26 октября.

Канон святому мученику диакону Вениамину.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Ра́бе благи́й и ве́рный, служи́тель Госпо́день тве́рдый, за благове́стие Ева́нгельское пострада́вый и вся́ до конца́ претерпе́вый, священному́чениче Вениами́не, моли́ Христа́ Бо́га спасти́ ду́ши на́ша.

Велича́ние:

Велича́ем Тя́, Пресвята́я Де́во, Богоизбра́нная Отрокови́це, и чте́м о́браз Тво́й святы́й, и́мже то́чиши исцеле́ния все́м, с ве́рою притека́ющим.

Стихи́ра, гла́с 6:

Егда́ явле́ние чу́днаго Твоего́ о́браза приспе́, тогда́ афо́нстии отцы́, сто́лп о́гненный на мо́ри зря́ще, стра́хом одержи́ми, недоумева́ху; Гаврии́л же, я́ко вторы́й Пе́тр, по мо́рю ходя́, со слеза́ми вопия́ше Тебе́: О, Пресвята́я, прииди́ и сохрани́ достоя́ние Твое́ от вра́г ненаве́тно!

Кано́н му́ченика, гла́с 5.

Пе́снь 1.

Ирмос: Спаси́телю Бо́гу, в мо́ри лю́ди немо́крыми нога́ми наста́вльшему и фарао́на со всево́инством пото́пльшему, Тому́ еди́ному пои́м, я́ко просла́вися.

Припев: Святый мучениче Вениамине, моли́ Бо́га о нас.

Спасти́ся мне́ хотя́щу, во гресе́х же валя́тися не престаю́щу, тя́жко ми́ е́сть отве́рсти уста́ моя́ во хвале́ние, оба́че, Уте́шителю Благи́й, благода́ть сло́ва ми́ да́руй, да воспою́ му́ченика Твоего́.

Припев: Святый мучениче Вениамине, моли́ Бо́га о нас.

Страда́ния твоя́, му́чениче, на хвалу́ подвиза́ют, а́ще и недосто́йная моя́ уста́, сего́ ра́ди воспе́ти тя́ дерза́ю, а́ще же и сла́вное и́мя твое́ нося́й: обои́х ра́ди прими́ да́р сло́в от безслове́снаго умо́м.

Сла́ва Отцу́ и Сы́ну и Свято́му Ду́ху:

За Христа́ пострада́в, мо́ре жите́йское преплы́л еси́, священному́чениче. И мене́ в приста́нище ти́хое доведи́ покая́нием: сея́ бо ми́лости ища́й от тебе́, во смире́нии ко хвале́нию твоему́ приступа́ю.

И ны́не и при́сно и во ве́ки веко́в. Ами́нь.

Богородичен: Ве́рная и благонаде́жная Засту́пнице, немощны́х покро́ве, ма́терски не гнуша́йся усте́н, а́ще и нечи́стых, но благо́дать пода́ти мне́ испроси́ с му́чеником, пе́ти начина́ющу сла́ву [Твою́].

Пе́снь 3.

Ирмос: Си́лою Креста́ Твоего́, Христе́, утверди́ мое́ помышле́ние, во е́же пе́ти и сла́вити спаси́тельное Твое́ Вознесе́ние.

Припев: Святый мучениче Вениамине, моли́ Бо́га о нас.

Стезя́ крове́й твои́х приведя́ тя́ к Распе́ншемуся за ны́: вонзе́ния бо в пе́рсты ру́к и но́г, и лю́тая муче́ния во у́д и на дре́ве сме́рть претерпе́л еси́.

Припев: Святый мучениче Вениамине, моли́ Бо́га о нас.

Ве́ра твоя́ утверди́ тя́, му́чениче Вениами́не: у́м бо челове́ческий недомышля́ется, ка́ко мо́жет естество́ на́ше преесте́ственныя му́ки терпе́ти?

Сла́ва Отцу́ и Сы́ну и Свято́му Ду́ху:

Страда́ниями терза́емый, па́че же огне́м любве́ к Бо́гу пали́мый, вопия́л еси́ мучи́телем: за Христа́ и сме́рть прия́ти гото́в е́смь.

