5 октября.

Канон Святому пророку Ионе

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 2:

Проро́ка Твоего́ Ионы па́мять, Го́споди, пра́зднующе,/ тем Тя мо́лим:// спаси́ ду́ши на́ша.

Кано́н. Гла́с 2.

Пе́снь 1.

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припев: Пророче Божий Ионо, моли́ Бо́га о нас.

Душе́вное сохрани́в, Ио́но блаже́нне, досто́инство, богови́дный бы́л еси́ о́браз и преми́рное сподо́бился еси́ прообрази́ти Христо́во Воскресе́ние, е́же песносло́вим вси́, сла́вно бо просла́вися.

Припев: Пророче Божий Ионо, моли́ Бо́га о нас.

Вся́чески любо́вию к Бо́гу преклони́лся еси́, приснопа́мятне, и сия́нии су́щими отту́ду просвети́вся, и проро́к язы́ком велегла́сен от Него́ устро́ен еси́, покая́ния врачевству́ уча́ спаси́тельному.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Возсия́ Со́лнце из Тебе́, Ма́ти Присноде́во, Иже из Отца́ пре́жде ве́к неви́димый и ви́димым же пресла́вно опису́емь те́лом, благоче́стия заре́ю челове́ки просвети́.

Пе́снь 3.

Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Припев: Пророче Божий Ионо, моли́ Бо́га о нас.

Проро́к, предзря́ си́лою Боже́ственною благода́ть, преходя́щую в язы́ки, в пучи́ну уны́ния низведе́ся, вопия́ Тебе́, Влады́ко: Ты́ еси́ Бо́г на́ш, и не́сть пра́веден па́че Тебе́, Го́споди.

Припев: Пророче Божий Ионо, моли́ Бо́га о нас.

Изре́к благоче́стие кора́бленником и ра́б Высоча́йшаго тя́ сама́го научи́в, в пучи́ну вве́ржен бы́л еси́, вопия́, проро́че сла́вне: Ты́ еси́ Бо́г на́ш, и не́сть пра́веден па́че Тебе́, Го́споди.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Ты́ еди́на па́че все́х су́щих от ве́ка вели́ких сподо́билася еси́ и па́че естества́, Бо́га бо невмести́маго все́й тва́ри во утро́бе понесла́ еси́ и воплоти́ла еси́. Те́м Богоро́дицу Тя́ вси́ почита́ем.

Пе́снь 4.

Ирмос: Прише́л еси́ от Де́вы не хода́тай, ни Ангел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти́: сла́ва си́ле Твое́й, Го́споди.

Припев: Пророче Божий Ионо, моли́ Бо́га о нас.

Не терпя́ зре́ти люде́й твои́х отпаде́ния, Ио́но богоглаго́ливе, те́м и бежа́ти произво́лив, ки́том я́т бы́л еси́, погребе́ние тридне́вное, блаже́нне, прообразу́я Христо́во.

Припев: Пророче Божий Ионо, моли́ Бо́га о нас.

Человеколю́бца ве́дый Влады́ку, не терпя́ше проро́ческа да́ра зре́ти укоря́ема, те́м отлага́ше Бо́жие повеле́ние, бежа́, богоглаго́ливе.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Исцеля́я Евино дре́внее преступле́ние, в Тя́, Всенепоро́чную и Всесвяту́ю, всели́ся, всего́ мя челове́ка вообрази́в па́дшаго, Пребоже́ственный.

Пе́снь 5

Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Припев: Пророче Божий Ионо, моли́ Бо́га о нас.

Ио́на, проро́к вели́кий, тридне́внаго бы́сть преображе́ние в ка́мени, Христе́, погребе́ния Твоего́, и́мже спа́сл еси́, Сло́ве, ве́рою и любо́вию Тебе́ зову́щия: ино́го, ра́зве Тебе́, Бо́га не зна́ем.

Припев: Пророче Божий Ионо, моли́ Бо́га о нас.

Не терпя́ презре́ти, Христе́ мо́й, ниневи́тян, в ро́ве лежа́щих грехо́внем, но, уще́дрив, посла́л еси́ и́м проро́ка Ио́ну, Влады́ко, пропове́дника, провозвеща́ющаго я́ве покая́ние.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Еди́ну на́м во дву́ существа́х ви́димую Ипоста́сь, еди́на Благослове́нная, ражда́еши неизрече́нно, Бо́жия Бо́га Сло́ва, воплоти́вшагося за ми́лость неизрече́нную. Того́ моли́ сохрани́тися пою́щим Тя́.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Припев: Пророче Божий Ионо, моли́ Бо́га о нас.

