Шрифт

27 октября.

Канон первый преподобной Параскеве Сербской.

Преподобной Параскеве Сербской
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Пусты́нное и безмо́лвное житие́ возлюби́вши, и во сле́д Христа́, Жениха́ твоего́, усе́рдно поте́кши, и Того́ благо́е и́го во ю́ности твое́й взе́мши, кре́стным зна́мением к мы́сленным враго́м му́жески вооружи́вшися, по́стническими по́двиги, посто́м, и моли́твами, и сле́зными ка́плями у́глие страсте́й угаси́ла еси́, достосла́вная Параске́во: и ны́не в небе́снем черто́зе с му́дрыми де́вами предстоя́щи Христу́, моли́ о на́с почита́ющих честну́ю па́мять твою́.

Величание:

Ублажа́ем тя́, преподо́бная ма́ти Параске́во, и чте́м святу́ю па́мять твою́, ты́ бо мо́лиши за на́с Христа́ Бо́га на́шего.

Стихи́ра, гла́с 8:

Вся́к язы́к да подви́жится к похвале́нию Христо́вы кра́сныя неве́сты, чи́стыя голуби́цы, позлаще́нныя Ду́хом Святы́м. Та́ бо возлюби́ пусты́нное житие́, бы́сть Ангелом собесе́дница, де́вственная похвала́, ю́же Ангели восхвали́ша, и челове́честии ро́ди, блажа́ще, вопие́м: ра́дуйся, засту́пнице су́щим в беда́х и обурева́емым приста́нище, преблаже́нная Параске́во, ты́ бо после́довала еси́ твоему́ Жениху́ Христу́, подаю́щему ми́ру ве́лию ми́лость.

Кано́н преподо́бныя, гла́с 6.

Пе́снь 1.

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Преподобная мати Параскево, моли́ Бо́га о нас.

Моего́ ра́зума твои́ми моли́твами мра́к отжени́, Параске́во преподо́бная, да воспою́ сла́вную твою́ па́мять, и светоно́сную, и блаже́нную пе́сньми.

Припев: Преподобная мати Параскево, моли́ Бо́га о нас.

Яко река́ устреми́ся от Сио́на, сла́вная Параске́во, напои́ла еси́ зело́ боже́ственными струя́ми ве́рных со́нмы, вопию́щи: Го́сподеви пои́м пе́снь но́вую.

Сла́ва Отцу́ и Сы́ну и Свято́му Ду́ху:

Боже́ственными сия́нии ду́шу твою́ озари́вши, Параске́во, сладостра́стие пло́ти воздержа́ния попали́ла еси́ огне́м, пою́щи и́стинную пе́снь Христу́.

И ны́не и при́сно и во ве́ки веко́в. Ами́нь.

Богородичен: Све́тлыми луча́ми Твоего́ Сы́на, Богоро́дице, просвети́ омраче́нную мою́ ду́шу и страсте́й смуще́ние твои́ми, Чи́стая, укроти́ хода́тайствы.

Пе́снь 3.

Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Преподобная мати Параскево, моли́ Бо́га о нас.

Ты́ испо́лнилася еси́, му́драя ма́ти Параске́во, Боже́ственнаго Ду́ха и яви́лася еси́, пита́ющи бога́тно благоче́стия сла́достию, живо́тным сло́вом зря́щия к тебе́.

Припев: Преподобная мати Параскево, моли́ Бо́га о нас.

От повеле́ний Боже́ственнаго сия́ния просвети́ла еси́ вся́, блаже́нная Параске́во, отгна́вши всю́ ерети́ческую зло́бу, Жизнода́вцу Христу́ воспева́ющи: свя́т еси́, Го́споди.

Сла́ва Отцу́ и Сы́ну и Свято́му Ду́ху:

На го́ру Боже́ственных доброде́телей востекла́ еси́, Параске́во, и во о́блак виде́ний прини́кши, сочета́лася еси́ с Бо́гом, разу́мныя скрижа́ли прии́мши зако́на благода́тнаго.

