Шрифт

8 октября.

Канон святителю Герману, архиепископу Казанскому и Свияжскому.

Святителю Герману, архиепископу Казанскому
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

От ю́ности и́го Христо́во усе́рдно восприи́м, бде́нными по́двиги поста́ и моли́твы просла́вился еси́. Отону́дуже призыва́ющу тя́ Бо́гу на служе́ние Це́ркви в новопросвеще́ннем ца́рстве Каза́нстем, вку́пе со святи́телем Гу́рием воззва́н бы́л еси́, иде́же я́ко первонача́льник созда́нной тобо́ю в гра́де Свия́жске оби́тели и досто́йный первосвяти́телю прее́мник яви́лся еси́. Почива́я у́бо нетле́нными моща́ми во оби́тели твое́й, а ду́хом предстоя́ престо́лу Влады́чню, моли́ся, святи́телю Ге́рмане, со святи́телем Гу́рием оби́тели твое́й во святы́ни, правосла́вней же па́стве во благоче́стии преспева́ти и тме́ инове́рия све́том ве́ры разгна́тися.

Ин тропа́рь, гла́с то́йже:

Яко вели́ким па́стырем единонра́вна и учи́телем вселе́нныя единомы́сленна, Це́ркве Бо́жия служи́теля усе́рдна и строи́теля та́ин Христо́вых благогове́йна, сте́кшеся, благове́рнии лю́дие, Свия́жския оби́тели богому́драго основа́теля и Каза́нския новопросвеще́нныя па́ствы святи́теля Ге́рмана пе́сньми и пе́нии восхва́лим, глаго́люще: не преста́й присеща́ти моли́твами твои́ми на оби́тель и на всю́ па́ству твою́, и оби́тель во святы́ни, па́ству же в ве́ре и благоче́стии блюди́ невреди́мо.

Стихи́ра, гла́с 6:

Челове́че Бо́жий, ве́рный ра́бе и слуго́ Госпо́день, сосу́де избра́нный, сто́лпе и утвержде́ние Це́ркве, Ца́рствия насле́дниче, не премолчи́, за ны́ вопия́ ко Го́споду.

Кано́ны святи́телю, 8 гла́са.

Пе́снь 1.

Ирмос: Мо́ре огусти́л еси́, погрузи́вый со ору́жием го́рдаго фарао́на, и лю́ди спа́сл еси́ немо́кренно, Го́споди, и вве́л еси́ я́ в го́ру святы́ни, вопию́щия: пои́м Тебе́, Бо́гу на́шему, пе́снь побе́дную, я́ко просла́вися.

Припев: Святителю отче Германе, моли́ Бо́га о нас.

Иису́се, прославля́ющий святы́х Твои́х, озари́ потемне́нную мы́сль и омраче́нное на́ше чу́вство, да возвести́м хвалы́ святи́телю Твоему́ и, восхваля́я его́, восхва́лим Тя́, ди́внаго во святы́х.

Припев: Святителю отче Германе, моли́ Бо́га о нас.

Боже́ственная благода́ть избра́ тя́, святи́телю, да пока́жеши си́лу ея́ в очище́нии прирожде́нной все́м сына́м Ада́млимь не́мощи естества́ и в благода́тней чистоте́ да послу́жиши ро́ду твоему́ во сла́ву Христа́ и спасе́ние ду́ш.

Припев: Святителю отче Германе, моли́ Бо́га о нас.

Простра́нный пу́ть мирска́го жития́ оста́вив, с отъя́тием власо́в земно́е пристра́стие отсе́кл еси́, и, к го́рнему у́м и се́рдце твое́ устреми́в, де́лы глаго́лал еси́: Госпо́дь — кре́пость и упова́ние мое́.

Припев: Святителю отче Германе, моли́ Бо́га о нас.

Еди́ному Бо́гу всего́ себе́ возложи́в, Тому́ во дни́ и в нощи́ рабо́тал еси́, служа́ посто́м, всено́щным в моли́тве стоя́нием и вся́ким ско́рбным самолише́нием, зовя́ в кре́пости ду́ха: Госпо́дь — утеше́ние мое́.

