7 октября.

Канон преподобномученику Галактиону Вологодскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 5:

Днесь град Во́логда тобо́ю всеми́рне хва́лится,/ возсия́л бо еси́ пресве́тло, я́ко со́лнце,/ и чудесы́ твои́ми град и ве́си, преподо́бне Галактио́не, озари́л еси́./ И ны́не моли́ся Го́сподеви/ изба́витися душа́м на́шим от пре́лести вра́жия/ и спасти́ся гра́ду на́шему от пога́нскаго и всех проти́вных наи́тия,/ и испроси́ у Христа́ Бо́га любо́вию чту́щим тя/ прегреше́ний проще́ния/ и прося́щим твоея́ по́мощи от вся́кия ско́рби избавле́ния/ и вопию́щим к тебе́:// Бог наш с на́ми, просла́вивый уго́дника Своего́, я́коже благоволи́.

Тропа́рь, гла́с 4:

Днесь град Во́логда тобо́ю хва́лится, преподо́бне,/ возсия́л бо еси́ пресве́тло, я́ко со́лнце,/ гра́ды и ве́си чудесы́ твои́ми озаря́я./ И ны́не, преподобному́чениче Галактио́не, Го́сподеви моли́ся/ стране́ на́шей от нахожде́ния сопроти́вных изба́витися,/ и у Христа́ Бо́га прегреше́ний на́ших оставле́ние испроси́,/ и от вся́кия ско́рби избавле́ние пода́ждь/ любо́вию чту́щим тя и вопию́щим ве́рно:// Бог наш с на́ми, просла́вивый уго́дника Своего́, я́коже благоволи́.

Канон. Гла́с 8.

Пе́снь 1.

Ирмос: Во́ду проше́д, я́ко су́шу, / и еги́петскаго зла избежáв, / изрáильтянин вопия́ше: / Избáвителю и Бо́гу на́шему пои́м.

Припев: Преподобне отче Галактионе, моли́ Бо́га о нас.

Несозда́ннаго Триипоста́снаго Божества́ А́нгеле,/ Невече́рняго Све́та сы́не и челове́че вои́стину Бо́жий,/ песнь тебе́ плету́щу предста́ни о мне, преподо́бный,/ да сконча́в ю, возблагоду́шествую,/ поя́ побе́дную песнь Го́споду, я́ко просла́вися.

Припев: Преподобне отче Галактионе, моли́ Бо́га о нас.

Отце́м похвало́, священноду́шне, ра́дуйся, сосу́де Бо́жий вои́стину,/ ра́дуйся, све́тлый по́стнических доброде́телей би́сере,/ с Небе́сными умы́ при́сно предстоя́ Христу́/ и поя́ побе́дную песнь, я́ко просла́вися.

Сла́ва Отцу́ и Сы́ну и Свято́му Ду́ху:

Вседержи́тель Госпо́дь Сил, Ему́же после́довал еси́ непоро́чным житие́м твои́м,/ во освяще́ние тебе́ бысть, чу́дне Галактио́не,/ Его́же любо́вь угаси́ в тебе́ любо́вь оте́чества твоего́,/ жела́тельно бо оста́вил е, поя́ Христу́, я́ко просла́вися.

И ны́не и при́сно и во ве́ки веко́в. Ами́нь.

Богородичен: Язы́к кий возмо́жет боже́ственныя Твоея́ хвалы́ по досто́инству вели́чие воспе́ти, Богороди́тельнице,/ Тебе́ бо ра́ди челове́ческое естество́, етрастьми́ погружа́емое, вообрази́ся./ Те́мже, Тобо́ю спасе́ннии, песнь Тебе́ пое́м, Влады́чице, я́ко просла́вися.

Пе́снь 3.

Ирмос: Небе́снаго кру́га Верхотво́рче, Го́споди, / и Це́ркве Зижди́телю, / Ты ме́не утверди́ в любви́ Твое́й, / желáний крáю, ве́рных утвержде́ние, / Еди́не Человеколю́бче.

Припев: Преподобне отче Галактионе, моли́ Бо́га о нас.

Незави́стно всем дае́ши исцеле́ние и благоуха́еши бога́тно,/ ду́ши же от бесо́вских наве́тов избавля́еши/ моли́твами твои́ми, преподо́бне.

Припев: Преподобне отче Галактионе, моли́ Бо́га о нас.

Отроча́ еще́ сый, ве́тхаго извле́клся еси́ челове́ка и красо́т мирски́х,/ впери́лся еси́ в ве́чную жизнь,/ победи́в трича́стное души́ соверше́нным, досточу́дне, безстра́стием,/ в не́мже утверди́ся дух твой.

