30 октября.

Канон святому пророку Осии.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 2:

Проро́ка Твоего́ Оси́и па́мять, Го́споди, пра́зднующе,/ тем Тя мо́лим:// спаси́ ду́ши на́ша.

Стихи́ры, гла́с 1.

Ду́х Святы́й, / от Отца́ исходя́щий, / твои́м язы́ком определи́ / Христо́во, хотя́щее / в после́дняя ле́та прише́ствие бы́ти / на обновле́ние тва́ри. / И ны́не, сбытие́ / ви́дяще прорече́нных, / твою́, проро́че, па́мять почита́ем.

Во́лею блудя́щее пре́жде / от Тебе́, Человеколю́бче, / естество́ на́ше обручи́в, / оскверне́ния изба́вил еси́ сие́, / Тебе́ Самому́ соедине́нием / совокупи́в па́че ума́ неразлу́чно. / И сего́ о́браз проро́к Тво́й бы́в, / пре́жде блудни́цы / целому́дренно ввожда́ше.

Проро́че богоглаго́ливе, / твоя́ глаго́лания ны́не ви́дя, / испо́лнены благода́тию, / и предстоя́ Бо́гу все́х, / о все́х моли́ся, / соверша́ющих ве́рою па́мять твою́, / си́м испроша́я / грехо́в проще́ние / и ми́р и ве́лию ми́лость.

Кано́н проро́ка. Гла́с 1.

Пе́снь 1.

Ирмос: Помо́гшему Бо́гу во Еги́пте Моисе́ови и те́м фарао́на со всево́инством погрузи́вшему, побе́дную пе́снь пои́м, я́ко просла́вися.

Припев: Пророче Божий Осие, моли́ Бо́га о нас.

Яко богоглаго́льник вои́стинну, я́ко проро́к, Оси́е, Жизнода́телю предстоя́, приле́жно моли́ся изба́вити искуше́ний ве́рно восхваля́ющия тя́.

Припев: Пророче Божий Осие, моли́ Бо́га о нас.

Твоея́ души́ ви́дительное очи́стив от скве́рн, сподо́бился еси́ прозира́ти све́тло бу́дущая и предглаго́лати нело́жно, сла́вне, сбыва́ющаяся.

Сла́ва Отцу́ и Сы́ну и Свято́му Ду́ху:

Прозре́ния исто́чник му́дрость Бо́жия боговеща́ннаго Оси́ю проро́чества показа́ реку́ неоску́дну, кипя́щу боже́ственная уче́ния.

И ны́не и при́сно и во ве́ки веко́в. Ами́нь.

Богородичен: Явльшагося Христа́ от Де́вы на́с ра́ди от Еги́пта явле́нно Оте́ц призва́, я́коже прорече́ Оси́я дре́вле богови́дительнейший.

Пе́снь 3.

Ирмос: Утверди́ мене́, Христе́, на недви́жимом ка́мени за́поведей Твои́х и просвети́ мя све́том лица́ Твоего́: не́сть бо свя́т па́че Тебе́, Человеколю́бче.

Припев: Пророче Божий Осие, моли́ Бо́га о нас.

Уче́нием боголе́пным науче́н Бо́жия изъявле́ния, язы́ков зва́ние я́ве провозгласи́л еси́, проро́че, Ду́хом Святы́м вообража́емь.

Припев: Пророче Божий Осие, моли́ Бо́га о нас.

Бу́дущая предзре́ти я́ко настоя́щая, богому́дре, сподо́бился еси́, иуде́йское я́сно отпаде́ние возвеща́я и зако́нных потребле́ние.

Сла́ва Отцу́ и Сы́ну и Свято́му Ду́ху:

Изба́витися Изра́илю не бра́нию, ни лу́ком, ни всеору́жием, но в Го́споде Бо́зе Вседержи́тели проре́кл еси́, воплоще́ние Сло́ва зна́менуя на́м.

И ны́не и при́сно и во ве́ки веко́в. Ами́нь.

Богородичен: Ра́дуйся, Де́во Честна́я, заче́ншая Сло́во Воплоще́нное, Свое́ю ны́ изба́вльшаго от ле́сти кро́вию свято́ю и те́лом.