И ны́не и при́сно и во ве́ки веко́в. Ами́нь.

Богородичен: Ученико́в нача́льница была́ еси́, Де́во Непоро́чная, егда́ ору́жие ду́шу Ти́ про́йде, на Кресте́ распина́ема Сы́на и Бо́га Твоего́ зря́ща ужа́сне.

Седа́лен, гла́с 3.

Ве́лия Креста́ Госпо́дня си́ла, то́чит бо чудеса́ и на страда́ния подвиза́ет, и яви́ немощны́х победи́тели и над де́моны власти́тели. Те́м с му́ченики све́тло рце́м: благослове́н еси́ пло́тию Распны́йся и Воскресы́й.

Сла́ва, и ны́не Богородицы:

Све́тлое дне́сь Засту́пницы на́шея наста́ торжество́. Да взыгра́ется тва́рь, да ликовству́ют челове́честии собо́ри, созыва́ет бо на́с Свята́я Богоро́дица ви́дети огнено́сную ико́ну Свою́, луча́ми ми́лости ве́рныя просвеща́ющую. Те́мже, ра́дующеся, вопие́м: спаси́, Госпоже́, от гла́да, огня́, меча́ и бе́д вся́ почита́ющия явле́ние ико́ны Твоея́.

Пе́снь 4.

Ирмос: Услы́шах слу́х си́лы Креста́, я́ко ра́й отве́рзеся и́м, и возопи́х: сла́ва си́ле Твое́й, Го́споди.

Припев: Святый мучениче Вениамине, моли́ Бо́га о нас.

Устраша́ют на́с страда́ния твоя́ за благове́стие Ева́нгельское. Се́ бо вопия́л еси́: до конца́ претерпе́в, спасу́ся!

Припев: Святый мучениче Вениамине, моли́ Бо́га о нас.

Му́ки го́рькия прия́л еси́, егда́ на дре́во о́строе вонзе́н бы́л еси́, и возопи́: помяни́ мя, Го́споди, во Ца́рствии Твое́м!

Сла́ва Отцу́ и Сы́ну и Свято́му Ду́ху:

Нестерпи́мыя стра́сти терпя́, па́че сло́ва свиде́тельствовал еси́, взыва́я: ничто́же разлучи́т мене́ от любве́ Христо́вы.

И ны́не и при́сно и во ве́ки веко́в. Ами́нь.

Богородичен: Любо́вь на́шу прие́млющи, пода́ждь на́м во страда́нии кре́пость, си́ла бо Бо́жия в не́мощех соверша́ется.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси́ Бо́г на́ш, ра́зве бо Тебе́ ино́го не зна́ем.

Припев: Святый мучениче Вениамине, моли́ Бо́га о нас.

Ко Христу́ любо́вию влеко́мь, вся́ Его́ ра́ди претерпе́л еси́, зовы́й: Ты́ еси́ Бо́г мо́й, ра́зве Тебе́ ина́го не зна́ю.

Припев: Святый мучениче Вениамине, моли́ Бо́га о нас.

Ду́хом пламене́я, вопия́л еси́ мучи́телем: никого́же хощу́ ве́дети, то́кмо Иису́са и Сего́ ра́спята по мне́.

Сла́ва Отцу́ и Сы́ну и Свято́му Ду́ху:

Жела́я ду́шу свою́ за Христа́ положи́ти, я́ко еле́нь на сла́дкия во́ды, к му́кам за Него́ устреми́лся еси́, Сладча́йшаго Иису́са иски́й неудержи́мо.

И ны́не и при́сно и во ве́ки веко́в. Ами́нь.

Богородичен: Во все́м ми́ре показу́ются чудеса́ Твоя́, Влады́чице, и мене́ боле́знующаго, не мимои́ди, Блага́я, стра́сти моя́ исцеля́ющи.

Пе́снь 6.

Ирмос: Обы́де мя́ бе́здна, гро́б мне́ ки́т бы́сть, а́з же возопи́х к Тебе́, Человеколю́бцу, и спасе́ мя десни́ца Твоя́, Го́споди.