Сла́ва Отцу́ и Сы́ну и Свято́му Ду́ху:

Во́лю творя́ Бо́жию, Того́ Отца́ себе́ име́л еси́, Галактио́не преподо́бне,/ ма́терь же умиле́ние, па́мять исхо́да я́ко сожи́тельницу,/ тем и пусты́ню дости́гл еси́, щито́м смире́ния отвраща́я ми́ра сла́ву,/ Христу́ подража́я, в Не́мже утверди́ся дух твой.

И ны́не и при́сно и во ве́ки веко́в. Ами́нь.

Богородичен: Мари́е, Благослове́нная Де́во, Всепречи́стая Ма́ти Бо́жия,/ Препросла́вленная Влады́чице А́нгелов и челове́ков преблаго́е прибе́жище,/ простри́ держа́вную Твою́ десни́цу, и преподо́бнаго Галактио́на моли́твами благослови́ ны,/ и сохрани́ покланя́ющияся Тебе́, да утверди́тся дух наш.

Та́же седа́лен, гла́с 3.

Уедине́нно ме́сто обре́т, водворе́ние име́л еси́, преподо́бне о́тче,/ безмо́лвием Бо́гу бесе́дуя и вся́кая сво́йства отсека́я, я́ко прему́дрый,/ ве́лие умиле́ние пусты́ннаго пребыва́ния стяжа́л еси́ и в напа́стех непрекло́нен был еси́./ Те́мже и гра́ду на́шему Во́логде, грех ра́ди на́ших озло́бленну наше́ствием бы́вшу,/ попече́нием спомоществова́л еси́/ и открове́нное тебе́ Бо́гом прави́телю волого́дскому безкры́тно яви́ти попе́клся еси́,/ он же, вознесе́н буего́рдаго своего́ се́рдца надме́нием,/ небре́жен бысть словесе́м твоего́ проро́чества,/ за е́же воздаде́ ему́ Госпо́дь и су́щим с ним, плени́вшим его́./ Христа́ моли́, Галактио́не досточу́дне, о почита́ющих любо́вию честно́е успе́ние твое́.

Сла́ва, и ны́не, Богородичен:

Устраши́ся вся́кое земноро́дных слы́шание:/ от недр Оте́ческих во утро́бу всели́ся Деви́чу,/ Его́же у́бо проро́цы провозвести́ша из Тебе́ воплоще́ннаго бы́ти Сы́на Бо́жия,/ Ма́ти Де́во Всепе́тая, Его́же моли́ спасти́ ста́до Твое́, Богоро́дице.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Преподобне отче Галактионе, моли́ Бо́га о нас.

Ум влады́ку на стра́сти плотски́я, богоно́се Галактио́не, поста́вль/ и нескве́рно е́же по о́бразу соблю́д,/ изря́дно на е́же по подо́бию восте́кл еси́,/ отню́дуже, я́ко Ада́м пре́жде преступле́ния, неви́нностию сия́я,/ зовы́й Вседержи́телю:/ сла́ва си́ле Твое́й, Го́споди.

Припев: Преподобне отче Галактионе, моли́ Бо́га о нас.

Моисе́йски кро́тостию блиста́я, пречу́дне,/ и, я́коже еле́нь, жела́нием е́же ко Христу́ обдержи́мь, безстра́стия дости́гл еси́,/ о гра́де на́шем благопопече́ния исполня́яся,/ зову́щи Да́телю благи́х:/ сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

А́нгельское житие́ препровожда́я неле́ностно,/ в бы́вшей гра́ду Во́логде напа́сти беспоко́йно ходи́в, пропове́дуя,/ те́мже поко́й духо́вный при реце́ Со́диме обре́л еси́, блаже́нне,/ моли́твою, посто́м и смире́нием от Све́та просвеща́емь,/ ра́достно Бо́гу взыва́я:/ сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богородичен: Ада́мово, Де́во Пречи́стая, обожи́ся смеше́ние,/ Собезнача́льное бо Отцу́ Сло́во сый и Ду́ху от Тебе́, Всенепоро́чная, роди́тися благоволи́./ Те́мже к Тебе́ прибега́ем, не отста́ви ми́лость Твою́ от нас, ве́рно вопию́щих:/ сла́ва си́ле Твое́й, Го́споди.

Пе́снь 5

Ирмос: Просвети́ нас повеле́нии Твои́ми, Го́споди, / и мы́шцею Твое́ю высо́кою / Твой мир подáждь нам, Человеколю́бче.

