30 октября.

Канон преподобномученику Андрею Критскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

По́стнически предподвиза́вся на горе́, у́мная враго́в ополче́ния всеору́жием Креста́ погуби́л еси́, всеблаже́нне. Па́ки же ко страда́льчеству му́жески обле́клся еси́, уби́в Копрони́ма мече́м ве́ры, и обои́х ра́ди венча́лся еси́ от Бо́га, преподобному́чениче Андре́е, приснопа́мятне.

Кано́н преподо́бнаго. Гла́с 2.

Пе́снь 1.

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припев: Преподобномучениче Андрее, моли́ Бо́га о нас.

Му́жески стра́сти плотски́я, о́тче, порабо́тив, по́мыслом му́жества я́ко тезоимени́т, мучи́телей суровство́ пора́товал еси́ и зако́нно пострада́л еси́. Те́м тя́ согла́сно, ве́рою соше́дшеся, ублажа́ем.

Припев: Преподобномучениче Андрее, моли́ Бо́га о нас.

Мы́сленно, я́ко у́гль, разже́гся теплото́ю Боже́ственнаго Ду́ха, ле́д страсте́й раста́ил еси́, пото́ки же кро́вными о́гнь погаси́л еси́ злоче́стия чу́ждий, велича́йше Андре́е, испове́дниче богоблаже́нне.

Сла́ва Отцу́ и Сы́ну и Свято́му Ду́ху:

Связа́вся любо́вию Христа́, о́тче, от ю́ности кре́ст тво́й восприи́м, ра́дуяся, Тому́ после́довал еси́, отре́кся себе́ сама́го по́стничеством, и испове́данием, и соверше́ннейшим страда́нием.

И ны́не и при́сно и во ве́ки веко́в. Ами́нь.

Богородичен: Уны́ния сно́м ду́шу всегда́ отягчева́я, к Твоему́, Де́во Ма́ти Пречи́стая, притека́ю заступле́нию: к бо́дрости покая́ния воздви́гни, ве́чнующаго тогда́ избавля́ющи мя́ муче́ния.

Пе́снь 3.

Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Припев: Преподобномучениче Андрее, моли́ Бо́га о нас.

Утверди́в ра́зума твоего́ стопы́, о́тче, на ка́мени любве́ Христо́вы, отню́д дохнове́нии не поколеба́лся еси́ проти́вными, вопия́ Творцу́ твоему́: Ты́ еси́ Бо́г на́ш, и не́сть пра́веден, па́че Тебе́, Го́споди.

Припев: Преподобномучениче Андрее, моли́ Бо́га о нас.

Исцеле́ния и пре́жде конца́ и по конце́ источа́я, помоществу́еши су́щим в не́мощех и ду́хи нечи́стыя отго́ниши, Андре́е преподо́бне, вопия́ Созда́телю твоему́: Ты́ еси́ Бо́г на́ш, и не́сть пра́веден, па́че Тебе́, Го́споди.

Сла́ва Отцу́ и Сы́ну и Свято́му Ду́ху:

По́стничества слеза́ми омове́н, кро́вию му́ченическою удобри́лся еси́, и ве́сь красне́йш показа́вся, вопия́, восте́кл еси́ к жела́емому: Ты́ еси́ Бо́г на́ш, и не́сть пра́веден, па́че Тебе́, Го́споди.

И ны́не и при́сно и во ве́ки веко́в. Ами́нь.

Богородичен: Пло́ти подо́бием бы́вшаго, Отцу́ Единосу́щна Бо́га Сло́ва родила́ еси́, Всенепоро́чная, па́че естества́ Де́ва пребы́вши и по рождестве́. Сего́ ра́ди ве́рою Тя́ ублажа́ем.

Та́же седа́лен, гла́с 4.

В посте́ ди́внаго и страда́нии восхва́лим, ве́рнии, по до́лгу, я́ко благоче́стия пропове́дника и побо́рника кре́пкаго; се́й бо без стра́ха гноеиме́нному противля́яся, чествова́тися пропове́да Христо́ву о́бразу, я́ко по́стников все́х удобре́ние и му́чеников му́жества подо́бие.

Слава И ны́не, Богородичен:

Иже на престо́ле херуви́мстем седя́й и в не́дрех Отчих водворя́яся, я́ко на престо́ле святе́м седи́т Свое́м, Влады́чице, в не́дрех Твои́х; вопло́щся бо Бо́г вои́стинну, воцари́ся над все́ми язы́ки, и разу́мно ны́не пои́м Ему́, Его́же умоли́ спасти́ся рабо́м Твои́м.

КрестоБогородичен:

Из Безнача́льнаго Отца́ рожде́ннаго, напосле́док Тя́ пло́тию Ро́ждшая, на Кресте́ ви́сяща, зря́щи, Христе́, — увы́ Мне́, любе́знейший Иису́се, — вопия́ше, — ка́ко сла́вимый я́ко Бо́г от Ангел, от беззако́нных ны́не челове́к, Сы́не, хотя́ распина́ешися? Пою́ Тя, долготерпели́ве.

Пе́снь 4.

