25 октября.

Канон святым мученикам Прову, Тараху и Андронику.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь му́чеников, гла́с 5:

Святы́х му́ченик исправле́нием небе́сныя си́лы преудиви́шася, я́ко в те́ле сме́ртнем, безтеле́снаго врага́ си́лою Креста́, подвиза́вшеся до́бре, победи́ша неви́димо. И мо́лятся Го́споду поми́ловатися душа́м на́шим.

Кано́н му́чеников. Гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Святии мученицы, моли́те Бо́га о нас.

Му́ченическими укра́шени благода́тьми, Венцеда́телю Христу́ на небесе́х любо́вию, му́ченицы, предстоите́, све́том озаря́еми Трисо́лнечнаго сия́ния, и вся́ просвеща́ете ве́рою ва́с блажа́щия.

Припев: Святии мученицы, моли́те Бо́га о нас.

В гоне́нии нече́стия яви́стеся, всю́ прогоня́юще злочести́вую пре́лесть, му́ченицы непобеди́мии, до́блественными по́двиги, я́ко до́брии во́ини, я́ко Це́ркве утвержде́ния и я́ко и́стины держа́ва.

Припев: Святии мученицы, моли́те Бо́га о нас.

Смы́сленным ра́зумом, всему́дрии, отрази́вше зло́бную бу́рю и свире́пеющееся мо́ре злоче́стия, ду́ха ти́хостию к приста́нищем преидо́сте небе́сным, ра́дующеся.

Сла́ва Отцу́ и Сы́ну и Свято́му Ду́ху:

Душа́м му́чеников ва́ши сра́дуются, му́ченицы, ду́си на небесе́х и́стинно, Про́ве, и Андрони́че, и Тара́хе, блаже́ннии: му́жески бо боле́зни муче́ния претерпе́сте, побе́дами Боже́ственными прославля́еми.

И ны́не и при́сно и во ве́ки веко́в. Ами́нь.

Богородичен: Иже Отцу́ и Ду́ху Свято́му Сло́во Собезнача́льное в де́вственную утро́бу, восхоте́в, всели́ся, и пло́ть невра́щно бы́сть, и пострада́в во́лею, му́ченическая боже́ственная во́инства ве́рою страда́ти устро́ил е́сть.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Святии мученицы, моли́те Бо́га о нас.

Кре́пко гони́телю проти́вився, Тара́хе, и сокруше́ние лица́ терпя́ крепча́йше, че́люсти сокруши́л еси́ мы́сленных льво́в, до́блествен бы́в си́лою Ду́ха.

Припев: Святии мученицы, моли́те Бо́га о нас.

Великому́дренным ра́зумом ра́ны претерпе́л еси́, по хребту́ и чре́ву, му́чениче Про́ве, растяза́емь и поджига́емь, и рожны́ пе́рси, и богосла́вная твоя́ уста́ бие́ма.

Припев: Святии мученицы, моли́те Бо́га о нас.

Яко а́гнец, вознесе́н бы́в, терпе́л еси́ боле́зни люте́йших ра́н, му́чениче Андрони́че, огня́ попале́ния и искорене́ние зубо́в, и богосло́внаго твоего́ язы́ка отъя́тие.

Сла́ва Отцу́ и Сы́ну и Свято́му Ду́ху:

Трисве́тлы, я́ко зве́зды, разу́мных сия́ний всю́, сла́внии, тва́рь просвеща́ете, тму́ отгоня́ще многобо́жия ле́сти, страстоте́рпцы, му́ченицы светови́днейшии.

И ны́не и при́сно и во ве́ки веко́в. Ами́нь.

Богородичен: Яко добру́, я́ко красну́ и я́ко избра́нну, Чи́стая, Сло́во, Иже вся́ осуществова́вшее Тя́ избра́в, в Твою́ непоро́чную и богоприя́тную утро́бу, восхоте́в, всели́ся Пресу́щественный.

Седа́лен му́чеником, гла́с 8.

