Шрифт

3 октября.

Канон всем святым, в земли Брянской просиявшим

Канон всем святым, в земли Брянской просиявшим

Тропа́рь святы́х, глас 4:

Днесь ра́достно лику́ет земля́ Бря́нская,/ прославля́ющи ча́да своя́, Бо́гу угоди́вшия,/ святи́тели и иере́и,/ преподо́бныя отцы́ и ма́тери,/ благове́рныя кня́зи и княги́ни,/ му́ченики и испове́дники,/ к ни́мже с любо́вию возопии́м:/ о собо́ре святы́й и по́лче боже́ственный,// земли́ на́шея утвержде́ние вы есте́ вои́стину.

Велича́ние:

Велича́ем вас,/ вси святи́и, в земли́ Бря́нской просия́вшии,/ и чтим святу́ю па́мять ва́шу,/ вы бо мо́лите за нас// Христа́ Бо́га на́шего.

И́но велича́ние:

Ублажа́ем вас,/ чудотво́рцы на́ши сла́внии,/ зе́млю Бря́нскую доброде́тельми ва́шими озари́вшии/ и нам о́браз спасе́ния// светоявле́нно показа́вшии.

Кано́н святы́х. Глас 4.

Песнь 1

Ирмос: Мо́ря че́рмную пу́чину/ невла́жными стопа́ми,/ дре́вний пешеше́ствовав Изра́иль,/ крестообра́зныма Моисе́овыма рука́ма,// Амали́кову си́лу в пусты́ни победи́л есть.

Припев: Вси святии земли Брянския, молите Бога о нас!

Земли́ Бря́нския прозябе́ния, Це́рковию Правосла́вною воспита́нныя,/ во благоче́стии просия́вшия боже́ственныя отцы́ и ма́тери на́ша/ в пе́снех духо́вных согла́сно воспои́м.

Припев: Вси святии земли Брянския, молите Бога о нас!

Священному́ченика Ку́кшу со ученико́м его́ Ни́коном восхва́лим,/ зе́млю Бря́нскую про́поведию Ева́нгелия просвети́вшия/ и ны́не ку́пно Святе́й Тро́ице предстоя́щия.

Слава: Сла́ву княже́ния и оте́чество Христа́ ра́ди оста́вив,/ преподо́бне о́тче наш Нико́ло, Свято́ша имену́емый,/ ве́чное Ца́рство и сла́ву на Небеси́ прия́л еси́,/ иде́же, лику́я, помина́й ве́рою чту́щих тя.

И ныне: Ты еси́, Богоро́дице, ору́жие на́ше и стена́, и Святе́й Руси́ Засту́пница,/ к Тебе́ ны́не прибега́ем, Тя на моли́тву призыва́ем,/ да изба́виши нас от враго́в на́ших.

Песнь 3

Ирмос: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,// и прибе́жище, и утвержде́ние.

Припев: Вси святии земли Брянския, молите Бога о нас!

Уби́йц жестосе́рдых, незло́биво му́ки претерпе́в,/ победи́тель яви́лся еси́, кня́же И́горю,/ те́мже благода́ть стяжа́л еси́ от междоусо́бныя бра́ни избавля́ти.

Припев: Вси святии земли Брянския, молите Бога о нас!

Прииди́те, воспои́м му́ченика Михаи́ла, кня́зя Черни́говскаго,/ с боля́рином ве́рным Фео́дором,/ испове́дания венцы́ украси́вшихся.

Слава: Небе́сное Ца́рство восприи́м труда́ми и моли́твами,/ Фео́доре, кня́же Смоле́нский,/ ору́жием моли́тв твои́х и ны́не Оте́чество на́ше охраня́й.

И ныне: И́мамы о́браз Твой, Блага́я Одиги́трие, в Чу́бковичах сия́ющий,/ зна́мение ми́лости Твоея́ и в ско́рбех утеше́ние,/ и чуде́с исто́чник, Пречи́стая.