Сла́ва: Всеору́жием Креста́ низложи́в мы́сленных, вою́ющих на ду́шу враго́в, в благооти́шие безстра́стия дости́гл еси́ и, побе́дныя от вседе́тельныя руки́ восприя́в по́чести, спобо́рствуй и на́м изба́витися от плене́ния грехо́внаго и в приста́нище спасе́ния дости́гнути.

И ны́не, богоро́дичен: Ви́дящи не́мощь мою́ теле́сную, смуще́ние душе́вное и озлобле́ние серде́чное, посеще́ния сподо́би Боже́ственнаго, Всенепоро́чная Де́во, и спаси́ мя́ моли́твами Твои́ми.

Пе́снь 3.

Ирмос: Утверди́ся се́рдце мое́ во Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии Твое́м.

Припев: Святителю отче Германе, моли́ Бо́га о нас.

Нощны́ми моли́твами и глубо́ким утренева́нием по любви́ ко Го́споду умертви́л еси́ пло́ти мудрова́ние. И ны́не из до́льних в небе́сныя возше́д оби́тели, не преста́й моли́тися о на́с, среди́ мирски́я ле́сти бре́нныя жи́зни пу́ть преходя́щих.

Припев: Святителю отче Германе, моли́ Бо́га о нас.

Мы́слию благоразсу́дною и жела́нием очище́нным преподо́бных жи́тельству ревнова́л еси́, сего́ ра́ди с благоугоди́вшими, преподо́бне, Го́споду насле́довал еси́ нетле́ние и жи́знь несконча́емую.

Припев: Святителю отче Германе, моли́ Бо́га о нас.

В челове́ческом естестве́ невеще́ственных жи́тельству от всея́ души́ твоея́ тща́лся еси́ подража́ти, отоню́дуже с невеще́ственными ли́ки сподо́бился еси́ престо́лу Бо́жию предстоя́ти.

Припев: Святителю отче Германе, моли́ Бо́га о нас.

Дви́жимый ре́вностию ду́ха, вели́ки по́двиги на земли́ соверши́л еси́, свя́те: небла́зненно бо протека́я пу́ть спасе́ния, ты́, в тве́рдости душе́вней, а́ки адама́нт, вся́ земна́я нивочто́же вмени́в, еди́наго Христа́ приобрести́ тща́лся еси́.

Сла́ва: Низложи́л еси́ ополче́ния мы́сленных враго́в кре́пким твои́м воздержа́нием и непристу́пен яви́лся еси́ и́м чистото́ю ду́ха; моли́твами твои́ми отжени́ от на́с мра́чное злы́х духо́в нахожде́ние.

И ны́не, богоро́дичен: Очи́сти, Чи́стая, нечи́стую ду́шу мою́ от мно́жества прегреше́ний, во глубину́ поги́бели попо́лзшуюся, и в ча́с сме́ртный огради́ мя от оглаго́лания де́монов и осужде́ния изба́ви.

Конда́к, гла́с 4:

Бо́дрствуя в моли́твах, послуша́ния до́брый рачи́тель бы́в, в терпе́нии стяжа́л еси́ ду́шу твою́, де́лы смиренному́дрия и кро́тости изря́дствуя, престо́л святи́тельства благове́рием и благоче́стием украси́л еси́, о́тче священнонача́льниче Ге́рмане, моли́ Христа́ Бо́га о оби́тели и о все́м ста́де твое́м, я́ко па́ствы твоея́ утвержде́ние и су́щим по тебе́ святи́телем све́тлое украше́ние.

Седа́лен, гла́с 7:

Благознамени́т пу́ть восхожде́ния твоего́, блаже́нне: из глубо́каго бо смире́нной и́ноческой жи́зни послуша́ния моле́нием Ста́рицкой бра́тии воззва́н бы́л еси́ к нача́льствованию. Возврати́вся же на пре́жний поко́й по любви́ к душе́вному поко́ю, па́ки из о́наго предержа́щим гла́сом воззва́н бы́л еси́ в новопросвеще́нную Каза́нскую па́ству для устрое́ния вели́кой оби́тели, от оби́тельнаго же благоустрое́ния воззва́н еси́ на престо́л святи́тельскаго благоуправле́ния. Упра́ви, святи́телю, и на́м полага́ти восхожде́ние в се́рдце по степене́м исправле́ния жи́зни и де́л.

