8 октября.

Канон Преподобной Евфросинии Александрийской.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

В тебе́, ма́ти, изве́стно спасе́ся, е́же по о́бразу: прии́мши бо кре́ст, после́довала еси́ Христу́, и, де́ющи, учи́ла еси́ презира́ти у́бо пло́ть, прехо́дит бо, прилежа́ти же о души́, ве́щи безсме́ртней. Те́мже и со Ангелы сра́дуется, преподо́бная Евфроси́ние, ду́х тво́й.

Кано́н. Гла́с 5.

Пе́снь 1.

Ирмос: Коня́ и вса́дника в мо́ре Чермно́е сокруша́яй бра́ни, мы́шцею высо́кою, Христо́с истрясе́, Изра́иля же спасе́, побе́дную пе́снь пою́ща.

Припев: Преподобная мати Евфросиние, моли́ Бо́га о нас.

Пе́сньми богокра́сными пою́щаго дне́сь святу́ю твою́ па́мять и и́стинно достохва́льную, све́том мя́ озари́ моли́тв твои́х, всечестна́я, весе́лия боже́ственнаго тезоимени́тая.

Припев: Преподобная мати Евфросиние, моли́ Бо́га о нас.

Еди́ну Боже́ственную добро́ту Христо́ву возлюби́вши и Того́ распа́льшися невеще́ственными красота́ми, добро́тою теле́сною возгнуша́лася еси́, сла́вная, виде́нии Боже́ственными упражня́ющися.

Сла́ва Отцу́ и Сы́ну и Свято́му Ду́ху:

Неве́ста, укра́шеная доброде́телей красота́ми, обручи́лася еси́ и́стинно кра́сному добро́тою Христу́, оста́вивши привре́меннаго, Евфроси́ние, обру́чника и жития́ всю́ красоту́.

И ны́не и при́сно и во ве́ки веко́в. Ами́нь.

Богородичен: Все́ Пожела́ние, и Сла́дость, и Жи́знь из Тебе́ Возсия́вый премно́жеством бла́гости, Де́во Всенепоро́чная, Его́же моли́ спасти́ непреста́нно Тя́ блажа́щия.

Пе́снь 3.

Ирмос: Водрузи́вый на ничесо́мже зе́млю повеле́нием Твои́м, и пове́сивши неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

Припев: Преподобная мати Евфросиние, моли́ Бо́га о нас.

Вели́кия претерпе́вши по́двиги, вра́жия низложи́ла еси́ ухищре́ния, победи́ла еси́ де́монския прило́ги, Ангелом уподо́билася еси́, безсме́ртию поучи́вшися, ма́ти, в ме́ртвеннем твое́м телеси́.

Припев: Преподобная мати Евфросиние, моли́ Бо́га о нас.

Весели́т мона́шествующих сердца́, житие́ твое́, утвержде́ние су́ще и наказа́ние ко спаси́тельным за́поведем и к стезя́м нетле́ния, к любви́ кра́йнейшему преде́лу, Евфроси́ние, Созда́вшаго.

Сла́ва Отцу́ и Сы́ну и Свято́му Ду́ху:

Просвеща́ет ве́рных боже́ственная собра́ния све́тлая твоя́ па́мять и достосла́вная, услажда́ет преподо́бных ли́ки, Ангелы весели́т, с ни́миже водворя́ешися, я́ко равноа́нгельному житию́, Евфроси́ние, ревнова́вши.

И ны́не и при́сно и во ве́ки веко́в. Ами́нь.

Богородичен: Страсте́й мя́ лю́тое обурева́ет волне́ние, лука́вых духо́в глубина́ одержи́т мя́, грехо́вный ви́хор коле́блет мое́ се́рдце: Богороди́тельнице, Ты́ мя́ утверди́, чи́сте Тя́ восхваля́юща.

Седа́лен, гла́с 5.

Же́нскую сла́бость укрепи́вши небе́сными наде́ждами, посреде́ всели́лася еси́, несомне́нною мы́слию, муже́й, богодохнове́нная, Евина льсти́теля покори́вши твои́м гове́нием, о Евфроси́ние, во бде́ниих и поуче́ниих, те́м ве́рою тя́ блажи́м.

