27 октября.

Канон второй преподобной Параскеве Сербской.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Пусты́нное и безмо́лвное житие́ возлюби́вши, и во сле́д Христа́, Жениха́ твоего́, усе́рдно поте́кши, и Того́ благо́е и́го во ю́ности твое́й взе́мши, кре́стным зна́мением к мы́сленным враго́м му́жески вооружи́вшися, по́стническими по́двиги, посто́м, и моли́твами, и сле́зными ка́плями у́глие страсте́й угаси́ла еси́, достосла́вная Параске́во: и ны́не в небе́снем черто́зе с му́дрыми де́вами предстоя́щи Христу́, моли́ о на́с почита́ющих честну́ю па́мять твою́.

Величание:

Ублажа́ем тя́, преподо́бная ма́ти Параске́во, и чте́м святу́ю па́мять твою́, ты́ бо мо́лиши за на́с Христа́ Бо́га на́шего.

Стихи́ра, гла́с 8:

Вся́к язы́к да подви́жится к похвале́нию Христо́вы кра́сныя неве́сты, чи́стыя голуби́цы, позлаще́нныя Ду́хом Святы́м. Та́ бо возлюби́ пусты́нное житие́, бы́сть Ангелом собесе́дница, де́вственная похвала́, ю́же Ангели восхвали́ша, и челове́честии ро́ди, блажа́ще, вопие́м: ра́дуйся, засту́пнице су́щим в беда́х и обурева́емым приста́нище, преблаже́нная Параске́во, ты́ бо после́довала еси́ твоему́ Жениху́ Христу́, подаю́щему ми́ру ве́лию ми́лость.

Ин кано́н преподо́бныя, гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Преподобная мати Параскево, моли́ Бо́га о нас.

Лику́ющи, ма́ти, на небесе́х и твоему́ Жениху́ Христу́, предстоя́щи при́сно со Ангелы, и проро́ки, и со апо́столы, и со жена́ми преподо́бными, о на́с моли́ся.

Припев: Преподобная мати Параскево, моли́ Бо́га о нас.

По́ст возлюби́вши и чи́стое смире́ние, де́во, Бо́га Истиннаго возвесели́ла еси́; Тому́ непреста́нно о на́с моли́ся.

Сла́ва Отцу́ и Сы́ну и Свято́му Ду́ху:

Ра́достный ти́ Христо́в гла́с прии́де, на земли́ мольбу́ де́ющей, ма́ти честна́я, и ра́дости напо́лнилася еси́, Сего́ пе́сньми за ны́ моля́щи.

И ны́не и при́сно и во ве́ки веко́в. Ами́нь.

Богородичен: Чи́ни Тя́ Ангельстии и челове́честии, Безневе́стная Де́во, хва́лят непреста́нно: Зижди́теля бо и́х я́ко Младе́нца на руку́ Твое́ю понесла́ еси́.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Припев: Преподобная мати Параскево, моли́ Бо́га о нас.

Испроси́, Параске́во, неве́сто Христо́ва сла́вная, грехо́в проще́ние пода́ти ве́рою хва́лящим тя.

Припев: Преподобная мати Параскево, моли́ Бо́га о нас.

Бе́гающи, удали́лася еси́ и всели́лася еси́ в пусты́ни, и гора́х при́сно, и верте́пех, Бо́гу угожда́ющи.

Сла́ва Отцу́ и Сы́ну и Свято́му Ду́ху:

Обрела́ еси́, его́же возлюби́ла еси́ от души́, пречестна́я Параске́во, в широте́ пусты́ни сокро́вище потае́ное.

И ны́не и при́сно и во ве́ки веко́в. Ами́нь.

Богородичен: Тебе́ вси́ стяжа́хом, прибе́жище и сте́ну на́шу, христиа́не, и Тя́ сла́вим немо́лчно, Ма́ти Безневе́стная.

Седа́лен, гла́с 4:

Яви́лася еси́, преподо́бная Параске́во, Це́ркви, я́ко ино́е со́лнце, озаря́ющи сию́ мо́лниями чуде́с твои́х и просвеща́ющи ве́рою вопию́щия ти́: ра́дуйся, по́стниц похвало́ и де́в удобре́ние.

Сла́ва, и ны́не, Богородичен:

Пречи́стеи ру́це Твои́, Де́во Ма́ти, просте́рши, покры́й упова́ющия на Тя́ и Сы́ну Твоему́ зову́щия: все́м пода́ждь, Христе́, ми́лости твоя́.

КрестоБогородичен:

На Дре́ве ви́дящи воздви́жена Сы́на Твоего́, Пречи́стая, утро́бою ма́тернею разтерза́ема, жа́лостно взыва́ла еси́: увы́ Мне́, ка́ко заше́л еси́, Све́те Мо́й безле́тный.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Преподобная мати Параскево, моли́ Бо́га о нас.

Нескве́рно зерца́ло и свя́то по́мыслом себе́ сотво́рши, я́ко свети́ло, при́сно сия́ющи посреде́ по́стниц, сла́вная.

