9 октября.

Канон иной преставлению святого апостола и евангелиста Иоанна Богослова.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 2.

Апо́столе, Христу́ Бо́гу возлю́бленне, ускори́ изба́вити лю́ди безотве́тны: прие́млет тя́ припа́дающа, Иже па́дша на пе́рси Прие́мый. Его́же моли́, Богосло́ве, и належа́щую мглу́ язы́ков разгна́ти, прося́ на́м ми́ра и ве́лия ми́лости.

Стихи́ра, гла́с 2:

Богосло́ве де́вственниче, учениче́ возлю́бленне Спа́сов, моли́твами твои́ми на́с спаса́й, мо́лимся, от вся́каго вре́да, я́ко твое́ есмы́ ста́до.

Други́й кано́н апо́стола. Гла́с 6.

Пе́снь 1.

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Апостоле и евангелисте Иоанне, моли́ Бо́га о нас.

Во глубины́ ду́ха, мы́слию озари́вся, прини́к и рождество́ стра́шное на́м я́сно сказа́л еси́, вопия́, Богосло́ве: в нача́ле бе́ Сло́во Бо́жие.

Припев: Апостоле и евангелисте Иоанне, моли́ Бо́га о нас.

Приклоня́еми мно́жеством напа́стей, и страсте́й, и скорбе́й, и лю́тых нахожде́ньми, ве́рою прибега́ем к тебе́, Богосло́ве, помо́щник бу́ди рабо́м твои́м.

Сла́ва Отцу́ и Сы́ну и Свято́му Ду́ху:

Ду́ш на́ших стра́сти лю́тыя, я́ко вра́чь изря́ден, уврачи́в, му́дре, ве́чнаго изба́ви ны́ осуждения и огня́, хода́тайством твои́м.

И ны́не и при́сно и во ве́ки веко́в. Ами́нь.

Богородичен: Бо́га заче́ншая, на́с ра́ди бы́вшаго Челове́ка, Того́ умоли́, Чи́стая, в де́нь Суда́ на́с уще́дрити, мно́гая согреши́вших Ему́.

Пе́снь 3.

Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Апостоле и евангелисте Иоанне, моли́ Бо́га о нас.

Умо́м све́тлым и чи́стым бесе́довав к Сло́ву, Богосло́ве треблаже́нне, тайнонаучи́лся еси́ от Него́, су́щим вы́шше сло́ва я́ве и всю́ тва́рь просвети́л еси́.

Припев: Апостоле и евангелисте Иоанне, моли́ Бо́га о нас.

Уз мя́ изба́ви лю́тых греха́, треблаже́нне, любо́вию связу́я мя́ Влады́ки и Бо́га, Его́же возлюби́л еси́ те́пле и Богосло́в Того́ наре́клся еси́.

Сла́ва Отцу́ и Сы́ну и Свято́му Ду́ху:

Да́лся еси́ защи́тник на́м, и хода́тай, и изба́витель, и ко Го́споду моле́бник, и чуде́с самоде́латель, и исто́чник исцеле́ний, Богосло́ве. Те́мже тя́ почита́ем.

И ны́не и при́сно и во ве́ки веко́в. Ами́нь.

Богородичен: Егда́ Сло́во, Еже из Тебе́ воплоти́вшееся неизрече́нно, Богоро́дице, на дре́во вознесе́ся Креста́, де́вственнику ученику́, я́ко Де́ву Отрокови́цу, Тебе́ вручи́.

Седа́лен, гла́с 8.

Прему́дрости на пе́рси возле́г и ра́зуму су́щих научи́вся, боже́ственно возгреме́л еси́: в нача́ле бе́ Сло́во, до́бре написа́в пе́рвый безнача́льное рождество́, и пропове́дал еси́ все́м Сло́ва воплоще́ние. Те́мже и язы́ком, я́ко мре́жею, улови́в язы́ки, благода́тию Ду́ха изуча́еши концы́ и просвеща́еши чудесы́, богосло́ве апо́столе, моли́ Христа́ Бо́га грехо́в оставле́ние дарова́ти пра́зднующим любо́вию святу́ю па́мять твою́.

Сла́ва, и ны́не, Богородичен:

В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х; и я́ко к те́плому Твоему́ заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ Воплоще́нному безсе́менно моли́ся приле́жно о все́х рабе́х Твои́х, непреста́нно моля́щих Ти ся, Богоро́дице Пречи́стая, моля́щи Его́ при́сно, согреше́ний оставле́ние дарова́ти воспева́ющим досто́йно сла́ву Твою́.

Пе́снь 4.

Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Апостоле и евангелисте Иоанне, моли́ Бо́га о нас.

Ка́плями напои́л еси́ сло́ва, сла́вне, подсо́лнечную всю́, му́тныя нече́стия во́ды изсуши́л еси́, благоче́стне: сего́ ра́ди тя́ почита́ем.

Припев: Апостоле и евангелисте Иоанне, моли́ Бо́га о нас.

Кре́постию опоя́ши и держа́вою, молю́ся, разсла́бленную вся́кими нанесе́ньми ду́шу мою́, всему́дре, от нечи́стых враго́в прибега́ющую в кро́в тво́й.

Сла́ва Отцу́ и Сы́ну и Свято́му Ду́ху:

Хра́м бы́в Боже́ственнаго Ду́ха, в хра́ме твое́м боже́ственнем ве́рою приседя́щия, хра́мы покажи́ Бо́жия, Богосло́ве, хода́тайством твои́м.

И ны́не и при́сно и во ве́ки веко́в. Ами́нь.

Богородичен: Боже́ственный Хра́м Бо́жий воспои́м, святу́ю Де́ву я́сне вси́ блажи́м, обоже́ни бы́вше Ею и от лю́тых избавля́емы.

Пе́снь 5

Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Апостоле и евангелисте Иоанне, моли́ Бо́га о нас.

Яко у́тро, просия́л еси́ су́щим на земли́, Восто́к мы́сленный я́сно пропове́дуя, апо́столе, ми́ру, в пло́ти прише́дший и многобо́жия тму́ разори́вший.

Припев: Апостоле и евангелисте Иоанне, моли́ Бо́га о нас.

Богосло́вии твои́ми свяще́нными вся́ку напои́л еси́ ду́шу, священнопропове́дниче апо́столе. Те́мже ти́ зову́: изсо́хшее се́рдце мое́ грехми́, все́ напо́й.

Сла́ва Отцу́ и Сы́ну и Свято́му Ду́ху:

Ура́нихся стрела́ми вра́жиими, всего́ мя уздра́ви, му́дре, предста́тельством твои́м, молю́ся, и на пути́ мя Бо́жия упра́ви, при́сно в беззако́ниих заблужда́ема.

И ны́не и при́сно и во ве́ки веко́в. Ами́нь.

Богородичен: Егда́ предста́ла еси́ со возлю́бленным ученико́м у Креста́ Сы́на Твоего́, Всенепоро́чная, стена́ла еси́, пла́чущи, и диви́лася еси́ Того́, е́же к челове́ком, мно́гому сострада́нию.

Пе́снь 6.

Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Апостоле и евангелисте Иоанне, моли́ Бо́га о нас.

Бы́сть, я́ко тро́сть скоропи́сца, и́стинно богосло́вный язы́к тво́й, добропи́шущий разуме́ние и́стинное и зако́н, зело́ нове́йший, на скрижа́лех, Богосло́ве, серде́ц на́ших.

Припев: Апостоле и евангелисте Иоанне, моли́ Бо́га о нас.

Увяди́вый искоре́нно нече́стия о́трасли, я́ко возде́латель всеизря́днейший, в души́ же мое́й стра́х Бо́жий насади́, сла́вне, доброде́телей благопло́дие процвета́ющее.

Сла́ва Отцу́ и Сы́ну и Свято́му Ду́ху:

Сы́на Де́вы тя́, из Тоя́ Проше́дый преявле́нно именова́; с Не́юже моли́ся положе́нием все́м сыно́м Бо́жиим бы́ти, всеприснопа́мятне, творя́щим благоуго́дная Ему́.

И ны́не и при́сно и во ве́ки веко́в. Ами́нь.

Богородичен: В подо́бии пло́ти позна́ся челове́ком Бо́г из Тебе́, Всенепоро́чная, Его́же моли́ всегда́ пло́ти на́шея мудрова́ния, Всечи́стая, умертви́ти па́губная.

Конда́к, гла́с 2:

Вели́чия твоя́, де́вственниче, кто́ пове́сть? То́чиши бо чудеса́, и излива́еши исцеле́ния, и мо́лишися о душа́х на́ших, я́ко богосло́в и дру́г Христо́в.

Икос:

Высоты́ небе́сныя уве́дети и мо́ря глубины́ испыта́ти де́рзостно е́сть и непости́жно, я́коже бо зве́зды исчи́слити и примо́рский песо́к невозмо́жно отню́д, си́це ниже́ я́же богосло́вова рещи́ дово́льно: толи́цеми того́ венцы́ Христо́с, его́же возлюби́, венча́, Ему́же и на пе́рси возле́г и на Та́йней ве́чери с Ни́м яде́, я́ко богосло́в и дру́г Христо́в.