Сла́ва, гла́с 4:

Во́ждь бы́в, преподо́бне, взыску́ющим спасе́ния своего́ путе́м жи́зни и́ноческой в чистоте́, послуша́нии и нестяжа́тельности, те́м предше́ствовал еси́ де́йственным приме́ром твои́м в сле́д Началовождя́ спасе́ния, путе́м креста́ и самоотверже́ния.

И ны́не, богоро́дичен, гла́с то́йже:

Вели́ких дарова́ний, Де́во Богома́ти, Ты́ сподо́билася еси́, я́ко родила́ еси́ пло́тию Еди́наго от Тро́ицы, Христа́ Жизнода́вца, во спасе́ние ду́ш на́ших.

Пе́снь 4.

Ирмос: Проро́к Авваку́м у́мныма очи́ма прови́де, Го́споди, прише́ствие Твое́, те́м и вопия́ше: от ю́га прии́дет Бо́г. Сла́ва си́ле Твое́й, сла́ва снизхожде́нию Твоему́!

Припев: Святителю отче Германе, моли́ Бо́га о нас.

Не да́л еси́ сна́ очесе́м твои́м и ве́ждом дрема́ния, до́ндеже де́нь благода́ти озари́ твое́ се́рдце и боговмести́мым соде́ла селе́нием Тро́ицы, Ейже предстоя́, спаса́й гра́д и оби́тель твою́.

Припев: Святителю отче Германе, моли́ Бо́га о нас.

Зва́ния небе́снаго прича́стник бы́в, нача́ток соста́ва ве́ры соблю́л и си́лы гряду́щаго ве́ка возвести́л еси́ лю́дем. И ны́не восхваля́ющих ве́рою твоя́ по́двиги просвеща́й повеле́ньми Влады́ки вся́ческих и сотвори́ досто́йны бы́ти насле́дия небе́снаго.

Припев: Святителю отче Германе, моли́ Бо́га о нас.

Труда́ми неосла́бными, а́лчбою и жа́ждою и всено́щным в моли́тве стоя́нием удруча́л еси́ пло́ть твою́, святи́телю, и ны́не преми́рно упокоева́ешися.

Припев: Святителю отче Германе, моли́ Бо́га о нас.

Ми́рно протека́л еси́, о́тче, пу́ть жи́зни твое́й стезе́ю и́ноческою, явля́я в себе́ о́браз смире́ния и уничиже́ния. Те́мже Призира́ющий на смире́нныя вознесе́ тя́ и в жи́зни вре́менней, и по кончи́не твое́й.

Сла́ва, Иису́су: Чи́ни Ангельстии ужасо́шася ди́вному снизхожде́нию Твоему́, Сло́ве Бо́жий, зря́ще Тя́, Творца́ своего́, до ра́бия зра́ка снизше́дша. С ни́ми же и мы́, пе́рстнии, благода́рственно взыва́ем: сла́ва смотре́нию Твоему́, Человеколю́бче!

И ны́не, богоро́дичен: Простира́ю ру́це, и преклоня́ю коле́на се́рдца, и припа́даю к Тебе́, Пречи́стая: воздви́гни мя́ с одра́ ле́ности, я́ко да отря́сши грехо́вное разслабле́ние, воспою́ благода́ть Твою́.

Пе́снь 5

Ирмос: Го́споди Бо́же на́ш, ми́р да́ждь на́м, Го́споди Бо́же на́ш, стяжи́ ны, Го́споди, ра́зве Тебе́, ино́го не ве́мы, и́мя Твое́ имену́ем.

Припев: Святителю отче Германе, моли́ Бо́га о нас.

Оби́тель зи́ждяй в благооти́шное приста́нище взыску́ющих Бо́га, в отреше́нии от жите́йских попече́ний, ты́, блаже́нне, вку́пе и са́м себе́ денноно́щно созида́л духо́вным трезве́нием и боже́ственным раче́нием, во оби́тель Обетова́вшему приити́ со Отце́м Свои́м к лю́бящему и оби́тель в не́м сотвори́ти.

Припев: Святителю отче Германе, моли́ Бо́га о нас.

Созда́в хра́м в сла́ву и во успе́нии Свое́м на́с не Оставля́ющей, самаго́ себе́ чистото́ю тща́лся еси́ созида́ти в хра́м Ду́ху Свято́му, я́ко да и в веще́ственном и духо́вном хра́ме в ду́хе и и́стине соверша́ем благоприя́тное служе́ние Го́споду.

