23 октября.

Канон преподобным отцам старцам, иже в Оптине пустыни подвизавшимся. (Собору Оптинских старцев)

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

В моли́твах непреста́нных пребыва́юще, / благи́я же и злы́я любо́вию объе́млюще, преподо́бнии ста́рцы Оптинстии, / Бо́гу и бли́жним послужи́сте, / бде́нием, слеза́ми и поще́нием дарова́ние многоразли́чных чуде́с прия́сте. / Сла́ва Да́вшему на́м таковы́я хода́таи, / сла́ва Просла́вльшему ва́с, / сла́ва Бо́гу ди́вному во святы́х Свои́х.

Велича́ние:

Ублажа́ем ва́с, преподо́бнии отцы́ Оптинстии, и чте́м святу́ю па́мять ва́шу, наста́вницы мона́хов и собесе́дницы Ангелов.

Стихи́ра, гла́с 6-й:

Все́ отри́нувше стра́стное мучи́тельство, и вся́ко умышле́ние лука́ваго зми́я попра́вше о Христе́, преподо́бнии отцы́ Оптинстии, светообра́зни яви́стеся, я́ко свети́ла озаря́юще всю́ подсо́лнечную, тьму́ отгоня́юще, и неду́ги благода́тию врачу́юще, и все́м помо́щницы явля́ющеся, ве́рою творя́щим святу́ю па́мять ва́шу.

Кано́н преподо́бным, гла́с 8.

Пе́снь 1.

Ирмос: Во́ду проше́д я́ко су́шу, и Еги́петскаго зла избежа́в, Израильтянин вопия́ше: Изба́вителю и Бо́гу на́шему пои́м.

Припев: Преподобнии старцы Оптинские, моли́те Бо́га о нас.

Мона́шествующим вы́ пра́вило есте́, в неду́зех су́щим и скорбя́щим исцели́тели, и па́стырие заблужда́ющих ове́ц, ва́м научи́те пе́снь досто́йно принести́.

Припев: Преподобнии старцы Оптинские, моли́те Бо́га о нас.

Наста́вники на́ша восхваля́юще зове́м: вы́ есте́ се́мя свя́то, преподо́бнии отцы́, земли́ Росси́йския хвале́ние, и ча́дом ва́шим утвержде́ние.

Припев: Преподобнии старцы Оптинские, моли́те Бо́га о нас.

Стадонача́льниче мона́шеских дворо́в, чреды́ наста́вив и́ноков к небе́сней па́жити, ра́дуйся о́тче на́ш, Паи́сие честны́й, наста́вивый земли́ Росси́йския концы́.

Сла́ва Отцу́ и Сы́ну и Свято́му Ду́ху:

Слеза́ми мно́гими и ско́рбным житие́м Фео́дор, и́нок сви́рский, зла́я претерпе́, оба́че тве́рд и кре́пок сы́й умо́м, в боле́знех сы́на Льва́ духо́вно породи́.

И ны́не и при́сно и во ве́ки веко́в. Ами́нь.

Богородичен: О, Ма́ти Де́во Богоро́дице, Христа́ моли́, вопло́щшагося из Тебе́, да сохрани́т Росси́йскую страну́, и ду́ши на́ша, я́ко ми́лостив, спасе́т.

Пе́снь 3.

Ирмос: Небе́снаго кру́га верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Преподобнии старцы Оптинские, моли́те Бо́га о нас.

Основа́ние тве́рдо по́двигом положи́л еси́, ка́мень краеуго́льный, Христа́, и бы́сть первонача́льник со́нму ста́рцев, о Льве́, и прия́т благода́ть отгоня́ти неду́ги от лю́те стра́ждущих.

Припев: Преподобнии старцы Оптинские, моли́те Бо́га о нас.

