24 октября.

Канон Преподобному Льву Оптинскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь преподо́бному, глас 3:

По́стническими труды́ украси́вся,/ со ученики́ преподо́бнаго Паи́сия подвиза́лся еси́,/ от ни́хже ста́рчества благода́ть прии́м,/ сие́ во оби́тели О́птинстей насади́л еси́./ Те́мже, богоблаже́нне о́тче Льве,/ я́ко име́яй дерзнове́ние ко Го́споду,/ моли́ от страсте́й нас изба́вити/ и спасти́ ду́ши на́ша.

Велича́ние:

Ублажа́ем тя,/ преподо́бне о́тче Льве,/ и чтим святу́ю па́мять твою́,/ наста́вниче мона́хов/ и собесе́дниче А́нгелов.

Стихи́ра собо́ру ста́рцев О́птинских, глас 6:

И́же на земли́ А́нгели/ и на небеси́ челове́цы Бо́жии,/ ми́ра благо́е украше́ние/ и оте́чества на́шего утвержде́ние,/ мона́хов и преподо́бных похвалу́,/ собо́р преподо́бных отце́в О́птинских почти́м:/ насажде́ни бо в дому́ Госпо́дни/ и процве́тше пра́ведно,/ мно́гия заблу́дшия на путь спасе́ния наста́виша/ в преподо́бии и пра́вде.

Кано́н преподо́бному, глас 2.

Песнь 1

Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь,/ сла́вно бо просла́вися.

Припе́в: Преподо́бне о́тче наш Льве, моли́ Бо́га о нас.

Ра́зум даждь нам, Всеси́льне Го́споди,/ досто́йно воспе́ти уго́дника Твоего́,/ Льва прему́драго, ста́рца О́птинскаго,/ чистоты́ и милосе́рдия ева́нгельскаго испо́лненнаго/ и ду́хом прему́дрости све́тло укра́шеннаго.

Припе́в: Преподо́бне о́тче наш Льве, моли́ Бо́га о нас.

А́нгельски на земли́ пожи́в, преподо́бне,/ и, служе́ние ста́рческое, я́ко крест, благопослу́шне от Го́спода прии́м,/ му́дрый наста́вник мно́гим и́ноком и миря́ном яви́лся еси́.

Сла́ва Отцу́ и Сы́ну и Свято́му Ду́ху:

Ду́хом Бо́жиим наставля́емь,/ та́йну челове́ческаго се́рдца проразумева́л еси́,/ смиренному́дрый уго́дниче о́тче Льве,/ те́мже и мно́гия лю́ди к Небе́сному Ца́рствию приве́л еси́.

И ны́не и при́сно и во ве́ки веко́в. Ами́нь.

Богородичен: Упова́ние на́ше и похвало́, Де́во Чи́стая,/ Христа́ Спа́са моли́,/ оставле́ние прегреше́ний нам пода́ти,/ ве́рою и любо́вию Тя почита́ющим.

Песнь 3

Ирмос: Процвела́ есть пусты́ня, я́ко крин, Го́споди,/ язы́ческая неплодя́щая це́рковь,/ прише́ствием Твои́м,/ в не́йже утверди́ся мое́ се́рдце.

Припе́в: Преподо́бне о́тче наш Льве, моли́ Бо́га о нас.

И́стину ева́нгельскую возлюби́в и ку́плю жите́йскую оста́вив,/ к мона́шескому житию́ устреми́лся еси́, преподо́бне,/ нищету́ духо́вную стяжа́в и му́жественне греху́ противоста́в,/ горды́ню злоко́зненнаго врага́ посрами́л еси́.

Припе́в: Преподо́бне о́тче наш Льве, моли́ Бо́га о нас.

Свою́ во́лю нивочто́же вменя́я, о́тче преподо́бне,/ пустыннолю́бцу Фео́дору после́довал еси́/ и, сла́дость послуша́ния и поко́й безмо́лвия вкуси́в,/ страсте́й треволне́ние, богоблаже́нне, укроти́л еси́.

Сла́ва Отцу́ и Сы́ну и Свято́му Ду́ху:

Я́ко сын послуша́ния и учени́к добронра́вный, богому́дре Льве,/ преда́ние оте́ческое насле́довал еси́,/ его́же преподо́бный Паи́сий, я́ко боже́ственныя кла́сы собра́.