Сла́ва, и ны́не, Богородичен:

Тя́ приста́нище, и сте́ну, и прибе́жище, и наде́жду, и покро́в, и предста́тельницу те́плу обре́тше, ве́рнии, к Тебе́ прибега́ем и вопие́м приле́жно, и взыва́ем ве́рно: поми́луй, Богоро́дице, на Тя́ упова́ющия и от прегреше́ний изба́ви.

КрестоБогородичен:

На Кресте́ Тя зря́щи, Христе́, Ма́ти Твоя́, во́льно среди́ разбо́йников пове́шена, терза́ющи Ма́терски утро́бу, глаго́лаше: безгре́шне Сы́не, ка́ко непра́ведно, я́ко злоде́й, на Кресте́ пове́сился еси́, ро́д челове́чь оживи́ти хотя́, я́ко Преблаги́й?

Пе́снь 4.

Ирмос: Боже́ственное Твое́ разуме́в истоща́ние прозорли́во, Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

Припев: Преподобная мати Евфросиние, моли́ Бо́га о нас.

Отцу́ тя́ Небе́сному вне́млющую, ду́ш Невестово́дцу, о́тча любо́вь не возбрани́, ниже́ привре́меннаго жениха́, ше́ствовати пу́ть спаси́тельный.

Припев: Преподобная мати Евфросиние, моли́ Бо́га о нас.

Яко фи́никс, богому́дренно процвела́ еси́ пра́вды сла́дость и, я́ко ке́др, при вода́х воздержа́ния, богому́драя, плоды́ доброде́тельныя умно́жила еси́.

Припев: Преподобная мати Евфросиние, моли́ Бо́га о нас.

Огне́м воздержа́ния испепели́ла еси́ хвра́стныя сла́сти и, разгоре́вшися у́глем Госпо́дни любве́, чуде́с лучи́ возсия́ла еси́.

Сла́ва Отцу́ и Сы́ну и Свято́му Ду́ху:

Растерза́н ви́дится и лежа́щь пред кра́сными твои́ми нога́ми пре́жде Евин ра́тник, из Де́вы Ро́ждшагося си́лою, Евфроси́ние, и благода́тию.

И ны́не и при́сно и во ве́ки веко́в. Ами́нь.

Богородичен: Уще́дри, Ще́драя су́щи, преокая́нную мою́ ду́шу, Богороди́тельнице Всенепоро́чная, от страсте́й греха́ лю́те омрачи́вшуюся и стеню́щу.

Пе́снь 5

Ирмос: Одея́йся све́том, я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Припев: Преподобная мати Евфросиние, моли́ Бо́га о нас.

Заре́ю боже́ственных дея́ний, я́ко ка́мень смара́гд, чи́стая, ви́дена была́ еси́ посреде́ муже́й, му́жеская боре́ния показу́ющи и веселя́щи Го́спода.

Припев: Преподобная мати Евфросиние, моли́ Бо́га о нас.

Точа́щи сле́зы, я́ко арома́ты, облагово́нилася еси́, возвели́чилася еси́, я́ко миро многоце́нное, и Бо́гу принесла́ся еси́ де́ва нерастле́нна.

Сла́ва Отцу́ и Сы́ну и Свято́му Ду́ху:

Все́ твое́ жела́ние Бо́гу принесла́ еси́, Того́ жела́ющи, Того́ и́щущи, Того́ после́дствующи законоположе́нию, де́во, спаси́тельному.

И ны́не и при́сно и во ве́ки веко́в. Ами́нь.

Богородичен: Мла́да родила́ еси́, я́ко Младе́нца, Чи́стая, пре́жде ве́к из Отца́ Безнача́льна безле́тно Возсия́вшаго, Его́же о ми́ре моли́, Богоневе́сто.

Пе́снь 6.

Ирмос: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли́ возведи́ мя, я́ко Благоутро́бен.

Припев: Преподобная мати Евфросиние, моли́ Бо́га о нас.

Яко чиста́ и непоро́чна, я́ко красна́, я́ко предобра́, Жениху́ Сло́ву ты́ уневе́стилася еси́, во ве́ки соблюда́ющему тя́ нетле́нну.

Припев: Преподобная мати Евфросиние, моли́ Бо́га о нас.

Стена́ньми и слеза́ми взыску́ющи Соде́теля, Онаго виде́ния сподо́билася еси́, я́ко избра́нная со избра́нными, досточу́дная.