Вопия́л еси́ си́це, о Льве́, ко оби́дящим: пою́ Бо́гу моему́ до́ндеже е́смь, кто́ мене́ разлучи́т от любве́ Его́? в не́йже пребы́сть до кончи́ны, соверша́я во́лю Его́ со дерзнове́нием.

Сла́ва Отцу́ и Сы́ну и Свято́му Ду́ху:

Преподо́бный Мака́рий блаже́н бы́сть вои́стину, насы́ти бо а́лчущих ду́ши, ту́не пита́я все́х сло́вом испо́лненным благода́ти, потребля́я душе́вный гла́д, умиря́я ду́ши страстьми́ обурева́емыя.

И ны́не и при́сно и во ве́ки веко́в. Ами́нь.

Богородичен: От Тебе́, Богома́ти, истече́ Пото́к сла́дкий, вся́ напая́я лю́ди, скве́рны ду́ш измыва́я, о Богоро́дице Де́во, те́м же спаса́й от бе́д все́х и́же о́браз Тво́й честны́й почита́ющих.

Седа́лен, гла́с 4:

Яви́стеся Ду́ха Свята́го орга́ни, отцы́ преподо́бнии, и проро́чества да́ра сподо́бистеся, и́бо в ва́ших душа́х возсия́ Све́т непристу́пный.

Сла́ва, и ны́не, Богородичен:

Яко все́х еси́ творе́ний вы́шшая, воспева́ти Тя́ досто́йно недоуме́юще, Богоро́дице, мо́лим Тя́: ту́не поми́луй на́с.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.

Припев: Преподобнии старцы Оптинские, моли́те Бо́га о нас.

О, мудре́йший Мака́рие, ты́ восторга́л еси́ кла́сы духо́вныя от писа́ний святы́х оте́ц, и насы́тил еси́ ду́ши а́лчущих.

Припев: Преподобнии старцы Оптинские, моли́те Бо́га о нас.

Ты́ наста́вник бы́в и́ноком во Предте́чи оби́тели, о Анто́ние, воздержа́тельным житие́м, помоли́ся о тя́ восхваля́ющих.

Сла́ва Отцу́ и Сы́ну и Свято́му Ду́ху:

Моисе́е, Анто́ние, и по пло́ти и по ду́ху су́ще бра́тие, богому́дрии па́стыри, вы́ наста́висте о́вцы на па́жити.

И ны́не и при́сно и во ве́ки веко́в. Ами́нь.

Богородичен: Богоро́дице Чи́стая, цве́те боже́ственный и прозя́бший ко́реню, Ты́ о на́с непреста́нно моли́, Богоро́дицу Тя́ воспева́ющих.

Пе́снь 5

Ирмос: Просвети́ нас повеле́нии Твои́ми, Го́споди, и мыш́цею Твое́ю высо́кою, Твой мир пода́ждь нам, Человеколю́бче.

Припев: Преподобнии старцы Оптинские, моли́те Бо́га о нас.

Прия́т Елисе́й от Илии́ благода́ть сугу́бую, на тебе́ же, о́тче Амвро́сие, благода́ть почи́ оте́ц Льва́ и Мака́рия.

Припев: Преподобнии старцы Оптинские, моли́те Бо́га о нас.

О, Амвро́сие, ты́ любо́вь в себе́ стяжа́л еси́, соверше́ние доброде́телей, все́м бо вся́ бы́л еси́, и убо́гим прибе́жище.

Сла́ва Отцу́ и Сы́ну и Свято́му Ду́ху:

О, Амвро́сие, ты́ боже́ственною пи́щею напита́л еси́ а́лчущия сердца́, о́вцы своя́ упа́с на слове́сней па́жити.

И ны́не и при́сно и во ве́ки веко́в. Ами́нь.

Богородичен: Ма́ти Бо́жия, и засту́пнице усе́рдная, просвети́ на́с моля́щихся Тебе́, при́сно моля́щи о на́с, недосто́йных рабе́х Твои́х.

Пе́снь 6.

