Шрифт

2 октября.

Канон Благоверному великому князю Феодору и чадам его, благоверным князем Давиду и Константину, Смоленским и Ярославским чудотворцем.

Благоверному великому князю Феодору и чадам его, благоверным князем Давиду и Константину, Смоленским

Тропа́рь на преставле́ние свята́го, гла́с 4:

От ю́ности ва́шея Христо́ве любви́ прилепи́вшеся, святи́и, усе́рдно зако́н и оправда́ния Того́ сохрани́сте, отону́дуже и чуде́сными дарова́ньми обогати́вшеся, исцеле́ния источа́ете, Фео́доре, Дави́де и Константи́не, о ве́рою ва́с почита́ющих моли́те Христа́ Бо́га, спасти́ся душа́м на́шим.

На пренесе́ние моще́й свята́го тропа́рь, гла́с 8:

Яко зве́зды многосве́тлыя, от ю́ности возсия́вше, освети́ли есте́ сердца́ ве́рных пренесе́нием честны́х моще́й ва́ших, во пло́ти я́ко Ангелы на земли́ показа́стеся, поще́нием насажде́ни бы́сте, я́ко древа́, при вода́х воздержа́ния, напое́ни струя́ми сле́з ва́ших, и скве́рну омы́сте. Сего́ ра́ди яви́стеся прия́телища Бо́жия Ду́ха, Фео́доре, и Дави́де, и Константи́не, моли́те Христа́ Бо́га спасти́ся душа́м на́шим.

Стихи́ра, гла́с 8:

Преподо́бнии отцы́ святи́и, Фео́доре и Дави́де с Константи́ном сла́вным, поучи́вшеся де́нь и но́щь в зако́не Госпо́дни, досто́йни бы́сте дре́ва живо́тнаго сады́ бы́ти, и пло́д ва́ш доброде́тельными венцы́ цвете́т. Дерзнове́ние иму́ще к трудополо́жнику Христу́ Бо́гу, проси́те на́м очище́ния и ве́лия ми́лости.

Други́й кано́н святы́х, гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Благоверные князие Феодоре, Давиде и Константине, моли́те Бо́га о нас.

Вси́ вы́ Творцу́ возложи́сте себе́ и все́ душе́вное жела́ние излия́сте к Нему́, сего́ ра́ди духо́вную благода́ть восприя́сте, све́том ея́ озаря́еми, преподо́бне Фео́доре и Дави́де с Константи́ном сла́вным.

Припев: Благоверные князие Феодоре, Давиде и Константине, моли́те Бо́га о нас.

Измла́да Христа́ возлюби́л еси́, всеблаже́нне Фео́доре, новоявле́нне чудотво́рче, и пречи́стую Его́ Ма́терь, и ны́не просвеща́еши чудесы́, я́ко мо́лния, всю́ вселе́нную.

Сла́ва Отцу́ и Сы́ну и Свято́му Ду́ху:

Ны́не, преблаже́нне Фео́доре, душа́ твоя́ почива́ет на небеси́ со Христо́м во Ца́рствии небе́снем, зде́ же честны́я твоя́ мо́щи даю́т исцеле́ния приходя́щим с ве́рою.

И ны́не и при́сно и во ве́ки веко́в. Ами́нь.

Богородичен: Ра́дуйся, Пречи́стая Богоро́дице, Ангелов удивле́ние, проро́ков про́поведь и апо́столов немо́лчная уста́, моли́ся Сы́ну Твоему́ и Бо́гу на́шему, да сохрани́т гра́д и ме́сто сие́ преподо́бных моле́нием.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Припев: Благоверные князие Феодоре, Давиде и Константине, моли́те Бо́га о нас.

Яко светоза́рное со́лнце яви́стеся Триипоста́снаго Божества́, Фео́доре блаже́нне, с Дави́дом богому́дрым, и Константи́ном пресла́вным, омраче́нных ду́ши просвеща́юще моли́твами ва́шими.

Припев: Благоверные князие Феодоре, Давиде и Константине, моли́те Бо́га о нас.

Измла́да во́зраст восприя́л еси́ во гра́де Смоле́нске, по Христо́ву веле́нию на успе́ние твое́ прише́л еси́ в сла́вный гра́д Яросла́вль и сия́еши, я́ко со́лнце, блиста́нием доброде́телей, преподо́бне Фео́доре.

Сла́ва Отцу́ и Сы́ну и Свято́му Ду́ху:

Креста́ Госпо́дня си́лою укрепи́вся, блаже́нне Фео́доре, и поще́нием и моли́твами вооружи́вся, стремле́ния де́монская на земли́ победи́л еси́ Бо́жиею си́лою.