Святы́я Тро́ицы кре́пкою вооружи́вшеся ве́рою ю́ношески, Андрони́к, Про́в же и всему́дрый Тара́х многобо́жия ле́сти держа́ву потреби́ша и лю́ди к Боже́ственней любви́ привяза́ша. Те́м побе́дныя прии́мше по́чести, лико́м свеселя́тся си́л безпло́тных, к ни́мже ве́рою возопии́м: моли́те Христа́ Бо́га грехо́в оставле́ние дарова́ти чту́щим любо́вию святу́ю па́мять ва́шу.

Слава И ны́не, Богородичен:

Прему́дрость и Сло́во в Твое́м чре́ве заче́нши неопа́льно, Ма́ти Бо́жия, ми́рови родила́ еси́ ми́р Содержа́щаго и во объя́тиих понесла́ еси́ вся́ Нося́щаго, Пита́теля все́х и Творца́ тва́ри. Те́мже молю́ Тя, Всесвята́я Деви́це, и ве́рно сла́влю Тя́, изба́витися ми́ от прегреше́ний, и в де́нь Суда́, егда́ предста́ти и́мам пред лице́м Созда́теля моего́, Влады́чице Де́во Чи́стая, Твою́ по́мощь тогда́ пода́ждь ми́: вся́ бо мо́жеши, ели́ка хо́щеши, Всепе́тая.

КрестоБогородичен:

Агнца, и Па́стыря, и Изба́вителя Агница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мляй Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние ве́рою пою́щим боже́ственныя Стра́сти Твоя́.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Святии мученицы, моли́те Бо́га о нас.

Зако́н Тво́й соблюда́юще, Сло́ве, му́ченицы, беззако́нных зако́ны возненави́девше небрещи́ Тебе́ Творца́ повелева́ющия де́монскими ухищре́ньми, и все́ претерпе́вше треволне́ние му́к, небе́сную тишину́ получи́ша.

Припев: Святии мученицы, моли́те Бо́га о нас.

Любя́ Христо́во и́го носи́ти подвы́йное на вы́и твое́й, е́юже ра́дуешися, сокруша́емь, Кре́ст же, же́зл держа́вныя, Тара́хе всеблаже́нне, си́лы имы́й, па́личная умноже́ния терпи́ши, взыва́я: си́ле Твое́й сла́ва, Человеколю́бче.

Припев: Святии мученицы, моли́те Бо́га о нас.

Яко си́лен Боже́ственным бы́в Ду́хом, лы́стов твои́х боле́зненное му́жественно, Про́ве, сокруше́ние и оче́с изъя́тие претерпе́л еси́, просвеща́емь зна́нием Тро́ицы, соверше́ннейше, и с вы́шними ли́ки, му́чениче, сочета́яся.

Сла́ва Отцу́ и Сы́ну и Свято́му Ду́ху:

Юношески, му́чениче, предста́л еси́, Андрони́че, пред суди́щем, противля́яся врагу́ кре́пко. Те́м отре́зая лы́сты твоя́, си́льнейша содева́ше тя́, главу́ его́ попира́юща и го́рнее тебе́ ше́ствие сотворя́юща.

И ны́не и при́сно и во ве́ки веко́в. Ами́нь.

Богородичен: Еди́на Бо́га но́сиши во утро́бе воплоща́ема, е́же бы́ти все́м подаю́щаго. Его́же на три́знищи непрекло́нно испове́дающа, пострада́ша боже́ственнии му́ченицы, Де́во Богоро́дице Препе́тая, Ангелов чу́до и де́монов я́зва.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святии мученицы, моли́те Бо́га о нас.

Неукло́ннии путеше́ственницы стези́ у́зкия и жесто́кия бы́сте, напа́стей мно́жество, я́ко пе́ны морски́я отрева́юще, я́ко неразсе́днии столпи́, сердца́, страстоте́рпцы, я́ко на ка́мени ве́ры утверди́вше.

Припев: Святии мученицы, моли́те Бо́га о нас.

Вити́йствуя боже́ственная и богосло́вя спаси́тельная уче́ния, усте́н терпи́ши растерза́ния, ума́ кре́постию загражда́я уста́, на Бо́га, Тара́хе му́чениче, вредосло́вие глаго́лющая сотво́ршаго.

Сла́ва Отцу́ и Сы́ну и Свято́му Ду́ху:

На че́тверо протяза́емь и ра́н я́звами одержи́мь, душе́вное показу́я до́блественно воста́ние. Те́мже венцено́сец я́влься с тождестрада́льники, Про́ве, Царю́ все́х предстои́ши.

