27 октября.

Канон святым мученикам Назарию, Гервасию, Протасию и Келсию.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́, Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости. Те́х моли́твами спаси́ ду́ши на́ша.

Канон святы́х. Гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Святи́и му́ченицы, моли́те Бо́га о нас.

Ве́рно пострада́вше и по́двиг сконча́вше, побе́ды венце́м увязо́стеся, боже́ственнии му́ченицы. Боже́ственную ва́шу па́мять те́м пра́зднуем, веселя́щеся.

Припев: Святи́и му́ченицы, моли́те Бо́га о нас.

Ве́трилом вперя́еми Ду́ха Боже́ственнаго, пучи́ну немо́кренно преидо́сте, му́ченицы сла́внии, муче́ний и ны́не к Боже́ственному приста́нищу вы́шния све́тлости всели́стеся.

Сла́ва Отцу́ и Сы́ну и Свято́му Ду́ху:

Кресто́м, я́коже броня́ми, оде́яни, блаже́ннии, врага́ безпло́тнаго пора́товасте в те́ле, томле́ния многоплете́нная и сме́рть непра́ведную претерпе́вше.

И ны́не и при́сно и во ве́ки веко́в. Ами́нь.

Богородичен: Еди́ну, вмести́вшую Преве́чнаго Го́спода во утро́бе, Всенепоро́чную Отрокови́цу воспои́м, я́ко бы́сть небе́с простра́ннейши, Бо́га воплоти́вши бла́гости ра́ди.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Припев: Святи́и му́ченицы, моли́те Бо́га о нас.

Яко гро́здие боже́ственнии бы́сте Виногра́да Боже́ственнаго и́стинно, страда́ния излива́юще вино́ на́м, му́ченицы, духо́вно веселя́щее все́х сердца́ благода́тию.

Припев: Святи́и му́ченицы, моли́те Бо́га о нас.

Кре́пко проти́вился еси́ гони́телю, Наза́рие, му́чениче Христо́в, повелева́ющу ме́рзским тебе́ бого́м жре́ти, пребога́те, я́ко а́гня заколе́нию гото́в бы́л еси́, сла́вне.

Сла́ва Отцу́ и Сы́ну и Свято́му Ду́ху:

Хвале́ния вси́ согла́сие воспои́м дне́сь ве́рно Наза́рию, Герва́сию, Прота́сию и Келси́ю, и́стины свиде́телем, бы́вшим в Ду́се.

И ны́не и при́сно и во ве́ки веко́в. Ами́нь.

Богородичен: Зако́на прообразова́ше ски́ния Тя́ бы́ти хотя́щую, Чи́стая, Бо́жие свяще́нное жили́ще, из него́же Очище́ние на́ше, святы́ню да́руяй все́м на́м, прии́дет.

Седа́лен, гла́с 8.

Наза́риевы стра́сти и гоне́ния, Прота́сиевы боле́зни и ра́ны чту́ще, Герва́сия хва́лим и Келси́я, Святы́я Тро́ицы сосу́ды честны́я, све́тлыя зве́зды, ве́рных предсто́лпия, нече́стия и́стиннии потреби́теле, и столпи́ ве́ры, и утвержде́ние непоколеби́мо. Имже ве́рою возопии́м: моли́те Христа́ Бо́га грехо́в оставле́ние дарова́ти чту́щим любо́вию святу́ю па́мять ва́шу.

Сла́ва, и ны́не, Богородичен:

Яко де́ву и еди́ну в жена́х, Тя́, без се́мене ро́ждшую Бо́га пло́тию, вси́ ублажа́ем, ро́ди челове́честии: о́гнь бо всели́ся в Тя́ Божества́, и я́ко Младе́нца дои́ши Зижди́теля и Го́спода. Те́м, Ангельский и челове́ческий ро́д, досто́йно сла́вим пресвято́е Рождество́ Твое́ и согла́сно вопие́м Ти́: моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му Рождеству́ Твоему́.

