25 октября.

Канон преподобным Дионисию и Амфилохию Глушицким

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь гла́с 8:

Светильницы светлии, явльшеся/ добро́ту земну́ю мудренно оста́вльше/ и идо́ша во внутреннюю пусты́ню, ку́пно с Диони́сием Амфило́хие,/ смирение и всю добродетель извыко́ша и обрето́ша безсмертие,/ постом, и бдением, и прочим воздержанием себе принося́ Христу,/ и ныне на Небесех Престолу Христову предстоя́,/ моли́теся, отцы Богомудрии, Диони́сие и Амфило́хие,/ умири́ти мир и спастися душа́м поющих вас,/ согрешением оставление дарова́ти,/ чтущим всечестну́ю память вашу.

Кано́н гла́с 6.

Пе́снь 1.

Ирмос: Яко по суху пешеше́ствовав Изра́иль,/ по бездне стопами,/ гонителя фараона,/ видя потопляема,/ Богу победную песнь поим, вопияше.

Припев: Преподобнии Дионисие и Амфилохие, моли́те Бо́га о нас.

Сшедшаго с Небес и на Кресте ру́це Простершаго подражатели, блаже́ннии,/ тем распя́сте себе мирови, и мир вами распина́шеся,/ и сего ради всели́стеся во Царствие Небесное,/ чудотворцы яви́стеся воистину преди́внии.

Сла́ва: Творца всех Бога возлюби́сте, преподобнии,/ мирску́ю мудрость всю отве́ргше, о земных неради́вше,/ Небесных благ наслади́вшеся со Ангельскими ли́ки,/ с нимиже молящеся, не забу́дите нас, чад своих.

И ны́не, богоро́дичен: Един от Святыя Троицы во двою естеству́/от чистых крове́й Твоих воплоти́ся, Боголепно про́йде,/ ихже от Ада́ма спасая, Пречистая, благостию Своею.

Пе́снь 3.

Ирмос: Несть свят,/ якоже Ты, Господи Боже мой,/ вознесы́й рог верных Твоих, Блаже,/ и утверди́вый нас на камени/ испове́дания Твоего.

Припев: Преподобнии Дионисие и Амфилохие, моли́те Бо́га о нас.

Бысть в пустынях гнездя́щася Ангели, добродетельным житием своим мир озаряюща,/ Диони́сия блаженнаго обре́те, преподобне Амфило́хие,/ ему же после́дствовав, Спасу всех угодил еси.

Припев: Преподобнии Дионисие и Амфилохие, моли́те Бо́га о нас.

Молением своим непрестанным и всенощны́м предстоянием,/ Пречистую Богородицу Помощницу иму́ще, бесовския полки́ от обители вашея прогони́ли есте́./ Тем и приходящим к вам подаваете скорое исцеление.

Сла́ва: Се, мы оста́вихом вся,/ по Господню словеси́ сотвори́сте и вслед Того изыдо́сте,/ тем мзду сторичную прия́сте и Живот вечный насле́довасте со всеми святыми,/ с ними же молящеся о нас не престайте, отцы блаженнии.

И ны́не, богоро́дичен: Просвещение мне испроси, Пречистая Владычице,/ рождшая Свет всему миру, омраче́нному грехи,/страстную мглу далече отжени, Едина Богоблаженная.

Седален, глас 4:

Удивил еси, Владыко, преподобных отец наших,/ подав им чуде́с благодать и неду́ги различныя от человек отгоня́ти,/ им же молебно возопие́м:/ о, отцы досточу́днии, Диони́сие и Амфило́хие,/ непрестанно моли́те о нас Пречистую Богородицу,/ да, просте́рши длани, умоли́т Сына Своего и Бога,/ сохрани́ти град наш и люди от злых обстояний,/ подаст верным людем победу на враги/ и душам нашим грехов оставление.

Слава, и ныне, Богородичен:

Пречи́стеи руце Твои, Богородице Дево, просте́рши,/ покры́й уповающих на Тя, Сыну Твоему зовущия,/ всем подай, иже милости Твоя.

Пе́снь 4.