Припев: Святителю отче Германе, моли́ Бо́га о нас.

Огражда́я созида́емую тобо́ю оби́тель веще́ственным огражде́нием, огражда́л еси́ ю́ па́че бде́нными моли́твами, отража́я и собла́зны ви́димые и наве́ты духо́в неви́димых от духо́вных ча́д твои́х.

Припев: Святителю отче Германе, моли́ Бо́га о нас.

Науча́л еси́ преда́вшихся духо́вному води́тельству твоему́ и сло́вом Христо́вым, да ки́йждо взе́мши кре́ст сво́й, для благода́тнаго врачева́ния боле́зней и неду́гов естества́, в бо́дрости ду́ха ше́ствует в сле́д Подвигополо́жника, па́че же науча́л еси́ приме́ром христоподража́тельной жи́зни, явля́я всего́ до́браго и богоуго́днаго о́браз в само́м себе́.

Сла́ва, Иису́су: Овча́ е́смь Твоего́ ста́да, Спа́се, лежу́ пред врата́ми двора́ Твоего́, боле́зньми разсла́блен; я́ко Па́стырь До́брый, стру́пы моя́ обяжи́, гно́йныя ра́ны очи́сти и воздви́гни мя́ к пра́вому хожде́нию путе́м за́поведей предста́тельством святи́теля Твоего́.

И ны́не, богоро́дичен: На́м, лю́бящим тя́, святи́телю, и любо́вию почита́ющим, и в хра́ме Пречи́стыя, тобо́ю созда́нном, лику́ющим, испроси́ моли́твами Ея́ исправле́ние, и прегреше́ний проще́ние.

Пе́снь 6.

Ирмос: Яко во́ды морски́я, Человеколю́бче, волна́ми жите́йскими обурева́юся. Те́мже, я́ко Ио́на, та́ко вопию́ Ти: возведи́ от тли́ живо́т мо́й, Благоутро́бне Го́споди.

Припев: Святителю отче Германе, моли́ Бо́га о нас.

По святи́теле Гу́рии па́стыря тя́ и вождя́ Христо́с поста́ви Каза́нстей па́стве, его́же досто́йным прее́мником явля́я себе́ де́лы и словесы́, и жи́знь твою́ в такове́м же по́двизе ве́ры и преподо́бия сконча́л еси́. Вку́пе предстоя́ с ни́м престо́лу Святы́я Тро́ицы, моли́ непреста́нно о все́х на́с.

Припев: Святителю отче Германе, моли́ Бо́га о нас.

Якоже по чу́дном богови́дце Моисе́е ди́внаго дарова́ вождя́ лю́дем Свои́м Бо́г — Иису́са Нави́на, та́ко по первопресто́льнике Гу́рии новопросвеще́нному гра́ду Каза́ни яви́ тя́ Христо́с па́стыря ве́рна, и́же, церко́вная прие́м корми́ла и к трудо́м труды́ прилага́я, дея́нием и ра́зумом все́х ко Христу́ приводи́ти тща́лся еси́.

Припев: Святителю отче Германе, моли́ Бо́га о нас.

Ца́рским путе́м зако́на Христо́ва неукло́нно ше́ствовав, святи́телю, те́м же путе́м руководи́л еси́ ко спасе́нию не то́чию ча́д Правосла́вия, но и ага́рянский ро́д из мра́ка магомета́нства к све́ту Христо́ву приводи́л еси́, возводя́ из заблужде́ния в ве́ру спаси́тельную.

Припев: Святителю отче Германе, моли́ Бо́га о нас.

Яко свети́ло мы́сленное, просвеща́я луча́ми добро́т твои́х Каза́нскую па́ству и су́щия в не́й христоимени́тыя лю́ди в позна́нии Христа́, моли́, святи́телю, все́м во све́те Христо́вом узре́ти све́т спасе́ния.

Сла́ва, Иису́су: Ви́ждь души́ моея́, Спа́се, обурева́ние грехо́вное! Му́тныя пото́ки беззако́ний, наводни́в все́ существо́ мое́, внидо́ша да́же до потопле́ния ду́ха моего́, но я́ко повелева́яй ве́тром и мо́рю, к благооти́шному приста́нищу укроще́ния страсте́й мои́х моли́твами уго́дника Твоего́ упра́ви мя́.

