28 октября.

Канон святителю Иоанну епископу, Суздальскому чудотворцу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь святи́теля, гла́с 8:

Правосла́вия наста́вниче, благоче́стия учи́телю и чистоты́, Су́ждалю пресве́тлый свети́льниче, святи́телем богодухнове́нное удобре́ние, Иоа́нне прему́дре, уче́нием твои́м па́ству твою́ просвети́л еси́; святи́телю блаже́нне, моли́ Христа́ Бо́га спасти́ся душа́м на́шим.

Стихи́ра, гла́с 6:

Дне́сь любо́вию соше́дшеся духо́вная ча́да твоя́, святи́телю Иоа́нне, пресла́вную па́мять твою́ све́тло торжеству́ем; просия́л бо еси́ я́ко со́лнце све́тло, све́том твоего́ жития́, и ско́рый на́м помо́щник яви́лся еси́, избавля́я на́с от бе́д и скорбе́й моли́твами твои́ми.

Кано́н святи́телю, гла́с 6.

Пе́снь 1.

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Святителю отче Иоанне, моли́ Бо́га о нас.

Твою́ свяще́нную творя́щим па́мять, святи́телю Иоа́нне, дарова́ти согреше́ний оставле́ние, жития́ исправле́ние и небе́снаго Ца́рствия насле́дие, не преста́й моли́ти Христа́ Бо́га.

Припев: Святителю отче Иоанне, моли́ Бо́га о нас.

Яко оте́ц милосе́рд к си́рым бы́л еси́, вдови́ц же пита́тель, скорбя́щим уте́шитель, оби́димым засту́пник, гра́ду Су́ждалю па́стырь и храни́тель, святи́телю Иоа́нне. Те́мже и ны́не приле́жно моли́ся Влады́це Христу́ о чту́щих па́мять твою́.

Сла́ва Отцу́ и Сы́ну и Свято́му Ду́ху:

Боже́ственным осия́емь све́том и со Ангелы ны́не на небесе́х водворя́яся, помина́й ве́рою чту́щих па́мять твою́, святи́телю Иоа́нне приснопа́мятне.

И ны́не и при́сно и во ве́ки веко́в. Ами́нь.

Богородичен: Око се́рдца моего́ устремля́ю к Тебе́, Чи́стая, не пре́зри те́плое к Тебе́ воздыха́ние, и бу́ди ми́ покро́в и помо́щница.

Пе́снь 3.

Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Святителю отче Иоанне, моли́ Бо́га о нас.

Го́рько стеня́ припада́ем ти́, святи́телю, гре́шнии раби́ твои́: моли́ся о на́с ко Христу́ Бо́гу поми́ловати рабы́ твоя́, да не хва́лится вра́г, ви́дя на́с погиба́ющих.

Припев: Святителю отче Иоанне, моли́ Бо́га о нас.

Образ Бо́жий сохраня́я невреди́мым, преподо́бне, чистото́ю и смиренному́дрием украси́лся еси́, житие́ же нескве́рно и нра́в ми́лостивен стяжа́л еси́, досточу́дне.

Сла́ва Отцу́ и Сы́ну и Свято́му Ду́ху:

Му́дростию и доброде́телию украси́в житие́ свое́, вели́кое дерзнове́ние стяжа́л еси́ ко Го́споду; те́мже моли́твами твои́ми сохраня́й гра́д и лю́ди от вся́кия беды́ и ну́жды.

И ны́не и при́сно и во ве́ки веко́в. Ами́нь.

Богородичен: Умная вся́ чинонача́лия превозшла́ еси́, Пречи́стая, я́ко Еди́наго от Пресвяты́я Тро́ицы родила́ еси́ на́м Спаси́теля и Го́спода, Его́же моли́, Присноде́во, спасти́ся душа́м на́шим.

Седа́лен, гла́с 1:

Прему́дростию Сло́ва обогате́в, источи́л еси́ уче́ния ре́ки живо́тны, и те́м благочести́вых ду́ши напои́л еси́, па́лицею же боже́ственнаго ра́зума упа́сл еси́ ста́до твое́; те́мже, я́ко па́стыря и учи́теля вели́ка, восхваля́ем тя́, Иоа́нне, святи́телю блаже́нне, моли́ Христа́ Бо́га грехо́в оставле́ние дарова́ти чту́щим святу́ю па́мять твою́.

Сла́ва, и ны́не, Богородичен:

О, Пречу́дная Де́во Богоро́дице! Огнь Божества́ во чре́ве Твое́м прия́ла еси́, и я́ко Младе́нца млеко́м пита́ла еси́ Зижди́теля и Го́спода. Те́мже досто́йно сла́вим пречестно́е Рождество́ Твое́, и согла́сно вопие́м Ти́: моли́ Христа́ Бо́га, согреше́ний оставле́ние дарова́ти воспева́ющим досто́йно сла́ву Твою́.

