3 октября.
Канон преподобному и благоверному князю Олегу Брянскому
![Преподобному и благоверному князю Олегу Брянскому Преподобному и благоверному князю Олегу Брянскому](img_i/012.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, глас 8:
От ю́ности возлюби́в Христа́ всем се́рдцем, преподо́бне,/ сла́ву земну́ю, я́ко преходя́щу, оста́вил еси́,/ и ца́рство земно́е в ничто́же вмени́в,/ ли́ку и́нок ра́достно приче́лся еси́,/ и труды́ мно́гими град Брянск, а́ки со́лнце, пресве́тло озари́л еси́:/ тем, быв Тро́ицы украше́ние,/ моли́, кня́же Оле́же, Христа́ Бо́га,// спасти́ся душа́м на́шим.
Ин тропа́рь, глас то́йже:
От ю́ности Христа́ возлюби́в всем се́рдцем, преподо́бне,/ сла́ву земну́ю, я́ко преходя́щу, оста́вил еси́/ и, ца́рство земно́е ни во что́же вмени́в,/ ли́ку и́ноческому ра́достно приобщи́лся еси́/ и, мно́гими по́двиги благода́ть Свята́го Ду́ха стяжа́в,/ град Брянск, а́ки со́лнце, пресве́тло озари́л еси́./ Те́мже моли́, кня́же Оле́же, Христа́ Бо́га,// спасти́ся душа́м на́шим.
Велича́ние:
Ублажа́ем тя,/ преподо́бне благове́рне кня́же Оле́же,/ и чтим святу́ю па́мять твою́,/ наста́вниче мона́хов// и собесе́дниче А́нгелов.
Стихи́ра, глас 6:
Я́ко до́браго дре́ва князе́й Ру́сских благи́й плод,/ преподо́бне кня́же Оле́же,/ стопа́м святы́х сро́дник твои́х после́довал еси́,/ в княже́нии благове́рие соблюда́я,/ во и́ночестве доброде́тельми чистоту́ души́ явля́я,/ сего́ ра́ди, я́ко и́маши дерзнове́ние ко Христу́ Бо́гу,/ моли́ дарова́ти Оте́честву на́шему мир// и душа́м на́шим ве́лию ми́лость.
Кано́н свята́го, глас 4.
Песнь 1
Ирмос: Мо́ря че́рмную пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма,// Амали́кову си́лу в пусты́ни победи́л есть.
Припе́в: Святы́й благове́рный кня́же Оле́же, моли́ Бо́га о нас.
Засту́пника те́плаго Бря́нския земли́, князе́й похвалу́ и мона́хов удобре́ние, преподо́бнаго Оле́га воспои́м, той бо си́лою Креста́ стра́сти и безпло́тныя враги́ победи́л есть.
Припе́в: Святы́й благове́рный кня́же Оле́же, моли́ Бо́га о нас.
А́нгельски на земли́ пожи́л еси́, кня́же Оле́же, блага́го ко́рене князе́й Черни́говских добропло́дная о́трасль быв, и я́ко воево́да Небе́снаго Царя́, Оте́чество на́ше ны́не огражда́еши.
Сла́ва Отцу́ и Сы́ну и Свято́му Ду́ху:
Смире́нию Царя́ ца́рствующих подража́я, власть и честь, сла́ву и бога́тство Христа́ ра́ди во уме́ты вмени́л еси́, и слеза́ми по́стническими велиа́рову горды́ню потопи́л еси́.
И ны́не и при́сно и во ве́ки веко́в. Ами́нь.
Богородичен: Твоего́ Пече́рскаго о́браза в преде́лы Бря́нския пренесе́ние ве́дая и роди́теля своего́ от слепоты́ исцеле́ние зря, князь Оле́г воспева́ше благода́ть Твою́, Пречи́стая.
Песнь 3
Ирмос: Весе́лится о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,// и прибе́жище, и утвержде́ние.
Припе́в: Святы́й благове́рный кня́же Оле́же, моли́ Бо́га о нас.
Утверди́л еси́ зе́млю и лю́ди твоя́ в ве́ре правосла́вней, преподо́бне, княже́нием благозако́нным и по́двиги мона́шескими.
Припе́в: Святы́й благове́рный кня́же Оле́же, моли́ Бо́га о нас.
Пе́рвую в земли́ Бря́нстей оби́тель основа́л еси́, свя́те Оле́же, я́ко ка́мень краеуго́льный ве́ры, во и́мя апо́стол первоверхо́вных.