Припев: Святый мучениче Вениамине, моли́ Бо́га о нас.

Пре́жде Креста́ Твоего́, Го́споди, со у́жасом Отцу́ моли́лся еси́, не́мощь естества́ челове́ческаго показу́я. Му́ченик же Тво́й взыва́ше: вся́ могу́ о укрепля́ющем мя́ Иису́се!

Припев: Святый мучениче Вениамине, моли́ Бо́га о нас.

Пе́рвее очи́стив ду́шу в по́двизех, ко благове́стию поте́кл еси́, и му́ченическим венце́м украси́лся еси́, страда́ти о Христе́ тебе́ дарова́ся.

Сла́ва Отцу́ и Сы́ну и Свято́му Ду́ху:

Ины́х науча́я, себе́ сама́го о́браз показа́л еси́, да вся́к по Христе́ иды́й, отве́ржется себе́ и взе́мь кре́ст сво́й, гряде́т по Не́м неизме́нно.

И ны́не и при́сно и во ве́ки веко́в. Ами́нь.

Богородичен: На Кресте́ ви́сяй, Сы́н Тво́й не забы́ Тебе́, Своея́ Ма́тере, возлю́бленному ученику́ вручи́ Тя. Не забу́ди и на́с, немощны́х ча́д Твои́х.

Конда́к му́ченика, гла́с 3:

От до́браго исто́чника, епи́скопа своего́ Авды, напои́вся оби́льно, того́ стопа́м после́довал еси́, во благове́стии, страда́ниях и сме́рти. И ны́не с ни́м вку́пе лику́я, зове́ши и на́с в селе́ния го́рняя, да пое́м с ва́ми: Аллилу́ия.

Пе́снь 7.

Ирмос: В пещи́ о́гненней песносло́вцы спасы́й о́троки, благослове́н Бо́г, оте́ц на́ших.

Припев: Святый мучениче Вениамине, моли́ Бо́га о нас.

Прехо́дят, я́ко князе́м во́ини, Христу́ Бо́гу — сла́внии му́ченицы, сла́ва Тебе́, глаго́люще, му́чеников весе́лие.

Припев: Святый мучениче Вениамине, моли́ Бо́га о нас.

Беззако́нных мучи́телей победи́вше и диа́вольския де́рзости попра́вше, ны́не в Ца́рствии сла́вы лику́ете, страда́льцы.

Сла́ва Отцу́ и Сы́ну и Свято́му Ду́ху:

Стра́сти на́ша победи́ти и вра́жия искуше́ния одоле́ти, мо́лим ва́с, святи́и му́ченицы, Христо́вы спобо́рницы.

И ны́не и при́сно и во ве́ки веко́в. Ами́нь.

Богородичен: Грехо́в рукописа́ния и неудобосмыва́емая заглажда́ются моли́твами Твои́ми, Пречи́стая. Сла́ва милосе́рдию Твоему́, Многоми́лостиве!

Пе́снь 8.

Ирмос: Из Отца́ пре́жде ве́к рожде́ннаго Сы́на и Бо́га и в после́дняя ле́та воплоще́ннаго от Де́вы Ма́тере, свяще́нницы, по́йте, лю́дие, превозноси́те во вся́ ве́ки.

Припев: Святый мучениче Вениамине, моли́ Бо́га о нас.

Сла́дость Ангелов, апо́столов похвало́, му́чеников весе́лие, преподо́бных умиле́ние, немощны́х укрепле́ние, гре́шников спасе́ние, Спа́се, — си́це взыва́ет Ти́ Це́рковь Твоя́.

Припев: Святый мучениче Вениамине, моли́ Бо́га о нас.

Креста́ ча́шу испи́л еси́, креще́нием му́к крести́лся еси́, диа́коне Вениами́не, сего́ ра́ди одесну́ю Сы́на Челове́ческаго седи́ши, сла́ве Тро́ичестей приобща́яся.

