26 октября.

Канон святым мученикам Карпу, Папиле, Агафодору и святой мученице Агафонике.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́, Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости. Те́х моли́твами спаси́ ду́ши на́ша.

Кано́н. Гла́с 1.

Пе́снь 1.

Ирмос: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая.

Припев: Святии мученицы, моли́те Бо́га о нас.

Ка́рпа и Папи́лы, кре́пких и́стины свиде́телей, похваля́юще па́мять всесвяще́нную, победи́тели ты́я соде́лавшаго Го́спода сла́вы боголе́пно воспои́м.

Припев: Святии мученицы, моли́те Бо́га о нас.

По́стническим пре́жде огне́м искуси́вшеся, страда́нием же второ́е, му́ченицы, яви́сте и́стинно душе́вное искуше́ние и па́че зла́та боже́ственными нра́вы возсия́сте.

Сла́ва Отцу́ и Сы́ну и Свято́му Ду́ху:

Си́лою Боже́ственною к ра́нам, к пове́шению, ко огню́ и к сме́рти, сла́внии, устреми́вшеся, гони́телей кре́пость победи́сте и нетле́нными венцы́ увязо́стеся.

И ны́не и при́сно и во ве́ки веко́в. Ами́нь.

Богородичен: Две́ре Све́та, от Твоея́ нерастле́нныя утро́бы возсия́вшаго, возсия́й ми́ покая́ния просвети́тельныя лучи́ и отжени́ грехо́в мои́х мра́к, Богора́дованная.

Пе́снь 3.

Ирмос: Еди́не, ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче.

Припев: Святии мученицы, моли́те Бо́га о нас.

Пло́д прине́сл еси́ Христу́ прия́тен и свяще́ннейший, свяще́ннаго с тобо́ю Агафодо́ра, ра́ны и я́звы претерпе́вшаго и одоле́вша с пло́тию врагу́ безпло́тному зна́ния кре́постию.

Припев: Святии мученицы, моли́те Бо́га о нас.

Непра́ведно сокруша́емь, му́дре, повеле́нием судя́щаго, и по ре́бром стру́жемь терпе́л еси́. Огне́м же па́ки подпаля́емь, струя́ми кро́вными пре́лести у́гли погаси́л еси́, Ка́рпе многострада́льне.

Сла́ва Отцу́ и Сы́ну и Свято́му Ду́ху:

Ви́дети жела́я Христа́, ви́ся высоко́, и огне́м пе́рси поджига́емь, до́блественно терпи́ши, богому́дре Папи́ле, росо́ю Ду́ха я́ве ороша́емь и Боже́ственными наде́ждами укрепля́емь.

И ны́не и при́сно и во ве́ки веко́в. Ами́нь.

Богородичен: Черто́г нескве́рный Бо́жий, и го́ру несеко́мую, и киво́т святы́й, и трапе́зу ве́рнии Тя́ вси́, Чи́стая, пропове́даем, и кади́льницу невеще́ственнаго Угля, Пресвята́я Де́во Всенепоро́чная.

Седа́лен, гла́с 1.

Плоды́ богозна́ния возде́лав труды́ твои́ми, из ко́рене безбо́жия исто́ргл еси́ остны́; и ма́стию пома́зався богоде́тельною, упа́сл еси́ лю́ди, свяще́нниче; и, зако́нно пострада́в, сугу́бых по́честей, Ка́рпе, сподо́бился еси́. Сла́ва Да́вшему ти́ кре́пость; сла́ва Венча́вшему тя́; сла́ва Де́йствующему тобо́ю все́м исцеле́ния.

Сла́ва, и ны́не, Богородичен:

Ру́це Твои́ боже́ственнии, и́миже Созда́теля понесла́ еси́, Де́во Пресвята́я, вопло́щшагося бла́гостию, просте́рши, умоли́ Его́ изба́вити на́с от искуше́ний, и страсте́й, и бе́д, хва́лящих Тя́ любо́вию и вопию́щих: сла́ва Все́льшемуся в Тя́, сла́ва Проше́дшему из Тебе́, сла́ва Изба́вльшему на́с Рождество́м Твои́м.

КрестоБогородичен:

Агнца на Кресте́ Агница зря́щи, с разбо́йникома распина́ема Тя́, долготерпели́ве Сло́ве, и копие́м в ре́бра пробода́ема, восклица́ше, вопию́щи ма́терски: Что́ стра́нное и ужа́сное, Иису́се Мо́й, та́инство, несказа́нно соверша́емое? Ка́ко покрыва́ешися гро́бом, Неопи́санный Бо́же? Да Мя́, ро́ждшую Тя́, не оста́виши, Сы́не Мо́й Сладча́йший.