Ирмос: Христос моя сила,/ Бог и Господь,/ Честна́я Церковь/ Боголепно поет, взывающи,/ от смысла чиста о Господе празднующи.

Припев: Преподобнии Дионисие и Амфилохие, моли́те Бо́га о нас.

Руце просте́рше, о нас мольбу ко Владыце приношайте,/ стаду вашему от долг разрешение прося́ще, и́мате бо послушающаго Владыку всей твари,/ творит бо волю боящихся Его и молитву их послушает.

Припев: Преподобнии Дионисие и Амфилохие, моли́те Бо́га о нас.

Сконча́сте течение, житие свое добре совершивше, блаженнии,/ приятелище бысте Пресвятыя Троицы,/ тем молитеся в мире сохраненным быти верным людем,/ правоверно вас почитающим.

Сла́ва: Любовию Божиего распаля́стеся, святии,/ мир весь оставльше, пустыню достиго́сте,/ в ней же Ангельски пожили есте́ и ныне, в Чертозех Небесных со всеми святыми веселящеся,/ непрестанно о нас молитеся.

И ны́не, богоро́дичен: К Тебе упование мое возложих, Мати Божия Приснодево, спасения моего/ и Тя Предстательницу животу моему положих, тверду же и непоколебиму.

Пе́снь 5

Ирмос: Божиим светом Твоим, Блаже,/ у́тренюющих ти ду́ши любовию озари́, молюся,/ Тя ведети, Слове Божий,/ Истиннаго Бога,/ от мрака греховнаго взывающа.

Припев: Преподобнии Дионисие и Амфилохие, моли́те Бо́га о нас.

Смире́н помысл и ду́шу свою сокруше́нную иму́ще,/ вы́ну прилепляшеся Бо́гови и на Того упование о души́ своей возло́жше,/ толпы бесо́вския, яко прах, разгнасте,/ исцеляете неду́ги душевныя вку́пе и телесныя.

Припев: Преподобнии Дионисие и Амфилохие, моли́те Бо́га о нас.

Юность телесную отвергше,/ посто́м и бдением удручи́ли есте́ плоти своя́,/ тем и святым житием своим весь мир просветили есте, Богоблаженнии.

Сла́ва: Егоже ищущи, присно желаемаго вами блаженства Небеснаго Царствия,/ о нем бо подвизастеся в поще́ниих и бде́ниих,/ души свои изда́сте в руце Божии;/ сему и нам получи́ти молитеся присно, блаженнии.

И ны́не, богоро́дичен: Тебе, рождши Христа, всему Содетеля, взываем:/ радуйся, Иже Свет возсия́вше нам,/ радуйся, вместившая Бога невместимаго.

Пе́снь 6.

Ирмос: Житейское море,/ воздвиза́емое зря напастей бурею,/ к тихому пристанищу Твоему притек, вопию Ти:/ возведи от тли живот мой,/ Многомилостиве.

Припев: Преподобнии Дионисие и Амфилохие, моли́те Бо́га о нас.

Возгремели быша до Небес молитвы ваша, святии,/ яко гром, Святым Духом гремя́ше,/ возду́шный же дух, яко дым, разгоняше,/ от недуг разрешение верным подавающи./ Тем яко заступники наша и к Богу хода́таи,/ непрестанно вас почитаем.

Припев: Преподобнии Дионисие и Амфилохие, моли́те Бо́га о нас.

Вышняго прибежище положи́сте себе и упова́ние, в пустынях, да яко в черто́зех светлых, пребывающе,/ во а́лчбе и жа́жде жизнь свою провожда́юще,/ тем и обители себе во имя Пресвятыя Богородицы сотвори́сте, Еяже молитвами от зол нас изба́вите.

Сла́ва: И́гу Господню вы́я прекло́нше, житейских молв избего́сте,/ тесным и прискорбным путем ше́ствовавше,/ пространства онаго Небеснаго достигли есте́,/ егоже и нам сподобленным бы́ти, святии, молитеся.

И ны́не, богоро́дичен: Пречистая Богородице Владычице, рождшая человеком Христа Спаса нашего,/ подаждь ми грехов оставление, да сподоблен буду избыти вечных мук нескончаемых,/ заступление Твое стяжавше, Богоневестная.

