3 октября.

Канон Святым мученикам и исповедникам, благоверному великому князю Михаилу и болярину его Феодору, Черниговским чудотворцам.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Жи́знь ва́шу му́ченически соверши́вше, испове́дания венцы́ украси́вшеся, к небе́сным востеко́сте, Михаи́ле прему́дре с до́блим Фео́дором, моли́те Христа́ Бо́га сохрани́ти oте́чество ва́ше и лю́ди, по вели́цей Его́ ми́лости.

Кано́н. Гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святии благовернии Михаиле и Феодоре, моли́те Бо́га о нас.

Твои́ми моли́твами, страстоте́рпче Михаи́ле, благода́ть мне́ и просвеще́ние с небесе́ да́руй, я́ко да возмогý похвали́ти до́блести и страда́ния твоя́.

Припев: Святии благовернии Михаиле и Феодоре, моли́те Бо́га о нас.

Боже́ственным жела́нием разжига́емь, Михаи́ле свя́те, с Фео́дором боля́рином, па́ки к ва́шему оте́честву возвраща́етеся, иде́же муче́ния венцы́ от десни́цы Вы́шняго прия́сте; изря́дно помина́йте ва́с почита́ющих.

Сла́ва Отцу́ и Сы́ну и Свято́му Ду́ху:

Ца́рствия ве́чнующаго и ника́коже мимотеку́щаго воспомина́я наслажде́ние, свя́те, ца́рство земно́е преоби́дев, и вме́сто ски́птра кре́ст взя́л еси́, и самозва́н к подвиго́м устреми́лся еси́, ку́пно со страда́вшим с тобо́ю Фео́дором боля́рином.

И ны́не и при́сно и во ве́ки веко́в. Ами́нь.

Богородичен: Святы́х Святе́йшая была́ еси́, Де́во Чи́стая, святы́х Свята́го на руку́ Христа́ носи́вши, Боже́ственною си́лою тва́рь содержа́щаго.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Святии благовернии Михаиле и Феодоре, моли́те Бо́га о нас.

Яря́ся, зве́рь нечести́вый уби́ти ва́с повелева́ет, сего́ скве́рным повеле́нием повину́тися не хотя́щих, и тва́ри па́че Творца́ не послужи́сте, но Христу́ вопия́сте: cвя́т еси́, Го́споди.

Припев: Святии благовернии Михаиле и Феодоре, моли́те Бо́га о нас.

Любо́вию твоего́ Влады́ки снеда́емь бы́в, Михаи́ле, ку́пно с Фео́дором боля́рином, ничто́же земна́го вмени́сте и Того́ жела́нием муче́ния ча́шу испи́сте усе́рдно, Христу́ вопию́ще: cвя́т еси́, Го́споди.

Сла́ва Отцу́ и Сы́ну и Свято́му Ду́ху:

Самозва́н от да́льных стра́н оте́чество твое́ прише́д посети́ти и злоимени́таго царя́ богобо́рную пре́лесть обличи́ти, от него́же пострада́в, же́ртва Бо́гу прине́слся еси́.

И ны́не и при́сно и во ве́ки веко́в. Ами́нь.

Богородичен: Возста́вила еси́, Чи́стая, па́ки па́дший мо́й о́браз, ро́ждшая Вино́внаго па́че есте́ственнаго Воскресе́ния.

Тáже седа́лен святы́х, гла́с 1.

Ка́мение тве́рдо яви́стеся и непребори́ми бы́сте мучи́телей преще́нием, Михаи́ле сла́вне и Фео́доре прему́дре. Сего́ ра́ди Росси́йстии собо́ри вопию́т ра́достно: сла́ва Укре́пльшему вы́, сла́ва Венча́вшему вы́, сла́ва Просве́щшему ва́ми ве́сь ми́р.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святии благовернии Михаиле и Феодоре, моли́те Бо́га о нас.

Богоме́рзкаго и злочести́ваго царя́ непра́ведна и лука́внейша па́че всея́ земли́, безбо́жную ве́ру укори́сте, и, лю́таго де́мона обличи́вше пре́лесть, я́ко а́гнцы, за Христа́ закла́ни бы́сте, и, я́ко со́лнце, по кончи́не просия́ли есте́.

Припев: Святии благовернии Михаиле и Феодоре, моли́те Бо́га о нас.

Усты́ све́тлыми вити́йствуя, испове́дал еси́ благоче́стно Еди́наго Бо́га, Михаи́ле, с пострада́вшим с тобо́ю Фео́дором; и сего́ ра́ди злочести́вый ца́рь не терпя́, повелева́ет уби́ти ва́с, на са́мей кончи́не Христа́ испове́дающия.

Сла́ва Отцу́ и Сы́ну и Свято́му Ду́ху:

О, я́рости царя́ злочести́ваго и непра́веднаго убие́ния! О, терпе́ния непобеди́мых страда́лец! Иже по ве́ре до́бре подви́гшеся, Христу́ вопия́ху: сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богородичен: Неискусобра́чно родила́ еси́, о Де́во, и по Рождестве́ яви́лася еси́ де́вствующи па́ки. Те́м немо́лчными гла́сы, — ра́дуйся, — Тебе́, Влады́чице, ве́рою несомне́нною вопие́м.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святии благовернии Михаиле и Феодоре, моли́те Бо́га о нас.

