23 октября.

Канон Святым 26-ти преподобномученикам Зографским.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1.

Житие́ по́стничеством че́стно проше́дше во оби́тели Зогра́фстей, по́лче преподо́бный, до́блии отцы́ два́десять и ше́сть, же́ртву принесо́стеся Бо́гу, тве́рдым во огни́ мудрова́нием благоче́стия. Те́мже и прия́сте сугу́бый вене́ц от Го́спода Бо́га, сла́ву Венча́вшему ва́с возсыла́юще.

Иной тропарь, гла́с 4:

Честни́и преподобному́ченицы дне́сь, по до́лгу чту́ще, восхва́лим ле́тний пра́здник ва́ш, я́ко благи́х на́м вино́вный, и всено́щная соверша́юще, пое́м: Ду́ха пропове́дницы, Тро́ицы ве́рнии служи́телие, те́пле моли́теся о на́с ко Го́споду.

Велича́ние святы́м:

Ублажа́ем ва́с, святи́и преподобному́ченицы, и чте́м святу́ю па́мять ва́шу, наста́вницы мона́хов, и собесе́дницы Ангелом.

Стихи́ра, гла́с 2:

Вме́сто тле́нных и преходя́щих, нетле́нная и пребыва́ющая возлюби́вше, и вме́сто земны́х небе́сная предпоче́тше, преподобнострада́льнии отцы́, чту́ще ва́с, от ва́рварских нахожде́ний, и разбо́йнических нападе́ний и наше́ствий изба́вите, мо́лимся, да при́сно почита́ем па́мять ва́шу всечестну́ю.

Ин кано́н святы́х, гла́с 4:

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Святии преподобномученицы, моли́те Бо́га о нас.

Скве́рными устна́ми восхвали́ти произво́лив боже́ственное собра́ние преподобнострада́льцев Христо́вых, молю́ Тя́, Спа́се, да́ти ми́ сло́во и благода́ть, соплести́ те́м похвалу́.

Припев: Святии преподобномученицы, моли́те Бо́га о нас.

Похва́лим дне́сь преподобнострада́льцев сочета́ние, два́десять и ше́сть, тве́рдых адама́нтов, обличи́вших злоче́стие лати́н и сме́рть непра́ведную претерпе́вших.

Сла́ва Отцу́ и Сы́ну и Свято́му Ду́ху:

Па́стырь изря́днейший Фома́ досто́йно да почти́тся дне́сь, и боже́ственный Иа́ков, и Варсану́фий, Си́мон, Кири́лл, Мина́ и Киприа́н, со все́ми ины́ми да возвеселя́тся.

И ны́не и при́сно и во ве́ки веко́в. Ами́нь.

Богородичен: Све́та невече́рняго исто́чник, ве́дуще Тя́, Всепе́тая, мра́к ду́ш и теле́с разреши́ луча́ми Твои́ми, и зре́ти сподо́би Того́, Влады́чице, мо́лимся.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Припев: Святии преподобномученицы, моли́те Бо́га о нас.

Ангелы удиви́ боже́ственный ли́к преподо́бных, претерпе́в о́гненное на столпе́ сожже́ние, де́моны же посрами́шася, ве́рнии же до́блести и́х ра́достно похвали́ша.

Припев: Святии преподобномученицы, моли́те Бо́га о нас.

Вельми́ просла́ви ва́с Христо́с, отцы́ всечестни́и, и на небеси́ и на земли́, я́ко по́стничествовавших пре́жде, последи́ же пострада́вших, те́мже почита́ем дне́сь благознамени́тую па́мять ва́шу.

Сла́ва Отцу́ и Сы́ну и Свято́му Ду́ху:

Да воспое́тся Па́вел и Са́вва, Мартиниа́н же тве́рдый, и Се́ргий с Си́моном, и Дометиа́н ку́пно со все́ми, я́ко обличи́вшии лати́нское безу́мие.

И ны́не и при́сно и во ве́ки веко́в. Ами́нь.

Богородичен: Ви́дети све́та Твоего́ лучи́, сподо́би, Влады́чице Чи́стая, любо́вию к Тебе́ припа́дающия, воздержа́нием и приле́жным моле́нием, разреши́вши мра́к страсте́й глубоча́йший.

Седа́лен, гла́с 8.

