31 октября.

Канон святителю Петру, Цетиньскому чудотворцу, митрополиту Черногорскому, Скендерийскому и Приморскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь святи́теля, гла́с 8:

Прииди́те дне́сь, о правосла́внии, торже́ственне да возвесели́мся, и да уви́дим всечестны́я и прехва́льныя доброде́тели, труды́ и по́двиги Черного́рския страны́ свети́льника пресве́тла, и́же во архиере́ех вели́каго Петра́, достохва́льнаго па́стыря и учи́теля, я́ко бо ди́вно сотвори́ Госпо́дь его́ во святы́х Свои́х, су́ща в земли́ четвероле́тна показа́ на́м нетле́нна. Того́ моли́твами, Христе́ Бо́же на́ш, спаси́ ду́ши на́ша.

Велича́ние святи́тельское:

Велича́ем тя́, святи́телю о́тче Пе́тре, и чте́м святу́ю па́мять твою́, ты́ бо мо́лиши за на́с Христа́ Бо́га на́шего.

Стихи́ра, гла́с 6:

Дне́сь пра́зднуем всечестно́е торжество́ отца́ на́шего Петра́, и́же свои́ми дея́ньми на по́льзу наро́да и Це́ркви, возвели́чен от Бо́га, сего́ ра́ди ублажи́м его́ всечестну́ю па́мять, я́ко да возра́дует сердца́ на́ша, и моли́твами спасе́т ду́ши на́ша.

Кано́н свята́го, гла́с 8.

Пе́снь 1.

Ирмос: Мо́ре огусти́л еси́, погрузи́вый со ору́жием го́рдаго фарао́на, и лю́ди спа́сл еси́ немо́кренно, Го́споди, и вве́л еси́ я́ в го́ру святы́ни, вопию́щия: пои́м Тебе́, Бо́гу на́шему, пе́снь побе́дную, я́ко просла́вися.

Припев: Святителю отче Петре, моли́ Бо́га о нас.

Мо́ря стра́стаго пучи́ною обурева́емии, к Тебе́, Иису́се Всеблаги́й, прибега́юще, вопие́м: от тиме́ния страсте́й на́с изба́ви, да в тишине́ ду́ха уго́днику Твоему́ пе́снь хвале́бную принесе́м, его́же сла́вно просла́вил еси́.

Припев: Святителю отче Петре, моли́ Бо́га о нас.

Мо́рю песо́к положи́вый Госпо́дь, тя́ избра́, святи́телю о́тче Пе́тре, от ю́ности Ему́ благоугожда́ти, и сего́ ра́ди посла́ тя в Росси́ю в науче́ние, иде́же не до́лго прожи́вый, возврати́лся еси́ во своя́ си, я́ко насле́дник архиере́я Са́ввы, ра́ди умиротворе́ния своего́ лю́бящаго тя́ наро́да, и́же пое́т ти́: сла́вно просла́вися.

Сла́ва Отцу́ и Сы́ну и Свято́му Ду́ху:

Мо́ря жите́йскаго треволне́ние не потопи́ спаси́тельную ладью́, о́тче святы́й, но ве́янием Ду́ха Бо́жия управля́емый, в ти́хое приста́нище спасе́ния вше́л еси́, и чудесы́ мно́гими от Го́спода просла́вился еси́.

И ны́не и при́сно и во ве́ки веко́в. Ами́нь.

Богородичен: Мо́ре сле́з испроси́ на́м, Влады́чице Преблага́я, у Ми́лостиваго Сы́на Твоего́ и Бо́га на́шего, я́ко да и́ми угаси́вше пе́щь страсте́й, омы́им скве́рну грехо́вную ду́ш на́ших, и спасе́ние ве́чное улучи́вше, воспои́м Христу́ пе́снь побе́дную, я́ко просла́вися.

Пе́снь 3.

Ирмос: Утверди́ся се́рдце мое́ во Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии Твое́м.

Припев: Святителю отче Петре, моли́ Бо́га о нас.

Утверди́л еси́ на ка́мени за́поведей Христо́вых се́рдце твое́, святи́телю Пе́тре, у́зким и приско́рбным путе́м ше́ствовал еси́, тружда́яся о спасе́нии и о благоустрое́нии своего́ оте́чества. Сего́ ра́ди получи́л еси́ блаже́нный поко́й, веселя́ся со святы́ми, угоди́вшими Бо́гу.

