24 октября (в ближайшее воскресенье).

Канон памяти святых отец, иже на Седмом Вселенском Соборе в Никеи собравшихся.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь отце́в, гла́с 8:

Препросла́влен еси́, Христе́ Бо́же на́ш, свети́ла на земли́ отцы́ на́ши основа́вый, и те́ми ко и́стинней ве́ре вся́ ны́ наста́вивый, Многоблагоутро́бне, сла́ва Тебе́.

Кано́н святы́х. Гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Святии отцы, моли́те Бо́га о нас.

Песносло́вити седмо́е собра́ние жела́ющему ми́ ны́не, седми́х дарова́ний собо́р да́ждь ми́ Паракли́та, Го́споди, умудри́вшаго се́й огненноязы́чне и ху́льное все́ языковре́дие умолча́ти сотво́ршаго.

Припев: Святии отцы, моли́те Бо́га о нас.

Бо́льшее из нача́ла чи́сл седмо́е: и́бо созда́ния Боже́ственнаго всего́ первообра́зно бы́сть, всесоверше́нное преста́ние в седмы́й де́нь; и ны́не все́х ересе́й коне́ц, в Собо́ре равночи́сленном.

Сла́ва Отцу́ и Сы́ну и Свято́му Ду́ху:

Победи́в богобо́рнаго Ария в Нике́и дре́вле па́стырским жезло́м, правосла́вными ше́ствовати Це́рковь уче́нии ли́к отце́в, и ны́не о се́м посрами́л е́сть образобо́рцы я́ко побо́рник.

И ны́не и при́сно и во ве́ки веко́в. Ами́нь.

Богородичен: Якоже отцы́ благоче́стно научи́ша, испове́дующе ве́рно Деви́ческую утро́бу, безболе́зненно ро́ждшую пло́тию Безпло́тнаго; покланя́емся же Сему́, столпопи́шуще изображе́ние, и че́стне облобыза́ем.

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, Еди́не Человеколю́бче.

Припев: Святии отцы, моли́те Бо́га о нас.

Не поколеба́тися Христо́ве неруши́мей Це́ркви, от Него́ тайнонауча́еми, боже́ственнии пастыренача́льницы, и́же сию́ поколеба́ти хотя́щия, я́коже анти́христовы ча́сти, от благочести́вых отри́нуша.

Припев: Святии отцы, моли́те Бо́га о нас.

Очища́ет му́тныя и ти́нныя пото́ки, от исто́чник спасе́ния поче́рп, и жа́ждущия лю́ди Христо́вы насыща́ет уче́ний струя́ми отце́в сосло́вие.

Сла́ва Отцу́ и Сы́ну и Свято́му Ду́ху:

На ненави́дящих и́стинно и христианооглаго́льников собра́ние христолю́бных седмо́е в све́тлем гра́де Нике́йстем бы́сть, его́же ца́рие Ири́на и Константи́н защи́тницы.

И ны́не и при́сно и во ве́ки веко́в. Ами́нь.

Богородичен: Вся́к да отсту́пит нечести́вый, не почита́яй ико́ну честну́ю Богоро́дицы, и Сию́ не пропове́дуяй, Христа́ Богому́жно ро́ждшую, и во о́гнь да отшле́тся сгара́ти несожже́нно.

Та́же седа́лен отце́в, гла́с 4.

Свети́льницы пресве́тлии и́стины Христо́вы ми́ру яви́стеся на земли́, вои́стинну блаже́ннейший отцы́ боговеща́ннии, изсуши́вше е́реси ху́льных языкобо́лий и угаси́вше пламенови́дная злосла́вных смуще́ния. Те́мже я́ко иера́рси Христо́вы моли́теся спасти́ся на́м.

Сла́ва, и ны́не, Богородичен:

Ско́ро на́с предвари́, Де́во Ма́ти Чи́стая; от вра́г на́с исхити́, ху́лящих на Тя́, сокруши́ языкобо́лия ересе́й вся́, разреши́ кре́постию Твое́ю стремле́ния те́х, да разуме́ют, я́ко еди́на Богома́ти еси́, моли́твами Твои́ми правосла́вных совокупле́ние спаса́ющая.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Святии отцы, моли́те Бо́га о нас.

Глаго́л Бо́жий иму́ще, стрелу́ и ме́чь, вся́ ку́пно ты́я закала́ют злоу́мныя о́бразом кре́стным, не чту́щия ра́вно изображе́ния Христо́ва, Богоро́дицы и все́х святы́х, отцы́ богови́днейшии.

Припев: Святии отцы, моли́те Бо́га о нас.

Якоже седмию́ труба́ми Иерихо́нския сте́ны в седмо́м обхожде́нии падо́ша; та́ко си́ми седмию́ Собо́ры ве́сь со́нм, на Бо́га вознося́щийся, низведе́н в бе́здну в собра́нии седмо́м благогла́сных тру́б Ду́ха.

