7 октября.

Канон святой первомученице и равноапостольной Фекле Иконийской.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Словесе́м Па́вловым научи́вшися, богоневе́стная Фе́кло, и ве́рою утверди́вшися от Петра́, богозва́нная, первому́ченица яви́лася еси́ и первострада́льница в жена́х, возшла́ еси́ на пла́мень, я́ко на ме́сто благоцвету́щее, зве́ри и юнцы́ устраши́шася тебе́, вооружи́ся бо Кресто́м. Те́м моли́, всехва́льная, Христа́ Бога, спасти́ся душа́м на́шим.

Канон. Гла́с 8.

Пе́снь 1.

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко еди́н сла́вно просла́вися.

Припев: Равноапостольная мати Фекло, моли́ Бо́га о нас.

Гла́с язы́ка не мо́жет всесла́вных первому́ченицы пове́дати страда́льчеств, изнемога́ет бо к похвале́ досто́йней.

Припев: Равноапостольная мати Фекло, моли́ Бо́га о нас.

Преста́ мучи́телево суесло́вие прего́рдое, на того́ бо жены́ благоче́стно во Христе́ му́жествоваша.

Сла́ва Отцу́ и Сы́ну и Свято́му Ду́ху:

Глаго́лы неизрече́нными ева́нгельски огласи́вшися твои́ми, всеблаже́нне Па́вле, Христу́ де́ва уневе́стися.

И ны́не и при́сно и во ве́ки веко́в. Ами́нь.

Богородичен: Гро́зд Тя́ жизноно́сный, всеми́рнаго точа́щ сла́дость спасе́ния, Де́ва, Христе́, породи́.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Припев: Равноапостольная мати Фекло, моли́ Бо́га о нас.

Оле любве́ твоея́, па́че ума́, всечестна́я! Имже о Христе́ Па́влу привяза́лася еси́, соедини́вшися ду́хом.

Припев: Равноапостольная мати Фекло, моли́ Бо́га о нас.

Уязви́ти тя́, сла́вная, уя́звльшуюся жела́нием духо́вным, мы́сль не возмо́же, земны́х наслажде́ние.

Сла́ва Отцу́ и Сы́ну и Свято́му Ду́ху:

Все́х отсту́пльши плотски́х пристра́стий, бесе́дами ма́терними не умягчи́лася еси́, страстоте́рпице всехва́льная.

И ны́не и при́сно и во ве́ки веко́в. Ами́нь.

Богородичен: Евы прама́тере Ты́ исправле́ние была́ еси́, Нача́льника жи́зни ми́ру, Богоро́дице, ро́ждши.

Конда́к, гла́с 8.

Де́вства добро́тою просия́ла еси́, и му́ченичества венце́м украси́лася еси́, апо́стольству вверя́ешися, де́во, я́ко пресла́вная, и огня́ у́бо пла́мень в ро́су преложи́ла еси́, юнца́ же я́рость моли́твою твое́ю укроти́ла еси́, я́ко первострада́льная.

Та́же седа́лен, гла́с 8.

В му́жество же́нство доброде́тельми преложи́вши любо́вию Христо́вою, Бо́жие жили́ще обою́ду была́ еси́, страсте́й бо мра́к поще́нием ума́ливши, му́ченически показа́лася еси́ страда́ния хвала́. Те́м и ми́ру, я́ко свети́ло, све́тиши сугу́бо, возсия́ющи лучи́ Ду́ха, первому́ченице всехва́льная. Моли́ Христа́ Бо́га, прегреше́ний оставле́ние пода́ти, чту́щим любо́вию святу́ю па́мять твою́.

Сла́ва, и ны́не, Богородичен:

Яко Де́ву и еди́ну в жена́х, Тя́, безсе́менно ро́ждшую Бо́га пло́тию, вси́ ублажа́ем, ро́ди челове́честии: о́гнь бо всели́ся в Тебе́ Божества́, и, я́ко младе́нца, дои́ши Зижди́теля и Го́спода. Те́мже, Ангельский и челове́ческий ро́д, досто́йно сла́вим всесвято́е Рождество́ Твое́, и согла́сно вопие́м Ти́: моли́ Христа́ Бо́га прегреше́ний оставле́ние дарова́ти, досто́йно пою́щим сла́ву Твою́.

КрестоБогородичен:

Агнца и Па́стыря и Изба́вителя Агница зря́щи на Кресте́, восклица́ше, пла́чущи, и го́рько рыда́ющи, вопия́ше: ми́р у́бо ра́дуется, прие́мляй Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости; долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй прегреше́ний оставле́ние, ве́рою пою́щим Боже́ственныя Стра́сти Твоя́.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Равноапостольная мати Фекло, моли́ Бо́га о нас.