Пе́снь 4.

Ирмос: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Припев: Святии мученицы, моли́те Бо́га о нас.

Нереши́мою свя́зан любо́вию Созда́вшаго, каменобие́мь я́ве, Папи́ле, му́чениче Христо́в, победи́л еси́ мета́ющия терпе́нием богодарова́нным ти́, всехва́льне, мужеу́мно с за́вистию боря́ся.

Припев: Святии мученицы, моли́те Бо́га о нас.

Ко вся́кому ви́ду боле́зней, до́блественнейшии, ополчи́стеся, к звере́м вве́ржени бы́вше, ку́пно ты́я победи́сте, я́коже Дании́л, боже́ственными о́бразы ве́ры, Ка́рпе и Папи́ле, му́ченицы сла́внии.

Сла́ва Отцу́ и Сы́ну и Свято́му Ду́ху:

Сы́й зло́бы обрета́тель вселука́вый, Христо́вы уго́дники неми́лостивно пожже́нию негаси́мому предае́т, осла́бити и́х си́лу мне́в, но испепели́шася того́ кова́рствия.

И ны́не и при́сно и во ве́ки веко́в. Ами́нь.

Богородичен: Приста́нище спасе́ния, Де́во, Тя́ и́мамы, и́же в пучи́не лю́тых обурева́емии всегда́: к Тебе́ прибега́ем и на Тя́ упова́ем, да не убои́мся неви́димых враго́в наве́та.

Пе́снь 5

Ирмос: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Припев: Святии мученицы, моли́те Бо́га о нас.

Ни бе́д гоне́ния, ни гла́д, ниже́ сме́рть разлучи́ от любве́ Христо́вы богому́дрых, но усе́рднейше возда́ния предзря́ще, неудо́бных неради́ша.

Припев: Святии мученицы, моли́те Бо́га о нас.

Вжиля́еми Боже́ственною си́лою, претерпе́сте люте́йшая проверте́ния сто́п, всехва́льнии, пу́ть ше́ствующе свиде́тельства и жа́ла безбо́жия сокруша́юще.

Сла́ва Отцу́ и Сы́ну и Свято́му Ду́ху:

Неугаси́мый свети́льник страда́ния нося́ще, претеко́сте неве́жества но́щь, му́ченицы, и Све́ту прибли́жишася невече́рнему, я́ко дне́ и́стинно сы́нове ве́рою.

И ны́не и при́сно и во ве́ки веко́в. Ами́нь.

Богородичен: Зачала́ еси́ неискусому́жно Бо́га Невмести́маго, родила́ еси́ Преесте́ственнаго Созда́теля естества́. Ве́лие та́инство, недомы́сленное чу́до, Де́во еди́на Пренепоро́чная!

Пе́снь 6.

Ирмос: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния, спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние.

Припев: Святии мученицы, моли́те Бо́га о нас.

Благоуха́ют ва́ша доброде́тельства челове́ческим со́нмом, злосмра́дие отгоня́ще я́ве многобо́жия, достосла́внии, и́бо Бо́жие ны́не благово́ние яви́стеся, му́ченицы.

Припев: Святии мученицы, моли́те Бо́га о нас.

Возгара́емый пла́мень росо́ю ве́ры погаси́сте, блаже́ннии, и возжго́сте жела́ние те́пле, Агафони́ке су́щей с ва́ми благосла́вными, с не́юже му́жественне стра́сти соверши́сте.

Сла́ва Отцу́ и Сы́ну и Свято́му Ду́ху:

Обощря́еми боле́зней приложе́ньми, Ка́рпе и Папи́ле, до́блии страда́льцы, мечи́ и́стинно небокова́ннии яви́стеся, вра́жия ополче́ния секу́ще.

И ны́не и при́сно и во ве́ки веко́в. Ами́нь.

Богородичен: От ти́ны страсте́й и от ро́ва паде́ний воздви́гни мя́ и упра́ви раба́ Твоего́, Чи́стая, испове́дающаго Тя́, Богоро́дицу: Ты́ бо еси́ при́сно па́дающих исправле́ние.

Конда́к, гла́с 4.

Яко сокро́вище многоце́нное, Влады́ка, и исто́чник, источа́ющь то́ки исцеле́ний, су́щим на земли́ подаде́ мо́щи ва́ша, неду́ги у́бо отъе́млющия страсте́й разли́чныя, благода́ть же даю́щия душа́м непреста́нно. Те́мже согла́сно любо́вию ва́ше, му́ченицы боже́ственнии, соверша́ем торжество́.

