5 октября.

Канон святому священномученику Фоке, епископу Синопийскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь священному́ченика, гла́с 4:

И нра́вом прича́стник, и престо́лом наме́стник апо́столом бы́в, дея́ние обре́л еси́, богодухнове́нне, в виде́ния восхо́д, сего́ ра́ди сло́во и́стины исправля́я, и ве́ры ра́ди пострада́л еси́ да́же до кро́ве, священному́чениче Фо́ко, моли́ Христа́ Бо́га, спасти́ся душа́м на́шим.

Кано́н священному́ченнка. Гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Священномучениче Фоко, моли́ Бо́га о нас.

Пе́ти усе́рдствующу дне́сь боже́ственную па́мять твою́ свеща́тельными Ду́ха заря́ми ду́шу мою́ осия́й, па́стырь и свиде́тель, сла́вне, Вседержи́теля явля́емь.

Припев: Священномучениче Фоко, моли́ Бо́га о нас.

Му́чеников све́тло обогати́л еси́, Бо́жие благосла́вие, па́стырскими укра́шся добро́тами и обагри́в кро́вию свяще́ннаго страда́ния твоего́ одея́ние, богоблаже́нне.

Сла́ва Отцу́ и Сы́ну и Свято́му Ду́ху:

Утверди́в по́мысл у́ншими наде́ждами, всему́дре, в зло́бе су́щаго си́льна всеконе́чно разсла́бил еси́ и победоно́сец изя́щнейший к небе́сным, Фо́ко, восте́кл еси́.

И ны́не и при́сно и во ве́ки веко́в. Ами́нь.

Богородичен: Разреши́ся пра́отцев, Чи́стая, запреще́ние, преве́чнаго бо ражда́еши Бо́га, мла́до Отроча́ явля́ющася и новотворя́щаго все́ челове́ческое и́стинно существо́.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Священномучениче Фоко, моли́ Бо́га о нас.

Исцеле́ния соверша́я призыва́нием Христо́вым, преподо́бне, от ле́сти вра́жия спа́сл еси́ гра́д и лю́ди Бо́жиею благода́тию.

Припев: Священномучениче Фоко, моли́ Бо́га о нас.

Хра́м сы́й Бо́жий, и́дольская ка́пища, му́чениче, низве́ргл еси́, Вседе́тельную Си́лу име́я Помо́щника и Соде́йствителя.

Сла́ва Отцу́ и Сы́ну и Свято́му Ду́ху:

Во́инство ви́дено бы́сть, Фо́ко, Ангельское и све́т Бо́жий безме́рный, пред суди́тельными тя́ престо́лы Го́споду прославля́ющу.

И ны́не и при́сно и во ве́ки веко́в. Ами́нь.

Богородичен: Из Тебе́ Бо́г воплоти́вся, за благоутро́бие челове́ком соедини́ся и кля́тву разруши́, еди́на Всеблагослове́нная Влады́чице.

Седа́лен му́ченика, гла́с 1.

Яко му́ченик и па́стырь свяще́нно просла́вился еси́, кро́вию оде́жду свяще́нства обагри́в светле́йше, и Го́споду предстои́ши. Те́м дне́сь Бо́жия Це́рковь пра́зднует пресла́вную твою́ па́мять, Фо́ко всеблаже́нне.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Священномучениче Фоко, моли́ Бо́га о нас.

Светле́йшую тя́ звезду́ на высоте́ церко́вней положи́, Фо́ко, Влады́ка, страда́ний, свяще́ннейше, и чуде́с сия́ньми все́х сердца́ просвеща́юща.

Припев: Священномучениче Фоко, моли́ Бо́га о нас.

Испове́дав воплоще́ние Влады́чне пред мучи́тельским суди́щем, му́чениче страстоте́рпче, и све́тло посрами́л еси́ е́ллинская чти́лища и многобо́жное безбо́жие.

Сла́ва Отцу́ и Сы́ну и Свято́му Ду́ху:

Возвыша́ему мо́рю пре́лести многобо́жия бу́рею, Боже́ственным окормле́нием преше́л еси́, сла́вне, приста́нище тиша́йшее все́м бы́в пла́вающим.

И ны́не и при́сно и во ве́ки веко́в. Ами́нь.