Сла́ва Отцу́ и Сы́ну и Свято́му Ду́ху:

Воздержа́ния о́браз, целому́дрия одушевле́нное подо́бие ве́рным яви́лася еси́, благохва́лящим твою́ свяще́нную, о Евфроси́ние, па́мять.

И ны́не и при́сно и во ве́ки веко́в. Ами́нь.

Богородичен: Па́че ума́, Безле́тнаго, па́че сло́ва, Созда́теля, Всечи́стая, родила́ еси́, избавля́ющаго вся́кия тли́ Богоро́дицу пою́щия Тя́.

Конда́к, гла́с 2.

Вы́шнюю жи́знь возжеле́вши получи́ти, до́льнюю сла́дость тща́тельно оста́вила еси́ и саму́ю себе́ смеси́ла еси́ посреде́ муже́й, красне́йшая, Христа́ бо ра́ди, Жениха́ твоего́, о обру́чнице привре́менном небрегла́ еси́.

Икос:

В весе́лии и ра́дости души́ возвесели́вше, воста́нем тща́тельно услы́шати сло́во пресла́вное: прехо́дит бо у́м вся́к пове́дание сие́ и удивля́ет, я́ко жена́, посреде́ муже́й пребыва́ющи, победи́ велиа́ра, и о́гнь попра́ сласте́й, и не опали́ся отню́д: Христа́ бо вожделе́вши, нескве́рная, обру́чника привре́меннаго небрегла́ е́сть.

Пе́снь 7.

Ирмос: Превозноси́мый отце́в Госпо́дь, пла́мень угаси́, о́троки ороси́, согла́сно пою́щия: Бо́же, благослове́н еси́.

Припев: Преподобная мати Евфросиние, моли́ Бо́га о нас.

Све́т тебе́ возсия́, Того́ сопру́зе, Евфроси́ние сла́вная, пра́вый бо име́ла еси́ ра́зум, песнопою́щи: Бо́же, благослове́н еси́.

Припев: Преподобная мати Евфросиние, моли́ Бо́га о нас.

Же́зл, укрепля́ющь тя́, Кре́ст иму́щи, де́монская зия́ния прешла́ еси́ невре́дна, преподо́бная, песнопою́щи: Бо́же, благослове́н еси́.

Сла́ва Отцу́ и Сы́ну и Свято́му Ду́ху:

До́м се́рдце твое́ Свята́го Ду́ха, преподо́бная, соверши́ла еси́, тя́ укре́пльшаго и показа́вшаго духо́в лука́вых си́льнейшу.

И ны́не и при́сно и во ве́ки веко́в. Ами́нь.

Богородичен: Те́лом обложе́ннаго Бо́га Безтеле́снаго, Всенепоро́чная, родила́ еси́, на́с избавля́ющаго, стра́хом песнопою́щия: Бо́же, благослове́н еси́.

Пе́снь 8.

Ирмос: Тебе́, Вседе́телю, в пещи́ о́троцы, всеми́рный ли́к спле́тше, поя́ху: дела́ вся́кая, Го́спода по́йте и превозноси́те во вся́ ве́ки.

Припев: Преподобная мати Евфросиние, моли́ Бо́га о нас.

Ти́ну страсте́й оттрясла́ еси́, отрокови́це, Ангелов невеще́ственному житию́ поревнова́вши, с ни́миже и воспева́еши: Го́спода по́йте и превозноси́те во вся́ ве́ки.

Припев: Преподобная мати Евфросиние, моли́ Бо́га о нас.

Дае́т тебе́ жи́знь жи́зни Храни́тель, Того́ бо стопа́м после́довала еси́, Того́ добро́ты вожделе́вши Боже́ственныя, с Ни́мже и весели́шися во вся́ ве́ки.

Сла́ва Отцу́ и Сы́ну и Свято́му Ду́ху:

Вознесла́ся еси́ ко оби́телем присножи́тельным и́стинно, жела́ние получи́вши, его́же возлюби́ла еси́, Дре́ва, де́во, жи́зни наслажда́ющися и превознося́щи Христа́ во ве́ки.

И ны́не и при́сно и во ве́ки веко́в. Ами́нь.

Богородичен: Вся́ избра́нна, укра́шена вся́, Бо́г Юже возлюби́, Юже избра́, яви́лася еси́, Де́во Препросла́вленная, при́сно: те́м Тя́ пое́м всегда́, я́ко Богоро́дицу.