Седа́лен святы́х, глас 7:

Нощне́й тьме огустева́ющей, умножа́ется зве́здное блиста́ние,/ и к тому́ о́чи заблу́ждших ра́достно возво́дятся./ Та́ко и умно́жившейся на земли́ тьме грехо́вней,/ возведе́м горе́ о́чи на́ши, бра́тие,/ и, сия́ние духо́вных звезд, зе́млю на́шу озаря́ющих, узре́вше,/ к Небе́сному Оте́честву потщи́мся,/ его́же да не лиши́т Госпо́дь нас гре́шных, моли́твами святы́х Свои́х.

Песнь 4

Ирмос: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не Свое́м,/ досто́йно взыва́ющи:// сла́ва си́ле Твое́й, Го́споди.

Припев: Вси святии земли Брянския, молите Бога о нас!

Ки́ими словесы́ просла́вим кня́зи благове́рныя, и́же, благоче́стием и ве́рою просия́вше, зе́млю Бря́нскую до́бре упра́виша и оби́тельми и́ноческими украси́ша.

Припев: Вси святии земли Брянския, молите Бога о нас!

Изше́л еси́, я́ко во́ин Христо́в, на враги́ неви́димыя, преподо́бне кня́же Оле́же,/ и во оби́тели, тобо́ю созда́нней, до́бре подвиза́вся,/ нам мо́щи твоя́ святы́я оста́вил еси́.

Слава: Звезду́ Су́ждальскую, от Черни́гова возсия́вшую,/ неве́сту Христо́ву, и́нокиням наста́вницу,/ Евфроси́нию преподо́бную любо́вию да ублажи́м.

И ныне: Егда́ обыдо́ша град Брянск супоста́ты,/ тогда́ благода́тию Све́нскаго Твоего́ о́браза, Пречи́стая, тех вспять обрати́ла еси́/ и мно́гая и́на чудеса́ от ико́ны Своея́ яви́ла еси́.

Песнь 5

Ирмос: Ты, Го́споди мой,/ Свет в мир прише́л еси́,/ Свет Святы́й, обраща́яй из мра́чна неве́дения// ве́рою воспева́ющия Тя.

Припев: Вси святии земли Брянския, молите Бога о нас!

Моли́ Бо́га о нас, святи́телю Феогно́сте, Моско́вский чудотво́рче,/ му́дрость со благоче́стием в житии́ сочета́вый и благослове́ние свое́ земли́ Бря́нской дарова́вый.

Припев: Вси святии земли Брянския, молите Бога о нас!

Любве́ и смире́ния сокро́вище,/ по́двигов и́ноческих зерца́ло,/ пра́вило ве́ры и благоче́стия яви́лся еси́, святи́телю Феодо́сие Черни́говский,/ те́мже Бог тя ди́вным нетле́нием и чудесы́ моще́й твои́х просла́ви.

Слава: Иоа́нна, святи́теля Тобо́льскаго, усе́рдно воспои́м,/ той бо, от Све́нския оби́тели изше́д,/ Сиби́рския страны́ свети́льник яви́ся/ и апо́стольскою ре́вностию и милосе́рдием к стра́ждущим просла́вися.

И ныне: Балы́кинскою и Мо́лченскою, и Чо́лнскою ико́нами Твои́ми преде́лы Бря́нския освяща́еши, Пречи́стая,/ и по́мощь неоску́дную притека́ющим к ним при́сно источа́еши.

Песнь 6

Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости из ребр Твои́х// исте́кшею Кро́вию.

Припев: Вси святии земли Брянския, молите Бога о нас!

Ра́тниче дерзнове́нный бра́ни Кулико́вския,/ игу́мена земли́ Ру́сския послу́шниче смире́нный,/ Алекса́ндре Пересве́те, страда́льче му́жественный,/ Бря́нскую зе́млю, оте́чество твое́, заступа́й.

Припев: Вси святии земли Брянския, молите Бога о нас!