Сла́ва Отцу́ и Сы́ну и Свято́му Ду́ху:
Ни́вы новонасажде́нныя де́латель усе́рдный яви́лся еси́, блаже́нне, те́мже доны́не плода́ми трудо́в твои́х освяща́емся.
И ны́не и при́сно и во ве́ки веко́в. Ами́нь.
Богородичен: И́сточник исцеле́ний близ Све́ны реки́ откры́ся чудотво́рная ико́на Богома́тере. Ея́же благода́тию укрепля́емь, князь Оле́г мир коне́чне оста́вил есть.
Седа́лен свята́го, глас 8:
Смиренному́дренно ца́рства земна́го удали́выйся, во и́ноцех тезоиме́нством ца́рским нарече́н был еси́, кня́же Оле́же, во зна́мение угото́ваннаго ти Небе́снаго Ца́рствия, иде́же ны́не, я́ко ца́рское свяще́ние, доброде́тели возвеща́еши Христа́ Бо́га, Призва́вшаго тя в чу́дный Свой свет.
Песнь 4
Ирмос: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.
Припе́в: Святы́й благове́рный кня́же Оле́же, моли́ Бо́га о нас.
Крест свой взем, себе́ и ми́ра отве́рглся еси́, преподо́бне, и вся ко́зни вра́жия си́лою возлюби́вшаго тя Христа́ победи́л еси́.
Припе́в: Святы́й благове́рный кня́же Оле́же, моли́ Бо́га о нас.
Ага́рян дре́вле и злове́рных нахожде́ние па́че меча́ моли́твою отража́л еси́, и ны́не Оте́чество на́ше от злых заступле́нием твои́м изба́ви.
Сла́ва Отцу́ и Сы́ну и Свято́му Ду́ху:
Земля́ Бря́нская красу́ется дре́вом, тобо́ю насажде́нным при исхо́дищих вод Правосла́вия, пита́ющим нас и покрыва́ющим.
И ны́не и при́сно и во ве́ки веко́в. Ами́нь.
Богородичен: Егда́ и́ноцы созда́нныя тобо́ю, кня́же, святы́я оби́тели принесо́ша от Ки́ева ико́ну Пречи́стыя, тогда́ си́ла Ея́ в чудесе́х яви́ся.
Пе́снь 5
Ирмос: Ты, Го́споди мой,/ Свет в мир прише́л еси́,/ Свет Святы́й, обраща́яй из мра́чна неве́дения// ве́рою воспева́ющия Тя.
Припе́в: Святы́й благове́рный кня́же Оле́же, моли́ Бо́га о нас.
Меч Бо́жий обоюдуо́стрый имену́ем тя, свя́те, душевре́дная бо посека́еши: в княже́нии благове́рием, во и́ночестве же преподо́бием.
Припе́в: Святы́й благове́рный кня́же Оле́же, моли́ Бо́га о нас.
Лице́ твое́ в час кончи́ны просвети́ся, богоблаже́нне Оле́же, и я́ко благи́й раб и ве́рный в ра́дость Го́спода твоего́ вшел еси́.
Сла́ва Отцу́ и Сы́ну и Свято́му Ду́ху:
Избавля́еши от бед в нощи́ грехо́вней блужда́ющих, свя́тче, не́ба церко́внаго кро́ткая звездо́ и к Све́ту Невече́рнему путеводи́телю.
И ны́не и при́сно и во ве́ки веко́в. Ами́нь.
Богородичен: Благослове́нная Влады́чице, просвети́ нас све́том Сы́на Твоего́, я́коже дре́вле о́чи благове́рнаго кня́зя Рома́на.
Песнь 6
Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости из ребр Твои́х// исте́кшею Кро́вию.
Припе́в: Святы́й благове́рный кня́же Оле́же, моли́ Бо́га о нас.
Ру́сская Це́рковь днесь всех созыва́ет к похвале́ уго́дника Христо́ва, преподо́бнаго кня́зя Оле́га, от земли́ Бря́нския Оте́честву на́шему возсия́вшаго.
Припе́в: Святы́й благове́рный кня́же Оле́же, моли́ Бо́га о нас.
Яви́лся еси́, преподо́бне Оле́же, правосла́вныя ве́ры пра́вило, мона́хом о́браз, лю́дем предста́тель те́плый, гра́ду и оби́тели твое́й огражде́ние.
Сла́ва Отцу́ и Сы́ну и Свято́му Ду́ху:
Насле́дие Небе́сное и чуде́с благода́ть, воздая́ние от Бо́га прия́л еси́, свя́те Оле́же, те́мже не преста́й ми́лостивно посеща́ти тя почита́ющия.