Припев: Преподобне отче Галактионе, моли́ Бо́га о нас.

Ре́чная устремле́ния чуде́с твои́х, о́тче преподо́бне,/ весе́лия исполня́ют град Во́логду и окре́стная его́,/ и вси спеша́т, е́же о Го́споде, к твоему́ хвале́нию.

Припев: Преподобне отче Галактионе, моли́ Бо́га о нас.

Волого́дския и Со́дима быстрины́ о тебе́ веселя́тся,/ зане́ держа́вный град Москва́ просла́ви тя, све́тла свети́льника,/ те́мже и град Во́логда, игра́я, торжеству́ет о твое́м хвале́нии.

Сла́ва Отцу́ и Сы́ну и Свято́му Ду́ху:

Волого́дскую страну́ при́сно чудесы́ обогаща́еши, богоно́се Галактио́не,/ е́йже по Бо́жией, да́нной тебе́, благода́ти ми́лостивый предста́тель явля́ешися,/ веселя́щейся о твое́м хвале́нии.

И ны́не и при́сно и во ве́ки веко́в. Ами́нь.

Богородичен: Ма́ти Бо́жия, пречи́стая колесни́це Све́та Присносу́щнаго,/ Галактио́новым предста́тельством спаси́ ны, рабы́ Твоя́,/ у́тренюющия к Твоему́, Влады́чице, хвале́нию.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Преподобне отче Галактионе, моли́ Бо́га о нас.

Таи́нника и учи́теля Присносу́щное Сло́во и просвеще́ние, прехва́льне о́тче Галактио́не, име́в,/ от младе́нчества и до кончи́ны сосу́д чи́стый святы́ни быв,/ немо́лчно взыва́л еси́:/ Го́споди, спаси́ мя.

Припев: Преподобне отче Галактионе, моли́ Бо́га о нас.

Облече́н быв во Христа́, целому́дрия и безстра́стия Да́теля и Помо́щника,/ зе́льнаго по́стничества и трудо́в не измени́л еси́/ и, на го́ру доброде́телей возше́д, в неизрече́нный светозаре́ния свет прише́л еси́,/ его́же ра́ди взыва́л еси́:/ Го́споди, спаси́ мя.

Сла́ва Отцу́ и Сы́ну и Свято́му Ду́ху:

Доброде́телей мно́жеством украси́вся,/ на ня́же, я́ко на колесни́цу, неле́ностныма нога́ма возше́д, о́тче сла́вне,/ возлете́л еси́ на Не́бо, ме́ртвенное прикрове́ние, я́ко сапо́г, разре́ш и Бо́гу предста́в,/ Ему́же воспе́л еси́:/ Го́споди, спаси́ мя.

И ны́не и при́сно и во ве́ки веко́в. Ами́нь.

Богородичен: А́нгел быв, преподо́бне, Всепречи́стыя Вседержи́теля Роди́тельницы,/ Многоми́лостивыя христиа́н Предста́тельницы,/ возвести́л еси́ гряду́щий гнев гра́ду Во́логде, со умиле́нием взыва́я:/ Влады́чице, спаси́ ны.

Конда́к, гла́с 4.

Благоче́стно на земли́ пожи́в,/ муче́ния вене́ц прия́л еси́, прече́стне,/ дре́вом во главу́ от наше́дших градоразори́телей убие́н,/ я́ко до́брый учени́к Спа́са Христа́,/ оста́вивый оте́чественный свой град и дру́ги/ и стра́нствовати любве́ ра́ди Христо́вы ева́нгельски изво́ливый./ Сего́ ра́ди тя почита́ем, пе́сньми вопию́ще:/ от бед изба́ви нас при́сно моли́твами твои́ми,// уго́дниче Бо́жий Галактио́не, о́тче наш.

Икос:

Я́ко светоза́рная луча́, вселе́нней свет возвеща́я, всему́дре о́тче Галактио́не,/ озари́л еси́ Волого́дскую страну́ чудесы́ твои́ми, и́миже тя Христо́с обогати́./ Тем вопие́м ти: ра́дуйся, о́тче наш предо́брый;/ ра́дуйся, по́стничествующих сосло́вие; ра́дуйся, ли́ку святы́х сочета́ние;/ ра́дуйся, преподо́бных удобре́ние, отце́м похвале́ние;/ ра́дуйся, крестоно́сное по гла́су Го́спода твоего́ после́дование;/ ра́дуйся, я́ко и́скренне ве́рующим на сопроти́вныя побе́ды у Христа́ испроша́еши;/ ра́дуйся, я́ко град наш невреди́м от наи́тия сохраня́еши;/ ра́дуйся, я́ко у Престо́ла Вседержи́теля Бо́га со А́нгелы лику́еши;/ ра́дуйся, я́ко усе́рдно Того́ за ны умоля́еши./ Мы же тя почита́ем, вопию́ще:/ от бед изба́ви нас моли́твами твои́ми,/ уго́дниче Бо́жий Галактио́не, о́тче наш.