Припев: Преподобная мати Параскево, моли́ Бо́га о нас.

В теле́сном обнаже́нии со́лнечным попале́нием сгара́ла еси́ за любо́вь Жениха́ твоего́, и мра́за студе́ность претерпе́ла еси́.

Сла́ва Отцу́ и Сы́ну и Свято́му Ду́ху:

Всено́щным бде́нием, и моли́твами кре́пкими, и стена́ньми, пло́ти увяди́ла еси́ движе́ния, преблаже́нная ма́ти.

И ны́не и при́сно и во ве́ки веко́в. Ами́нь.

Богородичен: Христа́, Его́же родила́ еси́, Пречи́стая Де́во, Того́ умоли́ рабо́м Твои́м дарова́ти прегреше́ний оставле́ние.

Пе́снь 5

Ирмос: Утренююще вопие́м Ти́: Го́споди, спаси́ ны, Ты́ бо еси́ Бо́г на́ш, ра́зве Тебе́, ино́го не ве́мы.

Припев: Преподобная мати Параскево, моли́ Бо́га о нас.

Дне́ и ми́ра сопроти́вная ве́дящи, жела́ния люботво́рца де́мона люби́ти не восхоте́ла еси́.

Припев: Преподобная мати Параскево, моли́ Бо́га о нас.

Мня́ преодоле́ти твое́й любви́ и чистоте́, но сме́х яви́ся козньми́ прелука́вый.

Сла́ва Отцу́ и Сы́ну и Свято́му Ду́ху:

Погребо́ша твое́ те́ло, я́коже нетле́емо, ты́ бо я́ко безпло́тна пожила́ еси́, богоневе́стная.

И ны́не и при́сно и во ве́ки веко́в. Ами́нь.

Богородичен: Де́ву по Рождестве́ пое́м Тя́, Богоро́дице, Ты́ бо Бо́га пло́тию ми́ру родила́ еси́.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Преподобная мати Параскево, моли́ Бо́га о нас.

Мирски́я молвы́ попра́ла еси́, ми́ра Соде́телю предстои́ши, возлете́вши кри́лы златоукра́шенными, ма́ти, от трудо́в поще́ния и моли́тв, богоблаже́нная.

Припев: Преподобная мати Параскево, моли́ Бо́га о нас.

Богоуго́днаго твоего́ ра́ди жития́, пречестна́я, я́ко да́р освяще́н, оте́честву подае́шися твоему́, Параске́во, к за́паду прише́дши, всесла́вная.

Сла́ва Отцу́ и Сы́ну и Свято́му Ду́ху:

Несказа́нно житие́ измла́да возжеле́вши, неви́дима бо в земли́ потаена́, восходя́щи, преподо́бная, на удивле́ние бы́сть, Бо́гу я́вльшу тя́.

И ны́не и при́сно и во ве́ки веко́в. Ами́нь.

Богородичен: Да избу́дем от лю́тых прегреше́ний моли́твами Твои́ми, Богоро́дице Чи́стая, и да улучи́м Бо́жие сия́ние из Тебе́ неизрече́нно воплоще́ннаго Сы́на Бо́жия.

Конда́к, гла́с 6:

Святу́ю вси́ засту́пницу су́щим в беда́х, благоче́стно воспои́м Параске́ву всечестну́ю: та́ бо, житие́ оста́вльши тле́нное и нетле́емое прия́т бо ве́ки, сего́ ра́ди сла́ву обре́те, чуде́с благода́ть Бо́жиим веле́нием.

Икос:

Прииди́те, по́стническое сосло́вие, прииди́те, чистоты́ рачи́теле, прииди́те, празднолю́бцы вся́к во́зраст, пе́сньми духо́вными похва́лим пустыннолю́бную го́рлицу, по́стников похвалу́, де́в украше́ние, молча́льников удобре́ние, печа́льных уте́шительницу, боля́щих посети́тельницу и су́щим в беда́х скоропослу́шную помо́щницу, богому́друю Параске́ву, точа́щую все́м исцеле́ния, обре́те бо благода́ть чуде́с Бо́жиим веле́нием.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Припев: Преподобная мати Параскево, моли́ Бо́га о нас.

За́йде, я́коже со́лнце, преподо́бная ма́ти, просвеща́еши же чудесы́ ве́рою те́плою и любо́вию пою́щих: благослове́н Бо́г оте́ц на́ших.

Припев: Преподобная мати Параскево, моли́ Бо́га о нас.

Испо́лнишася вся́ страны́ твоего́ благоуха́ния во обре́тение моще́й твои́х, и́мже ве́рою пе́ти повелева́еши, преподо́бная: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Обрета́ешися, ма́ти, хромы́м исправле́ние, и́бо ного́ю боле́вый, скака́я, вопия́ше, зовы́й немо́лчно: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Се́, Юже прорече́, Де́во, Ду́хом Святы́м вели́кий Иса́ия, во чре́ве Бо́га заче́нши, родила́ еси́: и благослове́н, Пречи́стая, Пло́д Твоего́ чре́ва.

Пе́снь 8.