Пе́снь 4.

Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Святителю отче Иоанне, моли́ Бо́га о нас.

Ду́хом уны́ния одержи́мь, к тебе́ о́чи се́рдца моего́ возвожу́, Иоа́нне святи́телю, и вопию́ ти приле́жно: моли́твами твои́ми спаси́ ду́шу мою́ погиба́ющую, и научи́ мя ко Христу́ взыва́ти: сла́ва си́ле Твое́й, Го́споди.

Припев: Святителю отче Иоанне, моли́ Бо́га о нас.

Разсла́блен е́смь во́лею, слепотству́ю же ра́зумом; те́мже, святи́телю, моли́ся ко Христу́, поми́ловати ду́шу мою́, злы́ми неду́гами си́ми лю́те уя́звленну.

Сла́ва Отцу́ и Сы́ну и Свято́му Ду́ху:

Аз, я́ко кровоточи́вая, то́ки нечи́стых помышле́ний источа́ю непреста́нно, я́ко ханане́я же, к тебе́ взыва́ю: святи́телю, моли́твами твои́ми помози́ ми, и исцели́ неду́ги души́ моея́, моля́ся ко Христу́ Человеколю́бцу.

И ны́не и при́сно и во ве́ки веко́в. Ами́нь.

Богородичен: Го́спода Милосе́рдаго на́м ро́ждшая, Пречи́стая, не преда́ждь на́с враго́м на́шим, на́ша засту́пнице и на́ша наде́ждо, но покры́й на́с ри́зою Свое́ю.

Пе́снь 5

Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Святителю отче Иоанне, моли́ Бо́га о нас.

О Тебе́ ра́дуется и весели́тся гра́д Су́ждаль, святи́телю Иоа́нне, весели́тся и ра́дуется и хра́м Бо́жия Ма́тере, име́я в себе́ честны́я мо́щи твоя́, па́стырю на́ш преизя́щный.

Припев: Святителю отче Иоанне, моли́ Бо́га о нас.

Свети́ло неугаси́мое, преподо́бне, уго́дниче Христо́в всече́стне, Су́ждалю сла́ва и всея́ Росси́и похвала́; моли́ спасти́ся гра́ду твоему́ от вся́ких бе́д и скорбе́й.

Сла́ва Отцу́ и Сы́ну и Свято́му Ду́ху:

Возсия́в, я́ко со́лнце, в стране́ на́шей, лю́ди твоя́ уче́нми твои́ми просвети́л еси́, блаже́нне; те́мже тя́ почита́ем я́ко боже́ственнаго наста́вника и богому́драго учи́теля.

И ны́не и при́сно и во ве́ки веко́в. Ами́нь.

Богородичен: Яко гре́шнейший все́х, на не́бо взира́ти не сме́я, к Тебе́ прибега́ю и вопию́: Ма́ти Бо́жия Пречи́стая, умилосе́рдися на мя́ и изба́ви мя́ ве́чнаго осужде́ния.

Пе́снь 6.

Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Святителю отче Иоанне, моли́ Бо́га о нас.

Тя́ иму́ще те́пла засту́пника раби́ твои́, да не бу́дем посра́млени от наве́тов вра́жиих, но да побежда́ем и́х, моли́твами твои́ми укрепля́еми.

Припев: Святителю отче Иоанне, моли́ Бо́га о нас.

Изба́ви от напра́сныя сме́рти лю́ди твоя́, блаже́нне Иоа́нне, стра́сти угаси́, бе́ды отврати́, и вся́кую ско́рбь и лише́ние отжени́ моли́твами твои́ми.

Сла́ва Отцу́ и Сы́ну и Свято́му Ду́ху:

Терпе́ние тве́рдое, и благоду́шие невозмуще́нное яви́л еси́, блаже́нне Иоа́нне, клевето́ю и зло́бою изгна́н бы́в из гра́да; я́же отврати́ от на́с моли́твами твои́ми, да ра́достно воспева́ем тя́.

И ны́не и при́сно и во ве́ки веко́в. Ами́нь.

Богородичен: Еди́но предста́тельство ве́рных, и обурева́емых оти́шие, Де́во Богоро́дице, страсте́й мои́х непостоя́нную бу́рю утиши́, и из бе́здны грехо́вной исхити́ мя, моли́твами Твои́ми, Пречи́стая.