Пе́снь 7.

Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Апостоле и евангелисте Иоанне, моли́ Бо́га о нас.

Гро́м разшуме́вший во вся́ концы́ воспои́м, Богосло́ва, и́мже вся́к и́стинно слу́х огромле́н взя́тся от земли́ и велича́ется Христо́с, все́х Творе́ц.

Припев: Апостоле и евангелисте Иоанне, моли́ Бо́га о нас.

Обзо́рно до́му твоего́ благоле́пие вся́ку просвеща́ет мы́сль, в не́мже всегда́ собира́ющеся, боголе́пне пое́м вся́ческих Творца́ и благохва́лим тя́ ве́рно, су́ща предста́теля на́шего.

Сла́ва Отцу́ и Сы́ну и Свято́му Ду́ху:

Яко звезду́ тя́ светлосия́ющую ве́мы, светоно́сными сия́нии твои́ми просвеща́тися, учениче́, мо́лимся, Христо́в, избавля́ющиися от тмы́ страсте́й и напа́стей всера́зных хода́тайством твои́м.

И ны́не и при́сно и во ве́ки веко́в. Ами́нь.

Богородичен: Благослови́м Тя́, Всенепоро́чная, ро́ждшую благослове́ннаго Го́спода, благослове́ньми разо́ршаго Бо́жескими прокля́тое естество́ челове́ческое и обнови́вшаго ны́, обветша́вшия тле́ю.

Пе́снь 8.

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Апостоле и евангелисте Иоанне, моли́ Бо́га о нас.

Ри́торствующим язы́ком, блаже́нне, благооби́льствовал еси́, и уме́ршия зло́бою вся́ живоулови́л еси́, свяще́нную твою́ прие́мшия про́поведь. Те́мже тя́ честву́ем, я́ко таи́нника неизрече́нных.

Припев: Апостоле и евангелисте Иоанне, моли́ Бо́га о нас.

Яко ины́й ра́й боже́ственный, до́м тво́й показа́ся, чудесы́, я́коже цве́ты, все́х ду́ши веселя́, апо́столе, и страсте́й прогоня́я злово́ние.

Сла́ва Отцу́ и Сы́ну и Свято́му Ду́ху:

Бо́же, Бо́же мо́й, вонми́ ми и изба́ви мя́ от враго́в, на ки́йждо де́нь находя́щих мне́ и смире́нное сокруша́ющих се́рдце мое́, име́я моля́щагося Тебе́ боже́ственнаго ученика́ Твоего́.

И ны́не и при́сно и во ве́ки веко́в. Ами́нь.

Богородичен: Иису́са Спа́са, Его́же воплоти́ла еси́ от чи́стых крове́й Твои́х, Богора́дованная, испроси́ уще́дрити ны́, рабы́ Твоя́, и от ве́чныя му́ки изъя́ти.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Апостоле и евангелисте Иоанне, моли́ Бо́га о нас.

Часо́в и време́н Госпо́дь, сы́й Изба́витель, в преполове́нии дне́ на Кресте́ ви́сяше и тебе́ предаде́, я́коже де́вственнику, блаже́нне, Присноде́ву, сла́ву неотъе́млему дая́, е́же велича́ти тя́.

Припев: Апостоле и евангелисте Иоанне, моли́ Бо́га о нас.

Сы́й с го́рними боже́ственными си́лами и с ни́ми боже́ственное восклица́я песнопе́ние, я́же в дому́ твое́м свято́м пою́щия и песносло́вящия Преблага́го, спаса́й хода́тайствы твои́ми честны́ми, Христо́в апо́столе.

Сла́ва Отцу́ и Сы́ну и Свято́му Ду́ху:

Ве́рою прося́щия тя́ спаса́й ны́ от вся́кия беды́, Богосло́ве блаже́нне, ше́ствия на́ша я́же ко Го́споду ду́хом направля́я и путево́ждствуя ны́ на пу́ть ми́ра, за́поведей Вседержи́теля.

И ны́не и при́сно и во ве́ки веко́в. Ами́нь.

Богородичен: Гла́с прино́сим Ти́ благода́рствен, Бо́жии Ма́тери, све́тло и возопие́м: ра́дуйся, престо́ле Бо́жий превысоча́йший, ра́дуйся, Све́та о́блаче, ра́дуйся, раю́, Еюже ра́йския сла́дости сподо́бихомся.

Свети́лен.

