24 октября.

Канон святому апостолу Филиппа, единому от седми диаконов.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь апо́стола, гла́с 3:

Апо́столе святы́й Фили́ппе, моли́ ми́лостиваго Бо́га, да прегреше́ний оставле́ние пода́ст душа́м на́шим.

Кано́н. Гла́с 6.

Пе́снь 1.

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Святый апостоле Филиппе, моли́ Бо́га о нас.

Пресве́тлыми сия́нии Христо́выми озари́вся, по прича́стию Божества́, му́дре, све́т яви́лся еси́ вторы́й, ве́рныя свяще́нно световодя́, сла́вне Фили́ппе.

Припев: Святый апостоле Филиппе, моли́ Бо́га о нас.

Пресу́щественное Сло́во, все́ на́ше осуществова́в, свяще́нна тя́ ученика́ свяще́нно предлага́ет, му́дре, несвяще́ннаго омраче́ния язы́ки избавля́юща.

Сла́ва Отцу́ и Сы́ну и Свято́му Ду́ху:

Ру́к возложе́нием свяще́нных ученико́в, избра́н бы́л еси́ со Стефа́ном и про́чими, свяще́нный диа́кон, я́ко сы́й по́лн Ду́ха Бо́жия, всему́дре Фили́ппе.

И ны́не и при́сно и во ве́ки веко́в. Ами́нь.

Богородичен: Иже из не су́щих вся́ соде́тельствуя, я́ко вину́ Тя́ име́яше воплоще́ния Своего́, Богома́ти Чи́стая, те́м по до́лгу ве́рнии Тя́ ублажа́ем.

Пе́снь 3.

Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Святый апостоле Филиппе, моли́ Бо́га о нас.

Сы́ны соверши́л еси́ Све́та, во тме́ неве́дения су́щия, блаже́нне, в зна́мениих стра́шных, я́ко не́бо высо́кое, Сло́ва сла́ву пове́дая.

Припев: Святый апостоле Филиппе, моли́ Бо́га о нас.

От пле́мене Иу́дова Христа́ возсия́вша, блаже́нне, свяще́нно возвеща́я, благода́ти све́том показа́л еси́, Его́же Моисе́й дре́вле и проро́цы провозвести́ша.

Сла́ва Отцу́ и Сы́ну и Свято́му Ду́ху:

Яда душетле́ннаго отбежа́ти и спаси́тельную благода́ть восприя́ти, покаря́еши медото́чными глаго́лы, отринове́нныя дале́че неразу́мием, Фили́ппе богодухнове́нне.

И ны́не и при́сно и во ве́ки веко́в. Ами́нь.

Богородичен: Свети́льник яви́лася еси́ та́инственный, Свещу́, Отрокови́це, нося́щи и́стинно, просве́щшую в нощи́ неве́дения пре́жде одержи́мыя, кра́йнею бла́гостию.

Седа́лен апо́стола, гла́с 8.

Прогони́тель де́монов яви́вся и, я́ко свети́льник, су́щия во тме́ просвети́в, яви́л еси́ Со́лнца, от Де́вы возсия́вшаго, и, хра́мы и́дольския сокруши́в, возста́вил еси́ Це́ркви, блаже́нне, в сла́ву Бо́га на́шего. Те́м тя́ почита́ем и боже́ственную твою́ па́мять све́тло пра́зднуем, и согла́сно вопие́м ти́: апо́столе Фили́ппе, моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Пе́снь 4.

Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Святый апостоле Филиппе, моли́ Бо́га о нас.

Ви́дев тя́ Си́мон содева́юща чудеса́ и зна́мения ве́лия, лицеме́рствовав, Фили́ппе, креща́ется, не зло́бы бежа́в, но поги́бели предае́тся.

Припев: Святый апостоле Филиппе, моли́ Бо́га о нас.

Мно́ги тя́ си́лы содева́юща ви́дяще живу́щии во гра́де Самари́йстем, пропове́дниче Христо́в Фили́ппе, позна́ния све́т, веселя́щеся, приима́ху.

Припев: Святый апостоле Филиппе, моли́ Бо́га о нас.

Иди́, глаго́ла тебе́ Госпо́день Ангел, пу́ть направля́я свяще́ннаго, Фили́ппе, му́рина, е́же позна́ти тому́ стезю́ Сло́ва воплоще́ния.

Сла́ва Отцу́ и Сы́ну и Свято́му Ду́ху:

Свяще́ннейший Канда́кий ви́дев тя́, вразумля́юща того́, твое́ю руко́ю, Фили́ппе, креща́ется, и по́лн Ду́ха Свята́го я́влься, пропове́дник Боже́ственный бы́сть.

И ны́не и при́сно и во ве́ки веко́в. Ами́нь.

Богородичен: Сы́ны соверши́ Бо́жия, Всенепоро́чная, сы́ны челове́ческия Тво́й Сы́н, от чи́стых крове́й Твои́х вопло́щся и ро́ждся, сего́ ра́ди сла́вим Тя́.

Пе́снь 5

Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Святый апостоле Филиппе, моли́ Бо́га о нас.