И ны́не и при́сно и во ве́ки веко́в. Ами́нь.

Богородичен: Се́ ле́ствица Иа́ковля, ю́же ви́де иногда́ утвержде́ну, на не́йже утвержда́шеся Бо́г, светоно́сна, Чи́стая, яви́ся де́вствующи.

Седа́лен, гла́с 4:

Яви́лася еси́, преподо́бная Параске́во, Це́ркви, я́ко ино́е со́лнце, озаря́ющи сию́ мо́лниями чуде́с твои́х и просвеща́ющи ве́рою вопию́щия ти́: ра́дуйся, по́стниц похвало́ и де́в удобре́ние.

Сла́ва, и ны́не, Богородичен:

Пречи́стеи ру́це Твои́, Де́во Ма́ти, просте́рши, покры́й упова́ющия на Тя́ и Сы́ну Твоему́ зову́щия: все́м пода́ждь, Христе́, ми́лости твоя́.

КрестоБогородичен:

На Дре́ве ви́дящи воздви́жена Сы́на Твоего́, Пречи́стая, утро́бою ма́тернею разтерза́ема, жа́лостно взыва́ла еси́: увы́ Мне́, ка́ко заше́л еси́, Све́те Мо́й безле́тный.

Пе́снь 4.

Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Преподобная мати Параскево, моли́ Бо́га о нас.

Поще́нием, преподо́бная Параске́во, себе́ очи́стивши, вся́ све́та испо́лнилася еси́, и вся́ боговме́стна показа́лася еси́, и вся́ яви́лася еси́ Ду́ху соприча́стна.

Припев: Преподобная мати Параскево, моли́ Бо́га о нас.

Гла́дом уморя́ющи лю́те зло́е ю́ности игра́ние, Параске́во блаже́нная, и по́стническия терпи́ши боле́зни, от со́вести чи́сты о Го́споде веселя́щися.

Сла́ва Отцу́ и Сы́ну и Свято́му Ду́ху:

Облиста́вши, сла́вная, жития́ исправле́нии, обощрена́ яви́лася еси́, я́ко Христо́в ме́чь, ссеца́ющи де́монская ухищре́ния, Боже́ственным Ду́хом укрепля́ема.

И ны́не и при́сно и во ве́ки веко́в. Ами́нь.

Богородичен: Свети́льник всесве́тлый, Боже́ственная трапе́за, Бо́жие селе́ние, киво́т и же́зл, процве́тши в ми́ре Христа́, Ты́ яви́лася еси́, Ма́ти Де́во.

Пе́снь 5

Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Преподобная мати Параскево, моли́ Бо́га о нас.

Светопода́тельными твои́ми блиста́ньми, Параске́во, мра́чную тму́ потреби́ла еси́ ерети́ческую, и Богозна́ния све́том озари́вшися, просвеща́еши ми́ра концы́.

Припев: Преподобная мати Параскево, моли́ Бо́га о нас.

Тебе́ вси́, засту́пницу иму́ще, досто́йно сла́вим, Параске́во, ты́ бо яви́лася еси́ Ангелов собесе́дница и де́в украше́ние, ма́ти преподо́бная.

Сла́ва Отцу́ и Сы́ну и Свято́му Ду́ху:

Яви́лася еси́, ма́ти Параске́во, светоза́рна, заблу́ждших путеводи́тельница, вла́ющихся прави́тельница, и коле́блющихся в лю́тых тве́рдость, и стена́ неруши́ма.

И ны́не и при́сно и во ве́ки веко́в. Ами́нь.

Богородичен: Добро́та Иа́ковля, ю́же возлюби́ Бо́г и всели́тися избра́, земны́х сла́ва и прибе́жище греша́щих, Богоро́дице, Ты́ яви́лася еси́.

Пе́снь 6.

Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Преподобная мати Параскево, моли́ Бо́га о нас.

