26 октября.

Канон святым священномученикам Николаю и Иннокентию, пресвитерам Новосибирским

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь священному́чеником, глас 2:

Ве́лия правосла́вныя ве́ры исправле́ния:/ в лю́тых гоне́ниих на Це́рковь Бо́жию,/ я́ко в черто́зех упокое́ния,/ в ра́нах и у́зах ра́довастеся,/ Крест бо Христо́в на ра́мена взе́мше,/ ве́рою и любо́вию Тому́ после́довали есте́/ в наде́жди живота́ ве́чнаго,/ новому́ченицы Нико́лае и Инноке́нтие,// моли́те Пострада́вшаго нас ра́ди спасти́ ду́ши на́ша.

Ин тропа́рь, глас 4:

Днесь, благове́рнии лю́дие, соше́дшеся восхва́лим/ священному́ченик Новосиби́рских дво́ицу Никола́я и Инноке́нтия:/ ти́и бо в годи́ну лю́тых гоне́ний от безбо́жных пострада́ша/ и венцы́ нетле́нными от Христа́ Бо́га венча́шася,/ и ны́не, предстоя́ще Престо́лу Вседержи́теля,/ Того́ я́ко Бла́га мо́лят/ утверди́ти ве́ру правосла́вную,/ сохрани́ти Оте́чество на́ше в благоде́нствии,// дарова́ти мир и спасти́ ду́ши на́ша.

Велича́ние:

Велича́ем вас,/ святи́и новому́ченицы Нико́лае и Инноке́нтие,/ и чтим честна́я страда́ния ва́ша,/ я́же за Христа́// претерпе́ли есте́.

Стихи́ра, глас 6:

Поми́луй нас, Бо́же,/ по вели́цей ми́лости Твое́й/ и моли́твами Пречи́стыя Твоея́ Ма́тере/ и всех новому́чеников Це́ркве Ру́сския// беззако́ния на́ша очи́сти.

Кано́н священному́чеников Никола́я и Инноке́нтия, глас 8.

Песнь 1

Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

Запев: Святии новому́ченицы Нико́лае и Инноке́нтие, молите Бога о нас.

Мно́гими содержи́ми напа́стьми,/ к вам прибега́ем, спасе́ния взыску́юще, о святи́и новому́ченицы и испове́дницы,/ от тя́жких и лю́тых обстоя́ний моли́те спасти́ся нам.

Припев: Святи́и новому́ченицы Нико́лае и Инноке́нтие, моли́те Бо́га о нас.

Страсте́й и поро́ков безсту́дных смуща́ют наше́ствия,/ я́же мно́гими печа́льми сокруша́ют сердца́ на́ша;/ вы же, ве́рнии во́ини Христо́ви Нико́лае и Инноке́нтие,/ испроси́те нам душе́вную чистоту́ и кре́пость,/ свяще́нную па́мять ва́шу соверша́ющим.

Сла́ва Отцу́ и Сы́ну и Свято́му Ду́ху:

Лю́тая муче́ния за Христа́ претерпе́ли есте́, сла́внии новому́ченицы,/ к вам простира́ем смире́нная моле́ния,/ страда́ньми ва́шими в ве́ре укрепля́еми,/ испроси́те Оте́честву на́шему мир/ и душа́м на́шим ве́лию ми́лость.

И ны́не и при́сно и во ве́ки веко́в. Ами́нь.

Богородичен: Пречи́стая Де́во Богоро́дице,/ с новому́ченики и все́ми святы́ми земли́ Сиби́рския/ умоли́ Всеблага́го Бо́га,/ да промышле́нием Боже́ственным поми́лует и спасе́т всех нас.

Песнь 3

Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// Еди́не Человеколю́бче.

Припев: Святи́и новому́ченицы Нико́лае и Инноке́нтие, моли́те Бо́га о нас.

