24 октября.

Канон преподобному Феофану Исповеднику, епископу Никийскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Правосла́вия наста́вниче, благоче́стия учи́телю и чистоты́, вселе́нныя свети́льниче, археере́ов богодохнове́нное удобре́ние, Феофа́не прему́дре, уче́ньми твои́ми вся́ просвети́л еси́, цевни́це духо́вная, моли́ Христа́ Бо́га спасти́ся душа́м на́шим.

Кано́н. Гла́с 6.

Пе́снь 1.

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Преподобне отче Феофане, моли́ Бо́га о нас.

Моего́ ра́зума твои́ми моли́твами мра́к отжени́, иера́рше Христо́в, я́ко да воспою́, сла́вне, твою́ свяще́нную и светоза́рную па́мять пе́сньми.

Припев: Преподобне отче Феофане, моли́ Бо́га о нас.

Яко река́, устреми́лся еси́ от Сио́на, иера́рше сла́вне, и напои́л еси́ зело́ Боже́ственными струя́ми ве́рных собо́ры, — Бо́гу побе́дную пе́снь пои́м, — вопия́ше.

Сла́ва Отцу́ и Сы́ну и Свято́му Ду́ху:

Боже́ственными сия́нии твою́ ду́шу озари́в, Феофа́не, сла́сти страсте́й воздержа́ния попали́л еси́ огне́м, песнопоя́ и́стинно: воспои́м пе́снь Христу́.

И ны́не и при́сно и во ве́ки веко́в. Ами́нь.

Богородичен: Светле́йшими луча́ми Твоего́ Сы́на, Богоро́дице, просвети́ омраче́нную мою́ ду́шу и страсте́й смуще́ние Твои́м, Чи́стая, укроти́ хода́тайством.

Пе́снь 3.

Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Преподобне отче Феофане, моли́ Бо́га о нас.

Сы́й испо́лнен, му́дре, Боже́ственнаго Ду́ха яви́лся еси́, пита́я бога́тно благоче́стия сла́достию сло́вом живи́тельным сердца́ зря́щих к тебе́.

Припев: Преподобне отче Феофане, моли́ Бо́га о нас.

Повеле́нии Боже́ственнаго сия́ния изблиста́я, всеблаже́нне, отгна́л еси́ всю́ ерети́ческую мглу́, Жизнода́вцу Христу́ воспева́я: свя́т еси́, Го́споди.

Сла́ва Отцу́ и Сы́ну и Свято́му Ду́ху:

На го́ру Боже́ственных доброде́телей возше́д, иера́рше, и во мра́к вше́д, сочта́лся еси́ с Бо́гом, и ра́зума скрижа́ль прия́л еси́, зако́н благода́ти.

И ны́не и при́сно и во ве́ки веко́в. Ами́нь.

Богородичен: Се́ ле́ствица Иа́ковля, ю́же ви́де иногда́ утвержде́ну, на не́йже утвержда́шеся Бо́г, Светоно́сная Чи́стая яви́ся де́вствующи Богоро́дица.

Седа́лен преподо́бнаго, гла́с 4.

Яви́лся еси́, преподо́бне, Це́ркви, я́коже друго́е со́лнце, озаря́я сию́ мо́лниями боже́ственных слове́с твои́х, я́ко учени́к Госпо́день, Феофа́не.

Слава и ны́не, Богородичен:

Пречи́стыя ру́ки Твоя́, Де́во Ма́ти, просте́рши, покры́й упова́ющия на Тя́ и Сы́ну Твоему́ зову́щия: все́м пода́ждь, Христе́, ми́лости Твоя́.

КрестоБогородичен:

На дре́ве ви́дящи воздви́жена Сы́на Твоего́, Пречи́стая, утро́бою ма́тернею растерза́ема, жа́лостно взыва́ше: увы́ Мне́, ка́ко за́йде, Све́те Мо́й Безле́тный?

Пе́снь 4.

Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Преподобне отче Феофане, моли́ Бо́га о нас.

Поще́нием, всему́дре о́тче Феофа́не, себе́ очи́стив, ве́сь све́та испо́лнен бы́л еси́, ве́сь Бо́га вмести́телен, ве́сь Ду́ха Свята́го соприча́стен.

Припев: Преподобне отче Феофане, моли́ Бо́га о нас.

Гла́дом та́емь, в лю́тая влага́емь заточе́ния, стражда́, всеблаже́нне, му́ченически терпе́л еси́, от со́вести чи́сты в Го́споде веселя́ся.

Сла́ва Отцу́ и Сы́ну и Свято́му Ду́ху:

Облиста́в, сла́вне, исправле́нии обощре́н яви́лся еси́, я́ко Христо́в ме́чь, ссеца́ющь ерети́ческая ухищре́ния, Боже́ственным Ду́хом укрепля́емь.