Припев: Святителю отче Петре, моли́ Бо́га о нас.

Богоно́сне архиере́ю Пе́тре, мно́го скорбе́й, поноше́ний и напа́стей понесы́й, оба́че вся́ преодоле́вый, спа́сл еси́ па́ству свою́ от порабоще́ния ага́рянскаго.

Сла́ва Отцу́ и Сы́ну и Свято́му Ду́ху:

Утвержде́ный благослове́нием, поуче́нием и моли́твою митрополи́та Се́рбскаго Моисе́я, ты́, о́тче, яви́лся еси́ Моисе́й, спасы́й ро́д сво́й, его́же презе́льне люби́л еси́.

И ны́не и при́сно и во ве́ки веко́в. Ами́нь.

Богородичен: Тве́рдое и непрело́жное упова́ние ве́мы Тя́, Богоро́дице, его́же держи́мся и, упова́я, мо́лимся: сохрани́ благове́рный ро́д на́ш, гра́д се́й и вся́ гра́ды и страны́ христиа́нския от все́х бе́д, находя́щих челове́ком согреша́ющим, но а́бие, моли́твами твои́ми, прие́млющим согреше́ний оставле́ние.

Седа́лен, гла́с 3:

Тако́в на́м подоба́ше архиере́й, преподо́бен, незло́бив, кро́ток, отлуче́н от гре́шник, и́же пред ве́чным Архиере́ем, Иису́с Христо́м, мо́лится вы́ну о спасе́нии ста́да своего́: мно́го бо мо́жет моли́тва пра́веднаго, поспешеству́ема во благо́е.

Сла́ва, и ны́не, Богородичен:

Ско́рый Тво́й покро́в, и по́мощь, и ми́лость покажи́ на рабы́ Твоя́, и во́лны, Чи́стая, укроти́ су́етных по́мыслов, и па́дшую мою́ ду́шу возста́ви, Богоро́дице: ве́м бо, Де́во Пресвята́я, я́ко мо́жеши, ели́ка хо́щеши.

Пе́снь 4.

Ирмос: Проро́к Авваку́м у́мныма очи́ма прови́де, Го́споди, прише́ствие Твое́, те́м и вопия́ше: от ю́га прии́дет Бо́г. Сла́ва си́ле Твое́й, сла́ва снизхожде́нию Твоему́!

Припев: Святителю отче Петре, моли́ Бо́га о нас.

Заря́ми чуде́с облиста́лся еси́, святи́телю Пе́тре, грехми́ отемне́нное се́рдце мое́, све́том твои́х моли́тв просвети́, я́ко да и а́з благода́рственно воспою́ па́мять твою́.

Припев: Святителю отче Петре, моли́ Бо́га о нас.

Исцелева́хуся иногда́ ве́рующии от нанесе́ния главны́х тя́жестей убру́сами Па́вловыми. Ты́ же, о́тче Пе́тре, архиере́ю Бо́жий, свои́ми моли́твами да́руеши исцеле́ние притека́ющим к ра́це моще́й твои́х.

Сла́ва Отцу́ и Сы́ну и Свято́му Ду́ху:

Моли́тва ве́ры спасе́ лю́те боля́щаго, и́же и испове́да, я́ко вра́чеве не воскреся́т, упова́ние же на тя́, благосе́рдный о́тче, николи́же посрамля́ет с ве́рою призыва́ющих тя́ во благовре́менную по́мощь.

И ны́не и при́сно и во ве́ки веко́в. Ами́нь.

Богородичен: Сни́де, я́ко до́ждь на руно́, во утро́бу Твою́ Госпо́дь, я́коже рече́ дре́вле проро́к, Всенепоро́чная, Ему́же взыва́ем: сла́ва си́ле Твое́й, Го́споди.

Пе́снь 5

Ирмос: Го́споди Бо́же на́ш, ми́р да́ждь на́м, Го́споди Бо́же на́ш, стяжи́ ны, Го́споди, ра́зве Тебе́, ино́го не ве́мы, и́мя Твое́ имену́ем.

Припев: Святителю отче Петре, моли́ Бо́га о нас.

Го́спода Бо́га освяти́л еси́ в души́ твое́й, блаже́нне о́тче, же́ртвенник же мы́сленный ду́шу твою́ соде́лал еси́, на не́мже же́ртву хвалы́ Го́сподеви возноси́л еси́ во смире́нии ду́ха, немо́лчно призыва́я и́мя Бо́жие спаси́тельное.