Богородичен: Неискусобра́чная Де́во Благослове́нная, иера́рхов похвало́ и страстоте́рпцев все́х вене́ц, бе́д и скорбе́й пою́щия Тя́ изба́ви.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Священномучениче Фоко, моли́ Бо́га о нас.

Ше́ствия вра́жия я́вственно запя́л еси́, напра́вив твоя́ ше́ствия к стезя́м Боже́ственнаго хоте́ния, свяще́ннейше.

Припев: Священномучениче Фоко, моли́ Бо́га о нас.

Терза́емо ра́нами многострада́льное те́ло твое́ расто́рже безбо́жия у́зы Боже́ственною си́лою, Фо́ко богоблаже́нне.

Сла́ва Отцу́ и Сы́ну и Свято́му Ду́ху:

Всеце́лое Бо́гу прине́слся еси́ заколе́ние, поже́ршемуся на́с ра́ди, всехва́льне, и крова́выя же́ртвы и́дольския разори́вшему.

И ны́не и при́сно и во ве́ки веко́в. Ами́нь.

Богородичен: Му́дрость Бо́жия созда́ Себе́, о Влады́чице, от святы́х и чи́стых Твои́х крове́й хра́м, я́ко благоволи́.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Священномучениче Фоко, моли́ Бо́га о нас.

Мо́ре безбо́жия изсуши́л еси́, всему́дре, исто́чник жи́зни источа́яй, уче́ния преподо́бная, ны́не же чуде́с ту́чами омыва́еши страсте́й вся́кое злосмра́дие.

Припев: Священномучениче Фоко, моли́ Бо́га о нас.

Взя́тся на дре́ве, лю́те раздробля́емь и изчленя́емь, блаже́нне, и гла́с с высоты́, тя́ укрепля́ющий, внуши́л еси́, священнонача́льниче и му́чениче многострада́льне.

Сла́ва Отцу́ и Сы́ну и Свято́му Ду́ху:

Стра́сти Безстра́стнаго, Фо́ко, уподо́бився, врачу́еши стра́сти разли́чныя и избавля́еши бу́ри и треволне́ния пла́вающих, к Бо́гу боже́ственными твои́ми моли́твами.

И ны́не и при́сно и во ве́ки веко́в. Ами́нь.

Богородичен: Яко ту́ча, спаси́тельное Сло́во истощи́ся в нетле́нную Твою́ утро́бу, всесвята́я Отрокови́це, и зло́бныя пото́ки Боже́ственною си́лою изсуши́.

Конда́к священному́ченика, гла́с 6.

Яко архиере́й принося́, о́тче, же́ртвы, на коне́ц себе́ прине́сл еси́ же́ртву живу́ю, свиде́тельствовав зако́нно о Христе́ Бо́зе, от Ангел укрепля́емь и сме́рть изволя́я, сы́й с вопию́щими тебе́: прииди́, Фо́ко, с на́ми, и никто́же на ны́.

Икос:

Жи́зни на небесе́х жела́ющии, сла́дость на земли́ попира́юще, устне́ очи́стим и язы́ки уясни́м на пе́ния и благохвале́ния, я́ко да исплете́м досто́йно Фо́ке иера́рху. До небе́сных бо вра́т вше́д, невозбра́нно обре́те во вну́тренняя ше́ствие и зри́т Жела́емаго, от Ангелов Сла́вимаго, отту́ду бо и мо́жет на́м уми́лостивити Еди́наго Благосе́рдаго душе́вным неду́гом, я́ко свиде́тельствовав о Не́м. Воспева́ем у́бо ему́ и вопие́м: призира́я на ны́, прииди́, Фо́ко, с на́ми, и никто́же на ны́.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Священномучениче Фоко, моли́ Бо́га о нас.

Ярости мучи́телей не устраши́лся еси́, сла́вне, па́стве же предста́тельствуя слове́сней, я́ко а́гнец, прине́слся еси́ Первопа́стырю Христу́, му́ченически, Фо́ко, прославля́емь.

Припев: Священномучениче Фоко, моли́ Бо́га о нас.

Искуше́н бы́л еси́, я́ко зла́то в горни́ле, му́чениче, посреде́ вве́ржен ва́пна пламенови́днаго и ника́коже опаля́емь, — благослове́н еси́, Бо́же мо́й, — взыва́я, — в хра́ме сла́вы Твоея́, Го́споди.