КрестоБогородичен:

Агнца и Па́стыря и Изба́вителя, Агница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мляй Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние, ве́рою пою́щим Боже́ственныя Стра́сти Твоя́.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Святи́и му́ченицы, моли́те Бо́га о нас.

Па́че смы́сла святы́х му́ченик Твои́х любо́вь превосхо́дит вся́ помышле́ния, Сло́ве, боре́ния, и му́жественныя по́двиги, и натрижне́ния, я́же пода́л еси́ зако́нно и́м, пострада́вшим.

Припев: Святи́и му́ченицы, моли́те Бо́га о нас.

Еди́н ра́зум, в ра́зных ураня́еми телесе́х, Христо́вы ору́жницы преизли́шно показа́ша, Еди́наго Бо́га в три́знищи испове́даша и многобо́жия ле́сть я́ве погуби́ша.

Припев: Святи́и му́ченицы, моли́те Бо́га о нас.

Наза́рия, Прота́сия, Герва́сия и Келси́я, честны́х му́чеников, Ангели боре́нию подиви́шася, ка́ко в пло́ти безпло́тному сплета́ющеся, низложи́ша сего́ на зе́млю му́жественнейше.

Сла́ва Отцу́ и Сы́ну и Свято́му Ду́ху:

Яко до́блии во́ини, я́ко непобеди́мии му́ченицы, я́ко Христо́вы ору́жницы и я́ко благоче́стия побо́рницы небе́сная селе́ния насле́довасте и лико́м Ангельским всегда́ свеселя́щеся.

И ны́не и при́сно и во ве́ки веко́в. Ами́нь.

Богородичен: Не истощи́в Оте́ческих, Пребоже́ственный, Пречи́стая Богоро́дице, не́др, в не́дрех Твои́х пречи́стых седи́т, Боже́ственное седа́лище все́м благосты́нею готовля́я и сла́ву, при́сно пребыва́ющую.

Пе́снь 5

Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Припев: Святи́и му́ченицы, моли́те Бо́га о нас.

Ра́нам те́ло твое́, Наза́рие, приобщи́ся, у́зам многообра́зных му́к, мѵ́ро благово́нное те́м источа́ет на́м, облагово́нствующее ду́ши ве́рою несомне́нною тя́ почита́ющих, всехва́льне.

Припев: Святи́и му́ченицы, моли́те Бо́га о нас.

Кропле́ньми крове́й твои́х погаси́л еси́ у́глие многобо́жия, страстоте́рпче, боже́ственных чуде́с огне́м же, всему́дре, ти́ну страсте́й лю́тых пожига́еши, Бо́жиею благода́тию Спа́совою, Наза́рие.

Припев: Святи́и му́ченицы, моли́те Бо́га о нас.

Цве́ты, дыха́ющии воню́ Бо́жия зна́ния, богозна́ния зла́чники, ра́йская древеса́ благопло́дная, предо́брыя и светоза́рныя, почти́м му́ченики и ве́рно ублажи́м.

Сла́ва Отцу́ и Сы́ну и Свято́му Ду́ху:

Да пое́тся Наза́рий, да велича́ется Келси́й, ку́пно с Прота́сием до́блий да похва́лится ве́рою Герва́сий, Це́ркве непрекло́ннии столпи́ и основа́ния неруши́мая бы́вшии.

И ны́не и при́сно и во ве́ки веко́в. Ами́нь.

Богородичен: Ору́жие, дре́вле Еде́м стрегу́щее, плещи́ ве́рным подае́т, Чи́стая, зна́менанным честно́ю Кро́вию, пре́жде источи́вшеюся от ре́бр копия́ прободе́нием, из Тебе́ Возсия́вшаго.

Пе́снь 6.

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припев: Святи́и му́ченицы, моли́те Бо́га о нас.

Твоя́ ше́ствия на вода́х бы́ша, всеблаже́нне Наза́рие, и не позна́шася си́м следы́ твоя́ в Ду́се, Его́же си́лою вся́ враги́ посрами́л еси́.