Яко душе́ю де́вственна тя́ и те́лом, блаже́нне, Сло́во избра́, Богосло́ве де́вственниче, и Того́ Божества́ чу́дна показа́ писца́ и слугу́, и́же и от земли́ преста́вился еси́, не у́мер, но в Бо́зе жи́в и безсме́ртен пребыва́я.

Сла́ва.

Гро́мов сы́н бы́в, челове́ком богосло́вил еси́, е́же в нача́ле бе́ Сло́во, апо́столе Иоа́нне; возлеги́й бо на пе́рси ве́рно Влады́ки твоего́ и отту́ду поче́рп богосло́вия струи́, тва́рь всю́ напая́еши.

И ны́не, Богородичен:

При Кресте́ Сы́на Твоего́ и Бо́га стоя́щи Всечи́стая со ученико́м де́вственником, се́, глаго́лет, сы́н Тво́й, услы́ша Созда́вшаго; ученику́ же: се́, глаго́лет, Ма́ти твоя́. С ни́мже Тя́ вси́ пое́м, Богороди́тельнице Де́во.

Молитва первая апостолу и евангелисту Иоанну Богослову

О, вели́кий апо́столе, евангели́сте громогла́сный, Богосло́ве изя́щнейший, тайнови́дче неизрече́нных открове́ний, де́вственниче и возлю́бленный напе́рсниче Христо́в Иоа́нне! Приими́ нас, гре́шных, прибега́ющих под твое́ си́льное заступле́ние и покрови́тельство. Испроси́ у Всеще́драго Человеколю́бца Христа́ Бо́га на́шего, И́же пред очесы́ твои́ми кровь Свою́ за ны, непотре́бныя рабы́ Своя́, излия́л есть, да не помяне́т беззако́ний на́ших, но да поми́лует нас и сотвори́т с на́ми по ми́лости Свое́й: да да́рует нам здра́вие душе́вное и теле́сное, вся́кое благоде́нствие и изоби́лие, наставля́я нас обраща́ти о́ная во сла́ву Его́, Творца́, Спаси́теля и Бо́га на́шего, по кончи́не же вре́менныя жи́зни на́шея от немилосе́рдных истяза́телей на возду́шных мыта́рствах да изба́вит нас, и та́ко да дости́гнем, тобо́ю води́мии и покрыва́емии, Го́рняго о́наго Иерусали́ма, его́же сла́ву ты во открове́нии зрел еси́, ны́не же несконча́емыя ра́дости наслажда́ешися. О вели́кий Иоа́нне! Сохрани́ вся гра́ды и страны́ христиа́нския и всех, призыва́ющих и́мя твое́, от гла́да, губи́тельства, тру́са и пото́па, огня́ и меча́, наше́ствия иноплеме́нных и междоусо́бныя бра́ни; изба́ви нас от вся́кия беды́ и напа́сти и моли́твами твои́ми отврати́ от нас пра́ведный гнев Бо́жий, и испроси́ нам Его́ милосе́рдие. О вели́кий и непостижи́мый Бо́же! Се на умоле́ние Тебе́ предлага́ем свята́го Иоа́нна, его́же Ты сподо́бил еси́ неизрече́нных открове́ний, приими́ о нас хода́тайство, да́руй нам исполне́ние проше́ний на́ших во сла́ву Твою́, па́че же соверши́ нас духо́вным соверше́нством к наслажде́нию, жи́зни несконча́емыя в Небе́сных Твои́х оби́телях! О Небе́сный О́тче, созда́вый вся Влады́ко, Всеси́льный Царю́! Косни́ся благода́тию серде́ц на́ших, да, раста́явше, я́ко воск, пролию́тся пред Тобо́ю и бре́нная тварь духо́вна сотвори́тся в честь и сла́ву Твою́, и Сы́на Твоего́, и Свята́го Ду́ха. Ами́нь.

Молитва вторая апостолу и евангелисту Иоанну Богослову

О, вели́кий и всехва́льный апо́столе и евангели́сте Иоа́нне Богосло́ве, напе́рсниче Христо́в, те́плый наш засту́пниче и ско́рый в ско́рбех помо́щниче! Умоли́ Го́спода Бо́га дарова́ти нам оставле́ние всех прегреше́ний на́ших, ели́ка согреши́хом от ю́ности на́шея во всем житии́ на́шем де́лом, сло́вом, помышле́нием и все́ми на́шими чу́вствы; во исхо́де же душ на́ших помози́ нам, гре́шным (Имена), изба́витися от возду́шных мыта́рств и ве́чнаго муче́ния, да твои́м ми́лостивным предста́тельством прославля́ем Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.