26 октября.

Канон великомученице Злате Мегленской.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

До́блественным твои́м терпе́нием беззако́нныя мучи́тели ужаси́ла еси́, изво́ливши па́че усе́рдно за Христа́ умре́ти, не́жели сту́дно без креста́ жи́ти, великому́ченице Зла́то богоизбра́нная, сме́ртию же твое́ю ве́рныя све́том озари́шася, мучи́тели же студо́м облеко́шася. Мы́ же ве́рно вопие́м ти́: моли́ся Христу́ Бо́гу непреста́нно о все́х на́с.

Велича́ние:

Велича́ем тя́, страстоте́рпице Христо́ва Зла́то, и чте́м честна́я страда́ния твоя́, я́же за Христа́ претерпе́ла еси́.

Кано́н великому́ченицы, гла́с 4.

Пе́снь 1.

Ирмос: Пои́м Го́сподеви, пресла́вно погрузи́вшему фарао́на в мо́ри, пе́снь побе́дную, я́ко просла́вися.

Припев: Святая великомученице Злато, моли́ Бо́га о нас.

Ка́пли му́дрости исто́чник благода́тно точа́щий, низпосли́ ми, Бо́же, да возмогу́ досто́йно воспе́ти страстоно́сицу Твою́ Зла́ту всезлату́ю.

Припев: Святая великомученице Злато, моли́ Бо́га о нас.

Ра́йския пи́щи изгна́на бы́сть прама́ти, хитростьми́ льсти́ваго прельсти́вшися пе́рвее, Зла́та поруга́вшися сему́, в небе́снем черто́зе ны́не водворя́ется.

Сла́ва Отцу́ и Сы́ну и Свято́му Ду́ху:

Окая́нный мучи́тель предае́т на сме́рть Зла́ту достохва́льную, но Человеколю́бец Христо́с дарова́ е́й живо́т ве́чный и вене́ц нетле́нный.

И ны́не и при́сно и во ве́ки веко́в. Ами́нь.

Богородичен: По́мощь Твою́ пода́ждь ми́, недосто́йному рабу́ Твоему́, Де́во Влады́чице, и вразуми́вши боже́ственное сие́ начина́ние, сотвори́ от недосто́йнаго досто́йная.

Пе́снь 3.

Ирмос: Утвержде́ние на Тя́ наде́ющихся, утверди́, Го́споди, в ве́ре Правосла́вней Твое́й, утверди́ на́с, я́ко Человеколю́бец.

Припев: Святая великомученице Злато, моли́ Бо́га о нас.

Тве́рдым умо́м до́блественно ра́ны претерпе́ла еси́, сло́вом же богому́дрым безбо́жных ле́сть изобличи́ла еси́, Зла́то свесла́вная.

Припев: Святая великомученице Злато, моли́ Бо́га о нас.

Кресто́м Христо́вым вооруже́на, укрепи́лася еси́ ду́хом и низложи́ла еси́ свире́пство мучи́тельское, Зла́то всехва́льная.

Сла́ва Отцу́ и Сы́ну и Свято́му Ду́ху:

Украси́лася еси́ порфи́рою, из крове́й твои́х истка́нною, Зла́то многострада́льная, претерпе́вши сече́ние и раздробле́ние всего́ те́ла.

И ны́не и при́сно и во ве́ки веко́в. Ами́нь.

Богородичен: Ро́ждши все́х Созда́теля, Де́во, Ангелов честне́йши яви́лася еси́, те́м молю́ Тя, Чи́стая: освяти́ у́м мо́й и се́рдце просвети́, о́блак страсте́й отгоня́щи.

Седа́лен, гла́с 2:

Облак страсте́й отри́нула еси́, тле́нная же и вре́менная забве́нием премину́ла еси́, страда́льчески льсти́ваго посрами́ла еси́, те́мже и к Зижди́телю возшла́ еси́ испещре́нна све́тло, я́ко Того́ послу́шавши, Зла́то богому́драя, Его́же моли́, согреше́ний оставле́ние дарова́ти чту́щим любо́вию святу́ю па́мять твою́.

Сла́ва, и ны́не, богоро́дичен, гла́с то́йже:

Ты́ две́рь Све́та все́м яви́лася еси́, Всенепоро́чная, су́щим во тме́ све́т неопи́санный, опи́сан пло́тию Христа́, Праведнаго Со́лнца, возблиста́вши, Его́же ны́не луча́ми Зла́та украси́вшися, му́ченик сла́ву притяжа́.