Припев: Святи́и му́ченицы, моли́те Бо́га о нас.

Теле́с стра́сти неисце́льныя Бо́жиею благода́тию исцели́л еси́, му́чениче Наза́рие, мѵ́ро благово́нное источа́еши же твои́м честны́м моще́м приближа́ющимся.

Сла́ва Отцу́ и Сы́ну и Свято́му Ду́ху:

Яве боже́ственный Прота́сий, вели́кий же с ни́м Герва́сий, бога́тство привре́менное и могу́тство попра́вше, ве́чныя сла́вы сподо́бишася.

И ны́не и при́сно и во ве́ки веко́в. Ами́нь.

Богородичен: Зако́ны еди́на обнови́ла еси́ естества́, Де́во, ро́ждши Бо́га безсме́ртнаго, в пло́ть ме́ртвенную оде́явшася, да ме́ртвыя оживи́т бла́гостию.

Конда́к, гла́с 2.

Свети́льницы све́тлии я́вльшеся, боже́ственнии му́ченицы, тва́рь све́том чуде́с озаря́ете, неду́гов разреша́юще глубо́кую но́щь всегда́ и Христу́ еди́ному Бо́гу моля́щеся непреста́нно о все́х на́с.

Икос:

Яко светоза́рнии и боже́ственнии свети́льницы, Све́ту Вели́кому предстоя́ще при́сно, богоблаже́ннии му́ченицы, и отту́ду испуща́емыми невече́рняго Божества́ сия́нии всегда́ просвеща́еми и обожа́еми, ве́рою па́мять ва́шу соверша́ющия боже́ственную просвети́те, и омраче́ния, и страсте́й, и бе́д, и зло́бы изба́вите, моля́щеся непреста́нно о все́х на́с.

Пе́снь 7.

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Святи́и му́ченицы, моли́те Бо́га о нас.

На ка́мени боже́ственнаго зна́ния утверди́вше стопы́, сла́внии, серде́ц ва́ших вра́жиими ухищре́ньми не преврати́сте, воспева́юще: препе́тый отце́в Госпо́дь и Бо́г, благослове́н еси́.

Припев: Святи́и му́ченицы, моли́те Бо́га о нас.

Све́т невече́рний страда́вшим кро́вию ва́м возсия́, и весе́лие я́ве ва́с прия́т, великому́ченицы, воспева́ющих: препе́тый отце́в Госпо́дь и Бо́г, благослове́н еси́.

Сла́ва Отцу́ и Сы́ну и Свято́му Ду́ху:

Освяти́сте преусе́рдно проходя́ще гра́ды, блаже́ннии, испове́дающе Христа́ пред мучи́тели и все́м исцеле́ния подаю́ще тре́бующим благода́тию Ду́ха Всесвята́го.

И ны́не и при́сно и во ве́ки веко́в. Ами́нь.

Богородичен: Светле́йшую пала́ту обре́т Бо́г утро́бу Твою́, в сию́ всели́ся, сы́ны соде́ловая све́та, Всенепоро́чная, зову́щия: оте́ц на́ших Бо́же, благослове́н еси́.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Святи́и му́ченицы, моли́те Бо́га о нас.

Утренююще к возсия́вшему из Де́вы пресла́вно вели́кому Со́лнцу, му́ченицы непобеди́мии све́т бы́сте и пре́лести тму́ благода́тию разори́сте: Го́спода по́йте, вопию́ще, дела́ и превозноси́те Его́ во вся́ ве́ки.

Припев: Святи́и му́ченицы, моли́те Бо́га о нас.

Ри́м дре́вле по́двиги твоя́ пропове́дает, Наза́рие многострада́льне, Константиногра́д пое́т чудеса́, свяще́нныя твоя́ мо́щи ве́рою содержа́я, Го́спода по́йте, вопию́щий, дела́ и превозноси́те Его́ во вся́ ве́ки.

