ем: е́сть бо преподо́бный Иов уго́дник ди́вный, многострада́льному подо́бный.

Пе́снь 7.

Ирмос: На по́ли Деи́ре иногда́ мучи́тель пе́щь поста́ви на муче́ние богоно́сных, в не́й же трие́ о́троци песносло́вяху Еди́наго Бо́га, тро́ично воспева́ху, глаго́люще: отце́в Бо́же, благослове́н еси́.

Припев: Преподобне отче Иове, моли́ Бо́га о нас.

Царя́ правосла́внаго, тя́ блажа́ща, преподо́бне Иове, укрепи́ на враги́ и о Це́ркви ми́рная глаго́ли в се́рдце его́, на́м же все́м единомы́слие испроси́ у Бо́га, и дру́г ко дру́гу любо́вь, и о Правосла́вии ре́вность.

Припев: Преподобне отче Иове, моли́ Бо́га о нас.

Ча́шу жития́ Твоего́ пи́ти, Го́споди, не могу́ а́з, окая́нный, боя́знию скорбе́й обурева́емь и страсте́й сплета́емь те́рнием, оба́че молю́ся: Иова, Твоего́ уго́дника, моли́твами поми́луй мя́, и помози́ ми грехо́вную отрясти́ ле́ность.

Припев: Преподобне отче Иове, моли́ Бо́га о нас.

Широ́кий пу́ть, поги́бель души́ преднося́щий, возненави́дев, Иове преподо́бне, в те́сней пеще́ре заключи́лся еси́ и те́снаго пути́ жи́зни в нача́льстве твое́м не уклони́лся еси́, де́нь и но́щь в моли́тве и труде́х пребыва́я и науче́ние здра́вое все́м приходя́щим к тебе́ подава́я.

Сла́ва Отцу́ и Сы́ну и Свято́му Ду́ху:

Ще́др бы́л еси́ ни́щим, ка́ющимся же ми́лостив и науче́ния тре́бующим учи́тель кро́ток, боже́ственныя же му́дрости люби́тель и ева́нгельских за́поведей пропове́дник, кни́г же боже́ственных изда́тель и е́реси безбоя́зненный обличи́тель.

И ны́не и при́сно и во ве́ки веко́в. Ами́нь.

Богородичен: Мари́ю Пречи́стую и Всесвяту́ю восхва́лим: То́ю бо благода́ть на́м источа́ется па́че ума́ даро́в, я́ко от пото́ка боже́ственныя бла́гости, Юже благочести́вым по́мыслом ны́не ублажа́ем.

Пе́снь 8.

Ирмос: Покрыва́яй вода́ми превы́спренняя своя́, полага́яй мо́рю преде́л песо́к и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

Припев: Преподобне отче Иове, моли́ Бо́га о нас.

Едущим и иду́щим во оби́тель твою́ безчи́сленным лю́дем, твои́м же моще́м припа́дающим, бу́ди дарова́ний духо́вных пода́тель, теле́сных же боле́зней цели́тель и пред Спа́сом те́плый о все́х предста́тель, Иове, земли́ Волы́нския сла́во и украше́ние.

Припев: Преподобне отче Иове, моли́ Бо́га о нас.

Юноша те́лом, но ста́рец умо́м в нача́ле мона́шескаго жития́ твоего́ бы́л еси́, о́тче: состаре́вся же пло́тию, ю́ношескую бо́дрость в труде́х явля́л еси́, земли́ копа́нием и древе́с насажде́нием о́браз все́м смиренному́дрия подава́я.

Припев: Преподобне отче Иове, моли́ Бо́га о нас.

Явле́ние твое́ со Ангелы вку́пе смире́нную де́ву ужаса́ше, здра́вие же ученику́ твоему́ подава́ше и вся́ лю́ди на славосло́вие Бо́гови воздвиза́ше, и́стинную же утвержда́ше в ни́х ве́ру и ерети́ческая отрева́ше нападе́ния.

Сла́ва Отцу́ и Сы́ну и Свято́му Ду́ху:

Фимиа́мом моли́тв твои́х и мене́ облагоуха́й, Иове пресла́вне, мои́х грехо́в злосмра́дие те́м отгоня́я и упова́ние на Го́спода вселя́я в мою́ смра́дную ду́шу, да благода́тию Бо́жиею очища́ем, воспою́ твое́, преблаже́нне, кре́пкое заступле́ние.

И ны́не и при́сно и во ве́ки веко́в. Ами́нь.