Пе́снь 7.

Ирмос: Тебе́, у́мную, Богоро́дице, пе́щь, разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Припев: Святии мученицы, моли́те Бо́га о нас.

Юношески страсте́й пе́щь воздержа́ния росо́ю погаси́вше, о́гнь же кровьми́ страда́ния, второ́е, му́ченицы, и́дольское огни́ще испепели́сте, хва́льнаго воспева́юще Бо́га и препросла́вленнаго.

Припев: Святии мученицы, моли́те Бо́га о нас.

Ста́нем, се́ отве́рзеся три́знище, не ослабе́ем, свы́ше Христо́с венцы́ терпе́ния муче́ний ра́ди я́ве подае́т живонача́льною руко́ю, — взыва́ху страда́льцы усе́рдною душе́ю, Ка́рп и Папи́ла.

Сла́ва Отцу́ и Сы́ну и Свято́му Ду́ху:

Иже к Бо́гу всеобра́зным, святи́и, манове́нием обожа́еми я́ве, безбо́жных ра́ны удо́бь претерпе́сте, я́коже ино́му стра́ждущу и́стинно са́ми пребыва́юще, хва́льнаго воспева́юще Бо́га и препросла́вленнаго.

И ны́не и при́сно и во ве́ки веко́в. Ами́нь.

Богородичен: Евы, Чи́стая, на́шея прама́тере, прокля́тство разреши́ла еси́ я́ве, благослове́ния Нача́ток ро́ждши, Всенепоро́чная Отрокови́це Браконеиску́сная, Его́же благословя́т чи́ни небе́снии, хва́льнаго отце́в Бо́га и препросла́вленнаго.

Пе́снь 8.

Ирмос: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Припев: Святии мученицы, моли́те Бо́га о нас.

Светоно́сная дне́сь на́м па́мять му́ченик, све́том целе́ний озаря́ющи на́с, вопию́щих, возсия́: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Припев: Святии мученицы, моли́те Бо́га о нас.

Украси́лся еси́, я́ко архиере́й, я́ко Боже́ственный проро́к, я́ко свиде́тель Страсте́й, всеблаже́нне, Христо́вых, я́ко Боже́ственное зна́мение, воспева́я, Ка́рпе всеблаже́нне: Го́спода по́йте, дела́, и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

То́ки твои́х страда́льческих крове́й, пото́ки коне́чно безбо́жия пото́пльше, исто́чник целе́ний яви́шася вопию́щим, Папи́ле му́чениче: Го́спода по́йте, дела́, и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богородичен: Свяще́нный Тя́ Боже́ственных проро́к ли́к пропове́дает Ма́терь бы́вшую, Всенепоро́чная, Бо́жию, Ему́же вси́ зове́м: благослови́те вся́ дела́, Госпо́дня, Го́спода и превозноси́те Его́ во ве́ки.

Песнь 9

Ирмос: Образ чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Припев: Святии мученицы, моли́те Бо́га о нас.

Якоже приноше́ния всеце́лая, я́ко же́ртвы соверше́нныя и непоро́чныя, принесо́стеся Творцу́, всеблаже́ннии, мече́м кончи́ну прие́мше, и ны́не, венцено́сцы, на небесе́х жи́тельствуете.

Припев: Святии мученицы, моли́те Бо́га о нас.

Столпи́ необори́мии яви́стеся Це́ркве, му́ченицы, и забра́ла, исто́чницы, во́ды исцеле́ний пролива́ющии, и свети́ла светоза́рная и всесве́тлая, но́щи из греха́ благочести́выя избавля́ющая.

Сла́ва Отцу́ и Сы́ну и Свято́му Ду́ху:

Уже́ к саме́м всели́вшеся светоза́рным селе́нием и небе́сным, и светлостьми́ Боже́ственными просвеща́еми, и ра́дости присносу́щныя исполня́еми, о Папи́ле и Ка́рпе, за ны́ моли́теся.

И ны́не и при́сно и во ве́ки веко́в. Ами́нь.

Богородичен: Но́сиши на объя́тиих, Пречи́стая, херуви́мски я́ко престо́л вся́ Нося́щаго, пло́тию на́с ра́ди по на́м обложи́вшагося и сугу́ба про́ста ви́димаго, Его́же всегда́ моли́ о на́с, воспева́ющих Тя́.

Молитва

Святи́и му́ченицы! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.