Пе́снь 4.

Ирмос: Услы́шах, Бо́же, слу́х Тво́й и убоя́хся, разуме́х дела́ Твоя́ и ужасо́хся, Го́споди, я́ко Твоего́ хвале́ния испо́лнь земля́.

Припев: Святая великомученице Злато, моли́ Бо́га о нас.

Юностныя сла́дости не услади́ша тя́, Зла́то всечестна́я, ниже́ добро́ты цве́т, Христу́ уневе́стившуюся, до́брая де́во.

Припев: Святая великомученице Злато, моли́ Бо́га о нас.

Агница Христо́ва была́ еси́, Его́ еди́наго возлюби́ла еси́, Ему́же и себе́ саму́ принесла́ еси́, я́ко же́ртву чи́стую.

Сла́ва Отцу́ и Сы́ну и Свято́му Ду́ху:

Гото́ва е́смь вся́ му́ки сла́дце подъя́ти за любо́вь Христа́ моего́, — взыва́ла еси́ к мучи́телем, Зла́то всехва́льная.

И ны́не и при́сно и во ве́ки веко́в. Ами́нь.

Богородичен: Агнца, и Па́стыря и Изба́вителя ро́ждшая, Пречи́стая, Сего́ моли́ при́сно изба́вити от бе́д рабы́ Твоя́, ве́рою и́мя Твое́ призыва́ющия, ра́зве бо Тебе́, Влады́чице, ино́го заступле́ния не и́мамы.

Пе́снь 5

Ирмос: Стяжа́вый ны́, избра́нныя лю́ди, кро́вию Твое́ю, Го́споди, Тво́й ми́р да́ждь на́м, во единомы́слии сохраня́я ста́до Твое́.

Припев: Святая великомученице Злато, моли́ Бо́га о нас.

Наноша́ше ти́ мучи́тель кова́рный свире́пейшая муче́ния, ты́ же, му́ченице, му́жественне вся́ терпе́ла еси́ за любо́вь Христа́ твоего́.

Припев: Святая великомученице Злато, моли́ Бо́га о нас.

Игра́ет дне́сь село́ Сла́тина, торжеству́ет и вся́ страна́ Ме́гленская, тебе́ воспита́вшая, и крася́тся па́мятию твое́ю честно́ю, Зла́то многострада́льная.

Сла́ва Отцу́ и Сы́ну и Свято́му Ду́ху:

Царю́ си́л дне́сь све́тло предстои́ши, оде́яна в багряни́цу, от крове́й твои́х, Зла́то, обагре́нную, и счисля́ешися небе́сным Ангелом; те́м тя́ мо́лим, моли́ Бо́га о на́с.

И ны́не и при́сно и во ве́ки веко́в. Ами́нь.

Богородичен: Мо́лим Тя́ приле́жно, Всеми́лостивая Влады́чице, Ро́ждшагося из Тебе́ моли́, изба́вити ны́ лю́тыя ско́рби и ва́рварскаго преще́ния, и вся́каго наве́та вра́жия.

Пе́снь 6.

Ирмос: Якоже проро́ка Ио́ну от ки́та изба́вил еси́, Христе́ Бо́же, и мене́ из глубины́ прегреше́ний возведи́ и спаси́ мя, еди́не Человеколю́бче.

Припев: Святая великомученице Злато, моли́ Бо́га о нас.

Утвержде́на на ка́мени за́поведей Христо́вых, ополче́ние злочести́вое победи́ла еси́, вся́ хи́трости стропти́ваго попра́ла еси́, сего́ ра́ди ны́не с твои́м Женихо́м Христо́м ца́рствуеши све́тло в черто́зех неизрече́нных.

Припев: Святая великомученице Злато, моли́ Бо́га о нас.

Земны́я пи́щи наслажде́ние презре́вши, небе́сныя трапе́зы сподо́билася еси́, Зла́то всесла́вная, мече́м бо усече́нна бы́вши, возшла́ еси́ с му́дрыми де́вами к Жениху́ Христу́.

Сла́ва Отцу́ и Сы́ну и Свято́му Ду́ху:

Лише́ния удо́в, огне́м опале́ния и вся́ боле́зни муче́ния до́блественно терпе́ла еси́, те́м и мзду́ восприя́ла еси́, Зла́то досточу́дная, му́ченик сла́вою обогати́вшися.