И ны́не и при́сно и во ве́ки веко́в. Ами́нь.

Богородичен: Ли́цы А́нгельстии пою́т Тя, Богора́дованная Влады́чице,/ Херуви́ми же и Серафи́ми досто́йно славосло́вят,/ не пре́зри и хвалы́ земноро́дных, воспева́ющих Тя.

Седа́лен, глас 4:

Я́ко страж Бо́жий, вои́стину яви́лся еси́, о́тче Льве,/ ста́до твое́ неусы́пно и бо́дренне сохраня́я,/ и ны́не огради́ нас моли́твами твои́ми,/ ве́рою и любо́вию па́мять твою́ соверша́ющих.

Сла́ва, и ны́не, Богородичен:

Я́ко Боже́ственный Мир, Спа́са Христа́, поро́ждши, Де́во Чи́стая,/ мир ми́рови и спасе́ние всем подала́ еси́,/ те́мже и жизнь на́шу умири́ и ду́ши спаси́, я́ко Блага́я.

Песнь 4

Ирмос: Огне́м очи́щся та́йнаго зре́ния,/ поя́ проро́к челове́ков новоде́йство,/ возглаша́ет глас, Ду́хом пле́щущ,/ воплоще́ние неизрече́нна Сло́ва,/ И́мже си́льных держа́вы сотро́шася.

Припе́в: Преподо́бне о́тче наш Льве, моли́ Бо́га о нас.

Всем приходя́щим к тебе́ наста́вник му́дрый яви́лся еси́, о́тче Льве,/ и просла́вися житие́ твое́,/ умертви́в бо мудрова́ния плотска́я,/ глуби́ны ве́дения, широты́ любве́ и высоты́ смире́ния дости́гл еси́.

Припе́в: Преподо́бне о́тче наш Льве, моли́ Бо́га о нас.

Егда́ к Бо́гу любо́вию возгоре́лся еси́ и усе́рдно Тому́ послужи́ти восхоте́л еси́,/ тогда́, я́ко зе́млю и пе́пел себе́ вменя́я,/ в пусты́ню безмо́лвия удали́лся еси́, о́тче преподо́бне.

Сла́ва Отцу́ и Сы́ну и Свято́му Ду́ху:

Свети́льник све́тел в пусты́ни яви́вся,/ мрак бесо́вский дале́че прогна́л еси́,/ моли́тву же непреста́нную в се́рдце, я́ко меч в руце́, име́я,/ де́монов зло́бу посрами́л еси́.

И ны́не и при́сно и во ве́ки веко́в. Ами́нь.

Богородичен: Тя Предста́тельницу тве́рду ве́мы/ и Богороди́тельницу и́стинную испове́дуем,/ я́ко Бо́га Сло́ва неизрече́нно родила́ еси́, Мари́е Де́во,/ те́мже спаса́й Тя призыва́ющия.

Пе́снь 5

Ирмос: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику Отцу́ Твоему́,/ от но́щи неве́дения,/ приведе́ние и́мамы.

Припе́в: Преподо́бне о́тче наш Льве, моли́ Бо́га о нас.

А́нгельскаго жития́ взыску́я,/ на стезю́ и́ночества невозвра́тным по́мыслом ступи́л еси́/ и, му́дрость отце́в преподо́бных стяжа́в,/ наста́вник и уте́шитель мно́гим яви́лся еси́, богоблаже́нне.

Припе́в: Преподо́бне о́тче наш Льве, моли́ Бо́га о нас.

Ра́достно днесь сла́вит оби́тель Валаа́мская по́стническия труды́ твоя́, о́тче Льве,/ зде бо и́ноческия по́двиги со преподо́бным Фео́дором подъя́л еси́,/ и ны́не с ним на Небеси́ ку́пно ра́дуешися.

Припе́в: Преподо́бне о́тче наш Льве, моли́ Бо́га о нас.

Чистоту́ се́рдца и ум све́тел стяжа́л еси́, о́тче,/ де́лы благи́ми и чудесы́, я́ко свети́льник многосве́тлый, сия́я,/ и пре́лести тьму богодарова́нным ти разсужде́нием изобличи́л еси́.