И ны́не и при́сно и во ве́ки веко́в. Ами́нь.

Богородичен: Ра́дуйся, Влады́чице Де́во, Церкве́й красота́, царе́й держа́ва и похвала́, непреста́нно моли́ся Христу́ Бо́гу, да сохрани́т гра́д се́й и лю́ди моли́твами Твои́ми.

Седа́лен, гла́с 1:

Жите́йское мо́ре воздержа́нием без труда́ преплы́вше, и в приста́нище мы́сленное безстра́стия приста́ли есте́, сосу́ди воздержа́нием бога́тства некра́дома благоче́стия яви́стеся, блаже́ннии, Фео́доре и Дави́де и Константи́не, безстра́стием житие́ ва́ше просвети́вше, и тре́бующия ми́лости обогаща́ете, Христа́ Бо́га моля́ще дарова́ти на́м ве́лию ми́лость.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Благоверные князие Феодоре, Давиде и Константине, моли́те Бо́га о нас.

На земли́ степе́нь име́л еси́, всеблаже́нне Фео́доре, но твои́ми моли́твами и го́рнее Ца́рство восприя́л еси́, преподо́бне, и ны́не на небеси́ со Христо́м ца́рствуеши.

Припев: Благоверные князие Феодоре, Давиде и Константине, моли́те Бо́га о нас.

Исцеле́ние содева́ет Боже́ственный хра́м ва́ш, Фео́доре и Дави́де и Константи́не, отго́ните неду́ги от челове́ков и укрепля́ете мудрова́ния и́х восхвали́ти труды́ ва́ша, всечестни́и.

Сла́ва Отцу́ и Сы́ну и Свято́му Ду́ху:

Со враго́м дре́вле бра́вшеся воздержа́нием, кре́пости поста́висте побе́ду, преподо́бнии, Фео́доре и Дави́де с Константи́ном сла́вным, му́жески низложи́вше де́монская ополче́ния.

И ны́не и при́сно и во ве́ки веко́в. Ами́нь.

Богородичен: Христа́ на́м родила́ еси́, Пречи́стая Влады́чице, Богора́дованная Де́во, спаси́ гра́д и лю́ди, к Тебе́ упова́ющия, Богоро́дице Всенепоро́чная.

Пе́снь 5

Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Припев: Благоверные князие Феодоре, Давиде и Константине, моли́те Бо́га о нас.

Зако́нно моли́твами и посто́м всегда́ претерпева́сте, в безстра́стие оде́явшеся, пло́тский ра́зум смири́вше кре́постию Боже́ственнаго Ду́ха.

Припев: Благоверные князие Феодоре, Давиде и Константине, моли́те Бо́га о нас.

От ю́ности возжада́л еси́ о́браза мона́шескаго и от Христа́ восприя́т вене́ц неувя́дный и ри́зу нетле́нную, и ны́не, блаже́нне Фео́доре, со Ангелы ра́дуется ду́х тво́й.

Сла́ва Отцу́ и Сы́ну и Свято́му Ду́ху:

Гро́б честна́го твоего́ телесе́ показа́л еси́ ве́рным лю́дем ду́ш освяще́ние, и теле́с исцеле́ние, и страсте́й избавле́ние, от твои́х моще́й цельбы́ почерпа́ющим.

И ны́не и при́сно и во ве́ки веко́в. Ами́нь.

Богородичен: Всесве́тлым укра́шена све́том, Богора́дованная Ма́ти, Ты́ бо породила́ еси́, Честне́йшая все́х, Христа́, Бо́га на́шего, Его́же моли́, да изба́вит ны́ от вся́ких напа́стей.

Пе́снь 6.

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припев: Благоверные князие Феодоре, Давиде и Константине, моли́те Бо́га о нас.

Моля́ приле́жно Го́спода, недви́жущагося о́трока це́ла сотворя́еши и безгла́сна пре́жде, Бо́жиим про́мыслом, многоглаго́лива показа́л еси́, о́тче на́ш чудотво́рче Фео́доре, мона́шествующих свети́льниче пресве́тлый.

Припев: Благоверные князие Феодоре, Давиде и Константине, моли́те Бо́га о нас.

Удиви́ся, блаже́нне, чудесе́м твои́м ве́сь ми́р, прему́дре Дави́де, и восприя́л еси́ от Христа́ вене́ц небе́сный, его́же сподо́би и на́м получи́ти твои́ми моли́твами, всече́стне.

Припев: Благоверные князие Феодоре, Давиде и Константине, моли́те Бо́га о нас.

Лу́к си́льных сокруши́л еси́ и бра́нь вся́ку неприя́знену истреби́л еси́, всеблаже́нне Фео́доре, де́йством, я́ко веща́нием, испусти́л еси́ чудеса́ во всю́ вселе́нную.