Ирмос: Прише́л еси́ от Де́вы не хода́тай, ни Ангел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти́: сла́ва си́ле Твое́й, Го́споди.

Припев: Преподобномучениче Андрее, моли́ Бо́га о нас.

Послушли́в бы́в Христо́вых за́поведей, Того́ подо́бию, о́тче, че́стно поклоня́лся еси́. Те́м пребеззако́нный тя́ многообра́зными ра́нами умертви́.

Припев: Преподобномучениче Андрее, моли́ Бо́га о нас.

Миродохнове́н доброде́телей благово́нием бы́в, во гро́бе лежа́ благово́нствиши ли́ца призыва́ющих тя́ несомне́нным се́рдцем, о́тче преподо́бне.

Сла́ва Отцу́ и Сы́ну и Свято́му Ду́ху:

Неду́говавша Мамо́на всезле́йшаго, преподо́бне, окая́нно е́ресию, со дерзнове́нием обличи́л еси́, побо́рник бы́в правосла́вных, Андре́е досточу́дне.

И ны́не и при́сно и во ве́ки веко́в. Ами́нь.

Богородичен: Яко Благопло́дная возрасти́ла еси́ благода́тный Кла́с, пита́ющий вся́, правосла́вно почита́ющия Тя́, Влады́чице Всепе́тая, и из Тебе́ вопло́щшагося Сло́ва, Всечи́стая.

Пе́снь 5

Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Припев: Преподобномучениче Андрее, моли́ Бо́га о нас.

Омраче́ние возненави́дев, о́тче, греха́, ве́сь блиста́нием безстра́стия све́т яви́лся еси́, и просвеща́еши ве́рныя, приходя́щия боже́ственному твоему́ гро́бу, целе́ний заря́ми, Бо́жиею благода́тию.

Припев: Преподобномучениче Андрее, моли́ Бо́га о нас.

Ве́сь Бо́жие прия́телище яви́лся еси́, до́бре пожи́в и доблему́дренно пострада́в, о́тче, и ны́не, во гро́бе лежа́, пребыва́еши це́л, блаже́нне, и неразруши́мь, все́х ве́рных разреша́я стра́сти.

Сла́ва Отцу́ и Сы́ну и Свято́му Ду́ху:

Юношески до́блествовав, всеблаже́нне, на де́моны и на челове́ки ерети́чествующия, ве́чнующаго сподо́бился еси́ благосла́вия и венце́в, Андре́е преподо́бне, те́м ве́рнии тя́ при́сно ублажа́ем.

И ны́не и при́сно и во ве́ки веко́в. Ами́нь.

Богородичен: Но́сиши Христа́ на объя́тиях, неизрече́нно роди́вши, объе́млющаго зло́бе прекло́ншияся и лука́вому окая́нно порабоще́нныя, Отрокови́це Всенепоро́чная, те́м Тя́ ве́рнии при́сно ублажа́ем.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Припев: Преподобномучениче Андрее, моли́ Бо́га о нас.

В темни́цу тя́ беззако́нный вве́рже, Влады́кою, Андре́е, сохраня́ема и Того́ соблюда́юща непреме́нно Боже́ственное хоте́ние.

Припев: Преподобномучениче Андрее, моли́ Бо́га о нас.

Растерза́емо те́ло небре́гл еси́ и раздробля́емо ра́нами, блаже́нне, но я́коже ино́му стра́ждущу терпе́л еси́, Боже́ственно укрепля́емь.

Сла́ва Отцу́ и Сы́ну и Свято́му Ду́ху:

Яко многоце́нное бога́тство кры́емое, о́тче, явля́ешися, предлежа́ лице́м благочести́вых, и чудесы́ вся́ обогаща́еши, почита́ющия тя́.

И ны́не и при́сно и во ве́ки веко́в. Ами́нь.

Богородичен: Разу́мный Тя́ све́щник прозря́ще дре́вле проро́к, Боже́ственную Свещу́ — Христа́, Чи́стая, нося́щу, Имже вси́ мы́ просвети́хомся.

Конда́к [преподо́бному], гла́с 3:

Пра́зднует дне́сь Ца́рствующий гра́д пра́здник пресве́тлый светоно́сныя Твоея́ па́мяти, вся́кий призыва́я гра́д и страну́, ра́дуется бо, я́ко име́я сокро́вище ве́лие, многострада́льное твое́ те́ло, Андре́е му́чениче, Правосла́вия свети́льниче.

Пе́снь 7.

Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Припев: Преподобномучениче Андрее, моли́ Бо́га о нас.

Возвыша́емая волне́ния лука́вствия твоего́ ума́ не поколеба́ша, Андре́е сла́вне, на ка́мени зна́ния Христо́ва стоя́ща. Те́м небу́рное приста́нище я́ве обурева́емым бы́л еси́.

Припев: Преподобномучениче Андрее, моли́ Бо́га о нас.

Бу́ими взыска́ньми лукавому́дрый, умо́м омрача́емый, укра́сти окуша́шеся тя́, богосло́вия светлостьми́ удобря́ема, но яви́ся сме́ха досто́ин, му́дре, испо́лнився студа́ дерзнове́нием твои́м.