И ны́не и при́сно и во ве́ки веко́в. Ами́нь.

Богородичен: Свети́льник всесве́тлый Ты́ яви́лася еси́, Боже́ственная трапе́за, Бо́жие селе́ние, киво́т и же́зл, процве́тши Цве́т в ми́ре, Христа́, Ма́ти Де́во.

Пе́снь 5

Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Преподобне отче Феофане, моли́ Бо́га о нас.

Светода́тельными твои́ми блиста́нии, о́тче свяще́ннейше, мра́чную тму́ потреби́л еси́ ерети́чествующих, богозна́ния све́том озаря́я и просвеща́я ми́ра концы́.

Припев: Преподобне отче Феофане, моли́ Бо́га о нас.

Злочести́вых защи́тницы тебе́, досточу́дна су́щаго, лю́тыми ра́нами уязви́ша, его́же Ангельстии чи́ни объима́ху, я́ко Христо́ва иера́рха и боже́ственнаго му́ченика.

Сла́ва Отцу́ и Сы́ну и Свято́му Ду́ху:

Бы́л еси́, о́тче, светови́дный заблу́ждшим путево́ждь, пла́вающим ко́рмчий, коле́блемым приложе́ньми лю́тых тве́рдость и стена́ недви́жима.

И ны́не и при́сно и во ве́ки веко́в. Ами́нь.

Богородичен: Добро́та Иа́ковля, ю́же Бо́г возлюби́ и всели́тися избра́, земны́х сла́ва и прибе́жище согреша́ющих, Богоро́дице, Ты́ яви́лася еси́.

Пе́снь 6.

Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Преподобне отче Феофане, моли́ Бо́га о нас.

Сы́й я́ко со́лнце, богоза́рныя лучи́, преблаже́нне, испусти́л еси́, похваля́я му́ченическия стра́сти, вяза́ния, и ра́ны, и ди́вныя по́двиги, иера́рше Христо́в.

Припев: Преподобне отче Феофане, моли́ Бо́га о нас.

Пречи́стую Влады́чицу похваля́я чи́сте язы́ком твои́м, богому́дре, воспе́л еси́ словеса́ светоза́рная, ве́рных собо́ры и му́дрых сердца́ умаща́ющая.

Сла́ва Отцу́ и Сы́ну и Свято́му Ду́ху:

Писа́нием твоего́ всечестна́го и чи́стаго, му́дре, лица́ безбо́жных писа́ния измазу́еши и те́х богоме́рзская и безбо́жная повеле́ния, возвеща́я чествова́ти ико́ну Христо́ву.

И ны́не и при́сно и во ве́ки веко́в. Ами́нь.

Богородичен: Вся́ хоте́нием соста́вивый Бо́г и содержа́й, Пречи́стая, описа́нием телесе́ на Твои́х объя́тиих но́сится, Боже́ственным существо́м Неопи́санный.

Конда́к Феофа́на, гла́с 2.

Возгреме́в Христо́во Боже́ственное воплоще́ние, безпло́тныя враги́ до конца́ обличи́л еси́, чу́дне Феофа́не. Сего́ ра́ди вси́ ве́рно и благоче́стно вопие́м ти́: моли́ непреста́нно о все́х на́с.

Пе́снь 7.

Ирмос: Отроцы в Вавило́не пе́щнаго пла́мене не убоя́шася, но, посреде́ пла́мене вве́ржени, ороша́еми, поя́ху: благослове́н еси́, Го́споди, Бо́же оте́ц на́ших.

Припев: Преподобне отче Феофане, моли́ Бо́га о нас.

Исправля́я ты́ и́стины сло́во, ра́н искуше́ния претерпе́л еси́ и, во изгна́ние вложе́н, иера́рше Феофа́не, пе́л еси́: благослове́н еси́, Го́споди, Бо́же оте́ц на́ших.

Припев: Преподобне отче Феофане, моли́ Бо́га о нас.

Твои́х догма́тов струи́ нечести́вых потопи́ша моря́, му́дре, не вопию́щих Христу́, Бо́гу на́шему: благослове́н еси́, Го́споди, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Ре́ки твои́х слове́с медото́чных, Феофа́не, челове́ков ду́ши весе́лия боже́ственнаго испо́лниша, песносло́вящих пе́сньми Бо́га Препросла́вленнаго.

И ны́не и при́сно и во ве́ки веко́в. Ами́нь.

Богородичен: На Тебе́ вели́кое соде́яся, Де́во Ма́ти, та́инство: Сы́н Бо́жий, из чре́ва Твоего́ вопло́щся, ны́не яви́ся, Ему́же, веселя́щеся, пое́м: отце́в Бо́же, благослове́н еси́.

Пе́снь 8.

