4 октября
Канон Святителю Димитрию, митрополиту Ростовскому, новому чудотворцу.
![Святителю Димитрию, митрополиту Ростовскому Святителю Димитрию, митрополиту Ростовскому](img_i/014.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь свята́го, гла́с 8:
Правосла́вия ревни́телю и раско́ла искорени́телю, Росси́йский целе́бниче и но́вый к Бо́гу моли́твенниче, списа́ньми твои́ми все́х уцелому́дрил еси́. Цевни́це духо́вная, Дими́трие блаже́нне, моли́ Христа́ Бо́га спасти́ся всему́ насле́дию и держа́ве Его́.
Стихи́ра, гла́с 6:
Излия́ся благода́ть во устна́х твои́х, святи́телю Дими́трие, уче́нми бо твои́ми Це́рковь украси́л еси́, и́стину Правосла́вия уясни́л, па́губное же раско́лническое мудрова́ние посрами́л еси́. Те́м я́коже в житии́, та́ко по отше́ствии твое́м потщи́ся, да поне́ чудесы́ твои́ми уверя́еми, прии́дут в чу́вство и просла́вят ку́пно с на́ми Триипоста́снаго Бо́га от на́с исходя́щии, но не от на́с су́щии.
Кано́н святи́телю Дими́трию, гла́с 6.
Пе́снь 1.
Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.
Припев: Святителю отче Димитрие, моли́ Бо́га о нас.
Го́рдому фарао́ну в ожесточе́нии уподо́бихся и того́ потопле́нию за нераска́яние подпадо́х, но ты́, святы́й Дими́трие, путеводи́тель ми́ бу́ди к покая́нию, я́ко да и а́з от Христа́ получу́ вхо́д в Зе́млю Обетова́нную.
Припев: Святителю отче Димитрие, моли́ Бо́га о нас.
Ни себе́ пощади́х, ни бли́жняго поми́ловах, но при́сно чре́ву, я́ко на Еги́пет, рабо́тая, и са́м истаева́ю гла́дом и жа́ждею, и други́м от крупи́ц па́дающих насыща́тися возбраня́ю. Сего́ ра́ди к тебе́, па́стырю до́брый Дими́трие, истаева́емый, прибего́х, да напита́еши мя́, а́ки ма́нною, словесы́ твои́ми и напои́ши мя́ слеза́ми умиле́ния.
Сла́ва Отцу́ и Сы́ну и Свято́му Ду́ху:
Уты́х, утолсте́х, забы́х Тя́, Бо́га, спаса́ющаго мя́, тя́жко бо уши́ма слы́шу и се́рдцем разуме́ю, а́ще и призыва́еши мя́ к Себе́ чрез зако́н и проро́ки. Те́мже, о Тво́рче и Изба́вителю мо́й! житие́м и уче́нием уго́дника Твоего́ Дими́трия испра́ви и спаси́ мя.
И ны́не и при́сно и во ве́ки веко́в. Ами́нь.
Богородичен: Ка́я по́льза в кро́ви мое́й, внегда́ сходи́ти ми́ во истле́ние? или́ что́ приложи́тся мне́, а́ще и ве́сь ми́р приобря́щу, ду́шу же погублю́? Но Ты́, Влады́чице, помози́ мне́, да получу́ от Христа́ Спа́са Твоего́ проще́ние грехо́в и жи́знь ве́чную.
Пе́снь 3.
Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.
Припев: Святителю отче Димитрие, моли́ Бо́га о нас.
Утверди́ся се́рдце мое́ в памятозло́бии, разшири́шася уста́ моя́ на сме́хи и осужде́ния, возвесели́хся о паде́нии бли́жняго моего́, уче́нию же твоему́ богоуго́дному, святи́телю, ни ма́ло внима́х. Поне́ у́бо чудесы́ твои́ми премени́ мя отсе́ле и сотвори́ подража́теля житию́ твоему́.
Припев: Святителю отче Димитрие, моли́ Бо́га о нас.
Ины́я страны́ хва́лятся прему́дростию свое́ю, други́я си́лою и бога́тством, мы́ же похваля́емся многоцеле́бными святы́х Бо́жиих и твои́ми мощми́, чудотво́рче Дими́трие, от ни́хже получа́ем телесе́м здра́вие и душа́м на́шим спаси́тельное врачева́ние.