Сия́еши, я́ко со́лнце, богоза́рны лучи́, преблаже́нная Параске́во, чуде́с испуща́ющи похваля́ющим твоя́ по́стныя труды́ и ди́вныя по́двиги.

Припев: Преподобная мати Параскево, моли́ Бо́га о нас.

Пречи́стую Влады́чицу Богоро́дицу похваля́ющи че́стно, язы́ком твои́м, богому́драя Параске́во, воспе́вши словеса́ светоза́рная, ве́рных со́нмища му́дре сердца́ умаща́ющи.

Сла́ва Отцу́ и Сы́ну и Свято́му Ду́ху:

Напи́санный всечестны́й и святы́й о́браз любе́зно лобыза́еши, безбо́жных же писа́ния потребля́еши, и те́х богоме́рзская и безбо́жная повеле́ния поплева́еши, и возвеща́еши че́сть и поклоне́ние о́браза Христо́ва.

И ны́не и при́сно и во ве́ки веко́в. Ами́нь.

Богородичен: Вся́ хоте́нием Свои́м соста́вивый Бо́г и содержа́й вся́ческая, описа́нием телесе́ на Твои́х рука́х держи́тся, Пречи́стая, Иже Боже́ственным Существо́м неопи́санный.

Конда́к, гла́с 6:

Святу́ю вси́ засту́пницу су́щим в беда́х, благоче́стно воспои́м Параске́ву всечестну́ю: та́ бо, житие́ оста́вльши тле́нное и нетле́емое прия́т бо ве́ки, сего́ ра́ди сла́ву обре́те, чуде́с благода́ть Бо́жиим веле́нием.

Икос:

Прииди́те, по́стническое сосло́вие, прииди́те, чистоты́ рачи́теле, прииди́те, празднолю́бцы вся́к во́зраст, пе́сньми духо́вными похва́лим пустыннолю́бную го́рлицу, по́стников похвалу́, де́в украше́ние, молча́льников удобре́ние, печа́льных уте́шительницу, боля́щих посети́тельницу и су́щим в беда́х скоропослу́шную помо́щницу, богому́друю Параске́ву, точа́щую все́м исцеле́ния, обре́те бо благода́ть чуде́с Бо́жиим веле́нием.

Пе́снь 7.

Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Преподобная мати Параскево, моли́ Бо́га о нас.

Исправля́ющи ты́ сло́во Жениха́ Христа́, Тому́ невозвра́тным жела́нием после́довала еси́, господоимени́тая Параске́во, вопию́щи: благослове́н Бо́г оте́ц на́ших.

Припев: Преподобная мати Параскево, моли́ Бо́га о нас.

Добро́ты тле́ющия, Параске́во преподо́бная, небрегла́ еси́, смотря́ющи та́мо су́щаго воздая́ния, и прия́ла еси́ сла́ву нестаре́ющуюся, Бо́жию красоту́ и весе́лие.

Сла́ва Отцу́ и Сы́ну и Свято́му Ду́ху:

Ре́ки твои́х слове́с медото́чных, Параске́во, челове́ком ду́ши весе́лия Боже́ственнаго исполня́еши, хвалосло́вящим пе́сньми Бо́га препросла́вленнаго.

И ны́не и при́сно и во ве́ки веко́в. Ами́нь.

Богородичен: На Тебе́ соде́яся вели́кое, Де́во Ма́ти, та́инство: Сы́н Бо́жий из чре́ва Твоего́ воплоти́ся и все́м яви́ся, Ему́же, веселя́щеся, пое́м: отце́в Бо́же, благослове́н еси́.

Пе́снь 8.

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Преподобная мати Параскево, моли́ Бо́га о нас.

По зако́не о́тчи, зако́н оте́ческий, всеблаже́нная, и́стинно нося́щи, де́монская ли́ца поплева́ла еси́, Госпо́дне воображе́ние благоче́стно лобыза́ющи, е́же прии́м в ми́ре, яви́вшася от Де́вы Отрокови́цы: Его́же превозно́сим во ве́ки.

