2 октября

Канон священномученику Константину, пресвитеру Богородскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4:

Священником украшение и мучеником похвала/ явился еси, отче Константине,/ ты бо, многия люди во ограду Церкви возвратил еси/ и небоязненно страдания и смерть за Христа приял еси./ Ныне же моли Человеколюбца Бога/ Церковь Русскую от ересей и расколов сохранити/ и спастися душам нашым.

Величание:

Величаем тя,/ священномучениче Константине,/ и чтим честная страдания твоя,/ яже за Христа/ претерпел еси.

Стихира, глас 6:

Града Богородска украшение,/ Церкве Русския светлую похвалу,/ Православия твердаго поборника,/ благочестия истиннаго ревнителя,/ расколов и ересей искоренителя,/ днесь восхвалим, вернии,/ Константина, священномученика добропобеднаго/ и теплаго о нас пред Богом молитвенника.

Канон священномученика, глас 4.

Песнь 1

Ирмос: Моря чермную пучину/ невлажными стопами/ древний пешешествовав, Израиль/ крестообразныма Моисеовыма рукама/ Амаликову силу в пустыни победил есть.

Припев: Священномучениче Константине, моли́ Бо́га о нас.

Просвети сердце мое, Владыко Господи,/ и подаждь свыше светозарную благодать,/ воспети похвальная пения Твоему угоднику,/ злобу безбожных гонителей победившему.

Припев: Священномучениче Константине, моли́ Бо́га о нас.

От юности Христа всем сердцем возлюбив, Константине блаженне,/ пастырь добрый во дни гонений явился еси/ и мученик непобедимый.

Сла́ва Отцу́ и Сы́ну и Свято́му Ду́ху:

Храм души твоея в чистоте соблюл еси/ и многия добродетели стяжал еси, священномучениче Константине,/ темже и Господь дарова ти силу непоколебиму пребыти/ и Царствия Небеснаго достигнути.

И ны́не и при́сно и во ве́ки веко́в. Ами́нь.

Богородичен: Волнами страстей боримую душу мою/ чистотою помыслов умири, Пресвятая Дево,/ Ты бо еси Заступница усердная рода христианскаго.

Песнь 3

Ирмос: Веселится о Тебе Церковь Твоя, Христе, зовущи:/ Ты моя крепость, Господи,/ и прибежище, и утверждение.

Припев: Священномучениче Константине, моли́ Бо́га о нас.

Апостольским стопам последуя/ и благодатию Духа Святаго просвещаемь, отче Константине,/ множество суемудренных во ограду святыя Церкве привел еси/ и овцы стада Христова соделал еси.

Припев: Священномучениче Константине, моли́ Бо́га о нас.

Лик светлый составльше,/ воспоим, память святаго Константина,/ той бо, славою небесною облистаемь,/ вкупе с новомученики Российскими молится о спасении душ наших.

Сла́ва Отцу́ и Сы́ну и Свято́му Ду́ху:

Яко крин сельный и цвет благоуханный,/ процвел еси подвиги твоими, блаженне Константине,/ и кровей твоих излияньми плоды многия Богови принесл еси.

И ны́не и при́сно и во ве́ки веко́в. Ами́нь.

Богородичен: Юже ангели светоносно воспевают и земнороднии достойно ублажают,/ Божию Матерь вси почтим/ и чистое житие Той принесем.

Седален, глас 3:

Возсиял еси, яко звезда лучезарная, достохвальне,/ тьму суемудрия разгоняя и еретичествующих лукавое мудрование посрамляя,/ мучимыя страстию пианства на путь спасительный возвращая/ и заблуждшыя люди к покаянию призывая./ Темже, прославляюще добродетели и подвиги твоя, умильно вопием:/ досточудне отче Константине, укрепи нас во истинней вере/ и на путь благочестия настави молитвами твоими.

Песнь 4

Ирмос: Вознесена Тя видевши Церковь на Кресте,/ Солнце Праведное,/ ста в чине своем,/ достойно взывающи:/ слава силе Твоей, Господи.

Припев: Священномучениче Константине, моли́ Бо́га о нас.

Пение похвальное благоговейно приносим ти, святе Константине,/ Бога же, давшаго ти крепость во страдании, прославляем, взывающе:/ слава силе Твоей, Господи.

Припев: Священномучениче Константине, моли́ Бо́га о нас.

Очистив ум твой и божественными помыслы озарився, святе,/ яко пастырь добрый, душу твою за овцы полагал еси,/ молитвенно Богу взывая:/ слава силе Твоей, Господи.

Сла́ва Отцу́ и Сы́ну и Свято́му Ду́ху:

Богородскую паству водами жизни вечныя напоил еси, богоносе Константине,/ и, яко делатель добрый, в вертограде Христове усердно потрудился еси, присно воспевая:/ слава силе Твоей, Господи.

И ны́не и при́сно и во ве́ки веко́в. Ами́нь.