Сла́ва Отцу́ и Сы́ну и Свято́му Ду́ху:
Дая́й моли́тву моля́щимся и благословля́яй в ле́та на́ша па́мять пра́ведника Твоего́, Дими́трия, пода́ждь моли́твами того́ кре́пость, Го́споди.
И ны́не и при́сно и во ве́ки веко́в. Ами́нь.
Богородичен: Взбра́нная Победи́тельнице и кре́пкая во искуше́ниях на́ших Засту́пнице, не пре́зри гре́х ра́ди на́ших ускори́ти на по́мощь, и от бе́д изба́вити на́с, еди́на Чи́стая, еди́на Благослове́нная.
Седа́лен, гла́с 8:
Дре́вних преподо́бию подража́я, освяти́л еси́ житие́ твое́ на слу́жбу Бо́гови в осмоена́десять ле́то. Отне́леже и бы́л еси́ вели́к мона́х, свяще́нник, учи́тель, иера́рх, ны́не же чудотво́рец, и моли́твенник о душа́х на́ших.
Сла́ва, и ны́не богоро́дичен, гла́с то́йже.
Златокова́нный киво́т вмеща́ше в себе́ дре́вле богопи́санный зако́н и небе́сную ма́нну. Ты́ же, Богороди́тельнице, заче́нши, пло́тию Сы́на Бо́жия родила́ еси́ во обновле́ние и спасе́ние ду́ш на́ших.
Пе́снь 4.
Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.
Припев: Святителю отче Димитрие, моли́ Бо́га о нас.
Позна́ во́л я́сли го́спода своего́ и осе́л стяжа́вшаго его́, а́з же безслове́сными страстми́ удали́хся от Творца́ моего́, но ты́, па́стырю благи́й Дими́трие, я́ко овча́ заблу́ждшее, взыщи́ мене́ и Христо́ву ста́ду сопричти́ мя.
Припев: Святителю отче Димитрие, моли́ Бо́га о нас.
Удо́бее от те́рния собира́ти виногра́дное гро́здие и от ре́пия смоко́вие, не́же от жесто́каго моего́ се́рдца приноси́ти еле́й милосе́рдия. Сего́ ра́ди, де́лателю виногра́да Христо́ва Дими́трие, огради́ мя стра́хом Госпо́дним и напо́й мя́ водо́ю умиле́ния.
Сла́ва Отцу́ и Сы́ну и Свято́му Ду́ху:
Сия́я со́лнце Свое́ на благи́я и дождя́ на пра́ведныя, да и вла́с главы́ моея́ не поги́бнет, храни́ши мя́, гре́шнаго. Вся́ стихи́и мене́ ра́ди зла́го ста́ша в чи́не свое́м, а́з еди́н то́чию пребыва́ю в нечу́вствии. Но да́ждь ми́, Го́споди, уго́дника ра́ди Твоего́ Дими́трия разуме́ти дела́ Твоя́, и слы́ша слу́х Тво́й, боя́тися Тебе́.
И ны́не и при́сно и во ве́ки веко́в. Ами́нь.
Богородичен: Внегда́ прибли́житися ле́том воплоще́нию, посреде́ двою́ живо́тну позна́н бы́сть. Внегда́ приити́ вре́мени ко спасе́нию, посреде́ двою́ разбо́йнику яви́ся Сы́н Тво́й, Богоро́дице. Непостижи́мо во обои́х си́х Сло́во, да мы́, воплоще́нному и пострада́вшему за ны́ покланя́ющеся Сло́ву, Тя́, Ма́терь Бо́жию, в пе́снех возвели́чим.
Пе́снь 5
Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.
Припев: Святителю отче Димитрие, моли́ Бо́га о нас.
Свети́льник нога́ма мои́ма зако́н Госпо́день, и све́т стезя́м мои́м оправда́ния Его́, а́з же, во тме́ неве́дения ползя́ и толки́йся, не хощу́ с му́дрыми свети́лника стяжа́ти. Но ты́ мне́, светоявле́нне Дими́трие, невестоводи́тель предста́ни, я́ко да и а́з ду́хом к Бо́гу от но́щи у́треневати потщу́ся.
Припев: Святителю отче Димитрие, моли́ Бо́га о нас.
Боле́зную те́лом, боле́зную и душе́ю: о́вому я́ко досади́х объяде́нием и пия́нством, о́ву же я́ко разсла́бих греха́ми. Сугу́ба боле́знь и тяжка́, но ты́, но́вый чудотво́рче, умоли́ Врача́ все́х, да обоя́ исцели́ти благоизво́лит.