Припев: Святителю отче Петре, моли́ Бо́га о нас.

Тве́рдое благода́ти позна́ние утвержда́я в ве́рующих, научи́л еси́ на́с, святи́телю Пе́тре, ве́дети тя́, я́ко наста́вника ми́лостиваго, благоутро́бия сокро́вище, правове́рия учи́теля, архиере́ев похвалу́, безпомо́щных засту́пника, при́сно моля́щагося о спасе́нии ча́д твои́х, с ве́рою к тебе́ притека́ющих.

Сла́ва Отцу́ и Сы́ну и Свято́му Ду́ху:

Госпо́дни за́поведи животво́рныя име́л еси́ напи́санныя на скрижа́лех се́рдца твоего́, богому́дре о́тче Пе́тре, и пропове́дник па́стве твое́й ева́нгельскаго уче́ния, к небеси́ возводя́щаго челове́ки, и́же послу́шающе сего́, моли́твами призыва́ют Боже́ственное и́мя Христо́во.

И ны́не и при́сно и во ве́ки веко́в. Ами́нь.

Богородичен: Вереи́ а́довы сломи́шася и закле́пи ве́чнии сокруши́шася Ро́ждшимся от Тебе́, Преблагослове́нная Ма́ти, те́мже мо́лим Тя́ изба́вити ны́ от ве́чныя сме́рти хода́тайством Твои́м, и всели́ ны во све́те Сы́на Твоего́, све́т искупле́ния ми́рови возсия́вшаго.

Пе́снь 6.

Ирмос: Яко во́ды морски́я, Человеколю́бче, волна́ми жите́йскими обурева́юся. Те́мже, я́ко Ио́на, та́ко вопию́ Ти: возведи́ от тли́ живо́т мо́й, Благоутро́бне Го́споди.

Припев: Святителю отче Петре, моли́ Бо́га о нас.

Твое́ прехва́льное житие́ и чистоту́, к си́м же безме́рное смиреному́дрие, прови́дев Пресвяты́й Ду́х, сла́вна тя́ показа́, те́мже от сего́ жития́ к о́ному преше́д, получи́л еси́ та́мо с пра́ведными весе́лие.

Припев: Святителю отче Петре, моли́ Бо́га о нас.

Дне́сь пра́зднующе свяще́нную твою́ па́мять, святи́телю Пе́тре, я́же весели́т ро́д тво́й, воспева́ющий любо́вию по́двиги твоя́ и сла́вяще честно́е твое́ успе́ние, мо́лится тебе́, да соблюде́ши его́ от все́х бе́д и напа́стей.

Сла́ва Отцу́ и Сы́ну и Свято́му Ду́ху:

Кто́ изрещи́ мо́жет труды́ твоя́ и бде́ния ра́ди спасе́ния па́ствы твоея́, богому́дре Пе́тре, и́хже ра́ди возме́здие от Бо́га по достоя́нию восприя́л еси́ по сме́рти свое́й, разли́чныя неду́ги исцеля́ти?

И ны́не и при́сно и во ве́ки веко́в. Ами́нь.

Богородичен: Твою́ по́мощь да́ждь ми́, Влады́чице Богома́ти, и изба́ви мя́ от все́х бе́д, скорбе́й и прегреше́ний мои́х, я́ко Ты́ все́х Изба́вителя родила́ еси́.

Конда́к, гла́с 3:

Наслади́мся вси́ дне́сь боже́ственне, о святолю́бцы, я́ко в настоя́щее вре́мя показа́ на́м не́бо преди́вныя и нетле́нныя мо́щи чу́днаго святи́теля и та́ин Боже́ственных строи́теля, Петра́, иера́рха Христо́ва. Те́м у́бо Черного́рскую звезду́ пресве́тлую, дне́сь на́м из гро́ба возсия́вшую, в пе́снех возвели́чим и, я́ко вели́каго ду́ш на́ших попечи́теля и те́пла моли́твенника, умо́лим, к нему́ вопию́ще и уми́льно глаго́люще: новоя́вленне во святы́х Пе́тре, святи́телю прему́дре, Черного́рская похвало́, мо́лим тя́, и́хже мно́гими труды́ и по́двиги твои́ми упа́сл еси́, и за вся́ правосла́вныя моли́ся, во е́же спасти́ся душа́м на́шим.