Та́же седа́лен, гла́с 8.

Чи́сто се́рдце от страсте́й, проро́че, стяжа́в, я́ко и́стинно орга́н бы́л еси́ сли́чный Ду́ха, от Него́ бога́тно, му́дре, просвеща́емь, и бу́дущих все́х зна́ние прии́м. Те́м, соше́дшеся, святу́ю твою́ па́мять ве́рно соверша́ем, Спа́са сла́вяще, Оси́е приснопа́мятне: моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Пе́снь 4.

Ирмос: Разуме́х, Всеси́льне, Твое́ смотре́ние и со стра́хом просла́вих Тя́, Спа́се.

Припев: Пророче Божий Осие, моли́ Бо́га о нас.

Оси́е, богови́днейшее о́ко церко́вное, бе́д изба́ви хва́лящия тя́.

Припев: Пророче Божий Осие, моли́ Бо́га о нас.

Светле́йшее и тверде́йшее Ду́ха прия́телище, моли́ся спасти́ воспева́ющия тя́.

Сла́ва Отцу́ и Сы́ну и Свято́му Ду́ху:

Судии́ ты́ все́х предстоя́, я́ко боже́ствен проро́к, страсте́й мя́ изба́ви моли́твами твои́ми.

И ны́не и при́сно и во ве́ки веко́в. Ами́нь.

Богородичен: Превозшла́ еси́, Присноде́во, Ангельския чи́ны, Творца́ си́х чревоноси́вши.

Пе́снь 5

Ирмос: От но́щи у́тренююще, воспева́ем Тя́, Христе́ Бо́же, обнища́вшаго на́с ра́ди, и кре́ст и сме́рть пло́тию претерпе́вшаго.

Припев: Пророче Божий Осие, моли́ Бо́га о нас.

Ми́лостивно дви́жимь, научи́л еси́ на́с Бо́жию долготерпе́нию, благоутро́бию же и бла́гости, е́юже вся́ щади́т, проро́че богоглаго́ливе.

Припев: Пророче Божий Осие, моли́ Бо́га о нас.

Умертви́в сме́рть, воста́ Христо́с, я́коже му́дрое твое́ прорече́ние, богогла́се, провозвести́, и жи́знь су́щим во а́де душа́м дарова́.

Сла́ва Отцу́ и Сы́ну и Свято́му Ду́ху:

От глубины́ мя́ грехо́вныя, проро́че Оси́е, твои́ми моли́твами исхи́ти, дерзнове́ние беззазо́рное ко Христу́ име́я, богому́дре пребога́те.

И ны́не и при́сно и во ве́ки веко́в. Ами́нь.

Богородичен: Все́х Госпо́дь и все́х Ца́рь, Отцу́ Собезнача́льный, под ле́том из Тебе́ бы́сть, Богоро́дице Де́во, и пло́ть показа́ся.

Пе́снь 6.

Ирмос: Проро́ка спа́сл еси́ от ки́та, Человеколю́бче, и мене́ из глубины́ прегреше́ний возведи́, молю́ся.

Припев: Пророче Божий Осие, моли́ Бо́га о нас.

Провозглаша́я бу́дущая, Оси́е всеблаже́нне, е́же к челове́ком Сло́ва возвести́л еси́ соше́ствие.

Припев: Пророче Божий Осие, моли́ Бо́га о нас.

Умерщвле́нныя греха́ми, Жи́знь Безсме́ртная, от а́довых преде́л, я́коже проре́кл еси́, возведе́.

Сла́ва Отцу́ и Сы́ну и Свято́му Ду́ху:

Зако́нных отъя́тие, иуде́ев отпаде́ние и язы́ков введе́ние, проро́че, яви́л еси́.

И ны́не и при́сно и во ве́ки веко́в. Ами́нь.

Богородичен: Из чре́ва Твоего́ возсия́ Бо́г Сло́во, Всенепоро́чная, пло́тию на́с ра́ди неизрече́нно обло́жся я́ко Благоутро́бен.

Конда́к, гла́с 8.