Обруче́ную Фами́ру, невестово́дец Па́вел тя́ сочета́ Жениху́ Небе́сному, я́ко непоро́чную, Фе́кло всечестна́я.

Припев: Равноапостольная мати Фекло, моли́ Бо́га о нас.

Приве́силася еси́ любо́вию благоче́стия, Па́вловыми словесы́, и Фами́ровы глаго́лы, я́ко буесло́вие, му́ченице, укори́ла еси́.

Припев: Равноапостольная мати Фекло, моли́ Бо́га о нас.

Кропле́нием боже́ственныя кро́ве Ада́мский ро́д благослови́ся: Ева ра́дуется, ви́дящи у́бо жена́ми льсти́ваго зми́я па́дающа.

Сла́ва Отцу́ и Сы́ну и Свято́му Ду́ху:

Чистоту́ возлюби́вши, вся́ кра́сная жития́ отве́рже, бога́тство, ро́д, красоту́ и сла́дости обру́чника, первому́ченица.

И ны́не и при́сно и во ве́ки веко́в. Ами́нь.

Богородичен: Богоро́дицу Тя́, Всечи́стая, просвеще́ннии, вси́ зна́ем: Со́лнце бо родила́ еси́ Пра́вды, Присноде́во.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси́ Бо́г на́ш, ра́зве Тебе́, ино́го не ве́мы.

Припев: Равноапостольная мати Фекло, моли́ Бо́га о нас.

Претя́жким страда́нием на три́знищи подвиза́лася еси́, Фе́кло всеблаже́нная, и по́чести удосто́илася еси́.

Припев: Равноапостольная мати Фекло, моли́ Бо́га о нас.

Окра́деся зми́й лука́вый, де́ва бо боже́ственными Страстьми́ послуша́нию науча́шеся.

Сла́ва Отцу́ и Сы́ну и Свято́му Ду́ху:

Побежда́шеся стыде́ние твое́ боже́ственным дерзнове́нием: о́гнь бо тя́ серде́чный, су́щий Тро́ицы, разжже́.

И ны́не и при́сно и во ве́ки веко́в. Ами́нь.

Богородичен: Мари́е, Богоро́дице Безневе́стная, наде́жды враго́в осуети́ и пою́щия Тя́ возвесели́.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Равноапостольная мати Фекло, моли́ Бо́га о нас.

Отрокови́ца естества́ сла́бость, кре́постию Креста́ укрепи́вшися, ю́ношеское украше́ние боже́ственною любо́вию отве́ргши, но́щию бо дерзне́ и потече́, жела́емаго благово́нная и́щущи уче́ния.

Припев: Равноапостольная мати Фекло, моли́ Бо́га о нас.

Черто́гов преесте́ственно неве́стных самово́льною измени́ любо́вию, благосла́вная и первому́ченица Фе́кла, е́же злоде́ев обита́ти во узи́лищи: жела́ние бо Творца́ зда́ний побежда́ше жела́ния.

Сла́ва Отцу́ и Сы́ну и Свято́му Ду́ху:

В ду́се облобыза́ше у́зы боже́ственнаго учи́теля, му́ченица, в темни́це я́ко в боже́ственном цве́тнице напая́ема словесы́, и возраста́ше, и приноша́ше, я́ко и́стинно Влады́це, пло́д красне́йший.

И ны́не и при́сно и во ве́ки веко́в. Ами́нь.

Богородичен: Яко шипо́к, я́ко чисте́йший кри́н, я́ко благово́нную воню́, Отрокови́це, Творе́ц, от кра́сных удо́лий мирски́х Тя́ избра́в, всели́ся во утро́бу Твою́, и роди́вся, благово́ния вся́ испо́лни.

Конда́к, гла́с 2.

Уязви́вши твое́ се́рдце, доброде́во, любо́вию Христо́вою, обру́чника вре́меннаго, я́ко небрего́ма, преоби́дела еси́, и на о́гнь дерзну́ла еси́, звере́й же уста́ загради́ла еси́, и спа́сшися от ни́х, прилежа́ше, Па́вла и́щущи, Фе́кло первострада́льная.

Икос:

От Па́вла научи́вшися пути́ и́стины, по нему́же неукло́нно ше́ствовала еси́, пречу́дная, и твои́х оста́вивши, я́ко стра́нная, Стра́нному после́довала еси́ му́жественным ра́зумом и о́бразом. Те́мже и Влады́ка тя́ же́н страстоте́рпиц первострада́льну показа́ в конце́х, в ни́хже обше́дши пребыла́ еси́, Па́вла и́щущи, Фе́кло первострада́льная.