Сла́ва Отцу́ и Сы́ну и Свято́му Ду́ху:

Ели́цы ку́пли ра́ди духо́вныя к тебе́ прихожда́ху,/ зла́том смиренному́дрия обогаща́хуся,/ те́мже и на́шу нищету́ уще́дри, о́тче Льве,/ ева́нгельских доброде́телей вели́кое сокро́вище стяжа́вый.

И ны́не и при́сно и во ве́ки веко́в. Ами́нь.

Богородичен: Све́тлый О́блаче, Со́лнце ми́ра, Го́спода Иису́са, носи́вши,/ покры́й мир от собла́знов,/ и зе́ницы оче́с духо́вных просвети́,/ во е́же сла́ву Твою́ мы́сленно зре́ти/ и любо́вию пе́ти Тя, Всеблаже́нная.

Песнь 6

Ирмос: Во глубине́ грехо́вней содержи́мь есмь, Спа́се,/ и в пучи́не жите́йстей обурева́емь:/ но я́коже Ио́ну от зве́ря,/ и мене́ от страсте́й возведи́, и спаси́ мя.

Припе́в: Преподо́бне о́тче наш Льве, моли́ Бо́га о нас.

Те́сным путе́м ше́ствуя,/ житие́ богоуго́дне испра́вил еси́, преподо́бне,/ в О́птину же пу́стынь всели́вся,/ духо́вный вертогра́д устро́ил еси́.

Припе́в: Преподо́бне о́тче наш Льве, моли́ Бо́га о нас.

Ве́лиих искуше́ний пучи́ну преплы́в,/ би́сер у́мныя моли́твы, я́ко добр купе́ц, обре́л еси́/ и пу́стынь О́птинскую, я́ко духо́вную сокро́вищницу,/ зла́том оте́ческаго преда́ния обогати́л еси́, о́тче Льве.

Припе́в: Преподо́бне о́тче наш Льве, моли́ Бо́га о нас.

Адама́нт тверд в терпе́нии искуше́ний де́монских, на тя воздвиза́емых, яви́лся еси́, преподо́бне,/ те́мже боле́зни и труды́, ско́рби и гоне́ния,/ я́ко И́ов, кро́тко претерпе́л еси́, на Бо́га упова́я.

Припе́в: Преподо́бне о́тче наш Льве, моли́ Бо́га о нас.

Оте́ческою любо́вию в боле́знех и ско́рбех су́щих покрыва́л еси́/ и му́чимых от духо́в нечи́стых исцеля́л еси́/ си́лою на тебе́ почи́вшаго Всесвята́го Ду́ха.

Сла́ва Отцу́ и Сы́ну и Свято́му Ду́ху:

Послушли́в и рачи́телен, я́ко пчела́ боже́ственная, быв,/ некта́р духо́вный собра́л еси́, богому́дре Льве,/ и́мже ча́да церко́вная и мона́шествующих собо́ры препита́л еси́.

И ны́не и при́сно и во ве́ки веко́в. Ами́нь.

Богородичен: Тве́рду ве́ру даждь ми, Влады́чице,/ я́ко мно́гими прило́ги смяте́ся се́рдце мое́,/ ве́тром бесо́вских искуше́ний обурева́емо,/ но упра́ви ше́ствие мое́, Богоневе́сто,/ Ты бо при́стань оти́шная рабо́м Твои́м.

Конда́к преподо́бному, глас 6:

Те́сным путе́м в житии́ твое́м ше́ствуя,/ на высоту́ доброде́телей возше́л еси́/ и, благода́ть па́стырства от Бо́га прии́м,/ слове́сныя о́вцы до́бре упа́сл еси́/ и ста́рчеству тве́рдое основа́ние/ во оби́тели О́птинстей положи́л еси́./ Те́мже ны́не, преподо́бне о́тче Льве,/ предстоя́ Пресвяте́й Тро́ице,/ моли́ спасти́ся благоче́стно тя почита́ющим.