Кре́ст Христо́в на ра́мо взе́мше, блаже́ннии отцы́ два́десять и ше́сть, по́стничеством к нему́ прилепи́стеся, но вра́г, зави́дяй доброде́тельному житию́ ва́шему, воздви́же на вы́ суро́выя лати́ны, мня́ осла́бити по́стничества ва́шего тве́рдость, но обличи́ся того́ ухищре́ние, я́ко изря́днейше пострада́вше, моли́теся Христу́ Бо́гу прегреше́ний оставле́нию дарова́тися, пра́зднующим любо́вию святу́ю па́мять ва́шу.

Сла́ва, И ны́не, Богородичен:

Солнцезра́чная колесни́це Дави́дова, порфиропо́сланный о́др Соломо́нов, сви́ток богоначерта́нный Иса́иин, и одушевле́нная ски́ния Моисе́ева, и стена́ адама́нтская Аммо́сова, Ты́ была́ еси́, свети́льник златокова́нный Заха́риев, Дании́лова же гора́, дщи́ца желтобе́лая Авваку́мова, и превосхо́дное проро́ков оглаше́ние. Моли́ся Сы́ну Твоему́ и Бо́гу, прегреше́ний оставле́ние дарова́ти, благогове́йно покланя́ющимся боже́ственному о́бразу Твоему́.

Пе́снь 4.

Ирмос: Неизсле́дный Бо́жий сове́т, е́же от Де́вы воплоще́ния Тебе́, Вы́шняго, проро́к Авваку́м, усмотря́я, зовя́ше: сла́ва си́ле Твое́й, Го́споди.

Припев: Святии преподобномученицы, моли́те Бо́га о нас.

Возвесели́мся духо́вно, па́мять соверша́юще благознамени́тую преподобнострада́льцев, и честны́х наста́вников оби́тели на́шея, моли́твами те́х от лю́тых избавля́еми.

Припев: Святии преподобномученицы, моли́те Бо́га о нас.

Красу́йся ны́не, боже́ственная оби́тель Зогра́фская свяще́нными твои́ми о́трасльми, преподобнострада́льцами два́десять и шестьми́, папослужи́телей злочести́вых, с высоты́ столпа́ посрами́вшими.

Сла́ва Отцу́ и Сы́ну и Свято́му Ду́ху:

Му́жеством и благода́тию укрепи́вся по́лк преподо́бных, упраздни́ кова́рства безпло́тных враго́в, и папи́стов низложи́ блядосло́вие, нече́стия испо́лненное.

И ны́не и при́сно и во ве́ки веко́в. Ами́нь.

Богородичен: Чи́стая безневе́стная, Ма́ти Бо́жия, спаса́й Твое́ ста́до безвре́дно от вся́каго зла́ и лю́тых наведе́ния, Тя́ бо во обстоя́ниих и́мамы рабы́ Твои́ избавле́ние.

Пе́снь 5

Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Припев: Святии преподобномученицы, моли́те Бо́га о нас.

Тле́нную и удобоувяда́емую жития́ красоту́, преподо́бнии отцы́, позна́вше, Христо́вою любо́вию уязви́стеся, ны́не же неизрече́нныя ра́дости в Боже́ственных селе́ниих наслажда́етеся, блаже́ннии.

Припев: Святии преподобномученицы, моли́те Бо́га о нас.

Истинно ны́не возсия́ све́т Боже́ственныя благода́ти, и́стинно дне́сь нетле́нная пи́ща, жизното́чная ма́нна, предлага́ется на́м, све́тлая па́мять боже́ственных предста́телей на́ших; жела́ющии наслади́теся.

Сла́ва Отцу́ и Сы́ну и Свято́му Ду́ху:

Безсме́ртное благосла́вие купи́сте, сла́внии, кончи́ною привре́меннаго огня́, ма́лая на вели́кая измени́вше. О, ку́пли прему́дрыя! Те́мже ны́не ра́дуетеся с преподо́бными и му́ченики.

И ны́не и при́сно и во ве́ки веко́в. Ами́нь.

Богородичен: Свети́льниче све́тлый Све́та пе́рваго, просвети́ ду́шу мою́ несве́тлую све́том Твои́м, да па́ки Све́т узрю́ пе́рвейший, Иже от Тебе́ просвети́ на́с, и Тебе́, мою́ Просвети́тельницу, сие́ бо све́та сво́йство.

Пе́снь 6.

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припев: Святии преподобномученицы, моли́те Бо́га о нас.

По́чести трудо́в, всепреподо́бнии отцы́ два́десять и ше́сть, прия́сте, пострада́вше, и благода́тными дарова́ньми ва́с венцеда́вец Христо́с украси́.

Припев: Святии преподобномученицы, моли́те Бо́га о нас.