Ве́рных утвержде́ние су́ще, святи́и новому́ченицы,/ в ве́ре Христо́ве пребы́ли есте́,/ ко приста́нищу церко́вному окормля́юще всех хотя́щих спасти́ся/ и от ересе́й и собла́знов обновле́нческих па́ству свою́ заступа́юще.

Припев: Святи́и новому́ченицы Нико́лае и Инноке́нтие, моли́те Бо́га о нас.

Мо́лим вас, дво́ице свяще́нная,/ разори́ти бу́рю но́вых собла́знов/ и сете́й многови́дных нас изба́вити,/ благоче́стно па́мять ва́шу воспева́ющих.

Сла́ва Отцу́ и Сы́ну и Свято́му Ду́ху:

Сокро́вище доброде́телей духо́вных испроси́те нам, святи́и новому́ченицы,/ земна́я бога́тства и уте́хи привре́менныя/ Ца́рства ра́ди Христо́ва презира́ти науча́юще.

И ны́не и при́сно и во ве́ки веко́в. Ами́нь.

Богородичен: Исцеле́ний неду́гов душе́вных и теле́сных/ про́сим от Тебе́, Пренепоро́чная Де́во,/ исцеле́ний бо неоску́дное сокро́вище Тя ве́мы, неиждива́емое.

Седа́лен, глас 3:

Кто ны разлучи́т от любве́ Бо́жия,/ Па́вел возгласи́ небоше́ственный,/ ни скорбь, ни теснота́, ни гоне́ния, ни смерть./ Та́кожде и вы, святи́и новому́ченицы,/ любо́вию, я́же ко Христу́ Бо́гу, укрепля́еми,/ Небе́снаго Ца́рствия дости́гли есте́,/ иде́же, со апо́столы веселя́щеся,/ ве́ру, любо́вию споспешеству́емую, и спасе́ние ве́чное/ испроси́те всем нам.

Сла́ва, и ны́не, Богоро́дичен, глас то́йже:

Богоро́дице Де́во,/ упова́ние христиа́ном,/ покры́й, соблюди́ и спаси́ на Тя упова́ющих.

Песнь 4

Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.

Припев: Святи́и новому́ченицы Нико́лае и Инноке́нтие, моли́те Бо́га о нас.

Бу́рею прегреше́ний обурева́еми,/ благода́тнаго утеше́ния про́сим от Христа́, тишины́ Пода́теля,/ ва́шими моли́твами, новому́ченицы земли́ Сиби́рския.

Припев: Святи́и новому́ченицы Нико́лае и Инноке́нтие, моли́те Бо́га о нас.

Наслажда́ющеся духо́вною ра́достию в па́мяти ва́шей,/ святи́и Нико́лае и Инноке́нтие,/ сла́ву возсыла́ем Бо́гу, просла́вльшему вас.

Сла́ва Отцу́ и Сы́ну и Свято́му Ду́ху:

Одр боле́зни ко благоче́стию призыва́ет/ и не́мощи теле́сныя проси́ти от Бо́га исцеле́ния науча́ют./ Вы же, святи́и новому́ченицы, боле́зни мно́гия за Христа́ претерпе́вше,/ здра́вие душе́вное и теле́сное испроси́те вас почита́ющим.

И ны́не и при́сно и во ве́ки веко́в. Ами́нь.

Богородичен: Наде́жду на ми́лость Всецари́цы Богоро́дицы иму́ще,/ скорбе́й и боле́зней мно́гих избавля́емся,/ благода́рно за явле́нная и неявле́нная к нам благодея́ния,/ я́ко всемо́щную Цели́тельницу, воспева́юще.

Пе́снь 5

Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,// Человеколю́бче.

Припев: Святи́и новому́ченицы Нико́лае и Инноке́нтие, моли́те Бо́га о нас.

Нетле́нную ра́дость во све́те лица́ Бо́жия улучи́вше, сла́внии новому́ченицы,/ испо́лните сердца́ на́ша неизрече́нною ра́достию/ о Бо́зе, Спаси́теле на́шем.