Припев: Святи́и му́ченицы, моли́те Бо́га о нас.

Боже́ственный Наза́рий, источа́я мѵ́ра благода́ти, повелева́ет все́м притека́ющим ве́рою почерпа́ти на просвеще́ние и очище́ние, взыва́ющим: Го́спода по́йте дела́ и превозноси́те Его́ во вся́ ве́ки.

Сла́ва Отцу́ и Сы́ну и Свято́му Ду́ху:

Ва́с, до́блия страстоте́рпцы, Наза́рия, Келси́я, Прота́сия, па́ки же Герва́сия, моле́бники ко Го́споду крепча́йшия иму́ще, любо́вию зове́м: Го́спода по́йте дела́ и превозноси́те Его́ во вся́ ве́ки.

И ны́не и при́сно и во ве́ки веко́в. Ами́нь.

Богородичен: Пло́тию соедини́вся Тебе́ по существу́, все́м, е́же бы́ти, Подая́й, всего́ мя́ обнови́, всего́ назда́, обветша́вшаго, Пречи́стая, преступле́ньми. Те́м Тя́, Де́ву, пое́м и превозно́сим во вся́ ве́ки.

Песнь 9

Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Припев: Святи́и му́ченицы, моли́те Бо́га о нас.

Кре́постию вжиля́еми Христа́, разо́ршаго зло́бу губи́теля, преклони́вше сему́ вы́ю, коне́ц мече́м прия́сте, разре́шшеся от пло́ти, великоимени́тии, те́м досто́йно блажи́ми есте́.

Припев: Святи́и му́ченицы, моли́те Бо́га о нас.

Красни́ я́звами плотски́ми бы́сте и Ангелом уподо́бистеся, ны́не же предстоите́ все́х, ра́дующеся, при́сно Красоте́, прича́стием я́ве удобря́еми, красне́йше, всечестни́и.

Припев: Святи́и му́ченицы, моли́те Бо́га о нас.

Зна́меньми и чудесы́ ва́с украси́ и пре́жде конца́, всеприснопа́мятнии, и по конце́ Влады́ка, Наза́рие, Прота́сие, Келси́е, Герва́сие, непобеди́мии му́ченицы, те́м досто́йно ублажа́етеся.

Сла́ва Отцу́ и Сы́ну и Свято́му Ду́ху:

Освяти́шася любо́вию ва́шею вся́ческая, соверша́ющи па́мять дне́сь: ра́дуются му́ченицы и вси́ проро́цы с на́ми пра́зднуют, с ни́миже о на́с моли́теся Благоде́телю, всеблаже́ннии.

И ны́не и при́сно и во ве́ки веко́в. Ами́нь.

Богородичен: Гла́с Ти́ боже́ственнаго Гаврии́ла прино́сим, веселя́щеся, Отрокови́це Пречи́стая: ра́дуйся, Обра́дованная, му́чеников, апо́столов похвало́ и все́х ве́рных спасе́ние, Де́во Ма́ти Неискусобра́чная.

Свети́лен.

Претерпе́л еси́, я́ко безпло́тен, нестерпи́мыя му́ки, Наза́рие блаже́нне, му́чеников сла́ва, с Герва́сием му́дрым, Прота́сием же ку́пно и боже́ственным Келси́ем. Те́м ве́рою чти́м всепра́зднетвенную ва́шу и честну́ю па́мять.

Богородичен:

Па́че ума́ Рождества́ Твоего́ пресла́вное чу́до удивля́ет вся́к смы́сл, и земны́х, и Ангел: Де́ва бо су́щи родила́ еси́, и Де́ва пребыла́ еси́, я́ко пре́жде рождества́, Де́во. О, стра́шнаго та́инства! О, рождества́ ди́внаго! О, чревоноше́ния пресла́внаго!

Молитва

Святи́и му́ченицы Наза́рие, Прота́сие, Келси́е и Герва́сие! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.