И ны́не и при́сно и во ве́ки веко́в. Ами́нь.
Богородичен: Све́нския ико́ны Богома́тере явле́ние чу́дное ви́дев, бла́же, ку́пно со отце́м твои́м, освяще́нным собо́ром и людьми́ мно́гими благодаре́ние Бо́гу возсыла́ше.
Конда́к, глас 2:
Засту́пниче те́плый Бря́нския земли́,/ преподо́бне кня́же Оле́же,/ ку́пно со святы́ми сро́дники твои́ми/ Престо́лу Бо́жию ны́не предстоя́,/ моли́твами твои́ми Правосла́вие утверди́,/ е́реси и раско́лы разори́,/ Оте́честву на́шему мир// и душа́м на́шим поле́зная испроси́.
И́кос:
Отве́рзи честна́я уста́ твоя́, Оле́же благоро́дне, и та́йно глаго́ли во ушеса́ серде́ц на́ших: ка́ко, трудо́м равноапо́стольнаго Влади́мира ревну́я, оби́тель первоверхо́вных апо́стол во гра́де Бря́нске основа́л еси́? Ка́ко, Нико́ле Свято́ши и И́горю страстоте́рпцу подо́бяся, ми́ра отве́рглся еси́? Ка́ко, после́дуя пра́деду Михаи́лу, безкро́вное му́ченичество в по́двизех мона́шеских восприя́л еси́ и благоче́стие роди́теля твоего́ насле́довал еси́? О цве́те кра́сный дре́ва вели́каго князе́й Ру́сских! Моли́твами твои́ми Правосла́вие в земли́ на́шей утверди́, е́реси и раско́лы разори́, Оте́честву на́шему мир и душа́м на́шим поле́зная испроси́.
Песнь 7
Ирмос: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:// благослове́н еси́ в хра́ме сла́вы Твоея́, Го́споди.
Припе́в: Святы́й благове́рный кня́же Оле́же, моли́ Бо́га о нас.
Княже́ние и род оста́вил еси́, огне́м любве́ Бо́жия распала́яся и кре́пко подвиза́яся в чи́не мона́шестем, бла́же. Те́мже и ны́не с преподо́бных ли́ки ра́дуешися.
Припе́в: Святы́й благове́рный кня́же Оле́же, моли́ Бо́га о нас.
Изба́витися е́зера о́гненнаго Человеколю́бца Бо́га моли́, преподо́бне, почита́ющим любо́вию святу́ю па́мять твою́ и доброде́телем твои́м подража́ющим.
Сла́ва Отцу́ и Сы́ну и Свято́му Ду́ху:
Я́коже зла́то огне́м, ду́шу и те́ло искуси́в воздержа́нием и моли́твою, преподо́бне, в порфи́ре чистоты́ над страстьми́ водвори́лся еси́.
И ны́не и при́сно и во ве́ки веко́в. Ами́нь.
Богородичен: Вся окре́стныя зе́мли, ели́ка ви́де исцеле́нныма очи́ма князь Рома́н, оби́тели Твое́й, Влады́чице, дарова́, сын же его́ себе́ сама́го в же́ртву Сы́ну Твоему́ принесе́.
Песнь 8
Ирмос: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:// благослови́те, вся дела́ Госпо́дня, Го́спода.
Припе́в: Святы́й благове́рный кня́же Оле́же, моли́ Бо́га о нас.
Ели́ко вели́к в правосла́вном княже́нии был еси́, толи́ко в мона́шестем де́лании смири́л еси́ себе́, преподо́бне Оле́же, те́мже и Бог тя превознесе́ и дарова́ ти чуде́с благода́ть.
Припе́в: Святы́й благове́рный кня́же Оле́же, моли́ Бо́га о нас.
Ре́вность ве́лию показа́л еси́ ко благоче́стию, преизря́ден быв о́браз лю́дем и ученико́м твоим, от младе́нства бо воспита́вся в зако́не Госпо́дни, чрез все житие́ во́лю Бо́жию испо́лнити тща́лся еси́.
Сла́ва Отцу́ и Сы́ну и Свято́му Ду́ху:
Одея́ния ху́дость не омрачи́ де́вственныя красоты́ души́ твоея́, блаже́нне, бде́ние же душе́внеи твои́ о́чи просвети́, и труды́ тя́жцыи плоть твою́ ду́ху покори́ша.
И ны́не и при́сно и во ве́ки веко́в. Ами́нь.