Му́жества тезоимени́тому благодаре́ние, я́ко благоче́стия тайноглаго́льнику, похва́льная воззове́м от любве́ тебе́, богоблаже́нне, но́ я́ко име́я дерзнове́ние ко Го́споду, от вся́ких лю́тых ны́ спаси́, да пое́м: ра́дуйся, о́тче приснопа́мятне.

Икос:

Ангел и́стины от Кри́та яви́лся еси́, обличи́в злоче́стия, о́тче, и с богосло́вным гла́сом, ра́нима тя́ зря́, всему́дре, ужаса́юся стра́сти, зовя́ и вопия́ ти́ сицева́я: ра́дуйся, Бо́жий кре́пкий ору́жниче; ра́дуйся, Госпо́день ве́рный уго́дниче; ра́дуйся, ху́льных враго́в сопротивобо́рниче; ра́дуйся, злоглаго́ливых челове́ков обузда́ние; ра́дуйся, я́ко пострада́л еси́ за о́браз Христо́в; ра́дуйся, я́ко восхласти́л еси́ сла́сти плотски́я; ра́дуйся, я́ко поще́нием нача́ла тмы́ победи́л еси́; ра́дуйся, я́ко страда́нием Копрони́му сопроти́вился еси́; ра́дуйся, исто́чниче чуде́с приснотеку́щий; ра́дуйся, зе́млю уясни́вый страда́ньми твои́ми; ра́дуйся, ве́рных жили́ще, о́тче; ра́дуйся, на́ш предста́телю и изба́вителю; ра́дуйся, о́тче приснопа́мятне.

Пе́снь 7.

Ирмос: Авраа́мстии о́троцы в пещи́ Тро́ицу прообрази́вше, о́гненный пла́мень на ро́су преложи́ша, и пою́ще, вопия́ху: благослове́н еси́, Бо́же оте́ц на́ших.

Припев: Пророче Божий Осие, моли́ Бо́га о нас.

Па́че естества́ просвеще́нием, Оси́е, у́м просвети́в тво́й, бу́дущих, блаже́нне, зна́нием обогати́лся еси́, Влады́це зовы́й: благослове́н еси́, Бо́же оте́ц на́ших.

Припев: Пророче Божий Осие, моли́ Бо́га о нас.

Ты́ в рука́х проро́ков уподо́бився, умно́жил еси́, Безсме́ртне, виде́ния, Спа́се, разли́чно образу́емь, Тебе́ ве́рно вопию́щим: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Изра́илев ты́ исто́чник, спасе́ния пролива́ющий во́ды, реку́ ми́рную — Христа́ пропове́дая, Оси́е, Ему́же вопие́м: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Из Безнача́льнаго Отца́ возсия́в, из Тебе́ воплоти́ся, Богома́ти Отрокови́це, за ми́лость неизрече́нную, Ему́же пою́ще, вопие́м: благослове́н еси́, Бо́же оте́ц на́ших.

Пе́снь 8.

Ирмос: В пла́мени о́гненне горя́щия пе́щи сохра́ншаго де́ти, и во зра́це Ангела снизше́дшаго к ни́м, по́йте Го́спода и превозноси́те Его́ во ве́ки.

Припев: Пророче Божий Осие, моли́ Бо́га о нас.

Па́че постиже́ния проро́ком да́нная от Боже́ственнаго да́ра предзна́тельное де́йство и бу́дущих зна́ние, пе́ти Го́спода и превозноша́ти Его́ во ве́ки.

Припев: Пророче Божий Осие, моли́ Бо́га о нас.

Уста́ богодохнове́нная стяжа́в и язы́к богоглаго́лив, Оси́е, богоче́стия све́т просвеща́ющь пое́ши: по́йте Го́спода и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Словесы́ и дея́ньми проро́чествуя, облича́еши лю́ди блу́дствовавшия, обра́зно, пребога́те, науча́я пе́ти: по́йте Го́спода и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богородичен: Соприсносу́щное Бо́жие Бо́г Сло́во, от Святы́я Де́вы вопло́щся, яви́ся ве́рою вопию́щим: по́йте Го́спода и превозноси́те Его́ во ве́ки.

Песнь 9

Ирмос: Ра́дуйся, де́вственная похвало́, ра́дуйся, Ма́ти Пречи́стая, Юже вся́ тва́рь боже́ственными пе́сньми велича́ем.