Конда́к, гла́с 8:

Богому́дрым уче́нием и святы́м житие́м, я́ко свети́льник, сия́л еси́ в Це́ркви Бо́жией; те́мже Боже́ственнаго заступле́ния сподо́бился еси́, внегда́ осле́пнути очесе́м злоумы́шленных клеветнико́в твои́х, и́хже прозре́ти сотвори́в моли́твою твое́ю, вспя́ть возврати́лся еси́ во гра́д тво́й, и до́бре упа́сл еси́ ста́до слове́сных ове́ц; и́хже ча́дом помога́й и на́м, моли́твами твои́ми, святи́телю Христо́в Иоа́нне.

Икос:

Преподо́бне всеблаже́нне святи́телю Иоа́нне, кто́, слы́ша му́дрыя ре́чи твоя́, не умили́ся от сла́дости слове́с твои́х? Или́ кто́, зря́ светоле́пное лице́ твое́, благогове́ния не испо́лнися? Или́ кто́, ви́дя свято́е житие́ твое́, не пока́ялся? Или́ кто́, сребролюби́в сы́й, ви́дя нищету́ твою́, Христа́ ра́ди обнища́ти не возжела́? Или́ кто́, го́рдостию превознося́ся, ви́дя смире́ние твое́, ни́щ ду́хом не соде́лася? Или́ кто́, гневли́в и напра́слив сы́й, ти́хостию нра́ва твоего́ на кро́тость не преложи́ся? Те́мже свяще́нную па́мять твою́ пра́зднующе, мо́лимся тебе́: за́поведи Бо́жия испо́лнити на́м помоги́, и в Ца́рствие ве́чное приведи́ моли́твами твои́ми.

Пе́снь 7.

Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Святителю отче Иоанне, моли́ Бо́га о нас.

Любо́вию влеко́ми, взыва́ем ти́, святи́телю Христо́в: бу́ди на́м ско́рый помо́щник, изба́ви на́с от вся́каго зла́, и от вся́ких бе́д соблюди́.

Припев: Святителю отче Иоанне, моли́ Бо́га о нас.

Яко ско́ро послу́шнаго предста́теля на́шего мо́лим тя́, святи́телю Христо́в, от вся́кия бра́ни страсте́й, воста́ния пло́ти и все́х наве́тов вра́жеских свободи́ на́с, вопию́щих ти́: ра́дуйся, о́тче треблаже́нне.

Сла́ва Отцу́ и Сы́ну и Свято́му Ду́ху:

Моли́, святи́телю Иоа́нне, от бе́д изба́витися, любо́вию тя́ почита́ющим, и научи́ вопи́ти: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Огражде́ние напа́ствуемых, утеше́ние скорбя́щих, спасе́ние бе́дствующих, Богоро́дице всехва́льная, моли́ Сы́на Твоего́ и Бо́га, изба́витися на́м от бе́д и зо́л.

Пе́снь 8.

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Святителю отче Иоанне, моли́ Бо́га о нас.

Лю́дем твои́м, прибега́ющим к покро́ву твоему́, Иоа́нне всехва́льне, моли́ спасти́ся от искуше́ний моли́твами твои́ми.

Припев: Святителю отче Иоанне, моли́ Бо́га о нас.

Еже ко Го́споду восхожде́ние в се́рдце твое́м полага́я, о душе́, возопи́й к Человеколю́бцу: Спа́се, поми́луй мя́ окая́ннаго, моли́твами святи́теля Твоего́.

Сла́ва Отцу́ и Сы́ну и Свято́му Ду́ху:

Бою́ся суда́ Стра́шнаго и огня́ гее́нскаго; но ви́ждь сокруше́ние се́рдца моего́, святи́телю, и испроси́ мне́ проще́ние безме́рных мои́х прегреше́ний.

И ны́не и при́сно и во ве́ки веко́в. Ами́нь.

Богородичен: Но́щь грехо́вная покры́ла мя́ е́сть, но озари́ мя, Человеколю́бче, моли́твами Пречи́стыя Твоея́ Ма́тере, и спаси́ мя.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Святителю отче Иоанне, моли́ Бо́га о нас.

Отцу́, и Сы́ну, и Свято́му Ду́ху до́бре послужи́в во пло́ти, святи́телю Иоа́нне, Пресу́щныя Тро́ицы предстоя́ти престо́лу с безпло́тными сподо́бился еси́; иде́же Христа́ Бо́га моли́, просвети́ти ду́ши на́ша омраче́нныя.

Припев: Святителю отче Иоанне, моли́ Бо́га о нас.

Пое́м твою́ свяще́нную па́мять, святи́телю Иоа́нне, и, благонаде́жно к тебе́ прибега́я, вопие́м: спаси́ на́с заступле́нием твои́м.