Богородичен: Богороди́тельнице Всечи́стая, души́ моея́ я́звы и грехо́вныя стру́пы очи́сти, исто́чниками омыва́ющи су́щим из ре́бр Сы́на Твоего́, и поте́кшими из те́х очища́ющи струя́ми: к Тебе́ прибега́ю, и Тя́ призыва́ю, Богоблагода́тную.

Песнь 9

Ирмос: Благослове́н Госпо́дь Бо́г Изра́илев, воздви́гнувый ро́г спасе́ния на́м в дому́ Дави́дове, Отрока Своего́, в ни́хже посети́ на́с Восто́к с высоты́ и напра́вил ны́ е́сть на пу́ть ми́ра.

Припев: Преподобне отче Иове, моли́ Бо́га о нас.

Иссо́пом благода́ти Бо́жия окропи́ сердца́ на́ша, Иове преподо́бне, твои́м святы́м моще́м покланя́ющихся, да твоея́ ре́вности о ве́ре причасти́вшеся, ко исполне́нию за́поведей Христо́вых до́бре потщи́мся.

Припев: Преподобне отче Иове, моли́ Бо́га о нас.

Псало́мски взыва́ти к Бо́гу на земли́ не престава́л еси́, и де́вства твоего́ сосу́д соблю́л еси́: те́мже на небеси́ ра́йския воспева́еши ны́не пе́сни со Ангелы и все́ми святы́ми, лю́ди же, на земли́ трудя́щияся, от вы́шних назира́еши.

Припев: Преподобне отче Иове, моли́ Бо́га о нас.

О, коли́ка жития́ твоего́ нетле́нная красота́! О, коли́ка по сме́рти твое́й чудеса́ и исцеле́ния! Се́ бо земна́я оста́вив, вои́стинну стори́цею небе́сная бла́га еще́ в житии́, па́че же во гряду́щем, по глаго́лу Христо́ву стяжа́л еси́.

Сла́ва Отцу́ и Сы́ну и Свято́му Ду́ху:

О, коли́ко грехо́в на́ших мно́жество! Но сия́ превосхо́дит твои́х моли́тв кре́пость, и́хже не лиши́ на́с, о́тче преподо́бне Иове, дру́же Христо́в и святы́х все́х соприча́стниче, церко́вный сто́лпе и о душа́х челове́ческих предста́телю тепле́йший.

И ны́не и при́сно и во ве́ки веко́в. Ами́нь.

Богородичен: Зачала́ еси́, Де́во, без се́мене, вся́ческая созда́вшаго Сло́во Бо́жие, кроме́ хоте́ний плотски́х, и без истле́ния родила́ еси́, без боле́зней ма́терних. Те́м Тя́, Богоро́дицу, и язы́ком, и се́рдцем испове́дающе, велича́ем.

Свети́лен.

Иов преподо́бный дне́сь да восхва́лится, я́ко Христо́в во́ин и о лю́дех моли́твенник, ве́ры пропове́дник, е́реси обличи́тель и Це́ркве украше́ние.

Сла́ва и ны́не:

Тя́ пе́сньми немо́лчными ублажа́ем, Де́во, я́ко от Тро́ицы Еди́наго родила́ еси́, Богоро́дице, и носи́ла еси́ на боже́ственных объя́тиих Пресу́щественное Сло́во, невра́щно и неизме́нно.

Молитва преподобному Иову, игумену Почаевскому

О, преподо́бне о́тче И́ове, и́ноков трудолю́бнаго жития́ богому́дрый наста́вниче, кро́тости и воздержа́ния, чистоты́ и целому́дрия, братолю́бия и нищелю́бия, терпе́ния и бде́ния от ра́нней ю́ности до по́здней ста́рости неутоми́мый подви́жниче, ве́ры Правосла́вныя вели́кий ревни́телю и непреобори́мый побо́рниче, земли́ Волы́нския и Га́лицкия свети́ло благосве́тлое и святы́я Поча́евския оби́тели непобеди́мый защи́тниче! При́зри о́ком благоутро́бия твоего́ на нас недосто́йных чад твои́х, к тебе́ усе́рдно по вся дни прибега́ющих и на боголюби́выя лю́ди сия́, пред твои́ми духоно́сными и многоцеле́бными моща́ми собра́вшияся и благогове́йно к тем припа́дающия, и испроси́ предста́тельством твои́м ко Всевы́шнему Влады́це им и нам вся, я́же к животу́ и благоче́стию, поле́зная и благопотре́бная: боля́щия исцели́, малоду́шныя обо́дри, скорбя́щия уте́ши, оби́димыя заступи́, немощны́я подкрепи́ и пове́рженныя до́лу возста́ви, всем вся, благода́тию от Бо́га да́нною, да́руй, по коего́ждо ну́жде и потре́бе, во спасе́ние души́ и во здра́вие те́лу. Вознеси́ уго́дниче Бо́жий всемо́щную моли́тву твою́ о Росси́йской держа́ве, да бу́дет вы́ну мир и тишина́, благоче́стие и благоде́нствие, в суда́х пра́вда и ми́лость, в сове́тах му́дрость и благо́е преспе́яние, да утвержда́ется же во благи́х челове́цех ве́рность, в злых же страх и боя́знь, во е́же преста́ти им от зла и твори́ти до́брая, да та́ко в держа́ве Росси́йстей ца́рство Христо́во расте́т и мно́жится и да просла́вится в нем Бог, ди́вный во святы́х свои́х: Ему́же еди́ному подоба́ет вся́кая сла́ва, честь и поклоне́ние Отцу́ и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Молитва вторая преподобному Иову, игумену Почаевскому