Сла́ва Отцу́ и Сы́ну и Свято́му Ду́ху:

Юношеское настоя́ние показу́я и боже́ственною ре́вностию распаля́емо, оте́ческое мно́жество, я́коже Илия́, сту́дныя свяще́нники умертви́ло е́сть. Те́м со дерзнове́нием Христо́ве ико́не любе́зно покланя́тися научи́ло е́сть.

И ны́не и при́сно и во ве́ки веко́в. Ами́нь.

Богородичен: Ты́ моя́ наде́жда, Всечи́стая, Ты́ мое́ и пе́ние, Ты́ мое́ приста́нище, Ты́ мое́ исправле́ние, я́же Бо́га Сло́ва Отча Вопло́щшагося несочта́нно родила́ еси́. Те́мже Твое́й несомне́нно покланя́юся ико́не, кре́постию Твое́ю укрепля́емь.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святии отцы, моли́те Бо́га о нас.

Высо́кою мы́слию сразсмотри́вше, ана́феме образобо́рцев преда́ша, я́ко чужда́я си́х му́дрствовавших, честни́и отцы́; и че́сть Христо́ве ико́не, я́коже ле́по, воздая́ти повеле́ша.

Сла́ва Отцу́ и Сы́ну и Свято́му Ду́ху:

Ны́не вре́мя весе́лия, ны́не де́нь спасе́ния яви́ся, возвесели́мся у́бо и Христу́ ра́достно возопии́м: ми́р да́ждь на́м Тво́й моли́твами отце́в Седма́го Собо́ра, Человеколю́бче.

И ны́не и при́сно и во ве́ки веко́в. Ами́нь.

Богородичен: Благоутро́бия ра́ди ми́лости, от Де́вы роди́ся Сы́н Бо́жий невра́щно, чу́ждее нося́, я́ко Свое́, и зра́ком си́м опи́санный, зри́тся во́лею, по Существу́ Сы́й неопи́сан.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святии отцы, моли́те Бо́га о нас.

Да ка́плют сла́дость го́ры и ра́дость: ерети́ческое бо мно́жество изгна́ся, го́рький излива́ющее я́д, святы́х ико́н отверже́ние.

Сла́ва Отцу́ и Сы́ну и Свято́му Ду́ху:

Не́бо и земля́ согла́сно да пра́зднуют Дще́ре Бо́жия вели́чие: и́бо велича́ется, отмета́ющи Сию́ умаля́ющия.

И ны́не и при́сно и во ве́ки веко́в. Ами́нь.

Богородичен: Ма́терний Сы́н, Иже Отчий пе́рвее безма́терен, безо́тчий же боголе́пно роди́вся и возроди́в мя́; те́мже Ро́ждшую с Рожде́нным образу́я, облобыза́ю.

Конда́к, гла́с 6.

Иже из Отца возсия́в, Сы́н неизрече́нно из Жены́ роди́ся сугу́б естество́м, Его́же ви́дяще, не отмета́емся зра́ка изображе́ния, но, сие́ благоче́стно начерта́юще, почита́ем ве́рно. И сего́ ра́ди и́стинную ве́ру Це́рковь держа́щи, лобыза́ет ико́ну вочелове́чения Христо́ва.

Икос:

Хотя́й Всеще́дрый Бо́г на́с воздвиза́ти при́сно к па́мяти соверше́нней Своего́ вочелове́чения, подло́г се́й предаде́ челове́ком, шароде́ланьми ико́н честны́й возобража́ти зра́к; я́ко да сия́ во зре́ниих ви́дяще, ве́руем, я́же сло́вом слы́шахом, разуме́юще я́ве дея́ние и и́мя, начерта́ние и страда́ния святы́х муже́й, и Христа́ Венцода́вца, венцы́ подаю́ща святы́м, страда́льцем же и му́чеником. Ихже ра́ди ясне́йше и́стинную ве́ру держа́щи, Це́рковь лобыза́ет ико́ну вочелове́чения Христо́ва.

Пе́снь 7.

Ирмос: Бо́жия снисхожде́ния о́гонь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Припев: Святии отцы, моли́те Бо́га о нас.

Побежда́ются догма́тами богоглаго́ливых муже́й ересенача́льницы, образо́в че́сть первообра́зным изобразу́ющих пра́во, я́коже рече́ Вели́кий Васи́лий; благослове́н Бо́г оте́ц на́ших.

Припев: Святии отцы, моли́те Бо́га о нас.

Хра́ми удобря́ются, све́тлыми ико́нами украша́емии дне́сь; сего́ ра́ди ми́р в Це́рквах, па́че все́х челове́к красне́йшему добро́тою, совоспева́ет пою́щему: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Све́т облиста́, дале́че тма́, нечести́вии отгна́ны. Сего́ ра́ди вся́ческая све́та испо́лнишася, Светода́теля Христа́ с весе́лием пою́т и глаго́лют: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Пречи́стая Влады́чица, еди́на все́х спасе́ния наде́жда, я́же стра́шно ро́ждшая Царя́ царе́й Христа́, на рука́х Свои́х Сего́ Младе́нца нося́щи, спокланя́ема е́сть опи́санне, я́коже отцы́ глаго́лют.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святии отцы, моли́те Бо́га о нас.