Припев: Святи́и новому́ченицы Нико́лае и Инноке́нтие, моли́те Бо́га о нас.

Изба́вите нас от бед и поги́бели ве́чныя, страда́льцы Христо́вы,/ и благода́ть, вся́кое земно́е мудрова́ние превосходя́щую,/ испроси́те те́плыми ва́шими к Бо́гу моли́твами.

Сла́ва Отцу́ и Сы́ну и Свято́му Ду́ху:

Просвеще́ния благода́тнаго сподо́би нас, Христе́, Све́те и́стинный,/ просвеща́яй и освяща́яй вся́каго челове́ка, гряду́щаго к Тебе́, Со́лнцу пра́вды,/ моли́твами новому́чеников, Тебе́ ра́ди пострада́вших.

И ны́не и при́сно и во ве́ки веко́в. Ами́нь.

Богородичен: Исцели́ боле́зни многостра́стных душ на́ших, Пренепоро́чная Богороди́тельнице,/ бла́гостию от Тебе́ Ро́ждшагося,/ и просвеще́ние душе́вное ско́ро пода́ждь нам.

Песнь 6

Ирмос: Моли́тву пролию́ ко Го́споду,/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся, я́ко Ио́на:// от тли, Бо́же, возведи́ мя.

Припев: Святи́и новому́ченицы Нико́лае и Инноке́нтие, моли́те Бо́га о нас.

Ны́не смерть вам прибли́жися, вопия́ху гони́тели ва́ши,/ егда́ мно́зи лжесвиде́телие клевету́ на вы воздвиза́ху, святи́и Нико́лае и Инноке́нтие,/ вы же Христа́ не отреко́стеся,/ но враго́в злоде́йства му́жески попра́ли есте́,/ Па́сху хва́ляще ве́чную.

Припев: Святи́и новому́ченицы Нико́лае и Инноке́нтие, моли́те Бо́га о нас.

Ио́на проро́к возопи́ ко Го́споду, во чре́ве ки́тове моля́ся,/ прообразу́я погребе́ние и воста́ние Спа́сово тридне́вное,/ новому́ченицы же Це́ркве Ру́сския посреде́ вели́ких страда́ний моля́хуся,/ Па́сху сла́вяще ве́чную.

Сла́ва Отцу́ и Сы́ну и Свято́му Ду́ху:

Бу́дите нам кре́пкое прибе́жище,/ сла́внии страда́льцы Христо́вы Нико́лае и Инноке́нтие,/ от пото́па страсте́й и бед спаса́юще нас.

И ны́не и при́сно и во ве́ки веко́в. Ами́нь.

Богородичен: Спа́са ми́ру ро́ждшая,/ мо́лимся Тебе́, Скоропослу́шнице на́шей,/ спаси́ от бед рабы́ Твоя́, Богоро́дице,/ многопопече́нием су́етным потопля́емыя.

Конда́к, глас 8:

Ве́ру Христо́ву, я́ко щит,/ в се́рдце прие́мше, святи́и новому́ченицы,/ клеветы́ челове́ческия и лю́тых страда́ний не убоя́стеся,/ но посреде́ муче́ний Бо́га призва́сте,/ и ны́не ускори́те на по́мощь на́шу,// я́ко присносла́внии.

И́кос:

А́нгелов подража́телие, новому́ченицы Нико́лае и Инноке́нтие,/ со А́нгелы ны́не на Небесе́х ра́дующеся,/ пе́ние хвале́бное приими́те от нас, па́мять ва́шу соверша́ющих,/ да ва́шими моли́твами прича́стницы жи́зни ве́чныя бу́дем./ Те́мже, ны́не восхваля́юще вас, глаго́лем вам сицева́я:/ Ра́дуйтеся, я́ко ве́ру Христо́ву во у́зах и страда́ниих соблюдо́сте;/ ра́дуйтеся, я́ко смире́нием свои́м горды́ню гони́телей посрами́сте./ Ра́дуйтеся, любо́вь ко Христу́, за ны пострада́вшему, ми́ру яви́вшии;/ ра́дуйтеся, се́ятели ненави́стныя ро́зни ми́ра сего́ обличи́вшии./ Ра́дуйтеся, я́ко наде́жду на Христа́ непоколеби́му сохрани́ли есте́;/ ра́дуйтеся, я́ко иска́вшия погуби́ти ду́ши ва́ша и наде́ющияся на си́лу свою́ не́мощны яви́ли есте́./ Ра́дуйтеся, я́ко во уничиже́нии ва́шем то́кмо о Кресте́ Христо́вом похвалу́ прия́сте;/ ра́дуйтеся, я́ко сораспе́ншеся Христу́, с Ним спросла́вистеся./ Ра́дуйтеся, я́ко всяк зол глаго́л Христа́ ра́ди претерпе́сте на земли́;/ ра́дуйтеся и весели́теся, я́ко мзда ва́ша мно́га на Небеси́./ Ра́дуйтеся, Нико́лае и Инноке́нтие, сла́внии новому́ченицы.

Песнь 7

Ирмос: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.

Припев: Святи́и новому́ченицы Нико́лае и Инноке́нтие, моли́те Бо́га о нас.

Вавило́н, си́речь грехо́вное смеше́ние,/ спасе́нию ми́ра противобо́рствует,/ вы же, новому́ченицы,/ ве́рою Тро́ическою безбо́жие попра́вше, Бо́га призва́сте:/ потщи́ся на по́мощь на́шу,/ вся бо мо́жеши хотя́й.

Припев: Святи́и новому́ченицы Нико́лае и Инноке́нтие, моли́те Бо́га о нас.

За зако́ны оте́ческия в Вавило́не благочести́вии ю́ноши бе́дствия прия́ша,/ вы же, новому́ченицы земли́ Сиби́рския,/ за ве́ру святу́ю правосла́вную ве́лия страда́ния претерпе́ли есте́;/ ку́пно со все́ми святы́ми моли́те Изба́вителя Бо́га о воспева́ющих вас:/ оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

За сокро́вища мирска́я и жизнь привре́менную/ не премени́ли есте́ сокро́вища духо́вная,/ святи́и новому́ченицы Нико́лае и Инноке́нтие,/ но, враго́в ухищре́ния попра́вше, непреста́нно воспева́ли есте́:/ оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Богоро́дице Всепе́тая,/ теле́сныя не́мощи и душе́вныя неду́ги исцели́,/ Спа́са и Изба́вителя неду́гов ро́ждшая.

Песнь 8

Ирмос: Царя́ Небе́снаго,/ Его́же пою́т во́и а́нгельстии,// хвали́те и превозноси́те во вся ве́ки.

Припев: Святи́и новому́ченицы Нико́лае и Инноке́нтие, моли́те Бо́га о нас.

Егда́ испо́лнися ча́ша страда́ний новому́чеников земли́ на́шея,/ тогда́ призре́ Госпо́дь на Це́рковь Ру́сскую./ И ны́не па́ки зрим земно́е oте́чество на́ше/ хра́мы Бо́жиими и святы́ми оби́тельми украша́емо во спасе́ние нас пою́щих:/ Изба́вителю Бо́же, благослове́н еси́.

Припев: Святи́и новому́ченицы Нико́лае и Инноке́нтие, моли́те Бо́га о нас.

Страда́ния ва́ша честна́я прославля́юще,/ святи́и Нико́лае и Инноке́нтие,/ благода́рственная пе́ния воспева́ем/ ди́вному во святы́х Свои́х Бо́гу на́шему.

Сла́ва Отцу́ и Сы́ну и Свято́му Ду́ху:

Тро́ичен: О Тро́ице Свята́я, Единосу́щная и Неразде́льная,/ спаси́ всех нас,/ па́мять новому́чеников Новосиби́рских све́тло пра́зднующих.

