5 октября.

Канон святому преподобному Ионе пресвитеру, отцу Феофана, творца канонов, и Феодора Начертаннаго.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4:

Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лость Твою́ от нас,/ но моли́твами их// в ми́ре упра́ви живо́т наш.

Кано́н. Гла́с 2.

Пе́снь 1.

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припев: Преподобне отче Ионо, моли́ Бо́га о нас.

Слуга́ Бо́жий бы́в, о́тче, сохрани́л еси́, я́ко свяще́нник, Спа́сова повеле́ния, мирско́е бо смуще́ние оста́вил еси́, кре́ст тво́й взе́м, и жизноно́сным стопа́м, всеблаже́нне, после́довал еси́.

Припев: Преподобне отче Ионо, моли́ Бо́га о нас.

Спасе́ния хода́тай, ве́дый ра́зум богодухнове́нный, все́ Писа́ние благоче́стно проше́л еси́, боговеща́нная повеле́ния навыка́я, Ио́но о́тче преподо́бне, свяще́нства отсю́ду прия́л еси́ достоя́ние.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Возсия́ Со́лнце из Тебе́, Ма́ти Присноде́во, Иже из Отца́ пре́жде ве́к неви́димый и ви́димым же пресла́вно опису́емь те́лом, благоче́стия заре́ю челове́ки просвети́.

Пе́снь 3.

Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Припев: Преподобне отче Ионо, моли́ Бо́га о нас.

От на́с ны́не сло́во похвале́ния плето́мо прие́мля, богоно́се, ра́дуяся, твои́х трудо́в наслажда́ешися, и зовы́й, преподо́бне: Ты́ еси́ Бо́г на́ш, и не́сть пра́веден па́че Тебе́, Го́споди.

Припев: Преподобне отче Ионо, моли́ Бо́га о нас.

Глаго́лы услы́шав Влады́чни, оста́вил еси́ ми́р и я́же в ми́ре, приве́л еси́ се́мя твое́ Го́споду, зовя́, преподо́бне: Ты́ еси́ Бо́г на́ш, и не́сть пра́веден па́че Тебе́, Го́споди.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Ты́ еди́на па́че все́х су́щих от ве́ка вели́ких сподо́билася еси́ и па́че естества́, Бо́га бо невмести́маго все́й тва́ри во утро́бе понесла́ еси́ и воплоти́ла еси́. Те́м Богоро́дицу Тя́ вси́ почита́ем.

Пе́снь 4.

Ирмос: Прише́л еси́ от Де́вы не хода́тай, ни Ангел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти́: сла́ва си́ле Твое́й, Го́споди.

Припев: Преподобне отче Ионо, моли́ Бо́га о нас.

Отве́рзл еси́, Ио́но богому́дре, две́ри твоя́, Авраа́му подо́бяся, все́м тре́бующим, преподо́бне, те́м небе́сная Христо́с отверза́ет ти́ врата́, всеблаже́нне.

Припев: Преподобне отче Ионо, моли́ Бо́га о нас.

Всечестно́е свяще́нническое досто́инство украси́л еси́, Ио́но блаже́нне, и к мона́шествующих же собра́нием, ра́дуяся, ты́ прите́кл еси́, вседомо́вно, преблаже́нне, приводи́мь.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Исцеля́я Евино дре́внее преступле́ние, в Тя́, Всенепоро́чную и Всесвяту́ю, всели́ся, всего́ мя челове́ка вообрази́в па́дшаго, Пребоже́ственный.

Пе́снь 5

Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Припев: Преподобне отче Ионо, моли́ Бо́га о нас.

Христокра́сным просвеща́яся житие́м, Ио́но блаже́нне, все́м че́стен показа́лся еси́, ве́сть бо и́стинно доброде́тель сла́вны соверша́ти сию́ иму́щия, яви́лся бо еси́ иере́й Христо́в достоприя́тен.

Припев: Преподобне отче Ионо, моли́ Бо́га о нас.

Си́лою Боже́ственною укрепля́емь, блаже́нне, мирску́ю любо́вь кре́пко отве́ргл еси́, и Влады́це, ра́дуяся, прише́л еси́ во́льным твои́м нра́вом, и, сохрани́в ве́ру невреди́мо, вене́ц сла́вы, богому́дре, прия́л еси́.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Еди́ну на́м во дву́ существа́х ви́димую Ипоста́сь, еди́на Благослове́нная, ражда́еши неизрече́нно, Бо́жия Бо́га Сло́ва, воплоти́вшагося за ми́лость неизрече́нную. Того́ моли́ сохрани́тися пою́щим Тя́.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Припев: Преподобне отче Ионо, моли́ Бо́га о нас.