Пе́снь 7.

Ирмос: От Иуде́и доше́дше, о́троцы в Вавило́не иногда́, ве́рою тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Преподобне отче Галактионе, моли́ Бо́га о нас.

Истка́нную от Вы́шняго благода́ти, совлече́нием вне́шняго челове́ка, во оде́жду обле́клся еси́, богоно́се Галактио́не,/ и, я́ко красе́н грозд мы́сленнаго виногра́да,/ вино́ нам безчи́сленных чуде́с излива́еши, Просла́вившему тя пою́щим:/ благослове́н еси́, Бо́же оте́ц на́ших.

Припев: Преподобне отче Галактионе, моли́ Бо́га о нас.

На земли́ сый, Христо́во был еси́ благоуха́ние,/ тем по отше́ствии твое́м Небе́сная благоуха́ния подае́ши,/ и чуде́с твои́х пресла́вных град и ве́си, целе́бныя сла́дости тре́бующии, испо́лнишася,/ Го́сподеви зову́ще:/ благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Ра́достно честно́е твое́ пра́зднество днесь и пресла́вную твою́, всеблаже́нне, па́мять торжеству́юще,/ позна́хом тя моли́твенника и врача́ предо́браго и защи́тителя тве́рдаго мни́хом,/ и Го́сподеви пое́м:/ благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Достодо́лжно днесь и при́сно еди́ну святы́х Пречестну́ю Богоблагода́тную Присноде́ву,/ сподо́бльшуся за превосходя́щую свя́тость роди́ти Еди́наго от Тро́ицы и безсме́ртну бы́вшу,/ возне́сщуюся превы́ше Небе́с и покланя́емую от всех святы́х А́нгел,/ я́ко Цари́цу всея́ тва́ри, ве́рнии, вопию́ще, мо́лим,/ да сподо́бит ны ми́лости Ро́ждшагося из Нея́ Бо́га оте́ц на́ших.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Припев: Преподобне отче Галактионе, моли́ Бо́га о нас.

Волого́дская страна́ днесь па́мять твою́ пра́зднуют,/ сла́вы твоея́ наслажда́ющеся, преподо́бне,/ сограждани́на тя себе́ су́ща мо́лят приле́жно,/ да не отсту́пиши, сохраня́я твое́ достоя́ние,/ моля́ о них, творе́нии Го́спода.

Припев: Преподобне отче Галактионе, моли́ Бо́га о нас.

Оби́тели го́рних дости́г,/ прибли́житися многочестне́йшему и высоча́йшему Све́ту и ра́зума просвеще́нию сподо́блься, преподо́бне,/ не забу́ди поклоня́ющихся твое́й све́тлой па́мяти/ и убо́гое ста́до ми́лостивно посеща́й,/ благословя́щее творе́ние Го́спода.

Сла́ва Отцу́ и Сы́ну и Свято́му Ду́ху:

Тро́ичен: Ликостоя́ния а́нгельская Тя, Тро́ице равносла́вимая, о́тче и Сы́не и Ду́ше,/ Безнача́льная, Несозда́нная, Нача́льственная и Ца́рственная, Пресоверше́нная, Единосу́щная,/ при́сно сла́вят немо́лчными усты́,/ с ни́миже и мы, бре́ннии, со стра́хом Тя, Трисо́лнечнаго Све́та,/ благослови́м, творе́ние Го́спода.

И ны́не и при́сно и во ве́ки веко́в. Ами́нь.

Богородичен: А́нгела неми́лостива ча́ю по моему́ зло́бному житию́ приити́,/ не ущедря́юща, ниже́ щадя́ща мя в стра́шный час сме́ртный,/ тогда́ к кому́, скве́рный аз, прибе́гну, то́кмо к Тебе́, Цари́це Богоро́дице,/ гре́шных покро́ву и упова́нию и ско́рому ско́рбных утеше́нию,/ Тебе́ бо ни еди́но же невозмо́жно, то́кмо е́же хоте́ти,/ я́ко Ма́тери Го́спода.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, а́нгелов и челове́к чинонача́лия велича́ют.