Ихже о́ко не возмо́же ви́дети, и у́хо слы́шати, всесла́внии, и у́м челове́ческий разуме́ти, я́коже писа́ся, си́х на небесе́х в жре́бии сподо́бистеся.

Припев: Святии преподобномученицы, моли́те Бо́га о нас.

Оби́тели Зогра́фския храни́тели, предста́тели и покрови́тели, дне́сь восхва́лим преподобнострада́льныя два́десять и ше́сть, пра́зднественное составля́юще торжество́.

Сла́ва Отцу́ и Сы́ну и Свято́му Ду́ху:

Па́мять ва́шу благознамени́тую соверша́юще, преподобнострада́льнии, дне́сь, мо́лим оби́тель сию́ и и́ночествующия соблюди́те и изба́вите от скорбе́й.

И ны́не и при́сно и во ве́ки веко́в. Ами́нь.

Богородичен: Разли́чная дарова́ния иму́ще, отцы́, разли́чных напа́стей на́с изба́вите, и сомоли́твенники Влады́чицу и Косму́ прии́мше, па́ству ва́шу соблюди́те.

Конда́к, гла́с 8.

Оби́тели на́шея предста́тели и храни́тели, свяще́нныя преподобнострада́льцы два́десять и ше́сть, лати́нскую горды́ню низложи́вшия, и о́гненное сожже́ние претерпе́вшия, и венча́нныя досто́йно, восхва́лим, вопию́ще: ра́дуйтеся, преподобнострада́льнии.

Икос:

Ангелы удиви́шася, с небесе́ зря́ще безбо́жное стремле́ние лати́н, ка́ко преподо́бныя во огни́ испепеля́ху благоче́стия ра́ди; и́же и умре́ти благоче́стно изво́лиша, и мучи́телеву бро́вь низложи́вше, слы́шат от на́с такова́я: ра́дуйся, ли́че преподобнострада́льных; ра́дуйся, тве́рдое ополче́ние многострада́льных; ра́дуйся, двадеся́тице с шестери́цею преподо́бных; ра́дуйся, Фомо́, с про́чими му́ченики; ра́дуйся, боже́ственный Варсану́фие с Михе́ем тве́рдым; ра́дуйся, Дометиа́не, Ми́но с Па́влом све́тлым; ра́дуйся, со Анто́нием Евфи́мие и Иларио́не; ра́дуйся, с Парфе́нием, Си́моне и Ио́сифе; ра́дуйся, дво́ице Иа́ковов ку́пно с Иоанни́кием; ра́дуйся, Мартиниа́не, ку́пно с Космо́ю и Се́ргием; ра́дуйся, Киприа́не, Кири́лле, Иове и Са́вво сла́внии; ра́дуйся, четвери́це сла́вная све́тлых страстоте́рпцев; ра́дуйтеся, преподобнострада́льнии.

Пе́снь 7.

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Святии преподобномученицы, моли́те Бо́га о нас.

Возлюби́вше Бо́га я́коже мо́щно, преподо́бнии, и поучи́вшеся в Боже́ственном Его́ зако́не, досто́йно ны́не почита́ются.

Припев: Святии преподобномученицы, моли́те Бо́га о нас.

Да совоспле́щут ны́не с земны́ми небе́сная, да возвесели́тся со Ангелы естество́ челове́ческое. Челове́цы бо небе́снии, Ангелы земни́и, небому́дреннии отцы́, пострада́вше до́блественно, пра́зднуеми су́ть.

Сла́ва Отцу́ и Сы́ну и Свято́му Ду́ху:

Ублажа́ются, отцы́, по́двиги ва́ши и боре́ния, и́миже честна́я прия́телища Ду́ха яви́стеся, я́коже Ангелы пострада́вше за пра́вое мудрова́ние и почита́етеся во ве́ки.

И ны́не и при́сно и во ве́ки веко́в. Ами́нь.

Богородичен: Благоче́стно воспева́ющих Тя́, Богоро́дицу, Госпоже́ Влады́чице, грехо́внаго лю́таго мра́ка ско́ро премени́, мо́лимся, ча́сти же и ра́дости Тобо́ю просвеще́нных, сподо́би.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Святии преподобномученицы, моли́те Бо́га о нас.

Сосу́ды избра́ннии, чесни́и, я́вльшеся, све́тло го́рнее сия́ние прия́сте, и к селе́нием и́стинно небе́сным ра́достно потеко́сте, облиста́еми благода́тию Боже́ственныя Тро́ицы, Юже пе́сньми пое́те во вся́ ве́ки.

Припев: Святии преподобномученицы, моли́те Бо́га о нас.