Сла́ва Отцу́ и Сы́ну и Свято́му Ду́ху:

Велича́ет тя́, страстоте́рпче, Це́рковь Христо́ва, тобо́ю бо ве́ра укрепля́ется, бе́си изгоня́ются, кро́вию твое́ю Ева́нгелие утвержда́ется, Христо́с прославля́ется и мы́ тя́ восхваля́ем.

И ны́не и при́сно и во ве́ки веко́в. Ами́нь.

Богородичен: Тобо́ю две́рь в Ца́рствие небе́сное открыва́ется и ра́йская селе́ния святы́ми восполня́ются, и вси́ со Ангелы тя́ велича́ем, Честне́йшую херуви́м, Бо́га Сло́ва ро́ждшую.

Песнь 9

Ирмос: Тя́ па́че ума́ и словесе́ Ма́терь Бо́жию, в ле́то Безле́тнаго неизрече́нно ро́ждшую, ве́рнии, единому́дренно велича́ем.

Припев: Святый мучениче Вениамине, моли́ Бо́га о нас.

Стыжду́ся недосто́йными усты́ восхваля́я тя́, па́че бо ума́ по́двиги твоя́ и страда́ния, оба́че ве́рою вопию́: ра́дуйся священному́чениче, диа́конов высо́кая похвало́.

Припев: Святый мучениче Вениамине, моли́ Бо́га о нас.

Да бу́дет прия́тен ти́ да́р сего́ песнопе́ния, ты́ же благода́ть в де́нь тво́й мне́ испроси́, да велича́ю тя́ ра́достно: ра́дуйся, му́чениче Вениами́не, страстоте́рпче прекре́пкий.

Сла́ва Отцу́ и Сы́ну и Свято́му Ду́ху:

Во́ля Госпо́дня на тебе́ соверши́ся и благода́ть Бо́жия дарова́ся ти́, е́же не то́кмо ве́ровати и благовествова́ти, но и страда́ти по Христе́ сподо́бился еси́. Сего́ ра́ди зову́: ра́дуйся Вениами́не, диа́коне, пропове́дниче и страда́льче.

И ны́не и при́сно и во ве́ки веко́в. Ами́нь.

Богородичен: Купина́ неопали́мая была́ еси́, Богоро́дице Де́во, и Ма́терь Бо́жия яви́лася еси́ неизрече́нно. Оба́че ве́рою и любо́вию с му́ченики хвалу́ Ти́ приношу́: ра́дуйся, Богоро́дице Де́во, му́чеников сла́во!

Свети́лен му́ченику.

Кре́ст муче́ния подъя́л еси́, Ева́нгелие страда́ньми испове́дал еси́, сла́ву Ца́рствия получи́л еси́, иде́же со все́ми святы́ми лику́я, пое́ши Тро́ицу Пресвяту́ю.

Моли́тва свято́му по моле́бне.

О, святы́й страстоте́рпче диа́коне Вениами́не! Ты́ от святи́теля твоего́ Авды послуша́нию навы́кл [еси́] и, пропове́данию от него́ научи́вся, му́ченическим стопа́м того́ после́довал еси́, и за благове́стие Ева́нгельское лю́тыя страда́ния претерпе́л еси́, и на небеса́ со сла́вою возне́слся еси́. Иде́же бо, предстоя́ престо́лу Святы́я Тро́ицы, помяни́ и на́с, недосто́йных, да не отпаде́м и мы́ от Христо́вы ве́ры, но претерпи́м сего́ ра́ди вся́кия ско́рби и боле́зни, и те́м очи́стившеся, благода́ть милосе́рдия получи́м и святы́ми твои́ми моли́твами сподо́бимся дости́гнути блаже́ннаго Ца́рствия со все́ми святы́ми. Зде́сь же, в ми́ре се́м пребыва́юще, ве́сь живо́т на́ш в ру́це Христа́ Бо́га предади́м, да спасе́т, я́коже Са́м ве́сть, ду́ши на́ша, Ему́же сла́ва подоба́ет со Отце́м и Святы́м Ду́хом во ве́ки веко́в. Ами́нь.