И́кос:

И́стиннаго смире́ния и послуша́ния де́латель быв,/ дар благода́ти Бо́жия стяжа́л еси́/ и, жезл ста́рчества от Благода́теля вся́ческих прии́м,/ Христо́во ста́до слове́сных ове́ц на па́житех благоче́стия упа́сл еси́/ и мона́шествующих до́бре наста́вил еси́./ Те́мже по блаже́ннем преставле́нии твое́м,/ Престо́лу Святы́я Тро́ицы во сла́ве ны́не предстоя́,/ моли́ спасти́ся благоче́стно тя почита́ющим.

Песнь 7

Ирмос: О́бразу злато́му на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния:/ посреде́ же огня́ вве́ржени, ороша́еми поя́ху:/ благослове́н еси́, Бо́же оте́ц на́ших.

Припе́в: Преподо́бне о́тче наш Льве, моли́ Бо́га о нас.

Иску́с подъя́л еси́, богому́дре Льве, жития́ по́стническаго/ и взыску́ющим о́наго и́стинный путево́ждь яви́лся еси́,/ наставля́я их взыва́ти:/ благослове́н еси́, Бо́же оте́ц на́ших.

Припе́в: Преподо́бне о́тче наш Льве, моли́ Бо́га о нас.

Неду́зи врачу́ются и де́мони отбега́ют моли́твами твои́ми, о́тче Льве,/ те́мже мно́зии с ве́рою к ра́це моще́й твои́х притека́ют и благода́рне вопию́т:/ благослове́н еси́, Бо́же оте́ц на́ших.

Припе́в: Преподо́бне о́тче наш Льве, моли́ Бо́га о нас.

Собо́р О́птинский тобо́ю хва́лится, преподо́бне,/ ты бо, я́ко ка́мень непоколеби́м во искуше́ниих пребыва́я,/ на Ка́мени ве́ры утвержда́тися науча́л еси́, взыва́я:/ благослове́н еси́, Бо́же оте́ц на́ших.

Припе́в: Преподо́бне о́тче наш Льве, моли́ Бо́га о нас.

К тебе́, преподо́бне, притека́ют ве́рнии,/ я́ко любве́ Христо́вы испо́лнен быв,/ оте́ц сиро́т и вдова́м засту́пник,/ ни́щим пита́тель и наста́вник заблу́ждшим яви́лся еси́, пою́щим:/ благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

А́ще и мно́гия ско́рби терпе́л еси́,/ оба́че не оста́вил еси́ прибега́ющих к тебе́, глаго́ля:/ а́ще и в изгна́ние пойду́, или́ во огнь, аз бу́ду то́йже, взыва́яй:/ благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Госпоже́ и Цари́це А́нгелов,/ ца́рствующи при́сно на Небесе́х,/ гра́ды и ве́си земли́ Ру́сския покрыва́й, Богороди́тельнице,/ и рог правосла́вных возвы́си, вопию́щих:/ благослове́нна еси́, Де́во Пренепоро́чная.

Песнь 8

Ирмос: В купине́ Моисе́ю Де́вы чу́до,/ на Сина́йстей горе́, прообрази́вшаго иногда́,/ по́йте, благослови́те,/ и превозноси́те во вся веки.

Припе́в: Преподо́бне о́тче наш Льве, моли́ Бо́га о нас.

О́птинский скит, я́коже ра́йский сад, возде́лал еси́,/ в не́мже ученики́ твоя́ взрасти́л еси́,/ и́же благода́тне процвето́ша/ и зе́млю Ру́сскую арома́ты моли́твенными облагоуха́ша.

Припе́в: Преподо́бне о́тче наш Льве, моли́ Бо́га о нас.

Гоне́ния благоду́шне претерпе́л еси́,/ я́же лука́вый за́вистию воздви́же на тя оглаго́ланием от челове́к,/ за оби́дящих и претя́щих ти кро́тко моли́лся еси́, о́тче Льве преподо́бне,/ в незло́бии Христу́ подража́я.

Сла́ва Отцу́ и Сы́ну и Свято́му Ду́ху:

Лесть обличи́л еси́, богому́дре,/ и, пре́лести тьму потреби́в, ду́ши от пле́на бесо́вскаго изба́вил еси́,/ те́мже и исцеле́ния пода́ждь к ра́це моще́й твои́х притека́ющим/ и превознося́щим Христа́ во вся ве́ки.

И ны́не и при́сно и во ве́ки веко́в. Ами́нь.

