28 октября.

Канон преподобномученику Лукиану, пресвитеру Великия Антиохии.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченик Тво́й, Го́споди, Лукиа́н во страда́нии свое́м вене́ц прия́т нетле́нный от Тебе́, Бо́га на́шего: име́яй бо кре́пость Твою́, мучи́телей низложи́, сокруши́ и де́монов немощны́я де́рзости. Того́ моли́твами спаси́ ду́ши на́ша.

Кано́н му́ченика. Гла́с 4.

Пе́снь 1.

Ирмос: Воспою́ Тебе́, Го́споди Бо́же мо́й, я́ко изве́л еси́ лю́ди из рабо́ты еги́петския, покры́л же еси́ колесни́цы фарао́новы и си́лу.

Припев: Преподобномучениче Лукиане, моли́ Бо́га о нас.

Му́дростию, и благода́тию, и си́лою духо́вною, Лукиа́не, возсия́в, просвети́л еси́ лю́ди, и к позна́нию Христо́ву, му́чениче, наста́вил еси́.

Припев: Преподобномучениче Лукиане, моли́ Бо́га о нас.

Ору́жием благове́рия тя́ защити́в, и́же не́мощь на́шу Понесы́й я́ко благоутро́бен, непобеди́ма соде́я тя́, враго́в, му́чениче, боре́нием.

Сла́ва Отцу́ и Сы́ну и Свято́му Ду́ху:

На высоту́ небе́сную во глубину́ злове́рия, страда́льче, па́дших возвле́кл еси́ мре́жами боже́ственных твои́х глаго́л, досточу́дне.

И ны́не и при́сно и во ве́ки веко́в. Ами́нь.

Богородичен: Сло́во Присносу́щное Отчее сло́вом, па́че вины́ и сло́ва, без се́мене зачала́ еси́, Чи́стая, и родила́ еси в на́ше избавле́ние.

Пе́снь 3.

Ирмос: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.

Припев: Преподобномучениче Лукиане, моли́ Бо́га о нас.

До́м доброде́телей све́тлостию, му́чениче, ду́шу твою́ Бо́гу соверши́л еси́ и и́дольския хра́мы моли́твою твое́ю разори́л еси́.

Припев: Преподобномучениче Лукиане, моли́ Бо́га о нас.

Воспева́л еси́, напа́стьми окружа́емь, му́чениче, и муче́ний боле́зньми оскорбля́емь, таковы́х я́ко Благоде́теля благи́х сподо́бльшаго тя́.

Сла́ва Отцу́ и Сы́ну и Свято́му Ду́ху:

Те́ло му́кам преда́в, му́чениче, ду́шу твою́ небла́зненно соблю́л еси́: же́ртву непоро́чну Влады́це, тя́ сама́го, прине́сл еси́, всече́стне.

И ны́не и при́сно и во ве́ки веко́в. Ами́нь.

Богородичен: От Де́вы Младе́нец ражда́ется, соде́тельствовавый ве́ки хоте́нием, Юже воспева́ем я́ко Богоро́дицу и пра́ведно ублажа́ем.

Седа́лен, гла́с 8.

Благода́ти сло́вом ве́рных умаща́я сердца́, му́чениче Лукиа́не, страда́ти устро́ил еси́ и побежда́ти мучи́теля, и до́бре соверши́в тече́ние боже́ственное, и по конце́ сла́вы му́чеников сподо́бился еси́. Те́м соше́дшеся, свято́е твое́ вси́ почита́ем сконча́ние, Спа́са прославля́юще: страстоте́рпче прехва́льне, моли́ Христа́ Бо́га прегреше́ний оставле́ние пода́ти, чту́щим любо́вию святу́ю па́мять твою́.

Пе́снь 4.

Ирмос: Седя́й в сла́ве на Престо́ле Божества́, во о́блаце ле́гце прии́де Иису́с Пребоже́ственный нетле́нною дла́нию и спасе́ зову́щия: сла́ва, Христе́, си́ле Твое́й.

Припев: Преподобномучениче Лукиане, моли́ Бо́га о нас.

Кре́пок на пре́лесть яви́лся еси́, блаже́нне, и мно́гим обучи́тель к боже́ственным подвиго́м всегда́; терпе́нием же му́к некре́пкую смири́л еси́, му́чениче, кре́пость го́рдаго.

Припев: Преподобномучениче Лукиане, моли́ Бо́га о нас.