Ирмос: Моли́тву пролию́ ко Го́споду, и Тому́ возвещу́ печа́ли моя́, я́ко зол душа́ моя испо́лнися, и живо́т мой а́ду прибли́жися, и молю́ся, я́ко Ио́на: от тли, Бо́же, возведи́ мя.

Припев: Преподобнии старцы Оптинские, моли́те Бо́га о нас.

Сы́н и́стинный яви́лся еси́ Ио́сифе, стяжа́в роди́тельницу безстра́стия, нелицеме́рное послуша́ние, и я́ко кро́ток, чи́ст же и ми́лостив, смире́нно глаго́лал еси́: непотре́бен е́смь без отца́ моего́.

Припев: Преподобнии старцы Оптинские, моли́те Бо́га о нас.

Ио́сиф целому́дренный ве́рно по стопа́м отца́ своего́ хожда́ше: да́же до сме́рти са́м себе́ смиря́ше, си́це Влады́це Христу́ подража́я, сего́ ра́ди мо́лим его́: научи́ и на́с гре́шных смире́нию.

Сла́ва Отцу́ и Сы́ну и Свято́му Ду́ху:

Отца́ своего́ любо́вь стяжа́в, Анато́лие, с ни́м упа́сл еси́ слове́сное ста́до, и ны́не, о́тче, на́с не забу́ди, о́вцы своя́ помяни́ и наста́ви и́х, взыщи́ заблужда́ющих ча́д, наставля́я все́х на́с ко спасе́нию.

И ны́не и при́сно и во ве́ки веко́в. Ами́нь.

Богородичен: Засту́пницу Тя́ ве́м в животе́ мое́м, и храни́тельницу тве́рду Деви́це, и напа́стей реша́щу молвы́, и прило́ги бесо́в отгоня́ющу, и си́це молю́ся всегда́: от страсте́й мои́х мя́ да изба́виши.

Конда́к, гла́с 8.

Иже от ми́ра су́етнаго уклони́вшеся, / и честны́м житие́м сокро́вище обре́тше, / попече́ния о гре́шных, су́щих в ми́ре, не оста́висте, / но я́ко су́ще заблужда́ющим наста́вницы, / и на́с от суеты́ мирски́я изба́вите, я́ко да зове́м: / ра́дуйтеся, ста́рцы богому́дрии.

Икос:

Ангелом поревнова́вше, устрани́стеся ми́ра, вожделе́вше в пусты́ню всели́тися, но и на́с, су́щих в ми́ре еще́, не забу́дите, мо́лимся мы́, гре́шнии, да пре́лести изба́вльшеся, к ва́м возглаго́лем си́це: ра́дуйтеся, вра́чеве душе́вных боле́зней; ра́дуйтеся, цели́тели неду́гов теле́сных; ра́дуйтеся, прему́дрых ра́зумом превосходя́щии; ра́дуйтеся, нему́дрых к ра́зуму наставля́ющии; ра́дуйтеся, непреста́нныя моли́твы де́лателие; ра́дуйтеся, о гре́шницех к Бо́гу хода́таи; ра́дуйтеся, ста́рцы богому́дрии.

Пе́снь 7.

Ирмос: От Иуде́и доше́дше, о́троцы в Вавило́не иногда́ ве́рою Тро́ическою пла́мень пе́щный попра́ша пою́ще: отцев Бо́же, благослове́н еси́.

Припев: Преподобнии старцы Оптинские, моли́те Бо́га о нас.

Отче Иларио́не, уклони́вся от ми́ра, и вся́ я́же в не́м оста́вль и уме́ты вмени́в, ста́рцем прилепи́ся, Леони́ду с Мака́рием, вла́сть от Христа́ прия́т бе́сы прогоня́ти.

Припев: Преподобнии старцы Оптинские, моли́те Бо́га о нас.