Припев: Преподобная мати Параскево, моли́ Бо́га о нас.

Ум Боже́ствен и Ду́ха Пресвята́го гу́сль всесочета́нна, слави́й добропе́снивый, ве́рных похвала́ верхо́вная, Правосла́вия сто́лпе и утвержде́ние му́дрое, церко́вное пра́вило, мона́хинь сла́ва и все́х преподо́бных удобре́ние яви́лася еси́, пою́щи Христа́ во ве́ки.

Сла́ва Отцу́ и Сы́ну и Свято́му Ду́ху:

Мирополо́жница Ду́ха Пресвята́го, ма́ти, показа́лася еси́ излия́нием ми́ра благово́нных твои́х и му́дрых уче́ний, потребля́ющи пре́лести злосмра́дную тлю́ и благо́вонствуя нра́вом твои́м, Параске́во, Честну́ю Це́рковь, зову́щи непреста́нно: пе́сньми Тя́ превозно́сим, Христе́, во ве́ки.

И ны́не и при́сно и во ве́ки веко́в. Ами́нь.

Богородичен: Бо́жия гора́ ту́чная, ея́же пра́отец Дави́д уясни́в, дре́вле поя́ проро́чески, ты́ яви́лася еси́, Де́во, от нея́же отсече́ся Ка́мык краеуго́льный Христо́с и сокруши́ кре́пость и́дольскую: Того́ непреста́нно пое́м и превозно́сим во ве́ки.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Преподобная мати Параскево, моли́ Бо́га о нас.

Посо́бствующу тя́ по Христо́ве Це́ркви, человекоуби́йца зре́ти не моги́й, искуше́ния тебе́ простира́ет: оба́че непрекло́нна пребы́вши, мы́сленным враго́м проти́вилася еси́ до́блественно, покланя́ющися о́бразу Христо́ву, богому́драя Параске́во.

Припев: Преподобная мати Параскево, моли́ Бо́га о нас.

Укра́шена несказа́нною, богому́драя, до́блестию и упещре́на сия́ньми светле́йшими, ра́достно, преблаже́нная, предстои́ши Престо́лу Зижди́теля Бо́га, иде́же пра́зднующих гла́с, богому́драя Параске́во.

Сла́ва Отцу́ и Сы́ну и Свято́му Ду́ху:

Твои́х по́двигов досто́йную прия́ла еси́ по́честь, и венцено́сица ны́не на небесе́х со Ангелы ликовству́ющи, иде́же проро́ческий со́нм, и апо́стол, и му́ченик вои́стинну во́инства мно́га, иде́же патриа́рхов ликостоя́ния, помина́й на́с, преподо́бная ма́ти Параске́во.

И ны́не и при́сно и во ве́ки веко́в. Ами́нь.

Богородичен: Побо́рствующи царе́м ве́рным во бране́х, Импера́тору на́шему на сопроти́вныя да́ждь побе́ды, Богороди́тельнице, покрыва́ющи от вся́каго наве́та враго́в, Ма́ти Бо́га Сло́ва Неискусобра́чная Чи́стая, да Твоего́ Сы́на пою́ще, Тя́ велича́ем.

Свети́лен.

Яко Боже́ственный све́т, Параске́во, пе́сненно Це́ркви яви́лася еси́, красото́ю сию́ озари́вши све́том лица́ твоего́, предо́брая неве́сто Христо́ва: к Нему́же непреста́нно моли́ся о все́х на́с.

Сла́ва, и ны́не, Богородичен:

Дре́вле дарова́нную ми́ ри́зу ба́нею креще́ния оскверни́в стра́стным блуже́нием, ужаса́юся, окая́нный, ча́с помышля́я вои́стинну Боже́ственнаго Суда́, Де́во Всенепоро́чная, предста́ни тогда́ и изба́ви мя́ стра́шнаго преще́ния.

Стихи́ры, гла́с 8.