Яко Ио́ну от ки́та спа́сл еси́, Спа́се, па́че ума́ неврежде́нна, та́ко и ны́не спаси́ ду́шу мою́ от се́тей змии́ных.

Припев: Пророче Божий Ионо, моли́ Бо́га о нас.

Спасе́ния ты́, проро́че, хода́тай бы́л еси́ ве́ровавшим твоему́ пропове́данию ниневи́тяном, сла́вне, покая́ния возопи́в пропове́дание.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Неискусому́жно, Пречи́стая Де́во, родила́ еси́ и ве́чнуеши Де́ва, явля́ющи и́стиннаго Божества́, Сы́на и Бо́га Твоего́, о́бразы.

Седа́лен, гла́с 4.

Проро́к бы́в прише́ствия Христо́ва, Того́ тридне́вное, блаже́нне, воста́ние я́ве провозвести́л еси́, в ки́тове чре́ве тридне́вновав невре́дно, зовя́: ны́не да взы́дет от тли́ живо́т мо́й к Тебе́, от тле́ния хотя́щаго земны́я изба́вити.

Пе́снь 7.

Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Припев: Пророче Божий Ионо, моли́ Бо́га о нас.

Не терпя́ зре́ти тебе́ ско́рбию и печа́лию дручи́ма, проро́че всече́стне, а́бие простре́ ти́ пресла́вно се́нь, осла́бу нося́щу, сы́й Благослове́н и Препросла́влен.

Припев: Пророче Божий Ионо, моли́ Бо́га о нас.

Измла́да Творцу́ Твоему́ освяти́лся еси́, Ио́но всехва́льне, богому́дре, всеблаже́нне, моли́твы бо ты́ прозябе́ние бы́в, проро́чествия благода́ть Ду́ха прия́ти сподо́бился еси́, пребога́те.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Облак Де́ва Тя́, пра́вды Со́лнце, роди́, Де́ва пребы́вши, дебе́лости плотски́я приобщи́вшася, Челове́ка бы́вша, Христе́, Юже воспева́ем, я́ко пресла́вную.

Пе́снь 8.

Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́, я́ко Го́спода, и превозноси́те во вся́ ве́ки.

Припев: Пророче Божий Ионо, моли́ Бо́га о нас.

Яко в черто́зе, в зве́ре, богоглаго́ливый Ио́но, ру́це распросте́р, возопи́л еси́, глаго́ля Всеви́дцу Бо́гу: Спа́се мо́й, от тли́ мя́ возведи́, па́ки да взы́дет ны́не к Тебе́ живо́т мо́й.

Припев: Пророче Божий Ионо, моли́ Бо́га о нас.

Умное твоея́ души́ очи́стив от скве́рны, спримеси́лся еси́ жела́емому, блаже́нне, и богови́ден бы́л еси́, Боже́ственным ра́зумом обожа́емь, поя́: вся́ дела́, Го́спода по́йте и превозноси́те во вся́ ве́ки.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Свяще́ннейшими Тя́ гла́сы свяще́ннейшии Бо́жии проро́цы, Чи́стая, бу́дущую Ма́терь провозгласи́ша я́сно все́ми Влады́чествующаго, Пречи́стая, Его́же превозно́сим во вся́ ве́ки.

Песнь 9

Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Припев: Пророче Божий Ионо, моли́ Бо́га о нас.

Луча́ми благода́ти просвети́вся, бы́л еси́, Ио́но богоявле́нне, Христо́во проображе́ние, те́м я́ко проро́ка тя́ вси́, и́же благочести́во твои́х наслажда́ющеся всему́дрых уче́ний, благохва́лим, досточу́дне.

Припев: Пророче Божий Ионо, моли́ Бо́га о нас.

Боже́ственными пе́сньми всеблагочести́во пое́м тя́, Христо́ва я́ко я́вльшася погребе́ния проображе́ние и Воскресе́ния, блаже́нне, па́че ума́ зна́мение бы́вшаго, его́же да наслади́мся хода́тайствы твои́ми, богоприя́тне.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Черто́г была́ еси́ па́че ума́ воплоще́ния Сло́ва, Де́во Богороди́тельнице, оде́яна сла́вою доброде́телей и укра́шена, те́м Тя́, Всенепоро́чную Богоро́дицу, велича́ем.

Стихи́ры, гла́с 4.

Заре́ю просвеща́емь / Трисо́лнечнаго Божества́, / Ио́но всебога́те, / я́ко проро́к Бо́жий, чи́стым се́рдцем / проро́чествия да́р восприя́л еси́ я́ве, / и предсказа́л еси́ бу́дущая, / и Словесе́ тридне́вное прописа́л еси́ воста́ние, / зве́рю примета́емь / и тле́ния не прие́мь.