Утеша́ше Исаа́кий сострада́тельный и́нок, и́же к нему́ приходя́щих, и си́лою моли́твы от злы́х и́х огражда́ше, заступа́я и́х вся́чески, я́ко оте́ц или́ ма́ти сы́й ча́дом свои́м.

Сла́ва Отцу́ и Сы́ну и Свято́му Ду́ху:

Не́сть проро́ка без че́сти, но в дому́ свое́м то́кмо, все́х бо изгна́ша проро́к, и ты́ изгна́н бы́в, о́тче, сподо́бися блаже́нства, Варсоно́фие пра́ведне, изгна́ние претерпе́вый пра́вды ра́ди.

И ны́не и при́сно и во ве́ки веко́в. Ами́нь.

Богородичен: Под Твою́ ми́лость прибега́ющих ве́рно и покланя́ющихся Твоему́ Сы́ну Богороди́тельнице, помоли́ся Ему́ о на́с, я́ко да изба́вимся от бе́д и искуше́ний.

Пе́снь 8.

Ирмос: Царя́ Небе́снаго, Его́же пою́т во́и Ангельстии, хвали́те и превозноси́те во вся ве́ки.

Припев: Преподобнии старцы Оптинские, моли́те Бо́га о нас.

Сла́ве ве́чней прича́стник бы́сть Некта́рий, уклони́вся жите́йския сла́вы, вся́к бо смиря́яй себе́ вознесе́тся.

Припев: Преподобнии старцы Оптинские, моли́те Бо́га о нас.

Да ублажа́тся отцы́ Анато́лий, Некта́рий, с ни́ми же Исаа́кий и Ни́кон, — зако́нно пострада́вше, лику́ют во вся́ ве́ки.

Сла́ва Отцу́ и Сы́ну и Свято́му Ду́ху:

Бы́вше изгна́ни отцы́ от отсту́пник, не смути́шася, но возопи́ша: на́ше житие́ на Небесе́х е́сть.

И ны́не и при́сно и во ве́ки веко́в. Ами́нь.

Богородичен: По́мощи, я́же от Тебе́ тре́бующия, не пре́зри Де́во, пою́щия и превознося́щия Тя́ во ве́ки.

Песнь 9

Ирмос: Вои́стинну Богоро́дицу Тя испове́дуем, спасе́ннии Тобо́ю, Де́во Чи́стая, с безпло́тными ли́ки Тя велича́юще.

Припев: Преподобнии старцы Оптинские, моли́те Бо́га о нас.

Вои́стину стяжа́сте вся́ку доброде́тель, дарова́ние же вся́ко дарова́ся ва́м, но спаси́те ста́до ва́ше, моля́щеся за ны́.

Припев: Преподобнии старцы Оптинские, моли́те Бо́га о нас.

О все́м благодари́те, за́поведь прия́хом, да похва́лим Бо́га, я́ко дарова́л е́сть на́м ва́с, наста́вники святы́я во Ца́рствие Его́.

Сла́ва Отцу́ и Сы́ну и Свято́му Ду́ху:

Предста́телие на́ши, о стране́ Росси́йстей помоли́теся приле́жно, и спаси́те все́х, и́же па́мять ва́шу ве́рно соверша́ющих.

И ны́не и при́сно и во ве́ки веко́в. Ами́нь.

Богородичен: Влады́чице Свята́я, помога́й на́м гре́шным, и злы́х враго́в изба́ви Оте́чество на́ше, Тебе́ мо́лим, сохрани́ на́с под кро́вом Твои́м.

Свети́лен.

Ста́рцы почти́м богому́дрыя, свети́льники све́тлыя, подви́жники благоче́стия, доброде́телей учи́тели, о на́с моли́твенники ве́ры.

Сла́ва, и ны́не, Богородичен:

Сла́дость Ангелов, скорбя́щих Ра́дость, христиа́н Предста́тельнице, Де́во Ма́ти Госпо́дня, заступи́ на́с, и изба́ви ве́чных му́к.