Сла́ва Отцу́ и Сы́ну и Свято́му Ду́ху:
Го́споди Бо́же на́ш, да́ждь на́м ми́р во дне́х на́ших, Го́споди Бо́же на́ш, стяжи́ в на́с любо́вь, да вси́ еди́ными усты́ и еди́ным се́рдцем испове́дуем Еди́наго Тя́ в Тро́ице сла́вимаго Бо́га.
И ны́не и при́сно и во ве́ки веко́в. Ами́нь.
Богородичен: Стра́ха Госпо́дня во чре́ве не прия́х, ни се́рдцем о нераде́нии поболе́х, но, при́сно зачина́я и ражда́я грехи́ ко грехо́м, от умноже́ния те́х со́вестию снеда́юся. Сего́ ра́ди в многопло́дии се́м беззако́нном к Тебе́, Влады́чице, вопию́: сотвори́ мя́ возроди́тися в живо́т ве́чный покая́нием.
Пе́снь 6.
Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.
Припев: Святителю отче Димитрие, моли́ Бо́га о нас.
От ки́та Ио́ну, от бла́та же е́зернаго тебе́, святи́телю Дими́трие, изведе́ Госпо́дь на све́т, о́в тридне́вен во утро́бе не вреди́ся, ты́ же четыредесятоле́тен неистле́нен в не́дрех земны́х пребы́л еси́. Ве́лие чу́до! Но бо́лше дарова́ние Бо́жие, и́бо тя́ чудесы́, я́ко проро́ка, просла́ви.
Припев: Святителю отче Димитрие, моли́ Бо́га о нас.
Дре́внии о́нии ниневи́тяне, неве́рнии язы́цы су́ще, еди́ною проро́ческою про́поведию пока́ялися. Аз же, толи́ко наставле́ний боже́ственных име́я и по вся́ дни́ что́мая слу́шая, неиспра́вен пребыва́ю, но ты́, святи́телю, моли́твами твои́ми к де́ланию си́х наста́ви мя́.
Сла́ва Отцу́ и Сы́ну и Свято́му Ду́ху:
Бе́здна грехо́в после́дняя обы́де мя́, и треволне́ние страсте́й погружа́ет мя́. Те́м, до́ндеже не понре́ душа́ моя́ во а́де, к Тебе́, Го́споду Бо́гу, от ско́рби вопию́, да пра́ведника Твоего́ ра́ди Дими́трия услы́шиши и спасе́ши мя́.
И ны́не и при́сно и во ве́ки веко́в. Ами́нь.
Богородичен: Ско́рая в беда́х Помо́щнице, гото́вое обурева́емым приста́нище, сохрани́ мя, Ма́ти Бо́жия, от потопле́ния жите́йскаго и не да́ждь ми́ разби́тися о ка́мень па́губы душе́вныя.
Конда́к, гла́с 8:
Звезду́ Росси́йскую, от Ки́ева возсия́вшую и чрез Но́вград Се́верский в Росто́в дости́гшую, всю́ же страну́ сию́ уче́нми и чудесы́ озари́вшую, ублажи́м златослове́снаго учи́теля Дими́трия, то́й бо все́м вся́ написа́, я́же к наставле́нию, да все́х приобря́щет, я́коже Па́вел Христу́, и спасе́т правове́рием ду́ши на́ша.
Икос:
Пра́ведным о ка́ющихся на небеси́, на́м же, гре́шным, на земли́, о тебе́, пра́ведниче Дими́трие, подоба́ет возра́доватися, я́ко но́ваго тя́ к Бо́гу моли́твенника о на́с стяжа́хом. Его́же досто́йными похвала́ми ублажа́юще, си́це от ра́дости зове́м: ра́дуйся, Росто́вская похвало́ и всея́ Росси́и прославле́ние.
Пе́снь 7.
Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.
Припев: Святителю отче Димитрие, моли́ Бо́га о нас.
Якоже трие́ о́троцы в пещи́ вавило́нстей о́гненную си́лу угаси́ша моли́твою, та́ко ты́, богоявле́нне Дими́трие, возни́кший о́гнь в саможего́мых ски́тах уче́нми твои́ми потреби́л еси́. Отню́дуже тя́ за спасе́ние ду́ш погиба́ющих Госпо́дь просла́ви чудесы́ и нетле́нием, мы́ же святоле́пными пе́сньми ублажа́ем.