Распросте́рт на дре́ве, и реме́нием растяга́емь, и гла́дом и жа́ждею многовре́менно умуча́емь, и то́нкими чрепи́нами настрека́емь, претерпе́л еси́, му́чениче Христо́в достосла́вне.

Сла́ва Отцу́ и Сы́ну и Свято́му Ду́ху:

Зако́н Боже́ственный пропове́дая, беззако́ннующих обрати́л еси́ и испи́ти усе́рдно ча́шу муче́ния показа́л еси́; с ни́миже в Боже́ственныя дво́ры всели́лся еси́, насыща́яся дре́ва жи́зни, всеприснопа́мятне.

И ны́не и при́сно и во ве́ки веко́в. Ами́нь.

Богородичен: Из утро́бы Твоея́ возсия́в Боже́ственное Со́лнце, я́же во тме́ многобо́жия, Отрокови́це, просвети́ и в се́ни сме́ртней су́щия осия́. Ему́же взыва́ем: сла́ва, Христе́, си́ле Твое́й.

Пе́снь 5

Ирмос: Нечести́вии не у́зрят сла́вы Твоея́, Христе́, но мы́ Тя́, Единоро́дне, Оте́ческия сла́вы сия́ние Божества́, от но́щи у́тренююще, воспева́ем Тя́, Человеколю́бче.

Припев: Преподобномучениче Лукиане, моли́ Бо́га о нас.

Поже́г, преподо́бне, те́рние страсте́й по́том поще́ний, струя́ми погаси́л еси́ трудо́в твои́х нече́стия пе́щь доблемы́сленне, всеблаже́нне.

Припев: Преподобномучениче Лукиане, моли́ Бо́га о нас.

Непрекло́нен, облага́емь ча́стыми боле́зньми, пребы́л еси́, к Бо́гу взира́я, свя́те, спасти́ могу́щему, Ему́же в ру́це преложи́л еси́ ду́ха твоего́, веселя́ся.

Сла́ва Отцу́ и Сы́ну и Свято́му Ду́ху:

Удали́вшияся Бо́га облича́л еси́ злове́рныя, и до́лгими боле́зньми и лю́тыми, сла́вне, окружа́емь, Христу́ прибли́жился еси́, Его́же стра́сть изобрази́л еси́.

И ны́не и при́сно и во ве́ки веко́в. Ами́нь.

Богородичен: По рождестве́ нетле́нна пребыла́ еси́, Чи́стая, и тле́ния ро́д челове́ческий, я́ко Бо́га Ро́ждшая, свободи́ла еси́; сего́ ра́ди ве́рою Тя́ правосла́вно ублажа́ем.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Преподобномучениче Лукиане, моли́ Бо́га о нас.

Немо́кренно муче́ний преше́л еси́ пучи́ну; Всеси́льною же десни́цею от глубины́ те́ло твое́ спасе́но бы́сть, лю́бящими тя́, невре́дно, богоблаже́нне, ви́димо.

Припев: Преподобномучениче Лукиане, моли́ Бо́га о нас.

От ки́това чре́ва Ио́ну Изба́вивый тридне́вновавша, спаса́ет и тя́ глубины́ морски́я, служа́щим морски́м звере́м, по дне́х три́десятих.

Сла́ва Отцу́ и Сы́ну и Свято́му Ду́ху:

Любо́вию Христо́вою распаля́емь, сла́вне, до сме́рти противоста́л еси́ мучи́телей, всему́дре; сего́ ра́ди Ца́рствия небе́снаго сподо́бился еси́, веселя́ся.

И ны́не и при́сно и во ве́ки веко́в. Ами́нь.

Богородичен: Чи́стую Тя́ голуби́цу и еди́ну нескве́рную, Пречи́стое обре́те Сло́во и от Тебе́ роди́тися благоволи́, Пресвята́я Богома́ти, Всенепоро́чная Де́во.

Конда́к му́ченика, гла́с 2.

В поще́нии пе́рвее просия́вшаго, и во страда́нии второ́е светя́ща, вси́, я́ко свети́ло пресве́тлейшее, Лукиа́на пе́сньми сла́вно почти́м, моля́щаго непреста́нно о все́х на́с.

Пе́снь 7.

Ирмос: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Припев: Преподобномучениче Лукиане, моли́ Бо́га о нас.

Стремле́ния глаго́л твои́х му́дрых, му́чениче, гони́тель, не терпя́, умерщвля́ет тя́, и во глубину́ морску́ю помета́ет, го́рнее хода́тайствуя тебе́, я́ко недоумева́я, Ца́рствие, доблему́дре, и Боже́ственную сла́ву.