Я́ко свети́льник ди́вный в де́бри Бря́нской яви́лся еси́, преподо́бне Полика́рпе,/ мудрова́ние бо и сла́ву мирску́ю презре́в,/ Боже́ственным за́поведем неле́ностне после́довал еси́.

Слава: Несумне́нно вся кра́сная ми́ра сего́ оста́вил еси́, преподо́бне Полика́рпе,/ поще́нием и слеза́ми, моли́твами и пе́сньми устремля́яся к Бо́гу,/ и оби́тель и́ноческую во и́мя Спа́са на́шего во гра́де Бря́нске созда́л еси́.

И ныне: Спору́чнице гре́шных, Всепе́тая Влады́чице,/ ико́ну Твою́ в О́дриной оби́тели чудесы́ просла́вившая,/ я́ко Ма́ти Бо́жия, умоли́ Твои́ми моли́твами Изба́вителя всех,/ да спасе́т ду́ши на́ша.

Конда́к, глас 2:

Засту́пницы те́плии Бря́нския земли́,/ святи́и сро́дницы на́ши,/ ку́пно с Пресвято́ю Богоро́дицею и все́ми святы́ми/ Престо́лу Бо́жию ны́не предстоя́ще,/ моли́твами ва́шими Правосла́вие утверди́те,/ е́реси и раско́лы разори́те,/ Оте́честву на́шему мир// и душа́м на́шим поле́зная испроси́те.

И́кос:

Еде́мскаго рая́ древеса́ добропло́дная и кра́сная яви́шася, святи́и,/ цве́ты благово́нныя уче́ний и плоды́ дел творя́щии,/ от ни́хже ду́ши на́ша пита́ются и глад наш духо́вный утоля́ется,/ прииди́те у́бо, притеце́м под сень их и ублажи́м,/ я́ко земли́ Бря́нския отра́ду и украше́ние, о́браз жития́ и начерта́ние,/ и к ним с любо́вию возопии́м:/ о блаже́ннии сро́дницы на́ши,/ моли́твами ва́шими Правосла́вие утверди́те,/ е́реси и раско́лы разори́те,/ Оте́честву на́шему мир/ и душа́м на́шим поле́зная испроси́те.

Песнь 7

Ирмос: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем опаля́еми взыва́ху:// благослове́н еси́ в хра́ме сла́вы Твоея́, Го́споди.

Припев: Вси святии земли Брянския, молите Бога о нас!

Крести́телю Иоа́нну ре́вностию уподо́бился еси́, Фео́доре преподо́бне,/ от ю́ности Бо́гу угоди́в и ско́рби Его́ ра́ди претерпе́в,/ оби́тели Площа́нския воспита́ние и Санакса́рскаго вертогра́да и́ноческаго похвало́,/ моли́ спасти́ся нам.

Припев: Вси святии земли Брянския, молите Бога о нас!

И́мамы преподо́бных Васили́ска Сиби́рскаго и ученика́ его́ Зоси́му Верхо́вскаго,/ в Бря́нских де́брех нача́ло по́двигов положи́вших,/ я́ко о́браз послуша́ния и пустыннолю́бия,/ и о спасе́нии бли́жних попече́ния.

Слава: Яви́стеся наро́да Бо́жия печа́льницы до́блии,/ преподо́бнии ста́рцы О́птинстии Льве, Мака́рие и Моисе́е,/ в оби́телех Бря́нских подвиза́вшиися,/ и нас на путь покая́ния, смире́ния и терпе́ния наста́вите.

И ныне: Влады́чице Богоро́дице,/ цельбоно́сною Твое́ю ико́ною, Троеру́чицею имену́емою,/ Пу́стынь Белобере́жскую украси́вшая,/ простри́ всемо́щную Твою́ ру́ку на по́мощь правосла́вно Тя велича́ющим.

Песнь 8

Ирмос: Ру́це распросте́р Дании́л,/ львов зия́ния в ро́ве затче́:/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:// благослови́те, вся дела́ Госпо́дня, Го́спода.

Припев: Вси святии земли Брянския, молите Бога о нас!