И ны́не и при́сно и во ве́ки веко́в. Ами́нь.

Богородичен: Иже све́тлыми де́вства заря́ми, светови́дно я́ко кри́н сия́я, одушевле́нный Влады́ки черто́г, посреде́ терно́внаго смеше́ния, Пречи́стая и Боголе́пная, Богоро́дица Де́ва сла́вится.

Конда́к, гла́с 1:

Стра́шно и пресла́вно сопротивле́ние твое́, и́мже вся́ удиви́ла еси́, и безчелове́чныя мучи́тели победи́ла еси́, и я́ко боже́ственная Влады́ки голуби́ца, златови́дными кри́лы испове́дания твоего́ Христу́ возлете́ла еси́, Зла́то богому́драя.

Икос:

Блиста́ющи светови́дными мо́лниями, зако́нно Христу́ уневе́стившися, муче́ния тече́ние сконча́ла еси́, скве́рную ве́ру ага́рянскую презре́ла еси́, укрепля́ема Боже́ственными уче́нии упра́вилася еси́ я́ко избра́нна, тща́щися ко Влады́це и Бо́гу, Ему́же и была́ еси́ же́ртва благово́нная, и окрили́вшися златови́дными кри́лы испове́дания твоего́, Христу́ возлете́ла еси́, Зла́то богому́драя.

Пе́снь 7.

Ирмос: В пещи́ о́троки неопа́льны соблю́дшаго и о́гнь угаси́вшаго, воспое́м, глаго́люще: благослове́н еси́, Бо́же оте́ц на́ших.

Припев: Святая великомученице Злато, моли́ Бо́га о нас.

Ада́ма и Евы паде́ние испра́вила еси́, врага́ низложи́вши си́лу, му́жеским ра́зумом Христа́ Бо́га все́х я́сно испове́дала еси́, и сопротивоборца́ тве́рдым сло́вом посрами́ла еси́, ра́достно пою́щи: благослове́н еси́, Бо́же оте́ц на́ших.

Припев: Святая великомученице Злато, моли́ Бо́га о нас.

Терпе́ние боже́ственное показа́вши, му́ченице златоимени́тая, же́нскую же не́мощь превозше́дши усе́рдием кре́пким, мучи́телей де́рзости низложи́ла еси́, воспева́ющи: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Укра́шена добро́тою твоего́ муче́ния, Зла́то всехва́льная, де́вства же заре́ю сия́ющи, твоему́ Жениху́ Христу́ предстои́ши све́тло, ве́село пою́щи: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Ра́дость Тебе́ принося́ от небе́с я́ве Гаврии́л, Чи́стая, благовести́ ре́к: Бо́г из Тебе́ с пло́тию прии́дет, на спасе́ние пою́щим Ти́ с любо́вию: благослове́на Ты́ в жена́х, и благослове́н Пло́д чре́ва Твоего́.

Пе́снь 8.

Ирмос: Вся́ческая нося́й непристу́пною Твое́ю си́лою, Христе́, преподо́бныя Твоя́ о́троки в пла́мени ороси́л еси́, зову́щия: благослови́те, вся́ дела́ Госпо́дня, Го́спода.

Припев: Святая великомученице Злато, моли́ Бо́га о нас.

Ви́дя тя́ Бо́г все́х Христо́с, ве́ры ра́ди и пра́вды я́ве во́инствующу, мужеподо́бным ра́зумом и кре́постию испо́лни тя́, и венце́м побе́дным увязе́ тя, Зла́то, зову́щую: благослови́те, вся́ дела́ Госпо́дня, Го́спода.

Припев: Святая великомученице Злато, моли́ Бо́га о нас.

Ору́жием Креста́ огражда́ема, любо́вию же Христо́вою распаля́ема, принесла́ еси́ кро́вныя пото́ки Влады́це Христу́, и возшла́ еси́ в черто́г небе́сный, вопию́щи: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Соблюла́ еси́ ве́ру непоро́чную да́же до конца́, Зла́то всечестна́я, сего́ ра́ди изплете́ся верху́ твоему́ прекра́сен вене́ц пра́вда; ты́ бо до конца́ взыва́ла еси́: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Кля́тву зако́на и сме́рти осужде́ние разруши́ла еси́, Чи́стая, ро́ждши Христа́, разори́теля сме́рти, и источи́вшаго все́м благослове́ние.