Сла́ва Отцу́ и Сы́ну и Свято́му Ду́ху:

Всеблаже́нне Фео́доре, уго́дниче Христо́в, на небесе́х предстои́ши Христу́, моля́ся, зде́ же честны́я мо́щи твоя́ боля́щих исцеля́ют и от гре́х изыма́ют.

И ны́не и при́сно и во ве́ки веко́в. Ами́нь.

Богородичен: Изсуши́ла еси́ сады́ безбо́жных челове́ков, Всенепоро́чная Де́во, Твои́м прозябе́нием, прозя́бшую во мне́ зло́бу искорени́, Богоневе́стная.

Конда́к, гла́с 8:

Яви́стеся свети́льницы всесве́тлии во пло́ти, я́ко Ангели, и, я́ко жи́зни древеса́ ра́йская, поще́нием, бде́нием и ве́рою возраща́еми, процвели́ есте́, моли́твами ва́шими небе́сныя благода́ти прие́мше, вра́чеве кре́пцы я́вльшеся, исцеля́ете неду́гующих ду́ши, с ве́рою прибега́ющих к ра́це моще́й ва́ших, чудотво́рцы сла́внии, Фео́доре, Дави́де и Константи́не, моли́те Христа́ Бо́га грехо́в оставле́ние дарова́ти, ве́рою и любо́вию чту́щим па́мять ва́шу.

Икос:

Свы́ше зва́ние прие́мше пресла́вно, безсме́ртную жи́знь насле́довасте, с пло́тию бо на земли́ безпло́тных житие́ проше́дше, бы́сте страсте́й неприя́тни. Те́мже восхваля́ем вы́, отцы́ преподо́бнии, сицева́я глаго́люще: ра́дуйтеся, све́тлая свети́ла и правосла́вных сла́ва; ра́дуйтеся, целому́дрия столпи́ необори́мии; ра́дуйтеся, прему́драго ра́зума явле́ние; ра́дуйтеся, пра́вды рачи́телие изве́стнии; ра́дуйтеся, я́ко по́стническими по́двиги умертви́вше плотски́х дея́ний стремле́ния; ра́дуйтеся, умы́ наслажда́ющеся небе́сных неизрече́нных; ра́дуйтеся, всю́ тва́рь благоче́стно удивля́юще чудесы́, и́миже посрами́шася де́мони; ра́дуйтеся, оружено́сцы духо́внии, и́миже вся́ка стра́сть умертви́ся; ра́дуйтеся, исто́чницы жизненото́чных во́д; ра́дуйтеся, помо́щницы ве́рно восхваля́ющим ва́с; ра́дуйтеся, чудотво́рцы достохва́льнии, Фео́доре и Дави́де и Константи́не; ра́дуйтеся, помо́щницы ве́рою и любо́вию чту́щим па́мять ва́шу.

Пе́снь 7.

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Благоверные князие Феодоре, Давиде и Константине, моли́те Бо́га о нас.

Блаже́нно житие́ твое́ и кончи́на безсме́ртна, преподо́бне Фео́доре: сего́ ра́ди тя́ Христо́с свы́ше украси́ венце́м, и просвеща́еши ве́сь ми́р чудесы́, всечу́дне.

Припев: Благоверные князие Феодоре, Давиде и Константине, моли́те Бо́га о нас.

Яви́лся еси́ ны́не гра́да Яросла́вля, Дави́де богоблаже́нне, сто́лп неколе́блен и стена́ неруши́ма, вели́кое прибе́жище притека́ющим и прие́млющим исцеле́ний благода́ть неоску́дную.

Сла́ва Отцу́ и Сы́ну и Свято́му Ду́ху:

Хоте́нием от мирски́х сла́достей отлуча́ющеся, стра́нно челове́ком Явльшемуся пло́тию присво́ившеся, и бу́дущая нетле́нная стяжа́сте, святи́и, пою́ще: благослове́н Бо́г отце́в на́ших.

И ны́не и при́сно и во ве́ки веко́в. Ами́нь.

Богородичен: Безсе́менно заче́нши, Творца́ все́х, Христа́ Бо́га, неизрече́нно родила́ еси́, Его́же моли́, дерзнове́ние иму́щи к Нему́, да спасе́т ны́, вопию́щия: благослове́н Бо́г отце́в на́ших.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Благоверные князие Феодоре, Давиде и Константине, моли́те Бо́га о нас.

Лику́ют на небесе́х чи́ни Ангельстии, всеблаже́нне Фео́доре, и ве́рных собо́ри на земли́, твою́ па́мять похваля́юще, вопию́т: Го́спода воспева́йте, дела́, и превозноси́те Его́ во ве́ки.