Припев: Преподобне отче Галактионе, моли́ Бо́га о нас.

Све́тлый му́дрости духо́вный до́ме, пусты́нная красото́ молча́ния,/ селе́ние ве́дения, бу́дущих сказа́телю,/ о́тче преподо́бне Галактио́не,/ не преста́й моли́твами твои́ми сохраня́ти тя велича́ющия.

Припев: Преподобне отче Галактионе, моли́ Бо́га о нас.

Вели́ку к тебе́, преподо́бне, Волого́дская страна́ иму́щи ве́ру,/ крила́та тя воздухохо́дна помо́щника весть,/ цельбоно́сную твою́ па́мять почита́ющи и припа́дающи, про́сит:/ не преста́й моли́твами твои́ми сохраня́ти тя велича́ющия.

Сла́ва Отцу́ и Сы́ну и Свято́му Ду́ху:

Очи мои́ просвети́, блаже́нне и всече́стне о́тче,/ да свет покая́ния до́бре созерца́ю/ и обра́щу ми́лость Стра́шнаго Судии́ в гро́зный час суда́,/ ты бо еси́ слепы́х просвети́тель, немы́х ясноре́чие, и вся́ких неду́гов врач, и прибе́жище скорбя́щих,/ тем тя, Христо́ва уго́дника, велича́ем.

И ны́не и при́сно и во ве́ки веко́в. Ами́нь.

Богородичен: Умиле́ния струи́ пода́ждь ми, Де́во Пречи́стая, еди́на Богоблагода́тная Влады́чице,/ да отмы́ю вся се́рдца моего́ скве́рны,/ Ты бо еси́ па́дающих исправле́ние и безнаде́жных наде́жде,/ вино́вная ве́чныя ра́дости и и́стиннаго весе́лия,/ впа́дша мя в про́пасть греха́ воскреси́, я́ко Ма́ти сладча́йшаго Воскресе́ния/ и Спасе́ния Тя при́сно велича́ющих.

Свети́лен:

Возсия́л еси́ всему́ ми́ру сия́тельными чудесы́ твои́ми, Галактио́не светоно́сче,/ звезде́ Це́ркве присносия́ющая, обурева́емых ти́хое приста́нище, исцеле́ний сокро́вище,/ те́мже тя град Во́логда неусы́пна име́ет храни́теля.

Моли́тва

Преподо́бне о́тче наш Галактио́не, свети́льниче стране́ на́шей, подвигополо́жников удобре́ние, Во́логды гра́да засту́пниче те́плый и неусы́пный, за ны, гре́шныя, ко Всеми́лостивому Бо́гу на́шему, Иису́су Христу́, и ко Святе́й Пречи́стей Ма́тери Его́, Влады́чице на́шей Богоро́дице, Присноде́ве Мари́и, моли́твенниче! Мо́лим твою́ честну́ю святы́ню мы, недосто́йнии раби́ твои́, зря́ще на святочудотво́рный о́браз твой, духо́вными взо́ры стоя́ще во огра́де селе́ния твоего́, не забу́ди нас, си́рых, но, я́ко оте́ц чадолюби́вый, посети́ ду́хом душ на́ших не́мощь и испроси́ моли́твами твои́ми у Христа́ Бо́га на́шего, да освяти́т ду́ши на́ша, и ум наш просвети́т, и вразуми́т, и со́вести на́ша от вся́кия скве́рны очи́стит, и от нечи́стых помышле́ний, и вре́дных разуме́ний, и губи́тельнаго уны́ния, и изба́вит нас от бесо́вских наве́тов и дневны́х и нощны́х озлобле́ний, и да́рует нам и́скреннее покая́ние, се́рдцу сокруше́ние, сле́зы и умиле́ние, воздержа́ние и тре́звость, смиренному́дрие и кро́тость, чистоту́ душе́вную и теле́сную, нищелю́бие же и страннолю́бие, и друг ко дру́гу нелицеме́рную любо́вь, и милосе́рдие, и вся́кое благоволе́ние. О всеблаже́нне о́тче наш Галактио́не, сподо́би ны после́довати по си́ле пути́ спасе́ния, я́ко да твои́ми моли́твами Преблаги́й Христо́с, Бог наш, пока́жет нам, гре́шным, благода́ть и ми́лость Свою́, и вся́ких зол и бу́дущаго муче́ния нас свободи́т, и сподо́бит насле́дником бы́ти Ца́рствия Своего́ Небе́снаго, сла́вящих Его́ и велича́ющих ку́пно со Безнача́льным Его́ Отце́м и Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.