Богородичен: Ю́же дре́вле избра́ла еси́ го́ру в преде́лех Бря́нских во оби́тель и́ноком и о́бразом Твои́м Све́нским освяти́ла еси́, Пренепоро́чная, невреди́му сохрани́, да воспева́ется в ней и́мя Сы́на Твоего́ во ве́ки.
Песнь 9
Ирмос: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся, Христо́с,/ совокупи́вый разстоя́щаяся естества́.// Тем, веселя́щеся, Тя, Богоро́дице, велича́ем.
Припе́в: Святы́й благове́рный кня́же Оле́же, моли́ Бо́га о нас.
Ча́янием бу́дущих благ веселя́ся, те́сным и приско́рбным путе́м ше́ствовал еси́, воздержа́нию же, кро́тости, смире́нию и послуша́нию навы́кнув, ли́ку святы́х совокупи́лся еси́.
Припе́в: Святы́й благове́рный кня́же Оле́же, моли́ Бо́га о нас.
Трудолю́бное по Бо́зе житие́ от ю́ности возлюби́в, преподо́бне кня́же, в ме́ру во́зраста Христо́ва дости́гл еси́ и, яко клас зре́лый, в Небе́сныя жи́тницы пожа́лся еси́.
Сла́ва Отцу́ и Сы́ну и Свято́му Ду́ху:
И́мамы святы́я мо́щи твоя́, богоно́сне кня́же, я́ко сокро́вище неистощи́мое и утеше́ние ве́лие душа́м и телесе́м на́шим, темже тя велича́ем.
И ны́не и при́сно и во ве́ки веко́в. Ами́нь.
Богородичен: Ма́ти Бо́жия Пречи́стая, моли́твами преподо́бнаго кня́зя Оле́га и святы́х сро́дник его́ спаси́ зе́млю Ру́сскую и ве́рныя лю́ди Твоя́ уте́ши, и́же Тя досто́йно велича́ют.
Свети́лен:
У́треневав к Бо́гу вы́ну, тьмы ве́чныя избе́гл еси́, преподо́бне кня́же Оле́же, сего́ ра́ди в час кончи́ны лице́ твое́ просвети́ся, и мо́щи твоя́ честны́я доны́не сия́ют нетле́нием и чудесы́.
Моли́тва
О преподо́бне о́тче, благове́рне кня́же Оле́же, уго́дниче Христо́в усе́рдный, моли́твенниче ко Го́споду те́плый, защи́тниче в беда́х и уте́шителю в печа́лех неуста́нный! Воззри́, преблаже́нне, ми́лостиво на град твой и виждь ча́да твоя́, смире́нно ти припа́дающая и служи́ти тебе́ хотя́щая. Не отве́ржи тре́бующих твоея́ по́мощи, но, я́ко благоде́тель и хода́тай, моли́ при́сно Го́спода и Бо́га и Спа́са на́шего Иису́са Христа́, да благослови́т зе́млю Ру́сскую, в ми́ре и благоде́нствии сохраня́я ю́, гра́ды умножа́я, достоя́ние Свое́ соблюда́я. Вознеси́, богоно́сне о́тче наш, сие́ ма́лое моле́ние ко Влады́це Христу́, да утверди́т во Святе́й Правосла́вней Це́ркви живы́й дух пра́выя ве́ры и любве́, благоче́стие непоколеби́мое, любому́дрие, кро́тостию растворе́нное; да да́рует па́стырем ре́вность попече́ния о спасе́нии люде́й, во е́же неве́рующия просвети́ти, заблу́ждшия наста́вити, отпа́дшия обрати́ти и привлещи́; изря́днее же вся ча́да Це́ркве Правосла́вныя чи́ста да сохрани́т от мирски́х искуше́ний, по́хотей плотски́х, суему́дрия, суеве́рий и наважде́ний вра́жеских.
Ей, уго́дниче Бо́жий, не пре́зри нас, моля́щихся тебе́, но помози́ нам ско́рым предста́тельством твои́м, да, вся́ких бед, напа́стей и скорбе́й в сей жи́зни вре́менней избежа́вше, кончи́ну непосты́дну обря́щем и, та́ко на земли́ богоуго́дно пожи́вше, жи́зни ра́йския на Небеси́ сподо́бимся, иде́же вку́пе с тобо́ю просла́вим человеколю́бие и щедро́ты в Тро́ице сла́вимаго Бо́га, Отца́, и Сы́на, и Свята́го Ду́ха, во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Преподобному и благоверному князю Олегу Брянскому Преподобному и благоверному князю Олегу Брянскому](img_b/012.jpg)