И ны́не и при́сно и во ве́ки веко́в. Ами́нь.

Богородичен: Бо́льши го́рних си́л еси́, Сло́во поро́ждши Отчее, Де́во, Собезнача́льное и Соприсносу́щное, Его́же све́тлостьми страстоте́рпцы озари́вшеся, безбо́жия но́щь преидо́ша.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святии мученицы, моли́те Бо́га о нас.

Ору́жие Си́льнаго бы́вше ве́рою, сердца́ злове́рных му́жески уязви́сте, подви́гшеся на ня́ до́блественно, страстоте́рпцы великоимени́тии.

Припев: Святии мученицы, моли́те Бо́га о нас.

Яко дре́вле Дании́ла в ро́ве зве́рие устыде́шася, та́ко и ны́не кре́пких ору́жников ве́ры на три́знищи устраши́шася, укроти́вшеся честны́ми и́х страда́нии.

Сла́ва Отцу́ и Сы́ну и Свято́му Ду́ху:

Прободе́ным Твои́м ре́бром, Влады́ко, то́жде образу́я, Тара́х прие́млет в ре́бра прободе́ние, и о́цтом напая́ется, и огне́м в главу́ лю́те попаля́ется.

И ны́не и при́сно и во ве́ки веко́в. Ами́нь.

Богородичен: Заче́нши без се́мене во утро́бе Преве́чнаго, Чи́стая, и родила́ еси́ пло́тию естество́м Безпло́тнаго, и млеко́м пои́ла еси́ Пита́ющаго все́х, Богома́ти Неискусобра́чная.

Конда́к му́чеников, гла́с 2.

Тро́ицы на́м сла́ву яви́ша, до́блии Христо́вы ору́жницы и му́ченицы, с Тара́хом Про́в же и Андрони́к: обличи́ша бо все́ мучи́телей безбо́жие, ве́рою до́блественне страда́льчествовавше.

Икос:

Иису́совы стра́сти до́блественно подража́вше, ку́пно с Тара́хом му́дрым Про́в же и Андрони́к, ра́дующеся, пострада́ша на три́знищи, беззако́нных облича́юще безбо́жие. Те́м и мы́, любо́вию чту́ще па́мять и́х, в пе́снех похва́лим и ве́рно по́двиги пропове́даем: я́ко ди́вен бо Госпо́дь, свети́льники в ми́ре просла́вив сия́, ве́рою до́блественно страда́льчествовавшия.

Пе́снь 7.

Ирмос: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Припев: Святии мученицы, моли́те Бо́га о нас.

Уше́с отъя́тие претерпе́л еси́, ра́дуяся, Тара́хе сла́вне, я́ко благопослушли́в ра́б Прикло́ншаго тебе́ у́хо ми́лостивнейшее и моли́твы твоя́ Соверши́вшаго, зову́ща: благослове́н еси́, Бо́же оте́ц на́ших.

Припев: Святии мученицы, моли́те Бо́га о нас.

Протяза́еми му́ченицы и му́ками ра́ними тве́рдым смы́слом пребеззако́ннующим сопроти́вистеся, и, победоно́сцы бы́вше, пое́те: благослове́н еси́, Бо́же оте́ц на́ших.

Припев: Святии мученицы, моли́те Бо́га о нас.

Испо́лнися ду́х тво́й Боже́ственныя росы́ и прохлажде́ния, егда́ ру́це огне́м и главу́ попаля́ху ти́, и, я́коже де́ти, взыва́л еси́, Тара́хе: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Кропле́нием, святи́и, честны́х крове́й ва́ших пре́лести у́глие погаси́сте, ро́су Боже́ственныя на́м источа́юще благода́ти и исцеле́ния пролива́ете во́ды, хва́лящим ва́шу па́мять всегда́.

И ны́не и при́сно и во ве́ки веко́в. Ами́нь.

Богородичен: Истощева́ется во утро́бу Твою́, Оте́ческих не́др не оста́вль, Соверше́ннейшее Сло́во, и пло́ть ви́дится, и Младе́нец ражда́ется, Ему́же пое́м, Де́во, ра́дующеся: благослове́н еси́, Бо́же оте́ц на́ших.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святии мученицы, моли́те Бо́га о нас.