Ра́вное соверши́вше тече́ние, отцы́ преподобнострада́льнии, и ра́вная пра́ведным венцы́ от Христа́ прия́сте на небесе́х, блаже́ннии, Фомо́ со все́ми, сра́дующеся Ангельским лико́м, па́мять у́бо твори́те о благохва́лящих ва́с.

Сла́ва Отцу́ и Сы́ну и Свято́му Ду́ху:

Тро́ичен: Со все́ми го́рними во́инствы, Отца́ и Сы́на и Ду́ха Свята́го, трисве́тлое, неразде́льное, несозда́нное Божество́, еди́ное власти́тельное, нача́льство и ца́рство песносло́вяще: Свя́т, Свя́т, Свя́т, вопие́м неусы́пною любо́вию.

И ны́не и при́сно и во ве́ки веко́в. Ами́нь.

Богородичен: Словесы́ и догма́ты, Де́во, Чи́стую Богоро́дицу Тя́ пропове́давшии, Бо́га во пло́ти неизрече́нно роди́вшую; и челове́ческое Обожи́вшаго естество́ в ложесна́х Твои́х, пе́сньми да чту́тся досто́йно с Тобо́ю, Богоро́дице, два́десять и ше́сть отце́в.

Песнь 9

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Святии преподобномученицы, моли́те Бо́га о нас.

Во све́те мы́сленнем, му́дрии, водворя́ющеся, пе́снь приими́те, ю́же ва́м прино́сим, мно́гаго ра́ди до́лга, и́мже до́лжни есмы́, и воздая́ния про́сим прегреше́ний оставле́нию дарова́тися, ва́шими моли́твами, досто́йно ва́с почита́ющим.

Припев: Святии преподобномученицы, моли́те Бо́га о нас.

Положи́ ва́с Бо́г, преподобнострада́льнии, я́ко незы́блемая оби́тели се́й предсто́лпия, в после́дняя времена́, на непримири́мыя враги́. Ко́сти же ва́ша всечестны́я, я́ко ка́мень претыка́ния сопроти́вным даде́, правосла́вную ве́ру при́сно укрепля́я, сла́внии.

Припев: Святии преподобномученицы, моли́те Бо́га о нас.

Утоли́те бу́рю лю́тых ва́рвар, воздвиза́емую на на́с, всепреподо́бнии, уста́вите церко́вныя раздо́ры, певце́м да́руйте прегреше́ний оставле́ние, оби́тель же невреди́му сохрани́те от вся́каго лю́таго обстоя́ния.

Сла́ва Отцу́ и Сы́ну и Свято́му Ду́ху:

Тро́ичен: Всевы́шний Бо́же, Отче, Сы́не, и Ду́ше, Тро́ице равноче́стная, моли́твами преподо́бных Твои́х, сохраня́й свяще́нную оби́тель на́шу от вся́каго озлобле́ния, па́стве же Твое́й непоколеби́мое, непрекло́нное и ми́рное пода́ждь состоя́ние.

И ны́не и при́сно и во ве́ки веко́в. Ами́нь.

Богородичен: Тя́, я́ко вои́стинну, прия́телище Ду́ха яви́лася еси́, Влады́чице: Бо́га бо, Его́же не́бо и земля́ вмести́ти отню́д не мо́жет, во чре́ве Твое́м вмести́ла еси́. Сего́ уми́лостиви, преподо́бных и Твои́ми моли́твами, о все́х на́с, воспева́ющих Тя́.

Свети́лен.

Оби́тели на́шея предста́тели, дне́сь све́тло восхва́лим преподобнострада́льныя отцы́, низложи́тели пре́лести лати́н и пропове́дники ве́ры правосла́вныя, и́же огне́м испепели́вшеся, всесожже́ния боже́ственная принесо́стеся Тро́ице.

Сла́ва:

Предста́телей ва́с, прему́дрии, стяжа́хом и храни́телей свяще́нныя оби́тели на́шея, те́мже све́тло соверша́ем па́мять ва́шу благознамени́тую, пе́сньми ва́с почита́юще: вы́ бо, Го́спода просла́вльше, ны́не досто́йно со Ангелы почита́еми есте́.

И ны́не, Богородичен:

Всецари́це Богоневе́сто, Благослове́нная Влады́чице, Ма́ти Царе́ва, цве́те де́вства, Ангелов благоле́пие, небе́сных украше́ние, вели́кое прибе́жище, пое́м Тя́, Пресвята́я, я́ко Спаси́тельницу ми́ра.

Молитва

Святи́и му́ченицы Зографскии! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.