Припев: Святителю отче Димитрие, моли́ Бо́га о нас.
О, коли́ких бла́г, окая́ннии, лиши́стеся, раско́лницы: ни священнонача́лника бо и́мате, ни вождя́ и́стиннаго ко спасе́нию, ниже́ Безкро́вныя Же́ртвы, ниже́ други́х та́инств сподобля́етеся. Но поне́ ны́не позна́йте па́губное свое́ заблужде́ние, и а́ще дело́м и уче́нию ангелоподо́бнаго Дими́трия не ве́рите, то чудеса́м, от него́ быва́емым, я́коже халде́и о́нии, ве́руйте, да с на́ми ку́пно еди́ными усты́ помо́литеся Бо́гу оте́ц на́ших.
Сла́ва Отцу́ и Сы́ну и Свято́му Ду́ху:
Вои́стину, Бо́же на́ш, Ты́ еси́ еди́н Бо́г бого́в и Госпо́дь господе́й и ра́зве Тебе́ ина́го и Твоея́ Святы́я Собо́рныя Це́ркве не́сть ни на небеси́, ни на земли́, иде́же подоба́ет спасти́ся. Сего́ ра́ди да́ждь на́м еди́ными усты́ и еди́ным се́рдцем удивля́ющаго вся́ хоте́ния Своя́ во святы́х, Тебе́ сла́вити.
И ны́не и при́сно и во ве́ки веко́в. Ами́нь.
Богородичен: Прови́дец Дании́л усмотри́ Тя́ го́ру, Неискусому́жная Де́во, приснопа́мятный же во святы́х на́ш Дими́трий, я́коже Гедео́н — Руно́ Ороше́нное Тя́ нарече́. Мы́ же, обоя́ испове́дающе, про́сим: да на отто́ргшемся от Тебе́ Ка́мени — Христе́, утвержда́ется Це́рковь и правове́рующих сердца́ росо́ю благода́ти Твоея́ напая́ются.
Пе́снь 8.
Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.
Припев: Святителю отче Димитрие, моли́ Бо́га о нас.
Вся́ сре́дства, святи́телю, на взыска́ние заблу́ждших употреби́л еси́, разлива́ющийся пла́мень по ски́там водо́ю покая́ния погаша́я, море́лщиков к Безсме́ртной Трапе́зе призыва́я, просвеще́нных же и отпа́дших, да не второ́е крестя́щеся па́ки распина́ют Христа́, еди́наго держа́тися креще́ния утвержда́л еси́. Все́х повсю́ду правове́рию учи́л еси́, и ны́не свои́ми списа́нми тому́жде учи́ши. Те́м я́ко и́стиннаго учи́теля во святы́х почита́ем тя́.
Припев: Святителю отче Димитрие, моли́ Бо́га о нас.
Дре́вним о́ным вавило́нским столпотвори́телем врази́ на́шего благоче́стия уподо́блшеся, дерзну́ша неразу́мия своего́ то́лки на песце́ суеве́рия назда́ти. Имже егда́ опро́шася уче́ний твои́х во́ды, святи́телю, а́бие поколеба́шася во основа́нии, и бы́сть и́м паде́ние ве́лие, на́м же, благочести́вым — подкрепле́ние и исправле́ние.
Сла́ва Отцу́ и Сы́ну и Свято́му Ду́ху:
Безнача́лне Отче, Сы́не Собезнача́льне, Уте́шителю Благи́й Ду́ше Пра́вый; Сло́ва Бо́жия Роди́телю, Отца́ Безнача́лна Сло́ве, Ду́ше Живы́й и Зи́ждяй: Тро́ице Еди́нице, поми́луй мя́.
И ны́не и при́сно и во ве́ки веко́в. Ами́нь.
Богородичен: Якоже купина́, огне́м распаля́ема, сама́ не сгара́ше, но богови́дца, устраши́в, приведе́ к почита́нию, та́ко Ты́, Неискусобра́чная Неве́сто, прие́мши во утро́бу Огнь Божества́, нетле́нна в Рождестве́ пребыла́ еси́. Ди́вное та́инство! Непоко́рников благоче́стию стыдо́м опаля́еши, почита́телей же правове́рных ороша́еши чудесы́ изоби́лно.
Песнь 9
Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.
Припев: Святителю отче Димитрие, моли́ Бо́га о нас.