И ны́не, богоро́дичен: Проро́цы Тя́ я́сно провозвести́ша, Отрокови́це, Ма́терь Бо́жию апо́столи в ми́ре пропове́даша, му́ченицы испове́даша, святи́телие просла́виша, и мы́ вси́ Богоро́дицу Тя́ вои́стинну велича́ем.

Конда́к, гла́с 4:

До́блестями преподо́бия и пра́вды вруче́нное тебе́ слове́сное ста́до озаря́я и на зла́чных сло́ва Христо́ва па́житях пита́я, на пра́вый пу́ть за́поведей Госпо́дних си́лою ду́ха твоего́ наставля́л еси́ е́. Те́мже и ны́не, осеня́емое цельбоно́сными чудотворе́нии твои́ми, в святу́ю па́мять твою́, зове́м тебе́: не преста́й, святи́телю, предста́тельствовати пред Пастыренача́льником о ста́де твое́м, я́ко па́ствы твоея́ утвержде́ние и су́щим по тебе́ святи́телем удобре́ние.

Икос:

Пе́ние, приноси́мое тебе́ благогове́йною мы́слию, благосе́рдно приими́ от на́с, святи́телю, си́це кра́сныя следы́ жи́зни твое́й, а́ще и недосто́йно, хвала́ми зна́менающих: ра́дуйся, пра́ведных роди́телей честно́е прозябе́ние, и Волокола́мския оби́тели в и́ноческих по́двигах воспита́ние, и в ме́ру му́жа возраще́ние; ра́дуйся, в Ста́рицкой оби́тели положи́вый восхожде́ние к священнонача́лию и в гра́де Свия́жске благоле́пныя оби́тели основа́телю; ра́дуйся, первосвяти́телю Каза́нския па́ствы, Гу́рию досто́йный прее́мниче; ра́дуйся, оби́тели твоея́ сла́во, гра́да Свия́жска огражде́ние, па́ствы твоея́ благоле́пие и су́щим по тебе́ святи́телем хвала́ и изря́дное удобре́ние.

Пе́снь 7.

Ирмос: Халде́йская пе́щь, огне́м распала́емая, ороша́шеся Ду́хом, Бо́жиим предстоя́нием, о́троцы поя́ху: благослове́н еси́, Бо́же оте́ц на́ших.

Припев: Святителю отче Германе, моли́ Бо́га о нас.

Возлия́ся вода́ искуше́ния до души́ твоея́, и бу́ря гне́ва и гоне́ния возшуме́ о́крест тебе́, святи́телю, егда́ благоду́шно ре́кл еси́ сло́во и́стины пред царе́м, оба́че пребы́л еси́ непоколеби́м, апо́стольским сло́вом утвержда́я себе́: я́ко Бо́гу подоба́ет повинова́тися па́че, не́жели челове́ком в и́стине.

Припев: Святителю отче Германе, моли́ Бо́га о нас.

Небоя́зненно уста́ твоя́ отве́рзл еси́ в защи́ту непови́нности и правоты́ святи́теля Фили́ппа; а́ще же и не возмо́гл еси́ загради́ти бездве́рная уста́ зло́бы, оба́че, яви́в кре́пость в безтре́петном оправда́нии му́жа пра́веднаго, оста́вил еси́ веко́м приме́р свято́й ре́вности, с каково́ю глаго́лал еси́ и́стину пред царе́м Гро́зным.

Припев: Святителю отче Германе, моли́ Бо́га о нас.

Прича́стник бы́в, блаже́нне, скорбе́й мяте́жной жи́зни, я́ко са́м искуси́выйся, и на́с, искуша́емых, изба́ви ско́рбнаго обстоя́ния моли́твами твои́ми.

Припев: Святителю отче Германе, моли́ Бо́га о нас.

Тве́рд в пра́вде и и́стине бы́л еси́, святи́телю, не убоя́вся гне́ва царе́ва, неустраши́мо веща́л еси́ сло́во во оправда́ние святи́теля Фили́ппа. С ни́м предстоя́ Подвигополо́жнику в чи́не свиде́телей и́стины, моли́ся, да не отпаде́м в ско́рби от и́стины.