Прозря́ хотя́щее на язы́ки бы́ти / Влады́ки спаси́тельное, блаже́нне, осия́ние, / бежи́ши от лица́ Всецаря́, / сокрыва́яся, му́дре, / спасу́щихся Боже́ственныя про́поведи, / и ки́ту пре́дан бы́л еси́, / губя́щу тя́ ника́коже, / и на су́шу изда́лся еси́ / Боже́ственными манове́нии.

Христо́во тридне́вное / пропису́я воста́ние, / от ки́та тридне́вен изше́л еси́, блаже́нне, / — и еще́ три́ дни́, — Ио́но, возопи́в, / — и Ниневи́й развраще́нию коне́чному преда́стся, / — покая́нием же зря́ / не соверши́тися твое́й про́поведи, / уныва́еши, / Бо́жию человеколю́бию удивля́яся.

Сла́ва, и ны́не, Богородичен:

Судию́ пра́веднейшаго / поро́ждши, Чи́стая, / моли́, Влады́чице всенепоро́чная, / мене́, блу́дно пожи́вша, / осужде́ннаго и недоуме́нна, / в бу́дущем стра́шнем суде́, Де́во, не осуди́ти мя́, / сочета́ти же одесну́ю Его́ / хотя́щим стоя́ти избра́нным, / за ми́лость и мно́гую благосты́ню.

Молитва

О прехва́льный и пречу́дный проро́че Бо́жий Ионо! Услы́ши нас, гре́шных и непотре́бных, в час сей предстоя́щих пред свято́ю твое́ю ико́ною и усе́рдно прибега́ющих к хода́тайству твоему́. Моли́ о нас Человеколю́бца Бо́га, да пода́ст нам дух покая́ния и сокруше́ния о гресе́х на́ших и всеси́льною свое́ю благода́тию да помо́жет нам оста́вити пути́ нече́стия, преспева́ти же во вся́ком де́ле бла́зе; да укрепи́т нас в борьбе́ со страстьми́ и похотьми́ на́шими; да всади́т в се́рдце на́ше дух смире́ния и кро́тости, дух братолю́бия и незло́бия, дух терпе́ния и целому́дрия, дух ре́вности к Сла́ве Бо́жией и спасе́нию бли́жних. Упраздни́ моли́твами твои́ми, проро́че, злы́я обы́чаи ми́ра, па́че же поги́бельный и тлетво́рный дух ве́ка сего́, заража́ющий христиа́нский род неуваже́нием к Боже́ственней правосла́вной ве́ре, к уста́вом Святы́я Це́ркве и к за́поведем Госпо́дним, непочте́нием к роди́телем и власте́м предержа́щим, и низверга́ющий люде́й в бе́здну нече́стия, развраще́ния и поги́бели. Отврати́ от нас, пречу́дне проро́че, предста́тельством твои́м пра́ведный гнев Бо́жий и изба́ви вся гра́ды и ве́си Оте́чества на́шего от бездо́ждия и гла́да, от стра́шных бурь и землетрясе́ний, от смертоно́сных язв и боле́зней, от наше́ствия враго́в и междоусо́бныя бра́ни. Укрепи́ твои́ми моли́твами, пресла́вне, предержа́щия вла́сти на́ша в вели́цем и многотру́днем по́двизе народоправле́ния, благопоспе́шествуй им во всех благи́х дея́ниих и начина́ниих к водворе́нию ми́ра и пра́вды в стране́ на́шей. Посо́бствуй христолюби́вому во́инству во бране́х со врага́ми на́шими. Испроси́, проро́че Бо́жий, от Го́спода па́стырем на́шим святу́ю ре́вность по Бо́зе, серде́чное попече́ние о спасе́нии пасо́мых, му́дрость во уче́нии и управле́нии, благоче́стие и кре́пость, во искуше́ниих, судия́м испроси́ нелицеприя́тие и безкоры́стие, правоту́ и сострада́ние к оби́димым, всем нача́льствующим попече́ние о подчине́нных, ми́лость и правосу́дие, подчине́нным же поко́рность и послуша́ние ко власте́м и усе́рдное исполне́ние свои́х обя́занностей; да та́ко в ми́ре и благоче́стии пожи́вше в сем ве́це, сподо́бимся прича́стия ве́чных благ в Ца́рствии Го́спода и Спа́са на́шего Иису́са Христа́, Ему́же подоба́ет честь и поклоне́ние со безнача́льным Его́ Отце́м и Пресвяты́м Ду́хом во ве́ки веко́в. Ами́нь.