Припев: Пророче Божий Осие, моли́ Бо́га о нас.

Че́сть, я́ко проро́к, прия́л еси́, Оси́е, прие́м вене́ц благоле́пия от Бо́га, всеблаже́нне.

Припев: Пророче Божий Осие, моли́ Бо́га о нас.

Все́м све́том озаря́емь Христо́вым всеизря́дне, да́ждь твои́ми моли́твами Сего́ ми́лостива пою́щим тя́.

Сла́ва Отцу́ и Сы́ну и Свято́му Ду́ху:

Хвала́ми с чи́нми Ангельскими, Оси́е, предстои́ши, Влады́ку хваля́, пожи́в житие́ равноа́нгельное.

И ны́не и при́сно и во ве́ки веко́в. Ами́нь.

Богородичен: Спасти́ восхоте́в челове́ка Спа́с и Госпо́дь, от Пречи́стыя Де́вы в пло́ть на́шу оде́яся.

Молитва

О прехва́льный и пречу́дный проро́че Бо́жий Оси́е! Услы́ши нас, гре́шных и непотре́бных, в час сей предстоя́щих пред свято́ю твое́ю ико́ною и усе́рдно прибега́ющих к хода́тайству твоему́. Моли́ о нас Человеколю́бца Бо́га, да пода́ст нам дух покая́ния и сокруше́ния о гресе́х на́ших и всеси́льною свое́ю благода́тию да помо́жет нам оста́вити пути́ нече́стия, преспева́ти же во вся́ком де́ле бла́зе; да укрепи́т нас в борьбе́ со страстьми́ и похотьми́ на́шими; да всади́т в се́рдце на́ше дух смире́ния и кро́тости, дух братолю́бия и незло́бия, дух терпе́ния и целому́дрия, дух ре́вности к Сла́ве Бо́жией и спасе́нию бли́жних. Упраздни́ моли́твами твои́ми, проро́че, злы́я обы́чаи ми́ра, па́че же поги́бельный и тлетво́рный дух ве́ка сего́, заража́ющий христиа́нский род неуваже́нием к Боже́ственней правосла́вной ве́ре, к уста́вом Святы́я Це́ркве и к за́поведем Госпо́дним, непочте́нием к роди́телем и власте́м предержа́щим, и низверга́ющий люде́й в бе́здну нече́стия, развраще́ния и поги́бели. Отврати́ от нас, пречу́дне проро́че, предста́тельством твои́м пра́ведный гнев Бо́жий и изба́ви вся гра́ды и ве́си Оте́чества на́шего от бездо́ждия и гла́да, от стра́шных бурь и землетрясе́ний, от смертоно́сных язв и боле́зней, от наше́ствия враго́в и междоусо́бныя бра́ни. Укрепи́ твои́ми моли́твами, пресла́вне, предержа́щия вла́сти на́ша в вели́цем и многотру́днем по́двизе народоправле́ния, благопоспе́шествуй им во всех благи́х дея́ниих и начина́ниих к водворе́нию ми́ра и пра́вды в стране́ на́шей. Посо́бствуй христолюби́вому во́инству во бране́х со врага́ми на́шими. Испроси́, проро́че Бо́жий, от Го́спода па́стырем на́шим святу́ю ре́вность по Бо́зе, серде́чное попече́ние о спасе́нии пасо́мых, му́дрость во уче́нии и управле́нии, благоче́стие и кре́пость, во искуше́ниих, судия́м испроси́ нелицеприя́тие и безкоры́стие, правоту́ и сострада́ние к оби́димым, всем нача́льствующим попече́ние о подчине́нных, ми́лость и правосу́дие, подчине́нным же поко́рность и послуша́ние ко власте́м и усе́рдное исполне́ние свои́х обя́занностей; да та́ко в ми́ре и благоче́стии пожи́вше в сем ве́це, сподо́бимся прича́стия ве́чных благ в Ца́рствии Го́спода и Спа́са на́шего Иису́са Христа́, Ему́же подоба́ет честь и поклоне́ние со безнача́льным Его́ Отце́м и Пресвяты́м Ду́хом во ве́ки веко́в. Ами́нь.