Сла́ва Отцу́ и Сы́ну и Свято́му Ду́ху:

Ум тво́й манове́ньми Боже́ственнейшими украша́емь, Андре́е досточу́дне, звезда́ всесве́тлая все́м показа́ся, чудесы́ коего́ждо ве́рныя просвеща́я, хва́лящия тя́.

И ны́не и при́сно и во ве́ки веко́в. Ами́нь.

Богородичен: Хра́м была́ еси́ Жива́го Бо́га, в не́мже жили́ще неизглаго́ланно сотвори́, Де́во Всепе́тая, на небесе́х обита́яй, и бла́гости ра́ди мно́гия Челове́к бы́ти изво́лив.

Пе́снь 8.

Ирмос: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Припев: Преподобномучениче Андрее, моли́ Бо́га о нас.

Стра́сти плотски́я, му́дре, предъумертви́в по́стническими по́двиги, пострада́л еси́, крепча́йше, Спа́сово подо́бие и Присноде́вы, преподо́бне, и святы́х чествова́тельно лобыза́я.

Припев: Преподобномучениче Андрее, моли́ Бо́га о нас.

Яростно на Христа́ неи́стовствующе, я́ко зве́рие свире́пии, возложи́ша, о́тче, умертви́ти тя́. Те́м влеку́ще и бию́ще, вверго́ша в про́пасть, свиде́теля Истины тебе́ я́вственно соде́ловающе.

Сла́ва Отцу́ и Сы́ну и Свято́му Ду́ху:

Чудесы́ ве́рныя, я́ко вода́ми, напая́еши, и отго́ниши, всеблаже́нне, лука́вствия ду́хи, и очища́еши неду́ги, благода́ть врачева́ний свы́ше прие́м от Христа́ Бо́га на́шего.

И ны́не и при́сно и во ве́ки веко́в. Ами́нь.

Богородичен: Яви́лася еси́ небе́с, Де́во, простра́ннейши, Бо́га во утро́бе Твое́й вмести́вшая, все́ми Невмести́маго, Его́же моли́ изба́вити утесне́ния, Чи́стая Влады́чице, душетле́ннаго благоче́стно воспева́ющия Тя́.

Песнь 9

Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Припев: Преподобномучениче Андрее, моли́ Бо́га о нас.

Се́, о́тче преподо́бне, тече́ние твое́ соверши́в, Правосла́вную ве́ру соблю́л еси́ непоро́чну, ея́же ра́ди пострада́в зако́нно, вене́ц же сугу́б прия́л еси́ свы́ше, я́ко му́ченик непобеди́мь и по́стник непобо́рен.

Припев: Преподобномучениче Андрее, моли́ Бо́га о нас.

Яко кри́н сладково́нный и я́ко шипо́к, о́тче, процве́л еси́ в цве́тнице боже́ственнаго я́ве поще́ния, и благово́нствуеши, я́ко ке́др, му́ченически просвеще́н, Андре́е всехва́льне, мона́шествующих удобре́ние.

Припев: Преподобномучениче Андрее, моли́ Бо́га о нас.

Зна́меньми и чудесы́ я́ве украша́емь, невреди́мь еси́ все́м на виде́ние лежа́, всеблаже́нне Андре́е, и ду́ши просвеща́я ве́рою те́плою приходя́щих тебе́, и всегда́ блажа́щих тя́.

Сла́ва Отцу́ и Сы́ну и Свято́му Ду́ху:

Де́нь пра́зднствен и весе́лия испо́лнен, святу́ю твою́ па́мять творя́ще дне́сь, ве́рою вопие́м тебе́, о́тче: к Бо́гу святы́ми твои́ми моли́твами все́х на́с изба́ви жите́йских обстоя́ний.

И ны́не и при́сно и во ве́ки веко́в. Ами́нь.

Богородичен: Све́та селе́ние утро́ба Твоя́ бы́сть, просве́щшаго ми́р заря́ми Божества́ и неве́дения тму́ от земли́, Всенепоро́чная Отрокови́це, соверше́нно отгна́вшаго, Того́ ра́ди Тя́ сла́вим.

Свети́лен.

Андре́я добропобе́дника похва́лим вси́, боже́ственно пра́зднующе честну́ю его́ па́мять, я́ко да изба́вимся от неду́г; се́й бо Спа́сова честна́я воображе́ния и святы́х все́х всеблагоче́стно чествова́ти пропове́да. Те́м, вене́ц на небесе́х прие́мь, со Ангелы ра́дуется.

Богородичен:

Го́ру Бо́жию пресвяту́ю, и свети́льник, и ста́мну, и трапе́зу, и мо́ст, же́зл же, и свещу́, и Боже́ственный престо́л, и две́рь, и хра́м, и черто́г воспои́м, богому́дрии, Чи́стую и Де́ву, из Нея́же Бо́г, воплоти́вся невра́щно и па́че естества́, обожи́ прия́тие неизрече́нным едине́нием.

Молитва

О святы́й уго́дниче Бо́жий, преподобному́чениче Андре́е! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.