Сла́ва, Тро́ице: Непостижи́мая Прему́дросте, неизсле́димая бла́госте, вседержа́вное могу́щество и вседе́тельное смотре́ние, Самосу́щная Светонача́льная Тро́ице, рабо́в Твои́х пе́ние приими́, вопию́щих: благослове́н еси́, Бо́же оте́ц на́ших.

И ны́не, богоро́дичен: Ско́рый Тво́й покро́в, и по́мощь, и ми́лость покажи́ на рабе́х Твои́х, и во́лны, Чи́стая, укроти́ су́етных помышле́ний, и па́дших на́с воздви́гни, Богоро́дице: ве́мы бо, ве́мы, Де́во, я́ко мо́жеши, ели́ка хо́щеши.

Пе́снь 8.

Ирмос: Ангели и небеса́, на Престо́ле сла́вы седя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во ве́ки.

Припев: Святителю отче Германе, моли́ Бо́га о нас.

Оправда́ния ри́зу соблю́д све́тлу, во све́тлости святы́я вше́л еси́ и венце́м нетле́ния венча́лся еси́; неле́пый зра́к прегреше́ний богоуго́дным хода́тайством твои́м совлецы́ с ве́тхаго на́шего челове́ка и чи́стыми покая́ния оде́ждами облеки́ но́ваго, я́ко облече́нный нетле́нною сла́вою но́ваго челове́ка и сия́ющий на небесе́х преподо́бнем и пра́вдою.

Припев: Святителю отче Германе, моли́ Бо́га о нас.

Свы́ше небе́сным предста́тельством до́лу цельбо́носным благоуха́нием моще́й твои́х озаря́я к о́ным притека́ющих, низпосли́, святи́телю, по коего́ждо потре́бе благо́е и поле́зное.

Припев: Святителю отче Германе, моли́ Бо́га о нас.

Украси́в жи́знь твою́ непоро́чностию и святи́тельский престо́л до́блестями па́стырства о Христе́, предстоя́ престо́лу Архиере́я, проше́дшаго небеса́, моли́ся о исполне́нии проше́ний предстоя́щих о́крест ра́ки твоея́.

Припев: Святителю отче Германе, моли́ Бо́га о нас.

Ве́дуще тя́, святи́телю, пода́теля исцеле́ний, к тебе́ возно́сим моли́твенный гла́с: уврачу́й многоле́тныя стра́сти ду́ш на́ших и от стре́л вра́жиих неврежде́нных сохрани́ под кро́в тво́й прибега́ющих, утвержда́я на ка́мени Боже́ственных за́поведей.

Сла́ва, Иису́су: Исто́чниче бла́гости и прему́дрости сокро́вище, Иису́се, яви́л еси́ от земны́х не́др нетле́нныя мо́щи Твоего́ уго́дника, моли́твами его́ исцели́ душе́вныя на́ши не́мощи по вели́цей Твое́й ми́лости.

И ны́не, богоро́дичен: Нетле́нная Де́во и Ма́ти, на́с, тле́ющих в по́хотех преле́стных, от ле́сти тли́теля ра́зумов и серде́ц сохрани́ и стезе́ю новотворя́щаго покая́ния к нетле́нию душе́вному упра́ви.

Песнь 9

Ирмос: Чу́жде ма́терем де́вство, и стра́нно де́вам деторожде́ние, на Тебе́, Богоро́дице, обоя́ устро́ишася. Те́м Тя́, вся́ племена́ земна́я, непреста́нно велича́ем.

Припев: Святителю отче Германе, моли́ Бо́га о нас.

Пра́ведно и благоче́стно пожи́в на земли́, в го́рних ны́не живе́ши оби́телех и, созерца́я Сла́ву Бо́жию, моли́ся о на́с, прегреше́ниями лише́нных Сла́вы Бо́жией.

Припев: Святителю отче Германе, моли́ Бо́га о нас.

В земно́й жи́зни сохрани́в душе́вную и теле́сную чистоту́, облече́нный благода́тию в све́тлость ея́, предстои́ши ны́не со Ангелы Пресвяте́й Тро́ице: Ейже не преста́й вопи́ти о проще́нии и очище́нии свы́ше грехо́в на́ших и измове́нии о́ных и́стинным на́шим покая́нием.

Припев: Святителю отче Германе, моли́ Бо́га о нас.