Конда́к, гла́с 8:

Яко светила незаходи́мая мысленнаго Солнца, просвети́сте вселенную,/ верным ду́ши и телеса́ лучами чудес ваших озаря́юще,/ незави́стно подава́ете от неду́г исцеление,/ темже, сошедшеся верою, вас в песнех восхва́лим,/ яко наши премудрыя наставники и к Богу хода́таи,/ и непрестанно вопием:/ радуйтеся, отцы Богомудрии Диони́сие и Амфило́хие.

Икос:

Кто изрещи́ может ваша на ме́стех сих труды́ и страдания, отцы Богоноснии,/ или кто испове́сть прежде смерти и по смерти, яже ваше к Богу дерзновение,/ ибо во плоти Безплотный подо́бящеся, Ангельски пожи́сте,/ добродетельми своими весь мир просвети́ли есте́./ Но, а́ще и худосло́вен есмь,/ но убо воспою́ и, поя, не престаю Божию силу и премудрость/ и преподобных терпение и по́двизи, си́це реку́ще:/ радуйся, Диони́сие, великий отче наш,/ яко измла́да Богу послужил еси и к Нему достигл еси в Небесное Царствие;/ радуйся, целомудренный сто́лпе, Амфило́хие преподобне,/ имже попрася всякая кознь сопроти́вная;/ радуйся, чу́дный Диони́сие,/ ибо терпением своим, яко безплотен, Ангелы удиви́л еси, лукавых бесо́в победи́вый;/ радуйся, Амфило́хие блаженне,/ мысленнаго рая́ грозд пресладкий, услади́вший весь мир пресладким житием своим;/ радуйся, Диони́сие Богомудре,/ прекрасное жилище Пресвятаго Духа;/ радуйся, Амфило́хие всече́стне,/ яко на Небесе́х предстои́ши Пресвятей Троице с преподобным Диони́сием, о нас мо́лишися непрестанно;/ радуйтеся, отцы наши вселюбе́знии,/ наставницы иноком премудрии, и ко Христу сих приведосте преподобно и праведно;/ радуйтеся, отцы досточу́днии,/ свети́льницы пресве́тлии, весь мир в чудесех просветили есте́ и, просвещая, не престае́те./ Темже, вопиюще, вси рцем непрестанно:/ радуйтеся, отцы Богомудрии, Диони́сие и Амфило́хие.

Пе́снь 7.

Ирмос: Росодательну убо пещь/ соде́ла Ангел/преподобным отроко́м,/ халдеи же опаля́ющее/веление Божие мучителя увеща́ вопи́ти:/ благословен еси Боже отец наших.

Припев: Преподобнии Дионисие и Амфилохие, моли́те Бо́га о нас.

Вмени́вше уме́ты вся, яже на земли́ сущая,/ всяко желание и тщание показа́сте, взыска́юще,/ да Христа приобря́щете,/ егоже обре́тше, посещайте шествующих путем вашим,/ ихже сниска́сте трудами своими, отцы блаженнии.

Припев: Преподобнии Дионисие и Амфилохие, моли́те Бо́га о нас.

На Небеси́ пребывающе,/ неотступно с нами пребу́дите, назира́юще нас, чад своих,/ непрестанно молитву к Богу, отцы, о нас сотвори́те,/ яко да молением вашим от всех зол нас избавите.

Сла́ва: Ни о́ны пустынная страши́лища устраши́ша вас,/ ни человек злых нахождения, ни лукавых бесо́в преще́ния,/ ни лет долгота́, ни скудость ме́стная,/ но вся преодоле́вше терпением,/ и сего ради со Христом царствуете в нескончаемыя веки.

И ны́не, богоро́дичен: Тя, Богомати, спасение позна́хом, земни́и,/ яко Творца плотию рождшая,/ темже спаси мене заблу́ждшаго,/ в пути правыя наста́ви мя,/ повелением Божественным грехов прощение подавая ми,/ яко Человеколюбива, Преблагая Помощнице.

Пе́снь 8.