Богородичен: Евангельских учений росою божественною/ окропи иссохшая сердца наша, Пречистая Дево,/ да воспоем Тя, яко Источника Жизни нам рождшую.

Пе́снь 5

Ирмос: Ты, Господи, мой Свет,/ в мир пришел еси,/ Свет Святый, обращаяй из мрачна неведения/ верою воспевающыя Тя.

Припев: Священномучениче Константине, моли́ Бо́га о нас.

Духа Пресвятаго обитель чудная быв, преблаженне Константине,/ люди, суемудрием омраченныя и гордостию ослепленныя,/ к свету истиннаго боговедения привел еси.

Припев: Священномучениче Константине, моли́ Бо́га о нас.

Озари нашя душы, помраченныя грехом,/ и к свету богоразумия настави, пастырю добрый,/ да путем заповедей Господних непорочно ходити будем.

Сла́ва Отцу́ и Сы́ну и Свято́му Ду́ху:

На камени веры утверждаяся, досточудне Константине,/ столп непоколебим в годину гонений явился еси,/ зловерие нечестивых мужески посекая.

И ны́не и при́сно и во ве́ки веко́в. Ами́нь.

Богородичен: Одигитрие Благая,/ на путь спасения направи нас молитвами Твоими/ и от скорбей, находящих на ны, избави.

Песнь 6

Ирмос: Пожру Ти со гласом хваления, Господи,/ Церковь вопиет Ти,/ от бесовския крове очищшися/ ради милости от ребр Твоих/ истекшею Кровию.

Припев: Священномучениче Константине, моли́ Бо́га о нас.

Светлаго праздника твоего память, блаженне Константине,/ верныя люди воедино собра,/ еже прославити твоя доблественныя подвиги и тяжкая страдания,/ имиже мрак безбожия разгоняется.

Припев: Священномучениче Константине, моли́ Бо́га о нас.

Неистовою злобою гонителей,/ еще жив сый, немилостивно в земли погребен был еси, страстотерпче,/ обаче, яко клас зрелый, в раи сладости богатно процвел еси.

Сла́ва Отцу́ и Сы́ну и Свято́му Ду́ху:

Апостолом, мучеником и пророком в ревности о славе Божией подобяся,/ отверзл еси уста во обличение беззаконных, священне Константине,/ и, муки за Христа прием,/ лику святых сочетался еси.

И ны́не и при́сно и во ве́ки веко́в. Ами́нь.

Богородичен: Гору Тя, благодатию Божиею приосененную,/ пророк прозорливо разуме, Пречистая Дево,/ от Тебе бо отсечеся Камень Жизни, Христос Бог наш,/ во спасение наше и обновление.

Кондак, глас 5:

Ревностию о вере Христове от юности возгоревся,/ богомудре отче Константине,/ заповедем евангельским последовал еси/ и светильник веры заблуждшым явился еси./ Темже, страданием за Христа жизнь твою увенчав,/ Бога в подвизе прославил еси,/ Егоже моли спастися душам нашым.

Икос:

Гласу Божественнаго Учителя повинуяся,/ яко премудр ловец явился еси, святе Константине,/ и, мрежею словес душы заблуждшыя из глубины греховныя извлачая,/ на путь спасения наставил еси./ Сего ради похвальная восписуем ти сице:/

Радуйся, истиннаго пастырства светлое сияние;/

радуйся, честнаго мученичества добрая похвало./

Радуйся, мед словес евангельских вкусивый;/

радуйся, сими глад духовный утоливый./

Радуйся, заповедей Божиих ревностный исполнителю;

радуйся, неверия и раскола мудрый обличителю.

Радуйся, Константине досточудный, теплый о нас пред Богом молитвенниче.

Песнь 7

Ирмос: В пещи авраамстии отроцы персидстей,/ любовию благочестия паче,/ нежели пламенем, опаляеми, взываху:/ благословен еси в храме славы Твоея, Господи.

Припев: Священномучениче Константине, моли́ Бо́га о нас.

Огнем Божественныя любве, мучениче Христов Константине,/ лед неверия растопил еси/ и чистотою исповедания твоего возгрел еси верных сердца воспевати Богу:/ благословен еси в храме славы Твоея, Господи.

Припев: Священномучениче Константине, моли́ Бо́га о нас.

Кротце страдания терпя, святе Константине,/ незлобием единаго от мучителей ко Христу обратил еси,/ еще же и самовидца кончины твоея мученичеству сочетал еси./ Ныне же купно с ними взываеши:/ благословен еси в храме славы Твоея, Господи.

Сла́ва Отцу́ и Сы́ну и Свято́му Ду́ху:

О, неизглаголаннаго долготерпения!/ Константин блаженный люте умервщляется/ и, еще жив сый, землею покрывается./ Обаче ангели душу его святую к Престолу Божию возносят,/ идеже небожители вопиют:/ благословен еси в храме славы Твоея, Господи.