Дивлю́ся, о царю́, твоему́ безу́мию и су́етному глаго́лу, — испове́дниче Михаи́ле ре́кл еси́. И с благоро́дным Фео́дором: тва́ри па́че Творца́ ника́коже да бу́дет на́м покланя́тися, она́ бо челове́ка ра́ди сотворе́на е́сть.

Припев: Святии благовернии Михаиле и Феодоре, моли́те Бо́га о нас.

Злочести́вый о́н законопресту́пный До́ман, и́же пе́рвее ве́ры христиа́нския отве́ргся, не терпя́ твоего́ испове́дания, зле́ огорчи́ся, ноже́м отре́зует главу́ твою́ честну́ю, испове́дниче Христо́в Михаи́ле.

Сла́ва Отцу́ и Сы́ну и Свято́му Ду́ху:

Аще честна́я свята́я телеса́ ва́ша и небрего́ма пребы́ша от кровоя́дец о́нех, пове́ржена псо́м на снеде́ние, но Бо́г соблюда́ше о́ная и столпо́м о́гненным осиява́ше, пресве́тлыми заря́ми.

И ны́не и при́сно и во ве́ки веко́в. Ами́нь.

Богородичен: Бо́г в Тя́, Богома́ти, всели́ся, челове́ка назида́я, во тлю́ па́дшаго пре́лестию зми́я.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святии благовернии Михаиле и Феодоре, моли́те Бо́га о нас.

Недово́лен злочести́вый бы́в мучи́тель о убие́нии благочести́ваго Михаи́ла, покуша́шеся и страда́льца Фео́дора ле́стию увеща́ти: а́ще бо, — рече́, — бого́м мои́м поклони́шися, со мно́ю во сла́ве бу́деши и име́нию господи́на твоего́ насле́дник бу́деши.

Припев: Святии благовернии Михаиле и Феодоре, моли́те Бо́га о нас.

Мне́ да не бу́дет, о царю́ пребеззако́нне, Христа́ отврещи́ся и ло́жным твои́м бого́м поклони́тися. Мне́ бо е́же жи́ти — Христо́с и е́же умре́ти за Него́ — приобре́тение.

Сла́ва Отцу́ и Сы́ну и Свято́му Ду́ху:

От ю́ности житие́ твое́ чи́сто яви́ся Пресвята́го Ду́ха дарова́нием, Фео́доре, посреде́ бо злочести́вых мучи́телей твоему́ господи́ну побо́рник бы́л еси́ и с ни́м на небесе́х при́сно весели́шися.

И ны́не и при́сно и во ве́ки веко́в. Ами́нь.

Богородичен: Излия́в пе́рвее я́д во у́ши Евины зми́й вселука́вый, Tы́ же сего́ еди́на оттрясла́ еси́, Богома́ти, Истреби́теля сему́ ро́ждши.

Конда́к, гла́с 8.

Ца́рство земно́е в ничто́же вмени́в, сла́ву, я́ко преходя́щую, оста́вил еси́, самозва́н прише́д к подвиго́м, Тро́ицу пропове́дал еси́ пред нечести́вым мучи́телем, страстотéрпче Михаи́ле с до́блим Фео́дором, Царю́ си́л предстоя́ще, моли́те без вре́да сохрани́ти оте́чество ва́ше, и лю́ди, да ва́с непреста́нно почита́ем.

Икос:

Кто́ по́двиги ва́ша и боле́зни возмо́жет извеща́ти, страстоте́рпцы, я́же му́жески претерпе́сте за ве́ру Госпо́дню? И дарова́ний, и́хже сподо́бистеся, не довле́ют уста́ челове́ческая испове́дати. Прему́дростию бо укра́шени и му́жеством, бога́тство и сла́ву привре́менную возненави́десте, Михаи́ле сла́вный, и с пострада́вшим с тобо́ю ди́вным Фео́дором, с ни́м не разлучи́стеся на земли́ и на небеси́. Те́м моли́те без вре́да сохрани́ти оте́чество ва́ше, и лю́ди, да ва́с непреста́нно почита́ем.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святии благовернии Михаиле и Феодоре, моли́те Бо́га о нас.

Ни любви́ сопру́жницы, ни ча́д разлуче́нию внима́л еси́, но сия́ вся́ в ру́ки преда́в Бо́жия, я́ко Творца́ и Промы́сленника все́х, вопия́л еси́: благослове́н Бо́г отце́в на́ших.

Сла́ва Отцу́ и Сы́ну и Свято́му Ду́ху:

Поревнова́в му́жеству пре́жде бы́вших му́чеников, те́х блаже́нство и сла́ву получи́л еси́, достохва́льне Михаи́ле, ку́пно с Фео́дором, вопию́ще: благослове́н Бо́г отце́в на́ших.

И ны́не и при́сно и во ве́ки веко́в. Ами́нь.