Ирмос: Из пламене преподобным ро́су источи́л еси/ и праведнаго жертву водою попали́л еси:/ вся бо твори́ши, Христе, то́кмо еже хоте́ти,/ Тя превозно́сим во вся веки.

Припев: Преподобнии Дионисие и Амфилохие, моли́те Бо́га о нас.

Светила великая, чудотворцы предивнии, Диони́сие со Амфило́хием,/ посетите нас в боле́знех наших,/ здравие всем притекающим к вам вскоре подавающе,/ разреши́те нас от греховных уз,/ ту́не прия́сте, ту́не и дади́те нам.

Припев: Преподобнии Дионисие и Амфилохие, моли́те Бо́га о нас.

Якоже обеща́стеся спожи́ти неразлучно в жизни сей,/ сице и по смерти вашей изво́листе погребе́нным быти единым телесем вашим,/ от них же чудес изливаете требующим исцеление, и Христа непрестанно сла́вящим.

Сла́ва: Нощь, яко день, вменя́шеся вами, преподобнии,/ не давше покоя телесе́м вашим, ни ве́ждома дрема́ния,/ но безпреста́ни течение творя́ще к Богу посто́м и молитвами,/ до́ндеже сподо́бистеся прияти праведных селение.

И ны́не, богоро́дичен: В рождестве болезни избежала еси, Чистая,/ и, рождши, паки Девою пребыла еси,/ вся бо творит Иисус Бог и Человек,/ егоже превозносим во веки.

Песнь 9

Ирмос: Бога/ челове́ком невозможно видети,/ на Негоже не смеют чини Ангельстии взирати:/ Тобою бо, Всечи́стая, явися человеком/ Слово Воплоще́нно,/ егоже величающе,/ с Небесными вои Тя ублажаем.

Припев: Преподобнии Дионисие и Амфилохие, моли́те Бо́га о нас.

Равно́ Ангелом житие стяжал еси, Диони́сие,/ тем равноа́нгельна в пусты́нях кры́ющася, обре́т тя блаженный Амфило́хий,/ и сего ради соревнова́ше ти в житии́ твоем,/ твоему внимающе нраву Боголюбезному.

Припев: Преподобнии Дионисие и Амфилохие, моли́те Бо́га о нас.

Подобящеся Христу своему,/ кротко житие и смиренно в жизни сей стяжа́ли есте́./ Тем и покой обрето́сте душа́м вашим,/ егоже ради жизнь сию во слеза́х и в воздыха́ниих изнури́ли есте́.

Сла́ва: Моление сие́ не пре́зрите, отцы досточу́днии,/ иже от недостойных уст моих вам приноси́мое,/ и, прия́в, сего донесите Творцу и Богу,/ прося́ще у Него обрести́ милость во вся веки.

И ны́не, богоро́дичен: Сына Безлетна от Отца Ты, во утробе несказа́нно заче́нши, родила́ еси, Богомати Пречистая Дево,/ моли непрестанно о рабе́х Твоих Того яко Человеколюбца Бога спасти род наш.

Молитва

К вам, о святи́и преподобнии Дионисие и Амфилохие, я́ко путево́дным свети́льникам, дея́ньми свои́ми освети́вшим путь Небе́снаго восхо́да, аз многогре́шный смире́нно коле́на се́рдца моего́ преклоня́ю и из глубины́ души́ взыва́ю: умоли́те о мне Человеколю́бца Бо́га, да не попу́стит ми еще́ блужда́ти по распу́тиям греха́, но да просвети́т мои́ ум и се́рдце све́том благода́ти Своея́, я́ко да то́ю озаря́ем и подкрепля́ем, возмогу́ про́чее вре́мя земна́го жития́ пра́вою стезе́ю непреткнове́нно преити́ и хода́тайством ва́шим к Преблаго́му Го́споду сподо́блюся, поне́ вма́ле прича́стник бы́ти духо́вныя ва́шея трапе́зы в Небе́сном черто́зе Царя́ сла́вы. Ему́же со Безнача́льным Его́ Отце́м и Пресвяты́м, Благи́м и Животворя́щим Ду́хом бу́ди сла́ва, честь и поклоне́ние во ве́ки веко́в. Ами́нь.