Гряди́те вси́, богому́дрии, / от земли́ да́льния, / ра́це прикосну́вшеся преподо́бныя / и проше́ния своя́ от души́ принося́ще, / приими́те избавле́ние / от страсте́й разли́чных: / ини́и же грехо́в разреше́ние, / и к Бо́гу присвое́ние, / и вся́ку по́льзу на́м ко спасе́нию.

Поще́ния пу́ть восприе́мши, / жите́йския бу́ри избе́гши, / Параске́во сла́вная, / о́во у́бо с му́дрыми де́вами / светоно́сна вошла́ еси́ во дворы́ Го́спода твоего́, / о́во же, уневе́стившися Ему́, / источа́еши исцеле́ния притека́ющим к тебе́, / и от душе́вных неду́г избавля́еши, / и́же к Бо́гу твои́ми моли́твами.

Наде́ждею Христо́вою и ве́рою возмо́гши, / стяжа́ния роди́телей отбе́гши, / и со безпло́тными лику́еши, / преподо́бная ма́ти Параске́во сла́вная. / Те́мже исцеле́ние то́чиши по сме́рти: / твоя́ бо мо́щи показа́шася, вся́ким благоуха́нием испо́лнены, / е́же Христо́с тебе́ дарова́, Его́же возлюби́ла еси́, / Его́же возжеле́ла еси́, / и То́й тя́ просла́ви, преподо́бная.

Сла́ва И ны́не, гла́с 8:

Оте́чество, и сро́дство, и име́ние оста́вльши, Параске́во, и нече́стия вся́ мирска́я возненави́девши, Бо́га Еди́наго возлюби́ла еси́, Ему́же и поще́нием уневе́стилася еси́ и была́ еси́ Свята́го Ду́ха жили́ще, от Него́же светоли́тием просвети́вшися, Того́ моли́ спасти́ ду́ши на́ша.

Молитва

О, прекра́сная неве́сто Христо́ва, чи́стая голуби́це, позлаще́нная Ду́хом Святы́м, де́вственная похвало́ и пустынножи́тельная собесе́днице А́нгелов, насади́вшая на земли́ мы́сленный рай твои́ми доброде́телями, преподо́бная ма́ти Параске́во! Что принесе́м тебе́ досто́йнаго в дар, кроме́ смире́нных и гре́шных моле́ний на́ших, я́же прии́мшы, очи́стя я́ святы́ми твои́ми моли́твами и принеси́ к Жениху́ твоему́, Христу́ Бо́гу на́шему! Ублажа́ем тя, красото́ Се́рбскаго наро́да и на́ша засту́пнице и храни́тельнице, е́юже хва́лятся ца́рие и кня́зи. Ты, я́ко хра́брый воево́да, кре́постию, да́нною ти от Царя́ сил, обраща́ла со студо́м вспять ли́ца враго́в страны́ твоея́, и на́шу страну́ Росси́йскую си́лою моли́тв твои́х огради́ от всех наве́т ви́димых и неви́димых враго́в. Моли́ Бо́га о нас, о преподо́бная ма́ти, да не я́ростию Свое́ю обличи́т нас, ниже́ гне́вом Свои́м нака́жет нас за премно́гия грехи́ на́ша, но ми́лостию Свое́ю да огради́т нас и да да́рует нам вре́мя на покая́ние и исправле́ние. О преподо́бная Параске́во, всех, собра́вшихся в сем хра́ме и с любо́вию чту́щих святу́ю па́мять твою́, осени́ твои́м заступле́нием и испроси́ у Царя́ сил, Ему́же со А́нгелы предстои́ши, коему́ждо благопотре́бная во вре́менной жи́зни сей, па́че же помози́ нам достиже́нии Ца́рства Небе́снаго в бу́дущем ве́це твои́ми те́плыми моли́твами и хода́тайством ко Го́споду на́шему Иису́су Христу́, Ему́же подоба́ет вся́кая сла́ва, честь и поклоне́ние со Отце́м и Святы́м Ду́хом, ны́не и при́сно и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Преподобной Параскеве Сербской