И ны́не и при́сно и во ве́ки веко́в. Ами́нь.

Богородичен: Надежда и Покров еси на Тя уповающым, Богородице Дево,/ молитвами Твоими на враги видимыя и невидимыя укрепи ны/ и Сыну Твоему пети достойно сподоби:/ благословен еси в храме славы Твоея, Господи.

Песнь 8

Ирмос: Руце распростер, Даниил/ львов зияния в рове затче;/ огненную же силу угасиша,/ добродетелию препоясавшеся,/ благочестия рачители, отроцы, взывающе:/ благословите, вся дела Господня, Господа.

Припев: Священномучениче Константине, моли́ Бо́га о нас.

Страж веры Православныя непоколебимь явился еси, священномучениче,/ первее убо многия лжемудрования изобличая,/ второе же верность Христу пред мучители показуя,/ темже Владыце взываеши:/ благословите, вся дела Господня, Господа.

Припев: Священномучениче Константине, моли́ Бо́га о нас.

Темничное заключение и истязания беззаконных мучителей/ не возмогоша поколебати твердость веры твоея, святе Константине,/ ты бо, мужески вся претерпев, райския обители достигл еси,/ идеже ныне светло воспеваеши:/ благословите, вся дела Господня, Господа.

Сла́ва Отцу́ и Сы́ну и Свято́му Ду́ху:

Аще и убиен был еси, мучениче славне,/ обаче, жив сый, ныне во обителех Царя Небеснаго пребываеши/ и с лики святых новомучеников и исповедников победне взываеши:/ благословите, вся дела Господня, Господа.

И ны́не и при́сно и во ве́ки веко́в. Ами́нь.

Богородичен: Наследия Небеснаго не даждь нам лишитися, Пресвятая Дево,/ но молитвами Твоими достойных нас сотвори со святым Константином воспевати:/ благословите, вся дела Господня, Господа.

Песнь 9

Ирмос: Камень нерукосечный/ от несекомыя горы, Тебе, Дево,/ краеугольный отсечеся,/ Христос, совокупивый разстоящаяся естества./ Тем, веселящеся, Тя, Богородице, величаем.

Припев: Священномучениче Константине, моли́ Бо́га о нас.

Тело твое, святе Константине, Бог нетлением прослави/ и, яко многоценное сокровище нам явив,/ во основание многих храмов земли Московския положити благоволи./ Мы же, Источника безсмертия вкушающе,/ причастники жизни вечныя бываем.

Припев: Священномучениче Константине, моли́ Бо́га о нас.

Исповедника тверда, мученика славна и пастыря добра/ именуем тя, Константине блаженне,/ и, подвиги твоими назидаеми, усердно просим:/ не лиши нас и ныне твоего отеческаго попечения.

Сла́ва Отцу́ и Сы́ну и Свято́му Ду́ху:

Не может язык человеческий воспети по достоянию подвиги вашя, мученицы Христовы,/ мы же, любовию движими,/ приносим похвалы сия и молим:/ присно ходатайствуйте о спасении душ наших.

И ны́не и при́сно и во ве́ки веко́в. Ами́нь.

Богородичен: Агница нескверная,/ Агнца Божия верным рождши, Богородице Пречистая,/ спаси любовию поющыя Тя и Богородицу воистину именующыя.

Светилен:

Днесь, вернии, вкупе собравшеся,/ светлость настоящаго праздника возвестим/ и священномученика Константина песньми прославим,/ егоже Христос сына Света показа/ и даров Духа Святаго исполни.

Молитва

О, избранный угодниче Христов, отче богомудре Константине, Церкве Русския столпе непоколебимый, земли Богородския похвало, паствы твоея предстателю и наставниче!

Ты, от юности в благовестии слова Божия подвизаяся, многия душы от заблуждения и раскола во ограду Церкве возвратил еси. Егда же призва тя Господь на служение пастырское, добрый делатель вертограда Божия явился еси: сопастыри в благочестии укрепляя, юныя в вере и доброделании наставляя, мучимыя страстию пианства от пути погибельнаго отвращая и о всех людех пред Престолом Божиим теплыя молитвы вознося.

Во время же гонения безбожнаго образ мужественнаго и кроткаго стояния за веру явил еси и, еще жив сый, в землю погребен был еси и, лютую смерть прием, в первых новомученицех просиял еси.

Ныне же, мы, недостойнии, к честней и многоцелебней раце святых мощей твоих благоговейно припадающе, тепле вопием ти: помози пастырем правило веры благочестне содержати, болящыя и немощныя уврачуй, печальныя утеши, гонимыя защити, юныя настави, всем же благосердый отец и теплый молитвенник явися.

О, святче Божий! Умоли Господа Бога, да соблюдается в вере Православней Отечество наше и в нем достойно и праведно прославляется имя Пресвятыя Троицы, Отца и Сына и Святаго Духа во веки веков. Аминь.