О, всесвяты́й и пресла́вный уго́дниче Бо́жий, преподо́бне о́тче наш И́ове, при́сный о нас ко Го́споду моли́твенниче и те́плый предста́телю о душа́х на́ших, к тебе́ всеумиле́нно ны́не притека́ем и, помина́юще по́двиги и чудеса́ твоя́, я́же сотвори́л еси́ и твори́ши на земли́, про́сим и мо́лим твою́ благосты́ню: я́коже тве́рдо и неизме́нно потруди́лся еси́ в ве́ре Христа́ Бо́га на́шего, и, сию́ до конца́ в себе́ и во всех при́сных твои́х це́лу и невреди́му сохрани́вый от вся́ких прираже́ний вра́жиих и ересе́й тлетво́рных, си́це и нас в Правосла́вии и единомы́слии укрепи́, отгоня́я моли́твами твои́ми вся́кую тьму неве́рия и неправомы́слия от серде́ц и помышле́ний на́ших; послужи́вый Го́споду и Бо́гу твоему́ де́лы благи́ми и неизрече́нным самоотверже́нием в труде́х, бде́ниих и поще́ниих, наста́ви нас на путь вся́кия доброде́тели и благосты́ни, избавля́я от искуше́ний и грехо́в, удаля́ющих нас от Бо́га и поверга́ющих в бе́здну зла все житие́ на́ше; яви́выйся иногда́ с Пречи́стою Де́вою Богоро́дицею верху́ горы́ Поча́евския во спасе́ние оби́тели твоея́ от наше́ствия и обложе́ния ага́рянскаго, и ны́не ускори́ на по́мощь стране́ на́шей проти́ву всех враго́в на́ших, вне́шних и вну́тренних, утвержда́я мир и тишину́ в земли́ на́шей, да безмо́лвное житие́ поживе́м во вся́ком благоче́стии и чистоте́; и всем к тебе́ притека́ющим и припа́дающим к ра́це честны́х и многоцеле́бных моще́й твои́х и твоея́ по́мощи и заступле́ния тре́бующим неоску́дныя ми́лости незави́стно подава́яй, не оста́ви и нас, си́рых и безпо́мощных, тебе́ моля́щихся, избавля́я от вся́кия ско́рби, гне́ва и ну́жды, от гла́да, губи́тельства, тру́са, пото́па, огня́, меча́, наше́ствия иноплеме́нник и междоусо́бныя бра́ни. Ей, уго́дниче Бо́жий, при́зри ми́лостивно от Престо́ла Царя́ Сла́вы, Ему́же ты ны́не предстои́ши со Арха́нгелы и А́нгелы и со все́ми святы́ми, на оби́тель твою́ Поча́евскую, е́юже ты дре́вле му́дро пра́вил еси́, назда́в ю́ всехва́льным и ди́вным житие́м твои́м, и сохрани́ ю́ моли́твами твои́ми и вся́кий град, и страну́ и всех отовсю́ду, на мо́ре и на су́ши, в пусты́нях и в заключе́ниих многоразли́чных тебе́ призыва́ющих, от всех зол, ви́димых и неви́димых, да, та́ко твое́ю по́мощию и хода́тайством спаса́еми, в ве́це сем и по сконча́нии живота́ на́шего сподо́бимся ку́пно с тобо́ю сла́вити и воспева́ти всечестно́е и́мя Отца́, и Сы́на, и Свята́го Ду́ха во ве́ки веко́в. Ами́нь.