Песнь 9

Ирмос: Тя́, пресла́вную Неве́сту и Всесвяту́ю Богоро́дицу, Зижди́теля ро́ждшую неви́димых же и все́х ви́димых, пе́сньми велича́ем.

Припев: Святая великомученице Злато, моли́ Бо́га о нас.

Посрами́вши мучи́телей безбо́жное шата́ние, крове́й же твои́х тече́нием злонача́льнаго зми́я потопи́ла еси́, и победоно́сно к небеси́ возлете́ла еси́, Зла́то приснопа́мятная.

Припев: Святая великомученице Злато, моли́ Бо́га о нас.

Оде́ждею от крове́й твои́х укра́шена, Влады́чнею багряни́цею оде́яна, возмогла́ еси́ разруши́ти вра́жие свире́пство, Зла́то прехва́льная, укре́пльшися Кресто́м Влады́чним и благода́тию.

Сла́ва Отцу́ и Сы́ну и Свято́му Ду́ху:

Юность твою́ чи́сту и кро́вь твою́ че́стну, рука́ми пребеззако́нных мучи́телей поже́рла еси́, и я́ко пло́д сладча́йший Бо́гу принесла́ еси́.

И ны́не и при́сно и во ве́ки веко́в. Ами́нь.

Богородичен: Облак ле́гкий еси́, Богоро́дице Чи́стая, на не́мже седя́, прии́де во ме́гленскую Сла́тину Госпо́дь Вседержи́тель, и свети́льник терпеливоду́шну Зла́ту соде́ла.

Свети́лен:

Светови́дна яви́лася еси́, великому́ченице, омраче́ние безбо́жных мучи́телей отри́нула еси́, те́мже по сконча́нии вели́каго страда́ния твоего́, вели́кое насле́дие прия́ла еси́ — сла́ву ника́коже мимоходя́щую, Зла́то пресла́вная.

Сла́ва, и ны́не, Богородичен:

Све́тлыми де́вства заря́ми светови́дно сия́еши, я́ко кри́н посреди́ терно́внаго смуще́ния, Де́во Ма́ти Всесвята́я, те́м Тебе́, Благо́й, молю́ся: да́ждь ми́ согреше́ний проще́ние, и душесла́дости испо́лни мя́.

Молитва святой великомученице Злате Мегленской

О, преславное прозябение рода Болгарскаго, солнцезрачная девице, багряницею кровей своих украшенная, предобрая мати наша, великомученице Злато! Услыши чад твоих с любовию к тебе ныне прибегающих и малое сие моление наше приими, и Господу Богу нашему благоприятно сотвори. Согрешихом бо и беззаконновахом, и недостойны есмы зрети высоту небесную от множества неправд наших — связани есмы узами греховными и николиже воли Создателя нашего сотворихом, ниже сохранихом повелений Его; темже преклоняем колена сокрушенна и смиренна сердца нашего ко Творцу и Спасу своему и твоего матерняго заступления к Нему просим. Воздвигни руце твои, красная девомученице, любве Христовы сосуде всезлатый, и вкупе с Пречистою Богородицею и всеми святыми рода нашего Зиждителя всех умоли, да ниспослет милость Свою на многострадальную страну нашу, шатание людей да умирит, горькия соблазны церковныя да утолит, отступившия от Веры Православныя светом Истины Своея да просветит, старыя да умудрит, юныя да наставит, от растления нравов и от сетей еретических добре их сохраняя, младенцы млеком благочестия да воспитает, всех же нас банею покаяния да обновит. Умоли, о, златонравная мати, красный цвете девства и мучеников удобрение, Господа и Спаса нашего, да подаст нам дух смирения и кротости, дух целомудрия и послушания, дух любве нелицемерныя, и да управит ум наш, и сердце наше в правой вере да укрепит, яко да Истиною наставляеми и любовию осияваеми, тихое и мирное зде поживем житие во всяком благочестии и чистоте. Молися, о, великомученице славная, сладчайшая мати наша Злато, Троице Преблагословенней, да избавит ны от всякаго обстояния, и от всякаго навета вражия безбоязненны нас да сохранит, да ни ранами, ниже прещением устрашаеми, до конца верни Христу Жениху нашему пребудем, и тако со благою надеждею и истинным уверением к тамошнему миру пойдем, богоприятное твое заступление призывающе и Пребожественную Троицу: Отца и Сына и Святаго Духа, выну хваляще и благословяще, ныне и присно, и во веки веков, аминь.