Пра́востию де́л, я́ко оде́ждою многоце́нною, оде́явся, живо́ю ве́рою и любо́вию, я́ко пресве́тлым венце́м, венча́лся еси́, святи́телю. Те́мже, в благоле́пии чистоты́ предстоя́ Спа́су все́х, моли́ся, да не яви́мся на суде́ Его́ бездерзнове́нны, на́ги и покры́ты студо́м осужде́ния.

Припев: Святителю отче Германе, моли́ Бо́га о нас.

Па́ству и оби́тель твою́ огражда́й твои́ми моли́твами, я́ко тве́рдыми забра́лы, от вра́жеских наве́тов и обстоя́ний, взыва́я Христу́: я́же да́л ми́ еси́, сохрани́, да превозно́сят Тя́ во вся́ ве́ки.

Сла́ва, Тро́ице: Отче Небе́сный — Трисия́ннаго Божества́ исто́чное нача́ло, Сы́не Бо́жий — Ипоста́сное зижди́тельное Сло́во Отчее, Ду́ше Святы́й — из Существа́ Того́жде Безнача́льнаго Све́та Отца́ ве́чно исходя́щий и все́ освяща́ющий; Тро́ице Свята́я, поми́луй, спаси́ и соблюди́ на́с, на Тя́ всю́ наде́жду жи́зни и спасе́ния возлага́ющих.

И ны́не, богоро́дичен: Умири́, Христе́, тезоимени́тое Твое́ жи́тельство мольба́ми Пречи́стыя Ма́тере Твоея́, низлага́я сопроти́вных си́лу, храни́ непоколеби́мо Це́рковь и Правосла́вие, да, утвержда́яся уста́ми и се́рдцем во благоче́стии, прославля́ем Тя́ со Отце́м и Пресвяты́м Ду́хом Твои́м во ве́ки.

Свети́лен, гла́с 4:

Во святи́телех благоче́стно пожи́в, лю́ди к богоразу́мию наста́вил еси́ и, до́бре Бо́гу угоди́в, от Него́ нетле́нием и чудесы́ просла́влен еси́. Сего́ ра́ди, святи́телю, мо́лим тя́: не забу́ди гра́д се́й, его́же возлюби́л еси́, и оби́тель твою́, в не́йже те́ло твое́ предложи́л еси́, и моли́ Просла́вившаго тя́ непреста́нно о все́х на́с.

Сла́ва, И ны́не, богоро́дичен:

Влады́чице небесе́ и земли́, иму́щая дерзнове́ние моли́тися о все́м ми́ре и о все́х, притека́ющих под благооти́шный кро́в Тво́й, моли́ со святи́телем Ге́рманом неизглаго́ланно Вопло́щшагося от Тебе́ милосе́рдия ра́ди, да прии́мет в сла́ву и́мени Своего́ ску́дную пе́снь на́шу и низпо́слет на́м благода́ть досто́йно пе́ти и моли́тися Ему́, Ди́вному во святы́х.

Молитва святителю Герману, архиепископу Казанскому

О, святи́телю Христо́в Ге́рмане, богому́дрый оби́тели сея́ основа́телю, духо́вный и́ночествующих вождю́, приме́ром Христоподража́тельной жи́зни твоея́ всех ве́рных и в жи́зни и по кончи́не твое́й наставля́ющий! К тебе́ прибега́ем и тебе́ усе́рдно мо́лим: соде́лай святы́ми твои́ми моли́твами, да и мы благода́тию Бо́жиею сози́ждемся во оби́тель Ду́ха Свята́го, после́дованием жи́зни твое́й вообража́емся во о́браз Христо́в, во о́браз преподо́бия и пра́вды, и осеня́емы си́лою благоприя́тных моли́тв твои́х, прино́сим плоды́ благи́х дел, благоугожда́юще Го́споду, да тщи́мся ходи́ти во све́те лица́ Его́, па́че всего́ люби́ти Его́ и исполня́ти святу́ю во́лю Его́, служи́ти во бла́го бли́жних на́ших и всеме́рно соде́ловати спасе́ние свое́, на пути́ многопреме́нчивой жи́зни, терпе́нием вся́кой тесноты́, скорбе́й, лише́ний. А да́бы возмо́щи нам понести́ благо́е и́го Христо́во, моли́, свя́тче Бо́жий, о укрепле́нии не́мощи на́шей по́мощию свы́ше, да изба́вит нас Госпо́дь от враг ви́димых и неви́димых, от о́гненнаго и во́днаго потребле́ния, от неблагорастворе́ния возду́ха и тлетво́рных ветр, а па́че от душепа́губнаго пла́мене, потопле́ния и обурева́ния страсте́й наших, да, под кро́вом бла́гости и милосе́рдия Бо́жия, ти́хое и безмо́лвное житие́ поживе́м, жду́ще блаже́наго явле́ния Го́спода и Спа́са на́шего Иису́са Христа́, Ему́же со Отце́м и Святы́м Его́ Ду́хом честь и сла́ва во ве́ки веко́в. Ами́нь.