Икос:

Яко ве́рный учени́к Боже́ственнаго Спаси́теля Го́спода Иису́са Христа́, неукло́нно исполня́л еси́ Его́ святы́я за́поведи. После́дуя Ему́, везде́ ходи́л еси́, иски́й по́мощи люби́мой ти́ Черного́рии. Ты́ посети́в Ве́ну и Берли́н, то́щь отту́ду возврати́лся еси́, и припа́дая всеси́льному Помо́щнику твоему́ Бо́гу, Иже тя́ укрепи́ победи́ти ага́рян и умири́ти сво́й наро́д, учи́л еси́ его́ дне́м и но́щию, я́ко бы́ти ве́рным Бо́гу, жи́ти же между́ собо́ю в согла́сии и бра́тстей любви́, зане́ любя́й бра́та, лю́бит Бо́га. Те́м устро́ив и соедини́в сво́й наро́д, мо́гл еси́ отрази́ти вели́кую си́лу ага́рянскую и изба́витися от все́х многочи́сленных, и́же от За́пада, враго́в, ухищре́ния лука́вых ко́зней злоумышля́ющих Черного́рии. Те́мже, ублажа́юще тя́, вопие́м ти́: ра́дуйся, святи́телю Пе́тре, похвало́, ра́досте и утеше́ние на́ше; ра́дуйся, к Бо́гу о на́с те́плый моли́твенниче; ра́дуйся, учи́телю, возводя́щий о́чи на́ши к небеси́, иде́же е́сть все́х веселя́щихся жили́ще, я́коже и твое́, моля́ся о ча́дех свои́х, получи́ти и́м все́м ве́чное спасе́ние, благоугожда́я Бо́гу.

Пе́снь 7.

Ирмос: Халде́йская пе́щь, огне́м распала́емая, ороша́шеся Ду́хом, Бо́жиим предстоя́нием, о́троцы поя́ху: благослове́н еси́, Бо́же оте́ц на́ших.

Припев: Святителю отче Петре, моли́ Бо́га о нас.

В пещи́ вся́ческих искуше́ний проше́л еси́, блаже́нне о́тче на́ш Пе́тре, оба́че благода́тию Бо́жиею охраня́емь, вся́ враги́ своя́ сокруши́л еси́, зовы́й немо́лчно: благослове́н еси́, Бо́же оте́ц на́ших.

Припев: Святителю отче Петре, моли́ Бо́га о нас.

Подража́я ре́вности апо́стола Христо́ва Петра́, ты́, святи́телю Пе́тре, де́лал еси́ до́брая дела́, я́же ви́девши твоя́ па́ства, прославля́ет чудоде́йствующаго тобо́ю, ди́внаго во святы́х Свои́х Бо́га Изра́илева.

Сла́ва Отцу́ и Сы́ну и Свято́му Ду́ху:

Душе́вныя на́ша боле́зни исцели́, умири́ на́ша волне́ния, утверди́ согла́сие в бли́жних на́м лю́дех, моли́твами просла́вленнаго Тобо́ю, Бо́же, Твоего́ уго́дника, ускоря́ющаго на по́мощь умиле́нною душе́ю тре́бующим пред Тобо́ю заступле́ния о на́с.

И ны́не и при́сно и во ве́ки веко́в. Ами́нь.

Богородичен: В пещи́ халде́йстей та́инство рождества́ Твоего́ проразумева́я, Богоро́дице Де́во, ро́ждшимся от Тебе́ Искупи́телем спасе́ние обрето́хом и, подо́бно отроко́м, Сы́ну Твоему́ и Го́споду, Спа́су на́шему, благода́рно зове́м: благослове́н еси́, Бо́же оте́ц на́ших.

Пе́снь 8.

Ирмос: Ангели и небеса́, на Престо́ле сла́вы седя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во ве́ки.

Припев: Святителю отче Петре, моли́ Бо́га о нас.

Изде́тска и от ю́ности потща́лся еси́, святи́телю Пе́тре, свою́ со́весть и се́рдце с душе́ю чи́ста Бо́гу предста́вити, те́мже и Христо́с просла́ви тя́, Ему́же вопие́м: Го́спода воспева́йте и превозноси́те во ве́ки.