Богородичен: Вы́шняго oсвяще́нное боже́ственное cеле́ние, ра́дуйся, Тобо́ю бо даде́ся ра́дость, Богоро́дице, зову́щим: благослове́на Ты́ в жена́х еси́, Всенепоро́чная Влады́чице.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Святии благовернии Михаиле и Феодоре, моли́те Бо́га о нас.

Взира́я на воздая́ния, су́щая на небесе́х, всече́стне, я́же лю́бящим Христо́с предугото́ва и вопию́щим Ему́ от души́: благослови́те, вся́ дела́ Госпо́дня, Го́спода.

Припев: Святии благовернии Михаиле и Феодоре, моли́те Бо́га о нас.

Боже́ственная му́ченик страда́ния вои́стинну превзыдо́ша похвале́ния, па́че сло́ва и помышле́ния, я́ко тле́нным те́лом безпло́тныя враги́ победи́ша, вопию́ще: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Непоколеби́мь в по́двизех пребы́л еси́, па́че же нечести́вых сердца́ поколеба́л еси́, ви́девших тя́ непрекло́нна, свя́те Михаи́ле, ку́пно с Фео́дором вопию́ща: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Та́инство стра́нно, и́стинно, под со́лнцем eди́на показа́ла еси́: Бо́га бо родила́ еси́, Чи́стая, Неви́димаго и Безнача́льнаго, Невмести́маго, все́м Непостижи́маго, Ему́же вопие́м: благослови́те, вся́ дела́ Госпо́дня, Го́спода.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святии благовернии Михаиле и Феодоре, моли́те Бо́га о нас.

Прииди́те, чи́стым се́рдцем и тре́звою со́вестию великому́ченика Михаи́ла с сове́тником кре́пким Фео́дором, па́че зла́та светя́щася зря́ще, велича́ем.

Припев: Святии благовернии Михаиле и Феодоре, моли́те Бо́га о нас.

Све́тлая ва́ша, пребога́тии, побе́дная храбо́рствия на враги́ ви́дев Всеви́дящее Око, по́двиги ва́ша венцы́ одоле́ния венча́ет Спа́с ду́ш на́ших.

Припев: Святии благовернии Михаиле и Феодоре, моли́те Бо́га о нас.

Во́инства Ангелов удиви́шася, му́чеников же ли́ки и пра́ведных собо́ри согла́сно похвали́ша Христа́, таково́е терпе́ние ва́м дарова́вшаго.

Сла́ва Отцу́ и Сы́ну и Свято́му Ду́ху:

Непобеди́мая честна́я му́ченик дво́ица, на небесе́х живу́щи, певцы́ своя́ помина́й, соверша́ющих во хвале́нии свяще́нная ва́ша страда́ния, ва́с непреста́нно велича́ющих.

И ны́не и при́сно и во ве́ки веко́в. Ами́нь.

Богородичен: Земля́ изба́вися от кля́твы дре́вния Рождество́м Твои́м, те́мже Тя́, Богороди́тельнице, велича́ем.

Свети́лен:

Да просла́вим вси́ Бо́га, просла́вльшаго святы́я Своя́ великому́ченики, Михаи́ла ку́пно с Фео́дором: ти́и бо пострада́ша за Христа́, и венцы́ от Него́ прия́ша, и ны́не, в вы́шних предстоя́ще, о ми́ре мо́лятся.

Молитва первая

О святии великомученицы Христовы княже Михаиле и болярине Феодоре! Помилуйте ны, грешныя и недостойныя (имена), в бедах и скорбех и в печалех пребывающая, и от всякия злыя напасти, от злаго же и обидящаго человека нас охраните, ибо дана вам бысть таковая благодать от Бога, еже молитися за нас, грешных, в бедах и напастех зле страждущих. Будите убо нам поборницы крепцыи на вся видимыя и невидимыя враги наша. О Великомученицы княже Михаиле и болярине Феодоре, предстоятели Небеснаго Царя! Не отвержите моления нашего от нас приносимаго, но от настоящих бед и скорбей и печалей, таже и от будущаго мучения избавите нас, верно вопиющих Богу: Аллилуиа.

Молитва вторая

О великомученицы Христовы и исповедницы, благоверный княже Михаиле и болярине Феодоре! Храбрии есте в ратех и врагом прогонители и обидимым заступницы всем православным христианом! Помилуйте нас, грешных и недостойных раб своих, в бедах и скорбех и в печалех и во всякой злой напасти и от всякаго злаго и обидящаго челвека, ибо дана вам бысть таковая благодать от Бога молитися за нас грешных, в бедах и напастех зле страждущих, и избавите нас от обидящих и ненавидящих: будите нам поборницы крепки на вся видимыя и невидимыя враги наша. О великомученицы всехвальнии и исповедницы веры Христовы, княже Михаиле и болярине Феодоре, предстоятели небеснаго Царя! Приимите моление наше от недостойных рабов своих, всех православных христиан, настоящих бед и скорбей и печалей и будущаго мучения избавите нас, верно вопиющих к Богу: Аллилуиа.