Богородичен: Ада́мово воззва́ние и Е́вино избавле́ние, Мари́е Де́во,/ потщи́ся спасти́ ве́рныя лю́ди Твоя́,/ пою́щия и превознося́щия Тя во вся ве́ки.

Песнь 9

Ирмос: Безнача́льна Роди́теля Сын, Бог и Госпо́дь,/ вопло́щся от Де́вы нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Припе́в: Преподо́бне о́тче наш Льве, моли́ Бо́га о нас.

В зе́млю кро́тких всели́лся еси́, незло́бив сы́й,/ и, доброде́тельми преукра́шен, с Вы́шними лику́еши,/ те́мже спаса́й нас предста́тельством твои́м, о́тче богохва́льне.

Припе́в: Преподо́бне о́тче наш Льве, моли́ Бо́га о нас.

Источа́ет благово́ния, я́ко крин, ра́ка честны́х моще́й твои́х,/ вразумля́ющи ве́рныя/ благоуха́ние ра́йскаго селе́ния взыска́ти,/ о́тче Льве достосла́вне.

Припе́в: Преподо́бне о́тче наш Льве, моли́ Бо́га о нас.

Заре́ю Ду́ха облиста́емь,/ в пусты́ни О́птинстей све́тло просия́л еси́, о́тче преподо́бне,/ те́мже и доны́не сия́еши/ во тьме грехо́вней пребыва́ющим.

Сла́ва Отцу́ и Сы́ну и Свято́му Ду́ху:

Небе́сная дарова́ния прии́м,/ прозрева́л еси́ бу́дущая, я́ко настоя́щая,/ те́мже, мно́гия в ве́ре утверди́в,/ ко спасе́нию приве́л еси́./ Моли́, преподо́бне, с про́чими отцы́/ в ми́ре соблюсти́ оби́тель на́шу,/ пе́сньми собо́р ста́рцев О́птинских ны́не прославля́ющих.

И ны́не и при́сно и во ве́ки веко́в. Ами́нь.

Богородичен: Оте́чество на́ше заступи́, Влады́чице,/ и по́мощь пода́й стра́ждущим,/ си́рыя приими́ под кров Твой честны́й/ и ду́ши озло́бленныя умири́, Богоблагода́тная./ Ты бо еси́ спасе́ние ве́рою Тя велича́ющих.

Свети́лен:

Боже́ственным Све́том просвеще́н,/ све́том доброде́телей све́тло просия́л еси́, о́тче Льве, / и на све́щнице о́птинстей поста́влен,/ ны́не просвеща́еши всех ве́рно к тебе́ прибега́ющих.

Сла́ва, и ны́не, Богородичен:

Моли́твами Пречи́стыя Ма́тере Твоея́/ и всех проро́ков, и му́чеников,/ и свяще́нных учени́к, Сло́ве Бо́жий,/ пода́ждь нам мир и очище́ние прегреше́ний.

Молитва

О Пречестная богомудрая главо и собора Старцев Оптинских изрядное и перволепное украшение, богопросвещенне отче Льве! Тебе, яко чада отцу, дерзаем приносити сие акафистное пение, ты же не пренебрези малаго сего приношения, яко паче должни мы не токмо пении, но делы тя почествити. Ты бо оставил еси нам богатство твоего жития богоугоднаго, в немже яко в зерцале зрится образ богошественных отцев в подвизе Богу угодивших. Аще и немощны есть мы тебе подражати, но желанием лучшаго от тебе неотступаем и под крила молитв твоих прибегаем и яко неключимии тебе вопием: изгони от нас всякое нерадение, искорени злыя страсти в сердцах наших гнездящияся, прожени бесов на ны непрестанно воюющих, даждь помощь благодатную, яко силен есть и еще при жизни твоей бесов прогонял еси и целил еси всякую болезнь и немощь таящуюся. Сице и в преднее время посещай ны духом твоим и жезлом пастырския молитвы твоея порази волков мысленных стадо твое ищущих расхитити. Нас же яко пастырь добрый, присно зови свирелию поучений твоих в Царствие Божие идеже с тобою по преставлении нашем вкупе да обрящемся, прославляя Отца и Сына и Святаго Духа в безконечныя веки. Аминь.