Его́же носи́л еси́ в се́рдце твое́м, Сло́ва Христа́ Бо́га,/ моли́ за ны, святи́телю Игна́тие богому́дре,/ Правосла́вия побо́рниче, покая́ния и моли́твы наста́вниче,/ архиере́ев украше́ние и мона́шествующих похвало́.

Припев: Вси святии земли Брянския, молите Бога о нас!

Ра́дуйтеся, священному́ченицы сла́внии Алекса́ндре, Иоа́нне, Митрофа́не, Алекси́е и Корни́лие, во дни гоне́ний безбо́жных ве́ру соблю́дшии и да́же до кро́ве Христа́ ра́ди пострада́вшии.

Слава: Архипа́стыри земли́ Орло́вския, му́ченическою кро́вию укра́шенныя, согла́сно воспои́м:/ Серафи́ма митрополи́та, прославле́нию Саро́вскаго чудотво́рца послужи́вшаго,/ и друга́го Серафи́ма добропобе́днаго,/ и до́бляго Мака́рия.

И ныне: Ю́же воспева́ют А́нгели, просла́вим ны́не Засту́пницу Усе́рдную,/ ико́ну Свою́ оби́тели Площа́нской и всей земли́ Бря́нской в покро́в и огражде́ние дарова́вшую.

Песнь 9

Ирмос: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся, Христо́с,/ совокупи́вый разстоя́щаяся естества́,// тем, веселя́щеся, Тя, Богоро́дице, велича́ем.

Припев: Вси святии земли Брянския, молите Бога о нас!

Честны́я иера́рхи, Староду́ба сла́ву,/ Дамаскина́ ре́вностнаго, за Христа́ смерть прие́мшаго,/ и кро́ткаго Никола́я, в Каза́хской земли́ испове́днический путь сконча́вшаго,/ моли́твенники о нас ко Спа́су приво́дим.

Припев: Вси святии земли Брянския, молите Бога о нас!

Тве́рдо правосла́вную ве́ру я́ко щит держа́ще, святи́и страстоте́рпцы земли́ Бря́нския,/ зло́бу лю́тых отсту́пников и безбо́жных на́глое неи́стовство препобеди́ли есте́/ и нам о́браз терпе́ния и злострада́ния яви́ли есте́.

Слава: Именова́ннии и безыме́ннии, явле́ннии и неявле́ннии, святи́и сро́дницы на́ши,/ сла́ву мно́гу от Бо́га прии́мшии,/ утвержде́ние в Правосла́вии и мир Оте́честву на́шему испроси́те/ и спасе́ние душа́м на́шим.

И ныне: Ма́ти Бо́жия Пречи́стая,/ гра́ды и ве́си земли́ Бря́нския честна́го ли́ка Твоего́ изображе́нии ми́лостивно обогати́вшая,/ благодаре́ние на́ше приими́/ и от вся́каго зла покры́й Оте́чество на́ше.

Свети́лен святы́х:

В пе́снех восхва́лим свети́ла незаходи́мая Бря́нския земли́,/ таи́нники Боже́ственнаго Сло́ва,/ Христа́ сла́вяще, сих просвети́вшаго и возлю́бившаго,/ и помо́щники нам в ско́рбех дарова́вшаго.

Моли́тва

О всеблаже́ннии и богому́дрии уго́дницы Бо́жии, по́двиги свои́ми зе́млю Бря́нскую освяти́вшии и телеса́ своя́, я́ко се́мена ве́ры, в ней оста́вльшии, душа́ми же свои́ми Престо́лу Бо́жию предстоя́щии и непреста́нно о ней моля́щиися!