Ярости беззако́нных не убоя́вся, среди́ волко́в, я́ко а́гнец и́стинно, Фили́ппе, ходи́л еси́, ты́я претворя́я к благоче́стию благода́ти сло́вом, блаже́ннейше.

Припев: Святый апостоле Филиппе, моли́ Бо́га о нас.

На заколе́ния веде́ся, я́ко Агнец, Емману́ил, я́коже глаго́лет Иса́ия сла́вный, Его́же разуме́ти не моги́й, Фили́ппе, свяще́нный Канда́кий от тебе́ науча́ется.

Сла́ва Отцу́ и Сы́ну и Свято́му Ду́ху:

Священносло́вна тя́ ученика́, еди́наго диа́конов седми́ избра́нна, уве́дехом и Це́ркве Боже́ственное основа́ние и все́х су́щих во тме́ свети́льника, Фили́ппе.

И ны́не и при́сно и во ве́ки веко́в. Ами́нь.

Богородичен: Богоро́дицу Тя́ и́стинно от души́ испове́дающе, искуше́ний и неудо́бств избавля́емся Твои́ми ко все́х Бо́гу и Го́споду, Де́во, хода́тайствы, Богоблагода́тная.

Пе́снь 6.

Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Святый апостоле Филиппе, моли́ Бо́га о нас.

Во́д духо́вных испо́лнився, я́ко река́ Боже́ственнаго Еде́ма, изше́л еси́, наводня́я волно́ю ти́хою земны́я концы́ и напая́я сердца́ ве́рных, досточу́дне.

Припев: Святый апостоле Филиппе, моли́ Бо́га о нас.

Отве́рз, испо́лнил еси́ твоя́ уста́, учениче́, духо́внаго ра́зума, и разве́рз горта́нь лука́ваго, поглоще́нных исто́ргл еси́ безчи́сленная мно́жества, и спа́сл еси́, апо́столе.

Сла́ва Отцу́ и Сы́ну и Свято́му Ду́ху:

Кре́пость низве́ржеся неви́димаго врага́ и отню́д поги́бе, тебе́, кре́постию Ду́ха Христа́ пропове́дающу, Фили́ппе, распе́ншагося и язы́ки призыва́ющаго.

И ны́не и при́сно и во ве́ки веко́в. Ами́нь.

Богородичен: Зако́нов Тя́ есте́ственных кроме́, роди́, Христе́, Соде́теля тва́ри, и па́че естества́ пребы́сть и́стинно Де́ва Нескве́рна свята́я Ма́ти Твоя́, Пресвяты́й.

Конда́к апо́стола, гла́с 4.

Язы́ков лове́ц пречу́дный и ученико́в Христо́вых собесе́дник, апо́столов предъизбра́нный, Фили́пп дне́сь ми́ру исцеле́ний подае́т бога́тство, покрыва́ет от обстоя́ний того́ хва́лящия. Те́м согла́сно зове́м ему́: спаса́й вся́ моли́твами твои́ми, апо́столе.

Икос:

Яко не́бо сла́ву Бо́жию, самови́дче, испове́дав, язы́ки да́льния привлече́ к ве́ре бли́з бы́ти Бо́га. Те́м, я́коже Моисе́й законополо́жник, обогаща́еши, прехва́льне, ста́до твое́: о́н дре́вле мо́ре пресече́ и преве́д лю́ди, пото́м в пусты́ни препита́ хле́бом небе́сным; ты́ же сла́наго лю́таго неве́рствия изба́вив во Христе́ всю́ тва́рь, горе́ к пребыва́нием небе́сным возве́л еси́ вопию́щия: спаса́й вся́ моли́твами твои́ми, апо́столе.

Пе́снь 7.

Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Святый апостоле Филиппе, моли́ Бо́га о нас.

Наведе́ тя́, я́ко коня́, Пребоже́ственный, возмуща́юща язы́ческое мо́ре, Фили́ппе, главы́ сокруша́юща вра́жия, и пою́ща Ему́ пе́сненно: благослове́н еси́, Бо́же оте́ц на́ших.

Припев: Святый апостоле Филиппе, моли́ Бо́га о нас.

Сказу́я пре́жде все́х веко́в сокрове́нную Та́йну, тайноглаго́льник же бы́в, Фили́ппе му́дре, научи́л еси́ страны́ и лю́ди и от та́ин ме́рзских очи́стил еси́.

Сла́ва Отцу́ и Сы́ну и Свято́му Ду́ху:

Яви́лся еси́ велича́йшая звезда́, Фили́ппе сла́вный, и Тралли́и удобре́ние, в не́йже те́ло твое́ честно́е лежи́т, содева́я чуде́с пресла́вная, му́дре, на просвеще́ние благочести́вно блажа́щих тя́.

И ны́не и при́сно и во ве́ки веко́в. Ами́нь.

Богородичен: Богороди́тельницу Тя́, Де́во, имену́ем, Мари́е Пречи́стая, спаса́емии Тобо́ю де́нь и но́щь от вра́жиих приложе́ний вре́дных, и искуше́ний вся́ческих, и душе́вных скве́рн.