Ирмос: Царя́ Небе́снаго, Его́же пою́т во́и Ангельстии, хвали́те и превозноси́те во вся́ ве́ки.

Припев: Преподобная мати Параскево, моли́ Бо́га о нас.

Укре́пльшися умо́м, безпло́тных жела́нием, вдала́ еси́ те́ло посту́ и живе́ши во ве́ки.

Припев: Преподобная мати Параскево, моли́ Бо́га о нас.

Пребога́тая в жена́х яви́ся, блаже́нная Параске́во, пою́щи Творцу́: Тя́ превозно́сим во ве́ки.

Сла́ва Отцу́ и Сы́ну и Свято́му Ду́ху:

Су́щу разсла́бленному в ле́та мно́га, честна́я, исцеле́ния подаде́ неду́га: те́м тя́ воспева́ше, преподо́бная, во ве́ки.

И ны́не и при́сно и во ве́ки веко́в. Ами́нь.

Богородичен: Соше́дшаго с небе́с и в ложесна́ деви́ческая все́льшася Го́спода, по́йте и превозноси́те Его́ во ве́ки.

Песнь 9

Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Припев: Преподобная мати Параскево, моли́ Бо́га о нас.

Не преста́й моля́щи Христа́, ма́ти преподо́бная, изба́вити ны́ от бе́д рабы́ твоя́, и́же от души́ пою́щия тя́ и велича́ющия.

Припев: Преподобная мати Параскево, моли́ Бо́га о нас.

Красота́ де́в яви́лася еси́, преподо́бная, я́ко Ангельскому житию́ поревнова́ла еси́, не преста́й моля́щи о отече́стве твое́м.

Сла́ва Отцу́ и Сы́ну и Свято́му Ду́ху:

Сочета́лася еси́ со безпло́тными ликостоя́нии и Влады́це предстои́ши, ра́дующися, с му́дрыми де́вами, Сему́ моля́щися о ми́ре.

И ны́не и при́сно и во ве́ки веко́в. Ами́нь.

Богородичен: Ра́дости испо́лни мя́ и весе́лия, Де́во, я́ко прии́мши вину́ ра́дости: Ты́ бо источи́ла еси́ все́м ра́дование.

Свети́лен.

Яко Боже́ственный све́т, Параске́во, пе́сненно Це́ркви яви́лася еси́, красото́ю сию́ озари́вши све́том лица́ твоего́, предо́брая неве́сто Христо́ва: к Нему́же непреста́нно моли́ся о все́х на́с.

Сла́ва, и ны́не, Богородичен:

Дре́вле дарова́нную ми́ ри́зу ба́нею креще́ния оскверни́в стра́стным блуже́нием, ужаса́юся, окая́нный, ча́с помышля́я вои́стинну Боже́ственнаго Суда́, Де́во Всенепоро́чная, предста́ни тогда́ и изба́ви мя́ стра́шнаго преще́ния.

Молитва

О, прекра́сная неве́сто Христо́ва, чи́стая голуби́це, позлаще́нная Ду́хом Святы́м, де́вственная похвало́ и пустынножи́тельная собесе́днице А́нгелов, насади́вшая на земли́ мы́сленный рай твои́ми доброде́телями, преподо́бная ма́ти Параске́во! Что принесе́м тебе́ досто́йнаго в дар, кроме́ смире́нных и гре́шных моле́ний на́ших, я́же прии́мшы, очи́стя я́ святы́ми твои́ми моли́твами и принеси́ к Жениху́ твоему́, Христу́ Бо́гу на́шему! Ублажа́ем тя, красото́ Се́рбскаго наро́да и на́ша засту́пнице и храни́тельнице, е́юже хва́лятся ца́рие и кня́зи. Ты, я́ко хра́брый воево́да, кре́постию, да́нною ти от Царя́ сил, обраща́ла со студо́м вспять ли́ца враго́в страны́ твоея́, и на́шу страну́ Росси́йскую си́лою моли́тв твои́х огради́ от всех наве́т ви́димых и неви́димых враго́в. Моли́ Бо́га о нас, о преподо́бная ма́ти, да не я́ростию Свое́ю обличи́т нас, ниже́ гне́вом Свои́м нака́жет нас за премно́гия грехи́ на́ша, но ми́лостию Свое́ю да огради́т нас и да да́рует нам вре́мя на покая́ние и исправле́ние. О преподо́бная Параске́во, всех, собра́вшихся в сем хра́ме и с любо́вию чту́щих святу́ю па́мять твою́, осени́ твои́м заступле́нием и испроси́ у Царя́ сил, Ему́же со А́нгелы предстои́ши, коему́ждо благопотре́бная во вре́менной жи́зни сей, па́че же помози́ нам достиже́нии Ца́рства Небе́снаго в бу́дущем ве́це твои́ми те́плыми моли́твами и хода́тайством ко Го́споду на́шему Иису́су Христу́, Ему́же подоба́ет вся́кая сла́ва, честь и поклоне́ние со Отце́м и Святы́м Ду́хом, ны́не и при́сно и во ве́ки веко́в. Ами́нь.