Сла́ва Отцу́ и Сы́ну и Свято́му Ду́ху:

О, пречу́дный святи́телю Христо́в Иоа́нне! святи́тельским житие́м украси́лся еси́; и ны́не на небесе́х всели́лся еси́, иде́же лику́ют Ангели, све́том Боже́ственным осиява́еми.

И ны́не и при́сно и во ве́ки веко́в. Ами́нь.

Богородичен: Юже иногда́ Иа́ков ви́де чу́дную ле́ствицу, от земли́ просте́рту к небе́сной высоте́, испове́дуем Тя́, Пречи́стая Богоро́дице: Тобо́ю бо небе́сная земны́м, и земна́я небе́сным совокупи́шася.

Свети́лен, гла́с 2:

На небесе́х ны́не со Ангелы водворя́яся, во све́те Присносу́щныя Тро́ицы, святи́телю о́тче Иоа́нне, о на́с моли́ся Человеколю́бцу Бо́гу, сохрани́тися на́м от се́ти лука́ваго.

Сла́ва, и ны́не, Богородичен:

Сподо́би, на́с, Пречи́стая, Твои́ми моли́твами изба́витися от все́х напа́стей, я́ко к Тебе́ прибега́ем, и Ангельски вопие́м Ти́: ра́дуйся, Богоблагода́тная Пречи́стая.

Молитва святителям Иоанну и Феодору, епископам Суздальским

О, вели́цыи уго́дницы Христо́вы и чудотво́рцы, святи́телие Фео́доре и Иоа́нне! Се мы, недосто́йнии и гре́шнии, скорбьми́ мно́гими угнета́емии, к вам усе́рдно прибега́ем и с упова́нием кре́пким мо́лимся: отцы́ благоми́лостивии и благопослу́шливии, ми́лостивно услы́шите ны́не глас наш моле́бный, и потщи́теся на по́мощь на́шу, и, я́ко при жи́зни ва́шей всем скорбя́щим и озло́бленным помо́щницы и уте́шителие бы́сте, та́ко и ны́не любо́вь ва́шу к нам яви́те благода́тным де́йством богоприя́тных моли́тв ва́ших, претворя́юще скорбь на́шу на ра́дость, печа́ль же на утеше́ние, вся бо мо́жете о укрепля́ющем вас Христе́, Его́же ве́рнии служи́телие бы́сте, от Него́же прия́вше вся обетова́нная блага́я, низпосли́те и нам вели́кую и бога́тую ми́лость Госпо́дню, да воспое́м и просла́вим ди́внаго во святы́х Свои́х Бо́га, Отца́ и Сы́на и Свята́го Ду́ха, ны́не, и при́сно, и во ве́ки веко́в. Ами́нь.

Молитва вторая святителям Иоанну и Феодору, епископам Суздальским

О, вели́цыи святи́телие и чудотво́рцы Иоа́нне и Фео́доре, уго́дницы Христо́вы и на́ши те́плии засту́пницы и моли́твенницы, земни́и а́нгели и Небе́снии челове́цы, Боже́ственныя Тро́ицы жили́ща, столпи́ благоче́стия, апо́стольскаго уче́ния пропове́дницы, Правосла́вныя ве́ры утвержде́ние, церко́вная красото́, све́тлии свети́льницы, во бране́х кре́пцыи побо́рницы, стра́нным утеше́ние и покро́в вдо́вам, те́плии засту́пницы, сирота́м корми́тели, боля́щим цели́тели, гра́ду Су́ждалю украше́ние, скорбя́щим уте́шители и всем ве́рою к цельбоно́сным моще́й ва́ших ра́кам притека́ющим ско́рии коего́ждо к потре́бе проше́нию послу́шатели, услы́шите нас, смире́нных и недосто́йных раб свои́х, с те́плою ве́рою и со слеза́ми припа́дающих к цельбоно́сным моще́й ва́ших ра́кам. Не ве́мы бо вас ме́ртвых су́щих, а́ще и преста́вистеся от нас, но, ду́хом с на́ми неотсту́пно пребыва́юще, при́сно исполня́ете потре́бу коего́ждо к по́льзе; проше́ния испроси́те па́стве свое́й и всем нам у Го́спода, всея́ тва́ри Соде́теля: благоде́нствие, земли́ благостоя́ние, возду́ха благорастворе́ние, нам же, принося́щим вам сие́ ма́лое моле́ние, коему́ждо теле́сное здра́вие и душе́вное спасе́ние, и вся́кое проше́ние во благое, я́ко да ва́шим заступле́нием и моли́твами сохраня́еми, поклоне́ние и сла́ву и благодаре́ние возсыла́ем в Тро́ице Еди́ному Бо́гу и всех Созда́телю ны́не, и при́сно, и во ве́ки веко́в. Ами́нь.