Ирмос: За зако́ны оте́ческия блаже́ннии в Вавило́не ю́ноши, предбе́дствующе, царю́ющаго оплева́ша повеле́ние безу́мное, и совоку́плени, и́мже, не свари́шася огне́м, Держа́вствующему досто́йную воспева́ху пе́снь: Го́спода по́йте, дела́, и превозноси́те во вся́ ве́ки.

Припев: Преподобне отче Феофане, моли́ Бо́га о нас.

Зако́н оте́ческий, всеблаже́нне, и́стинно нося́, пребеззако́ннейшаго ца́рствующаго поплева́л еси́ повеле́ние несмы́сленное, погубля́юща, о́тче, Госпо́дне воображе́ние благоче́стно лобза́ющих, е́же прие́мь, в ми́ре яви́ся от Де́вы Отрокови́цы, Его́же превозно́сим во ве́ки.

Припев: Преподобне отче Феофане, моли́ Бо́га о нас.

Ум боже́ствен, Ду́ха Пресвята́го гу́сль всесли́чная, слави́й добропе́снивый, ве́рных ве́рх, Правосла́вия сто́лп и утвержде́ние, му́дре, Це́ркве тве́рдь, мона́хов хвала́, Феофа́не, отце́в сла́ва и кре́пость яви́лся еси́, воспева́я Христа́ во ве́ки.

Сла́ва Отцу́ и Сы́ну и Свято́му Ду́ху:

Мирополо́жница Ду́ха Пресвята́го, о́тче, ты́ показа́лся еси́ излива́нием миродохнове́нных твои́х и му́дрых уче́ний, потребля́я пре́лести злосмра́днейшую тлю́, и благово́нствуеши нра́вом твои́м Честну́ю Це́рковь, зовя́ непреста́нно: пе́сньми тя́ превозно́сим, Христе́, во ве́ки.

И ны́не и при́сно и во ве́ки веко́в. Ами́нь.

Богородичен: Бо́жия гора́ ту́чнейшая, ю́же пра́отец Дави́д предписа́ дре́вле, песнопоя́ проро́чески, Ты́ яви́лася еси́, Де́во, от нея́же отсече́ся Ка́мень краеуго́льный, Христо́с, и сокруши́ кре́пость всю́ и́дольскую. Того́ непреста́нно пое́м и превозно́сим во ве́ки.

Песнь 9

Ирмос: Безсе́меннаго зача́тия рождество́ несказа́нное, Ма́тере Безму́жныя нетле́нен Пло́д: Бо́жие бо рожде́ние обновля́ет естества́. Те́мже Тя́ вси́ ро́ди, я́ко Богоневе́стную Ма́терь, правосла́вно велича́ем.

Припев: Преподобне отче Феофане, моли́ Бо́га о нас.

Побо́рствующа тя́ по Христо́ве Це́ркви человекоуби́йца зре́ти не моги́й, искуше́ния тебе́ простира́ет: оба́че непрекло́нен пребы́л еси́, мужему́дренно к царе́м нечести́вым противля́яся до́блественно, увеща́я ты́я покланя́тися о́бразу Христо́ву, Феофа́не.

Припев: Преподобне отче Феофане, моли́ Бо́га о нас.

Укра́шен несказа́нною, богому́дре, добро́тою Тро́ицы и упещре́н сия́нии, све́тиши и ра́достно, пребога́те, обстои́ши престо́л и́стинно Зижди́теля и Бо́га, иде́же пра́зднующих гла́с, о́тче богоно́се Феофа́не.

Сла́ва Отцу́ и Сы́ну и Свято́му Ду́ху:

Твои́х подвиго́в досто́йно прия́л еси́ че́сти и, венцено́сец, ны́не на небесе́х со Ангелы свесели́шися, иде́же проро́ков собо́р, и апо́столов, и му́чеников и́стинно во́инства мно́гая, иде́же патриа́рхов ли́ки, помина́й на́с, о́тче Феофа́не.

И ны́не и при́сно и во ве́ки веко́в. Ами́нь.

Богородичен: Побо́рствующи царе́м ве́рным во бране́х на ва́рвары, да́ждь победи́тельная, Де́во Богороди́тельнице, Благослове́нная и Препросла́вленная, Ма́ти Неискусобра́чная Чи́стая, покрыва́ющи от вся́каго вре́да вра́жия, да Твоего́ Сы́на пою́ще, Тя́ велича́ем.

Свети́лен преподо́бнаго.

Яко Боже́ственный све́т, Феофа́не, Це́ркви яви́лся еси́, пе́сней твои́х сия́нием сию́ озари́в, и све́том лица́ твоего́, на не́мже Христо́вы я́звы носи́в, удобря́ем, к Нему́же не преста́й моля́ся о ста́де твое́м, о́тче.

Молитва

О свяще́нная главо́, преподо́бне о́тче, преблаже́нне а́вво Феофа́не, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.