Се ны́не, в день о́бщаго ва́шего торжества́, мы гре́шнии, земни́и сро́дницы ва́ши, дерза́ем приноси́ти вам сие́ хвале́бное пе́ние. Велича́ем ва́ша вели́кия по́двиги, духо́внии во́ини Христо́ви, терпе́нием и му́жеством до конца́ врага́ низложи́вшии и нас от пре́лести и ко́зней его́ избавля́ющии. Ублажа́ем ва́ше свято́е житие́, свети́льницы боже́ственнии, све́том ве́ры и доброде́телей светя́щиися и на́ша умы́ и сердца́ богому́дренно озаря́ющии. Прославля́ем ва́ша вели́кая чудеса́, цве́ти ра́йстии, в стране́ на́шей прекра́сне процве́тшии и арома́ты дарова́ний и чуде́с повсю́ду благоуха́ющии. Восхваля́ем ва́шу богоподража́тельную любо́вь, предста́телие на́ши и покрови́телие, и, упова́юще на по́мощь ва́шу, припа́даем к вам и вопие́м: просвети́телие на́ши! Споспешеству́йте лю́дем Бря́нския земли́ завеща́нную ва́ми ве́ру правосла́вную тве́рдо содержа́ти, да спаси́тельное се́мя, ва́ми все́янное, не изсуше́но бу́дет зно́ем неве́рия, но, дожде́м благода́ти Бо́жия напое́нное, плод изоби́льный да принесе́т.

Святи́телие Христо́ви! Моли́твами ва́шими утверди́те Це́рковь Ру́сскую, е́реси, раско́лы и нестрое́ния в ней потреби́те, расточе́нныя о́вцы во еди́но собери́те и от вся́ких волко́в, во оде́жди о́вчей в ста́до Христо́во входя́щих, огради́те.

Преподо́бнии отцы́! Сохрани́те нас от пре́лестей ми́ра сего́ лука́ваго, да, отве́ргшеся себе́ и взе́мше крест свой, после́дуем Христу́, распина́юще плоть свою́ со страстьми́ и похотьми́, нося́ще тяготы́ друг дру́га.

Благове́рнии кня́зие! Воззри́те ми́лостивно на земно́е оте́чество ва́ше и вся нече́стия и собла́зны, в нем ны́не су́щия, ору́жием моли́тв ва́ших потреби́те, да я́коже дре́вле, та́ко и ны́не и в гряду́щее вре́мя, прославля́ется на святе́й земли́ на́шей и́мя Госпо́дне.

Страстоте́рпцы пресла́внии! Укрепи́те нас в му́жественнем стоя́нии да́же до кро́ве за ве́ру правосла́вную и обы́чаи отече́ския, да ни скорбь, ни теснота́, ни гоне́ния, ни глад, ни нагота́, ни беда́, ни меч возмо́гут нас разлучи́ти от любве́ Бо́жия, я́же о Христе́ Иису́се, Го́споде на́шем.

Богому́дрыя жены́, в немощне́м естестве́ по́двиги ве́лия яви́вшия! Моли́теся, да дух ва́шея любве́ ко Го́споду и ре́вность о угожде́нии Ему́ и о свое́м и бли́жняго спасе́нии не оскуде́ет в нас.

Вси святи́и сро́дницы на́ши, от лет дре́вних просия́вшии и в после́дния дни подвиза́вшиися, явле́ннии и неявле́ннии, ве́домии и неве́домии! Посети́те на́шу не́мощь и уничиже́ние и моли́твами ва́шими испроси́те у Христа́ Бо́га на́шего, да и мы, безбе́дно преплы́вше пучи́ну жите́йскую и невреди́мо соблю́дше сокро́вище правосла́вныя ве́ры, приста́нища ве́чнаго спасе́ния дости́гнем и в блаже́нных оби́телех Го́рняго Оте́чества вку́пе с ва́ми и со все́ми угоди́вшими Ему́ от ве́ка святы́ми водвори́мся благода́тию и человеколю́бием Спаси́теля на́шего Го́спода Иису́са Христа́, Ему́же со Преве́чным Отце́м и Пресвяты́м Ду́хом подоба́ет непреста́нное славосло́вие и поклоне́ние от всех ве́рных во ве́ки веко́в. Ами́нь.

Канон всем святым, в земли Брянской просиявшим