Припев: Святителю отче Петре, моли́ Бо́га о нас.

Ангела тя́ во пло́ти ве́мы, зане́ чистоту́ души́ и те́ла ре́вностно соблю́л еси́. Ны́не же водворя́ешися та́мо, иде́же ничто́же скве́рно вхо́дит, пою́ще немо́лчную пе́cнь Бо́гу, препе́тому и превозноси́мому во ве́ки.

Сла́ва Отцу́ и Сы́ну и Свято́му Ду́ху:

Ангелов Творе́ц и всея́ тва́ри Соде́тель, свети́ло доброде́телей яви́ тя, блаже́нне о́тче Пе́тре, Его́же си́лою укрепля́емь бы́вый, дости́гл еси́ соверше́нства духо́внаго, Ца́рствие Христо́во унасле́довал еси́ и со святы́ми ра́достно пое́ши: Го́спода по́йте и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богородичен: Ангельское целова́ние прино́сим Ти́ с любо́вию, Богоро́дице Пречи́стая: ра́дуйся, Благода́тная, Госпо́дь с Тобо́ю! Ты́ же ра́дости нетле́нныя сподо́би по до́лгу Тя́ ублажа́ющия, ро́ждшагося от Тебе́ Го́спода пою́щия и превознося́щия во ве́ки.

Песнь 9

Ирмос: Чу́жде ма́терем де́вство, и стра́нно де́вам деторожде́ние, на Тебе́, Богоро́дице, обоя́ устро́ишася. Те́м Тя́, вся́ племена́ земна́я, непреста́нно велича́ем.

Припев: Святителю отче Петре, моли́ Бо́га о нас.

Чу́жд бы́л еси́ тщесла́внаго превозноше́ния, подава́я все́м о́браз смире́ния, святи́телю Пе́тре, я́ко избега́ти горды́ни и в смире́нии ду́ха велича́ти Христа́ Жизнода́вца.

Припев: Святителю отче Петре, моли́ Бо́га о нас.

Страстьми́ коле́блющияся и бу́рею грехо́вною погружа́емыя лю́ди твоего́ ро́да всегда́ сохраня́й, зане́ и́маши дерзнове́ние ко Го́споду и моли́ся о все́х, благоче́стно пою́щих и сла́вящих Бо́га.

Сла́ва Отцу́ и Сы́ну и Свято́му Ду́ху:

Всегда́ чужда́яся пра́здности, блаже́нне о́тче Пе́тре, при́сно в моли́твах, труде́х и по́двизех о благоустрое́нии и о спасе́нии вве́ренных ти́ от Бо́га люде́й пожи́л еси́, си́лою Го́спода укрепля́емый, Его́же гла́сы хвале́бными немо́лчно велича́л еси́.

И ны́не и при́сно и во ве́ки веко́в. Ами́нь.

Богородичен: Чу́жды на́с яви́, Влады́чице, вла́сти лю́таго мироде́ржца, и в ча́с кончи́ны на́шея на по́мощь ускори́ к на́м, безпомо́щным: мно́го бо мо́жет Ма́терня моли́тва ко Го́споду, и пред Тобо́ю трепе́щут ду́си тмы́, изба́ви наси́лия и от лука́вых наважде́ний сохрани́, Всеблага́я, вся́ лю́ди Твоя́, да Тя́ ра́достными славосло́вии велича́ем.

Свети́лен:

Иера́рше свя́те, богому́дре Пе́тре, Черного́рская сла́во, па́мять твою́ све́тло пра́зднующе, мо́лим тя́ усе́рдно: вся́ лю́ди твоя́, о ни́хже мно́го труди́лся еси́, утверди́ в ве́ре, в любви́ и наде́жде, я́ко да и́ми охраня́емии, в животе́ свое́м велича́ют Бо́га на́шего.

Сла́ва, и ны́не, Богородичен:

Све́т ми́рови возсия́л е́сть в рождестве́ Твое́м, Пречи́стая Богома́ти. Осия́й у́бо у́м на́ш, позна́нием Сы́на Твоего́, се́рдце на́ше уязви́ любо́вию к Боже́ственным за́поведем, укрепля́я ны́ моли́твами твои́ми в ве́ре и благоде́лании.