Жите́йских веще́й, о́тче, нестоя́щее све́дый, сия́ оста́вив, и к возда́нию потща́ся жре́бия го́рняго, пребога́те.

Припев: Преподобне отче Ионо, моли́ Бо́га о нас.

Благочести́во мона́шествующих мно́жества пита́я, не оста́вил еси́, о́тче блаже́нне, те́м сла́дости лу́чшия во оби́телех небе́сных сподо́бился еси́.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Неискусому́жно, Пречи́стая Де́во, родила́ еси́ и ве́чнуеши Де́ва, явля́ющи и́стиннаго Божества́, Сы́на и Бо́га Твоего́, о́бразы.

Кондак, глас 2

Чистото́ю душе́вною боже́ственно вооружи́вся,/ и непреста́нные моли́твы/ я́ко копие́ вручи́в кре́пко,/ пробо́л еси́ бесо́вская ополче́ния./ Ионо, о́тче наш,// моли́ непреста́нно о всех нас.

Пе́снь 7.

Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Припев: Преподобне отче Ионо, моли́ Бо́га о нас.

Избра́нием суда́ украси́лся еси́, свяще́нник бы́в, Ио́но, о́тче преподо́бне, те́мже вше́л еси́ вну́трь вы́шняго хра́ма, нехо́дная зря́, твоего́ священноде́йства пло́д пожа́в.

Припев: Преподобне отче Ионо, моли́ Бо́га о нас.

Оте́ческая возлюби́л еси́ ликостоя́ния и в ли́цех оте́ц ра́достно просла́вился еси́, Христу́ предстоя́, всеблаже́нне преподо́бне, прие́млеши твоего́ служе́ния всего́ возда́ние.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Облак Де́ва Тя́, пра́вды Со́лнце, роди́, Де́ва пребы́вши, дебе́лости плотски́я приобщи́вшася, Челове́ка бы́вша, Христе́, Юже воспева́ем, я́ко пресла́вную.

Пе́снь 8.

Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́, я́ко Го́спода, и превозноси́те во вся́ ве́ки.

Припев: Преподобне отче Ионо, моли́ Бо́га о нас.

Соверше́нною чи́стою любо́вию Христа́ вожделе́л еси́, священнота́инниче о́тче, и непреста́нными гла́сы вопия́л еси́: по́йте, вся́ дела́, Го́спода и превозноси́те во вся́ ве́ки.

Припев: Преподобне отче Ионо, моли́ Бо́га о нас.

Мирску́ю красоту́ оста́вив, во́лею Христу́, блаже́нне, прише́л еси́, благоле́пие Того́ жела́я зре́ти, во оби́тели святы́я вселя́емь, превознося́ Христа́ во ве́ки.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Свяще́ннейшими Тя́ гла́сы свяще́ннейшии Бо́жии проро́цы, Чи́стая, бу́дущую Ма́терь провозгласи́ша я́сно все́ми Влады́чествующаго, Пречи́стая, Его́же превозно́сим во вся́ ве́ки.

Песнь 9

Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Припев: Преподобне отче Ионо, моли́ Бо́га о нас.

Правове́рный ра́зум благоле́пно измла́да навы́к, от Отца́ пре́жде ве́к возсия́вшаго Сы́на и спокланя́ема Ду́ха, исходя́ща отту́ду неизрече́нно, я́ве уясни́л еси́, святи́тель бы́в, преподо́бне.

Припев: Преподобне отче Ионо, моли́ Бо́га о нас.

Во оби́телех небе́сных Созда́тель всели́ тя, Того́ та́ин я́ко служи́теля честна́го, о́тче Ио́но богоно́се, и ны́не на́с твоя́ назира́еши сы́ны, всеблаже́нне, тя́ при́сно похваля́ющия.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Черто́г была́ еси́ па́че ума́ воплоще́ния Сло́ва, Де́во Богороди́тельнице, оде́яна сла́вою доброде́телей и укра́шена, те́м Тя́, Всенепоро́чную Богоро́дицу, велича́ем.

Молитва

О свяще́нная главо́, преподо́бне о́тче, преблаже́нне а́вво Ионо, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.