Молитва вторая святителю Герману, архиепископу Казанскому

О, святи́телю Ге́рмане, вели́кий уго́дниче Христо́в, оби́тели сей богому́дрый основа́телю, мона́шествующих наста́вниче и гра́да сего́ недре́млемый блюсти́телю, свято́ю душе́ю твое́ю на Небеси́ Престо́лу Святы́я Тро́ицы предстоя́й, нетле́нным же те́лом зде во оби́тели твое́й почива́яй и многоразли́чная чудеса́ моли́твами соверша́яй! При́зри на ны и на вся лю́ди, к цельбоно́сному твоему́ гро́бу притека́ющия и твоего́ ко Го́споду хода́тайства во обдержа́щих ну́ждех прося́щия. Поне́же мы, по мно́жеству грехо́в на́ших, не то́чию недосто́йни принести́ со дерзнове́нием моле́бный глас, но ниже́ возвести́ оче́с на́ших на Не́бо; ты же, я́ко стяжа́вый дерзнове́ние, принеси́ за всех, к честне́й ра́це твое́й приходя́щих, те́плыя моли́твы ко Го́споду, е́же изба́витися нам от гла́да, пото́па, тру́са, огня́, ме́ча, бра́ни, от люде́й и диа́вола быва́ющия, и от вся́кия душе́вныя и теле́сныя боле́зни; да изба́вльшеся сих и рабо́тающе Го́споду, Ему́же предстои́ши, вни́дем в несконча́емый поко́й и вку́пе с тобо́ю просла́вим всех благи́х пода́теля Бо́га, всегда́, ны́не и при́сно и во ве́ки веко́в. Ами́нь.

Молитва третья святителю Герману, архиепископу Казанскому

О, вели́кий уго́дниче Христо́в, Ге́рмане, те́плый о нас ко Го́споду моли́твенниче, всем притека́ющим к тебе́ во ско́рбех предста́телю, испроси́ нам по́мощь в не́мощех, утеше́ние в ско́рбех, здра́вие в неду́зех душе́вных и теле́сных; умоли́ Го́спода дарова́ти нам оставле́ние во всех, ели́ка согреши́хом от ю́ности на́шей в житии́ сем де́лом, сло́вом, помышле́нием и все́ми на́шими чу́вствы, и при кончи́не на́шей испроси́ нам вре́мя покая́ния, да, предвари́вше и́скренним испове́данием грехо́в и очище́нием со́вести исхо́д душ на́ших, безбе́дно пре́йдем возду́шныя мыта́рства и изба́вимся осужде́ния и му́ки, ми́лостию Безнача́льнаго Отца́, благода́тию собезнача́льнаго Сы́на и освяще́нием присносу́щаго Ду́ха. Ами́нь.

Молитва четвертая святителю Герману, архиепископу Казанскому

О, вели́кий уго́дниче Христо́в, Ге́рмане! Испроси́ нам, раба́м Бо́жиим (Имена), у Го́спода по́мощь в не́мощех, утеше́ние в ско́рбех, здра́вие в неду́зех душе́вных и теле́сных: умоли́ Его́ дарова́ти нам оставле́ние всех, ели́ка согреши́хом от ю́ности на́шея в житии́ сем и при кончи́не на́шей испроси́ нам вре́мя покая́ния, да и́скренним испове́данием грехо́в сию́ предвари́вше, безбе́дно пре́йдем возду́шныя мыта́рства, и изба́вимся от осужде́ния и му́ки, ми́лостию Безнача́льного Отца́, благода́тию Собезнача́льного Сы́на и освяще́нием Присносу́щнаго Ду́ха, во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Святителю Герману, архиепископу Казанскому