Песнь 9

Ирмос: Иса́ие, лику́й, Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́, Его́же велича́юще, Де́ву ублажа́ем.

Припев: Преподобная мати Евфросиние, моли́ Бо́га о нас.

Свяще́нное торжество́ мона́шествующих собо́р хва́лит, па́мять твою́ соверша́я богосве́тлую, ли́к ра́дуется мона́хинь, яви́ся бо чи́стая все́х све́тлость, Евфроси́ние досточу́дная.

Припев: Преподобная мати Евфросиние, моли́ Бо́га о нас.

Яко че́стно возложе́ние небе́снаго была́ еси́ хра́ма, я́ко кри́н, во дво́рех процвела́ еси́ Бо́жиих, я́ко шипо́к сладково́нный, принесла́ся еси́ Всецарю́, я́ко честно́е мѵ́ро, Евфроси́ние всеблаже́нная.

Припев: Преподобная мати Евфросиние, моли́ Бо́га о нас.

Тебе́ саму́ю просвети́ла еси́ доброде́телей твои́х украше́нием све́тлым, и привела́ся еси́ к мы́сленному черто́гу, чи́стая, и ны́не недомы́сленную смотря́еши добро́ту Христо́ву, и обоже́ние прие́млеши соверше́ннейшее.

Сла́ва Отцу́ и Сы́ну и Свято́му Ду́ху:

Свята́я твоя́ па́мять освяща́ет дне́сь ве́рныя, точа́щи просвеще́ние и святы́ню, в не́йже тя́ мо́лим, я́ко избра́нную неве́сту Христо́ву: спаси́ моли́твами твои́ми, Евфроси́ние, на́с всегда́.

И ны́не и при́сно и во ве́ки веко́в. Ами́нь.

Богородичен: Све́том лица́ Твоего́ во тме́ лежа́щаго страсте́й озари́, Све́та две́ре мы́сленная, да не но́щь пости́гнет мя́ сме́ртная, Влады́чице Чи́стая, спасе́ния моего́ неча́яние отсека́ющи.

Свети́лен.

Кня́зя утаи́вшися студа́, и сего́ в любому́дром о́бразе показа́ла еси́ безу́мна, де́ва су́щи душе́ю и те́лом, была́ еси́ му́ж ра́зумом и ве́рою, Евфроси́ние преподо́бная, де́вственников добро́та и мона́хинь красота́.

Сла́ва, и ны́не, Богородичен:

Де́нь мне́ возсия́й у́мнаго весе́лия, Ты́ бо еси́, Чи́стая, све́т и жи́знь су́щим во тме́: хоте́нию бо мощна́ еси́ и е́же твори́ти и́маши, я́ко су́щи все́х Влады́чица, изба́ви вся́ от бе́д, и скорбе́й, и собла́зн чужда́го.

Молитва преподобной Евфросинии Александрийской

О, свята́я преподо́бная ма́ти на́ша Евфроси́ние! Ны́не све́тло па́мять твою́ пра́зднующе, умиле́нными сердца́ми восклица́ем ти́: ты́ послу́шалася еси́ блага́го Учи́теля Го́спода на́шего Иису́са Христа́, глаго́лющаго в Ева́нгелии: И́же лю́бит отца́ или́ ма́терь па́че Мене́, не́сть Мене́ досто́ин, и и́же не отрече́тся всего́ своего́ име́ния, не мо́жет бы́ти Мо́й учени́к, и все́м житие́м свои́м после́довала еси́ Ему́. Испроси́ на́м, ма́ти на́ша Евфроси́ние, си́лы и де́йства Свята́го Ду́ха, во е́же искорени́ти вся́кий гре́х в на́с живу́щий и сотвори́ти ду́ши на́ша в хра́мы Бо́жии; воспламени́ сердца́ на́ша любо́вию ко Го́споду да испо́лним уста́ на́ша ко славосло́вию Его́ и соверши́м хожде́ние на́ше пред лице́м Бо́жиим во вся́ком благоче́стии и чистоте́, да небе́сным предста́тельством твои́м спаса́еми у́зрим сла́ву Бо́жию, сла́вяще Отца́ и Сы́на и Свята́го Ду́ха во ве́ки веко́в. Ами́нь.