Благослове́н Госпо́дь на́ш, я́ко посети́ на́с в ле́та сия́ и воздви́же на́м в Правосла́вно-Росси́йской Це́ркви но́ваго чудотво́рца Дими́трия. Якоже бо во дни́ живота́ своего́ служа́ше преподо́бием и пра́вдою, та́ко и по кончи́не подае́т ра́зум заблу́ждшим ко взыска́нию путе́й спаси́тельных.
Припев: Святителю отче Димитрие, моли́ Бо́га о нас.
Сла́ва Тебе́, Пастыренача́льниче, я́ко и во дни́ на́ша поста́вил еси́ на стра́жи бо́драго па́стыря Дими́трия, и́мже прогоня́ются посмра́дшия ко́злища ста́до Твое́ непоро́чное.
Сла́ва Отцу́ и Сы́ну и Свято́му Ду́ху:
Сла́ва Тебе́, Христе́ Бо́же, благочести́вым похвало́ и правове́рным весе́лие, я́ко пропове́дание свята́го Твоего́ Дими́трия достове́рными чудесы́ утвержда́еши.
И ны́не и при́сно и во ве́ки веко́в. Ами́нь.
Богородичен: Ра́дость от Ангела прии́мшей, и мы́, по прорече́нию Твоему́ ублажа́юще со все́ми ро́ды, ева́нгельски вопие́м: ра́дуйся, Благода́тная, Госпо́дь с Тобо́ю.
Свети́лен, гла́с 8:
Поставля́яй преде́лы язы́ков по числу́ Ангел Свои́х, и собира́яй от разсе́янных сыно́в Ада́млих Це́рковь Свою́, умножа́еши в не́й святы́я Твоя́, Бо́же на́ш, я́ко зве́зды на небеси́, от ни́хже просия́ и па́мять святи́теля Твоего́ Дими́трия. Его́же ра́ди просвети́ ду́ши, помраче́нныя раздо́рным суеве́рием, да вку́пе зове́м Ти́ пе́снь трегу́бую: аллилу́ия.
Молитва святителю Димитрию, митрополиту Ростовскому
О, всеблаже́нный святи́телю Дими́трие, вели́кий уго́дниче Христо́в, Златоу́сте Росси́йский, услы́ши нас гре́шных, моля́щихся тебе́, и принеси́ моли́тву на́шу к Ми́лостивому и Человеколю́бцу Бо́гу, Ему́же ты ны́не в ра́дости святы́х и с ли́ки А́нгелы предстои́ши! Умоли́ Его́ благоутро́бие, да не осу́дит нас по беззако́ниям на́шим, но да сотвори́т с на́ми по ми́лости Свое́й. Испроси́ нам у Христа́ и Бо́га на́шего ми́рное и безмяте́жное житие́, здра́вие душе́вное и теле́сное, земли́ благопло́дие и во всем вся́кое изоби́лие и благоде́нствие, и да не во зло обрати́м блага́я, да́руемая нам от Ще́дрого Бо́га, но в сла́ву Его́ и в прославле́ние твоего́ заступле́ния. Да́руй нам богоуго́дно прейти́ по́прище вре́менныя жи́зни; изба́ви нас возду́шных мыта́рств и наста́ви нас на путь, веду́щий в селе́ния пра́ведных, иде́же пра́зднующих глас непреста́нный, зря́щих Бо́жия лица́ неизрече́нную добро́ту. Це́рковь же Святу́ю от раско́лов и ересе́й сохрани́, ве́рных укрепи́, заблужда́ющих обрати́ и всем да́руй вся, я́же ко спасе́нию и сла́ве Бо́жией подоба́ющая; Оте́чество твое́ сохрани́ от враго́в ненаве́тно, но побора́й ору́жие Крестоно́снаго во́инства; и пода́ждь нам всем твое́ архипа́стырское и свято́е благослове́ние, да о́ным осеня́еми, изба́вимся от ко́зней лука́ваго и избе́гнем от вся́кия беды́ и напа́сти. Услы́ши моле́ние на́ше, о́тче Дими́трие, и моли́ непреста́нно о нас Всеси́льнаго Бо́га, сла́вимаго и поклоня́емаго в Трие́х Ипоста́сех, Ему́же подоба́ет вся́кая сла́ва, честь и держа́ва во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святителю Димитрию, митрополиту Ростовскому Святителю Димитрию, митрополиту Ростовскому](img_b/014.jpg)