Пе́снь 8.

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Святый апостоле Филиппе, моли́ Бо́га о нас.

Сло́вом боже́ственным, всеблаже́нне, я́коже со́лию, раствори́в, пре́лести очи́стил еси́ смра́д лю́тый, и челове́ческая сердца́ исцели́л еси́, чести́ и сла́вити Тро́ицу во ве́ки.

Припев: Святый апостоле Филиппе, моли́ Бо́га о нас.

Утверди́шася но́ги хромы́х сло́вом твои́м, му́дре, ду́си же ме́рзцыи и нечи́стии рыда́ху, терпе́ти не могу́ще да́нныя тебе́ благода́ти.

Сла́ва Отцу́ и Сы́ну и Свято́му Ду́ху:

В Самари́и дре́вле живу́щии, Фили́ппе, благода́ти зарю́ от тебе́ прие́млют, ви́дяще мно́гая содева́юща тя́ чудеса́ си́лою Ду́ха, Исто́чника благода́тнаго.

И ны́не и при́сно и во ве́ки веко́в. Ами́нь.

Богородичен: Коле́блющуюся зло́бою ратобо́рца ду́шу мою́, Де́во Чи́стая, укрепи́, боже́ственным призира́нием Дви́жущаго вся́ческая прие́мши и неподви́жущися.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Святый апостоле Филиппе, моли́ Бо́га о нас.

Ви́дев дре́вле тебе́ ча́емая и боже́ственную прие́м вла́сть непоколеби́му, о не́йже челове́ки научи́л еси́, Фили́ппе богоглаго́ливе, красу́йся и лику́й, Боже́ственнаго наслажда́яся просвеще́ния и утеше́ния.

Припев: Святый апостоле Филиппе, моли́ Бо́га о нас.

Яко све́т, я́ко звезда́, я́ко вели́кое со́лнце, свеща́тельными заря́ми обте́кл еси́ вселе́нную, возвеща́я Боже́ственное пропове́дание: во Тралли́ю же, Аси́йский гра́д, прише́д, ему́же во́ждь бы́в, блаже́нне, в не́м усну́л еси́.

Припев: Святый апостоле Филиппе, моли́ Бо́га о нас.

Кре́ст, и сме́рть, и воскресе́ние Изба́вителя бли́жним и да́льним возвести́л еси́, не́бо озвезде́нное бы́в, Боже́ственными светлостьми́ блиста́ющося, Фили́ппе, апо́столе Христо́в досточу́дне.

Сла́ва Отцу́ и Сы́ну и Свято́му Ду́ху:

Земля́ те́ло твое́ многострада́льное, сия́ние испуща́ющее исцеле́ний, покры́, не́бо же ду́х тво́й святы́й со апо́столы и́мать веселя́щейся, с ни́миже и на́с помяни́, му́дре, хва́лящих тя́.

И ны́не и при́сно и во ве́ки веко́в. Ами́нь.

Богородичен: Гла́с прино́сит Ти́ благода́рственный вся́кое дыха́ние, вопию́щий ве́село и глаго́лющий: ра́дуйся, престо́ле Вы́шняго огнеобра́зный; ра́дуйся, Бо́жие село́ простра́ннейшее; ра́дуйся, апо́столов благоле́пное, Чи́стая, венча́ние.

Свети́лен.

Апо́столе Христо́в, во всю́ вселе́нную протече́ твое́ веща́ние, Бо́га пропове́дал еси́ на́м, Его́же о на́с моли́ све́т у́мный на́м возсия́ти.

Молитва

Святы́й сла́вный и всехва́льный апо́столе Христо́в Филиппе, мо́лим тя с ве́рою и любо́вию: умоли́ Христа́ Го́спода претвори́ти ду́ши на́ша из грехолюби́вых в боголюби́выя; сохрани́ и соблюди́ нас моли́твами твои́ми от искуше́ний диа́вольских и паде́ний грехо́вных, и испроси́ нам свы́ше по́мощь во вре́мя уны́ния и беспо́мощия на́шего; да не преткне́мся о ка́мень собла́зна, но неукло́нно ше́ствуем спаси́тельным путе́м за́поведей Христо́вых, до́ндеже дости́гнем о́ных блаже́нных оби́телей ра́йских, иде́же ты ны́не водворя́ешися и весели́шися. Ей, апо́столе Спа́сов! Не посрами́ нас, кре́пце на тя упова́ющих, но бу́ди нам помо́щник и покрови́тель во всем житии́ на́шем и помози́ нам благоче́стно и богоуго́дно житие́ сие́ вре́менное сконча́ти, благу́ю и ми́рную христиа́нскую кончи́ну получи́ти и до́браго отве́та сподо́битися на Стра́шнем Суде́ Христо́ве; да избежа́вше мыта́рств возду́шных и вла́сти лю́таго мироде́ржца, унасле́дуем Ца́рство Небе́сное и просла́вим великоле́пное и́мя Отца́ и Сы́на и Свята́го Ду́ха, во ве́ки веко́в. Ами́нь.