И ны́не и при́сно и во ве́ки веко́в. Ами́нь.

Богородичен: Зря́щи поруга́ние свята́го уде́ла Твоего́, Богоро́дице Де́во,/ умоли́ Сы́на Своего́ суд об Оте́честве на́шем преложи́ти на ми́лость./ Те́мже и ны́не сохрани́ гра́ды на́ша, Засту́пнице усе́рдная,/ Твои́ бо есмы́ раби́,/ да не постыди́мся.

Песнь 9

Ирмос: Вои́стину Богоро́дицу/ Тя испове́дуем,/ спасе́ннии Тобо́ю, Де́во Чи́стая,// с безпло́тными ли́ки Тя велича́юще.

Припев: Святи́и новому́ченицы Нико́лае и Инноке́нтие, моли́те Бо́га о нас.

То́ка моле́ний нас, гре́шных, не отврати́теся,/ новому́ченицы сла́внии Нико́лае и Инноке́нтие,/ ва́ша по́двиги воспева́ющих/ и Бо́га непреста́нно прославля́ющих.

Припев: Святи́и новому́ченицы Нико́лае и Инноке́нтие, моли́те Бо́га о нас.

Ра́дости духо́вныя сердца́ на́ша испо́лните, святи́и новому́ченицы,/ грехо́вныя обы́чаи отгоня́юще/ и во благоче́стии наставля́юще.

Сла́ва Отцу́ и Сы́ну и Свято́му Ду́ху:

Све́та Твоего́ заря́ми пресве́тлыми просвети́ нас, Спа́се,/ ублажа́ющих новому́чеников Твои́х Никола́я и Инноке́нтия,/ со все́ми святы́ми, в земли́ Сиби́рстей просия́вшими,/ в ни́хже препросла́влен еси́.

И ны́не и при́сно и во ве́ки веко́в. Ами́нь.

Богородичен: Ра́дуйся, Богоро́дице Де́во,/ ра́дуйся, земли́ Ру́сския Покро́ве,/ ра́дуйся, Сиби́рския страны́ Засту́пнице,/ ра́дуйся, градо́м и ве́сем на́шим огражде́ние.

Свети́лен:

Свет Христо́в просвети́л есть страну́ Сиби́рскую,/ Христо́вых благове́стников пропове́данием./ По́двигами же новому́чеников свет Христо́в па́ки зе́млю на́шу осиява́ет/ и благода́ть Боже́ственная ве́рным подае́тся.

Сла́ва, и ны́не, Богородичен:

Ма́ти Бо́жия,/ сохрани́ под кро́вом Твои́м град наш/ и вся гра́ды и ве́си Сиби́рския/ и всю зе́млю Ру́сскую,/ благода́рно заступле́ние Твое́ воспева́ющую.

Моли́тва

О святи́и священному́ченицы Нико́лае и Инноке́нтие! Ны́не усе́рдно притека́ем к вам и со умиле́нием мо́лимся: моли́твами ва́шими утверди́те ве́ру правосла́вную, укрепи́те наде́жду на́шу на по́мощь Бо́жию, да любо́вию же́ртвенною соедине́ни бу́дем в служе́нии Бо́гу и бли́жним во спасе́ние душ на́ших. Градо́м и ве́сем на́шим испроси́те от Бо́га благослове́ние, земли́ Сиби́рстей от наше́ствия иноплеме́нных огражде́ние, отпа́дшим от ве́ры правосла́вныя све́том Христо́вым просвеще́ние, служи́телем Це́ркве о спасе́нии пасо́мых ре́вность и попече́ние, ча́дом в за́поведех Бо́жиих науче́ние и всем чту́щим вас в де́лех ве́ры и любве́ благо́е поспеше́ние, да, ва́шими моли́твами укрепля́еми, просла́вим Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.