Стихи́ры, гла́с 5:

Светле́йше со́лнца возсия́ всепра́зднственная па́мять твоя́, святи́телю Пе́тре, луча́ми блиста́ют твоя́ доброде́тельная дея́ния и озаря́ют ве́рных чу́вства све́том чуде́с твои́х. Сию́ у́бо пра́зднующе, ра́достно тя́ восхваля́ем и ве́рно ублажа́ем.

Ра́дуйся, главо́ освяще́нная, жили́ще Ду́ха Пресвята́го, сосу́де избра́нный Бо́жия благода́ти! Наста́ви все́х на́с ходи́ти путе́м богоуго́дных исправле́ний твои́х, и приклони́ся ми́лостивно ко гласо́м хвале́бным, и́миже че́ствуем па́мять твою́, святи́телю Пе́тре, зане́ ты́ еси́ боля́щих цели́тель и печа́льных уте́шитель. Помяни́ вся́ ны́ в моли́твах твои́х ко Го́споду и испроси́ на́м Его́ ве́лию ми́лость.

Стра́сти теле́сныя и враги́ держа́вы твоея́, приле́жным к Бо́гу моле́нием и воздержа́нием укроти́л еси́, зми́я льсти́ваго сле́зными по́двиги умертви́л еси́, богоно́сне Пе́тре, и угожда́я Бо́гу па́че ины́х, досточу́дне, Иже тя́ и украси́ небе́сными дарова́ньми, Госпо́дь Иису́с, Спа́с ду́ш на́ших.

Ра́дуйся, пра́вило ве́ры, ра́дуйся, люби́телю ро́да Се́рбскаго, блаже́нне иера́рше Пе́тре! Яко оте́чество твое́ земно́е озаря́я чудесы́, прославля́еши и по сме́рти свое́й, утвержда́еши лю́ди твоя́ в ве́ре Правосла́вней, исцеля́я неду́ги и́х и моля́ся Христу́ Бо́гу дарова́ти все́м на́м ве́лию ми́лость.

Сла́ва, и ны́не, гла́с 4:

Дре́вле Бо́г, глаго́лавый отце́м во проро́цех, в после́док дни́й возглаго́ла на́м в Сы́не, Его́же благода́тию и до дне́сь глаго́лет на́м в наста́вниках на́ших, в животе́ свое́м поуча́ющих на́с ве́ре и наде́жде, по исхо́де же свое́м уверя́ющих на́с в любви́ соверше́нней, николи́же отпа́дающей. Ихже моли́твами, Христе́, сохрани́ и спаси́ ду́ши на́ша.

Молитва

О великий святителю и чудотворче Божий Петре, равноапостольный проповедниче Евангелия Христова, пастырю разумнаго стада Его и столпе Церкве Православныя, неложный народный вождю, учителю и просве-тителю, великий Божий угодниче, приими со свойственным ти милосердием нас грешных, молящихся ти и к твоему всемощному заступлению и предстательству прибегающих.

Молимся ти, испроси нам у Всемилосерд-наго Человеколюбца Христа, Единаго Бога и Спаса нашего, да не помянет беззакония и грехи наша, но да по-милует нас по велицей милости Своей, да нам дарует душевное и телесное здравие, любовь, мир и единение, и вся полезная к вечному животу и спасению, в сердцах наших обнови безсмртную светлость истиннаго богопознания, да вся творим во славу Творца, Спаса и Бога нашего.

О великий святителю и угодниче Христов, Цетиньский чудотворче, пастырю и молитвенниче всего рода Сербскаго и Православнаго, молитвами твоими и небесною благодатию Святаго Духа сохраняй Богом дарованное ти стадо и вси грады, веси и земли христианския от глада, мора, труса, потопа, огня, меча, нашествия иноплеменных, братоубийственныя рати и злобы, избави нас от всякия неправды и лжи, от безбожия, неведения, ереси и раскола, испроси нам у Христа Бога покаяние, да будем вси род твой по телеси и духу.

О Великий и Небесный Боже, Альфа и Омего всяческих, Начальниче веры нашея и живота нашего, приими молитвы Своего угодника, владыки святаго, той бо Ти молится за нас грешных и недостойных раб Твоих. Аще бо и Ти много согрешихом, обаче не отступихом от Тебе, Единаго Живаго и Истиннаго Бога и Спаса нашего, Емуже подобает от всякия твари всякая слава, честь и поклоне-ние: Отцу и Сыну и Святому Духу, ныне и присно и во веки веков. Аминь.