Пе́снь 7.

Ирмос: От Иуде́и доше́дше, о́троцы в Вавило́не иногда́, ве́рою тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Равноапостольная мати Фекло, моли́ Бо́га о нас.

Яко у́знику, Па́влу привяза́лася еси́ любо́вию, о всеблаже́нная! Узами нереши́мыми, ве́рою соглаша́ющи благоче́стно, и спою́щи: отце́в на́ших Бо́же, благослове́н еси́.

Припев: Равноапостольная мати Фекло, моли́ Бо́га о нас.

Спредста́ла еси́ Па́влу пред суди́щи непра́ведными, о доброде́во! И жела́нием Влады́чним вопия́ла еси́ во у́жасе, сту́д отве́ргши: отце́в на́ших Бо́же, благослове́н еси́.

Припев: Равноапостольная мати Фекло, моли́ Бо́га о нас.

За любо́вь боже́ственную пе́щи те́ло, му́ченице, отдала́ еси́, и Жела́емаго пребыла́ еси́ неопа́льна си́лою, вопию́щи: отце́в на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Тучено́сный о́блак, дожде́м и гра́дом пла́мень погаси́в, пра́ведно попаля́ет неразу́мныя и спаса́ет песнопою́щую му́ченицу: отце́в на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Же́зл была́ еси́, Де́во, из Иессе́ева ко́рене, Преблаже́нная, Пло́д цветонося́щий спасе́ния ве́рою Сы́ну Твоему́ зову́щим: отце́в на́ших Бо́же, благослове́н еси́

Пе́снь 8.

Ирмос: Царя́ Небе́снаго, Его́же пою́т во́и Ангельстии, хвали́те и превозноси́те Его́ во ве́ки.

Припев: Равноапостольная мати Фекло, моли́ Бо́га о нас.

Странноявле́нен тво́й по́мысл, во гро́б бо, я́ко во Еде́м, де́во, всели́лася еси́, му́ченице, пою́щи Христа́ во ве́ки.

Припев: Равноапостольная мати Фекло, моли́ Бо́га о нас.

Помрачи́тися благоле́пию де́вства све́тлости не терпя́щи, твоея́ добро́ты, умре́ти изво́лила еси́ и жи́ти во ве́ки.

Припев: Равноапостольная мати Фекло, моли́ Бо́га о нас.

Животворя́щему и преесте́ственному сочета́вшися Христу́, первому́ченице, Жениху́, зве́ри изво́лила еси́ бы́ти храни́тели де́вства.

Сла́ва Отцу́ и Сы́ну и Свято́му Ду́ху:

Совле́кши твою́ тле́ния оде́жду, благооде́ждна Христо́ва стадиоте́чница, прешла́ еси́ к нестаре́ющей жи́зни во ве́ки.

И ны́не и при́сно и во ве́ки веко́в. Ами́нь.

Богородичен: Преесте́ственно Соде́теля и Спа́са, Бо́га Сло́ва, родила́ еси́, Де́во. Те́м Тя́ чти́м, Чи́стая, во ве́ки.

Песнь 9

Ирмос: Тя́, неискусобра́чную Ма́терь Бо́га Вы́шняго, Тя́, па́че ума́ ро́ждшую сло́вом вои́стину Бо́га, вы́шшую пречи́стых си́л, немо́лчными славословле́нии велича́ем.

Припев: Равноапостольная мати Фекло, моли́ Бо́га о нас.

Кто́ твоему́ непобе́дному, о первому́ченице, не подиви́тся? Зве́ри бо мы́сленныя, стра́сти души́, укроти́вши, и неудержа́нных звери́ных стремле́ний не убоя́лася еси́, но пребыла́ еси́ посреде́ си́х нерастли́ма.

Припев: Равноапостольная мати Фекло, моли́ Бо́га о нас.

Не прохо́дный тве́рдый Бо́жиим повеле́нием разсе́деся тебе́ ка́мень, богоно́сней му́ченице, ба́нею возрожде́ния запеча́тствованну боже́ственную неве́сту, я́ко черто́г, бежа́щу вну́трь прия́т.

Сла́ва Отцу́ и Сы́ну и Свято́му Ду́ху:

Исцели́, первому́ченице, я́звы души́ моея́, ми́ру ми́р пода́ждь, Ве́рному Импера́тору на́шему на ва́рвары враги́ побе́дная даю́щи, и ми́р Це́рквам твои́ми моли́твами.

И ны́не и при́сно и во ве́ки веко́в. Ами́нь.

Богородичен: Тебе́, Пресла́вную и Всесвяту́ю Богоро́дицу, вси́ ве́рнии, сла́вим немо́лчными пе́сньми и пое́м, я́ко ро́ждшую Го́спода все́х, на спасе́ние пою́щих Тя́.