Законополага́ет у́бо изя́щнейше отце́в сосло́вие, богочести́вым имстви́тельное поклоне́ние и возставле́ние свяще́нныя ико́ны Христо́вы; любоблагочести́вии же ле́тнюю па́мять я́ко ча́да соверша́ем благопослушли́вая о́ных, и любо́вию о́браз Христо́в лобыза́ем.

Припев: Святии отцы, моли́те Бо́га о нас.

Седмокра́тно преклоня́ху смире́нных высокому́дреннии и любодоброде́тельных стремле́ния пресеца́ху, и́миже оглаго́ловаху боже́ственная дея́ния и́х; но и́же Седма́го Собо́ра соше́дшиися отцы́ в Нике́и горды́ню о́ных а́бие истерза́ша седмокра́тнейше.

Сла́ва Отцу́ и Сы́ну и Свято́му Ду́ху:

Стре́лы младе́нец быва́ют, псало́мски, старому́дрствующим младому́дренных я́звы и ра́ны; Боже́ственною же си́лою изнемога́ют язы́цы мно́зи, хулы́ на высоту́ глаго́лющих; и вся́к, кто́ Отца́ Сы́на и Ду́ха, Бо́га Еди́наго, не ве́сть, Всевино́внаго и Еди́наго.

И ны́не и при́сно и во ве́ки веко́в. Ами́нь.

Богородичен: Зи́ждется Младе́нец самово́льне ми́лости ра́ди, Зижди́тель от чи́стых крове́й Твои́х, соблюда́яй Тя́ по рождестве́ Преочище́нну всю́ Чи́стую и очища́яй оскверне́нный о́браз. Те́мже на ико́нах соизобража́ется Тебе́, естество́м бы́в Челове́к, Бо́г Сы́й естество́м.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Святии отцы, моли́те Бо́га о нас.

Ве́лий кре́постию и сове́том вся́ содержа́й, Непостижи́ме Еди́не Бо́же, держа́внейше Всенача́льниче, Всецарю́, Це́рковь утверди́, в правосла́вии Твое́м соблюда́я, отце́в всесла́вных, изоблича́ющих злосла́вие, мольба́ми.

Припев: Святии отцы, моли́те Бо́га о нас.

Вели́ких че́стей сподо́бистеся на земли́, небому́дрении святи́и, я́ко Христо́во изображе́ние любе́зно почто́сте. И ны́не се́нь отложи́вше, и покрыва́ло пло́ти, самоли́чно Сего́ в лице́ зрите́, и бо́льших сподобля́еми.

Сла́ва Отцу́ и Сы́ну и Свято́му Ду́ху:

Да нака́жемся всево́инством ва́рварскаго безслове́сия, е́же попусти́л еси́ на ны́; те́х стремле́ние и де́рзость Са́м сокруши́, наде́ющемуся на Тя́, Вседе́телю, благодерзнове́нными моли́твами святы́х оте́ц, и́хже соверша́ем па́мять.

И ны́не и при́сно и во ве́ки веко́в. Ами́нь.

Богородичен: Разуме́ти та́йну стра́шнаго Твоего́ Рождества́ ника́коже мо́жет у́м челове́ческий, но ниже́ Ангельский высоко́мный, я́ко Бо́га Ты́ родила́ еси́ Воплоще́ннаго, па́че естества́. Те́м Тя́, Богоро́дицу, ве́дуще и со Онем напису́юще, велича́ем.

Свети́лен отце́в.

Отцы́ небому́дреннии, на Седмо́м Собо́ре собра́вшиися, моли́тву приле́жну Тро́ице принеси́те, е́же изба́витися от вся́кия е́реси и суда́ ве́чнаго, Ца́рствие же получи́ти на́м небе́сное, ва́ш Собо́р боже́ственный воспева́ющим.

Молитва

К вам, о святи́и отцы, я́ко путево́дным свети́льникам, дея́ньми свои́ми освети́вшим путь Небе́снаго восхо́да, аз многогре́шный смире́нно коле́на се́рдца моего́ преклоня́ю и из глубины́ души́ взыва́ю: умоли́те о мне Человеколю́бца Бо́га, да не попу́стит ми еще́ блужда́ти по распу́тиям греха́, но да просвети́т мои́ ум и се́рдце све́том благода́ти Своея́, я́ко да то́ю озаря́ем и подкрепля́ем, возмогу́ про́чее вре́мя земна́го жития́ пра́вою стезе́ю непреткнове́нно преити́ и хода́тайством ва́шим к Преблаго́му Го́споду сподо́блюся, поне́ вма́ле прича́стник бы́ти духо́вныя ва́шея трапе́зы в Небе́сном черто́зе Царя́ сла́вы. Ему́же со Безнача́льным Его́ Отце́м и Пресвяты́м, Благи́м и Животворя́щим Ду́хом бу́ди сла́ва, честь и поклоне́ние во ве́ки веко́в. Ами́нь.