Припев: Преподобномучениче Лукиане, моли́ Бо́га о нас.

Не поклони́вся истука́нным, коле́на же не поклони́в и́долом, во о́гнь вве́ржен скорбе́й, в пе́щь мучи́тельную вше́л еси́, ороша́емь Ду́хом, росода́тельною си́лою, богому́дре му́чениче.

Сла́ва Отцу́ и Сы́ну и Свято́му Ду́ху:

Умерщвле́нныя и во глубине́ е́ллинскаго безбо́жия пожре́нныя лю́ди, живоно́сными твои́ми словесы́ извле́кл еси́, песнопоя́, досточу́дне: препе́тый Го́споди, Бо́же оте́ц на́ших, благослове́н еси́.

И ны́не и при́сно и во ве́ки веко́в. Ами́нь.

Богородичен: Благослове́н Пло́д благослове́ннаго чре́ва Твоего́, Его́же благословя́т небе́сныя си́лы и земны́х собо́ри, на́с Изба́вльшаго кля́твы дре́вния, Благослове́нная.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте дела́ и превозноси́те Его́ во вся́ ве́ки.

Припев: Преподобномучениче Лукиане, моли́ Бо́га о нас.

Гла́дом мы́сленным иста́явшия, хле́бом слове́с твои́х утверди́л еси́, Еди́наго чествова́ти Го́спода — Хле́б жи́зни на́шея, наказа́в, сла́вне. Ему́же вси́ пои́м: Го́спода воспева́йте дела́ и превозноси́те во вся́ ве́ки.

Припев: Преподобномучениче Лукиане, моли́ Бо́га о нас.

Попра́в лю́тая козноде́йства врага́ преле́стника страда́нием твои́м, взя́лся еси́ на пресла́вную высоту́, достосла́вне, и Ангельския дости́гл еси́ чи́ны, вопия́: Го́спода воспева́йте дела́ и превозноси́те Его́ во вся́ ве́ки.

Сла́ва Отцу́ и Сы́ну и Свято́му Ду́ху:

О, стра́нных веще́й соверши́вшихся на тебе́, Лукиа́не терпели́вейше! Не́дро бо морско́е те́ло твое́ свято́е на дово́льно прие́мь, не вреди́ е́, су́ши же предае́т це́ло, струи́ исцеле́ний точа́ще лю́бящим тя́.

И ны́не и при́сно и во ве́ки веко́в. Ами́нь.

Богородичен: И язы́ком, Де́во, и се́рдцем Чи́стую Богоро́дицу Тя́ пропове́даем, Го́спода бо родила́ еси́, пло́тию обложе́на и во дву́ естеству́ разумева́ема; Его́же вся́ си́лы небе́сныя славосло́вят во вся́ ве́ки.

Песнь 9

Ирмос: Ева убо недугом преслушания клятву вселила есть; Ты же, Дево Богородице, прозябением чревоношения мирови благословение процвела еси. Тем Тя вси величаем.

Припев: Преподобномучениче Лукиане, моли́ Бо́га о нас.

Све́тится, му́дре, свяще́нная твоя́ па́мять, заря́ми Ду́ха о́блак страсте́й разгоня́щи, просвеща́ющи же ве́рных собра́ния и пожига́ющи де́монская во́инства; ю́же соверша́ющия ны́ сохраня́й.

Припев: Преподобномучениче Лукиане, моли́ Бо́га о нас.

Разреши́лся еси́ от теле́сных у́з, блаже́нне, и к высоте́ небе́сней, ра́дуяся, возлете́л еси́, и яви́лся еси́ красе́н я́зв удобре́ньми Бо́гу Творцу́; Ему́же предстои́ши с му́ченики, веселя́ся.

Сла́ва Отцу́ и Сы́ну и Свято́му Ду́ху:

Му́ченик на́с Лукиа́н совокупи́ похвали́ти того́ стра́сти дне́сь, и све́тлыя по́двиги, и е́же до конца́ до́блесть, чуде́с же благода́ть оби́льную; Сего́ вси́ согла́сно ублажа́ем.

И ны́не и при́сно и во ве́ки веко́в. Ами́нь.

Богородичен: Му́дрости вмести́лище, па́че ума́ лу́чшия, яви́лася еси́, Отрокови́це Чи́стая, одушевле́нный престо́л же и две́рь; те́м Тя́ челове́честии собо́ри и Ангельская сла́вят во́инства, Еди́на все́х преиму́щая.

Молитва

О святы́й уго́дниче Бо́жий, преподобному́чениче Лукиане! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.