Сла́ва Отцу́ и Сы́ну и Свято́му Ду́ху:

Боже́ственная любо́вь, распаля́ющи се́рдце твое́, Боже́ственною росо́ю тя́, сла́вне, сохрани́ во огни́ неизнуря́ема, безбо́жия же, иера́рше, ти́ну сожига́юща.

И ны́не и при́сно и во ве́ки веко́в. Ами́нь.

Богородичен: Согни́вший души́ моея́ до́м, Пречи́стая Отрокови́це, покая́ния о́бразы, я́ко Блага́я, обнови́, Яже все́ челове́чество Рождество́м Твои́м обнови́вшая.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Священномучениче Фоко, моли́ Бо́га о нас.

Благода́ть во уста́ твоя́, му́дре Фо́ко, излия́ся, те́м обрати́л еси́ блудя́щия лю́ди зми́я сове́том и приве́л еси́, я́коже па́стырь и́стинный, Христу́ зову́щия: благослови́те, вся́ дела́ Госпо́дня, Го́спода.

Припев: Священномучениче Фоко, моли́ Бо́га о нас.

Неусы́пна и́мать тя́, му́дре, ве́рных собо́р моли́твенника, утоля́юща мо́ря во́лны свере́пыя, напа́сти же укроща́юща и лю́тых вся́ческих на́с избавля́юща, вопию́щия: благослови́те, вся́ дела́ Госпо́дня, Го́спода.

Припев: Священномучениче Фоко, моли́ Бо́га о нас.

Струи́ целе́ний хра́м тво́й тре́бующим то́чит всегда́, приста́нище явля́яся нево́лненное и страсте́й отгони́тельное тебе́ почита́ющим и Христу́, му́чениче, зову́щим: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Да твою́ честву́ем честну́ю, Фо́ко, па́мять, торжеству́юще, преблага́го Го́спода умоли́ усе́рднейше, избавле́ние неудо́бных на́м дарова́ти, вопию́щим: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Зако́нныя Тя́ прообража́ху ковче́г и ста́мна, иму́щая ма́нну, Пречи́стая, Боже́ственная трапе́за, па́ки же и све́щник златоза́рный, во открове́ние язы́ков Све́т поро́ждшую, просвеща́ющий богозна́нием земны́я концы́.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Священномучениче Фоко, моли́ Бо́га о нас.

Священносло́вии боже́ственными, свяще́ннаго, прииди́те, па́стыря вси́ всесвяще́нную па́мять свяще́ннейше торжеству́ем, благоде́телю Бо́гу за ны́ моля́щаго.

Припев: Священномучениче Фоко, моли́ Бо́га о нас.

Яви́лся еси́ распаля́емь ре́вностию Влады́ки, егда́, му́чениче, в ба́ню разжже́нную вше́л еси́, в не́йже ду́х тво́й в Бо́жии ру́це веселя́ся, му́чениче, пре́дал еси́.

Припев: Священномучениче Фоко, моли́ Бо́га о нас.

Тя́ иера́рхов ли́ки, и му́чеников собра́ния, и свяще́нных апо́столов соводворе́ние, все́х же пра́ведных, му́чениче Фо́ко, ду́си, иму́ще посреде́ себе́, веселя́тся.

Сла́ва Отцу́ и Сы́ну и Свято́му Ду́ху:

Простре́ся в ми́ре па́мять твоя́, ду́ши просвеща́ющи благохва́лящих ве́рою по́двиги твоя́, и боре́ния, и до́блественное страда́ние, па́стырю и му́чениче досточу́дне.

И ны́не и при́сно и во ве́ки веко́в. Ами́нь.

Богородичен: Просвети́, Чи́стая, ду́шу мою́, омраче́нную грехо́м, и ве́чнующаго мя́ пла́мене и тмы́ изба́ви хода́тайством Твои́м, да Твое́, ра́дуяся, восхваля́ю вели́чество.

Свети́лен священному́ченика.

Архиере́ев сла́ва и ни́щих защи́тник ты́ показа́лся еси́, богому́дре о́тче, и сто́лп доброде́телей, те́м помина́й все́х пою́щих тя́, Фо́ко.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, священномучениче Фоко, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.