Припев: Благоверные князие Феодоре, Давиде и Константине, моли́те Бо́га о нас.

Помоли́ся Христу́ Бо́гу, преблаже́нне Фео́доре, о приходя́щих к тебе́ с ве́рою и хотя́щих от тебе́ почерпсти́ исцеле́ния неоску́дную благода́ть, пою́щих: Го́спода воспева́йте, дела́, и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Со безтеле́сными си́лами, преподо́бнии отцы́, Христу́ предстоите́, моли́твами ва́шими, святи́и, душе́вныя на́ша боле́зни исцели́те и от безчи́сленных зо́л изба́вите на́с, вопию́щих: Го́спода воспева́йте, дела́, и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богородичен: Из пречи́стаго Твоего́ чре́ва, Богома́ти, Небе́снаго Дождя́ Ка́пля на́м ука́не, на омове́ние скве́рн, на здра́вие теле́с, на прогна́ние лука́ваго. Те́мже Тя́ блажи́м, Чи́стая, во ве́ки.

Песнь 9

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Благоверные князие Феодоре, Давиде и Константине, моли́те Бо́га о нас.

Удиви́ся во все́м ми́ре, Фео́доре, твоя́ па́мять, чудесы́ сия́ющи, я́коже со́лнце, и злы́я боле́зни исцеля́ющи все́х. Те́мже на́ша стра́сти разжени́, мо́лимся тебе́, прося́ на́м отпуще́ния, чудотво́рче Христо́в, и просвети́ ны твои́ми моли́твами, да тя́ вси́ велича́ем.

Припев: Благоверные князие Феодоре, Давиде и Константине, моли́те Бо́га о нас.

Да вхо́дят ны́не во святы́й хра́м, к честны́м твои́м моще́м, преподо́бне Фео́доре, благоче́стия держа́тели и вся́к во́зраст, припа́дающе, про́сят от тебе́ почерпсти́ исцеле́ния, здра́вия и спасе́ния, Христа́ велича́юще.

Сла́ва Отцу́ и Сы́ну и Свято́му Ду́ху:

И ны́не моли́теся ко Христу́ Бо́гу, всечу́днии, Фео́доре и Дави́де и Константи́не, да ва́ши честны́я мо́щи всегда́ подаю́т слепы́м прозре́ние и хромы́м хожде́ние, больны́м исцеле́ние и все́м здра́вие и спасе́ние, да ва́с вси́ велича́ем.

И ны́не и при́сно и во ве́ки веко́в. Ами́нь.

Богородичен: Пресвята́я Де́во, Богоро́дице Мари́е, со Ангелы, и арха́нгелы, и со все́ми небе́сными си́лами, и со проро́ки и апо́столы, и с ли́ки преподо́бных отце́в и свяще́нных му́ченик, и со блаже́нным Фео́дором, моли́ся Сы́ну Твоему́, Христу́ Бо́гу на́шему, да изба́вит ны́ от все́х бе́д, Тя́ велича́ющия.

Свети́лен:

Якоже со́лнце блиста́я, зарю́ испуща́еши чуде́с, просвеща́я все́х сердца́, твою́ сла́вную па́мять творя́щих ве́рно, преблаже́нне Фео́доре, и спаса́еши от бе́д и бу́дущаго гне́ва.

Молитва

О, велиции угодницы Божии и чудотворцы, святии и благовернии князе Феодоре, Давиде и Константине, припадающе к святым и многоцелебным мощем вашим, молим вы со смирением, верою и любовию: прострите благоприятные молитвы ваша ко Господу и Создателю нашему, и умолите Его благость, даровати нам вся нужная к житию сему временному, и потребная к вечному спасению нашему: веруем бо несумненно, яко вся возможна вам, яко истинным Его угодником. Сего ради просим вы: испросите нам у Царя царствующих и Господа господствующих страждущую страну Российскую от лютых безбожник и власти их Господь да свободит, верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш. Испросите престольным градом, граду нашему и всем градом Российским благополучие, изобилие и от злых сохранение, всем же правоверным людем, почитающим вас, и на поклонение мощем вашим святым приходящим, милость Божию и благих прошений скорое исполнение. Ей, чудотворцы святии, не посрамите упования нашего, но молитвами вашими сотворите нас наследники быти Царствия Христова: да прославляем человеколюбие в Троице славимаго и поклоняемаго Бога, Отца и Сына, и Святаго Духа, и ваше святое заступление во веки веков. Аминь.

Благоверному великому князю Феодору и чадам его, благоверным князем Давиду и Константину, Смоленским