Свети́лен:

Же́н сла́ву, наста́вницу страда́льцев, отве́рзшую все́м муче́ния пути́, равноапо́стольную Фе́клу и первострада́льную благопохва́лим.

Богородичен:

Кре́пким Твои́м кро́вом от наве́та враго́в, Чи́стая, Твоя́ рабы́, сохрани́ ны вся́ невре́дны, Тя́ бо стяжа́хом еди́ну прибе́жище в ну́ждах.

Молитва 1-я

О райский цвете целомудрия, о мученице первейшая Завета Новаго, о Фекло, невесто Христова равноангельная, страдании очищенная и проповедию апостольскою напоенная, чистоты крине осиянный, подвиги многими процветый и чудесы преславными облагоухаяй!

Кому уподобим тебе, богозванная, всякое душепагубное прельщение поправшая, Духа Святаго исполнь сосуде, премудрости кладезю, цельбы источниче, иже всякия страсти пламень остужаяй! Яко облак светлый, прииди и омый нас дождем молитвы твоея от скверн душевных и телесных. Якоже огнь любве разжженый, уцеломудри сердца наша и воспламени я ко Христу любовию. Яко знамение мужества в страданиих непреклоннаго, укрепи колеблемая сердца наша спасительною силою Креста Господня; яко крепкая поборнице наша противу выну враждующих на ны, немощныя, буди нам щит огнезрачный необорим, да бежат от нас безстуднии демони, опаляемии твоими молитвами, да телеса наша яко храмы Святаго Духа будут.

Ей, Фекло, добродево премудрая, отврати очи наша от похотей мира сего, да обручимся Христу непорочною совестию; исполни светильницы наша елеом целомудрия, зане тяжце согрешили есмы, верности Жениху Христу не сохранивше, и сего ради Чертога Брачнаго вне затворитися имамы. Обаче не отрини чада твоя, тебе молящаяся, но, яко благосердая помощнице, облеки ны в ризы яже о вере крепости, препояши чресла наша чистотою во умерщвление страстей и обновление духа; паче же и души наша кротостию и смирением украси, да яко чада Божии, якоже агнцы и овчата Христовы невозбранно пройдем искушения нечестиваго мира сего, и вожделеннаго Чертога Райскаго да достигнем, идеже вся мудрыя девы Престолу Жениха Христа предстоят, воспевающе достопокланяемое Имя Отца, и Сына, и Святаго Духа, ныне и в безконечныя веки. Аминь.

Молитва 2-я

О богоблаженная святая первомученице, равноапостольная дево, Фекло прехвальная, истинная невесто Христова, красото тверди церковныя, мысленнаго Неба утренняя звездо, пресветлый бисере чистоты и целомудрия, сада райскаго благоуханный цвете!

Ты, паче всех благ и самыя жизни единаго Господа возлюбившая, добре за Имя Его пострадавшая, венцы девства, мученичества и апостольства предивно от Него увенчанная, ликом Небесным сопричтенная, аще и радуешися ныне во славе вечней, но не оставлявши и нас, чтущих тя, яко неусыпную пред Богом ходатаицу и милосердую нашу предстательницу.

И якоже дарова тебе велию благодать Жених твой, сладчайший Иисус, смиренно молим тя: вонми прошением нашим сердечным, не остави нас в мире сем сирых; посети ны, в темнице греха сущия, на покаяние бодренное скоро возстави, души и тела научи блюсти чистоту, на путь доброделания направи, к евангельскому жительству усердие вдохни, молитвы огнь святый воспламени и возведи к любви Божественней.

Ей, добропобедная первострадальнице, понеже многая на пользу испросити можеши у Многомилостиваго Иисуса Спаса нашего, помощница скорая в сей жизни буди. Ангельское охранение нам исходатайствуй, раны и язвы болящих уврачуй, скорбящим благодатную отраду низпосли юность и отрочество чистотою огради, иноком в трудех и послушании пособствуй, супружества нерасторжима соблюди, воины во бранех неодолимы сотвори, враги же веры и Святыя Церкве расточи.

Пролей, нареченная избраннице Христова, моление твое за ны ко Господу, да дарует нам жития течение неукоризненно, старость неболезненну, безбедну, мирну; кончину же непостыдну, Таин Пресвятых, Тела и Крове Его Божественных, причастну, во еже Царствие Небесное нам улучити и с чинми Ангельскими тамо пребывати, и со святыми купно воспевати в Троице славимаго Бога, Отца, и Сына, и Святаго Духа, в безконечныя веки веков. Аминь.