Просвеще́ни я́звами и кра́сными добро́тами добротво́рнаго и чу́днаго страда́ния Го́споду предстоите́, венцено́сцы вси́, све́та та́мо су́щаго, испуща́ема бога́тно, исполня́еми и любо́вию пою́ще непреста́нно: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святии мученицы, моли́те Бо́га о нас.

В себе́ неи́стовяся пребезу́мный мучи́тель, я́ко побежде́н ва́шими противле́нии, вско́ре повелева́ет умори́ти мече́м ва́с, Соде́телю и Изба́вителю пою́щия: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Тро́ицы побо́рницы, добропобе́днии му́ченицы, и́же безбо́жия зи́му разо́рше теплото́ю ве́ры, ве́рных предсто́лпие, цве́ти кра́снии у́мнаго рая́, приста́нища су́щим в бу́ри, непрекло́ннии столпи́, Андрони́к, и Про́в, и Тара́х почита́ются.

И ны́не и при́сно и во ве́ки веко́в. Ами́нь.

Богородичен: Со безпло́тными чи́нми, с му́ченик во́инствы, со апо́столы и проро́ки, вси́ все́ми влады́чествующую тва́рьми Влады́чицу я́ко херуви́м святе́йшу и еди́ну Бо́жию Чи́стую Ма́терь благоче́стно пое́м, Христа́ превознося́ще во вся́ ве́ки.

Песнь 9

Ирмос: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Припев: Святии мученицы, моли́те Бо́га о нас.

Возмого́ша телесы́ тле́нными нетле́нныя по́двиги пристяжа́ти, до́блественнии, и, Ангелом уподо́бишася, Ца́рство Бо́жие прие́мше недви́жимое, Про́в, и Тара́х, и Андрони́к, Христо́вы уго́дницы.

Припев: Святии мученицы, моли́те Бо́га о нас.

Яви́стеся у́глие, Огне́м Невеще́ственным та́инственне вжига́еми, и пожго́сте веще́ственную ле́сть, великому́ченицы, и, возсия́вше, я́ко све́т, тва́рь озаря́ете и спаса́ете от страсте́й и бе́д ду́ши на́ша.

Припев: Святии мученицы, моли́те Бо́га о нас.

Дне́сь прино́сит пра́зднство ле́тнее све́тло и ра́достно Це́рковь Христо́ва, боже́ственное сие́ ва́ше торжество́, и веселя́тся с ва́ми проро́цы, апо́столи и вси́ му́ченицы, страстоно́сцы, победи́тели великоимени́тии.

Сла́ва Отцу́ и Сы́ну и Свято́му Ду́ху:

Взя́стеся в светови́дная ра́йская, страстоно́сцы, селе́ния, оде́явшеся све́тлою ри́зою, ю́же истка́сте многови́дными му́ками, и престо́лу предстоите́ Вседержи́теля, о все́х приле́жно моля́щеся.

И ны́не и при́сно и во ве́ки веко́в. Ами́нь.

Богородичен: Пощади́ мя, Спа́се, рожде́йся и сохрани́вый Ро́ждшую Тя́ нетле́нну по Рождестве́, егда́ ся́деши суди́ти вся́ дела́ моя́, беззако́ния и грехи́ моя́, пре́зри я́ко Безгре́шен, Ми́лостив я́ко Бо́г и Человеколю́бец.

Свети́лен святы́х.

Триплете́нный ли́к страстоте́рпец, Тара́ха и Про́ва вси́ со Андрони́ком, пе́сньми хва́льными увенча́ем: строга́ния бо претерпе́ша, и лю́тыя ра́ны, и боле́зни и со Христо́м ца́рствуют.

Богородичен:

Херуви́м яви́лася еси́ сла́внейши и серафи́м показа́лася еси́ вы́шши, я́ко Бо́га Ро́ждшая воплоще́нна, земны́м же показа́вшаго стези́ пра́выя ше́ствовати, ко спасе́нию водя́щия.

Молитва

Святи́и му́ченицы Христовы! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.