Стихи́ры, гла́с 6:

Все́ отло́жше / о земны́х попече́ние, / и страсте́й мучи́тельство / дале́че от себе́ отри́нувше, / преподо́бнии отцы́ богому́дрии, / в пусты́ню всели́стеся, / и се́рдце очи́стивше, / просвети́стеся благода́тию, / и я́ко свети́ла возсия́вше, / просвеща́ете всю́ подсо́лнечную, / тьму́ отгоня́ще от чту́щих / святу́ю па́мять ва́шу.

Духо́вная свети́ла, / на тве́рди церко́вней возсия́вшая / в после́дняя времена́, / наставля́ют к ти́хому приста́нищу / обурева́емых в пучи́не / и жите́йскими сластьми́ погружа́емых, / грехо́вную мглу́ отгоня́ют, / и бу́рю страсте́й утиша́ют, / и от зла́го пути́ возбраня́ют, / приводя́щаго в па́губу, / и со дерзнове́нием мо́лятся / о спасе́нии ду́ш на́ших.

Не к тому́ в гада́ниих, / но и́стиною и лице́м к лицу́, / зерца́лом разре́шшимся, / зри́те сла́ву Госпо́дню, / и́хже о́чи не ви́деша / и у́ши не слы́шаша, / и на се́рдце челове́ческом не взыдо́ша, / я́же угото́ва Бо́г лю́бящим Его́. / Си́х благи́х сподо́бльшеся, / и на́с не забу́дите, / но моли́те и на́м спасти́ся, / соверша́ющим па́мять ва́шу.

Сла́ва, гла́с 8:

Воздви́гше кре́ст на ра́мена своя́, / и пло́ть распе́нше со страстьми́ и похотьми́, / сотро́сте зми́еву главу́, / и на́с яви́те победи́тели греха́, / и покая́ния досто́йныя плоды́ приноси́ти научи́те.

И ны́не, богоро́дичен, гла́с то́йже:

Влады́чице, приими́ моли́тву ра́б Твои́х, / и изба́ви на́с от вся́кия ну́жды и печа́ли.

Молитва преподобным отцем и старцем, в Оптиной пустыни просиявшим

О, велицыи угодницы Божии, столпи и светильницы Земли Российстей, преподобнии и богоноснии отцы наши Оптинстии, Льве, Макарие, Моисее, Антоние, Иларионе, Амвросие, Анатолие, Исаакие и Иосифе, Варсонофие, Анатолие, Нектарие, Никоне и Исаакие, по закону Евангельскому Господа Бога всем сердцем и всею душею и всем разумением возлюбившии и всему народу Божию во спасение бывшии; сего ради под покров Пресвятыя Владычицы нашея Богородицы во обитель Оптину, покаявшимся разбойником основанную, притекшии, путем тесным и прискорбным смирения и самоукорения до конца дней ваших ходившии, темже убо благодатныя дары святаго Духа преизобильно стяжавшии; старых и младых, знатных и препростых, мудрых века сего и худоумных, никогоже от грядущих к вам ижденувшии, николиже тща и неутешна отпустившии, но светом истины Христовы всех просветившии и духовно воскресившии, ближних ваших, яко себе самех, возлюбившии и тех в сердце своем вместившии, по словеси Апостола, пророчествующе и назидающе, увещающе и утешающе. Умолите Милосердаго Господа, во обитель райскую разбойника благоразумнаго с собою вземшаго, даровати нам, недостойным, яко работником единонадесятаго часа, дух сокрушения, сердца очищение, уст хранение, правоту деяний, мудрование смиренное, слезы покаяния, веру непостыдную, любовь нелицемерную, мир душевный и здравие телесное, да предстательством вашим сподобит нас Господь добраго ответа на Страшнем Судищи Своем, вечных мук избавляя, и царствия Небеснаго купно с вами да удостоит во веки веков. Аминь.